كنا بنسكن بشقة بروحنـا .. بس اللحين قـرروا نسكن عندهـم ( حمولتي ) شلون اتعامل معاهم ؟

[اخت خالتهم]

السـلام عليكم ورحمة الله وبركاته


شلونكم شخباركم

بناااات قبل جم شهر كتبت موضوع وكان باقي 5 شهور
واللحين سبحان الله مر الوقت بسرعه وباقي شهر وشي

المهـم احنا كنا مقررين نسكن بـرا
بس الله كتب نسكن عندهـم لأن بيتهم صار فااضي
و بعـد انا كليـه يعني ما اقدر اطبخ غدا .. و ما ارد الا العصـر ..

اللـي أفكـر فيه شلون اتعامل معاهم
بنات انـا حياويه و ما احب اقعد وايد مع ناس احب أكون بروحي
بس بنفس الوقت خالتي طيوووبه وحبوبه الحمدلله
أبي أكسبها وما تفهمني غلط لان انا جذي كله بروحي

فـ شلون تعاملي يكون معاهم ..
و شلون اعودهم اني ما انزل و اقعد على طول معاهم


وانتو اللي اخوانكم متزوجين تحبون ان جنتكم تنزل والا احسن تكون بروحها ؟؟

انا ما احاتي اطباعهم لاني واثقه فيهم ..
بس ابي ما يفهموني غلط
وابي نصايحكم

وشكرا​

 

[اخت خالتهم]

اب
اب
شدعوه بنات وينكم

 

[حطموكَ يآقلـبيَ]

حياتي وقت فضاوتج نزلي شوي عند خالتج وسولفي معاها واستانسي وبعدها صعدي شقتك عشان مايفهمونك غلط ان مانزلتي مدام خالتج حبوبه لاتخسرينه والله يوفقج

 

[الدااانــــه]

راي من راي الي قبلي يعني لو سااعه فاضيه نزلي قعدي مع خالتج شووي وبعدها صعدي شقتج

 

[قآهرني بس آحبه]

اب اب

 

[*peace*]

عادي لي خلاص بتصعدين تحلطمي قولي الله يعيني بروح ادرس واتسبح وانظف ومن هالحجي

خلج واضحه وصريحه عادي الوضع عادي لاتحاتين

وانتي بعدين بتعرفين نوعية خالتج اذا تحب تطولين تحت او لا

 

[يآحبي الدآيم]

انتي عندج دواام يعني تجين وقت الغدا يعني تغدي وصعدي ولا تنزلين لا الساعه 7 واقعدي ساعه او ساعتين واصعدي يقولي بنام مبجر وراي قعده من الصبح

وبس ترا الامووور سهالات ولا تحاتين مثل هشغلات مادرين يمكن انتي تصيرين تحبين تقعدين معاهم وما تحبين القعده بروحج والله يوفقج

 

[mon-amour]

لا تدققدين وايد


خلي تصرفاتج طبيعية

 

[جنون العاصفه]

عادي حبيبتي راح تعودين على الحياه اليديده ...........مثل ماقلت الاخت انتي تدوامين بغداء تجتمعين معهم وبعدين اصعدي وانزلي على ساعه 7وتقهوي او سوي اقهوه مع حلى ,,,,
بس خليج سنعه لاتفشلين اهلج.......................

 

[blondeya-pretty]

عادي لي خلاص بتصعدين تحلطمي قولي الله يعيني بروح ادرس واتسبح وانظف ومن هالحجي

خلج واضحه وصريحه عادي الوضع عادي لاتحاتين

وانتي بعدين بتعرفين نوعية خالتج اذا تحب تطولين تحت او لا

رايي من رايهااااا :eh_s(15): نزلي قعدي شوي ولما بتصعدين قولي وااي ورااي دراسة او قوليلهم استأذنكم بروح اتسبح وانظف الغرفة أو اي شي عشان يحسون انج مشغولة وعندج شغل وجذي ولازم تصعدين:eh_s(15):

 

[" ام حمود "]

خليج ع طبيعتج عادي ضحكي وسولفي اذا ودج تروحين فوق قولي حق خالتج
خالتي بروح فوق اكممل دراستي وعندج شغل بالبيت وتنظيف وجذي
لاتحاتين .. انا مرت اخوي كانت قبل ساكنه عندناا لما تنزل نستانس كانت بس تضحك والكل يحبها ونستانس لما نشوفهاا وكانت وقتها تدرس اذا خلصنا سوالف وضحك تقول لناا يلاا بروح فووق اكمل دراستيء وانظف البيت طبعاا احنا نعطيهاا خدامتناا عشان ماتتعب بتنظيف البيت .. كل ماصرتيء حبوبه وفرفوشه مع حمواتج وخالتج صدقيني بيحبوونج ..
الله يوفقج ومبرووك مقدمآآ ..

 

[تعبت اداري...~]

هوبآ......

 

[فوفى]

عادى قعدى مع خالتج اول ماترجعين من الدوام ولا تغيرين ملابسج لا قعدى ساعة بعدين قولى انا تعبانة بروح اتسبح وانام.

 

[a7la roro]

انا بعد اقول لج ماتدرين دامه خالتج حبوبة يمكن انتي ترتاحين وتكرهين الوحده
انا كنت مثلج احاتي واللحين والله مايمر يوم الا مانزل واطول واجلس معهم واذا مارحت اتضايق لانهم حدهم حبوبين والجلسه معهم ماتنمل
راي من راي خواتي متى مافضيتي نزلي ساعه وجلسي بعدها تعذري قولي ودي اجلس لكن هالدراسه وراي قومه صبح ودوام
والله يوفقج

 

[ام دلال ومنال]

شوفي حبيبتي اذا انتي اجتماعيه او مو اجتماعيه


اجتماعيه : انزلي كل يوم ساعه بعد اذان المغرب او بعد العشا انزلي تعشي معاهم بحكم انج ماتطلعين الا العصر

اذا مو اجتماعيه : انزلي يوم وترك ساعه او ساعتين اللي يريحج وبعدين صعدي ولاتسيرين رسميه حيل ولا ماخذه راحتج مسكي العصا من النص وخصوصياتج كلش لاتسولفين فيها ضحكي وسولفي الا خصوصياتج خط احمرر عليها


وشوفي نفسج من اول شي موتعودينهم كل يوم تنزلين وفجاه تطخين ماتنزلين والعكس صحيح والله يوفقج يااااااااااارب وتسيرون سمنه على عسل ​

 

[سيلينا]

الله يتمم عليكم على خير يارب

صراحه انا مثلج ما احب اقط روحي زياده عن اللزوم وما احب احد يطيح الميانه معااي زياده عن اللزوم لاني اشوي حساسه والكلمه تجرحني وبصراحه ما ابي اسوي حزازه او اشيل بخاطري على اهل زوجي
الي انا اسويه لما ارد يعني كنت طالعه راده من الدوام امر خالتي اذا كانت بالصاله واسولف معاها اشوي واصعد بس مو مقرر يومي انزل واقعد تحت صراحه مرااات ابي هدوء وابي اقعد لو ما عندي شي انسدح برووحي بالصاله

احسن حل عامليها مثل امج لو جرحج شي منها دايما افترضي حسن النيه وانها ما تقصد ودايما اوصليها يعني لي طولتي ما صادفتيها نزلي حلو معاج اسوي لج كيكه شغل بيت وقعدي معاها بوساعه ساعتين لو انج تحبين تقعدين بروحج بس انتي الحين عايشه مع ناس بالبيت حاولي دايما مبتسمه وسلامج لخالتج ولعمج غير وحاولي احسن وقت المغرب مري سلمي وقعدي اشوي واطلعي اذا عندج مشوار او وراج تنظيف او دراسه يعني قولي من زمان ماشفتج قلت اقعد معاج اشوي والله عندي شغل فووق او عندي مشوار عذريني خالتي ولا قعدتج ما تنمل

واذا زوجج عنده خوات علاقتج فيهم تعتمد على شخصياتهم اذا حبوبين خلي علاااقتج قووويه واذا حسيتي متقلبين خليج حليوه معاهم من غير لا تطلع منج الشينه واذا سألتج سؤال عطيها على مزاجها لا تعارضينها

وموفقه يااارب​

 

[Čut!e Quèéи]

انا ساكنه مع حمولتي
سواء عندج كليه او ماعندج
لاااا تطبخين لهم الا بالشهر مره عن خاطرج
اذا عودتيهم كله تطبخين باجر يقولون مانكل الا منج وتبتلشين
انتي مو ملزومه فيهم بس ملزومه في زوجـج
وبعدين خلي تعاملج نوعاً ما رسمي لا تطيحين الميانه معاهم ولا تقعدين وايد معاهم
يعني اهم شي التزمي معاهم على الغدا اذا وقتج يسمح وماتكونين بالكليه
وبعد الغدا جامليهم 10 دقايق واستأذني قولي بروح ارتاح اشوي العصر جامليهم
بعد صلاة العصر نزلي قعدي معاهم ساعه وحطي لهم الجاي و القهوه واشتري كيك وضيفيهم العصر
جذي راح يستانسوون ويقولون ياحلوها سنعه يمعتنا على الوناسه عقب ساعه قومي استأذني
قولي روح ادرس عندي وايد مراجعات و حفظ ولا تنزلين كلش قعدي بشقتج لي وقت العشااااا
ساعتها يا تعشين من عشاهم او تسووين عشا حقج وحق زوجج وكله حطي الحجه براسه
ليش ما تاكلون معانا ؟ والله مادري فلان قال سوي لي العشا ويبيه فووق الحجه المعتاده لوووول
اي يوم تطلعين لاتقولين وين رايحه وحق شنو بس مري على خالتج قولي لها خالتي انا طالعه تامرين على شي؟
وين بتروحين ؟ والله مشوار وبرجع لا تعطين تفاصيل عشان لا يتعودون على اللقافه
اي شي تشترينه وانتي داشه لا تورينهم سلمي وصعدي غرفتج هذي الطريقه تخلي حاجز بينكم وحدود ما يتعدونها
وبس الله يوفقج وياهم وحتى لو تشوفينهم حيييييل طيبين ويحبونج لا تطيحين الميانه خلي لج شخصيتج وفرضيها عليهم

 

[تبطي عظم!]

كأنج تتكلمين عني

كنت احاتي هالشيء قبل العرس بس الي صار

انزل مل يوم ونرك ساعتين ع الاقل او ساعه اكثر من جذي لا طبعا هالوقت مو انا حددته حق نفسي انا

لاحظت انهم جذي يقعدون ساعه معاي ولعدين كلن يلهى بشغله فعرفت ان وقتي لهم وقتهم لي بس ساعه او ساعتين بالويك اند

كلامي مو رسمي ولا منفتحه حيييل اسولف بس بالشيء المهم

الحش تجنبيه لا تحشين عند حمولتج بأي احد حتن لو فنانه حشو فيها اكتفي بالابتسامه هذي فكرتي وتعاملي مع حمولتي احبهم ويحبوني الحمد لله

وموفقه يارب ~

 

[اخت خالتهم]

حبايبي والله تسلمون وماا قصرتوووا
شجعتوووني والله

فديتكم الله لا يحرمني منكم

 

[اخت خالتهم]

ودي ارد عليكم وحده وحده
بس ما شاءالله بنات ديرتي سنع وذرابه
الله لا يغير عليكم

سيلينا
حسيتج انا والله ..
حبيبتي مشكوره عجبني وايد ردج