آنا مدرسة وعارفة الوضع بمدارس الحكومة
خلي عيالج بمدارس خاصة أريح لج
الحكومة فيها ظلم بالدرجات موطبيعي , يقولج إذا الطالبة درجتها نازلة بالامتحان
غصبن عنج تنزلين درجتها بالأعمال !!!!!!!!
و إذا شاطرة بالامتحان وجايبة درجة حلوة غصبن عنج ترفعين درجتها بالأعمال
حتى لو كانت مشاغبة وقليلة أدب و كتبها ناقصة !!!!
و إذا ماسمعتي كلامهم و حطيتي بعدل وضمير الدرجات, يردون كشوفاتج ويطلبون منج تعدلينهم
وتوازنين بين درجة الامتحان والأعمال !!!
أمانة مو ظلم ؟
مو حرام؟
وغير هذا تعالي شوفي الصفوف تكدس بأعداد الطالبات
مرة بالطابور طلبوا منا نفصخ جاكيتات البنات المخالفات و كان برد موت الصبح
قلت والله مافصخهم حرام صغار يثلجون
مافيه احساس من الإدارة همهم بس شكل المدرسة يكون مرتب و اوكية
غير الحالات الخاصة محد يرحمهم و يساوونهم بالمعاملة مع الطلاب العاديين
عندي بنت فيها تأتأه , فلتة شاااااطرة جتني أمها بالاجتماع تشكي
تقول اصلا انا بنتي طول عمرها بمدرسة بريطانية بس بسادس طلعتها
قلت تبين نصيحتي ردي بنتج لمدرستها الخاصة أهني الأبلة من ضغط الطالبات والشغل
ما راح تهتم فبنتج خصوصا انها حالة خاصة
غير الطق اللي يصير بالمدارس و الاخصائيات يشتكون نلحق على منو و إلا منو!!
لا والله الخاصة أفضل من الحكومة من حيث
(الأعداد تكون قليلة بالصف) ,
(يهتمون بالحالات الخاصة) ,
(يراعون الفروق الفردية)
يشجون الطلاب و ينمون شخصيتهم أحنا الحكومة أهم شي يحفظ المنهج وشخصية الطالب مهملينها
غير المباني والفصول اللي تريح وتسر العين مو احنا كل شوي مدخلين عامل و يطقطقون على روس
البنات و أهم يمتحنون
أعذروني و الله أحس بغصة وآنا اكتب جذي عن مدارسنا
صحيح أحنا عندنا معلمين خبرة و من أكفأ مايكون
بس المعلم بالحكومة ينكرف كراف فـ مايكون مهتم بنفسية الطالب همه بس يخلص المنهج
ويرضي مديره , و يسوي انشطه تسد عيون الإدارة
