مجبوس الدياي بحشوة اللوبا ... / صور

[بطه فيها نطه]

سامحوني على التاخير ... لكل من طلب مقادير هالطبق

بسم الله نبدي ...




الدياي :


احب الحجم الصغير اللي يكون بين 900 - 800 ناطع ولذيذ ... استخدم ساديا

من الليل اغسلها وادلكها بملح و ليمون ... واخليها بالثلاجه ليه ثاني يوم



فوح الدياي :


مقادير السلق العاديه ... وانا طريقتي هذي ( ماي - ملح - فلفل اسود حب - مسمار - اعواد دارسين

هيل حب - فصوص ثوم - 2 بصل قطع كبيره - نص جزره مقطعه اصابع - 1 طماط مقطعه جزئيين

اوراق غار - 1م ك كركم ناعم - 1م ص بهارات مشكله )


افوح اليدايه ثلاث ارباع استوى ... علشان تكمل بالفرن ... ولاتحاتين بتطلع ناضيه وناطعه



شوي الدياي :


انا بالمره مااقلي الدياي ... في اي اكله ... احس تصير حطبه ... دايما اشويها حتى للمجبوس


بهارات التدليك والمساج :


ثوم مدقوق ناعم / كركم / فلفل اسود ناعم / زعفران ناعم / هيل ناعم / دارسين ناعم / ملح / بهارات مشكله

2م كاتشب / ربع كوب دهن نباتي او زبده او سمنه او زيت زيتون ... اللي يريحك


بعد كل هالمقادير ... خلطيهم كلهم مع بعض ... ولبسي ادسوس ... ودلكي الديايه ( الديايه بعد الفوح او السلق )

دلكيها بكل المقادير حتى من داخل ... حطيها بصحن للفرن ودخليها تحمر ... ( شبي الفرن من فوق )

وقلبيها من وقت ليه الثاني ... علشان تحمر من كل صوب ... خلصنا من الدياي




العيش :


طبعا نحتاج لماي فوح الدياي ... علشان نسوي العيش .... ( بعد ماتصفينه من البهارات اللي فيه )

انا استخدمت العيش الاسمر ... ( لطبق اللي بالصوره ) ... بس محد حبه .. والسبب فيه ريحة قمح او قشر العيش

وبعدين تعبني ... مايستوى بسرعه مثل العيش العادي ... ياخذ وقت وماي اكثر ... نصيحتي جربوا الطبق

بالعيش البسمتى العادي ...



طريقة اعداد العيش ... العاديه .. واهي نحمس نص بصله ناعمه + 1فص ثوم ناعم + 2عود دارسين + هيل حب

نضيف بعدها العيش الحب المغسول والمصفى من الماي ... نحمس لين ياخذ

العيش حراره ... وبعدها نضيف ماي سلق الدياي ... واكيد مقدار الماي ... فوق العيش بطرف الاصبع

بالاول الحراره وسط او شبه عاليه ... وبعدين نقصر .. لين يستوى وينشف

الماي ... مع التقليب بالشوكه ان احتاج ... وديري بالك تكسرين العيش



وبما ان العيش عادي وابيض ... ممكن تسوين خلطه وتصبينها عليه علشان تاخذ لون

واهي ( زعفران - 1م ص صبغة الزعفران - ماي ورد - دهن ) خلطيهم وسوي فتحات بالعيش

وصبي فيهم ...



الحشوه :


من الليل كنت غاسله اللوبا .. وناقعتها بالماي

الصبح ... غسلتها مره ثانيه وبعدين حطي جدر ... وفوحيها ... هم ثلاث ارباع سوى .. بس بشكل انها تكون

مستويه ... يعني مو يابسه ... ولا تنتف ... علشان راح تكمل طباخها بالحمسه


ناخذ بصل ناعم .. الكميه اللي تبينها للحشو .. انا استخدمت 6 بصلات ... تحمسينهم + ثوم ناعم

والدهن يكون شوي زياده عن العاده + بهاراتك ( باربيكيا ناعمه - فلفل اسود - ملح - كركم

دارسين ناعم - هيل ناعم - بهارات مشكله ) تضيفينهم وتحمسين وبعدها تضيفين اللوبا

تكونين مصفيتها من ماي السلق ... وتحركين ... اهني نحتاج شوي ماي

ممكن تحطين ماي الدياي اذا زايد او ماي عادي حار ... تقريبا اقل من كوب ...

غطي الجدر لين ينشف الماي ... وحركي من وقت ليه الثاني ... لين تستوي




خلصنا ... ننجب العيش بالطبق ... ونفرش الحشو

وبعدين نحط الدياي عليه ... وعليكم بستين عافيه

 

[جارة القمر]

ماشاء الله



الطبق شكله يشوق



تسلم هالأيادي

 

[مساء مونترو]

تسلم ايدج..

 

[@فطفوووطه@]

تسلم ايدج بصراااحه باين عليها لذيذه

 

[اللاما]

الله يعطيج العافيه

 

[jolie_q8]

عجيبه الطبخه

تسلم ايدج ومشكورة على الوصفه

 

[الحنونهـ]

شكله لذيذ وجاااااري التنفيذ..
ومشكووووره وتسلم يمناش حبيبتي..

 

[Snow angel]

ماشاء الله تبارك الرحمن

مبدعه يا بطوطه بسم الله عليك

يسلموووووو هاليدين ياقلبي

 

[unreachable]

ماشاءالله الصور تشوق

تسلم ايدج

 

[زهرااا]

مشكوره حبوبه

 

[ريمه الكويت]

شكلهااااااااااااااا عذاب تقول اكلوني تسلم ايدج يابطه عالطبخه السنعه

 

[@ربانة العود@]

تسلم ايدج

 

[ABEER FLOWER]

يمي يميييييييييي
ما شاء الله تبارك الله
تسلم إيدج بطوطه
و يعطيج ألف عاااااااافية ياااااارب

 

[ألماس وردي]

تسلم الايادي حبيبتي

 

[om mishaal]

ما شاء الله شكله حلو وشهي
تسلم إيدينك إن شاء الله

 

[ايمانو حلوة]

اهبببببببببببل ومغذييي

مشكوورة ياقلبي تسلم ايدينج

 

[اسيرة زوجها]

تسلم ايدينج شكلها يشهي يميمي
بس الديايه تقول يلا ابدو بالريل ههههههه

 

[صوت الناى]

تسلم ايدج
خوش طبخة والحشوة عجيبة صراحة

 

[& ام سلمى &]

 

[foofo]

تسلم ايدج روووووووعه شكلها يشهييييييييييي