كوميديا الاقسام .....

[بنات حواء2]

حبيت انزل هلموضوع لانه بصراحه القسم صاير سايلنت كلش مافي حركه قلت نفرفش شوي

و كالعاده الموضوع فكاهي و بنفس الوقت يعكس مشكله من مشكلات هلامه
ههههههههههههههههههه
و خاصه الي منتقله او التعيين اليديد شوي ممكن تلاقي صعوبه في التعامل وي القسم

و نبي نعرض هلمشكله وطريقة التعامل وياها و نبي اساليبكم في التعامل وي بعض الاقسام الي يصير فيها مشاكل
و نلاقي بعض التفاسير لهذه الظاهره المنتشره في مجتمع الحريم

يعني ليش لي دخلتي القسم فجأه يسكتون و يطالعونج بهطريقه

تقول داشه بيت ابوهم مو قسم المدرسه

و ليش اذا قعدتي و قلتي كلمه
طالعوا بعضهم جذي
و بذهووووووووووووووووول و استغراب

و كل ماقتلي اقتراح ما عجب وحده فيهم
قامت و قالت على قولت عبد الناصر حبيب الكل انا معارضه
ههههههههههههه

و ليش اذا شافوج شاده حيلج و تسوين و تنوقلين بهلوسايل يولج قالولج هوب هوب شصاير
انتي ليش شاده حيلج و يوقفلوج هلوقفه ويوقلون ستوب

انا عن نفسي حاشني هلموقف وحده الله يذكرها بالخير قالتلي انتي ليش شاده حيلج شوي شوي
و مشت و بصراحه انقهرت هي شكو انا شاده حيلي و لا لا هي شكو كيفي شي راجعلي
شرايكم الي تقولكم جذي اشلون ترودون عليها
انا من الصدمه سكت ماتوقعت احد بيي يقولي جذي
بالعكس توقعت الكل بيشجع
و الله انا من ماسمعت هلحجي على قولت عبد الناصر درويش
ابكي ابكي كبكاء طفل عجوز
يعني انا شذنبي ان الله خلقني جميل
هههههههههههههههه

و لمن تييبين شغلج علمكتب و تسوين شغلج تلقين وحده لابده لج و تطل عليج شتسوين

و تالي تقول وي شلويه شالله حادج ؟؟
انزين انا ابي اتميز انتي شحارج

يعني تهقون مافي اقسام متفقين و عايشين بسعاده و من السعاده يقلبونها بندري

يلله خلونه نسمع رايكم و خبراتكم
وسمعوني صوت صدى
هههههههههه

 

[fri2010]

ااااااه ام زنوب دستي على الوتر الحساس
عانيت من هالشغله بس كان بالكليه
لي عوده لهالموضوع والمناقشه فيه
ومشكوره على طرح هذا الموضوع

 

[بنات حواء2]

حياج الله فراي صاجه هشي موجود بكل مكان و بكل الدوامات مو بس بالمدارس
بس الواحد كثر مايقدر يتجاهل و يقض النظر بعد شنسوي لاحول و لا قوه
و الله يهدي البعض من الحريم

 

[iLLuMinaTion]

يسلمووو

 

[بنات حواء2]

حياج الله حبيبتي

 

[miele]

انا احاتي ان مايكون في تجاذب و تفاهم بيني وبين مدرسات القسم .. لاني بكون دخييله واول الايام مايقدرون ياخذون راحتهم .. واحاتي الاستغلاليه اللي بتسير علينا كتعيين جديد*

 

[اخت اخوانها]

يبه خلاااااااااااااص وصلت لراي واااااحد وبس



بكشخ واتزقرت على سنقة 10 وادخل مع المدرسة الأولى وأسلم واكون بحاااااالي مالي شغل صار شئ يسوى الضحك ضحكت غيره براااااحتهم حياتي مو متوقفه عليهم ،،


اماااااا سالفة احد يعلق عليج عاد كلن وشخصيتها تفتح مجال لهم ولا لا
انا نوووو وي اجرء احد علي وعمرها ماصارت احد حتى يبدي رايه لما كنت ميداني خلج وسط بكلللل شئ تصير امورج فالروب على قولة عبدالعزيز الجاسم بفرصة ثانية



واموااااااااااااه حقكم كلللللكم



احببببكم

 

[بنات حواء2]

miele
اممم نفس الي احاتيه عشان تصدقيني لمن اقولج عاديتيني
ههههههههههههههههههههه
بس ماتدرين يمكن ربج يقطنه بقسم حليو و حبوب
عمومن المطلوب منه من البدايه نكون وسطيين و نتعامل معاهم باخلاقنه على ماتتضح الامور و برايي حلو الانسان يكون وسطي لا معزول و لا وايد وياهم الوسطيه حلوه
الاستقلال الاغلب راح يستقل هذي مافيها روح تعال و هذا من تجربتي بالميداني لمن كنت اشوفهم يقطون الشغل عى التعيين اليديد
الله يعين



اخت اخوانها
اهلين حبيبتي و يعلم الله اني بعد احبكم و حبيت هلموضوع يكون في فايده لنه كلنه
من ناحية الكشخه هذي نسيت اعلق عليها لي كشختي جنج غالطه عليهم يعطونج نظره غريبه تقول غالطه عليهم
ههههههههههههههههههههههههههه
منوره حبيبتي


وينكم بنات نبي نصايحكم و تجاربكم شدعوه

 

[Maryam]

شوفي اللي يقولون لج ليش شادة حيلج
حايشها احباااااااط شديييييد
و تحط الحرة فيج

 

[صدقني@صعبه]

يعيني على هالموووووووووووووضوووع حده ناااايس

والله صج ما اددري ليش انا كنت اواجهه بالميداني
الكل يحبط من معنوياتي وليش اتجيبين وليش اتسوين ماله داعي وليش خابه عمرج
يعني اسوي العاب ومسابقات وازين الصف ولما يشوفنه احسهم متضايقين
وفي ابله كنت ماخذ صف من صفوفها بثانيه
ودخلت على صف ثانيه ثاني عليهم احتياط وقعدت اقولهم قصص يخص دروس العلوم وهي دخلت عليهم توزع كتبهم وجان البنات يقولون ابله احنا ما نبيج اتدرسينا الابله هذي حبوبه تلعبنا وتقول لنا قصص
عاد اهي شردت مو كافي مخربه صف 2/3 علي بعد هذول غسلتي مخهم؟!!
تخيلووووااا؟


ومن هالكلمه وحسيت شي بقلبي


وعاد على الكشخه حدث ولا حرج بصراحه انا نظامي كله بدل واغلب قمصاني تفصال يعني ما تلاقين نفسهم عاد هم حاطين عليه حطه شحقه تلبسين ماله داعي يبى البسي لج عبايه احسن واريح ومن هالسوالف
ومشرفي مال الميداني يقول لي استمري بهذا النظام الانه الطالب راح يتعلق بالماده ويفهمها اكثر كل ماكانت نفسيتج حلوه ولبسج مرتب انيق كل ما يكون الطالب لهووف على حصتج

والله عاد صج كلامه يعني لما ادخل الاداره الصبح ولا نص بنات الصفوف اللي ادرسهم قاعدين ينطرووني والاحظ من نظراتهم شلون يطلعوني
بس صج ايام حلووووووووووووووووه

 

[ام حنااين]

وايد معلمات اذا انتى بس تسوين شغلج وماتتميزين اهم حبايبج وشحلوهم

بس تسوين معرض او ورشة اوتسوين شغل ادارى ويمدحونج المديرة او الموجه صاروا ما يحبونج وغصب يردون السلام

هالنوع طنشيه اذا انتى تحبين تحللين معاشج مومن اللي كل وسائلها قديمة وكل يوم غايبة


انا جربت من انسانة عزيزة على حيييل مرة قالت شسالفة هاللاب توب كل يوم معاج واذا اخذت حصص اضافى تقول غريبة شادة حيلج اليوم بس طنشتها قامت ماتقول هالحجى

 

[MISS_PURPL]

يعطيج العافية على الموضوع واايد حلو ،،،

 

[المـــــها]

هههههههههه أشوه أنا قسمي كان يثني على كشختي و نشاطي
لما يشوفون شغلي يطالعون شغلي و يشوفونشمسوية اليوم و شنو بطاقاتي و وسائلي و يندهشون من شغلي
و الله كانوا يشجعوني و يتسلفون أغراضي و بطايقي هههههههه
بس الحمدلله ماحد حبطني
بعدين كل وحده و شخصيتها
في ناس فيها نشاط و تحب تشتغل و تحب تكشخ و في ناس العكس​

 

[Bronzya kwt]

وييييي ياامالج من هالنوعيه وايد وايد بتجوفينهم

لااا بعد ادعي ربج ماتصلدفين النوعية اللي تبوق اغراضج

انا اذا غبت والا كنت بحصه من حصصي

القااا مزاد علا اغراضي كل شي بحته علا قولتهم مره فقدت المغناطيس العود كنت شاريه ٧ منه

اثبت اللوحه العوده ع الصبوره وكل يوم كانوا ينقصون استغربت وطنشت

وعلا اخر السنه لقيت واحد علا مكتب ابلة والثانية ماخذه مغناطيسسين ومثبته فيهم وسايلها

امبيه صج احتريت حسيت انهم اشكره يبوقون وعادي

بس ماطوفتها قتلهم امبيه عاد البوق مو جذي بس علا بو اني اضحك معاهم وافتشلوا

بس صج تعودي تكونين ريلاكس عشان ماتتعبين راح يمرون عليكم انواع من المدرسات حدهم مو شي

بس هم اكو ناس سنعه وتحس علا دمها لووووول

وعلا سالفة الشغل مالج شغل باللي تعطيج من مود الاحباط ماتبيج احسن منها

So انتي تميزي قد ماتقدرين be uniqe

الله يوفقكم :*

 

[** رش رش **]

دستي على الجرح يا قلبي ... هذا الي خايفه منه لاني مقدمه نقل و ماني عارفه اشبلاقي بمدرستي الجديده
لاني متعوده بقسمي القديم كنا كلنا مشاء الله علينا خوااات .... مستحيل وحده تحبط الثانيه بالعكس الكل يشجع بعض
و اي وحده تسوي وسيله جديده او ورقه عمل فيها فكره تعرضها على الكل و تاخذ رايهم و الكل يعطي رايه بصدق
و كنا نتبادل الوسائل مع بعض و نتقاسم الشغل بدون حتى ما ندخل رئيسه القسم
و اذا جات الموجه و لا الناظره تبي تدخل على وحده الكل يجيها و يسالها محتاجه شي و يعرض عليها من وسايله و مصوراته بدون حتى ما تطلب
يا ويل قلبي على رفيجاتي ما اظن بلاقي مثلهم ابد

 

[بنات حواء2]

شوفي اللي يقولون لج ليش شادة حيلج
حايشها احباااااااط شديييييد
و تحط الحرة فيج

اهلين مريومه تصدقين انا فسرت نفس التفسير و اعتقد انها ماتبي احد يتميز عليها لانها قديمه
منوره الموضوع حبيبتي بس ماقلتي لنه تجاربج و خبرتج في هلخصوص ياريت تفيدينه


صدقني@صعبه
امبي هههههههههههه حدج ضحكتيني على الي شردت
هههههههههههههههههههههههههههههه
اي هذا الحسد تدرين عاد انا بالميداني من عينهم و الله ثم و الله كنت من مرض لي مرض تخيلي اخلص المضاد ارد امرض و اخذ مضاد ثاني و كان في وحده دايم تحذرني مره خذتني على كتر و حلفتني اني اسوي الي هي تقولي علي و انا منصدمه قتلها اي شنو قولي تقولي حلفي ما تحجين مسكينه هي حبوبه و هاديه و مالها بالمشاكل قلت لها و الله ما اتكلم و لا هذا طبعي و انتي راح تعرفيني تقولي انا ما احب اغتاب احد بس عليج الله تلتزمين بلاذكار ترى العين حق قلت لها انشالله بس شنو السبب الي خلاج تقولين جذي قالتلي كثر الحجي عنج و و الله خايفه عليج
قيم بالله انها كبرت بعيني و حسيت بطيبتها ماشاالله تبارك الرحمن اللله يجمله و يزودها باخلاقها
صج الميداني ذكرياته حلوه و انشالله يصير التدريس بعد التعيين احلى
منوره الموضوع تجاربج حلوه و مفيده و نفس المعانات



ام حنااين
اوافقج الراي
صح في ناس يتغيرون من تسوين شي مميز
بس مايشوفون شر و على قولتج احنه نحلل معاشنه ما ننتظر منهم اوامر سوي او لا تسوين
او يمكن غيره و حسد
وفي ناس ممكن يزعلون لانج ماقلتي لهم افكارج انزين هذي افكاري و انا ابي اتميز فيها و هذا حقي و مو من حق احد ياخذ افكاري من غير اذني و بما اني ماقلت اذن انا ما عطيت حق احد اذن
يسلمو حبيبتي نصايحج تهبل


MISS_PURPL
حبيبتي الله يعافيج منوره الموضوع


المها
انشالهل يارب تتعينين بقسم مثله و احسن منه
و انشالله كلنه نتوفق بهشي يارب
وفعلن القسم الي يثني على شغلج و يمدحج ثقي تماما ان مافيه غيره و حسد بالعكس راح تلقين فيه اجمل صور التنافس الايجابي
و الله يهنينه بهلاقسام يارب
و اكيدد الكل يحب ان الناس يمدحونه و يثنون على شغله و هذا الشي يزيد الدافعيه و الابداع
بعكس الانسان الي يشتغل و مايقلى من يشكره او يمدح شغله يحس باحباط و يوقف مجهوده
و صاجه في اختلاف بين الناس و ظروفهم
بس احس الابله الي تكشخ ريفرش يوميا


Bronzya kwt
حبيبتي تسلمين عنصايح الحلوه و الدعوه الحلوه و لج بالمثل حبيبتي
و صاجه في اشكال و الوان بس اهم شي الهدوء و كظم الغيض
و هذا الي كنت اسويه امسك اعصابي قصبن علي مابي اسوي مشاكل
و هذا احسن حل التطنيش
منوره الموضوع حبيبتي



** رش رش **

هلا و الله حبيبتي رش رش ردج مفرح بصراحه و يدل ان الدنيا ليلحين بخير و اصابع الايد مو سوا
و يازين الاقسام المتعاونه و الي قلبهم على قلب بعض تلقين الله موفقهم
و هذا الحلو
و انتي لا تضيقين خلقج و لا تتعبين نفسج انشالله ربي يعوضج مثل هلقسم و احسن
بس انتي دامج مرتاحه ليش نقلتي ؟
لو ظاله احسن لج
عمومن تفائلي بالخير تجديه و موفقه ياقلبي

 

[Turquoiseya]

:dddds:

اما سالفة وحدة اطل عليج لووول
ذكرتيني بزميلة كان مكتبها يم مكتبي 00 فدايما عيونها طايحة بدرجي واللي فيه


ام زنووووب انتي ابداع :aha:

 

[~ FOOSY ~]

up

up

 

[مريم ص]

ام زبوب شنو لج عندهم ؟
يا حبيبتي ضربيهم بالطوف و مالج شغل الا برئيسة قسمج و بالادارة
و الوحده اذا صارت سيده و علاقتها زينه مع رئيسة قسمها ما يهمها حتى لو احفرولها من وراها

صراحه هذا الموضوع للاسف منتشر بشكل مو طبيعي و لازم يحوشج طشار منه

عاد المشكله انهم يغثونج و ما يحترمونج و اذا بغوا منج شي تلزقوا فيج حتى باتفه الاشياء مثلا ياخذون منج اغراضج اللي على مكتبج مثل اقلامج ولا دبابيسج او اي شي و بعد ما يخلصون ياخذونهم لهم على طول او يقطونهم ولا يردونهم بس عشان ما يشكرونج يبونج انتي اللي تدورين عليهم
انا تلوع جبدي من مدرساتي كل وحدة حاطتلي طقم مكتب احلى من الثانية و بالسعر الفلاني و اغراض ما عندها كل اشوي افقد دباستي او اقلامي او,,,,,, و عاد تعالي سالي و منو يرد عليج كل وحده تقول ما ادري و المشكله تكون الاغراض على مكاتبهم و ينكرونها حتى ما يقومون يوصلونها لي عندي لازم اقط جم كلمه عشان يتلحلحون و يردون اغراضي

( اني لهم بالمرصاد )
هالجمله مو معناته اني قشره بس الحق حق انا اروح و اشتري و هذول ياخذون الاغراض على الجاهز
اما اللي تطلب لها عيوني و الله و اللي تستاذن و تحافظ و ترد الاغراض هذي بنت اصل

 

[fri2010]

واااااي حتى بالمدرسه جذي

ايام الكليه كنت اييب معاي مقلمه

فيها 5 اقلام وقلمين رصاص ومسطره ومحايه وهاي لايت لوول وكوركتر يعني كل شي

واسلف البنات وما يردونه لي حدي افتشل وما اعرف شقول

والحين بتطلع وياي هالسالفه بعد بالمدرسه!!!!!!!