مادري صارت فيكم ولا بس انا

[brettey]

اشلونكم بنات بكتب موضوعي من غير هجوم رجاءا الي بتتناجر لا ترد
لان مابي اتناجر واتوقف ونفسيتي صفررر
بصراحه لاحظت شغله
من تجاربي بدعاء فادني او استغفار ارد ادعي فيهم واستغفر مره ثانيه مايفيد معاي استغفر الله ومو مره تصير كذا مره
ومو بس انا هم كذا عضوه سولفوا لي عالخاص والبي بي قالوا لا تكتبين تجاربج العين حق وصارت معاهم وقالوا لي سووي شغلج بسكات ادعي واستغفري حتى اذا انفرجت لا تقولين
انا ما اقول ان العضوات هني حسودات او عينهم حاره
بس احيانا تصير فزه للشغله
يعني مره عضوه بالزوجيه يت كتبت عن علاقتها مع زوجها وان يموت فيها وعن نصايحها للبنات باساليب المعاشره والتجديد
يتني عضوه كانت تفضفض لي وكانت تعاني وايد من زوجها وخياناته وكان ماذيها ووطلقها وتقول يا بختها حظها حلو ريلها يحبها ليش احنا مو جذي عليها بالعافيه بس ليش احنا مو جذي
وهم لما تقرا ان في ناس انفرجت همومهم كانت تقول متى انا تنفرج همومي هذه عليها بالعافيه انفرجت همومها
انا مالومها كلنا تحوشنا هالحاله
بس الواحد لازم يقول ماشاء الله
والله كل الادعيه الي كتبتها لكم الحين من ادعي فيها استغفر الله ماقامت تييب معاي نتيجه
واستغفر وادعي واقيم الليل
انا من 10 سنين مريت بمشكله كبيره وكنت اقيم الليل وانفرجت عليي خلال اشهر
وذكرت للناس وكتبت تجربتي بهالمنتدى ومنتديات ثانيه
والله من عقبها من اطيح بمشكله اقيم الليل يا انها تنحل بصعوبه ومو بالشكل الي انا ابيه يا ماتنحل
الحين من سنه ونص طحت في نفس المشكله الي طحت فيها من 10 سنين الله وكيلكم مواظبه على صلاه الليل صج ساعات اوقف بس ارجع لها بس خلاص كل مالها وتتسكر في ويهي والحين تعقدت خلاااااص صعب تنحل الا بمعجزه من الله
والمعجزات كانت على زمن الرسل
ترى مو بس انا كذا عضوه نفس حالتي من يذكرون تجاربهم بدعاء معين عقب مايفيد معاهم
سواء بهالمنتدى او غيره
والله نصيحه دايما من تقرون مواضيع من هالنوع ذكروا الله قولوا ماشاء الله العين حق
العين تفز ساعات

 

[هب العطر]

شيلي هالاشياء من راسج

كل شي ينحسد الا ( رب العالمين القوي المتين ) اقوى من عباده


استجابه الله لج لها دخل بمشيئه الله ,, دامج تدعين الله , ما فيه احد يحسد الدعاء , مستحيل


منو اللي يستجيب ؟؟ الله سبحانه و تعالى


يعني بعيونهم استغفر الله يقدرون يأثرون على رب العالمين ؟؟ استغفر الله ,, و تعالى الله علوا عظيما .


ما فيه شي بالدنيا اسمه ( يحسدون الدعاء او يحسدون الاستغفار )


يمكن يحسدون النتيجه , يعني اذا وحده يالها رزق فلوس يمكن تنحسد و تروح فلوسها


بس ارتفاع الدعاء لله او ارتفاع العباده لله تعالى , هذي مستحيل تنحسد


يمكن ينحسد الشخص اللي يدعو , يعني يحسدونه على ايمانه ,, و يصير شوي متكاسل ,,


بس ارتفاع الدعاء و الصلاة و العبادات , لو يبققون عيونهم من السبت الى الاحد , ما بيدهم شي


لان كل شيء تسوينه من عبادات , رب العالمين هو الوحيد اللي يقبلها او لا ,, البشر مالهم دخل و لا احد له دخل




اللي فيج الحين وساوس ابليس


طنشي و تعوذي بالله من ابليس و كملي و استغفري , بس لا تقولين لاحد انج تستغفرين عشان ما يصير رياء


او انتي تنحسدين و تتكاسلين .


بس

 

[بطوووطة$بيضة]

حبيبتي كلنا ندعي ونقوم الليل

بس مو معناته ان الله سبحانه يستجيب اي دعاء ندعيه ...او اي شي في خاطرنا يصير

ومومعقوله اذا الله ما استجاب دعائج بتقولين عطوني عين علشان جذي الله مايستجيب لي دعائي!!!!!!!!!!!!!!

 

[ببي جونسون]

والله انتي نفسي ادعي 24 ساعه واصلي ماكو فااايده حظي ميت ميت ماامنه امل

 

[مسس غلوي]

استغفر الله ..حرام هالتفكير ..الدعوه إذا دعيتيها اما تستجاب او تؤجل او يرفعها الله عنج لانه خيره لج .. تمنين على ربج بالدعاء وقيام الليل..الله يهديج .. الدنيا رايحه والزوج رايح مايبقى الا عملج الصالح .. ترا الزوج مو كل شيء بالدنيا .. فكري انج متعافيه وتشوفين وتمشين غيرج محروم من هالاشياء .. ا

 

[لمى الهاجري]

بنات ادعولي بالتوفيق تكفون لا تنسوني بصلاتكم

 

[قلبي وينك]

كلامج فيه نوع من الصحه من ناحية الحسد وكتمان الحوائج
بس يمكن خانج التعبير بمسألت استجابة الدعوه لانه هذا الشئ بينج وبين رب العالمين ما في اي شخص ولا قوه بينكم تقدر تتدخل ولا تنسين انه الله ما يرد دعوة عباده ابدااااا بس ياجلها او يمسح منج مصيبه او سيئات او يعوضج فيها يوم القيامه
حتى يقولج الله يستحى ان يرد اي شخص رفع يديه للدعاء حتى لو ما كان مسلم وغير المسلمين بس غير المسلمين طبعااا جزائهم دنيوي

 

[HaAaDoOol]

اناا حظي مصخم
مهماا سويت اصلي واقرا قرآن لاكن ماكوو فايده كلله مشاااكل
وسمعت ناس شيوخ يقولون كل ماكثرت المشاكل عند الانسان كلما الله تعالى يحبه
يعني انتي الله ان شاءالله راضي عليج ولاتحاتين قولي هذا كل شي الله كاتبه مو تقولين ليش وشمعنى انا ترا مو بس انتي حظج يطيح الصخر فيه ناس وايد يمرون بنفس ظروفج واصعب وليلحين صابرين { وان الله مع الصابرين }
صبري وان شاءالله كل شي عندج من تعب وهم وحزن يروووح

 

[لحن التياعي]

اقضوا حوائجكم بالكتمان
بنات نصييييييحة اللي سعيدة مع زوجها وكريم معاها ويحبها لا تبين لاحد والله الناس ماتعطي خير
راح تقلب حياتها فوق تحت
حسبي الله ونعم الوكيل
انتي سنة تنتظرين الفرج انا سنين
من عمري 19
مااقول الله مااستجاب لكن له حكمة يمكن تكفير لذنوبنا او اختبار لنا
لكن اللي يصبرنا ااننا مسلمين وعارفين ان الدنيا دار ابتلاء واختبار والاخرة دار الفوز والخسران
يارب اجعلنا من الحمادون لك على كل حال

 

[الريم الشمالية]

استغفري ربك انتي ماتدرين ربي كاتب لك الخير وين ادعي يعوضك باللي احسن منها

 

[granted]

احياناً الشغلة ماتتسهل خيره
انتوا لمن تنوون تسون شي او تقدمون على شغلة استخيروا وربي بيسهلها حتى لو شغل او دراسة او عملية او اي شي
وعلى فكرة وايد بنات يحطون عينهم على غيرهم
اهي ليش تتزوج
اهي ليش تتوظف
اهي ليش تحمل وانا لا
افرحي لغيرج مثل ماتفرحين حق روحج وربي بيرزقج على قد نيتج هذا شي مؤكد

يعني نادر اشوفهم يقولون ماشاء الله صح كلامج

اما الدعاء مااعتقد انه فيه عين لانه بينج وبين ربج حتى لو ذكرتي هالشي لحد مااعتقد انه بياثر على استجابة الدعاء

 

[زهرة دلقينيوم]

انا من زمان كان ودي اسجل معاكم بس عشان اقولكم مو كل شي ينقال
بالذات اللي تكتب باقي على ولادتي جم شهر او اللي تكتب باقي على زواجي كذا يعني وايد حريم وبنات يدشون على المنتدى وفي حريم مساكين مايحملون وماتقدر تحمل واللي مافيها عيال واللي ودها تتزوج وماجالها النصيب واشياء واايد واللي تقول ريلي سوالي ريلي يحب هالحركه ومادري شنو
كلمتين بقولهم
العين حق

 

[قموووره]

في ايه في القران تقول : افحسب الذين امنوا ان يقولو امنا وهم لا يفتنون

التوفيق من رب العالمين وحده وما تطولين الي تبينه الا بقربج منه بس ابليس يبي يقنعج بهالفكره علشان توقفين صلاتج ودعائج وعلشان تقولين الكلام الي قلتيه الحين !
والله يتني فتره كل ما احط سورة البقره في بيتي اتهاوش مع ريلي هوشه شكبرها وبعدها قمت اقول شالسالفه من اشغلها نتهاوش وكنت استغفر الله ساعات اقول مابي اشغلها مالي خلق هواش بعدين الحمدلله تلاحقت نفسي وتعوذت من ابليس واستوعبت الرساله الي ابليس يبي يوصلها لي وقمت اشغلها واقول والله لو تصير حريجه هم بشغلها .... يعني تغلبت على ابليس ولله الحمد وكاني الحين احطها ولا في هواش ولا شي والحمدلله
انتبهي حبيبتي هذا مدخل ابليس ... اما بخصوص الحسد او الفزه فالعين حق والرسول عليه الصلاة والسلام قال قضوا حوائجكم بالكتمان
والله يفرج همج ويرفع عنج ويسعدج في الدارين حبيبتي​

 

[قموووره]

لو اطلعتم على الغيب لاخترتم الواقع

الحمدلله على كل حال ما تدرين وين الخيره؟ ربج اعلم .. لا تتشرطين بالدعاء وتقولين ابي جذيه وجذيه ! قولي يارب اكتب لي الخيره وربج اخبر بالي فيه الخير لج​

 

[Queen.H]

كل شي خيييييييييييييييييييييره كل شي يصير بدون استثناء
لا تقولين شنو الخيره بموضوع ,, والله العظيم ان مرات أشياء تحسين لااا مافي منها خيره كلش,, حتى لو أحد ظالمج لو شنوو و يطلع خيره بشي انتي كلش مو متوقعته ..

والله ما يرد دعوه اذا ما فادتج الحين بتفيدج بالاخره

 

[قاهره عذالي]

بريتي

الظاهر ان طول الابتلاء وعدم حله

اثر على ايمانج

سيدنا ايوب عليه السلام

سنين مبتلى

مو سنه ونص

وما يأس من قدرة الله

استمري حبيبتي في ذكر الله والاستغفار وقيام الليل

وتقربي من الله

ان ما انحلت مشكلتج هذا ما يثنيج عن الاستمرار في الدعاء

وربنا علام الغيوب

يعلم بكل شي

وعسى ان تكرهوا شيئا وهو خير لكم

ماتدرين حكمة ربج شنووو

وهالابتلاء ان شاء الله تكفير ذنوب

هذا الشيطان يوسوس لج

انه انتي تستغفرين وتعبدين الله وتقربين منه وتدعين

وان الله ما استجاب لج يعني ماكو فايده يعني انا انحسدت عشان جذي الله ما يستجيب

تفكير كلش مو منطقي

 

[Queen.H]

بعين انتي يمكن مو محسنه الظن بربج وحاطه ببالج انه ما راح يستجيب لج ,, حتى لو عقلج الباطن مو مقتنع

لازم تكون ثقتج بربج كبيره و حطي ببالج ان الدعاء اللي تدعينه مستجاب مستجاب لأن هذا الصج ,, الله موجود و الله رحيم و الله كريم والله مجيب ,, بس العيب فينا

(و اذا سألك عبادي عني فاني قريب اجيب دعوة الداعي اذا دعا , فليستجيبوا لي وليؤمنوا بي لعلهم يرشدون)

تدرين وانا أكتب الكومنت جان أسمع هالايه ابوي مشغلها بداره

 

[الاهله]

الي مافيها عيال ولا ماتحمل بتحسد الي حملت وش هلكلام والله نفرح لغيرنا ونقول الحمدالله على كل حال الي رزق فلانه بيرزقنا

ليه حاطين براسكم ان الي ماحملت تحسد الي حملت

لاحول ولا قوة الا بلله

 

[نبضكم]

بعين انتي يمكن مو محسنه الظن بربج وحاطه ببالج انه ما راح يستجيب لج ,, حتى لو عقلج الباطن مو مقتنع

لازم تكون ثقتج بربج كبيره و حطي ببالج ان الدعاء اللي تدعينه مستجاب مستجاب لأن هذا الصج ,, الله موجود و الله رحيم و الله كريم والله مجيب ,, بس العيب فينا

(و اذا سألك عبادي عني فاني قريب اجيب دعوة الداعي اذا دعا , فليستجيبوا لي وليؤمنوا بي لعلهم يرشدون)

تدرين وانا أكتب الكومنت جان أسمع هالايه ابوي مشغلها بداره

كتبتيها غلط
بنات حبيباتي هاذي ايات قرانيه لا بغيتو تكتبونها نقلو حتى لو حافظيها علشان التاكيد وماتقعون بخطا

هاذي الصح
وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُواْ لِي وَلْيُؤْمِنُواْ بِي لَعَلَّهُمْ يَرْشُدُونَ


( دعان وليس دعا )
ارجو الانتباه غاليتي :eh_s(17):
:eh_s(17):

بريتي حبيبتي فعلا هاذي مداخل من الشيطان لا تسمعين له واستمري بالاستغفار والطاعات وقيام الليل
واقري الرقيا الشرعيه وواظبي عليها :eh_s(17):
اتركي كل المعاصي والاثام ومنها صورتج الرمزيه يالغاليه حاطه صورة مراه ادري منتدى نسائي لكن هم الشباب اهني كلا يدشون يشوفها وتاخذين اثمه
والله ماتدرين سوي شي بسيط الله يفرج همج سبحان الله ماتدرين لو غيرتي الصوره لوجهه الكريم تنفرج بعض همومج :eh_s(17):
فَمَنْ يَعْمَلْ مِثْقَالَ ذَرَّةٍ خَيْرًا يَرَهُ
حتى الاعمال الصغيره سويها كل شي فيه خير سويه :eh_s(17):

وبالتوفيق بنوتات :eh_s(17):

 

[brettey]

مشكووورين وماقصرتوا
لا والله العين حق والله الكلام الي قلته صاير
واحيانا احس بتاكسل استثقل قيام اللسل والاستغفار اوقت ساعتي على صلاه الفجر اول اقوم بحماس الحين لا احبااااط مو يأس بس مادري تعبت
امس واول امس صليت الليل وقمت ادعي وابجي انهرت والح بالدعاء ارتحت بس من اصبح راسي ثقيل وضيقه
استغفر وادعي بس الضيقه ماتروح
اقرا الرقيه وساعات ماقدر
من جم يوم فجيت المصحف قلت بقرا جزا ماكو صفحه وصكيته
حاولت اقاوم احس قلبي مقبوض ليش مادري
وبعدين صدقوني الناس تطالع
امس اسولف على رفيجتي عن سالفتي تقول بنت عمها الي ماتهد دروس دينيه ولا صلاه ولا ذكر تختم القران بثلاث ايام
يتها وحده بدوامها اشكره بطتها في ويهها بل تختمينه بثلاث ايام وااااي انا ماقدر ماعندي وقت شلون تقدرين
تقول هذا الحين لها شهرين ما مسكت القران مو قادره بس تبجي


وااااي ودي اواظب من غير انقطاع ودي بس ياربي ثبتني
وانا مو بس ادعي وقت المشاكل انا على طول الحمدلله

حتى الرزق الماده اذا ضاقت فيني استغفر وادعي اييني الرزق بنفس اليوم او عقب جم يوم
الشهر الي فات اسبوع كامل مريت بضيقه ماديه واستغفر وادعي لا والمصيبه نزل معاشي امس خاصمين مني مبلغ وقدره من غير سبب وهذا انا بعد شوي بروح اطلعها من خشومهم وعاد حبالهم طوال مايخلصون
توه موظفه الاستقبال عندنا جيكت لي بالسيستم تقول ماعليج خصم وكل امورج تمام
حتى الحين قلت ببدي مشروع تجميل وقاعده اشتري وزهبت من مده وانا ازهب فجاه انقبض قلبي وهونت حتى بنيتي اخذ دوره تجميل عشان اقدر ابدي كخبيره تجميل

قلت همتي والله مادري شفيني