محتاره بين قلبي وعقلي

[اللهم رحمتك]

مرحبا بنات
انا بشكي لكم وابيكم ترشدوني للطريق الصح الله يخليكم جد انا محتاره بين قلبي وعقلي مادري منو اختار
الموضوع ومافيه ان تقدم لي واحد واحنا نحب بعض حيل واهوا بدون واهلي رافضين هذا المبدأ مايبون بدون بسبب وضع البدون اللي اهو العيال باجر يجون على الدنيا ماعندهم شهايد ميلاد ولا معترفين فيهم ومايندرى متى يتعدل الوضع وعمري قاعد يمشي وانا خايفه ارد النصيب ومايجي لي نصيب ثاني وبنفس الوقت اقول يمكن اخذ الكويتي ويعذبني واتحسف على البدون اللي يحبني وبنفس الوقت محد خطبني غير هالبدون محتااااااااااره الحين تقولون سوي استخاره سويت لمدة 3 ايام اخر يوم حلمت بطحين كاني قاعده انخله ومايطلع شي من المنخل صافي الطحين وانا مستغربه اقول ليش مايطلع شي بالمنخل يعني السمار مال الطحين عرفتوه لما تنخلونه
شسوي اطيع قلبي ولا عقلي قلبي يقول اخذيه من غير تفكير هذا حبيبج اللي يحبج وتحبينه وعقلي يقول وبعدين العيال شلون ؟؟؟؟؟؟؟؟
انتظر ردكم اللي يطمن قلبي انا خلاص احس مخي وقف من التفكيررر حتى عيني صارت حمره

 

[بتبوتااا]

سمعي كلام عقلج لانه اهو الصح

الا اذا الريال عنده دخل ثابت ويقدر يفتج بيت ويصرف عليج وعلى عيالكم ان شاء الله ماكو مانع بس اذا على قد حاله انصحج من كل قلبي لا تستعيلين لانه بشوف عيني عيال بدون متبهذلين اخر بهذله ومتوظفين وظايف ولا هندي يقبل فيها !!

 

[مولاي الفرج]

حبيبتي البدون هم اوادم يعني صج ظروفهم صعبه لكن انا عن نفسي لو ظامنه ان يحبني اضحي بهالشي

ولو ان اهلي بمكانج هم ماراح يخلوني عشان مثل ماقلتي اليهال وجذي

انتي شاوري اهلج وقولي لهم شتحسين فيه وبراحتج

بس ترى انتي غلطانه .. تكلمينه وتحبينه وعارفه ان بدون وتالي لي طلب الحلال منج تقولين محتارة وين حيرتج كانت اول مافتحتي له قلبج

 

[classicyah]

و الله مآ أدري شو أقولجْ ،

البدون انسْ حآلهم حآلنآ ،

لكن للأسف الشديدْ ،

نحـن في زمـن الأورآق الثبوتيـه و الجوآزآت و الجنآسيْ . .

صعب انه الإنسآن مآ يملك هالأشيآء ،

لأن العيآل بيضيعون ، مآ بيكون لهم مستقبل ،

أهلجْ من حقهم يرفضون ، لأنهم يخآفون عليجْ من الدنيـآ . .

،

بخصوصْ الحلمْ ، ارسلي رسآلـه لدلع العتبآن ، اتعرف اتفسر أحلآم مآشآءالله . .

 

[فلنتينو]

اتبعي اللي يقوله عقلج
هذا مستقبل وحياة مو لعب
وعسي الله يوفقج

 

[زوجة عزيز]

انا معا بتبوتاا صبري والله يعوضج

 

[مجنونة حبه]

انا مع راي بتوتا يمكن بالبدايه مااتحسين بهالشي بس بعدها لما اتيبين عيال راح يكونون اغلى شي عندج ودج اتوفرينهم كل شي ويكونون احسن ناس
فصعبه مع ظروف البدون الحاليه
والله يعينج ويوفقج

 

[أحلى البشر]

سمعي كلام عقلج الحب يقل مع الايام والظروف ساعتها تشوفين الواقع الاليم اللي اهمه فيه وبتعضين اصابعج ندم ترى وضعهم حيل صعب الله يفرج همهم لاتبلشين عمرج
وانتي ليش تستعيلين منو قال ماراح اييلج واحد زين ويحبج الرزق بيد ربج ادعي وخلي املج بربج كبير

 

[_Pure_]

اذا حالته المادية زينه و مخلص بعمله و وظيفته
اهله ناس طيبين
اخلاقه وايد زينه
يصلي و يخاف ربه

انسان محترم و ما شفتي منه شي مو زين

توكلي عالله
لانج استخرتي لازم تتخذين قرار و تقبلين عليه
اذا مشت الامور بسهوله معناته في الخير لج

و اذا تعرقلت الامور معناته مافي خير

و دايما كرري دعاء الاستخارة

اللهم اني استخيرك بعلمك و استقدرك بقدرتك و اسالك من فضلك العظيم
فانت تقدر و انا لا اقدر و انت تعلم و انا لا اعلم و انت علام الغيوب
اللهم انت كنت تعلم ان زواجي من (فلان) خير لي في ديني و دنياي و عاقبة امري فاقدره لي و يسره لي ثم باركلي فيه
و انت كنت تعلم ان هذا الامر شر لي في ديني و دنياي و عاقبة امري فاصرفه عني و اصرفني عنه و اقدرلي الخير حيث كان
اللهم صلي و سلم على سيدنا محمد و على اله و صحبه اجمعين


كرري هالدعاء بكل وقت و كل صلاة و كل سجدة

و وافقي عالريال


و اذا فيه خير الله راح ييسر الامور
و اذا صارت مشاكل معناته تركي الموضوع و الله يعوضج باحسن منه

الله يرزقج اللي فيه الخير

 

[واقعية حـلـم !]

ما ادري يا قلبي

البدون وضعهم صعب حيل مو شوي الله يعينهم اذا تقدرين اتحملين وافقي

الله يكتب لج الي فيه الخيرر

 

[مناير ...!]

هالقرار بروحج ويا اهلج تتخذونه
لانه باجر بييج يوم اتقولين ليتني سمعت شور فلانه وماسمعت شور علانه
شوري عليج تستخيرين + تمشين على راي اهلج

*الاستخاره
أعتقد قلبي انج من الي فاهمين الاستخاره غلط
سالفه الاحلام بدعه

والآن انتهت صلاة الاستخارة .. تاركا ً أمرك إلى الله متوكلا ً عليه .. واسعى في طلبك ودعك من الأحلام أو الضيق الذي يصابك .. ولا تلتفت إلى هذه الأمور بشيء .. واسعى في أمرك إلى آخر ماتصل إليه .

نتيجه صلاه الاستخاره مو مربوطه لابالاحلام الي بعدها ولابالاحاسيس الي بعدها
بعد الاستخاره ربي ياييسر امرج للموضوع الي استخرتي له
او يصرفه عنج

والله يوفقج

 

[غمآزه]

الله يصبرك والله شي كبير ...

الله يسهل امورك ويعينك ويخيرلك امرك بألأحسن لك​

 

[nooorrrsss]

سمعي عقلج لانه حرام تضلمين اعيالج بعدين وصيرون نفس ابوهم

 

[قآنون كيفكـ!!]

بقول رايي وعسى الله يكتب لجج اللي في الخير ..
حبوبه ..
اولا البدون حالهم حالنا اوام مخلوقين من طين لكن الزمن الحين مايمشى بالجنسيه يعني الله العالم متى يتعدل وضعم ؟؟!
فكري ان الزواج مو علاقة يوم وليل رابطه اقوى من جذيه ويمكن يصير ينكم عيال فمصيرهم اكيد نفس مصير ابوهم بدون :/
ثانيا اهلج رافضين يعني شلون تتزوجينه ووليج رافض اهلج اكيد فكروآ بمستقبلج ..

والله يكتب لج الصصالح ..

 

[BeNt PaRiS]

اهلج عين الصواب
فكري بالمستقبل
يعيشج بعشه يمكن
بدون ماعنده شي
تاخذين كويتي يعزج و يرزج و يريحج احسن


الله يوفقج حبيبتي

 

[ام زهقانه]

اسمعي عقل ولا تسمعين القلب

 

[المرتاحة]

سمعي عقلج وخليج مع راي اهلج

والله يوفقج يا رب

 

[Tom ♥ Jerry]

،


حبيبتي فكري بـ عقلج و خلي قلبج !
بآجر وراج عيال شلون رآح تعيشينهم اذا ابوهم بدون !
صج آنه الله كريم و كل شي بيده يصير .،
لاكن رآح تتعذبين وآيد ترا ديري بآلج ,،
اعرف وحده مآخذه بدون كآنت تحبه نفسج و آهلها نصحوهآ
بس مآ رضت .، الحين تخيلي الله يستر عليها وعلينا و يفرج همهآ ,، " حتى هدوم تاخذ منآ "
آحنآ نعطيها هدوم حقها و حق عيالها و ريلها !
و متحسفه قد شعر رآسها !
الحب حلو و شي مهم بالحياه بس ترا مو كل شي يصير بالحب !

 

[انا لحبيبي .]

الله يكتبلك يلي فيه الخير ،

 

[pusy cat]

الحب مايدوم صدقيني

ماشفت كويتيه ماخذه بدون ومرتاحه بحياتها كلهم متمرمرين

لا تبدين نفسج على عيالج لأن لما تجيبينهم راح يكونون اهم منج وراح يكونون اهما حبج الصجي وودج توكلينهم من لحمج بس عشان يعيشون متهنين

انا اقول اهلج ادرى بمصلحتج

والله ميز الانسان بالعقل فكري بعقلج ودام استخرتي ماراح يصير الا الخير انشالله

وشوفيلج مفسر احلام خل يفسر حلمج

والجئي لربج اكثر واكثري الدعاء والاستغفار

وقولي حسبي الله لا اله إلا اهو عليه توكلت وهو رب العرش العظيم ( 7 ) مرات اذا اصبحتي واذا امسيتي يكفيج الله ما همج بالدنيا والآخره