ماليزيا في شهر 11

[miss-pinky-q8]

السلام عليكم

حبيباااااتي ياريت تساعودني بجدول مثلا اليوم الاول وين اروح والثاني لي اليوم التاسع وجم يوم اقعد بأي منطقه والاماكن السياحيه
تكفي ماليزيا 9 ايام اول مره نروحلها واخاف ما يكفي الوقت وشلون استفيد من الوقت لاني مو عارفه الاماكن اللي تسوا هناك احنا اهم شي عندنا الوناسه بالمرتبه الاولى السوق مو ذاك الاهميه فياريت تساعدوني

بنسكن بكوالامبور بفندق برجايا تايمز سكوير شخصين مادري زين ولا مو زين منو جربه وتوني قريت انه اثاث مستهلك وفيه زهيويه صججججج عااااد منو جربته :eh_s(16):

اول يوم شسوي
وثاني يوم
..
...
....
لي تاسع يوم؟؟


وتسوا نتنقل حق جزر ولا بيضيع الوقت

لووووووووووول ابي اقطعها عدل موووو بالسوق لا بالوناسه



وراح ادعي لكم من كل قلبي اذا استانست
ولكم مني جزيل الشكر

 

[رووووفان]

رد : ماليزيا في شهر 11

شوف حبيبتي تسع أيام تكفي زين
أنصحج روحين بينيغ يومين وتردين الباقي بكوالالمبور وأنصحج تسكنين بفندق جي دبليو ماريوت نظيف ويهبل وبشارع العرب وروحي جنتنق
وتقدرين تروحين سيلانجور بينها وبين كوالالمبور نص ساعه وتقعدين بفندق صن واي لاقون فيه مجمع يهبل ومدينة العاب مائية

 

[miss-pinky-q8]

حبيبتي روفان اشكرج وعسى الله يهنيج ويحققلج كل اللي فبالج:yaaaaaarb:

يعني اليوم الاول : بينيغ (شنو الاماكن السياحيه؟؟ وباي فندق؟؟)
اليوم الثاني : بينيغ (شنو الاماكن السياحيه؟؟)
اليوم الثالث :كوالالبمور (فندق ميلينيوم او ماريوت..شنو الاماكن السياحية؟؟)
اليوم الرابع : جنتق (اروحلها من الصبح لي بليل وارد كوالالمبور)
اليوم الخامس :سيلانجور (اذا نص ساعه طريج من كوالالمبور ما تسوا احجز فندق فيها..الاماكن السياحية مدينة مائية وشنو)
اليوم السادس :
اليوم السابع :
اليوم الثامن :
اليوم التاسع:

تحسوووون وحده ضايعه :_080402ask_prv:
شرايكم بالجدول و اذا في تعديل او اضافات بليييز

 

[الطماطه]

رد : ماليزيا في شهر 11

بالنسبه لتسع ايام ماانصحج بطيران داخلي لأن المده قصيره وراح تتعبين
أول يوم توصلين روحي شارع العرب بكوالمبورفندق ميلنيوم حلو وبنص شارع العرب
إذا واصله بالنهار ريحي إشوي بالفندق وبعده إطلعي تمشي بشارع العرب لي الساعه 12 ونص فاتح كل شي
ووصيج بمطعم طربوش ترا احلى اكل عربي ذقته ويمدحون ناب الايرانيوفيه مطاعم الوجبات منتشره

بالنسبه لفندق برجاياحلو وفيه مجمع من عشر ادوار بس لاتسكنين فيه لانه موبوسط شارع العرب بس قريب أفضل ميلنيوم بوسط شارع العرب
ثاني يوم قومي من الصبح وروحي صن واي لاقون في سيلانجور تبعد عن كوالامبور 20 دقيقه عشان تقعدين بالمنتزه من الصبح لي ست المغرب يسكر المنتزه اذا سكره روحي للمجمع التابع له وتمشي فيه وتعشوا واذا خلصتوا ارجعوا لفندقكم اخذي شور وريحي وانزلي لشارع العرب تمشي واشربي عصير في محل عصاير على الشارع لذيذ
ثالث يوم روحي لمجمع الماينس تبعد تقريبا 20 دقيقه هذا مولازم تروحيله من الصبح لان فعالياته بالليل وفيه قوارب داخل المجمع بالليل فيه عروض
ضوئيه تغدي بشارع العرب بمطعم طربوش وبعده اطلعي للمجمع واقعدي فيه لليل لانه بالليل عجيب واذا خلصتي ارجعي لشارع العرب

رابع يوم اطلعي من الصبح لمنتج أفاموسا تبعد ساعه ونص وخلي راعي التاكسي معاكم لايروح يدخلكم ويقعد معاكم انتم اتفقوا معاه على السعر وكاسروه
اول ماتجين خليه يوديكم عالم الحيوان فيه سفاري وجزيرة القرده وحديقة حيوان وعروض الطيور والحيوانات والفيله والكابوي
لماتخلصون يمه عالم الماي انا مادخلته لاني ماراح العب
عالم الحيوان وعالم الماي تسكر الساعه ست المغرب
بعده خليه يمشيكم بالمنتجع اشوي على الساعه 7 ادخلي الكابوي فيه سينما ثلاثيه وفيه كرنفال يبدا من 8 الى 10 لايطوفج ممتع
واذا انتهيتم ارجعي شارع العرب وريحي بفندقج
خامس يوم قومي الصبح وروحي الشلالات اللي بكوالمبور نسية اسمها اذا خلصتي اطلعي لحديقة الفراش والطيور والبهار كلهم يم بعض ويسكرون على الست مساء وارجعي لشارع العرب
سادس يوم روحي لسوق الصيني والهندي بس شوفيه لاتاخذين شي نصابين وانتي طالعه روحي للبرجين تور تونس فيها اكواريوم وتمشي بالمجمع وفيه مطاعم
ويمه برج المنار روحيله يقولون فيه مثل المنظار تشوفيه روحيله يمه
سابع يوم اذا تحبين البحر روحي فندق افاليوم في بورت ديكسن تبعد ساعه ونص اسكني فيه يوم فيه غرف داخل البحر وغرف مطله على البحر
واذا ماتبين خليج بشارع العرب اقضي يومج في مجمعاته
ثامن يوم روحي مرتفعات جنتنغ من الصبح تبعد ساعه ونص جوها خياااال روعه بارد وتسكر 12 بالليل
اليوم التاسع آحر يوم خليه تسوق بشارع العرب اذاتبين هدايا للأهل
بالنسبه لتكاسي متروسين بشارع العرب بس انتي كاسريهم واتفقوا معاهم واخذوا رقمه احسن
وآنا ماحطيت جزر لان سفرتج قصيره ومابي اضيع وقتج بالطيران الداخلي وتروح عليج ايام حرام
روحي لمجمع فندق برجايا تراعجيب من عشر طوابق بس موبشارع العرب بس قريب 5دقايق مشي روحي للمجمع حلو

 

[miss-pinky-q8]

حبيبتي والله الطماطه بصرااااحه كفيتي ووفيتي واااايد ساعدتيني
ربي يحفظج ويوفقج وين ماتروحين ويحققلج اللي فبالج
ونستيني يالغاليه وخذيت وااايد اشياء من اللي كتبتيه

انا حجزت من قبل يومين
حجزت 3 ليالي في جزيرة بينانغ فندق بارك رويال
والفجر طيران داخلي كوالالمبور وبقعد 5 ليالي في فندق ميلينيوم

فراح يصير شوية تغيير بجدولج للاسف

اليوم الاول : الوصول اليى جزيرة بينانغ الصبح ..راحة بالفندق ..جولة على المدينة..حديقة الفواكه والفراشات والطيور والقرود والزهور..مطعم السفينه..تمشي بشارع الليل

اليوم الثاني : من الصبح رياضات بحرية (جت سكي سباحه برشوت)..راحة..الذهاب لمنطقة الجبل بالقطار واستئجار دراجة ..برج وجسر بينانغ ومتحف الالعاب ..مطعم الاسماك الحيه ايدين

اليوم الثالث : من الصبح رحلة بحرية الى جزيرة القرود للصيد الغدا يكون هناك شواء..العوده للفندق ..التمشي بشارع الليل واسواقه

اليوم الرابع : وصول الطيران الداخل الى كوالالمبور ..فطور بالفندق وراحه ..الصبح الى صن وي لاقون في سيلانجور المدينة المائية وعقبها المجمع التابع له..الرجوع للفندق وراحه ثم النزول لشارع العرب ونجرب محل العصاير لووول

اليوم الخامس : الذهاب من الصبح لجنتنق الملاهي الخاجية والداخلية والتلفريك وصالة التزلج والسينما

اليوم السادس : من الصبح شارع العرب تايمز سكوير الملاهي والتسوق ..مطعم ناب الايراني ثم راحة بالفندق ..العصر بحيرة تيتي فيها زوارق ومطعم..ثم البرجين كي ال سي سي والحديقة اللي يمه والمركز الاستكشافات العلميه والاكواريا..ثم برج الاتصالات المناره عشاء(صج لازم نحجز حق المطعم قبلها بيومين!!)ا

اليوم السابع : من الصبح حديقة الحيوان زوو نيقارا شلالات كوالالمبور ويمكن ما اروح الحدايق لاني بروح بجزيره بينانغ..كهوف باتوكيف..غداء مطعم الطربوش (اذا في وقت ريحنا بالفندق لوووول شغل وايد)..عقبها مجمع ماينز فيه عروض وحديقة ومدينه ثلجيه

اليوم الثامن : من الصبح الاسواق والسوق الصيني ..الظهر منطقة افاموزا والفجر رادين الكويت


شراااايكم بالجدول مع اني احسه وايد مزحوم وراح نتعب

اذا في اي ملاحظات او نصايح عالجدول اكون شاكرتلكم

 

[اتعبني غلاك...]

رد : ماليزيا في شهر 11

نصيحة مني لج تبين وناسة وجو روؤوؤوؤعة
روحي جنتنق احنا رحنالها بس يومين بس لو ندري ان الجو عجييييييييييب
جان طولنا فيها اكثر وروحي حديقة الفراشات ومصنع الكاكاو
واذا بتقعدين بكوالالمبور تقدرين تمرين على سيلانجور
فيها السن واي لاغون
بس ترى كوالالمبور ما فيها الا السوقة والمطاعم
اتمنى اني اكون فدتج....
تقبلي مروري

 

[*سوسو ستار*]

روحي بيننانغ 3 يوم اذا مارحتيلها جنج مازرتي ماليزيا اقعدي فيها 3 ايام او يومين روحي الرحلات البحريه رحلة صيد السمك تشووووق وجزيرة القرده

وخصصي يوم كامل من الصبح لي الليل حق جنتنق تهببببل وكوالالمبور باجي الايام

 

[*سوسو ستار*]

حبيبتي نصيحه خلو اليوم الاول للراحه بسيلانجور او كوالا لان تعب عليكم 5 ساعات طيران موشويه غير الترانزيت اذا في واجراءات المطار بتتعبون منها

 

[miss-pinky-q8]

يعطيكم الف عافيه حبيباتي ما قصرتو وقاعده اسجل الاماكن اللي تقولونها واخذ بنصايحكم عسى ربي يوفقكم مشكورين

 

[الطماطه]

رد : ماليزيا في شهر 11

جدولج حلو أهم شي وناستكم
تروحين وترجعين بالسلامه

 

[ά38Ł miήόήά ㋡]

رد : ماليزيا في شهر 11

بعد أأذنـج صااحبة المووضوع حتى انا بعد بسافر ماليزيا انشالله

بعرف بس جوهم الحين حر ولآ برد ولا شنو ..؟!

وأأبي العاب والسـوااالف هذي وين .؟

وشسمه جت سكي ميتتتته عليه هم بعد وين

و
و
وبس :$

اتمنى تفيدوني

 

[أم حمودي**MALL**]

اخذيني معاج

 

[miss-pinky-q8]

الله يسلمج حبيبتي الطماطه

اعقال مينونه : حياج الله حبيبتي بالنسبه حق الالعاب من كلام البنات وبحثي بالنت اكو بجنتنق ملاهي وبالنسبه حق الجت سكي والبرشوتات وغيرها تلاقينها بالجزر انتي شكلج نفسي تحبين الوناسه والمغامرات والحركه لووووول
بالنسبه للجو اهيا تقع عند خط الاستواء يعني جوها نفس ما اهوا طول السنه حر واشهر رطوبه يعني يبيلها سبورت وقطن الخفيف بس بالمرتفعات يكون شوي برد بس مو البرد القارص هالمعلومات من خلال بحثي وانشالله بروحلها واشوف لاول مره

ام حمودي حياج الله انا ابي اسافر ويا بنات جان زين سي السيد يرضا نروح قروبات بنات ونااااسه لوووووووول

 

[يا عيون سمي]

انا مثلج بس بغيت اسالج بجم التذاكر

 

[*وردة نرجيسية*]

اختي علي اي طيران مسافرة وبجم تذكرة؟؟؟؟؟؟

 

[miss-pinky-q8]

لانه حاجزين متأخر مالقينا الا الكويتية
والتدكره الوحده بـ 320 دينار