كل وحدة تاخذ الجلوكوفاج اثناء الحمل ياريت تجاوبني

[كوكي العسل]

السلام عليكم ورحمة الله وبركاته

خواتي انا عندي تكيس وتعالجت بالجلوكوفاج وحملت الحمدلله

بس بعدني مستمره عليه لانه يعمل مثل مثبت

بصراحة انا نفسيتي وايد تعبااااانة لان من حملت والدكاترة تعبوني

منهم يقولون استمري عليه مايضر بشي وشي يقولون لا وقفيه ومايصير تاخذينه بالحمل

وانا صج احس خلاص وصلت مرحلة من التفكير والحالة النفسية :eh_s(16):

والله نفسيتي وايد تعبانة احس صايرة بين نارين نار اني صج اوقفه والتكيس ياثر على الحمل

وتصير عندي ولادة مبكرة لا سمح الله :eh_s(16): ونار اني استمر فيه ولا سمح الله يضر الجنين :eh_s(11):

خواتي ماادري شسوي انا بغربة وصج تعبانة وهالحمل هذا صار بعد تعب وانتظار

منو استمرت عليه وولدت وماضر الطفل

 

[كوكي العسل]

للرفع

 

[أم عبود 2011]

ربي يثبت لج الحمل على خير
شوفي آنا فيني سكر من قبل الحمل وآخذ جلوكوفاج 1500 يعني 3 حبات باليوم
ولما حملت طبعا بالبداية راجعت أكثر من دكتور علشان أتأكد من سالفة الحبوب 3 منهم قالوا لي أستمر عليه ما له تأثير عالبيبي وواحد منهم قال لي أي دوا عليه حجي إنه يأثر عالبيبي حتى لو ما كان الكلام مؤكد يقول نفضل إن الحامل توقفه لين ما تثبت الدراسات إنه ما يضر
وبالأخير رحت لدكتورة خالدة المجيبل اللي إهي متخصصة بعلم الأجنة وقالت لي استمري عليه علشان ينظم لي السكر وعلشان لا يتحول لسكر حمل
وكاني الحمد لله مستمرة عليه وكل فحوصات البيبي الحمد لله طبيعية
نصيحة استمري عليه ما كو إلا العافية ولحد يخرعج بس مثل ما قلت لج بعض الدكاترة لما يكون في دوا مو متأكدين منه ينصحون المريضة توقفه وأكو موقع طبي يبين لج مفعول كل دوا عالحمل بس بصراحة الحين ناسيته حطيت اسم الدوا فيه وطلع لي تأثيره كلاس b يعني لا توجد دراسات تؤكد تأثيره عالحمل
وشخصيا أعرف أكثر من وحدة استعملوه خلال فترة الحمل والحمد كاهم عيالهم ما فيهم شي

 

[كوكي العسل]

هلا والله ام عبود حبيبتي

ربي يسهل عليج ان شاء الله

والله ماتدرين امس طول الليل مو نااايمة

انا مغتربه وهني الاجانب عندهم كل شي ولا سالفة الادوية بالحمل

امس خرعتني اتصلت فيني القابله تقولي انتي شلون تاخذين الجلوكوفاج وانتي ماعندج سكري

قعدت افهمها علشان التكيس مااقتنعت والحين متصله بزوجي تقوله مو زين على الجنين

انا والله من الصبح وقلبي يعوووووورني اقول معقول صج مو زين على البيبي والوسواس ذبحني

اقول معقول ينولد وفيه سكري لا سمح الله من ورى هالحبوب والله تعباااااااانة يارب يارب ان شاالله ماعليهم الا العافيه

وصج للحين خايفه اوقفه اخاف اولد ولادة مبكرة واخاف استمر عليهم وصج يضره مااعرف شسوووي

 

[أم عبود 2011]

توكلي على الله واستمري عليه يعني مو معقولة د. خالدة بتغامر بسمعتها علشاني وبتقول لي اخذيه وإهي عارفة إنه بضر
بس مثل ما قلت لج دايما الأدوية اللي يطلع تأثيرها كلاس b تكون آمنة عالبيبي
ولا إنتي من صجج آنا أغامر بصحة جنيني مستحيل
وبعدين ريلي دكتور ومن الدكاترة المعقدين والله ما خلى أحد من ربعه سواء بالكويت ولا بره الكويت ما تأكد منه والحمد لله وايد طمنونا وقالوا أحسن من الإبر
وآنا مثلج قبل الحمل كان عندي تكيسات ومن حاشني السكر الحمد لله بفضل الله ثم هالعلاج التكيسات بروحها اختفت حتى في دكاترة يوصفونه لبعض الحريم علشان تنظيم الهرمونات وسبحان الله اللي لاحظته من قوته كان يطلع لي أكثر من بويضة بالشهر بدون منشطات ولا شي
ربج أهو الحافظ وعسى ربي يتمم لي ولج على خير

 

[علياء الحسن]

شوفى انا دكتورتى هدى الزكري خلتني اخذه لمدة 3 شهور وبس والحمدلله مافينى الا العافية ووليدى اسم ةالله علية الحمدلله