كويتيات ..تجاربكم في التوفير

[خبيرة اعشاب]

السلام عليكم


شرايكم يا بنات نحط موضوع عن التوفير و تنظيم الميزانية ..و كل وحدة اتحط رايها في الموضوع ...

مو شرط ايكون التوفير في اغراض البيت او اللبس بل يمتد الى كل اركان الحياة ( الراتب / اعادة استعمال الملابس / الاشياء الي ممكن تصنعينها في المنزل ...الخ )

طبعا حنا يا الكويت اظن ان اخر شي نهتم فيه هو تنظيم الميزانية ..او التوفير عموما ..لان الحمد لله حنا عايشين في ديرة خيرها على الكل الصغير قبل الكبير ..فصعب نتعلم التوفير و نرسخه في عقول اطفالنا ...

طبعا الي توفر مو شرط انها بخيلة و حارمة نفسها , بالعكس هي مرة حكيمة اتعرف قيمة الفلوس و اتعرف اشلون تصرفهم ...

فاظن لو يكون الموضوع مثبت و نفتح فيه مجال للناقشة رح يكون احسن عشان الكل يستفيد ...

 

[خبيرة اعشاب]

تجربتي الشخصية في التوفير بمصروف البيت :

مستلزمات البيت :

في شغلات كثيرة نشتريها للبيت بشكل اوتوماتيكي لانها صارت عادة و مستحيل استغني عنها ..و دايما ما اشتري بدون لا ادقق في السعر ...او اطالع ماركات ثانية ربما انها ارخص من النوع لي متعودة اخذه ...
و من طبقت نظريتي للتوفير ...انخفضت الفاتورة بشكل فظيع ..فقط لاني دققت بالماركات و خذيت انواع ارخص من لي انا متعودة استعملها ...

مثلا :

الكلينكس : العادة اخم اي نوع كلينكس / الي عليه رسمة سدو ..او غيره ..
و كلينكس التعاون او كلينكس جمعيتكم ديما يكون اررخص جدااا مع انه نفس الجودة

المنظفات : طبعا المنظفات ناخذ ديتول و داك للارضيات و السيراميك و فيري بانواعه حق الطباخة و المغسلة و البخاخ ...الخ و الشي هذا ياخذ له اقل شي 20 دينار

فبالنسبة للديتول في انواع منظفات ثانية ارخص و تقريبا نفس الشي ..في ماركة لولو او سوفتي ..الخ

الصابون مال المواعين طبعا اشوف حريم بالجمعية ياخذون لولو او اي نوع ثاني ..و يضطرون ياخذون 5 الى 10 حبات عشان يا الله يكمل لهم شهر ...احسن شي لوكس او فيري لعلبة ب 650 فلس و علبة وحدة اتكمل شهر كااامل فبالتالي اوفر من المنتجات الرخيصة ...

التايد : اخذ الكيس الكبير اريال اوفر من الكرتون طبعا / بالاضافة الى صابون اي نوع عادي مثلا واش او اي نوع رخيص حق تغسيل الحوش و المطبخ و الحمامات عزكم الله ...و الشي هذا انا شفته ببيت جارتي حاطة صابون حق الملابس و صابون حق تغسيل الارضيات ..و بالتالي اوفر ...لان ماله داعي انجيب صابون غالي و انكبه بالارض ..؟؟؟


الله يعز كارفور جايبين صابون نوعيته ممتازة 4 كيلو ب 900 فلس خذيت يمكن 6 كراتين منه ..و استعملته حتى للملابس حلو ..

كلينكس المطبخ : انا دايما احب الرول الي عليه رسمة ثعلب ..فوكسي ...حلو و يمتص بسرعة ..بس سعره يمكن 650 فلس العلبة الي فيها رولين ...
و الرولين طبعا ما يكملون اسبوع ...

مرة بكارفور لقيت مناديل مطبخ ب 180 فلس رولين و قلت حق اي شي ...بس انصدمت يوم فكيته ان جودته عالية تقريبا نفس المناديل الي متعودة عليهم ..و رديت و خذيت منهم كمية كبيرة ..

العروض الخاصة :

عادة في فصل الصيف تلقين عروض خاصة على نوع معين ...من الافضل تشترين كمية و اتحفظينها عندج اررخص و احسن ...
خصوصا الشغلات الي اتخرب نفس الاولويز و الشامبو و المعجون ..و رولات القصدير ..الخ

 

[خبيرة اعشاب]

المعلبات:

المعلبات اصلا الفروض انقاطعها لانها مضرة حييييل بالصحة و تعد من اهم الاسباب لامراض السكري و الضغط و الكولسترول ...
عموما انا اخذ بس ذرة العملاق الاخضر ..بدون ملح بدون سكر ..و تجي الكرتونه فيها 3 ارخص من الحبة ابروحها طبعا
طبعا في معلبات صحية بكارفور ..الي تكون الخضار معلبة بماء فقط و هاذي احسن شي بس هم بعد انا افضل اخذ الخضار المثلجة ..

معجون الطماط و الصلصات :

بالنسبة للمعجون انا دايما اخذ كي دي دي ...و مؤخرا يوم بديت اقارن الاسعار لقيت معجون هينز ارخص منه ..و بالاستعمال احلى بووواجد من كي دي دي ..استعملته للدقوس ما يعطي مراره او حموضة نفس الكي دي دي ...
فبالتالي اعتمدته عندي ..

الصلصات و الكاتشب اخذي العلب الكبيرة ارخص و اتطول طبعا بس في حالة اذا الاسرة صغيرة ممكن تاخذين علبتين صغار ..

الزيت :
اشتري بالكرتون من مركز الجملة ..ارخص و احسن ..بس بالبيت اتبع طريقة للتوفير في استعمال الزيت ..مو لاني بوفر العلبة لا لاني خايفة على صحتي بالاساس و ما ودي استعمل دهون واجد بالاكل ...

عادة يا اسوي ثقوب صغيرة في القصدير الي يكون مسكر علبة الزيت ..و بالتالي كمية الصب اتكون اقل
و في طبعا الزيت الي يجي على بخاخ احسن جدااا بس ما لقيته بكل الجمعيات الا مرة بالصدفة كنا رايحين للمزرعة و مرينا جمعية الصليبية ..فلقيته فيها ...بس ريحته دسمة و اتحسين فيه طعم المعدن ..فبعدين شريت بخاخ بلاستك عادي و عبيته بالزيت و قمت استعمله ...

زيت الزيتون :
العادة نشتري تنكة من الجملة ..او من ناس يجيبون من الاردن او فلسطين ..واعبي في غرشة اتكفي استعمالي و ان خلصت ارد اعبي مرة ثانية ....

المجمدات و غيره :
من الاحسن عدم شراء المجمدات و خصوصا الهمبرجر و الناجتس و الوجبات المجمدة لانها تحتوي على نسب عالية من الدهون ..و ثانيا اتعود على الاكل السريع ...
انا شخصيا اخذ بس بعض الخضار المجمدة الي ما تنوجد طازجة نفس الارضي شوكي / الباميا الزيرو / الملوخية / اكواز الذرة ...

بالنسبة للدجاج اخذ صدور دجاج فقط بالاضافة الى كراتين الدجاج
عجينة حلويات او جلاش حسب اذا بستعملها او لا ...
شباتي مرات ...

بالنسبة للاجبان :
مرات وااجد نشتري اكثر من الكمية الي نحتاجها و في اغلب الاحسان نضطر انقطهم بالزباله عزكم الله لانتهاء مدة الصلاحية ..فلا حنا استفدنا منهم و لا تصدقنا فيهم...
فاحسن شي اشتري كمية بسيطة تكفينا اسبوع و ان خلص ارد و اشتري مرة ثانية ...

و طبعا قبل لا اتروحين الجمعية سوي جرد لكل شي عندج بلبيت عشان اتعرفين شنو ناقص بالضبط و شنو الغشلات الي تشترينها و الي لا ...

و هم بعد عودي نفسج انج ما تشترين كريمات او شامبو او عطورات الا لما اتخلصين الي عندج ...

 

[خبيرة اعشاب]

:eh_s(3): في سوق اسمه رامز بالشويخ ..ممتاز تلقون فيه اغراض وااجد ارخص من الجمعيات مثل القصدير و النايلون و السفرة ...الخ

 

[طال السكوت]

تبااااااااااااااااااااااارك الله ماشاء الله عليج

فعلا هذى المواضيع اللى صج الواحد يستفيد منها و حتى نرضي الله ونرضي

ازواجنا ......جزاج الله خير وسجلت كل اللى قلتى عليه من ماركات رخيصه وجودتها عاليه بنفس الوقت

لكن ابي اسالج كااارفور وين بالضبط؟؟؟ انا اسمع انه بدبي ؟؟ اما الكويت ما اعرف فرعهم وين

 

[عسولة الكويت]

مشكورة على موضوعج الرائع اللي يفيد الكل يالغالية ويعطيج العافية

متعبة عسافها
كارفور بالافنيوز

 

[خبيرة اعشاب]

متعبة عسافها : حياج حبيبتي و نورتي الموضوع بالنسبة لكارفور تلقينه بالافنيوز ..اخذي الاغراض الي عليهم رقم 1 دايما سعرهم رخيص و الجودة ممتازة ....

في بعد كاكاو بودرة ممتاز و عيالي الحين ما يستغنون عنه قبل كنت اشتري النسكويك بس الحين ما يبون غيره و سعره رخيص بعد ..العلبة فيها كيلو ب 900 فلس تقريبا و عليه بعد رقم 1 في كارفور

بعد مرات يسوون عروض على السمج توني مواخذه منهم الزبيدي بدينارين و نص ...شريت 4 كيلو استعملت منهم شوية و الباقي حطيته بالفريزر حق بعدين

هم بعد تلقون عندهم تشكيلة من الخضروات المجمدة مطبوخة و جاهزة و لذييييذة و صحية ب 850 فلس ..و هاذي ممكن تستعملونها كحلول مرات بالعشا ...بدل ما تطلبون من مطعم ....

انا دايما مرات يصير مالي خلق اسوي عشا فاضطر اطلب فطاير او كنتاكي او اي شي من برة ..فالخضار هاذي بغض النظر عن السعر صحية اكثر ..و سهلة التحضير بس اتحطينها بالمقلاة 15 دقيقة ...يعني تقريبا نفس المرق بس خفيفة حيييل ..ممكن في نفس الوقت احمر بطاط بالفرن او اسوي سلطة و خلاص ...:eh_s(9)::eh_s(9):

و في بعد الشوربه الجاهزة ..بس اتصبينها في جر و اتحرينها و خلاص ..و هم بعد حلوة و طبيعية ...

شغلة ثانية :
الحليب : اشتري الحليب الطويل الامد المراعي ..احلى و ياخذ عندج مدة ما تنتهي صلاحيته و هم بعد سعره مناسب
الكيك و الحلويات استعمل حليب اسمه مدهش ...اخذه من مركز سلطان رخيص و هم بعد زين ...استعمله فقط حق الفطاير او الكيك و السوالف هاذي ..مو شرط نيدو ؟؟؟ صح :eh_s(22):

التقنين :

سبحان الله الخدم يجونا من دول فقيرة و المفروض انهم متعودين على التوفير ...بس ماشاء الله من اول ما تطب الكويت و هي اتبذر باستعمال كل شي ...ليش ؟؟؟ مال عمك ما يهمك ...

اول شي الخدامة حطي لها الصابون بقوطي نيدو او اي قوطي عندج و لا تحطين لا العلبة كامله لانها خلال يومين رح اتخلصها ..

طبعا اتعلمينها ان الصابون هذا حق الملابس و الصابون الثاني حق تغسيل الحوش ...الخ

الكلوركس انا دايما اصبه بالعلبة الصغيرة لاني اسثتقل ال5 لتر و ما اقدر اتحكم بالصب ...

بالنسبة للكمفرت انا اشتري لانس او داوني ريحتهم عندي احلى من الكمفرت خصوصا الي بالخوخ...:eh_s(17):

بعض الشغلات الي نستعملها دائما افضل اشتري كراتين من محلات الجملة :

البيرة / البيبسي / البطاط مال الجهال / البسكوت ...الخ

 

[خبيرة اعشاب]

عسولة الكويت : مرحبا مشكورة على مرورج بالموضوع

 

[*سكون*]

يعطيج العافيه .. خووووووش نصايح

 

[أحب ترابها]

مشكوره يا خبيرتنا ..مبين خبيره بالتسوق بعد الله يعطيج العافيه...باخذ بنصايحج ..ان شاء الله ...ممكن تشرحين شنو قصدج برقم واحد مافهمت

 

[@عروبه@]

الله يعطيج الف عافيه

 

[زيـنـه]

مشكوره

 

[خبيرة اعشاب]

*سكون* : حياج
أحب ترابها : حياج حببيتي ..بالنسبة لرقم 1 , كارفور حاطين رقم 1 على بعض المنتوجات و هاذي علامة اوربية على ان السعر هذا هو ارخص شي ..

@عروبه@: الله يعافيج و نورتي الموضوع

بس يا بنات حنا نبي تجاربكم بعد ...مو شرط التوفير بالجمعية بل كل انواع التوفير ( بالطلعات / تقسيم الراتب / السفر ...الخ ):eh_s(9)::eh_s(9):

 

[أحب ترابها]

مشكوره علي المعلومه ...بالنسبه لطريقتي بالتوفير انا بديت انتبه لنفسي واترك التبذير..ويكفي اننا نكون اخوان لشياطين والعياذ بالله..فسويت استقطاع علشان اظبط الصرف وادش جمعيات بالدوام لسفره اواذا بشتري سياره علشان اخفف من ضغط المصاريف ...وطبعا استغل التنزيلات ..اذا تذكرت شي بقولج

 

[LaSt WoMeN]

خوش موضوع الله يعطيج العافية ان شاء الله

 

[خبيرة اعشاب]

حلوة فكرة الاستقطاع ..وتقدرين اتجمعين منها على المدى الطويل انا فكرت تقريبا اسوي نفس الشغلة بس كل اسبوع احط مبلغ معين ( 5 او 10 دنانير ) عشان ما احس انها وااجد و انساهم بالمرة ..و طبعا لا بغيت اسافر اطلع المبلغ ..يكون تجمع لي شي 300 او 400 دينار بدون ما احس فيهم ...

و اتشرى فيهم اغراض للسفر ....

 

[الجــادل]

مشكوووووره


موضوع مفيد جدا

 

[شندوخه]

افكار حلوه والله يعطيج العافيه
بس بغيت اظيف شي
احنا نستخدم حليب السوفتي للفطاير والمعجنات اوفر وألذ
وبالنسبه لتوفير الفلوس والله على حسب
انا مو مسويه استقطاع ولا داخله جمعيه مابي التزم بشي اخاف تصادفني مناسبه واضطر اني مادفع واخلف للجمعيه
صارت جمعيتي مني وفيني استلم مصروفي واوفر منه مرا 200 مرات 100
مرات ما اوفر شي
بس صج احنا اللي ذبحنا طلعات المطاعم
بس تدرين شكلي بطبق طريقتج كل يوم اوفر 10 او 20 ماحس اني شلت مبلغ وبالنهايه احوشلي مبلغ زين

 

[عنايد]

ماشاء الله عليج
جهد رااائع تشكرين عليه
يعطيج ألف عااافيه فعلا احنا لازم نلتفت لانفسنا شوي ماسوينا شي للمستقبل ذبحنا هالتبذير

 

[كيوت_25]

خوووووووووووووش موضوع و يستحق التثبيت


يزاج الله خير يا خبيره :eh_s(7):​