شوفي انا مثلك عروس ومن السعوديه بعد .. وماكنت اهتم بنفسي
واخواتي اصرو علي وجابولي حرمه سودانيه تدلك سوتلي دلكه كل اسبوع
ولاحظت جسمي صار يلمع من الدلكه لكن مافتح مررره ..
كان عندي مشاكل كثير اهمها سيقاني مره غامقه حيل فرق عن لون جسمي
والمنطقه الحساسة والباط في سواد .. مو مره غامق لكن موجود
شعري مو ناعم وعندي شيب مطفشني بكل مكان صاير يزيد كاني عجوز مجنني
ووقت الخطوبه انعدم وجهي حبوب من الحاله النفسيه الزفت
يعني انواع الدمااااااااااااار الشامل ارض جو ..
بس كنت مطنشه واقول بكيفه هو اختارني مثل ما انا .. وعايشه الدور <<<< الواثقة من نفسها
والصراحه داخل نفسي ماكنت مؤمنه ان في شئ ممكن يبيض او يغير فعلا بدرجه ملحوظة
يعني كنت احس بحوس نفسي بخلطات ولا يبين لها اثر ..
الشئ الوحيد اللي اعتنيت بيه وقتها هو وجهي .. لان اعرف خطيبي يكره شئ اسمه حبوب .. ما يهمه سمرا بيضا حمرا ماعليه .. أهم شئ الوجه صافي ..
وبما اني ما احب اطلع من البيت وكرهي للدكاتره والمستشفيات واعتقد انهم كلهم نصب بنصب للاسف ماعاد في امانه الا من رحم ربي
اشتريت لي غسول ال3 ستبس من كلينيك المجموعه الكامله واستخدمتها
حلوه لكن ماوقفت الحبوب
وعملت سيرش في النت واستقريت على اني اعالج الحبوب بالبنزل بروكسايد .. مره مشهور بانه يشيل حب الشباب
رحت الصيدليه وقلتله عطني بنزل بروكسايد 2%
وصرت احطه على وجهي مرتين باليوم صباح ومسا
طبقة سميكه يعني احط كميه
وينشف الوجه .. فكنت استخدم معاه مرطب قوي
لكن الحمد لله الحبوب خفت من اول اسبوع
وبنهاية الشهر كلها راحت مابقي الا الاثار
وصرت اخفف الكميه المستخدمه
واستمريت على الغسول .. واحط بنزل بروكسايد 2% مره او مرتين بالاسبوع بس .. مجرد تعقيم علشان اضمن الحبوب ما ترجع باذن الله
سعره رخيص 12 ريال بس .. اخذته من النهدي
وبعدها بفتره لما استقرت حاله بشرة وجهي .. صرت استخدم مقشرات وصنفره مرتين بالاسبوع علشان تروح الاثار .. والحمد لله خفت بنسبه 90%
وكل ما تطلعلي حبه على طول احط عليها بنزل بروكسايد وتروح ثاني يوم .
-------------------------------
بالنسبه لجسمي كنت بس ادهن بزيت السمسم كل يوم قبل النوم فقققققط
وبعد حوالي شهرين من الدلكه الحرمه اللي كانت تسويلي صارتلها ضروف وماصارت تقدر تيجي ..
وانا كنت تعودت على اني اهتم بنفسي بعد ماشفت نتايج الدلكه .. كتوفي كانت تلمع ..
استخرت وقررت اني استخدم كريمات
اشتريت كريمات .. افالون - اليكوم - رتن اي - الدوكين
وصرت كل يوم اخلط شويه من كل نوع مع كميه اكبر من كريم الجسم .. ( فازلين - جونسون - جرجنز .. اي شئ )
اخلطهم وادهن جسمي كله بالكريمات وانام ..
والصباح اتروش واحط كريمات مره ثانية ..
بالليل اخلط ( الدوكين - اليكوم - رتن اي + كريم مرطب )
بالصباح نفسه بس ابدل الالدوكين بالافالون يعني يصير اخلط (افالون - اليكوم - رتين اي + كريم مرطب )
لان الالدوكين لازم يستخدم بالليل بس .. اذا استخدمتيه بالصباح يجيب اثر عكسي .. يعني يسود بدل ما يفتح .. فانتبهي
وانا من النوع اللي ما اطلع من البيت الصباح بهالفتره فما كنت استخدم واقي من الشمس صراحه
اذا عندك دوام او جامعه استخدمي واقي شمس قوووووي طبعا .. انصحك ببايوديرما ممتاز
المهم بعد اسبوع من استخدام الخلطه لاحظت تغير ملحوظ جدا خصوصا في سيقاني قامت تفتح وانبسطت واستمريت عليها بذمه والنتيجه راااائعه ..
وقمت اهتم بنفسي اكثر واكثر لان شفت النتائج الزينه
صرت استخدم صنفره علشان تسرع نتيجه الكريمات .. وفعلا نتيجتها روعه
وصرت اخلط ( سدر وحليب وكركم ونشا وملح الحليب ) كله بعلبه كبيره خالطتهم بودره كلهم طبعا .. واخذ منها حوالي 5 ملاعق واخلطها بموية ورد وازيد شوية اسكينول واستخدمها كدلكه للجسم ..
اخلطها بزبديه صغيره واخلي قوامها متوسط .. مو سايله مره .. وافرش مفرش نايلون بالغرفة وادهن جسمي كله بالخلطه وانتظرها تنشف شوي .. وبعدها اخذ زيت سمسم وادلك جسمي ( الحرمه كانت تدلكلي بزيت الزيتون . بس انا اعرف ان زيت السمسم يناسب بشرتي اكثر فقمت استخدمه ، وكانت تستخدم دلكه بالاعشاب المغربيه .. وانا ماكان عندي فأخترعت موضوع خلطه السدر .)
مره بعد مره كنت اتحسن واعرف ادلك نفسي احسن من المره السابقه .. لما صرت محترفه .. يعني ماتيأسين من اول مره .. استمري لما تعرفين لنفسك
بعد الدلكه اتروش واحط صنفره وافرك بليفة البوديشوب القفاز .. والنتيجه رائعه
وكله كوم ويوم خلصت صنفرة ستيفز .. كنت احس في شئ ناقص اذا ماقشرت بالصنفره لان خلاص تعودت على الاهتمام .. قمت بيومها لان ماعندي صنفره خلطت سكر وزيت وفركت بيه .. والله رهييييييييييييب
غير كل الصنفرات .. لا ستيفز ولا كاب ولا يحزنون
قشرت السواد اللي تحت باطي بشكل فوري صار ابيض من جسمي
مع انها ناعمه ما توقعت مفعولها رهيب مع ان اسمع البنات دايم يمدحون صنفرة الملح الخشن او السكر مع الزيت ..
بس لما جربت حسيت الفرق ..
المهم ان لكل صنفره استخدامها ..
اشتريت ملح خشن ودقيته علشان يصير ناعم وما يجرحني .. وصرت اخلطه بالزيت وافرك بيه بعد الدلكه بس مره بالاسبوع لان تعتبر صنفره قوية
وبقية الصنفرات استخدمها بشكل شبه يومي .. او يوم بعد يوم
وقمت اتفنن واجرب انواع جديده ..
حبيت صنفرة تشبه صنفرة ستيفز .. اخذتها من عند نزيه تجربه لان سعرها ممتاز نص سعر ستيفز .. ولاني كنت استهلك المنتجات بشكل سريع صرت افكر بالتوفير صراحه .. لان العلبه ماتكمل معي اسبوع ولا اثنين وهي خالصه .. ومع زياده العنايه زادت الميزانية ..
جربت هاذي وصراحه راااااااااائعه
بالبدايه ماحبيتها لان كنت متعوده على ستيفز بالمشمش ,, وهذي تحسي فيها كريم مرطب ..
لكن بعدين لاحظت بشرتي ناعمه مره والحبيبات اللي فيها ممتازه نفس ستيفز واحسن يعني تقشر وترطب
وفيها ميزه ان كميه قليله منها تفرد على مساحه كبيره ما ادري كيف .. بس انا ناسبتني واضفتها لصنفراتي الدائمه
صرت اسوي بيها او بستيفز بالتناوب .. وبعدها استخدم صنفرة كريم كاب لان انعم .. يعني اول صنفره خشنه وبعدها ناعمه .. تعطي نتيجه روعه
وبعد الحمام طبعا لازم الترطيب .. كل فتره اجرب مرطب شكل .. وصرت اشتري العبوات الكبيره اكبر حجم وماتجلس معي تخلص مره بسرعه .. حسيت شقد كنت مقصره بالعنايه
احلى مرطبات استخدمتها وناسبتني
بالمرتبه الاولى بدون منازع ( كريم الكولاجين الوردي من نزيه )
ممتاز ترطيبه روعه .. ما يدبق على الجسم ، ريحته خيال ، وكميته ممتازه ، وسعره رخيص .. يعني المواصفات المثاليه
وكمان ما استغني عن ( فازلين بالشوفان - دوف الوردي - جرجنز العناية الفائقه - جونسون الوردي ) كلهم ممتازين .
جسمي كله صارت يفتح يوم بعد يوم .. والنتايج تحمسني على العناية اكثر وماتخليني اوقف او اهمل
وبعد ساعدني على الاستمرار اني مابدأت كل شئ دفعه وحده .. لا بس ازيد شغله بسيطه .. واستمر عليها فتره لما اتعود عليها واحس انها مره عادي وصارت روتين ساعتها اصير من نفسي ادور على شئ زياده علشان اسويه
واحاول ما اسوي اشياء تتعب مره او فيها حوسه وخلطه بمئه مكون .. او تاخذ وقت طويل .. علشان ما أمل منها واتركها
والحمد لله استمريت والنتيجه لسا بعد ماتحددت ملكتي .. وجسمي فتح مره لدرجه صرت ابيض من خواتي مع انهم كانو مره افتح مني .. وحتى كريمات الاساس حقي كلها صارت ماتنفع لان مره اغمق من جسمي ..
صح نسيت اقول اني صرت احط السدر على وجهي كقناع وقت اسوي الدلكه .. لكن ما افركه بعد ما اخلص الدلكه مثل جسمي لان الفرك على الوجه يطلع حبوب .. بس اشطفه بالمويه ..
وبعد احط افالون واليكوم مسكه خفيفه على الوجه كل يوم .. ماعدا اليوم اللي استخدم فيه بنزل بروكسايد طبعا ما اخلطه معاهم ..
والنتيجه ماكنت احلم بيها .. خصوصا بهالفتره .. يعني حوالي 3 شهور بس والنتيجه اكثر من مرضيه ولله الحمد
شعري صرت اسويله كيراتين الفرد كل 3 شهور اعيد على الجذور والحمد لله تمام
وصرت اخذ حبوب فيتامينات هردال .. ممتااااااااااااازه اخذتها من صيدليه بوتس ب120 .. اتوقع تنباع برى .. بس ما ادري وين
وناويه على فيتامينات اوميجا 3 بايومارين يمدحونها مره شفتها بالنهدي على 60 ريال
شعري فرق كثير على الفيتامين .. ووقف التساقط وصار يبين ان الشعر يطول ..
وصرت احط زيت مره بالاسبوع على كل الشعر ساعتين واغسله مضبوط
وبقيه الاسبوع ادهن زيت بس على الاطراف لانها ضعيفه ولا ابيها تتكسر .. بس الاطراف .. ادهنها كل شوي وادلعها علشان تتقوى والنتيجه ممتازه
وقت الاستحمام على ما اتفرك ابلل شعري بمنقوع السدر ومره ممتاز .. بعدين اشطفه بالمويه بس - الشامبو مره بالاسبوع او مرتين فقط .. لان الشامبو يعدم الشعر ..
اذا ماعندك مناسبه حاولي ما تغسلين شعرك كثير
واهم شئ تمشطيه بشويش لان التمشيط يكسر الشعر
واستخدمي شامبو يناسب شعرك ... الشامبو مره يفرق ( انا صرت استخدم افون باللوز - لوريال )
وبعد الحمام ابخ شعري بمنقوع الشاي ( شاي عادي ابو جبل او ربيع ، اغليه وخليه ليله ينقع ، وبعدها حطيه ببخاخ وخليه على التسريحه )
كل ما اسرح شعري ابخ منه .. روعه يقوي الشعر وينشط الفروه .. ويفرد الشعر .. يصير كانه مسشور
اختي صارت تستخدمه ماهي مصدقه .. بعد فتره صارت ماتسشور شعرها للدوام لان بعد استخدام الشاي فتره يخفف تجاعيد الشعر كثير
وبالتالي يخف استخدام الحراره .. وطبعا هذا كله في صالح الشعر يصير صحي اكثر
ولما تمشطي قولي " بسم الله ماشاء الله ولاحول ولا قوة الا بالله " كرريها طوال ما انتي تسرحي شعرك وشوفي الشعر كيف .
هذي طريقتي للعناية بالتفصيييييييييييييل .. ان شاء الله انك تستفيدي منها ولو شوي ..
لا تخافي من الكريمات ترى البنات يبالغون .. اهم شئ جربي على منطقه صغيره وشوفي كيف بشرتك تستجيب لها .. أذا بشرتك ماكانت حساسة جدا .. باذن الله راح يناسبك الكريمات ..
واهم شئ لما تيجي توقفيها وقفيها بالتدريج واستمري على العناية بأشياء طبيعية
مثل السدر وزيت اللوز
انا لما مايكون في اعمل السدر دلكه .. بس اتحمم فيه مثل الصابون مرررررررره يبيض السدر
وزيت اللوز توني شاريته الكل يقول يبيض .. وبصير اخفف من الكريمات واحط زيت اللوز بأذن الله .
لاتنسيني من دعائك
