كل ام تخبرنا من تفضلين من بين اطفالك وشنو السبب؟وهل حسيتي بالامومه في اول ولاده وتجرب

[يااسمينه]

السلام عليكم
بعد انجاب اكثر من طفل واحيانا يكون طفل من بينهم اذكى والا اكثر حنان ولطافه ولا يتعب

وطفل ثاني بالعكس فيه حركات سلبيه الام ماتحبها ابد

..سؤالي بصرااحه كل ام ترد ..من اكثر طفل تفضلينه من بين اطفالك هل هو اول واحد والا الثاني والا...وليه ؟
واذا كنتي ماتفضلين واحد عن الثاني ياريت تذكرين السبب ؟؟

عن نفسي توقعت لما كنت بنت طبعا

ان الام تحب كل اطفالها بنفس الدرجه ..وبعد تجربتي اكتشف صح ان فيه حب لكن يتميز طفل عن طفل بخفة الدم وببعض التصرفات القريبه مني والعكس ..يالله ابي ردودكم وتفاعلكم والله يعطيكم العافيه

 

[ريكاتو]

انا اول وحده

بصراحه صح احب كل اعيالي بس ولدي الوسطي اموت عليه

عندي البجر بنت هاديه وحبوبه بس عسره + انها عادي تتخلى عني وتروح لابوها يدتها
اما حبيبي احمد من انولد يرفض يشرب الحليب الا لما انا اعطيه ولا يحب الخدم كله يبيني
واهو من الاساس حبوب ودمه خفيف كل من يشوفه يتعلق فيه لانه نكته صج شيطان ويكسر بس مادري عسل على قلبي
والحين عندي ولد بعده بس ليلحين ما صك على اخوه احمد ماخذ كل الجو
والله يحفظ لي اعيالي واعيال المسلمين اجمعين

 

[@ام يوسف@]

الله يحفظهم كلهم نفس الحب عندي ما افرق بينهم ابدا

 

[a-a-alrajhe]

ان شاء الله اجرب واقول لكم.. الله يحفظ اللي فبطني ويحفظ عيالكم يارب..

 

[يااسمينه]

الف شكر والله يعطيكم العافيه ويخلي لكم اولادكم يارب
ريكاتو وصفك لبنتك مثل بنتي سبحان الله على انها هاااديه وتجي بالطيب ممكن لكن الثانيه امووت عليها رغم شطانتها وحوستها طوول اليوم وراسها خفيف يعني ماتعطيني فرصه ابد وهي تميل لابوها اكثر مادري اقول يمكن مصلحه هههه لانه كله يطلع وهي تحب الطلعات والاكشن فتنبسط وانا لو بطلع نفس الشي تشبك فيني

 

[هيبة الطاووس]

آنا مربيه عيال أخواني 3 علووي حمود حسون

ولا فكرت أحد ياخذ مكانهم وعلوي الأعز بينهم كلهم

ولا زال عزيز الروح بس بنتي صكت عليه وخذت نص المكانه ويمكن كلها مع الأيام

 

[dnyay_mll]

احبهم كلهم وما افـرق ابد بينهم حتى لو حاولت اصلا ما اقدر الله يحفظهم ويجعلهم من الذريـه الصالحه
احب ولدي الاول لانه الكبيـر والبجر واول فرحه واحس انه كبرني من قام يكبـر واحب قعدته وسوالفه
واحب الثاني لانها بنتي الوحيده العسوله الدلوعه امووت بسوالفها واستانس لي قعدت ومشطت شعرها وكشختها ومكيجتها واعشقها لي قلدتني بحركاتي ومكياجي ولبسي
واحب الثالث لانه الصغير الشيطان الدلوع اللي متحكم بالبيت كله واموت بسوالفه وحركاته وشطانته

جد احبهم كلهم ما اقدر افرق بينهم كلش كل واحد فيه شي يميزه
الله يخليهم لي ولا يحرمني منهم ولا يحرمهم مني ياااااااااارب

 

[^noonaa^]

الحمدالله مافرق بينهم واثنيناتهم امووت عليهم الله يخليهم لي يارب

 

[MiSs_PiNkOz]

ماعندي إلا بنت وحدة واحبها اكثر من روحي 

 

[om al ghaleen]

..., آحبهم كلهم وماافرق بينهم والله
بس الصبيان ممكن اخليهم ينامون بيت يدهم وعمامهم
اما البنات لآ مااخليهم يبيتون الابفراشهم مااحب انام الا ومطمنه عليهم كلهم
والحين عندي بنوته سبع شهور ماخذه كل وقتي واحس وايد ظلمت باجي عيالي

 

[درة أهل الطولات]

ما ادري ما عندي عيال

بس ما اتوقع اني ممكن افضل واحد من عيالي عن الباقــي

 

[AVE.NJ]

انه احس امي تفضلني عن خواتي وابوي يفضل اختي عنا
بس صدقوني في اسباب
انه بس افتر بامي
واختي كله تكسر حسابات ابوي وابوي يحب جذيه

 

[G!RLooNa]

امبيه شلون تفضلون بين عيالكم انصدمت 

 

[يااسمينه]

مش تفضيييل ممكن تتميييز الحب نفسه لكلهم انا بنتي تقولي تحبون اختي اكثر اقول لها شفتي اصابع يدك تقدرين تقطعين اصبع قالت لا قلت لها الاولاد نفس الشي كلللهم مانقدر نستغني عن واحد منهم لكن حقيقه بعضهم ممكن نميز اذا عند اطفال بينهم طفل حبوب وحنون ولا يتعبك وطفل ثاني العكس اكيد بيكون فيه نوع من التمييز انا امي وابوي يفضلون على البقيه لكن عارفه ان البقيه يحبونهم وابوي يثق برأيي ويحبني لاني الوحيده الي احس فيه وانا الي افضل اجلس معاه اذا لقيته جالس لحاله واسولف معاه واسليه واذا طلب مني شي مساعده ما اتردد بينما البقيه عاادي حتى لو يجلسون لحالهم مو بذيك الاهتمام فأكيد بيكون فيه تمييز سلوك الطفل او البنت هي الي تقربها اكثر من الاب والام

 

[Daleela]

قيرلونا مو تفضيل اهو لوووول فهمتي غلط الام تحب عيالها كلهم بس فيه ياهل دمه خفيف وفيه العسر واللي ما يعطي وي لووول

يعني انا عيالي صغار اموت فيهم اثنينهم

ولدي دمه خفيف ويتدلع علي جنه بنت
وبنتي ما تعطي وي اللهم ابوها وخالي وناس معينين

بس نفسيه ولا مو نفسيه بنتي واموت عليها وولدي يضحكني وي وي فديتهم الله يحفظهم

 

[G!RLooNa]

هممم جايز فهمت غلط بس هذا اللي فهمته من العنوان و الردود منو تفضلين من عيالج 

عموما الله يخليلكم عيالكم انشالله