ليش بنات الكويت صارو كلهم مثل مثل؟؟

[بنت من الكويت]

سلاااام بنات

مو ملاحظين معاي انا الكويتيات راعيين هبه ويحبون يقلدون بعض ؟!!

يعني تذكرون اول ما هبو بالقمصان مالوت الهنووووووود كل الكويت صارت طقه وحدة ؟؟!!! الي مالبس هل القميص صار جنة مو كويتي؟!!!

ولما هبو قصة حليمة كلللللللللللهم قصو مثلها ؟!!!! يعني اذا قاصه غير القصه انتي مو كويتيه؟!!

ولما هبو بحجاب بو تفخة كللللللللللللللهم صارو يتفخون حجاباتهم؟!!!!!

ولما البسو حجاب الستراس كلللللللللللل من لبس؟!!!!

وحتى لما هبو بالمكياج كل من صار عندة شهادة ويمكيج؟!!!!

حتى نقسمو الكويتيات نص يمكيج ونص يصمم؟!!!!

مالاحظتو؟!!!!

والحين الهبه اليديدة الترايننقات المخمل المرصرصه؟!!!

شي غير طبيعي .... صار مافي تميز مافي ستايل خاص

كله تقليد بتقليد وصارو يطالعون غيرهم؟!! بالمجلات والسوقه والمطاعم؟؟ كله خز بخز؟


شي غريب فعلا !!

مادري انتو شرايكم؟

 

[yam_yam]

فعلا حبيبتي أنا اليوم رايحة الافنيوز الظهر قلت ماراح أحط مكياج لاني قاعدة أعالج بشرتي لبست حجاب و نظارة كبيرة و جينز و بلوزة عادية بس شكلي كان حييييل مرتب تحسين وحدة رايحة السوق تشتري و تطلع و فعلا كنت رايحة أشتري ماتأخرت خلصت شغلي و طلعت

تصدقين هناك البنات كلهم نفس الشي المتحجبات تافخين روحهم بشباصات ميري كل وحدة صاير صماخها للسما ( و هذا الشي قبل لا يكون موضة حراااااااااااااااام )
و اللبس هالبطرونات السترتش ( ليقنز ) على قولة أمي تقول هذول نسميهم صراويل طوال نلبسهم تحت العباية وقتا الشتا عن البرد و لا لاقعدنا بالخيمة الحين كاشخين فيهم
و كلهم حجابات كريستال
جناط كبار
جواتي تكرمون نفس الطقة كلهم
و نفس الميك أب و كلهم حاطين مكياج عروس ماجنهم بالسوق
لا و يطالعون كاني شي غريب عشان مو حاطة ميك أب ( كيفي أنا أحط حق مناسبة مو عشان رايحة السوق و لاني مخربة ويهي عشانهم و أنا قاعدة أعالجه )
تصدقين صايرين جنهم خوات كلهم نفس الطقة

و الأغرب أن و لاااااااااااااااااا وحدة شايلة كيس ابايدها بس يتمشون عالفاضي


و فعلا كل وحدة صايرة تحط مكياج و كل وحدة طلعت لها بفنتق جديد صارت مصممة

و لو على قولتج وحدة من البلوزات اللي طالعة العام تلبسينها هالسنة قالوا عنج مو ستايل و قديمة حدج ( شخباري )
بصراحة ماكو منطق و لا تفكير و همهم كله بالمظاهر و اللبس
ووحدة تطالع الثانية جنها بتذبحها ... و لا عدوتها ... ليش جذي
ليش مانصير مثل الأجانب و الله لو أمشي بلندن و لا بألمانيا و ألبس اللي ألبسة محد يطالعني و لا يلتفت صوبي
و بعدين لبس السوق و مكياجه للسوق و لبس المطاعم للمطاعم والكشخة للكشخة و الاستقبل للاستقبال
كل واحد له لبسه
لكن مادري ليش جذي الحمدالله و الشكر

 

[AL REMAS]

شيسوون يشترون من البضاعة المعروضة
يعني تبين كل وحدة تبتكر ستايل خاص فيها
صعبة
اللي موجود بالسوق بيلبسونه
حالهم حال باقي العالم
وترى هالشي مو من ابتكار الكويتيات كل العالم جذية
علشان جذيه يقولون هذا ستايل الستينات والسبعينات وهلم جرا
كل العالم على هالحاله اذا موضة الجينز لوويست كل اللي بالشارع من اي دولة يلبسون واللي ما يلبس مثلهم مو كول
بس مقرودات الكويتيات كل شي يسوونه يتضخم ما كان كل العالم تسوي مثلهم

 

[أم بدير]

التقليد مو اهو الهدف
السالفه سالفة موضه وشي دارج

يعني الحين لو تشوفين وحده بالسوق تتمشى لابسه بنطلون بوكسرات عالخصر ماتتطنزين عليها وتقولين شخباري من وين طالعه؟

والا ان شفتي وحده لابسه قميص وحاطه وراه الكلبسه اللي قبل يخصرون فيها القمصان ماتقولين شالسالفه وين قاعدين؟

وان شفتي وحده قاصه قصة فاطمه عبدالرحيم اللي باخر مسلسل نص طويل ونص قصير اللي قصتها اول مره المذيعه ساميه الدوب بالكويت قبل عشر سنين تقريبا ماتستغربين مثل ما استغربنا شلون فاطمه عبدالرحيم قصتها؟؟ مع انها كانت باروكه مو صج بس هم استنكروا الناس الوضع

احنا نمشي عالشي الدارج والشي اللي انتهى موديله لازم يروح مو سالفة تقليد
وقصة حليمه اسمها قصة سعاد حسني وفي بنات قبل حليمه قصوها مع مسلسل سعاد حسني

بس التقليد في منه بالديره
مو وايد بس في
يعني تلقين بنات صابغين شعرهم اسود وزايدينه والا مطولينه ورافعينه على جنب بورده شكبرها وحاطين مكياج مثل هيفا وهبي ويمشون ويقولون واي كل من شافنا قال هيفا وهبي بالديره

والا تشوفينهم تافخين البراطم ورافعين الخدود وحاطين شامه ويقولون نشابه انجلينا جولي

هذا التقليد اللي ما احبه
بس بالنسبه للبس الدارج صراحه محد يقدر يلبس شي انتهى وقديم راحت موضته​

 

[yam_yam]

ريماس كلامج صح بالعكس المفروض الكل يتبع الموضة و هذا الشي حلو ماقلنا لا
لكن ماتوصل لدرجة التقليد الاعمى هم أحنا ناس بدولة اسلامية لنا عادات و تقاليد يعني يرضيج على بو موضة نلبس اللويست و يطلع البطن و لا البطرون ضيج ؟؟
و لا يحطون هالشباصات اللي تافخة روسهم و هذا الشي منهي عنه الرسول عليه الصلاة و السلام
بالعكس كل من يبي الموضة لكن ماناخذها مثل ماهي و نطبقها جذي على خرابها
نلبس لكن في حدود الالتزام

أم بدير هذا قصدي التقليد الصح مو الأعمى على بو بقلد أهول بنفسي

 

[شيهانه]

الصراحة .. ما احب الافينيوز بالويك اند

مو مورييييييييييييييييييييييييييييح كلش كلش

ياربي احس كل وحدة لابسه اكشخ بدله في كبتها ويايه ؟؟؟

ليش ؟؟؟

ما ني فاهمة صار الافنيوز كانه استقبال والله العظيم ..

البنات الماركات واغلى الاثمان اللبس والساعات وتكرمون حتى الجواتي Lv وبرادا وديور

وحق السوق ؟؟؟

افهم لا صارت الوحدة عروس لبسها يكون كشخة مع المعرس .. بس الاوادم كلهم ؟؟؟

واللحين عدي 3 أو 4 ستايلات لبس فقط لا غير للمحجبات وغير المحجبات ويكرر

ونسيتي هل الهبات بعد عندك :


هبة الامطة _ هبة جوتي الفلات- هبة الجاكيت الكت القصير _هبة الشلاحات _هبة المعارض _ هبة ساعة سواتش _ هبة ساعات كارتير واساورهم ّّ_ هبة جناط Lv ...واي اشكثرهم وبعد نسيت

 

[بنت من الكويت]

هبة الامطة _ هبة جوتي الفلات- هبة الجاكيت الكت القصير _هبة الشلاحات _هبة المعارض _ هبة ساعة سواتش _ هبة ساعات كارتير واساورهم ّّ_ هبة جناط Lv ...واي اشكثرهم وبعد نسيت


بالفعل شيهانه هذا الي اقصدة؟

انا ماقصدت تتبع الموضه كثر ماقصدت الهبااات الي لاااازم كل كويتيه تتبعها؟!!!!

يعني تقليد بطريقه تنرفز؟!!

يعني الأوادم الي برة الكويت مايتبعون الموضة ؟ ..... مبله اكيد بس مو جذيه ماتشوفين الناس كلهم مثل مثل ابد

هذا الي اقصدة

 

[blue diamond]

ههههههههههههههه انا اذا قلت رايي بتذبحوني

 

[Reeema_q8]

فعلا ً صراحه شي مبالغ فيه حييييييييييل


يعني البنات الحين اغلبهم رايحه سوق كأنها رايحه عرس بروشات واستراس يتبارق من بعيد والمييييك أأب تفنن فيه


الوحده لما تفكر تروح سوق او مطعم او سينما تجيب اللي وراها كله صار تحدي بينهم


وبعض البنات ذكرو انه شي دارج وهذا اللي بالسووق اهوو صح بس طريقة اللبس والافكار متشاابهه ( طبعا ً اقصد افكار البنات بالتركيب والاختيااار )


والشي اذا طلع الكل يهب فيه وينتشر لدرجة انج تكرهينه ويصير سااامج


وبالنهااااايه


يبقى الاختلاف لا يفسد للود قضيه !!

 

[مغروره بس معذوره]

عادي مافيها شي موضه لاوم نمشي مع الموضه بس اذا كانت عاجبتنا انا وحده اذا شي عجبني واقتنعت فيه اوكي عادي اغلد واذا مو عاجبني ما اشتري الشي ولا اغلط عادي

بعدين هذا الموجود بالسوق
لا وهالايام مافي شي سنع حق المنتحجبات كله لبس تفصخ الله يستر علينا وعلى ديرتنا والله يستر من الموضه اليديده اللي راح اتييلنا


بعدين الترينقات المخمل من هذيك السنه هابين فيهم مو الحين ؟؟

تعالوو صج الحين شنو موضتنا اليديده لوووووووول

 

[supermarket]

والله عادي اروح الافنيوز بالويك اند وبعز الزحمة

لابسة جينز وفلات وبدون مكياج وجنة العييييييييييد


شكو اشكخ للسوق ...لوعوا جبدونا من ارواجهم اللي تكون عالهدوم بالمحلات


ياية تشرين ولا رايحة عرس!!!

 

[ii DareeN ii]

موضه هبه ستايل ليش مانحترم خصوصيه الناس طول ما ان هالشي ماياذينا العالم كله يمشي على ستايل موضه ليش احنا الي كل بس ندور شي نتحلطم عليه دع الخلق للخالق الناس تلبس الي يريحها ومن راقب الناس مات هما ترا

 

[بنت من الكويت]

مغرورة تبين تعرفين الموضه هل السنه؟

فتحي ليالينا ولا شنو شريتي اليوم ولا روحي حدا هل المجمعات وانتي تعرفين

 

[بنت من الكويت]

dareen محد يراقب بس هذا شي غريب متكرر الكل لابس نفس الشي؟!!!

قصبن ماعليج بتستفسرين وتتسائلين

وبعدين محد يتحلطم

مجرد فكرة وأراء ... واختلاف الراي لا يفسد من الود قضيه

 

[بنت من الكويت]

ههههههههههههههه انا اذا قلت رايي بتذبحوني

لا محد بيذبحج

قولي رايج والكل بيحترمة حتى لو مايتفق معاج

الموضوع طرح لمعرفه الأراء

 

[بتبوتااا]

بصراحه انا ما اهتم الي يناسبني البسه

 

[بنت الحزن]

حبيبتي هالكلام ما يمشي علي بنات الكويت بس كل بنات الدنيااااااااااااااااااااااا نفس الشي يعني لو رحتي الامارات و لا البحرين و لا قطر مع احترامي للجميع راح تلاقينهم كلهم لابسين علي و تحتهم بنطرونات و كل العبايه شك و الالشوارفسكي و بنات الكويت حالهم حال اي بنات و هذا الي دارج بالسوق يعني انا و لا انتي و لا اي وحده من البنات لما ترح السوق راح تشتري نفس الي تشتريه الثانيه مع فروقات بسيطه اذا انتي بتلوموين احد لومي الموردين مو بنات الكويت

 

[xtraCooL]

لووول نسيتي موضة حواجب الجاينييز اغلب اللي اعرفهم حافيينها اذا مو كلهم واللي حاجبها مايصير تاتووووووو سيده واغلبهم يلوع الجبد عليهم مو حلوو
ونسيتي الاكستينشن قامو يحطونه لو حتى حق طلعت مول ولا مطعم ..
شي يضحك وحلو نفس الوقت تدرين ليش سهل تتميزين سوي عكس الدارج وتصيرين مميزه
وعلى فكره اغلب الكويتيات فيهم حب التجربه والتقليد حلو موحلو يسوونه عشان صار ماصار قالو عنج واااااااااااااي ستااايل حدها زوغه اتشوق اتعقد ...
توني متعشيه خل انهي احسن لاتكت جبدي

 

[صديقة د. شريفه]

طبيعة أهل الكويت من زمان من موضة الشارلستون ، و الجبنيز ، وتكرمون جواتي الدبابه ، دايما يحبون اللبس والكشخه والموضه ، في ناس يقلدون وفي ناس اتكون لهم الرياده ،وهم مع هذا في ناس لبسهم حلو وفي ناس ما يعرفون يلبسون حتى لو اتبعوا الموضه ، فيه ناس نازكين وناس امهتملين ، بس الغالبيه من اهل الكويت ذويقين وانيقين.
وبعدين مو بس الكويتيات يلبسون حتى الوافدين يقلدون الكويتيات ، ويعرفون الموضه منهم .
يظل التميز في اناقة البنت نفسها وذوقها في تركيب الالوان ووضع المكياج ، وباقي الاكسسوارات .
نصيحتي:
كل مره تنتقي الموضه اللي اتناسبها ، بدون تكلف وبدون تتبع الموضه اللي تهدف الى عري بناتنا الله يستر عليهم ووايد ان شاء الله فيهم الخير ، ويحبون الستر.

 

[toosh]

نسيتوا هبة واهي...



...
....
....



الدبابيس مالت الملافع لازم يبرق هالدبوس والا ماتصيرين كووووووووول هههههههههههههههههاي:dddds: