مطبخ .. بمواعين يديده بس ماعرف شي من وين اشتريها؟؟

[ana_q8eya]

شقتي في بيت حمولتي
المطبخ لونه ابيض
الكبتات ابيض
السقف ابيض
الارضيه ابيض
الثلاجه هم بيضا

وداخل الكبتات هم ابيض لانه ماكوووو شي



اقووووووول لكم فكرتي الجهنميه


راح اشتري الستيكر من ايكيا والصقهم على كبتات لمطبخ
واشتري اكسسزارات الفوط وقضبات حق باب الثلاجه والفرن
الكبتات بغير قضباتها

مره شايفه قضبات على شكل شوك وقفاش او فاكهه؟؟ احد يعرف وين شفتهم في شقة ناس نعرفهم بره الكويت وقالو انهم شارينها من الكويت ^_^

الحين انيي حق المشكله الكبيره


ابي موااعين
شنوو اشتري

جم جدر
جم ماعون
شنو ادوات المطبخ الي احتاج لها
الملاس القفاش
المشخال
امبيه
احس راسي مفتررر
والله لو احد يسالني يمكن اعرف ارد عليه بس احس الحين اني ضايعه!!
من وين اشتري شنو افضل النوعيات
وارخصها والي تتحمل الشغل

وانا احب شغل المطبخ ^_^

بس ماعرف شي منوو يسااااااااعدني ^_^


وعيدكم مبارك:klhfl:

 

[bnt_kwt]

اممممممم

شوفي ايكيا شغلاتهم اللي حق المطبخ حلوه وعمليه

جدور

طقم سجاجين

مكسر

خلاط

بايركسات

غوري عادي

يتبع

 

[bnt_kwt]

حق المروقات والشروبات والقلي اخذي من كل نوع حبتين

هذيل وايد يفيدون

ملال لهم غطا هم ينفعون

مقالي يبيلج

مشاخيل

الملح والفلفل

طقم صحون

 

[bnt_kwt]

عصاره الليمون والبرتقال عاديه ولا كهربائيه

صواني فرن



هذا طقم في بوادي وصحون وكامل

قلاصات
للضيوف

والاستعمال اليومي

هذيل القفاش الخشب احسن شي حق الحمسات عشان ما يختربون اجدورج ومقاليج

يتبع

 

[bnt_kwt]

هذا حق الشكر والجاي والقهوه

هاون



حق المواعين لما تغسلينهم

مايكرويف

قفاش وشواك وسجاجين مع القاعده اللي تنحط بالدرج

سله صغيرونه تحطين فيها المنظفات مالت المطبخ

بيوز حق الجدور

مبشاره

قطاعه اللحوم والخضار

يتبع

 

[bnt_kwt]

قشاره بطاط

صواني عاديه وللضيوف

علب بهارات

طقم ضيافه جاي وقهوه مع البيالات والفناجيل

غلايه الماي الكهربائيه

 

[bnt_kwt]

ان شاء الله يارب تكونين استفدتي
واي شي ناقص ان شاء الله البنات يذكرونج فيه

 

[bnt_kwt]

اي ونسيت اقولج
الاجهزه الكهرابيه تلقينهم بمركز سلطان السالميه اشحلاتهم وسيتي سنتر السالميه ولا شويخ
والصحون والكواب والقلاصات والقفاش والسجاجين وباجي الاغراض
تلقينهم بسنتر بوينت وايكيا والاسواق الشعبيه مثل المعلم وسيتي سنتر
واي شي راح اتذكره را ارد واحطه لج

 

[bnt_kwt]

للرفع
اشدعوه بنات وينكم البنت تبي منكم المساعده

44 وحده يدشون ولا وحده منهم ردت غيري انا

 

[ana_q8eya]

واي بعد عمري تسلم ايدج يالغاليه ماتقصرين

حصلت لي لسته حلوه بموقع وبحطها هم اذا احد يبي يستفيد
بس فديت روحج حطيتي الصور لانه صج مادري شنو ايب احس على بونه ملاس
بشتري كل الانواع:tomato2:




الفهرس
كتاب تجهيز مطبخ

• الأجهزة الرئيسية في المطبخ
1- الفرن
2- التكييف
3- الميكرويف
4- الخلاط (عصيرات+ البهارات + الكيك )
5- المسجل بدون اشرطة مايصير
6- التلفون
7- التلفزيون .. مو شي اساسي بس حلو
8- الثلاجة
9- الفريزر
10- طفاية حريق
11- علبة الاسعافات الأوليه
الشفاطه ثنتين فوق الجوله والي على الطوفه
ستارة


• أدوات الطبخ في المطبخ
1- القدور
2- المقالي (الأنواع والصفات والاستخدام )
3- الغواري
4- ملاعق طبخ كبيرة ( الأنواع والصفات والاستخدام )
5- السكاكين (الأنواع والصفات والاستخدام )
6- بايركس ومواعين للفرن
7- الصواني (الأنواع والصفات والاستخدام )
8- المشاخل (الأنواع والصفات والاستخدام )


• أدوات تجهيز الطعام
1- الصحون (الأنواع والصفات والاستخدام )
2- القنجه(ماعرف اسمها بالعربي)
3- البوادي (الأنواع والصفات والاستخدام )
حق الشوربه حق الحلويات
6- الفناجيل+استكانات (الأنواع والصفات والاستخدام )
7- قلاصات (الأنواع والصفات والاستخدام)
8- اكواب مشروبات ساخنه
المج اشكال حلوه
9- السلات (الأنواع ولصفات والاستخدام )
حق الخبز مثلا
10- الأشواك والملاقط (الأنواع والصفات والاستخدام )
ملقط سلطه او حق الكيك
أفضل انك تضع اطقم تجهيزالشاي و القهوة ( نقطة ثانية )




• أدوات المساعدة في المطبخ
1- المحراب العجين
2- لوح التقطيع
3- مقشرة البطاطس+ مبشرة الجبن + قطاعة البيض المسلوق
4- الصفاية
5- العصارة
6- المقص( مقص السمك + مقص " مفتاح" المعلبات المعدنية)
7- سلة الشوي
8- القفاز
9- فوط
10_ البيز
قطاعة بيتزا
هاون يدق الثوم
وعاء قياس ملل
ميزان
جراخه(حق اللبن)
سباجولا.... ملعقة مالت الحلو وخلط العجين
مبشرة خضار الي على شرايح
ومصفاة حق عصير ومعجون الطماط
فرشاة لدهن



• الكماليات والأجهزة الكهربائية
1- حافظات البهارات
2- حافظات الطعام
3- حافظات الملاعق والأشواك والسكاكين
4- سلة المناديل
5- شواية بريد
6- شواية كهربائية (لحم ، دجاج ، السمك)




• أدوات وأجهزه تنظيف المطبخ
1- غسالة صحون
2- قفاز الغسيل
3- صابون
4- الممسحة
5- المكنسة
6- ليف غسيل
7- مواد تنظيف وتعقيم الأجهزة وأدوات المطبخ
8- سلة المهملات

* ديكورات
1- الساعة
2- مناظر
3- مفارش
4- لاصقات الثلاجة ...

فيه اشياء مثل " الالمنيوم (القصدير) ، التغليف الشفاف، مفارش السفرة ..
----------------


كل هذا طابعتهم وببتدي بالاساسيات:ada:

ولابد يكون في نواقص تكمل مع الايام ^_^

بس في شي مهم نسيته ولا بس غطيت على كل شي؟!؟!؟

 

[ana_q8eya]

اي اقول شغله انا اروح اشتري من المعلم والاسواق الشعبيه ماعندي مانع

بس حق الاكل صراحه ما اجازف اخاف شغله اي شي الحديد الجدور اتطلع ريحه ولا اتطلع سموم على الاكل

شوفي يعني شي ينوكل ولا ينشرب فيه ماراح اششتريه من اماكن شعبيه

اما اذا اكسسوارات وغيرها لا عادي ....

ابي شنو احسن نوع مقلاه
وانواع الجدور


اووووووو صج جدر هريس وااي يحلوي وانا اسوي هريسه حدي ماعرف... مزهبه الدوا قبل الفلعه ^_^




ماظن بشتري جدور وايد بس يمكن 3 كبير او وسط وصغير
المقلاة نفس الشي
كبيره او وسط وصغيرة
و حق الحليب
او وحده حق القهوه التركيه

اتوقع التيفال احسن شي صح

اممم بروح المبروك قالو لي زين والكترو زان حق الاجهزة الكهربائية

بس ابي قضبات حق الكبتات على شكل فواكهه تدرون وين احصلهم؟!؟

واي حدهم يشوقووون

 

[ملكه بابتسامتي]

اكثر من رائعة مشكورة

 

[موزة ام فارس]

شوفي انا ليومج كل ماحسيت بشي احتاجه رحت السوق وشريته

نفس الشي سويه ..

اشتري اطقم القفاش والشوك والسجاجين
والاكواب عادي من اي مكان تحبينه

واي شي ثاني ترا ايي على حسب حاجتج له


أما الاجهزه الكهربائيه عندج يوريكا وسيتي سنتر وغيرهم وايد

 

[امراة من زمن الحب]

انتي روحي السوق وهناك بتجيج الافكار

 

[يابختي]

شوفي الجدور والمقالي حسب عددكم وطبخاتج..

والقلاسات والصحون والاشياء الثانية.. حطي طقمين..واي عادي واستهلاكي... بس حلو وملون.. حق الاستخدام اليومي...

وواحد كلاسيك وكشخة حق تقديم الضيوف... هذا مبدايأ....

بس بالاول عشان لا تضيعين... سوي لسته بالاحتياجات اليومية ولسته بشغل الضيوف... ولا تنسين الاستكانات ... ترى وايد مهمة....

ومري ايكيا شغلهم يونس.. وفي عرض مقالي وجدور...... وزارا هوم.. وهوم سنتر... للضيوف..وستي سنتر " لليومي"...
واصلا انتي مع الايام كل ما شفتي شي حلو راح تاخذين... فلا تكودين وايد...


وشكرا المشرفة.. حاطة شغلات وايد حلوة

 

[يابختي]

http://www.ikea.com.kw/kitchen.html

يمكن يفيدج

 

[ام عفاف الكويت]

البنات ماقصروا وجزاج الله خير استفدت منج بعد

بس الوردي عذااااااااااااب

 

[بنت العز والدلال]

سناء عندهم قفاش تينن وذربين وايد ونص الدرزن ب دينار يمكن والصغار ب 600 فلس يهبلون

 

[bnt_kwt]

حبيبتي العفو اشدعوه ما سويت الا الواجب
بس الجدور احسن شي التيقال والستانلس ستيل التركي
والمقالي تيفال

وخوش لسته مجهزه ولا تحاتين حبي من السوقه الشعبيه ترا مضمون شغلهم
عندج المعلم وسيتي سنتر شغلهم عدل مدل

 

[الغلاااااا]

ماقصرو البنات قالو كل شي
بس حبيبتي اخاف اذا حطيتي الستيكرات عالرفوف اخاف تتبطط لان المطبخ مكان رطب ومادري اذا الستيكرات تتحمل الرطوبه ولا لأ انتي سألي اول اخاف تحطينهم ويتبططون ولما تشيلينهم يخترب شكل الكبت

والله يهنيج بالطبخ