كل وحده تقول لنا منو (( أسنــــــع )) شخص صادفته بحياتها؟؟؟؟؟

[سبائك]

السلام عليكم


شلونكم بنات عساكم بخير


ذاك اليوم آنا وامي وخواتي قاعدين نسولف عن وحده تبارك الرحمن ماشاءالله لا قوة الا بالله سنعه لأقصى درجه

سنعه في بيتها مجابلته وشايلته الله يحفظها

وبصراحه من زمان وآنا ملاحظتها تبارك الرحمن شغلها كله سنع وما تيبب معاها
نقصه ولا ماعون الا ويكون مميز بين كل الاطباق

غير هذا لبسها ولبس عيالها دايما مميز وحلو ومرتب

ماشاءالله عليها من سنعها مره طاح عليها ريلها كاتبه ورقتين للجمعيه
وحده منهم أغراض للحلو وفلوسها بروحها
استغرب ريلها قال لها ليش هالاغراض بروحهم بالحساب!!!!!!
قالت له لان بسوي حلو حق بيت أهلي وفلوس الحلو من فلوسي مو من مصرف البيت الي تعطيني اياه للبيت!!!!!

ماشاءالله عليها تبارك الرحمن


هذا نموذج حلو وطيب مر علي بحياتي

شرايكم كل وحده فيكم تذكر لنا أشخاص سنعين مروا عليها بحياتها

وشنو صفات السنع الي لفتت نظرها فيهم علشان كلنا نستفيد ونحاول نطبق على نفسنا:eh_s(15)::eh_s(15):

 

[irresistible]

تصدقين سؤالك روعة لازم افكر فيه عدل علشان اجاوب لان لي الحين ما صادفت هذي الشخصية

 

[ريفيل]

سنع منو ...منو .. ايه تذكرت في وحدة معانا بالمدرسه مطلقة اتمنى اكون مثلها( بس مو مطلقة) ما شاء الله دايما شغلها كامل كلمتها موزونه شايلة بيتها وعيالها وامها وهم بنات اختها سنع ما مر على تجهيز عرايس العايلة كلهم عندها من بنات اخوان من بنات خوات بالدوام شغلها ملفاتها حتى الطبق اللي تشارك فيه غير عيالها تبارك الرحمن متوفقين عمري ما سمعت منها كلمه تضايق او احس انها كلمه سفيه وسلااامتكم

 

[شـمــعة]

خووش سؤال ..

والجواب عليه صعب

بس طرت على بالي رفيجتي بالدوام ...

حبوبه ومتميزه ... فصلها مميز .. علاقتها في بيتها ممتازه مع بناتها .. بس دلوعه حبتين على زوجها .. هذي تنحسب عليها

بس من النظافة .. مجننه الخدامات هههههههه
ومن الشغل بالدوام .. كامل ومرتب
ومن الاهتمام .. تهتم بكل صغيره وكبيره حواليها
من علاقات اجتماعيه .. حبوبه عالآخر .. وما تاخذ انطباع عن احد من غير ما تعرفه او من شكله

يعني الله يحفظها ان شاء الله

ويحفظنا وياها :eh_s(8):​

 

[MissChoco]

مــــــحد .. لأنه مو كامل الا وجهه سبحان وتعالى

وموضوعج وايد أيينن

 

[سبائك]

ماشاءالله لا قوة الا بالله الله يزيدهم من فضله يارب


مشكورين حبيباتي ما قصرتوا على المشاركه

 

[همسات ليالي]

سؤالج حلووووووووووو سبائك

واجابته صعبه

انا عندي وحده سنعه وماشاء الله عليها عاشرتها وبالسفر سافرت معاها واهي على فكرة معانا بالمنتدى

عقل وثقل وعمر حمولتها ما سمعوا منها شي يغت هاديه وكلمتها رزينه

ماشاءالله عليج يا فتوووووووووووووووووووون

 

[لانا]

انا ماكو اسنع مني......هع هع هع هع خخخخخخخخخ

صديقتي سنعه تهبل....قايمه في بيتهم قومه مع ان عندها اخوان اكبر منها (اهي مو متزوجه )الله يرزقها باللي يستاهلها....
دايما تسألني عن شغلات خاصه فيني انا اكون ناسيتها....مهتمه بالكبير والصغير....عقلهاا كبير ماشاءالله عليها
الله يحفظها و يرزقها باللي تتمناه
والله يخليها لي اخت حنونه ماكو منها......حبيبتي سوسو

 

[قلم صريح]

وايد خصوصا حريم قبل

 

[حصة]

والله يا سبوج وايد صادفوني جذي بس صج صج عندي بنت خالتي تبارك الرحمن ولا اله الا الله سنعة ومحترمة لأبعد الحدود وملتزمة بشكل تحسين مو ماخذة الدين دعاية او مثل اللي اليوم نشوفة لأ تحسين فاهمتة وتفهمج ايه بيسر مو بعسر ونصوووحة وايد ونصيحتها اتيين وقايمة ابيتها ماشاءالله جنج داشة بيت اسباني نظامة والوانة طبعا النظافة لا تشوفين تبارك الرحمن والتنسيق والطبخ المميز واللبس السنع والعيال المرتبين واللي وايد مهتمة فيهم ومميزة بدوامها لدرجة اهيا مدرسة ثنوية ومرة طلبني الدكوتر اسوي مقابلة مع ناظرة ثنوية فقتلها تكلم ناظرتها تعرفين لما رحت قامو فيني قومة ليش اني بنت خالتها يعني صج صج شفت سنعين بس مثلها سنعة كل النواحي سنع وجمال وادب واخلاق عالية ودين تبارك الرحمن صج صج كل من يضرب المثل فيها حتى اهل ريلها يموتون عليها والله حتى ويها يريح انا لي شفتة ارتاح وطبعا ذرابة واسلوب والله يا سبوج لو اتحجى عنها ما اخلص ماشاء الله وشكووورة عالموضوع الحلو صج

 

[زلابيا]

سؤالج حلو سبوح ويابلي الصداع قاعده افكر بمنو وحده سنعه منو منو ؟؟؟

ليلحين ما صادفتها .. او يمكن صادفتها وماني ذاكره ..

بس لي ذكرت بكتب

 

[سيد-الغنادير]

حلو سؤالك ياسبائك وانا دائما احب مواضيعك وردودك دايمن هاديه تدل على شخصيتك المتزنه

بدون غرور دايمن اسمع من الناس اني انا سنعة ودايمن مايلاقون علي زلة من جميع النواحي وفي كل مكان بيت حمولتي ومدرستي ورفيقاتي ..:eh_s(9):


وبصراحة انا اشوف مرت اخوي ماشالله عليها حيل سنعة ومرتبه ونظيفة ومرت بيت صح وعيالها متفوقين وطباخة وقايمة بواجباتها على اكمل وجه ماشالله عليها..

 

[@ام ضاري@]

السنعااااااااااات وايد ياكثرهم

واكثرهم حريم اول الحين موذكرني احد قلت ادش واقرااا وماحبيت اطلع بدون رد

 

[امون حبيبة زوجها]

انا اللي اشوفها سنننعه منعه صراحه

عماتي ثنتين

الاولى عمتي كبيره متزوجه وعندها عيال وحفيده بعد بس شنو سنع الطباخ ماعمره مر علي انسانه نفس طبخها معروفه عند الكل هوايتها الطبخ ماشالله البيت والنظافه والسنع لو عندها 70 جاهل البيت نظيف بس وسواسيه والخدامه ماتقعد من زود نظافتها واهتمامها

وعمتي الثانيه مالله رزقها بعيال بس سنع وذووق ماشالله بكل شي بيتها وذقها قمه

وبنت عمة امي ورفيجتي بنفس الوقت امبييه ارتب وحده شفتها بالعالم ماشالله تبارك الله لدرجة امي اول مانزلنا بيتنا امعانيها وااجد بشكل موطبيعي حاولت تشوفلهم حل لين انفجر راسها مافي مجال ماكفا المطبخ نادتها امي قالتلها ساعدني بترتيب المعاين تعالي شوفي ياسبوج شلون قلبت المطبخ والماعين ماشالله هوايه

الطباخ انا ماذقت طباخها الا مرتين او ثلاث والشهاده لله حلو بس امبيه سنعه ومرتبه لدرجة مره بيتزوج اخوها ومافي غرف اخذ غرفتها واهي قصتلها ربعه صغيره من الصاله ربعه مايقعد فيها القطو من صغرها بس يوم دشيت عليها الربعه تقولين فندق شنو مرتبتها ومسنعتها ماشالله صارت شي ولا يوم فجيت الثلاجه امبيه الترتيب يخرع لدرجة اقولها ماتتعبين من النظام ماودج بشوية دثره خخخخخخخخخخخخخخخخخ

 

[مهاوي البحرين]

تدرين ما في بالي احد

بس موضوعج حلو

 

[سعوديه بينكم]

حيل حلو موضوعك
انا عندي بنت خالتي ماشاء الله عليها احسها حيل سنعه تبارك الله قايمه ببيت اهلها قومه وكل شيء اهيا تتصرف فيه وتبين نظافه وترتيب وطبخ وكل شيء ذووق ماشاء الله عليها اهيا ماتزوجت طبعا للحين ربي يرزقها بس ماشاء الله عليها حتى ترتاحين لما تسولفين وياها اتذكر مره كنت متضايقه وانا طبعي مااحب اقول لاحد اذا متضايقه اهيا خلتني اقول مادري كيف قلت لها بس اهيا بطريقتها خلتني اقول لها لي في بالي وحضنتني لها فديتها والله ذيك البنت احس مافي مثلها ماشاء الله عليها حتى ما امها وخالتي تناظرهم واي شيء يبونه او يحتاجونه تجيبه لهم ودايم مع اخوانها حتى اخوانها ما يقون عنها كلش يقولون لها لا تتزوجين وتخلينا راح نضيع من دونك ودايم تشوفينها واقفه ما تقعد كلش تزين هذا وتسأل عن هذا وكل شيء ماشاء الله عليها تبارك الرحمن عسانا نكون مثلها يارب
وتسلمين سبوكتي على هالموضوع الرائع
الله لايحرمنا منك ،،

 

[مرت ريلي]

بصراحة أمي وأتمنى أكون مثلها
جميلة وأنيقة دايما وست بيت وذوقها حلو
وبيتها وايد حلو ومرتب بشهادة الكل
واجتماعية وتحب اللمة وطيبة وحنونة
على يدتي واخوانها وابوي وعلينا
ومتفهمة وما أمدح فيها لأنها أمي
بس لأنها فعلا اللي ودي أكون نفسها
لما أكون بعمرها

يسلموا عالموضوع السنع يا أم السنع كله فديتج

 

[المستبده]

اول ماشفت الموضوع طرت علي مــرت اخووي جد جد سنعه بكل معنه الكلمه
اول شي مافيها الغيره والحسد
واثقه من عمرها
لبيسه وكشيخه
طباخه درجه اولى
عيالها ماشالله قمه الادب والاسلوب
موفقه بين بيتها وبين وظيفتها واتوجب الكل ونصوحه
اتينن اتينن عن جد الله يحفظها وماشالله عليها
لاوفوق هاذا تسوي سوالف تقديم وقرقيعان وشغلها عجييييييييييييييب
توني ماخذه منها قرقيعان \\\ مو دعايه ها \\\ ماشالله الله يتمم عليها

 

[سبائك]

حياكم الله حياتي والله انتوا

وآنا متاكده كل وحده دشت هالموضوع وعلقت سنعه لانها تحب السنع فلفت نظرها عنوان الموضوع


مشكورين وما نتحرمش يارب

 

[أميرة الورد]

الصراحة مرت أخوي ومرت عمي ثنتينيهم دينات ونظاف وازقرتيه مع انه مرت اخوي منقبة بس لبسها راقي وتنحط عالجرح يبرى لا عمري سمعتها حشت والا طلعت منها غلطة لدرجة والله لو أخوي يغلط عليها يا ويله منا ومن أمي والله يتمم عليها ان شاء الله ويسعدها مع اخوي