مشكلتي تزوجت مطلق!!!ساعوني مالي غيركم

[فجرالاحساس]

مرحبا خواتي..انا متوهقه وحايسه ومالي غيركم..ابي نصيحتكم ومشورتكم لاني بجد تعبانة ومو قادرة اتحمل...

مشكلتي من البداية اني تزوجت شخص مطلق وعنده اربع عيال..وعنده بيت مقسوم الدور الاول لطليقته وعياله
والدور الارضي له

طبعا اول ماتزوجنا سكنت معاه بالدور الارضي..وياليتني ماسكنت...شفت نجوووووم القايله من عياله وكل شوي يقولون طمعانه في بيتنا..حتى مصفط السيارة علي بالحسرة..ومشاكل كثييييييييرة تسببت في اجهاضي لاول بيبي في حياتي واول فرحتي..

منها قررت يانطلع يشقة بعيدة او نطلق..
وفعلا طلعنا بشقة صغيرة..وماتتصورون السعادة اللي عشناها في هالشقه
وجبت ولدي الاول..والثاني..والثالث
والحين موقادرين نتحرك بالشقة من صغرها!!!!

و هني المشكلة؟؟؟؟؟؟؟؟؟؟؟؟؟
زوجي مو راضي يطلع من هالشقة الصغيرة لانها في بيت اخوه يقول الناس تضحك علي يقولون مخلي بيتك وعيالك ولاحق المره
واذا مو عاجبتج الشقة نرد للبيت ونرد للمشاكل؟؟؟؟؟؟؟؟؟؟


بنات عفيه انصحوني جزاكم الله خير ...انا قاعده افكر بالطلاق ماني متحمله ارد لذاك البيت ومشاكل عياله وطليقته
على فكرة زوجي طيب ومحترم وخلووق بس مشكلته البيت!!!!
وهو ماعليه قاصر فلوس..يقدر يشتري بدال البيت ثلاث..بس اهو بيضغطني عشان يسكن قريب من عياله

محتاجه محتاجه راااايكم لاتخلوني..ماني عارفة شسوي؟؟

 

[G!RLY-PAci]

الله يعينج حبيبتي والله يصبر قلبج ويخليلج عيالج
دام ريلج معزم الا يبي يقعد قريب من عياله
خلاص قوليله اللي اوله شرط اخره نووور
خل يسويلج مدخل خاص لج بروحج
ويسوي لج مظله حق سيارتج بروحج
وخل يكلم عياله انهم يحترمونج شوي
اذا اهوا يبي الاستقرار لازم اهوا يصير نوخذه ويمسك العصا من النص
وسالفه المشاكل هذه لااااااااااااازم حبيبتي
لازم تتحملين دامج رضيتي تاخذين واحد مطلق وعنده عيال لازم تسعين لج كلمه او كلمتين
بس الشي اللي بخليج تتحملين كل هذا اهوا ريلج
على قولتهم لأجل عين تكرم مدينه
خليه اهوا يبادر بالشي ويحط لج حقوق ووواجبات
لج ولهم (مرته الاوليه وعياله)
ومالج شغل باحد انتي مع ان المفروض والله انه عيالج يلعبون مع يعال طليقته وماتصير بينهم حزازات لان هذيل مردهم اخوان وشايلين اسم واحد
الله يعينج حبيبتي والله كريم وربي يفتحها بويهج انشالله

 

[X_asomaaa]

هاي حبوبة مادام يقدر يشتري بيت ثاني ليش ما تطلبين منه يشتري بنفس الفريج أو القطعة ويكون قريب من عياله

 

[ن لبا عيونج ن]

الله يعينج ويفرج همج

قولي هالدعاء دعاء الكرب
لااله الا الله العظيم الحليم
لااله الا الله رب العرش العظيم
لااله الا الله رب السماوات ورب الارض
ورب العرش الكريم

 

[السيده الاولى]

الله يعينج قبل كل شى يارب
<<<من صبر قدر >>>
الطلاق صعب مهما يكون مايهون عليج تخلين عيالج بدون ابوهم وماشاء الله عندج 3 الله يخليهم لج
ودام زوجج زين معاج خلاص ليش تنفصلين ترا صعب تلقين رجال يتحمل عيال مو عياله وعيالج بيسكنون بعيد عندج يعنى لا تعورين راسج من اولها ؟؟
اشرطي عليه انه يسويلج مدخل خاص وموقف خاص او انج تقعدين بشقتج الصغيره وتعيشين بخير انتى وزوجج



الله يكون بعون جميع المسلمسن

 

[فجرالاحساس]

اشكر حبايبي اللي ردو علي..عسى الله يجعلها في ميزان اعمالكم يارب
حبيباتي البيت كان مفصول ومدخلي بروح ومع هذا توصلني المشاكل
ماقدر ارد لبيت الاشباح مره ثانية حسو فيني بنات حتى انا عندي كرامة
واللي تقولي خل يشتري بيت قريب منهم..قلت له مو راضي يبي يضغطني ارد لنفس البيت
انا تعبت..ابي ارتاح مع عيالي بسكن مريح حرام يعني؟؟

 

[omajiad]

السعادة لو بغرفة أحسن من السكن بقصر

خلج بعيدة و إن شاء الله عيالج بيكبرون ويحس

لا تقربين منهم وباجر لو يطقون عيالج قلبج بيعورج وهو ما راح يسوي شي

الله معاج

 

[فجرالاحساس]

السعادة لو بغرفة أحسن من السكن بقصر

خلج بعيدة و إن شاء الله عيالج بيكبرون ويحس

لا تقربين منهم وباجر لو يطقون عيالج قلبج بيعورج وهو ما راح يسوي شي

الله معاج

الله يجزاج خير حبوبة
والله تعبت قاعده افكر اطلق واخذ حقوقي كامله حالي حال طليقته

 

[نــوف]

دام أنج طلعتي وانتي ماعندج عيال , وبعدهاا طلعتي من البيت وجبتي عيال ثلاث >>> أكيد الحين عياله الاولين كبرو وأعقلو

أعتقد تسمعين كلام زوجج وترجعين تسكنين معاه بالبيت وإذا صار شي راح يكون قدامه لانه معاج بالبيت وراح يواجههم هو وانتي مالج شغل فيهم

والله يسر أمورج

 

[شانييل]

والله صراحة أنا مو قادرة أتعاطف معاج
للأسف تظلين إنتي المرة لثانية الي قطيتي روحج على متزوج وحرمتي مرته وعيالة منه

مهما كان ما تقدرين تبنين سعادتج إلا على تعاسة مرة وعيال

مهما كان خلج بعيدة عنهم حرام خل يرتاحون منج

 

[دانة من البحرين]

غريب امرج يا بنية :eh_s(20):


تقولين ريلج محترم وخلوق وطيب فهذي اكبر نعمة


وتبين تتطلقين عشان الشقة صغيرة !!!!!!!!!!!!


شوفي يا قلبي ادا المرة مرتاحة مع زوجها ومحترم وخلوق ومومأذيها والله والله انها تصبر و تتحمل كلشي لأجل تكون معاه حتى لو في كوخ وسالفة السكن ذي امرها سهل انتي لا تحنين عليه وايد تصبري ليما اهو يشوف الضيق بنفسه ويحسه فيه ساعتها اهوا بيقرر تطلعون من الشقة :sfg:


وبالتوفيق

 

[فجرالاحساس]

والله صراحة أنا مو قادرة أتعاطف معاج
للأسف تظلين إنتي المرة لثانية الي قطيتي روحج على متزوج وحرمتي مرته وعيالة منه

مهما كان ما تقدرين تبنين سعادتج إلا على تعاسة مرة وعيال

مهما كان خلج بعيدة عنهم حرام خل يرتاحون منج

يا اختي الله يهداج اقولج انا خذيته واهوا مطلق المره من خمس سنين..يعني ماجيت عليها ولا ظلمتها
وبعدين ربي سبحانه وتعاله اهوا اللي كاتب لي اتزوج هالرجال وهذا مسجل باللوح المحفوظ عند رب العالمين

وبعدين انتي افهمي الكلام بالاول وبعدين ردي..اقولج اهوا يغصبني على البيت وانا مو راضيه
لو اني عوبة وابي المشاكل وابي تعاستهم ومغثتهم كنت رجعت على طول وبدون تفكير

بس انا بنت حموله وبنت ناس ولنا اسمنا وشاريه راحة بالي وما اعرف اسلوب المرادد والملاسن

الله يهديج بس

 

[اميره1980]

اخذيه باللين و قوليله ان بيتنا صار صغير علينا و عايلتنا كل مالها و تكبر
و اذا عيالج اسم الله عليهم كبار خليكلمون ابوهم و يحنون عليه ان كل واحد فيهم يبي غرفة بروحه
كثر الدق يفج اللحام

 

[_ظل الياسمين _]

بالهدووء والمسايس شوى شوى تتعدل الامور وتتسهل باذن الله.

 

[princess89]

الله يكوون بعوونج يااارب

 

[ترانيم القصيم]

على فكرة زوجي طيب ومحترم وخلووق بس مشكلته البيت!!!!

من جدّكـ ؟ و تبين تتطلّقين ؟

حرام عليكـ ,,

 

[&آغليا&]

اول شئ الله يوفقج ويخليلج عياالج ياارب وزوجج ثاني شئ شيلي من راسج فكرة الطلاق نهائيا تسمعين نهائيا

ولا تقارنين نفسج بزوجته اللي تطلقت واخذت حقها ترى هذا اكبر غلط انج تقارنين حياتج بفلانه وعلانه

ثالثا شنو راح تكسبين وشنو راح تخسرين اذذا تطلقتي سوي جدول وراح تعرفين انج غلطانه بسالفة الطلاق عشان شنو طلاق عشان بيت اوسع

انا انصحج يا انج تبقين بشقه وتصبرين وتكونين ثابته على موقفج بعدم الرجوع لبيت عياله وطليقته وبجذي راح يعرف انج ماتبين حل غير انج تكونين

بعيد عن اسرته الثانيه وهذا حقج او الحل الثاني انج ترجعين بيته اللي قبل وتعيشين مع طليقته وهني يبين انج مو ثابته بقرارج بس راح توسعين وتحلين

مشكله وراح تطلع لج مشاكل غيرها وتقولين يا حلو الضيج بس مرتاحه

انا اقدر وجهة نظر زوجج انه يبي قرب عياله ولا الومه وهذا يدل على انه فيه خير بس كلش كلش بيت في نفس المنطقه او القطعه او اجار اي شئ راح

يكون قريب منهم والاخوان يكونون قريب من بعض الله يسهل عليج ويوفقج يااارب

 

[sweet cake]

لو البنات يقرون عدل ويفكونا من السب وهم مو فاهمين شالسالفه !!
الحين قالت انها تزوجت مطلق شكو تقولين قطت روحها وحرمت العيال وامهم منه وخليهم يرتاحون منج!!

الله يعينج على هالنوعيه..



اما عن زوجج انتي اشرطي.. اذا يبيج تردين للبيت تردين لكن مع ضمان منه انهم ما يأذونج ولا يقربون صوبج ويكون له موقف قوي..
لا يظلمهم لكن لا يخليهم يظلمون

 

[q8_pearls]

اتفق 100% مع غيرلي باجي

 

[فجرالاحساس]

لو البنات يقرون عدل ويفكونا من السب وهم مو فاهمين شالسالفه !!
الحين قالت انها تزوجت مطلق شكو تقولين قطت روحها وحرمت العيال وامهم منه وخليهم يرتاحون منج!!

الله يعينج على هالنوعيه..



اما عن زوجج انتي اشرطي.. اذا يبيج تردين للبيت تردين لكن مع ضمان منه انهم ما يأذونج ولا يقربون صوبج ويكون له موقف قوي..
لا يظلمهم لكن لا يخليهم يظلمون

عادي حبيبتي..هالنوعية الفظه من الناس ماره علي وايد..عادي عندي مناعة من هالعقول الصغيرة
الله يعين..
حبيبتي انتي ما اقدر ارد لبيته ما اقدر اهين نفسي ومثل ما قالو البنات راح تطلع مشاكل ما كنت متوقعتها
بس اللي يحز في نفسي انه يبخل علينا بمسكن انا وعيالي واهوا مقتدر وعنده خير
عشان جذي فكرت ابتعد عنه..يمكن يحس انه غلطان