ماتبي الروضه شسوي

[ام فجر3]

هذا الاسبوع الثاني وهي تبكي ماتبي الروضه وتقول موحلوه وغيرتها الحين تقول مابغى الماما اللي بالروضه ابيك انتي كسرت خاطري وفكرت اطلعها بس مناهجنا جديده وصعبه احترت شسوي ساعدوني

 

[miss_heathrow]

حبيبتي لا تصيرين حساسه وايد خليها تبجي يبيلها شهر تتاقلم

انتي اي مدرسه كنتي موديتها و شنو المدرسه اللي غيرتيها

انا بنتي متعلقه فيني وايد ولي الحين تبجي وتصارخ وساعات تسخن وسهال بس عادي تحملي


شوفي انا مشيت معاها بنظام يومي حيل

الساعه 5 ونص تتعشى 6 تدش الغرفه تنام تقوم الصبح 5 ونص 6 مصحصحه العب معاها ونلون ونتريق عدل واقوم اسبحه وادخلها بيبيات تسبحهم واشغل قناة طيور الجنه اغاني اطفال اعلي الموسيقى او ام بي سي 3 ببايات

البسها واقعد معاها اقولها شوفي اذا بجيتي ما اوديج الجمعيه وصج تتنهوص بس كل ما اذكرها بالجمعيه تسكت قبل المدرسه اوديها الجمعيه واخليها تشتري اللي تبي تخشه عندي وتدش مدرستها
بالجمعيه اسولف معاها اقولها سويلي بيباي وبوسيني وصج مسكينه واهي مغورقه ومبوزه باستني ودشت صفها


شوي شوي الياهل يتعلم بس صبري عليها شوي

وطمنيني عليها كل يوم حبيبتي

 

[الوردة المكنونة]

انا بنتي نفس الحاله اولى روضه كل يوم تقعد الصبح مستانسه تتسبح وتتريق واطالع قناى براعم والساعه 7 ونص اوديها الروضه بس اوصل عند باب الروضه تقول تقعدين معاي بالصف اقولها ماشي اقعد شوي لين تنشغل مع الايله وانحاش ترى عادي عشان اول مره يفارقونا يعني ساحبتها من حضنج لي الروضه يعني يبيلها وقت اتعلم حتى المدرسات عارفين هالشي ويقولون عادي كل اليهال جذي مع الوقت يتعودون

 

[ام فجر3]

ماقصرتوا حبيباتي ريحتوني بردودكم والله نفسيتي تعبانه اليوم تقول الماما خزتني الروضه مافيها تلفزيون تتحجج تعالي معاي وتمسك رقبتي تقول ماما انا احبك ابغى انام عندك الروضه زهق تكسر خاطري بسوي مثل ماقلتولي والله يساعدها على العالم الجديد

 

[al_jood]

المساله يبيلها تتعود شوي شوي

 

[اللهم الجنة]

ميخالف خليها تبجى بعد فترة تتعود

 

[ذهبيه مرصعه بألماس]

يوووووو

انا عيالي بدعووووو
بالحضانه ... قبل الروضه كنت مدخلتهم حضانه عشان لمن يوصلون الروضه يكونون متأقلمين ...
و بالذات بنتي

كانت تبجي لين ترجع
و تلوى و تشكي من بطنها

و تصارخ

و ابوها يقولي لاتودينها ذبحتي بنتي

خليها لا تروح
و كنت اروح معاها و اقعد عندها لييين تأقلمت مع الاطفال و الابلات

و كل يوم هديه ( والله يخلي بو 100)

لمن تأقلمت شوي

و باولى روضه نفس الشي شهر كامل ..
بعدين خلاااص استسلمت للامر الواقع و قامت تروح و اهي زعلانه و ترجع و اهي فرحانه لأن امر الجمعيه اشتريلها حلاو ..

 

[أم@الحلوين]

عاااادي حبيبتي كلهم جذي
انتي حاولي تقطينها وتطلعين وخلج قويه ادري انها تكسر خاطرج بس فكري انها هم لازم تروح الروضه وتختلط مع اليهال
وكثر ما تقدرين شجعيها ويبيلها شغله اهياا تحبها او لعبه لمن تتعود والله يخليها لج ويفرج فيهاا ياااااارب

 

[توته شيطونه]

وي وي وي الله يعينج والله

انا للحين ما جربت بنتي سمل عليها توها صغنونه الله يعينا والله

 

[MyLittleBerry]

رد : ماتبي الروضه شسوي

وييي عادي

انا ولدي من اول يوم روضه واهو بجي لي درجه انا عبايتي تقولين مطلعتها من الغساله مبلله ولابستها كل يوم بجي كل يوم

بس اليوم اسم الله عليه صدمني برحه دخل الصف وراح عند الابله

طلعت بسرعه سويت يسسسسسسسس من كل قلبي

خصوصا اولى روضه يبيلهم بال طويل لان من حضنج ومن البيت لي بيئه بره البيت غريبه عليهم

فعلبالهم ماتبينهم والله انا بنتي اذكر تقولي انتي ماتبيني تبين قطيني مع اليهال بره طالعي شنو تفكيرهم علبالها موديتها ملجأ !!

 

[كويتيه ذربه]

الله يخليها لج ان شاءالله

انا بنتي نفس الشي من الحضانه لي اولى ابتدائي لازم افلام ودموووع وبجي
تخيلي بعمر الحضانه كانت حتى تخاف من ملابس الحضانه وتبجي لانمر الشارع اللي فيه الحضانه يبوووووي شيسكتها
وانا اقعد بالسياره ابجي اكثر منها
غضب تعودت وصلت الروضه كل يوم تبجي تبي الحضانه وماتبي الروضه
خلصنا من الروضه الابتدائي قامت تبجي تبي الروضه
اخر شي خلاص قلت اقوي قلبي واخليها وامشي ولا اشوف وراي
تخيلي لانادي نقدر نسجلها ولا شي
قلت غلطتي من البدايه عودتها كنت اقول خلاص اذا بجت مو ضروري تروح

اهم شي الله يعافي بو100
كل بدايه اسبوع كنا نوزع العاب
او ساعات كرتون بفك او بسكوت
ويوم نشتريلها استيكرز وتلصق على ملابس البنات
والحمدلله الحين بثالثه ابتدائي تعودت ولمن تشوف يهال يبجون تضحك عليهم<<<<<<<< قلت قصه حياتي

 

[ام فجر3]

ماقصرتوا سويت امس مثل ماقلتولي مسكوها المعلمات وطلعت وهي تصارخ وتصيح وسبحان الله من جات وهي متشجعه وثاني يوم جلست لحالها ولبست وانا من الفرحه مانمت والله يخلي معلمتها تهبل معاها وطلعت من الجيران وحطتها بعيونها الله يفرج هم كل وحده ردت على موضوعي

 

[@حلاوة الدنيا@]

كل اليهال جذي ولد اختي ثانيه روضه وللحين يقول حق امه انطريني عند الباب لاتروحين وتقوله أنظرك بس يدخل الصف ترتون دوامها وقبل لا يطلع تستأذن وترووح تقول أنا مارحت قاعده من الصبح

تحملي شوي شوي تتعود