مرت حماي وظلمها لي

[مارشميلو..]

مرحبا
شلونكم ان شالله بألف خير


بقولكم اللي صار لي وقولوا لي رايكم

مرت حماي توها عروس ماصار لها شهر
انا ماشفتها الا كم مره بعد العرس لاني ساكنه بشقه مو معاهم بالبيت
والله يشهد انه ماقد طلع مني لاكلمه ولا تصرف يضايقها
لقيتها قبل كم يوم داقه علي وتهاوش وتطول لسانها
قلت لها خير يافلانه شلي جاك مني
قالت انتي ماتستحين على وجهك وماقد شفت وحده عندها زوج وولد وتسوي اللي تسوينه
وكلام واااااجد صدمني
بغيت اسكر بوجهها بس قلت لازم اعرف شلي خلاها تقول هالكلام
قالت انا داقه اقولك ياليت تحترمين نفسك اذا جيتي عندنا وتلبسين مثل الناس
وماتقعدين تستعرضين
علامات استفهاااااام فوق راسي خيييييير
قلت ليش شنو شايفه علي
قالت انا عارفه انك تحاولين تخلين زوجي يشوفك واتعمدين تطلعين قدامه ومدري شنو
قلت انا مستحيل اسوي هالشي شفتيني بعينك طالعه قدامه
(على فكره انا منقبه وفي بيت خالتي ماقعد مع حمواني اذا دخلوا الغرفه انا اطلع واذا لقيتهم قدامي
ماادخل الغرفه استحي مع ان خالتي تقول عادي لبسي نقابك واقعدي بس مااحب)
بس شوفوا سخافتها
تقول انها كانت تسولف مع زوجها عن ولدي وتقول عنه انه اشقر ومن هالكلام
راح زوجها قال انه طالع على امه يعني انا!!!
قلت لها كان سألتيه مو زوجك
قالت سألته وقعد يقول انه يذكرك لما كنتي صغيره كان شعرك اشقر بس مو علي هالسوالف
(انا زوجي ولد عمي واكيد حماي هذا يذكرني وانا صغيره مثل ماقال خصوصا انه اكبر مني بكم سنه)
انقهررررررت حيل منها مسويه سالفه ومطوله لسانها علي
على كلام انقال بينها وبين زوجها وانا مالي ذنب
وقعدت تحاول تقلل مني وتقول ترى ندري انك صابغه >>شفتوا السخافه
بصراحه ماقدرت اكمل المكالمه حسيت اني قاعده اهين نفسي وانا اتكلم مع وحده تفكيرها كذا
قلت لها طيب فمان الله وسكرت

انا خايفه الحين تروح تقول لخالتي وتسوي سالفه
مع اني ادري ان خالتي مارح تصدقها لانها تشوفني صار لي سنتين اجيهم ولا عمري قعدت مع حمواني
بس ماودي يصير مشاكل

افكر اقول لزوجي بس ماودي احس شي سخيف
وهذا اخوه الكبير ويحترمه حييييييل

انا علاقتي زينه مع اهل زوجي ويحبوني مثل بنتهم
ومرت حماي هذي شكلها ملسوونه وراعيه مشاكل
خايفه تسوي توتر بيني وبينهم
حسبي الله عليها
الله يكفيني شرها يااااااارب
بنات شسوي شلون اتعامل معاها لو واجهتها

 

[مارشميلو..]

.....

 

[tbola]

مادري نصيحه قولي حق زوجج عشان لا باجر احد يظلمج ودعي دايمن الله يهديها ولا تنسين الله يمهل ولا يهمل

 

[رمـــانـــه]

موووووصج شهالاشكال وانتي قولي لزوجج شنوهذي التفهه ماعرفها ولا تعرفني بسم الله توها عروس جذي داقه تزف انا مابي لسانها يطب لساني وكلم اخوك يوقفها عند حدها ولاتشوف شي مايرضيها خخخخخخ قوليله هذا شرف وعيب عليها تسوي جذي ؟ لاتسكتين

 

[pusy cat]

شهالمسعوره هذي@@

لا حبيبتي قولي حق زوجج وقولي حق خالتج لا تسكتين عنها هذي قاعده تقذفج وتشوه سمعتج باجر ماتخلي احد ماتقوله هالكلام خل يوقفونها عند حدها المريضه

وتكفين حطي ايدج على شعرج واقري عليه واقري على ولدج مبين عليها حسوده عمى بعينها

 

[a7la_7b]

قولي لخالتج عشان ما تتجرأ عليج ووقفيها عند حدها وصج كل يرى الناس بعين طبعه الله يعينج على هالاشكال

 

[tmtmt]

ياحليلها شهر وبهالجرأه !!!

من رايي قولي حق ريلج بس بطريقه حلوه
ان بقولك عشان تكون بالصوره وعندك خبر وانا مو هامتني ولا هامني تفكيرها
بس عشان اذا انفتح الموضوع يكون عندك فكره بلي صاير مو ضايع بالطوشه
وتكون مرتب افكارك وتعرف شلون ادافع عني

وبس

 

[نجدية2011]

الأفضلية قولي لزوجك وكمان ام زوجك اتصلي عليها تلفون وخبريها
حتى يوقفونها عندها حد صدقيني بالمستقبل بتتجراء عليك اذا شافتك تسكتين عنها
خليك قويه مدامك صح وكافيتني خيرك وشرك ولا أذيتي احد
مو مثلها ماعرست زين الا تهاوش
الله لايبلانا بس

 

[ريمي اميري]

اول شي ,,, انتي منتي غلطانه ،، بالعكس محترمه حالك وشكلهااا تغااار منك وميته وماعندها ثقه بنفسهااا

بس انك تقولين لزوجك هذاااا واجب عليك يسمع من لسانك السالفه احسن من غيرك ويحطوون الغلط عليك

بعدين لازم توقفين الخااايسه هذي عند حدهااااا ومنين جاابت رقمك ,, ؟

انا مع ان الوحده تكون مؤدبه ومحترمه وعلاقتهااا حلوه مع اهل زوجهاا ,, بس مايتعارض هذا الشي مع قوة شخصيتهااا

الله يعينك واحمدي ربك الي منتي عندهااا ساكنه ولا بطين عيشتك اعرف هالنوعيه من البشر ..

 

[@ام يوسف@]

هذي عروس وسوت المشاكل شلون لجابت العيال كل يوم عيالج يطقون عيالي واتسوي لج مشاكل انتي لازم تقولين حق زوجج وخالتج علشان ما تتبلى عليج وتقلب السالفه عليج

 

[PuPa^^SWeeT]

لاا سكتي عنها

بالاحرى جان سكرتي السماعة بويهها


اللي فيه نقص عاد لايقطه على غيرها



وبعديين ترا شوفي رسمي حريم الحموان يغارون من اول وحدة



رسمي


فا عادي عديها غيره و مسكييينة و مشي الحياة

بس دقي على خالتج قوليلها اللي صار

وقوليلها مابي مشاكل وياها

واهيا اتصرف

 

[أم توتو]

من اولها جذيه الله يعين حمولتج عليها بس شوفي حمولتج عارفينج من سنين وانتي قريبتهم مو تجي هالغريبه تخرب بينكم بس خليهم بالصورة عشان يعرفون انها راعيه مشاكل الله يعينج عليها ويكافيج شرها

 

[sKntyny]

خلي ريلج بالصوره لاتقول عنج حجي او تتبلى وبعدين الكل راح يصدقها ..
اذا ريلج من النوع المتفهم قوليله

 

[dectora 7elwa]

علمي ريلج وخالتج
هذي ما ينسكت لها

 

[اليوم السابع]

لازم وحتماً وضروري تقولين حق زوجج ترى بعدين ترجع عكسيه عليج هالامور هذي ما فيها بسكت وأخاف لالالالالالال حبيبتي هذي دخلت بشرفج واخلاقج وقفيها عند حدها عن طريق زوجج من غير ما تشيشينه على اخوه لان الاخو كلش ماله ذنب ريال طبيعي وكلامه عادي جداً بس شتقولين في غيرة الحريم (( چلبٍ نبح قبل لا يثلث ))

 

[اميره1980]

لا حبيبتي لا تسكتين علشان بعدين تروح تطلع عليج سوالف و انتي مظلومة فيها
قولي لريلج و لامه بعد يوقفونها عند حدها قليلة الادب
هذي و اهي عروس لازم تستحي و لسانها طويل جذي عيل لو يصير لها سنة شنو بيصير ؟؟

 

[سعوووديهـ]

لو انا منك اول خطوه اقول لزوجي لازم يعرف عشان ترتاحين ولايفهم غلط بعدين وتشوه سمعتك

ثاني شي استانسي شكلك مزيونه وانقهرت وغاااااااارت ياحرام

 

[princess.78]

وقعدت تحاول تقلل مني وتقول ترى ندري انك صابغه >>شفتوا السخافه

ههههههههههههههههههه حركات بزران بصراحه ههههههه

 

[مارشميلو..]

مشكورين بنات
وشكلي بقول لزوجي

 

[برنسس كاتي]

مو شكلج الا لااااازم ترووحين تخبرين زوجج بس مو وانتي معصبة او منفعله
انتي لازم تصيرين اعقل منها وتبلغين زوجج عشان لو صار شي يدري وانتي استيشيريه
وشوفي ايش هو يقول بس مو لازم تقولين لخالتج