ماعندج خدامة ؟ طرق عملية لتسريع وتسهيل عمل المنزل

[حلمي الأمومة]

الطبخ بنات عندي ازمة فيييييييييه كله مطاعم ما قدرت انظم وقتي شنوتنصحوني اسوي بحيث اني اسهل على نفسي زوجي قااام يتذمر

 

[درة أهل الطولات]

مشكورة

 

[بساطه]

حلمى الامومة مشاركتج حلوه
اختى بالنسبة للطبخ اذا زوجج يقبل خلى عشاج خفايف والريوق بعد اكيد
بس خلى الدسم على الغداء ومثل ما قالوا الخوات قصى البصل والثوم والطمام وخضرواتج من بلليل وبعد التتبيله كله خليه بلييل واذا صار الصبح طلعى لحومج ان كان لحم او دجاج او سمك عشان بس توصلين من دوام يكون راح الثلج
وحاولى اذا مالج خلق انج تحطين فى المرق الخضروات المعلبة او الخضروات المجمدة مثل بزاليا والجزر وجذى
والطبخ اللى على رواق خليه بنهاية الاسبوع
انشالله تكونين استفدتى

 

[بساطه]

درة اهل الطولات
حياج الله انشالله استفدتى

 

[حلمي الأمومة]

ابي طريقةحفظ الخضرة والاكل يعني شلون البصل اقصصة واحطةبالفريزر عادي ولا لازم اخلط معاه شي عشان يحفظة مايتكون عليه بكتيريا

 

[معالجة نساء]

أفكارج روعه
يعطيج العافيه على هالمجهود

 

[nadoooy]

انا نفس الشي كله استخدم القلاية بالطباخ

 

["البتول"]

موضووع روووعه ميرسي صاحبة الموضوع
البصل قطعيه صغير وحطي عليه قفشه أوقفشتين زيت الطبخ عافيه أو غيره
الطماط قصصيه صغير بس لايطول أكثر من3أيام يتغير طعمه
الثوم فرميه بحقت البصل وحطيه بعلبه وبالفريزر مو الثلاجه أو أكياس صغيره يعني كل كيس حطي فيه قفشه كبيره
الماي بالغلايه أريح
لريوق جهزي الشغلات العاديه بالليل مثل الجبن والزيتون والمربى كل واحد بصحن وغلفيهم وعليج الصبح بس تفوحين البيض
وإذا تذكرت شغلات ثانيه بأرجع لنفس الموضوع

 

["البتول"]

لريوق جهزي الشغلات العاديه بالليل مثل الجبن والزيتون والمربى كل واحد بصحن وغلفيهم وعليج الصبح بس تفوحين البيض
وإذا تذكرت شغلات ثانيه بأرجع لنفس الموضوع

عن الحلال والحرام
هذي الفكره :bbbiu:أخذتها من وحده بمنتدى ثاني الله يجزاها خير

 

["البتول"]

وعندي فكره لزعتر عشان مو كل يوم أحط بالمقلا زيت زيتون وأسويه
سويت كميه زعتر وحطيتها بعلبه وبالثلاجه
ولمن أبيه أطلع العلبه قبل بربع أو نص ساعه أو بارد عادي وأحشيه بالصمون أو الخبز

ولي رحعه إن شاءالله إذا تذكرت شيء

 

[جذابه بنت ذيابه]

موضوع روعه


لاهنتي غلاي ..


اخصص يوم لغسيل الملابس ويوم لكوي الملابس
وهكذا

 

[noor الدنيا]

noor الدنيا مشاركتج روعه والله عطيتينا افكار انزين الفلفل جم وقت تنقعينه وجم فترة اقدر استفيد منه بهالطريقة يعنى يكفى اسبوعين مثلا؟ انزين وطعمه يصير نفس الطازج مال الجمعيات ؟انزين هالطريقة اقدر اطبقها عالجزر مثلا والبطاط؟ عفية ردى انتظرج

هلا حبيبتي ,,آىسفه ما قدرت ارد عليك قبل كذا .. شوفي ياقلبي انقعيه خمس دقايق علشان ينزل الغبار بس ,, و بعدين غسليه عادي ,, و ممكن تستفيدين منه شهر او أكثر ,, بس ما ينفع للسلطة ,, يعني بس للأكل المطبوخ ,, و الجزر أخزنه أكثر من شهر في الفريزر, جزء أبشره , و جزء اخليه مكعبات ,, أما البطاطس ما أدري ممكن يتغير لونه ؟؟؟؟؟

 

[ام جي جي الحلوه]

الطبخ بنات عندي ازمة فيييييييييه كله مطاعم ما قدرت انظم وقتي شنوتنصحوني اسوي بحيث اني اسهل على نفسي زوجي قااام يتذمر

حبوبة لاتازمين ولا شي انا بقولج طريقه تسهل عليج طبخ الغدا
في يوم الويكند اخذي لحم الي يكفيج الاسبوع كله وطبخيه واذ برد حطيه باكياس بالفريز واذا يتي من الدوام طبخي مع الخظار المجمدة الي تكون جاهزة او طبخيه مع اي شي يكون سهل

 

[mweegah]

عم نفسي عندي بيبي عمره 6 شهور و ساكنه بروحي و ما عندي خدامه
بالنسبة للطبخ فوحي ديايه و سحبيها و حطيها بالثلاجه, تقعد اربع ايام عادي
يوم فوحي معكرونه و حمسي الدياي معاها و مشروم و كريمه
يوم مع خضار و صويا صوص
يوم مع بصل محمر و صماق و زيت زيتون
يوم مع مايونيز و ذره و حطيه بصمون
يوم حمسية مع خضار و عيش و هوت دوج و صويا
انا صراحه افوح ديايتين و يكفوني 5 وجبات لان بس انا و زوجي

عندج الكفته سهله و سريعة
سويها مرق مع فاصوليا او بطاط او ساعات سوي المرق خاثر حيل يصير جنه صوص تغيير يعني
يمكن تستغربون بس مره حطيت معاها بامية و شوية صبار صارت تينن

العيش انا اذا ابي شي سريع اسوي عيش شعرية, لا ينشخل و لا شي حمسي الشعرية مع زبده ليش تصير ذهبية و حطي بهارات المشخول و حمسي العيش شوي معاها و حطي ماي و نطريه لين يصك, لذيذ و ناطع و سريع
هذا حق الطباخ
شخصيا ما احب احط الخضره بالفريزر احس تخبط
بس اشتري احسن انواع السكاكين واااااااااااااااااااااااااايد يريح بالتقطيع و الخضرة اللي تنبشر بشريها اكبر حجم, البصل و الجزر و الملفوف مثلا


اما التنظيف فاحسن شي سويته اني اشتري بخاخات حق المطبخ و الحمامات و امسح اول باول, و التنظيف القوي مرتين بالاسبوع, والله يا بنات ريحة البخاخات نظاااااااااااااااااااااافه احبهم


الكوي قمت ما اكوي وايد اشياء مع بعض, لا طلعت الهدوم من النشافه و اهم حارين اصفطهم و اكوي اول باول اللي بلبسه

مميات البيبي انقعهم قبل لا اغسلهم
و اكل البيبي اسوي حق يومين و احط بالثلاجه بس ما اخليه اكثر من 24 ساعه بالثلاجه
هدوم البيبي ما اكودهم ابدا, ساعات والله بالمغسله اغسلهم اول ما ابدلها و اشرهم على طول


بالنسبة للغسيل مرتين بالاسبوع و الملابس الداخلية ساعات بالايد هم بالمغسله اول باول, لا تنسين تنظفين مكان الصابون بالغسالة الاوتومتيك ترى يتكود و يعلق بعدين

الفاكيوم كل يوم عالسريع

ان شاء الله اكون فدتكم


و نصيحتي للكل يبي شركة او خدامه يومين و نظفي كل شي 100% علشان يسهل عليج انج تتابعين بعدين, يعني ابدي على نظافة

 

[حظ من عنده انا]

يعطيكم العاافيه يالسنعات

صراحه المووضووع رووعه ومفييد

 

[قلبين وسهم]

خوووش موضووع وماقصرو اللي شاركووو

 

[منووله مشعل]

خوووووووووووووووووووووووووووووووووش موضوع تسلم الاياااادي

 

[NEW WOMEN]

ربي يجعله في موازين حسناتك

 

[حبوبة الأطفال]

بالنسبة للطبخ .. أحب أتعلم الأطباق السريعة والسهلة وأهم شي تكون لذيذة

أحب أتابع برامج طبخ على قناة فوود نتورك إلي يسوون أطباق متنوعه لشخصين أو أكثر أقل من ساعة

حلو الوحده تنوع أكلها لكن يناسب وقتها

والشي الثاني
مثلا أحب أخصص وقت الكوي وأنا أتابع برامجي على التلفزيون .. طبعا أكوي أسرع وقت الدعايات ههههههههههههههه

هممممممم إذا ذكرت شي بقولكم

ويعطيكم العافية على الموضوع الحلو

 

[نفـــائس]

اقلي الباذنجان وارتبه بالعلبه واحطه بالفريز حق المصقعه او مكعبات للسلطه
الخبز اقطعه واقليه بالفريز للفتوش
اي شي زايد بالفريز ما اكب
اطلع دجاجه ناكل نص والنص الثاني انتفه حق اكله ثانيه وبالفريز مايضره
بيجي يوم تعبانه مالج خلق نسوين اللي كلشي موجود طلعي وحمي

حق العيازين مثلي