متزوجات و مطلقات تعالوآ شوي :$ !

[jessica almutairi]

السلام عليكم و رحمة الله

بنات عندي موضوع وحابه اخذ رايكم فيه

انا ملجت و بنت عمي ملجنا ع اخوان قبل فتره
وم تحدد العرس

المهم هي تكلمه من بعد الملجه وتعرفوآ ع بعض واتفقوآ

وانا ما اكلمه ولا اعرف عنه شي ؟

على مدح اخواني بس , ف انا خايفه انا ما نتفق بعد العرس
واتحسف ان م كلمته ولا تعرفت عليه قبل العرس

وهو قال ل اخوه مره لا تكلم مرتك يمكن تمل منها بعدين ؟
وجهة نظره

وحتى اخوي قبل لا يملج تعرف ع البنت الي اخترناها وفي قبول وتوافق بين الطرفين تمت الملجه

ف شرايكم بالي تعرف عليه فترة الملجه !

مع اني من النوع الخجول ولآ ابي هالشي بس يفضل ؟

مع ان ام بنت عمي ماشاء الله متفهمه ام امي لا متحفظه شوي

وادعوا لي يا بنات فكرة الزواج تخخخوووووووف :eh_s(2):

​

 

[نـعـومـه]

اهيه شغله وحده

الحضر بس تملج خلاص تكلمه وتطلع لان بالشرع حلال زوجها

البدو غالبا بيوم العرس

وعاد كل واحد تربى على شي انا اشوف لازم تعارف بالملجه بس موحلوه اطول الملجه يعني حده 5 شهور لان خلاص المرا والريال يتعبون يبون يسكنون

 

[jessica almutairi]

اهيه شغله وحده

الحضر بس تملج خلاص تكلمه وتطلع لان بالشرع حلال زوجها

البدو غالبا بيوم العرس

وعاد كل واحد تربى على شي انا اشوف لازم تعارف بالملجه بس موحلوه اطول الملجه يعني حده 5 شهور لان خلاص المرا والريال يتعبون يبون يسكنون

هلآ والله نعومه نورتي

اي نفسس تفكيري لان مطول العرس ف مابي اكلمه خاف تمصخ السالفه ومامن علوم ولا هروج سنعه :d

 

[Royof]

إذا مطول العرس نصيحه لا تكلمينه تبدي مرحلة الملل بينكم حتى من الزواج يكون عرف كل شي عنج

 

[-فلانة-]

يعني شلون على مدح إخوانج؟! زوج وإلا سيارة اهو؟!
منو اللي بيدخل معاه غرفة وحدة وينام معاه على فراش واحد؟! إنتي و إلا إخوانج؟!
شلون تقبلين على نفسج أصلاً بيوم و ليلة تتعرين جدام رجل ما تعرفينه ولا تعرفين أسلوبه ولا كلمتيه ولا كلمج؟ لي متى هالعادات البايخة اللي تعارض شرع الله أصلاً؟! زوجي حلالي على سنة الله و رسوله و ما أكلمه ولا يكلمني؟ وشنو مبدأ ملجتنا مطولة واخاف اذا كلمته يمل مني؟ عادّة نفسج مسلسل وإلا فلم طويل و ينمل منه!
انتي بشر و هو بشر..أرواح تحتاج تتآلف و تتودد لبعضها البعض..تفهمينه يفهمج تتعرفون على طبايع بعض شنو يحب و شنو تحبين مو خذوه فغلوه قبل ساعة كان غريب و الحين نايم يمي عالفراش!!!
ما يجوز احنا مو بهايم مكرم القارىء..
انتي الحين انسانة مسؤولة عن نفسج..وهذا زوجج على شرع الله يعني حلالج و انتي حلاله..كلميه و تعرفي عليه و قطوا هالعادات السخيفة اللي ما أنزل الله بها من سلطان..دفنوا هالعادات الدنيا تطورت و احنا ما عدنا بسنة ١٩٠٠.

 

[عيني عليه]

احلا شي فتره الملجه. . يدلعج ويدللج وطلعات ومطاعم وهدايا ورومنسيات. تزوجي قعدي طبخي ونفخي وكرفي وجيبي عيال وماعندكم وقت لبعض لان بتبدي الحياه العمليه. .. بالنسبه للملل انا اقولج شنو سرر الرجااال خخخخخخ

انتي بس لاتخلينه يدخل عليييج ومارااح يمل. .. مادري شسرهم يعني دام الاشيا من بعيد لبعيد بالعكس بيتم متشوق لج ومحترق عليج. . بس انتي لاتبردين قلبه بالدخله وبيتم مشتاق لج ع طووووول. ..

والله لاااايقوله لو صار فيه شي ماتفقتوا عليه تصير الامور وانتي ع البرر قبل لاتتزوجين وتتدبسين

 

[عيني عليه]

احلا شي فتره الملجه. . يدلعج ويدللج وطلعات ومطاعم وهدايا ورومنسيات. تزوجي قعدي طبخي ونفخي وكرفي وجيبي عيال وماعندكم وقت لبعض لان بتبدي الحياه العمليه. .. بالنسبه للملل انا اقولج شنو سرر الرجااال خخخخخخ

انتي بس لاتخلينه يدخل عليييج ومارااح يمل. .. مادري شسرهم يعني دام الاشيا من بعيد لبعيد بالعكس بيتم متشوق لج ومحترق عليج. . بس انتي لاتبردين قلبه بالدخله وبيتم مشتاق لج ع طووووول. ..

والله لاااايقوله لو صار فيه شي ماتفقتوا عليه تصير الامور وانتي ع البرر قبل لاتتزوجين وتتدبسين

 

[خابت هقواتي]

مادري انا ريلي ما كلمته ولا عرفت عنه شي

بس شوفي ترا حلو يكون بينكم تواصل

لان راح تعرفين شغلات مبجر قبل لا يفوت الفوت وماتندمين

تعرفين سلبياته

يعني اختي كلمت ولد عمي خطيبها امبيه صج صج متشدد لاقصى درجه وشكاك وايد

فهونت عن الخطبه او اجلتها وعطته خبر انه هذي عيوبك الي ما عجبتني فيك واتمنى تغيرها

بصراحه لمن تحاجينه بسسس

يصير يحبج اكثر ويكون ملهوف عليج بزياده وينطر العرس احر من الجمر

وتقدرين تعودينه على شغلات قبل الزواج منها راح تستفادين من هالنقطه

يعني تعودينه على يدق يقولج انا وين ؟ وشغلات ثانيه يتعود يخبرج عنهم قبل الزواج

عشان باجر اذا تزوجتي يكون متعود

وخليج غامضه عشان يكون ملهوف اكثر يكلمج

ومكالمات قليله مو وايد

ولا تبنين مشاعرج كلها ولا احساسج خليه هو يموووت فيج

انا هذا رايي وكيفج

وبالتوفيج يالغاليه

 

[لوولوو_88]

كلميه ليش لا و إذا عرسج بتحدد بعد سنين كلميه قبلها بفترة .. ترى علاقتكم تلفون لها طعم و باجر لا تعاشرتو لها طعم ثاني .. توكلي على الله أذا اهلج متفهمين و ممكن تكلمينه .. تعرفو على بعض شوفي تفكيره هواياته

و صح لسانج فلانه .. اي ملل شالحجي هذي حياة و مشاركة شمل منه بالله من صوتها ولا سوالفها التلفون ولا شي بالنسبه لحياتكم بعد العرس .. اكتشفي لو ربع شخصيته و تفكيره من التلفون يبيلج اشهر والله ..

 

[Aloe Vera]

مادري بصراحة شلون طريقتكم بالزواج ما تدش عقلي
شلون تتزوجين واحد ماتعرفينه عيل شنو فايدة فترة الملجة ؟ اهو شرعاً حلالج و زوجج

 

[عاشقة الدوحة]

على حسب،، يعني احنا ما عندنا وحدة او واحد من اهلنا كلموا اللي بيخطبونهم قبل الملجة، الا انا لاني ما كنت متقبلة الموضوع ففضلت اني اكلمه مرتين ثلاث قبل ما اقرر القرار النهائي، والمكالمة تكون جدا عادية فيها تعرف على بعض وبس.

 

[عاشقة الدوحة]

لكن انصحج نصيحة، اهم شي قبل ما تقررين تكونين جدا مقتنعة فيه، والقناعة ما تتكون بدون سبب ، لا بد لها مسببات.

 

[miss.unique]

ترى هذا زواج مو لعبة او قرار يوم و تملين و تغيرينه ...
ومدح اخوانج شراح يفيدج ؟؟؟ اخوانج ما رح يحتكون فيه من بعيد لي بعيد .. مدح اخوانج مارح يبينلج عيوبه او مميزاته ..
دام الريال جدام شرع الله ورسوله زوجج كلميه تعرفي عليه .. عرفي طبعه وين يروح وين يرجع ..اذا كنتي حظريه طلعي وياه و روحي وتعالي .. بس الدخلة لا حبيبتي هذي بعد الزواج .. فترة الملجة احلى فترة اهي فترة الوله والشوق والاهتمام وماتتكرر بالعمر غير مرة وحده .. دامج مو مسويه شي حرام توكلي على الله

 

[المحاميه ن]

هذه احسن فتره تعرفين فيها طباعه كريم ولا بخيل شكوكي لو متفهم بس كلشي وفق حدود معينه لا تتخطيها الله يوفقك

 

[هيبة ملك]

حسب. عاداتكم. احنا. عندنا ماتكلمه الا ليلة العرس

 

[A p r i l]

لازم تكلمينه عشان تعرفين طبعه مب باجر اتزوجينه وانتي ماتعرفين شنو يحب مايحب شنو طبعه وشلون اتعاملين معاه !!! وتفهمون بعض يعني شلون تزوجين واحد ماتعرفين عن شي وغير جذي تكون مهيئه نفسيا لزواج ومتشوقه ....


المحبه والعلاقه بينكم بتزييد

 

[Sosota_20]

انا مع كلام فلانه 100%

انا مع تكلم البنت زوجها اذا ملجتهم 6 اشهر واقل لانه الوقت مو وايد طويل الايام راح تمشي بسرعه

شنو هالكلام يمل منج صج والله وين قاعدين كلهم يقولون هالكلام بس عشان يقنعون نفسهم ولا اهو مو واقع والله حجي يضحك ههههههه يعني بوقت الملجه يمل بس وقت الزواج سنين طويله مايمل شهالمنطق
واذا صار لاسمح الله ومل منج وقت الملجه فهذا سلميلي على مستقبلج وياه اذا وانتو بعاد مل عيل وقت الزواج راح يختفي من عندج من كثر الملل واهو مجابلج وهذا العيب فيه مو بسبة الملجه

انا مارديت هالرد الا عشان مصلحتج يعني شتحسين فيه بنت عمج تسولف ومستانسه وتتعرف على زوجها وانتي قاعده حاطه ايدج على خدج بس تتخيلين اسلوبه كلامه طريقته واخرتها تنصدمين مو نفس ماتخيلتي وقت الملجه

صج اني مو متزوجه بس من سوالف رفيجاتي يقولون صج صج هذي احلى ايام كل يوم طلعات وشوق و وله وسوالف ويتعرفون على بعض عكس بعد الزواج من يمر عليهم فتره خلاص تنسى هالطلعات ويقل وهالشوق لانه بيجابلها طول الوقت واختي بعد نفس الشي كنت اشوفها مستانسه حدها وتقول حدا وناسه شعور حلو

يعني اعطيج موقفين من رفيجاتي
رفيجتي الاولى حضريه : ايام الملجه تقول وناسه ريلي مدلعني مونسني تمدح فيه حيل بعد العرس وصار عندها ولد تشكيلي تقول عادي يمر شهرين مايطلعني كلش يقولها روحي مع رفيجاتج انا مو فاضي كله مع ربعه هني البنت عاشت وضع حلو بالملجه لانه حياة الزواج بعد العرس شي ثاني

رفيجتي الثانيه بدويه : هم تطلع مع زوجها فتره ولاتقولي انها تطلقت سالتها ليش شصاير تقول طلع بخيل حيل حيل مستحيل تعيش معاه لي درجة لمه يطلعها يقولها وين فلوس مهرج انتي دفعي كل شي انا ماعندي طلعت بلاويه كلها وقت الملجه البنت انحاشت منه قبل لاتتعاشر معه

واختي وقت ملجها كانت تطلع معاه وراحو اثثو شقتها على ذوقها واختارو كل شي مع بعض حتى العطور كل واحد اختار حق الثاني شنو يحب وعرفت ذوقه واهو عرف ذوقها

يعني هالفتره مو بس وناسه هم فيها تعارف تعرفين سلبياته ايجابياته شنو يحب شنو مايحب حتى شقتج تسوينها على ذوقج وذوقه مو ذوق اهلها ولا اي شي على السريع
وكل شي راح يبدا تدرج لين قبل الزواج بشهر تلقون نفسكم خلاص تعودتوا على بعض ومتشوقين حق العرس

اذا انتي حضريه فهالشي خالصين منه مايحتاج نقاش كل الحضر عادي عندهم
اذا انتي بدويه فعندي رفيجاتي البدو عندهم عادي ويطلعون واذا مو عادي كلمي امج على الاقل مكالمات مو لازم طلعات
لاتقولون عيب وتقاليد هالشي مو محرم وحلال تسوينه اذا انتو بنفسكم ماتحجيتوا وماغيرتوا هالعاده شلون بتتغير

وبس هذا رايي اذا ماستانستي بهالفتره خلاص طول عمرج مراح تردلج هالفتره تنسينها وتتحسفين عليها اذا زواجج مطول حيل اخر 5 اشهر قبل العرس كلميه

 

[سـٌگر معـقـود]

اول شي اهو طلب يكلمج ؟ طلع رقمج وتواصل وياج ؟
اذا اي انا اقول لاتردينه بعد زوجته انتي كلميه مافيها شي واذا متحفظين مولازم طلعات برى بالببت
بعدين يمكن يتطور الوضع يتعودون عليه اهلج ويوافقون تطلعين

بس اشوف انه اهو اللي رافض الفكره ويقول لاخوه لاتكلم مرتك !
فشلون بتكلمينه و تشاورينا وهو معارض هالفكره :/
اهيا كفكره مو معارضينهاا حلوه بس اهو مومقتنع شبتسوين !

واللي تقول الملجه احلى ايام استغليها الزواج عقب غير احب اقول شالفايده عيل بس استانس جم شهر وحياتي الباجيه مش حالك :/
او يعني اتذكر الملجه واستانس لوول غير ان مو كلهم نفس الشي بوقت الملجه في مشاكل
اكيد لان تو بادي التعارف وفي خلافات مرات تسبب فسخ الملجه فلا يبينون لج انها احلى فتره
ان شاء الله ايامكم بعد الزواج احلى واحلى

 

[عاشقة فانتسي]

يمكن قبل البدو لا . الحين الغالبية قبل الزواج يصير بينهم( رسائل+اتصال+طلعات) بس انا لانة عمرى 39 سنة يعنى دقة قديمة مااحب هالشي . وودى بس اشوفة بليلة العرس. لانة الصراحة صارت مشاكل وكذا عند الى يتساهلون بالطلعة وانها تطلع وتروح وكذا مع خطيبها حتى بعد كتب الكتاب. وصارت سالفة وحدة من جماعتنا طلعت من زوجها بعد كتب الكتاب( قبل الزواج) الرسمى. طلعت وكذا المهم نام معاها( لانها زوجتة) قانونيا وشرعا. لكن زوجها قعد يماطل فيها 2 سنتيت ليما هى رفعت علية قضية طلاق وطلقها القاضى . زوجها بعد مانام معاها خلاص مايبى يتزوج بس وهذى السالفة. انا مااويد طلعات مكالمات حتى وتس اب بينهم لا . خلهم مايشفون بعض الى ليلة العرس ويكون يوم خميس بعد ؟؟؟ اللة يوفق الجميع لما يحبة ويرضاة .

 

[لذه السكر]

يعني شلون على مدح إخوانج؟! زوج وإلا سيارة اهو؟!
منو اللي بيدخل معاه غرفة وحدة وينام معاه على فراش واحد؟! إنتي و إلا إخوانج؟!
شلون تقبلين على نفسج أصلاً بيوم و ليلة تتعرين جدام رجل ما تعرفينه ولا تعرفين أسلوبه ولا كلمتيه ولا كلمج؟ لي متى هالعادات البايخة اللي تعارض شرع الله أصلاً؟! زوجي حلالي على سنة الله و رسوله و ما أكلمه ولا يكلمني؟ وشنو مبدأ ملجتنا مطولة واخاف اذا كلمته يمل مني؟ عادّة نفسج مسلسل وإلا فلم طويل و ينمل منه!
انتي بشر و هو بشر..أرواح تحتاج تتآلف و تتودد لبعضها البعض..تفهمينه يفهمج تتعرفون على طبايع بعض شنو يحب و شنو تحبين مو خذوه فغلوه قبل ساعة كان غريب و الحين نايم يمي عالفراش!!!
ما يجوز احنا مو بهايم مكرم القارىء..
انتي الحين انسانة مسؤولة عن نفسج..وهذا زوجج على شرع الله يعني حلالج و انتي حلاله..كلميه و تعرفي عليه و قطوا هالعادات السخيفة اللي ما أنزل الله بها من سلطان..دفنوا هالعادات الدنيا تطورت و احنا ما عدنا بسنة ١٩٠٠.

:rerrerek::rerrerek::rerrerek::rerrerek:


واذا بمل منج من مكالمات شلون اذا جابلتيه 20 سنه ؟؟؟ جان محد ظل متزوج الكل ماااال