كوكب الدرر
New member
السلام عليكم كويتيات
حبيت أتناقش معاكم في حل لمشكلة الكل يعاني منها وأبي أشوف رايكم
المشكلة اللي أتكلم عنها اهي مشكلة المرور
الشوارع دايما زحمة لدرجة مرات الواحد لما يتذكر حال الشوارع يصير ماله خلق يطلع
أو يدور الأوقات اللي الناس تكون بالبيت علشان يطلع مثل الظهر في عز الحر
فخلونا نتناقش في حلول حق هالمشكلة
انا عندي جم حل بس بعض البنات راح يعترضون عليه
مو مشكلة الكل يبدي رايه
واحنا ندري إن اللي بنقوله محد راح يطبقة بس نعيش على أمل
الحلول اللي فكرت فيها :
1-لازم يرفعون السن القانونية للحصول على إجازة
وآنا أشوف إن سن 22 سنة أفضل من 18
وهذا راح يحل لنا مشكلة ثانية غير مشكلة المرور وهي إن الحوادث ممكن تقل لأن في هالسن الواحد يكون أعقل شوي من ابو ال 18 سنة خاصة إذا كان متخرج من الجامعة ومشتغل .
2-يوقفون استخراج رخص القيادة للأجانب والعرب مع استثناء أصحاب المهن المهمة واللي عندهم شهادات عليا مثل الأطباء والمهندسين والمدرسين
3-بالنسبة لسواق المنازل ممنوع أي شخص يحط سايق إلا إذا تجاوز ال 60 من العمر لأن في هالسن ممكن يكون الشخص عاجز عن القيادة أو مريض أو ما يشوف زين
وبالتالي يقل عدد الهنود اللي يسببون حوادث بغباءهم ، ونحل مشكلة ثانية وهي تقليل عدد السواق اللي واقفين عند المدارس والمعاهد والأسواق واللي بس قاعدين ويخززون بالحريم .
4-وهذا الحل يمكن ما يعجبكم وهو: منع المرأة من قيادة السيارة منع غير تام
يعني البنت لما يصير عمرها 22 سنة تقدر تاخذ رخصة قيادة حالها حال الولد وتظل تسوق طالما اهي مو متزوجة ، لكن بمجرد زواجها تسحب منها الإجازة ويصير الاعتماد على زوجها
وإذا تطلقت أو ترملت وما عندها عائل يلبي لها احتياجاتها ، تجدد رخصتها بعد إثبات حالتها الاجتماعية
وهذا الحل راح يحل مشاكل ثانية
كلكم تدرون أن الزوج في الكويت يعتمد على زوجته في كل شي ، توصيل اليهال للمدارس ، تلبية احتياجاتهم اليومية ، تلبية احتياجات البيت ، مستشفيات ، سوق وغيره
فلما تمنع المرأة من قيادة السيارة راح يضطر زوجها إنه يعتمد على نفسه
أدري مو كل الأزواج راح ينفع معاهم هالشي بس الأغلبية راح يضطرون للإعتماد على أنفسهم مو على زوجاتهم .
هاااااااا شرايكم ، جني مصختها بالحل الاخير :dddds:
يالله اللي عندها حل ثاني تشاركنا فيه
