مشوار الرشاقه

[ني ني الحلوه]

هاي بنوتات بدخل بالموضوع على طول راح انبط متنت متن مو طبيعي قبل كنت شحلاتني وجسمي حلو صارلي سنه تقريبا هاده روحي ظروف ومشاكل وما اهتم بروحي كلش طق وزني 115 خلاص ويهي بينفجر من المتن قررت وان شاء اكون قدها و اغير نفسي واثبت حق الكل اني اقدر اسيطر على روحي وابتعد عن الاكل طبعا انا اكيله درجه اولى جدام الاكل انسى روحي العيش والمعكرونيه والحلويات والمقالي وماكدونالدز وسينابون وباسكن روبنز ملو مني من كثر ما اكلهم راح ابدى ان شاء الله من باجر وراح اكتب اي شي اكله او اي شي اسوي فهذا الموضوع
اليوم راح احط وزني وطولي والوزن الي ان شاء الله ابي اوصله
وباجر بذن الرحمن راح احط قياسات جسمي وصورة جسمي في بداية الرجيم عشان بالنهايه اشوف شنو كنت وشنو صرت وكل عشر ايام راح اقيس وزني وقياسات جسمي وراح اصور جسمي واحطهم لكم والي ابي منكم التشجيع والدعواي الحلوه
طبعا انا مو متزوجه
عمري 25
طولي 162.5
وزني 115
:yaaaaaarb: ان شاء الله كل الي يبون يضعفون يضعفون بالصحه والعافيه قولو امين

 

[أحلى عيون]

اختي سوي لج قروب مع البنات حاولي تشدين علي نفسج وتنسين الاكل ةدايم قولي لاحقه علي الاكل واشتري جهاز مشي او تروحين للممشي اذا تقدرين


علي الريج اشربي نسكافيه تسد الشهيه حيل


وكل يوم من الاسبوع توزنين




وبالتوفيق

 

[ني ني الحلوه]

اي نسيت اقول الوزن الي ابي اوصله ابي اوصل ان شاء الله 65
طبعا انا ما عندي لياقه نهائيا تخيلو بنات اصعد الدري دور واحد بس ينهد حيلي ولا على ما اخلص سباحه الا انا طالعه روحي
ما امشي ولا اتحرك نهائيا انا مو موظفه ولا ادرس ما ااسوي شي بحياتي حياتي كلها اكل ونوم ما اتحرك نهائيا وان شاء بذن الله راح اغير هذا الشي فيني مو لأني قاعده فالبيت وما عندي شي اقضي وقتي كله بالقعده والنوم والله يقويني ويقوي كل بنت تبي تضعف ان شاء الله

 

[زهره الجلنار]

ان شاء الله تضعفين بصحه وعافيه

 

[ني ني الحلوه]

احلى عيون فديتج على النصايح الحلوه لي الشرف انج اتردين على موضوعي حبيبتي الله يوفقج ويهنيج حبيبتي

 

[ني ني الحلوه]

يلا بنات شدو الهمه منو تبي تبدا معاي خلي انسويها تحدي مسابقه يعني

 

[ني ني الحلوه]

حبيبتي زهره الجلنار مشكوره على الدعوه الحلوه الله ينولج الي فبالج اللهم امين

 

[روج وردي]

حياج حبيبتي معانا قروبنا فيه جميع الاوزان

http://www.q8yat.com/t871393.html

 

[دلع انثه]

ياحياتي انشالله تضعفين بس لازم توخرين عن الاكل الدسم والي وفيه دهن لاتحرمين نفسج من شي بس لاتاكلين شي فيه دهون واخذي كل شي دايت بلجمعيه تلقين جبن دايت حليب دايت كل شي بدلي اكلج خليه خالي الدسم وكثري شرب ماي وإكلي فواكه كيوي واناناس كثري منهم سلطات مشاوي جذي قلبي ودشي قسم الاطباق الصحيه تلقين وصفات للرجيم ويارب تضعفين وأي استفار انا حاضرة وقسم السمنه والنحافه مايقصر مشالله البنات دايم يكتبون كل شي مفيد للرجيم وموفقه ياعمري

 

[فجر_الكويت]

ان شاء الله تضعفين بصحه وعافيه يارب

 

[ني ني الحلوه]

فديتج دلع انثى يعطيج الف عافيه على النصايح الحلوه جزاج الله خير الله يوفقج وينولج الي في بالج اللهم امين
فجر الكويت اللهم امين حبيبي انتي مشكوره على الدعوه الحلوه الله يهنيج ويوفقج وينولج الي في بالج اللهم امين

 

[ني ني الحلوه]

خل اقولكم اليوم شنو سويت لحد الحين
الحين الساعه 9 وست دقايق
قعدت من النوم الساعه ست الساعه ست وربع تقريبا حطيت بقلاص قفشة عسل وسيحتها بشوي ماي دافي
وحطيت عليها عصير ليمونه وقفشة زين زيتون وزدت الماي شوي بحيث يصير نص قلاص وشربتهم قبل لا اشربهم كانت لايعه جبدي شلون راح اشرب زيت بس والله يا بنات طعمه مو شين طعم اليمون والعسل مضيع الزيت طبعا الزيت لازم يكون زيت زيتون طبيعي اصلي والعسل نفس الشي شربتهم ريحت شوي

 

[ني ني الحلوه]

الساعه ست ونص شغلت التلفزيون وحطيت على فلم كان على ام بس شي ماكس وقفت جبال التلفزيون وقعدت امشي وانا واقفه والعب رياضة المشي وانا واقفه لمدة نص ساعه الحركات الي سويتها تشابه الحركات الي بحطها الحين بالفيديو بس مو بنفس الترتيب
هذا الرابط http://www.youtube.com/watch?v=ndVjwkaLGDk
بعدها قعدت ريحت وشربت قلاص ماي

 

[ني ني الحلوه]

الساعه 8 وربع اكلت عشر حبات كاجو طبعا كاجو غير مملح ولا محمص مع حبه وحده زيت كبد الحوت بقلاص ماي
الساعه 8 ونص قمت وصعدت الدري ثلاث مرات اصعد وانزل بعدها على طول اروح افتر بالصاله جني نحله عشان اريح شوي من صعدة الدري عن طريق المشي بالصاله رديت صعدت الدري ثلاث مرات اصعد وانزل ونفس الحركه نزلت افتريت بالصاله الين ما ارتحت ونفس الشي رديت حق الدري ثلاث مرات بعد اصعد وانزل وبعدها كملت النص اساعه افتر فالصاله واسوي نفس الفيديو الي خاطه الرابط فوق الين ما كملت نص ساعه
وبس هذا الي سويته من يوم قعدت من النوم الحين برتاح وبتسدح واخذ راحتي وبخلي جسمي الشطور الامور يحرق الدهن ولي عوده ان شاء الله
احبكم ان شاء كل البنات الي يبون يضعفون يضعفون بالصحه والعافيه اللهم امين

 

[ني ني الحلوه]

شدعوه بنات تدخلون وتطلعون على الاقل اب ما راح تخسرون شي لي قلتولي كلمه اتشجعني انا راح ادعيلكم من كل قلبي

 

[ني ني الحلوه]

ييت من يديد الحين الساعه 1
الساعه عشر تقريبا اكلت حبتين توست اسمر المربع مال المطاحن الي في الحبوب لذيذ مع جبن
طبعا بتقولن هذي مسويه رجيم وتاكل حبتين توست مع جبن انا توني باديه ومتعوده اكل فشوي شوي على نفسي يعني بعد عشر ايام حبيتين التوست راح اخليهم حبه وحده
اممم بعدين الساعه 11 ونص دهنت جسمي بزيت الزنجبيل والليمون والنعناع ولبست بدلة السونه بس البلوزه لانه بنطرون بدلتي مشقوق ومشيت على جهاز المشي نص ساعه وبعدها غسلت جسمي بماي بارد
الحين ابي انام اشوي واخلي جسمي الشطور يرتاح ويحرق الدهون المكوده في وبث
لي عوده ان شاء الله

 

[very valentino]

الله يوفقك و اسىتمري و دايما فكري انو الأكل موجود و مارح يهرب بالتوفيق

 

[كيكه توفي]

الله يوفقج

 

[ني ني الحلوه]

very valentino_ كيكه توفي , فديتكم حبايبي مشكورين وجزاكم الله الف خير الله يرزقكم ويوفقكم وينولكم الي في بالكم اللهم امين

 

[ني ني الحلوه]

الحين الساعه 9 ونص طبعا غداي كان الساعه 2 قبل يبت زنجبيل طري مع شوي ثوم شوي بس حطيته بالخلاط مه زيت زيتون اصلي وخلطته الين ما صار مثل المايونيز طبعا مو وايد زيت ولا شويه وحطيته بقرشه وحطيته بالثلاجه
غداي كان قوي تونه قطيت منه الزيت وحطيته بصحن مع تقريبا قفشه كبيره من الزنجبيل الي انا سويته وحبة توست وحده طبعا التوست الي اكله اسمر المربع مال المطاحن الي بالحبوب وبعدين انا الشطوره نمت وقعدت الساعه 9 كسوله صح فيني شوي صخونه وريولي تعورني من الرياضه اليوم