مااتحمل الهجر ،، تكفون ابي حل

[شتات نفس]

السلام عليكم ،، عندي مشكله زوجي شخصيته صعبه ومتحكم ومتسلط صار بيني وبينه مشكله من 4 سنوات وتدخلوا اهلي وكرههم ومايبيهم يدخلون بيتنا ابد قبل شهرين تقريباً تهاوشنا مره ثانيه على هالموضوع وبصراحه طولت لساني وطلعت الي بقلبي كله وهو زعل الحين له 40 يوم مايكلمني ويقولي خلاص انا ماابيج بتقعدين عند عيالج اقعدي ماتبين روحي لاهلج وانا اصلاً مو زعلان بس هذا اسلوب حياتي الجديد احاول فيه اتعود على عدم وجودج لانج مزعجه ولسانج طويل وابي ارتاح منج ،، سؤالي تتوقعون من جد خلاص مايبيني وشلون احل هالمشكله معه لان اول مره يطول زعله جذيه مع اني تاسفت اكثر من مره و ما فاد والمفروض مااتأسف لانه غلط بالكلام علي وعلى اهلي بس انا طبعي مااحب الهجر وهو شخصيته شمالي شرقي ياليت احد يساعدني شلون اتعامل معاه

 

[مفـآهـيم الخجـل]

حبيبتي اول شي اذا شخصيته شمالي شرقي فاطبعآ مايحب كثر الاعتذار والتأسف والضعف بشكل عام واذا شافك ماكله هم وتتأسفين كل شوي كذا يزووود فاخليك طبيعيه وقومي بالواجب وطنشي وصدقيني هو بيمل ويرجع عااادي

 

[الأميرة ريماس]

اذا انتي الغلطانه تاسفي ولا تطولين لسانج مره ثانيه ماكو زوج يحب المرا الملسونه

 

[مدمنة كوفي]

الرجال ما يحب لسان المراة الطويل بس في رجاجيل يخلون المراة تطول لسانها غصبا عنهم مثل اللي شفته في طليقي الثاني رجال لا يحتمل وانا عصيبة فكنت ما اسكت

انتي خففي من العصيبة وخلج هادئة ومعروف الرجال الشرقي اي شي يقول لزوجته تقوله ان شاءالله وتنفذ كلامه وما تحب اللي تناقشه على طول سمعا وطاعة

انتي تعرفين ان زوجج تغير على اهلج قمتي فتحتي الموضوع وشفتي شصار طبيعة الرجال الخليجي اذا سكر موضوع ما يحب يفتحته واذا يقول شي يتنفذ

واذا على الحجي عادي الرجاجيل بس يهددون انتي اكثر وحدة عارفة شخصية زوجج عشرة عمر شنو يحب شنو يكره مو توه متسلط ومتحكم من زمان شخصيته جذي وما تغير فانتي لازم طنشين تعودتي عليه واذا ما يبيج ما قالج قعدي عند عيالج

مثل ما قالت الاخت مفاهيم الخجل طنشي بس قومي بالواجب طبخي رتبي البيت مثل ما كنتي تسوين لا تهملين بيتج هو بيمل وبيجي

بس دائما خلج هادئة اذا شفتي روحج مو قادرة وبتنفجرين غيري جو ساعات الواحد يعصب ويقول حجي ما يثمنه ويخليه يخسر حياته واهله واصدقائه حتى لو ما يقصد اول الغضب جنون واخرته ندم

 

[والله مادري]

الله يعين الريال اذا حقد عادي عنده سنه او سنتين يزعل

 

[مناير ...!]

عليكم السلام
شمالي شرقي جنوبي غربي
هالسوالف انا ماافهمها
بس افهم شغله وحده
ان اهلي خط أحمر
ولازم ريلج يفهمج جذي وانه مو من حقه يغلط عليهم ولاتعودينه يغلط عليهم واتعذرين له
جذي تكسرين هيبه اهلج
انت غلطت فيني وبااهلي وانت ماشفت منهم الا كل خير
من من حقه اهو الي يزعل ويقلبها عليج

 

[&هند&]

الحل انج ما عاد تتاسفين خليج واثقه من نفسج وقومي بواجباته على اكمل وجه وخليج دايم على سنقة عشرره واذا قاعد بغرفه اقعدي بنفس الغرفه وخليج عادي مو تبينين انج ميته عليه

ومن اليوم ورايح لا عاد تراددينه واسكتي عنه لا هاوش ومن يهدا ويجي يبي منج شي عاتبيه خلي حياتكم هاديه لا تكثر المشاكل ويطفش انا ما اقولج اسكتي عنه لا غلط بس لا هدا عاتبيه

شكل زوجج عصبي ولازم تعرفين لطبعه مستحيل للحين ما عرفتي له وخلاص اي سالفة تغثه لا تفتحينه والله باجر يتغير وحتى اهلج بحبهم من غلاج وحبه لج ترا الرياجيل قلوبهم نظيفه مو حقودين

 

[حروف من ذهب*]

الله يهديه معروفه حبيبتي الرياجيل ما يحبون المره المتسلطة وطويلة السان

 

[يتيمة جابر العز]

قومي بواجبتج بأكملها خيرته يجيج ويتعذر مأكو رجل يتحمل بعد زوجته شلون لو كانت تنام معاه بنفس الغرفة !!!

 

[حبيبي مالكني]

الله يسخركم لبعض يارب

 

[عزيز قلبي]

عليكم السلام
شمالي شرقي جنوبي غربي
هالسوالف انا ماافهمها
بس افهم شغله وحده
ان اهلي خط أحمر
ولازم ريلج يفهمج جذي وانه مو من حقه يغلط عليهم ولاتعودينه يغلط عليهم واتعذرين له
جذي تكسرين هيبه اهلج
انت غلطت فيني وبااهلي وانت ماشفت منهم الا كل خير
من من حقه اهو الي يزعل ويقلبها عليج

:yaaaaaarb: معاها

 

[Gatwa DaloO3a]

يكفيي انك متحملته! وبعد مايبيك!

لاتعطينه وجه اسككتي عن الموضوع ، وحبي حياتك خل يعرف ان حياتك به ولا من غيره ماتفرق ، خل يعرف عندك ظهر و اهل مايخلونك بحاجته ! ....هو اذا حس بهالاحساس ماراح يتمادى