لا للخـــــــــــــــــــــدم

[لا للخدم]

السلام عليكم اخواتي العزيزات
اشرايكم تشاركوني حملة " لا للخدم "
أبي اللي تشارك في هذا الموضوع تكون مقتنعة ان الخدم شي ثانوي بحياتنا و تقدر نعيش بدونهم
تقول لنا تجربتها بدون الخدم واشلون اقدرت تتأقلم بدون خدامة

ليش ما نصير نفس الدول المتقدمة .. عايشين بدون خدم و مع ذلك متطورين ومستمتعين بحياتهم.

رجاءا مابي الردود اللي تحبط .. و تقول لنا " ما لنا غنى عنهم " أو " شر لا بد منه" كلنا نعرف هالكلام
نبي الردود اللي تشجع و ترفع المعنويات و تأيد " لا للخدم" وتقدم لنا الحلول لحياة أفضل بدون هذي العمالة اللى اترست ديرتنا مصايب و امراض ..

لا للخـــــــــــــــــــــــدم

 

[غزيل الفله]

السلام عليكم اخواتي العزيزات
اشرايكم تشاركوني حملة " لا للخدم "
أبي اللي تشارك في هذا الموضوع تكون مقتنعة ان الخدم شي ثانوي بحياتنا و تقدر نعيش بدونهم
تقول لنا تجربتها بدون الخدم واشلون اقدرت تتأقلم بدون خدامة

ليش ما نصير نفس الدول المتقدمة .. عايشين بدون خدم و مع ذلك متطورين ومستمتعين بحياتهم.

رجاءا مابي الردود اللي تحبط .. و تقول لنا " ما لنا غنى عنهم " أو " شر لا بد منه" كلنا نعرف هالكلام
نبي الردود اللي تشجع و ترفع المعنويات و تأيد " لا للخدم" وتقدم لنا الحلول لحياة أفضل بدون هذي العمالة اللى اترست ديرتنا مصايب و امراض ..

لا للخـــــــــــــــــــــــدم

أمبيه من صجج حناموظفات وزوجات وعيال وبيوت تبين تردين من دوامج تغسلين حمامات وملابس ووراج أوتى وطبخ ماشاء الله أنتى متخيله أن أحنا قاعدين بالبيت لا حناعندناشهادات ووحرام مانشتغل فيه والحين مافى بيت بالكويت مافيه بدل الخدامه2

 

[احلى غمازات]

انا اقول نعم للخدم لان مابي احس بالتعب من التظيف ............الخ وشكرا

 

[قتلوني]

طيب الا بيتهم كبير ومافيه الا بنت وامها والبنت تروح دوامها وعندها دراسة شنو يسون
يخلون البيت حالته حاله والا يتركون الدراسة ويقعدون في البيت
بصراحه الدول المتقدمة قاعدة على نجاسة مو نظافه
والبيوت العربية الغير خليجية ما تجي عندنا بيوتنا ولا نصه كله على بعضه ثلاث غرف

 

[بشوشه]

يعني اذا ما عندي خدامه ما لجامل يصير في حوار مع زوجي او طلعه حتى لو مرة بالاسبوع لانمنو بيساعدني؟

 

[SaD FaCe]

انا معاج بس هذا كلام ما نقدر انطبقه للاسف لان المره صارت تشتغل مو نفس قبل ..والدول المتقدمه ترى بيوتهم وصخه مو نظيفه ذاك الزود

 

[لا للخدم]

خواتي مشكورين على ردودكم .. لكن انا طلبت الناس اللي مأيدة الموضوع بس ترد .. نبي تجارب ما ني تحبيط
و احب اقولكم اني حاليا بدون خدامة سافرت بدون ردة من 8 شهور ولله الحمد عندي زوج واعيال ووظيفة لكن الحمدلله ارتحت نفسيا و اعيالي بدوا يحسون بالمسئولية و زوجي صار يقعد بالبيت اكثر و صار البيت لنا .. ولله الحمد.
لا تنطرون لما الفاس يطيح بالراس و يسوون لكم جريمة بعيالكم عشان تقتنعون ..

 

[لا للخدم]

من الاشياء اللي سهلت على شغلي بالبيت

غسالة و نشافة فل اتوماتيك وايد تريح و ما تحسين بالتعب مثل الغسالة العادية و الملابس تطلع حارة و كأنها مكوية اوتي
غسالة مواعين : تطلع مواعينك معقمة مو بس نظيفة
اوتي بخار : تكوين الملابس وانتى واقفة و بسرعة من غير ما تسوي علامات بالملابس او تحرقهم

..
تجاربي الاخرى بالطريق

 

[قتلوني]

من الاشياء اللي سهلت على شغلي بالبيت

غسالة و نشافة فل اتوماتيك وايد تريح و ما تحسين بالتعب مثل الغسالة العادية و الملابس تطلع حارة و كأنها مكوية اوتي
غسالة مواعين : تطلع مواعينك معقمة مو بس نظيفة
اوتي بخار : تكوين الملابس وانتى واقفة و بسرعة من غير ما تسوي علامات بالملابس او تحرقهم

..
تجاربي الاخرى بالطريق

عسى ربي يزيدك من نعيمه
بس لاسف غيرك صحتهم ماتسمح لهم بالعمل وامهاتنا مو صغار حتى يوقفون يشتغلون

 

[لا للخدم]

عسى ربي يزيدك من نعيمه
بس لاسف غيرك صحتهم ماتسمح لهم بالعمل وامهاتنا مو صغار حتى يوقفون يشتغلون

الحمدلله على كل حال انا عندي مشاكل صحية بعد
بس تدرين عاد لما كان عندي خدامة كان جسمي يعورني اكثر ووزني زاد و اعاني من الاكتئاب و ااملل وزوجي ما يقعد بالبيت نهائيا لانه مطمن في احد عندي...
ترى شغل البيت رياضة و تحمي من كثير من الامراض ما تشوفين الخدم على الرغم من الشغل صحتهم احسن منى و منج

 

[حناينq8]

اقص عليج اذا قلت لج لا للخدم واني اقدر استغنى عن الخدامه

لكني اقدر اخليها شي ثانوي بالبيت والاساس انا طبعا

 

[~*~الملكة~*~]

انا اقول نعم للخدم

احنا انداوم من الـ 7.30 لي الساعه وحده او ثنتين

يادوب الوحده ترد اجابل عيالها وزوجها وتشوف طلباتهم

انزين لما يزورونج ناس شنو تسوين ؟؟؟

تقعدين اجابلينهم ولااجابلين المطبخ

وخصوصا الضيوف يبيلهم مجابل وبنفس

الوقت المطبخ يبيله مجابل لازم اتزهبين العشا

او الغدا على حسب الزواره ولاتزهبين الشاي والقهوه

ومن غير التخديم على الضيوف من تصير زواره تصير لويه

انتي بهالوقت شنو تسوين اتزهبين روحج ولاتستقبيلن ضيوفج

ولا جابلين مطبخج !!!

مافيها شي اذا الوحده حطت ايدها بالبيت

يعني بوقت العطلات ترا الحريم يحبون بنفسهم يسنعون

بيوتهم بس وقت الدوام صعبه وايد عليهم

 

[دمعه حزينه]

جزاج الله الف خير حبيبتي ...


نعم نعم الف لا للخدم ..

احنا اكيد بحاجتهم لكن قطييعه ما احب الا اسوي شعلي بنفسي من قبل لا اتزوج ..

وتلوع جبدي منهم والله لو كانت عندي انظف وحده بالعالم هم راح اوسوس ومااخذ راحتي فبيتي

بدونهم وبدون بلاويهم راحه ما بهدها راحه ..

والحمدلله انا موظفه وعندي زوج وبيت ولا هاملته والمفروض الوحده تقسم شغلها مو كل شي بوقت واحد ..

والشي الحلو انه زوجي بعد ما يواطنهم الحمدلله ..

 

[QUMAR]

شوفي حبوبه أنا ما اواطن الخدم بعيشة الله
وخدامتي سافرت من شهر 6 \2008
ولا زلت صامده بدون خدامه
بس شقول شحجي يا وخيتي
ببجي والله ) ":
عادي يمر يومين وأنا ما نظفت البيت
الهدوم تعالي شوفيها متكوده بالسله ما غسلتهم
نشاطاتي الأجتماعيه قلت الا شوي
طلعات مع ريلي ما أقدر
عيالي صغار أذا نامو حق المدارس علي 8:30 خلاص انسي الطلعه
صج اني ضعفت بس هلااااااااك
ولا غسيل المواعين صرت اكره اطبخ والسبه هالمواعين
اددري حبيبتي حبطتج
بس هم لها ايجابيات
تري البيت بدون خدامه تحسينه ملكج غييير لما يكون فيه خدامه
بعدين تري الأجانب يساعدون حريمهم مو مثل رياييلنا
اللي يرد من الدوام ينام بعدين نادي بعدين دوانيه
ويبي يرد يلاقيج جاهزه $ :
صراحه نفسيتي صارت زيرررررررووو حدها والله
الله المستعاااان يا بنت الحلال يعينني ويعينج

 

[لا للخدم]

اقص عليج اذا قلت لج لا للخدم واني اقدر استغنى عن الخدامه

لكني اقدر اخليها شي ثانوي بالبيت والاساس انا طبعا

صدفيني اذا كنتي تعتبرينها شي ثانوى هذي بادرة جيدة و ان شاء تستغنين عنهم نهائيا

 

[لا للخدم]

يبدو الامر بالبداية صعب و يمكن مستحيل لكن بالمحاولة راح تشوفينه شي عادي
و اذا كلنا استغنينا عن الخدم في بيوتنا اكيد راح تصير بالديرة مكاتب تقدم خدامات بنظام الساعات تنظف و تروح و لا تقعد علة على جبودنا 24 ساعة
اعيالنا نوديهم حضانة و فعلا بدت تظهر حضانات تعمل 24 ساعة بنظام الساعات تخلين اعيالج و تطلعين اي وقت .. صح غالية شوي .. لكن مع زيادة الطلب و زيادة المنافسين بقل السعر

وقت العزايم المطاعم ما تقصر توفر مضيفات بخمس دنانير باليوم

وليش الطلعة والعزايم كل يوم .. ليش ما يكون في نظام بحياتنا و نقلل من الطلعات اللي ما لها داعي شوي

بالنسبة للطبخ مو لازم تطبخين كل يوم.. الله ما كثر الا المطاعم بديرتنا ووايد مطاعم مسوية جدول اكلات كويتية و مجابيس و لا احسن طباخة تسويهم
و هم عندج وجبات خفيفة ووجبات الماكرويف تساعد بعض الاوقات

 

[لا للخدم]

دمعة حزينة : اخيرا لقيت وحدة مأيدتني يعطيج العافية و يا ليت تفيدينا بتجاربج

 

[cacaw_q8]

لا لا مااقدر من غيرخدامه لا مستحيل انا مااقدر

 

[لا للخدم]

قمر

الله يعينج لا تحاتين لانج بالبداية بس و ليما الحين ما تأقلمتى مع الوضع الجديد
اصلا يبيلنا كم شهر عشان نعرف وين اغراض البيت من عقب الخدم ولا تحسسين نفسج ابدا انج ما تقدرين بالعكس بشوية تنسيق و تنظيم راح تصير الامور عادية و سهلة مع الوقت لا تهتمين

 

[فلونة احلى وردة]

شوفي انا معاااااااااج
بس لو الجو اللي حواليج يشجع
بس مو معقولة اشوف الكل مرتاح الا انا جذي اغار واحتر على تعبي
البنات يستانسون ويطلعوووون ويكشخون
وانا مجابلة هالحمام ولا المطبخ ولا الاوتي ولا ارضع ولا اغسل مواعين
بلا قوليلي
ويبيلها تغير كبير بالعادات يعني مثل الاجانب كل واحد يقط هدومة بالغسالة الاتوماتيك ويكوي ويغسل صحنة
وعيالهم بالمدارس والحضانات الا الساعة 5 يعني يدوبك يوصخون كلها ساعتين وينامووووووووووووووووون
ووجباتهم خفيفة مو مجبوس وحشو ودقوس,,,واطباقهم جاهزة بالميكويف وحياتهم بالاكل من المطاعم وغريبة اذا طبخوا
المهم ودي بس الهوى والظروف ضدي
وانا حاليا بدون خدامة ومعتمدة على المواعين البلاستيك وادور الاكل اللي ما يوصخ
ومطاعم ووووهم وغم و24 ساعة شغل وتعب
وظهري يعورني
ودي ارجع اطلع ودي انام الظهر ودي وودي
وعلى فكرة الاجانب بالواقع بيوتهم مو ذاك النظافة وهدومهم شوية بلوزتينن وجنزين
مو احنا داخلي وخارجي وكوووووووووووووووووووود الحمد لله
الشكوى لله