للبنات المتقدمات لغة عربية

[الزهقانه]

هلا بهالطلة الحلوة بنات الكون
ويعطيك العافية والشكر لك ولا تحرمينا من تعليقاتك وآرائك أو حتى اللي تبينه وتحسين إنك محتاجته
وخبرينا عن كل اللي يصير معاك .
وإذا انت قدمت من شهر ترى الموعد قريب إن شاء الله
في ناس مقدمين في أول الشهر دقوا عليهم هالأبسوع
يالله شدي حيلك ادرسي عدل ترى اختباراتهم تبي دراسه
لا وزادوا معاشهم بعد فالمعاش يستاهل التعب
يمكن المعاش يوصل أكثر من 10 آلاف ريال .
الله يوفقك ويسر النجاح لك ، ويهنيك بهالوظيفة
وجميع البنات المتقدمات إن شاء الله .

 

[الزهقانه]

تلخيص لأنواع لا :
- إذا جاء بعد لا اسم احتمال تكون : 1- نافية للجنس : يكون الاسم بعدها اسم لا مبني على الفتح - تعمل عمل إن بشروط خمسة
2- نافية للوحدة : يكون الاسم بعدها اسم لا مرفوع بالضمة . تعمل عمل ليس إذا دلت على نفي واحد من جنس عام وليس كل الجنس
3- العاطفة : تقع بين اسمين يأخذ الثاني علامة الأول .
4- زائدة : لا عمل لها . غالبا ما تكرر في الجملة أو تسبق بحرف جر

- إذا جاء بعدها فعل مضارع فهي إما أن تكون :
1- نافية : لا تؤثر في الفعل فيبقى مرفوعا ( لا تطلب منك شيئا بل تخبر بنفي أمر ما )
2- ناهية : تجزم الفعل المضارع ( تطلب منك التوقف عن عمل )

إذا سبقت لا بهمزة الاستفهام ( ألا ) بالتخفيف وليست اللام مشددة
تصبح استفتاحية تنبيهية لا عمل لها ولا تؤثر فيما بعدها .
وهذه تدخل على الحروف والأسماء والأفعال .

أنتظرونا في أنواع ( إن ) ... المتفائلة

 

[فرحه]

شلونكم
شخبار كم بنات

اليوم من قدم اختبار

ياريت تكتب وش جاهم من اسئله وكيف التعامل معم
وهل الاسئلة التربويه الغوا ام لا

لان انا عندى اختبار الاحد القادم تاريخ 5-6

المره الاولى كنت متفائله
هالمره والله خائفه وعندى يأس وحاسه انى راح اسقط
انا متوكله على الله
بس الواقع والامور اللى تحصل تخرع

جزاكم الله خير

 

[سكون2]

الاسئلة التربوية انلغت
اول شيء امتحان اعراب وبلاغة وتصحيح اخطاء وكذا
وبعدين المقابله
والله يوفقك

 

[ريمووو99]

مرررررررررررررررررررحبا بنات كيفكم

ب التوفيق للجميع انا عندي اختبار يوم الثلاثاااااااااااااااااااااااااااء

وحدي خااااايفه
في اشياء معينه اركز عليها
وعندي سوال ب المقابله يخلوني اعرب ولا بس في الاختبار التحريري والنتيجه في نفس اليوم ولا كيف

انتظر ردكم والله يوفقنا جميعااا\
\

 

[الزهقانه]

هلا أختي ريمووو
أول شيء حياك الله معانا وإن شاء الله أنشوفك على طول
وثانيا أنصح إذا انت خايفة لا تختبرين لما تروح عنك الخوف
لان الانسان تروح نصف معلوماته في الخوف ويظهر بشخصية مو شخصيته
وتروح عليك محاولة على الفاضي
لان من خلال تجارب البنات يقولون ان الارتباك هو سبب رسربنا وعدم التركيز
وبالنسبة للمقابلة اسمها مقابلة وهي اختبار ومقابلة معا
الاختبار خمس ورقات او اربع نحو وصرف وبلاغة واملاء
من 100 لازم تجيبين 60 تدخلين المقابلة
المقابلة اول شي
1- تعرفين بنفسك تعريف كامل
2- تقرأين قرآن قراءة صحيحة مو ضروري التجويد مع إعراب 3 كلمات تقريبا
3- تقرأين قصيدة مع معنى البيت او المستفاد من النص ويمكن إعراب 2 او 3.
يركزون على المخارج و الانطلاق في الحديث وصحة الإعرابات وأهم شي واهم شي صحة القراءة وعدم الخطأ وتبديل الحركات
والله يوفقك واحنا ذكرنا هذا الكلام اكثر من مرة بالتفصيل راجعيه فيما سبق قبل اسبرعين الى شهر
وأهم شي الحين لا تخافين ونتزعين الخوف من قلبك ولا تحطين هدف النجاح بين اعيونك ولا تترددين ابدا
وتقولين انا ناجحة ناجحة رضوا ولا ما رضوا متوظفة متوظفة إن شاء الله وبعونه وتوفيقه
وبعدين تدرسين عدل ليل ونهار وتدخلين وانت مطمنه إن شاء الله ناجحة

 

[بنات الكون]

هلا باختي المتفائله ومشكوره على ترحيبك لي والله ما ظنتي يقبلوني كل حياتي عثرات بس هذي يعني مليت من الصبر وما له داعي ادرس نفسيتي صفر تعبانه من كل شيء تربيه العيال لا اهل لااخت لا اخو لا صديقه لاوطن اسفه على إزعاجك بسوالفي بس الظاهر وصلت حدي من الألم

 

[الزهقانه]

اختي بنات الكون هلا والله
الله يعينك على كل اللي تواجهينه
بس إذا تبين حياتك تتغير لازم تقومين انت وتسعين
لتغييرها يعني هي ما راح تتغير بروحها
محتاجه عزيمة قويه وحب التغيير
وأنا متأكدة ان انت قادرة على النجاح وبسهولة
بس تحتاجين بعض الترتيبات بحياتك اشو
ارجو انك تنظرين للحياة والمستقبل بعين اجمل وتخيلي انك نجحت وتوظفت
كيف راح تكون حياتك ؟
هذا الامر انت اللي تحددينه
اشرايك تبادليني بالاسم !!!!

 

[ريمووو99]

هلا اختي الزهقانه
ان شاءالله يكون المنتدى ملتقى لنا دايم
الخوف امر ضروري يبقى للاختبار هيبه
بس للامانه مطئنه لدرجه الثقه ب النجاح باذن الله
ان شاءالله استفيد من جميع المواضيع المكتوبه والكل يستفيد منالتجارب
والله يوفقنا جميعا وعلى طول راح اكتب تجربتي بعد رجوعي من المقابله باذن الله
اشكرك اختي على المعلومات والترحيب والاجابه على اسئلتي
والله ينور دربك يارب

 

[فرحه]

بنات من اختباره يوم الاحد 5-6

بنات اعتقد انهم بيجيبون الاسئلة التربويه احساس

الله واعلم

من عنده خبر عن الاختبار يقول

 

[الزهقانه]

اختي انا عندي خبر اكيد
انسي التربوي نهائيا
وخليك بالمادة بس والله يوفقك

 

[فرحه]

الله يسعدج يالزهقانه

حلمت حلم بالاستاذ طارق انه قال لنا واحنا كنا 5 او 6 بنات جالسين على الارض يقول كلهم ناجحات

يارب يتحقق هالحلم

وننجح
بكتب شيصير يوم الاحد كم وحده نجحت ان شاء الله كلهم ناجحات يارب

اتمنى النجاح لى وللبنات اللى معاى

الله يسهل علينا جميعا

 

[الزهقانه]

إن شاء الله تجنحين أختي فرحة
مع كل البنات
وان شاء الله رؤية خير وتتحقق .
بس أنت ركزي ولا تروحين الاختبار الا وانت مرتاحة مو تروحين سهرانة أو تعبانة
بالتوفيق

 

[فرحه]

ان شاء الله

جزاج الله خير

 

[الزهقانه]

نصائح قبل وأثناء الاختبار :
- الراحة الجسدية يعني لازم تروحين وأنت مرتاحة مو تعبانة
- لا تروحين مبكر حيل الاختبار س١١ روحي١٠ ونص
- لا تأثرين باستعداد بعض البنات وتحبطين خلك صامدة وواثقة من قدراتك ومعلوماتك
- الاختبار ساعة وساعة وراه يالله تعرفين النتيجة فلا تنهارين وحافظي على ثباتك وتركيزك ولا تبدين أي تاثر للجنة
- عند استلام الورقة اهتمي بالدرجات الأعلى يمكن تلقين الدرجات مكتوبة
- ركزي بالاملاء وانتبهي للأخطاء ( الكلمة ماعليها همزة أو العكس - كلمة ناقصة الألف او زايده ناقصة حرف - الإعراب خطأ رسما - الهمزة المتوسطة أو المتطرفة - الألف في ابن - التنوين - الشدة )
- اهتمي بالإعراب عليه درجات كبيرة ( لا تقولي فعل ماضي قولي فعل ماض بدون ياء - ركزي على الكلمة إن كانت اسم او فعل لا تخلطي من الارتباك -أاكملي الإعراب كله مع الضمائر ) راجعي مقالي الأخطاء العشر في الإعراب قبل أسبوع
- اسألي الأستاذ طارق أو غيره في أي شيء ترددين فيه واكثري من السؤال عادي ما يقولون شي ء
- حسني خطك قدر الإمكان
- نصائح المقابلة غدا *
وبالتوفيق

 

[بنات الكون]

مشكوره اختي الزهقانه اللي اللحين متفائله على كلامك والله ريحتيني شوي وصج من اول فكرت اني أقولك تعطيني اسمك أنا على الماده موناقصني شي وعيالي يدرسون بالخاص ونتعالج بالخاص واذا رحت حكومي احتار ما عرف ووين اروح بس مليت من الوحده اصدقاء تفرقنا ولهينامع اعيالناوالاهل بعيدين والأقارب عقارب يشوفونك متميز بشي اكلهم الحسد أنا إنسانه مسالمه بس محتاجه اثبت وجودي احس عندي طاقه اربي أبنائي ومعها اعمل لان العمل لي يعطيني ثقه باني نافعه لكل شيء والله يعلم شنو قاسيت بدراستي الجامعيه من دراسه وتربيه أبنائي والحمدلله على كل شيء----اسفه على ازعاجك طولت عليك أنا من كثر ماكنت اكتم احس اني انفجرت اللحين

 

[دمموع الورد]

مرحبا بنات شلونكم وشخباركم بنات انا كويتيه وخريجه جامعه خاصه وقدمت وسويت المقابله ونجحت فيها ونزل اسمي بالديوان هل هو خطأ ولا اراجعهم يمكن يعطوني اوراق الفحوصات

 

[ضحكه طفل]

اختي الزهقانه حبيت اسالج جم صار راتب المعلمه السعوديه بالكويت
رفيجتي تخصص عربي وساكنه بالخفجى وتبي تتوظف بالكويت
وسالتني عن الراتب قلت اسالج

ياليت اذا تعرفين تردين ؟؟

 

[ريمووو99]

مرحباااا

مين اختبارها يوم الثلاثاء,,؟؟

 

[فرحه]

ضحكة طفل تسالين عن الراتب كم

بالاول اجتازوا الاختبار والمقابلة بعدين اسالوا كم الراتب

يارب تغفر لى الذنب اللى بسببة ما انجح واحصل على الوظيفه
يارب تجاوز عن ذنوبي يارب وارحمنى

يارب انجح بالاختبار

اليوم كنت منتظره احد يحط شي عن الاختبار بس ماحد عبرنا ولا احد حط لو سؤال واحد

الله كريم

اذا رسبت هذا امر الله ولا حول ولاقوة الا بالله
والدنيا ماشيه بالواسطات
وانا واسطتى رب العباد ومتوكله عليه وحده ومؤمنه بانه هو وحده اللى قادر على كل شي
الحمدالله يارب

على قول ام الولد الله يذكرها بالخير اذا ربج وقعها من عنده خلاص تمشي معاملتج

استغفر الله استغفر الله استغفر الله
اتمنى انى بكره اكون سعيده وابشركم انى نجحت