ماعندي خصوصيّة . . ومو حاسّة إني عروس !

[أحلام ورديـہ]

السلام عليكم ورحمة الله وبركاته

بنات ابغيكم تساعدوني شوي عشان أرتب حياتي وأعدل من نفسي

أنا عروس جديدة وصارلي 20 يوم تقريباً من رجعت من شهر العسل

ساكنة ببيت أهل زوجي والحمدلله مرتاحة بس في شغلات متضايقة منها

بالملحق عندنا غرفة وصالة وحمامين واحد بالغرفة والثاني بالصالة . . لكل غرفة بابها بس ناوين نسكر مكاننا بـ باب عشان تكون لنا شقة منفصلة

زوجي دوامه اسبوعين باسبوعين . . وأنا بهالاسبوعين اروح بيت اهلي

المهم بهالاسبوعين الي يكون اهوا موجود فيهم أحس نفسي مو عروس ابي اكشخ ابي البس بس مافي مجال لأن اخوانه بالبيت مع انهم اصغر مني بس بالغين ولازم طول الوقت بدراعة وملفع

ابي البس بجايم قمصان شورتات اكشخ على راحتي بس ما نقعد مع بعض بروحنا :eh_s(16): أغلب وقتنا بصالة بيتهم لأن اهوا يروح النادي لمدة 3 ساعات يوميا بين الغداء والعشاء وطبعا نقعد مع اهله . . وبالليل يا اما نروح ننام ووقتها البس على راحتي بس ما يشوفني بكشختي الا ثواني قبل النوم هذا اذا كان منتبه بعد

ومرات بدراعتي والملفع واحط مكياج خفيف كحل ومسكرا والبس ذهب ولا اكسسوارات يقول لي ليش كاشخه وين بتروحين ؟ احسه ما يحب المكياج حتى فطلعاتنا يحن علي عشان اخلص بسرعه ويقول لي مو لازم مكياج

شلون اتصرف انا كارهه نفسي بالدراعه والملفع طول اليوم ابيه يشوفني بشكل ثاني بس ماعرف البس شي ثاني جدام اخوانه
حرام جسمي الحين حلو مابي تروح علي الفرصة ابي اتهنى فيه البس واكشخ مثل ما ابي بعد كم سنة بتحسف على هالأيام
وشعري كله مغطيته بالملفع ولافته مافي مجال استخدم اكسسوارات واسوي بشعري حركات

والمشكلة اذا بنطلع من غرفتنا لي صالتنا اضطر البس شيلتي والملفع لأن المكان مفتوح

وغير جذيه ودي نقعد مع بعضنا أكثر وتكون لنا خصوصية أكثر بس عمتي لأنها اغلب الوقت بروحها تكسر خاطري الحمدلله هي حبوبة حيل ومرتاحة منها وما امل من القعدة معاها بس بعد ابي اقعد مع زوجي بروحنا واشوفه كفاية نص الشهر اشوفه ونصه لا

عطوني حلووووول

 

[لمى الهاجري]

حلج حلو سكي باب صالتكم سديه وخليه خاص فيكم عشان القعده وافضل انج هالفترة عروس يعني تقعدين مع ريلج اكثر وقت ممكن ولما يطلع نزلي تحت حق ام ريلج

 

[محروس قلبي]

اذا كانت صالتج لاصقه بغرفه نومج انا اقترح عليج انج تصكرين باب غرفه النوم تكنسلينه بالمره و تفتحين لج باب علي الصاله بحيث تكون دخلتج الاساسيه من باب الصاله ومنها تدخلين حق غرفه نومج وبجذي يصير لج خصوصيه تقدرين تطلعين من غرفتج الي صالتج من غير لا تتسترين 
و بخصوص الكشخه اذا شافج تلبسين و تكشخين يقولج ليش و حق منو ما عليج منه البسي و اكشخي اهو لانه مو متعود بس انتي علميه و عوديه خليه يحس ان الكشخه منج و فيج وان انتي بذاتج كشيخه و حلوه لا تحسسينه انج كاشخه له اذا حس انج كاشخه له خليه يحس انج كاشخه حق نفسج وانج جذي علي طوووول راح يحب هذا الشي فيج مع الوقت
ترا الرياجيل ما يعجبهم العجب تدرين لو ما كنتي تلبسين و تكشخين راح يشوف البنااات برا بالمولات وجذي وراح يجي يقولج ليش ما تلبسين لي جذي مثلهم و حزتها راح تروحين تلبسين و تكشخين  جذي مو حلوه تجي منه خليها منج وخصوصاً انتي توج عروووووس يعني تقدرين تشكلين الصوره اللي تبين عن نفسج بعقله وحتي لو يرددها عليج الف مره لا تكشخين او لا تلبسين ماله داعي لا تردين عليه البسي ما عليج منه خصوصاً احنا الحين بوقت البنات تشوفينهم بالشارع استغفر الله تقولين راحيه عررررررس فلا تخلينه يشوفج اقل منهم 

 

[قطوووة]

ميخالف توج جديدة لاتتحلطمين مع الوقت ياتتعودين يا هو يحس مادام هو زين واهله زينيين صبري شتسوين بعد

 

[A.E]

عادي طيب قبل النووم
اكشخي ويعنني تبي تسولفي معه
وراح يشوف جمالك ماشاءالله
وبعدين انتي بيدك تقدري تغيري حياتك
بالتوفي اختي

 

[مشتاقة الى الله]

ذكرتيني بمعاناتي الى يومنا هذا وانا بالدراعة والملفع والحين قررنا ننتقل لبيت بروحنا

دعواتكم يا بنات وإنتي يا صاحبة الموضوع الله يسهلها عليج ويفرج همج لا تكونين مثلي قدمت اهل زوجي عن نفسي وزوجي والحين طاح الفاس بالراس والعياذ بالله الله يحفظج عروستنا وان شاء الله راح تستمتعين مع ريلج والله يحفظكم لبعض فديتج

 

[عتآق الخيل]

الله يوفقك حبيبتي احلـآم وردية
وتتظبط الامور عالشوي شوي
لاتتضايقين عروستنا
ويوفق اختي مشتاقة الى لله
ربي يسعدكم .~

 

[!الجادل الصعب!]

المفروض مسكرين الباب من قبل تجين .. شلون شقتج مفتوحه بالطريقه هذي ..
رتبي امورج .. الوقت الي يكون زوجج بالنادي تكشخي ميك اب وسوي شعرج ولفي الملفع وقعدي معها ..
من يرد ردي غرفتج ولبسي الي تبينه وسولفي معاه وسوي له قعده حلوه بسيطه ..
مشي الامور تمشي ..

 

[Gifts&Occaions]

الله يوفقج

 

[أحلام ورديـہ]

مشكورين بنات ع النصايح . . في نقاط ذكرتوها استفدت منها

إن شاء الله بنسكر شقتنا بباب ويكون لنا مكان منفصل بس شلون أخلي قعدتي وياه بروحنا

حنا اكثر الوقت مع اهل زوجي بالصاله إذا كان اهوا بالبيت بعد مانقدر نخلي ام زوجي بروحها ماعرف احس مو حلوه

وبعد ما يرجع من النادي يكون وقت العشا ونقعد معاهم لين يروحون ينامون ! وحزتها نكون خلاص نبي ننام

على ما ابدل واكشخ يكون نام خلاص او حاط راسه يبي ينام :eh_s(11):

 

[ليمونة وزيتونه]

اب اااب

 

[Eng Jolie]

المفروض انتي عارفة الوضع شلون صاير قبل لا تتزوجين يعني وين بتسكنين

ماعليه حلج حلو تصكرين الباب وإن شاء الله ريلج يتقبل الفكره وماتصير مشاكل

والله يوفقج ويهنيج ولا تتضايقين انتي عروس ^^

 

[بولندية]

اهو ما خذا اجازة من دوامه عقب عرسكم على طووول ؟؟

حبيبتي انا نفسج كان ودي البس حق ريلي و نقعد مع بعض بس ماكو وقت ينام عقب الغدا على طول و لما يقوم يا يطلع حق النادي و لما يرد بليل اكون لابسة نفسج ثواني وننام حتى ساعات ما ينتبه حاولي اذا رد بليل تسولفين معااااه على اساس تقعدين معاااه اكثر

 

[انت مناي]

طيب انتي ليش تلبسين دراعه لبسي بدل انا ببدايه زواجي كنت عندهم مثلج بس كنت البس بدل واكشخ
وهو راح يتعود على شكلج وماراح يسالج ليش كاشخه وحتى اهله خليهم يشوفون كشختج مو يقولون باجر
عروس وماتعرف تكشخ ولا تلبس تعرفين كلام النناس سكري حلوجهم من الحين
​

 

[مشتطـه]

الله ؟


الحين اليوم كله مجابلة خالتج

حتى لو لج غرفه بس وبروحج
صكي باب الغرفه وقعدي انتي وزوجج بالساعات

ترى انتو لبعض مو لخالتج ما يصير 24 ساعه مجابلتها


يعني تغدي وياهم وقعدي عقب الغدا نص ساعه وروحي دارج انتي وزوجج

وعالساعه 6 طلعي لها وجابليها لما ال10
وروحي دارج وسهري مع زوجج


انتي اللي غلط

انا اعرف وحده دار وحده لها وفيها حمامها
وبين اهله مكاننهااا يعني اهي وضعها حيل صعب


اذا عندكم تلفزيون بالدار هذا احسن شي تسهرون فيه مع بعض


واي انا احب اقعد مع زوجي بروحنا
وبالساعات

اوكي خالتي بروحها انا مو ملزومه اقعد وياها طول الوقت
انا توني عروس بستمتع مع زوجي

احس السالفه سهله وانتي معقدتهااا

 

[MiSS B.K]

الله يعينج

 

[Patcholli]

اختي اشلون رضيتي بهالوضع قبل الزواج المفروض قبل لاتسكنين عنده يكون مظبط مكانكم بعدين يسكنج الصراحه مو عيشه هاذي بالطالعه والنازله شيلتي وعباتي على راسي ..!! خنقه ..!!!!!!!!!!!

المهم اذا ليلحين مافي باب لازم يحطلج عازل مؤقت سواء بارتشن او طربال ولازم يقول حق اخوانه انه مايقربون صوب غرفتكم المفروض اهله يراعون هالشي يعني ويحطونلكم شوية خصوصيه بحكم انكم معاريس ..

عجلي عليه واستعيلي بسالفة الباب .. انا اختنقت من وضعج عيل انتي شلون متحمله

كلش ولا خصوصيتي الصراحه مو كل وقت لي خلق اوادم ومجاملات ..!!

 

[أحلام ورديـہ]

مشكورين بنات . . مكانا من قبل جاهز بس الباب الي يسكر شقتنا ما سويناه لي الحين بقول لزوجي وبحن عليه عشان يسويه ان شاء الله
واخوانه مايوون صوبنا بس الي ييلس في البلكونه ولا يطل من الدريشه يشوف تحت

الحين مشكلتي . . شلون اخلي زوجي يقعد معاي بروحنا فترة اطول ؟ ؟ كيف اخليه يروح معاي الغرفة ونقعد بروحنا ! ! ساعدوني بأفكاركم . .

حتى صالتنا والتلفزيون ما نستخدمهم إلا نااااااااااادر

 

[Laidy n3ooma]

الصراحه الغلط منج

شكو تقعدون معاهم لين مايروحون ينامون ؟؟؟!!!

خلاص بعد العشا بنص ساعه صعدوا فوق شوفوا التلفزيون كشخي له سوولفي

ودي القهوه والشاي غرفتج

وسدي باب الصاله

لاتعودينهم تقعدين معاهم وايد

 

[...ليالي...]

لاتعودين حمولتج كل شوي مجابلتهم مايصير خلج ثقيله مافيها شي إنتي عروس فرصتج الحين
تحببينه. فيج لازم خلي
حياتج الحين كله تكشخين له وتتزكرتين
لاحقه عالرسميات والباب حني عليه يصكره