محتاجة لكم في كم سؤال عن أطفال الأنابيب؟

[أم علاوي 14]

السلام عليكم

أخواتي ناوية ان شاء الله بأطفال الأنابيب عندي كم سؤال :

1. أفضل طبيبة على الإطلاق ؟

2. هل احتمال حمل بأطفال معاقين في عملية اطفال الأنابيب ؟؟

لأني سمعت عن حالة بأطفال داون سندروم ( منغولين ) ومنها خفت من العملية

وإن كان كل شي بأمر الله ولا اعتراض على حكمه ،

 

[حلم الأمومة]

حبيبتي الله يرزقج ان شاءالله .... بس مادري ليش مركزه انها تكون طبيبة ..؟؟

انا سمعت ع فوزية القطان الكل يمدحها ...بس اذا تبين عن تجربة عماد غزاوي شااااااطر حيل حيل وعندج بعد منصور العرف وفي بعد دكتور برويال حياة حيل شاطره بس نسيت اسمها ..

بالنسبة للاطفال المعاقين هذي قسمه رب العالمين ... وبعدين ترا باطفال الانابيب يختارون لج اجود الاجنه ويفحصونها عدل واذا كان الجنين موسليم او جودته موذاك الزود تأكدي انه اهو من نفسه بيطيح لان اغلب الدكتاتره يقولون ان الجنين الللي تكون كروموسوماته موجيده على اغلب الاحيان يطيح فمايصير عندج حمل

يعني لااتحاتين سوي كل اللي تقدرين عليه والباجي على الله بس توكلي على الله

 

[أم علاوي 14]

هلا أختي حلم الأمومة ,, مشكورة على ردج الطيب .. وكلامج العسول اللي يطمن القلب

اما عن الطبيب انا ما احبذ العلاج عند رجل مهما كانت درجة مهارته .. وشكلي ان شاء الله عند دكتورة فوزية ، والله يعطي كل محروم ولا يحرم أحد من الذرية ( المال والبنون زينة الحياة الدنيا )

 

[Emanova]

والله احسن طبيب .... ما في شيء اسمه احسن طبيب و مضمون لانهم كلهم يمشون على نفس النظام بس الله يحط العلاج بايد منو

الصراحه قبل لا اسويها لفيت على دكاتره و ما ارتحت الا عند ماجده اليتامى و اهي اللي سوت لي اياها و الحمدالله انا خامل و عسى ربي يتمم علي و يرزقج مثل ما رزقني

الاعاقه هذا شيء بايد رب العالمين محد يتدخل فيه انا بجري حملت فيه من ليله عرسي و طلع فيه توحد ... فتوكلي على الله و خلي ايمانج قوي و ان شاء الله يرزقج الذريه الصالحه المعافاه يا رب

 

[أم علاوي 14]

ما قصرت حبيتي على الرد، والله يتمم عليج حملج يارب يصبرج على تربية عيالج

وانا مؤمنة بالله والحمدلله وكل شي بأمره ، ومشكورة على التفاعل

 

[غموض الصمت]

الله يتمم عليكم ان شاء الله
و يرزقنا و اياكم الذرية الصالحة

 

[miss_uk]

1. أفضل طبيبة على الإطلاق ؟

والله بالكويت ما عندي خبر بس اللي اعرفة عيادة كير بدار الشفا لأنها فرع من بريطانيا
انا سويتها بلندن ونجحت الحمدالله

2. هل احتمال حمل بأطفال معاقين في عملية اطفال الأنابيب ؟؟

ان شاء الله لأ لأنة النسبة نفسها بالحمل الطبيعي لا تحاتين

الحالة اللي سمعتي فيها هم لو حاملة طبيعي جان صار نفس الشيء والله اعلم

حبيبتي انا سويتها والحمدالله البيبي سليم وما علية اي شر احمدك يا رب

توكلي وبشرينا