مغتربات أمريكا وبريطانبا .. بلييييز دشوا

[رويدا]

السلام عليكم .. شلونكم يا مغتربات .. الله يصبركم علي غربتكم ويشرح صدوركم .. وترجعون غانمين سالمين لديرتكم .. اللهم آمين



بصراحه انا عندي مشكله وان شالله ألقي الحل عندكم


أنا انسانه جامعيه صار لي تقريبا 7 سنين من تخرجت من الجامعه .. لكن أواجه صعوبه كبيره باللغه الانجليزيه ....

لما كنت بالجامعه كان مستواي جيد وأقدر أمشي حالي ... ومن تخرجت أصبحت بالانجليزي ميييييح


وبصراحه هذا يعرضني لمواقف محرجه مع الاشخاص اللي أصادفهم مثلا ويسألوني عن مكان أو مساعده

وما أعرف أرد عليهم بالانجليزي .. مشكلتي مهما تعلمت أنسي الكلمات .. دخلت واايد معاهد لغه لكن ما كوفايده


يمكن تقولون مارسي اللغه وانتي ما تنسين .. زين وين أمارسها ومع منو وكل المحيطين فيني عرب

لاني بالكويت ..

ودي أصير بلبل بالانجليزي .. بس شلون؟؟


وما أنسي أحراجي لما سافرت لندن .. ودخلت محل لبيع الاحذيه عزكم الله وحاولت أتحاور مع البياعه بس انحرجت وطلعت بدون ما أشتري


بنات أنا صج أعاني والله لاني أحس اني مجتهده بس شلون الطريق الصحيح .. ياريت تنقلون لي خبرتكم .. ولكم الاجر انشالله .. وشكرا

 

[رويدا]

ما شالله 13 وحده تطمشت علي الموضوع .. ولا وحده فيهم ردت .. عيني عليكم بارده

 

[حبيبتي لندن]

هلا اختي , صادقه اللغه الانجليزيه لازم تمارسيها علشان ماتنسيها .
طيب تابعي البرامج باللغه الانجليزيه و حاولي تمارسي اللغه الانجليزيه مع الفلبينيات والاجانب الي يتكلموا انجليزي سواء في المستشفيات او المدارس .

 

[لابسة نظارة!]

صاادقة اللغة يبغى لها ممارسة!!

انا تقريبا ضد الا يقول روح معاهد والخ .. ما ينفع لازم يكون فيه ممارسة .. اذا الي حواليج عرب شلون يتعلم الواحد!!

اذا انا الي في امريكا وانا لغتي مو ذاك الزود .. يعني اتكلم بطلاقة صحيح في بعض الامور والحياة اليومية .. لكن فيه بعض المواضيع ابلم فيها!

انا اقترح عليج تاحذي لج كورس لغة في الخارج .. يعني امريكا ولا كندا ولا بريطانيا وتحاولي تحتكي بالعالم هناك تطلعي وتروحي وتجي مع الوقت رح ينطلق لسانج ان شاءالله

 

[عيون&الريم]

رد : رد: مغتربات أمريكا وبريطانبا .. بلييييز دشوا

صاادقة اللغة يبغى لها ممارسة!!

انا تقريبا ضد الا يقول روح معاهد والخ .. ما ينفع لازم يكون فيه ممارسة .. اذا الي حواليج عرب شلون يتعلم الواحد!!

اذا انا الي في امريكا وانا لغتي مو ذاك الزود .. يعني اتكلم بطلاقة صحيح في بعض الامور والحياة اليومية .. لكن فيه بعض المواضيع ابلم فيها!

انا اقترح عليج تاحذي لج كورس لغة في الخارج .. يعني امريكا ولا كندا ولا بريطانيا وتحاولي تحتكي بالعالم هناك تطلعي وتروحي وتجي مع الوقت رح ينطلق لسانج ان شاءالله

انا ايدهاا اخذي كورس لغه في الخارج:rerrerek:

 

[kuwait_queen82]

اللغه ماينفع بدون ممارسه لو تيبلج قاموس و تتسمعين طريقه لفظ الكلمه هم شي حلو
اشتري هلدكشنري وايد ممتاز للنطق الكلمات بلهجه البريطانيه و الامريكيه و كل يوم على الالق حفظي 5 كلمات و الي حلو فيه ايبلج جمل فيها الكلمه و ينطق الجمله كامله

تلاقينه في مكتبه جرير الي بحولي بارك

 

[رويدا]

مشكورين بنات علي اقتراحاتكم .. اني أسافر وآخذ كورس فكره فكرت فيها من زمااان .. لكن للأسف ما عندي أحد أروح معاه

وما أقدر أسافر بروحي .. فعلا الحل بالممارسه ..

 

[رويدا]

اللغه ماينفع بدون ممارسه لو تيبلج قاموس و تتسمعين طريقه لفظ الكلمه هم شي حلو
اشتري هلدكشنري وايد ممتاز للنطق الكلمات بلهجه البريطانيه و الامريكيه و كل يوم على الالق حفظي 5 كلمات و الي حلو فيه ايبلج جمل فيها الكلمه و ينطق الجمله كامله

تلاقينه في مكتبه جرير الي بحولي بارك

مشكوووره حبيبتي واايد.. راح أحاول أحصل الديكشنري وان شالله يفيدني :eh_s(17):

 

[عشق ريلها]

والله مشكلتج مو هينه رووحي قووقل في ترجمه اضغطي عليه
اكتبي اي كلمه ماتعرفين شمعنااها يطلعلج المعنى بالانجليزي وباي لغه تبيهاا
وتنطقلج اياها الصراحه يوم دخلت ترجمة قوقل وانا يعني يمشي حاالي بالانجلش
والله يوفقج

 

[زينة 66]

اني اعرف موقع وممكن ارسله عل ايميلك

 

[طلة نجمه]

حبيبتى اخذى كتاب تعلم اللغه الانجليزيه وكل يوم اقرى ترى وايد سهل وسلس وبسرعه تحفظين الكلمات والله يعينج

 

[منورة الكويتية]

نصيحه تابعي البرامج الاجنبيه والمسلسلات وتسمعي عدل بدون ماتقرين الترجمه هالشي بيفيدج وايد

 

[ترف بابا]

كثري من قراءة القصص والمجلات وسماع الراديو والتلفزيون بالانجليزي وشوي شوي تندمجين

 

[dream_q8]

انا مع منوره وهذا اللي خلاني بلبل بالانجليزي وما انسى لمارحت امريكا مع زوجي اللي حوالي يحسبون الي دارسه لغه
بس اهم شي الافلام والبرامج بدون ترجمه عشان تركزين والجرئه في التحاور مع الي حواليج

 

[لولوة الكويتية]

اب



اب

 

[سامرينا]

نفس ما قالوا البنات طالعي افلام و برامج بدون ترجمه

اقري جرايد وقصص بالانجلش ولا تحاولين ترجمين الكلمات لانج راح تعرفين معناها من الجمله

ثاني شغله الممارسه مهمه حيل

 

[D.asmaa]

عليج بالافلام والمجلات لانه كلامهم عامي وبسيط واذا توهقتي بشي الحين كلنا تلفوناتنا متطوره نزلي معجم وترجمي وتكلمي لا تستحين ذاك اليوم بالسوق شفت صينيين والله ولا كلمه انجليزي بالاشاره ويطلع الصوره بتلفونه ويوريه البياع ويتفاهمون لا تخلين اللغه حاجز والا راح تتازمين