مجموعة الـ 26 التقت الأمير: قانون إسقاط الفوائد... مرفوض

[‏ღLave♥nderღ]

تب رضا السناري|

علمت «الراي» من مصادر مطلعة ان سمو الأمير الشيخ صباح الاحمد التقى اخيرا وفدا من مجموعة الـ 26، بناء على طلب المجموعة، لبحث ملف اسقاط الفوائد المقسطة والاستهلاكية على المواطنين.
ولفتت المصادر إلى ان الوفد تمثل في كل من رئيس مجلس إدارة مجموعة الاوراق المالية علي الموسى، ورئيس مجلس إدارة بنك بوبيان ابراهيم القاضي، ونائب محافظ بنك الكويت المركزي السابق الدكتور نبيل المناعي، فيما تغيب عن اللقاء رئيس مجلس إدارة شركة الشال جاسم السعدون نظرا لظروف خاصة تتعلق به.
وافادت المصادر ان وفد المجموعة بيّن لسمو الأمير ان موقفه الرافض لاسقاط الفوائد يرجع إلى كون «هكذا اجراء يخل بمبدأ العدالة الاجتماعية في البلاد، بين شريحة المقترضين وغير المقترضين، وينمي الحس الاستهلاكي لدى المواطنين، كما انه يتضمن بعض الشبهات الدستورية»، مشيرة إلى ان الوفد تطرق مع سموه إلى جملة اخرى من المثالب الاقتصادية والاجتماعية التي يمكن ان تترتب على اقرار القانون.


شوف التعليقات

مجموعة 6 + 20 نقص واحد او زاد مهتهم اعادة تسلط التجار وارجاع حقبة احنا الكبار والباجى صغار ؟ يقولون الحفاظ على المال العام وينهم عن حكومة دعمت بنك يعتبر مستقل من الانهيار ؟ تدعم بنك من فلوس الشعب والبنك وصل كويتين للسجون ؟؟

بعض بنوك الكويت امثال الجمل والسفينة والاخضر وغيرهم كان شعارهم قرض لمدة 20 سنة ؟ وحملات اعلانية تكسر الدنيا حتى باص المواصلات تلقى اعلانهم
فى النهاية 20 سنة مخالف للقانون !!!! وغيرها امور قانونية مخالفة فعلتها البنوك ؟
من حاسبهم

شنو نقول 26--عندهم الشعب يتبهذل على الفوائد بس المهم أرباح بنوكهم وكروشهم تكبر على ظهر المسكين والغريب بالأمر أنهم لا حكومة وأعضاء مجلس يعني ممكن إنسوي وفد من 600 شخص وإنقول عن نفسنا مجموعة 600

اللهم لاتوفج من يقف بوجهه الشعب وبوجه المواطن حساد وكروشكم متروسه من لفلوس الله ياخذ كل واحد طماع وحاسد وجشع بدال لا توقفون بويهه الناس حسوا بالناس اول والله لو الواحد يقصون منه 50 دينار والله تعور فما بالكم 500 ولا 600 بس ربكم يمهل ولا يهمل راح ايلكم يوم انشاء الله.

وجموعتك اللي تطبل لها وينها عن قناون الاستقرار المالي... وينها عن كارثة مشرف وضياع 26 مليون ؟؟

ما اقول عسي الله لايوفق كل واحد حاااسد

اسقاط الفوائد فيها مثالب وشبهات لكن ادفع دم قلبي على الفوائد المركبة ما فيها مثالب وشبهات بسكم يا حرامية فضيحتكم مو بس عرفها الشعب الكويتي حتى المقيمين بكل جهات الدولة قاعده تتكلم عنكم يا مصاصين الدماء صحيح الي اختشوا ماتوا

يا 26 ذابحكم المال العام وينكم من مناقصات الدوله
اللي فيها تلاعب بالمال العام وينكم من المواطن العاطل عن العمل وينكم من نهظة البلد وينكم من الفتنه
اللي راح تخل بالبلد لو لا ستر الله -- اطال الله بعمره وسدد الله خطاه وينكم من اختلاس ناقلات النفط وينكم

فلوس تروح برة الديرة مو ظلم فلوس تنباق مو حرام
ياخي طلوع الي بالسجون الي عليهم شيكات ولا هذولة مو مواطنين؟؟؟؟؟؟؟؟؟؟؟؟
رحمتك ربي

قوانيين وقرارات مجلس الأمة هي اللي بتمشي لا 26 طابوقة ستقف بوجه الارادة الشعبية لانها كالجبال ويا جبل مايهزك ريح والشعب الكويتي مليون شغص لا يهمه 26 مهرج ويتفرج على معاناته وساكت عن توزيع القروض والمساعدات للدول الأخرى عن طريق صندوق التنمية

حسبى الله ونعم الوكيل فيهم تجار الكويت مؤسسين الربا الله لا يوفقهم
ولايرحمهم يارب اللهم انتقم منهم فوق الارض وتحت الارض ويوم العرض اللهم امين
وينهم لما طيحو المديونات الصعبه على 25 شخص وينهم على الشاليهات اللى ماجرينها من الحكومه ابلاش
وينهم عن قسايم

26 -- نصبوا أنفسهم مستشارين ومخولين عن الشعب بالوقت الضائع، وكأننا في عصر الرومان ننتظر منهم الرؤيا الثاقبة في حل أمور البلد.واين كانوا عند إقرار تمويل البنوك والمليارات التي هدرت لمشاريع التنمية. ولليوم منهم 26 بلا حضارة احترام رأي وإقرار قانون صوت عليه من المجلس.

 

[ملاك ^ الحب]

اول شي منو اهم 26 ؟؟؟

وثاني شي حسبي الله ونعم الوكيل عسى حوبه المقترضين ما تتعداكم يالحراميه ماهمهم الا نفسهم اهم شي شلون يطلعون فلوس ومنو الي ماكلها غيرنا يالمواطنين

حسبي الله ونعم الوكيل فيكم

 

[‏ღLave♥nderღ]

هذيل شوية تجار متجمعين ضد الفوايد والمواطن..!

 

[متي أركد]

الواحد مايقول ألا حسبي الله ونعم الوكيل فيهم ........ أخاف صج هامهم المال العام والمواطن الكويتي وأستاد جابر الرياضي أللي صارلهم ينهبون فيه سنين هذا مومال عام من عرفنا الدنيا وأهما يبنون هالاستاد برج خليفه بن زايد بس فكرة بناء البرج سنة 2004 وتم بناءه وأنتهي بداية 2010 وأحنا أستاد مثل خلق الله ومستشفي جابر صار حلم من النهب والسرقه

 

[AbRo0oH Q8]

هذوله ما يمثلونا كلنا ..يمثلون فقط نفسهم ..
ألحين همكم المال العام والعدالة يا 26 ......
أقول ..سجل يا تاريخ ..

 

[0(مـــســـ(مطير)ــــــك)0]

انا اعرف واحد منهم .. كان يدرسني .. كان يصارخ بالمحاضره على اللي مايبون القروض تسقط .. يقول شالنانيه فيهم .. اذا انت ماعندك قروض راع غيرك اللي ماخذ وذابحته الديون والقروض ... الحين سبحان الله شغير كلامه !!!

ناس تبي الشهره حتى لو على مبادئهم .. لكن لنا الله ..

 

[نونيا]

الله يعين

 

[Stylista_Q8]

زين يسووون

إعجبـوني ^^

واصلن اهمه قالوا بيخلون هالامر بيد الامير صباح الاحمد لنه يدرون انه بيرفض

لنه هالشي مافيه عداله للمو مقترضين ! بسكم أنانيـة

 

[ii DareeN ii]

مجموعة 26 لا اهم ممثلين من الشعب ولا اهم وزراء معينهم الامير على اي اساس اهم مخلين حق نفسهم كيان ويتكلمون بسم منو اتوقع الشعب عنده ممثلينة والحكومة عندها ممثلين لكن ان لم تستح ففعل ماشئت

 

[مظلومه ياناس]

يعني خلاص نغسل ايدنا من اسقاط الفوائد؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 

[‏ღLave♥nderღ]

لا تو

الامير وعد بحل مشكلة القروض

حياكن

--

 

[النوالنو]

الله كريم

 

[ˆώ• اح ـساس المطر •ώˆ]

زين يسووون

إعجبـوني ^^

واصلن اهمه قالوا بيخلون هالامر بيد الامير صباح الاحمد لنه يدرون انه بيرفض

لنه هالشي مافيه عداله للمو مقترضين ! بسكم أنانيـة

انانية ؟؟

حبيبتي انا القروض مو مسببة لي مشكلة ..

لكن ما اوقف بوجه اخواني المقترضين بس لانه انا ماعندي قرض !!!!

شوفي الانانية الصح وين صايرة ..

الحمدلله الخير واجد بديرتنا .. بدال لا يروح مني او مناك الشعب اولى ..

ومثل ما قالت اختي دارين اللي راحوا ما يمثلون الشعب ..

ما اقول الا حسبي الله ونعم الوكيل ..

 

[فرنسا]

شوفي القروض انواع ......قرض للبيت وقرض للسفر وقرض علاج وقرض ترفيهي الخ
المفروض تدرس كل حالة لوحدها ,يعني اللي ماخذ قرض لانة كلش ماعندة بيت ولا مكان وحالتة حالة من الاجار مثل اللي ماخذ قرض يسنع بيتة ويبهرجة؟؟
واللي ماخذ قرض ترفيهي مثل اللي ماخذ قرض لعلاج
انا بالنسبة لي اطالب بتعديل نسبة الفوائد وخفضها لكن ماتسقط القروض لان فعلا شذنب اللي ما اخذ؟؟ مو معناة انة مرتاح ممكن انة اكثر منهم محتاج بس الفوايد كانت فوق طاقتة وهون ... وتسقط القروض عن اللي خذوها لعلاج اضطراري

على فكرة مرة وحدة تتكلم عن القروض بعصبية ان شالله حاد الناس عالقروض الترفيهية .. مو لازم يسكن ببيت يسكن بشقة ,مو لازم يسافر يقعد بديرتة ,مو لازم عيالة يدرسون بمدارس خاصة ,مو لازم يتعالجون برة
وطلع بالنهاية زوجها بوزارة المال السايب (الدفاع)والبيت ماجرينة الوزارة لهم ,وعيالها بمدارس خاصة على حساب الوزارة وكل سنة تذاكر مجانية وخصومات السفريات .ولو فيهم نشلة الابو الام والعيال وابوة وامة واخوة بعد يتعالجون برة والله تفاجات انها مسافرة اهي وزوجها وابو زوجها عشان عملية دسك المانيا وتسولف اخذنا سيارة وتمشينا ورحنا وشهرين على هالحال بذمتك مايحر ناس مقطعتها القروض للعلاج وناس العايلة كلها مسافر على حساب الحكومة
لكن ارد واقول القروض تسقط عن البعض بعد الدراسة ...... مع انا واسطات الكويتين وايد لو يسون دراسة معناة بيطلعون الكل معسرين ولا راح يدفعون

 

[أم وهابي (عبير)]

انانية ؟؟

حبيبتي انا القروض مو مسببة لي مشكلة ..

لكن ما اوقف بوجه اخواني المقترضين بس لانه انا ماعندي قرض !!!!

شوفي الانانية الصح وين صايرة ..

الحمدلله الخير واجد بديرتنا .. بدال لا يروح مني او مناك الشعب اولى ..

ومثل ما قالت اختي دارين اللي راحوا ما يمثلون الشعب ..

ما اقول الا حسبي الله ونعم الوكيل ..

بعد جبدي انتي :icon30: معاج

والله كريم انشاءالله
واللي الله كاتبه بصير باذنه والله يعين هالمساكين اللي حتى مصرف حق عيالهم ماعندهم
والله يكافينا شر الحساد
ومن فرج عن مسلم كربه فرج الله له كربه من كرب يوم القيامه
وحب لغيرك ما تحب لنفسك
حتى اذا ماكنت ماخذ قرض ليش ماتبي الخير لغيرك
والله استغرب من هالناس

 

[توته وااااااااو]

انا معاهم ليش تبون تخسرون الديره اكيد هم في شغلات هم ادرى فيها ليش انتوا ياللي خذيتوا القرض اكيد كنتوا تدرون ان الفوائد بالتزيد او تنزل ورغم هذا وافقتوا خلاص تحملوا ليش هاللويه هذي كلها ؟؟

 

[ام زين العابدين]

ترى الموضوع صج مو انصاف الي مو ماخذ قرض لي يتحمل الي يصير ما تدرون يالي خذيتوا قروض انه راح يصير فيكم جذي
الي ماخذ عشان مرض خل يدفعون له قرضه والي ماخذ حق سياره خل يدفعون له قرضه والي باني فيه بيته خل يدفعون له بس الي ماخذ حق وناسه وحق لعب لا والله اسمحولي يتحملون ليش لازم الديره تتحمل كل شي يعني بسالكم وحده اول ما تتوضف تاخذ قرض 10 الاف ليش عشان تلعب فيهم ما تسوق سياره ولا عندها اجار ولا عندها بيت ولا شي ليش القرض ؟؟؟؟


اذا بيطيحون حق المقترضين نفس النسبه يعطون حق غير المقترضين يعني تدفون حق المقترض 10 الاف تعطون حق الغيرمقترض
10 الاف انا عندي هذا الحق

 

[‏ღLave♥nderღ]

يابنات لاتخلونهم يقصون عليكم

بالفعل اللي مقترضين لازم يتحملون الفوايد بس مو بهالشكل الضالم

مو معقول الفايده تكون اكثر من القرض نفسة بدبلات!!!

بعدين البنك المركزي نزل قوانين تضبط الفايده لو البنوك موضالمين ليش البنك المركزي نزل ضوابط!
هذي غلطة الحكومه الي خلت الموضوع سبهلله

وخلت البنوك تنهب بالمواطن دون ان تحمية باي قانون

اهم شي يردون حق الناس لهم

واحنا اللي مااقترضنا مو معقول نكون ضالمن بهالشكل

نساعد البنوك بضلمها حرام

لاتعينون الضالم على الضلم لازم نوقفهم عند حدهم عشان مايزيدون بضلمهم

والمقترض كافي انه بيرد فلوس القرض

يعني اللي خذاه بالضبط راح يرد فشنو الاشكالية بهالشي

واللي راح يقترض بعدين البنك المركزي نزل قانون يحميه

فليش معترضين وحالتكم حالة وماشيين ورا الناس اللي تقول مافي عداله..!

العداله اللي اهم يبونها مو لكم يبونها للبنوك والا انتوا ماهميتوهم للاسف..!

 

[AbRo0oH Q8]

انا ميته واعرف ليش في ناس رافضة اسقاط الفوائد ..
علشان العدالة ..؟؟
اي عدالة << اذا اخوي و ابوي ماخذين قرض وانا مو ماخذه اروح ارفض على بنه انا مو ماخذه ..
يهون عليكم ان الكويت تفرج كرب دول مو ناس لأ دول ,,, و ما تفرجها على شعبها ...
,,,,,,,,,,,,,,,,,,,,,,,,,,,,,,,
و لحد يتكلم عن العدالة ..لان لو تكلمنا عن العدالة ..راح نتوسع بالموضوع..
اشوف العدالة موموجودة بقاموس الحكومة لما يشوفون وحده من النواب تاخذ قرض 50 مليون بدون فوائد ..
وين العدالة اهنيه ..
اشوف العدالة بس تصير على الشعب ,,,
,,,,,,,,,,,,,,,,,,,,,,,,,,,,,,,,,,,,,,,,,,,,,,,
بنات فكروا عدل هذي حركة حكومية انه يطلعون في الموضوع عذر ,, مثل العدالة ,,
علشان الشعب يرفض فكرة اسقاط الفوائد ..
,,,,,,,,,,,,,,,,,,,,,,,,,,,,,,,,,,,,,,,,,,

 

[‏ღLave♥nderღ]

لا العداله انهم يعطون بنك الخليج 800 مليون عشان مايفلس

والمواطن افلس وانسجن والحكومه ولاتدري عنه..!