محتارة وين أدق براسي ... دخيل الله شوروا علي

[العـذوب]

بسم الله الرحمن الرحيم

لأول مرة أطرح مشكلة خاصة فيني بالمنتدى ..

بنات شوروا علي دخيل والديكم


أنا صار لي حادث من 4 سنين انضربت فيه كمن ضربة ، من قوة الحادث أبوي الله يرحمه توفى بالحادث ...

المهم إن من بين الضربات كانت فيه ضربة بالأنف ... يومها انحط لي حديد بالفك وقالوا لي الدكاترة ما فيه أي جراحة ممكن تصير بالويه لين ينشال الحديد

المهم أنا شلت الحديد من حوالي سنة ونص ، وحطيت تقويم وبديت الحين عمليات زراعة أسنان لأني فقدت في الحادث 9 أسنان ..


الجديد هو الخشم ... لأن مر وقت طويل على العمليه طلعوا لي لحميات ..
وانحرف خشمي بشكل وااااضح وتضخم شكله وغير هذا صار عندي انسداد بالبلعوم ما أروم أكل شيء .. البلع وايييد صعب عندي .. لازم أشرب وراه ماي

المشكلة وين يا محفوظين السلامة ..

أنا عرضت نفسي على كذا طبيب

ما ارتحت إلا عند طبيب ايراني كان ياي دبي زيارة ( أنا من الامارات ) اسمه محسن نراقي . .. المشكلة هالطبيب سوبر بروفيسور موب أي كلاااام بالمرة يعني واااااايد غالي لأنه يعتبر من أطباء العالم النخبة .. محطوط في قائمة أحسن 100 طبيب في العالم .. هذا موقعه بنات شوفووه:
http://www.fess.ir/en/

المشكلة في دبي عمليته تكلف 55 ألف درهم يعني 5000 دينار
وفي ايران عمليته تكلف 7 آلاف دولار يعني قريب النص

الحين المشكلة إني كنت مجهزة عمري واليهال بنزل ايران ,, بس صدمني السعر أنا ما كنت أعرف إنها تكلف هالمبلغ في ايران ... الصراااحة توووو ماااش


انزين سويت سيرش سريع على لبنان

طلعت بالتالي

دكتور ايل جاريوس <<< له كتاااب بالسوق
خذ صوري بالايميل وسوالي خشم الله لا يراويكم وقلت له غير الاستايل وغير الاستايل وبعده موب عاجبني لأنه يبا يقصر خشمي أونه موب حلو الخشم الطويل <<<<< جني طلبت منه يقصر .. يا أبوي أنا بنت بدو للحين ينضرب المثل بالخشم اللي "نصل سيف " عندنا ..
والله سوالي خشم فلبن ..
المهم التكلفة عنده من 1000 إلى 1500 دولار
هذا موقعه:
http://secure1advancedemedia.com/dr...216282183392&category=8&subcat=1018&startat=1

الثاني الدكتور سامي حلو
أونه مال ممثلات .. قال لي انزلي لبنان وبشوفج .. أو انتظري لآخر 8 .. وأنا أريد أسويها هالأيام علشان عندي اجازة
التكلفة عنده من 1000 إلى 3000 دولار

الثالث الدكتور عمر من الاردن
هذا موب اختصاصي أنف .. بس تجميل .. والعالم الله حتى اللي في لبنان تجميل ...
وطرشت له تقاريري وللحين ما رد مع إني مرمستنه كمن مرة
حدود 2000 دولار

الدكتور الرابع الدكتور حكيّم
هذا عطوني رقمه وصار لي اسبوع أحاول اتلاقى وياه ما ألاقيه

ولا أعرف كم تكلفته

يا جماعة شوروا علي وين أدق براسي .. فيز ايران مخلصتنها وحاجزة تذاكر وإخواني ثيابهم في الشنط ..
ولبنان الوضع السياسي فيه متأزم وااايد والأطباء اللي رمستهم كلهم تجميل أحس مالهم خص بالأنف وأنا أريد طبيب أنف أكثر من التجميل ..

ومحتتاااااارة


دخيلكم بنات عقلين يفكرون أحسن من عقل واحد .. فكيف بعقولكم وياي ..


يمكن وحدة منكم تعطيني الشور الشافي ...



أختكم :
العذوب

شو الحل بنات

 

[منورة الكويتية]

والله مادري ياختي
ماحبيت اطلع بدون مادعيلج الله يسهل عليج امرج وانتي استخيري والله يكتب لج الي فيه الخير

 

[الجــادل]

انا اقولج دام في ضروره للعمليه الشرع يحلل لج هالشي


وروحي عند الدكتور اللي ارتحتيله


ومو مهم الفلوس

هذا خشم وعلاج مو شنطه والا ساعه عساس تحتارين

اهم شي صحتج وتكونيني مرتاحه وراضيه عن شكلج

 

[* ألماسه *]

والله مادري ياختي
ماحبيت اطلع بدون مادعيلج الله يسهل عليج امرج وانتي استخيري والله يكتب لج الي فيه الخير

.

 

[شندوخه]

حبيبتي الفلوس شنو فايدتها اذا ماقطيتيها على نفسج وصحتج
انا اقول قبل كلشي استخيري وتوكلي على الله روحي ايران عند الطبيب الزين
المهم صحتج وراحتج ولا الفلوس مصيرها الزوال

الله يشفيج يارب ويسهل عليج امورج وبشرينا عنج

 

[*دبدوووبه*]

والله ياقلبي
لو انا بقولج
بقولج تعالي الكويت هههههههههه
في عندنا ثلاث دكاتره
شطار بدرجة كبيره
وفي بعض الفنانات
الي مسوين عمليات الخشم وفشلت
صلحولهم الاخطاء

وتقريبا العمليه ماتتعدا ال 1200 دينار

بس انا الي سمعته
دكاترة لبنان
شطار وايد وايد
وانا اعرف ناس في لبنان
وان شاءلله بسألهم
وبرلج الجواب

والله يعينج
ويصبرج ياقلبي
بس لا تستعجلين

 

[نــور1]

هلا أختي

ما تشوفين شر . . .

والله يرحم والدك ويسكنه جنات النعيم . . .

استخيري رب العالمين ولا خاب من استشااار . . .

في وحدة مسوية عملية عند دكتور اسمه جوزيف بمستشفى القديس في لبنان سألي عنه . . .

 

[العـذوب]

مشكورات بنات

ولا تنسون لبنان الوضع الامني فيه صعب واااااااااايد



انا بتوكل على الله وباجر بعون الله بسير ايران



مشكووورات

 

[ii DareeN ii]

الله يسهل دربج وترجعين معافاه حق اهلج ويرحم والدك وجميع موتى المسلمين وطمنينا عليج لي رجعتي وبشرينا بنتايج العمليه

 

[*سكون*]

الله يشافيج ويردج بالسلامة وطمنينا عنج

 

[& مــشــايــخ &]

الله يشافيج ويردج بالسلامه