كلية التربيه جامعة الكويت + تخصص علمي = احبااااط !!!!!!!!!

[فيونكـآ]

السلام عليكم

شلونكم بنات شخباركم

بنات شسالفه يعني شسالفه :eh_s(11): ليش الأحبااااااط ؟

اسمعو قصتي !! :eh_s(2):
انا خريجة علمي بنسبه 85
قبلوني علوم اجتماعيه !!! بس انا مابيها مستقبلها مو ذاك الزود
قررت احول كلية التربيه !! وقلت اتخصص علم نفس هناك عشان بعض المواد ماتضيع !!

و لمن فكرت فيها انا خريجة علمي وتعباااانه ع النسبه صج واخر شي تخصص ادبي !؟ ما يقهر ؟
قلت عااادي المواد الي بتضيع خلاص اهم شي ميولي و رغبتي بالتخصص

انا خاطري ي كيمياء او كلش كلش احياء اكثر شي كيمياء وانا شااااطره فيه !!
بس لا تشوفون الهجووووووم المحبط من الطلبه !!:eh_s(4):
يقولون لااااا مستحيل كيمياء صعب وكيمياء ما يدشونه الكويتين كله من جنسيات ثانيه و اللابات وتعب واخر شي تتخرجين معاشج مثل معاش اي ابلة ثانيه وكله انجليزي
واخررررر شي لمن اسأل الطالب ولا الطالبه الي مسويين لي كل هالرعب والدراما خريجين شنو !!! يطلعون كلهم ادبي واحد او اثنين علمي بس يسولفون لي عن الي يسمعون انهم حولو من العلوم او الهندسه بحجة انها صعبه!!!:rgewrg:
وماكو احد يعني ثقه ومجرب بنفسه :eh_s(11):

انا احب الكيمياء ودرجاتي فيها ايام الثانويه كلها كااااامله بس مشكلتي بالانجليزي !! يعني نص ونص مو قويه بالانجليزي بس اكيد مع الدروس بتعلم صح ولا لا !!!!:eh_s(10):

ومرات اقول خل اخذ كيميا 1 واجرب !!! اذا مشيت فيه وارتحت اتخصص كيميا

لهدرجة الكيمياء طلع كارثه ؟؟؟؟:eh_s(4):

وبغيت اسأل الاحياء بالانجليزي ؟؟ "فقط مجرد سؤال"


بنات الله يوفقكم ويرفع معدلاتكم ويرزقكم بالA الطيبه ردو علي انصحوني
الله يخليكم لحد يقول لي حولي تربيه اساسية :eh_s(1):


​

 

[غاليت e]

ما عندي فكره الله ييسرلج الي فيه الخير
استخيري قبل اي شي تفكرين تسوينه

 

[أبله أريج]

ضحكتيني على سالفه حرام علمي واروح تخصص ادبي هههههههههههههههههههههههه
انتي الحين مقبوله بكلية ادبية
واذا حولتي احرصي تروحين شي تحبينه وتقدرين عليه بنفس الوقت

 

[حنطاويه عسل]

ماعليج منهم دخلي الشي الي تحبينه حتى لو صعب راح يصير بالنسبه لج سهل

وبعديييين بثنويتي كل ابلات الكيميا كويتيات بس 2 مصريات عكس الفيزيا مافيه ولا كويتيه p:

وموفقه يااارب

 

[فيونكـآ]

يعطيكم العافيه

اي حنطاويه صح العكس شكثر ابلات كيميا كويتيات و الفيزيا تصدف وحده او ثنتين

محتااااره !!!!

 

[miss swan]

مالج شغل باحد
التخصص اللي صعب عند الاوادم سهل عليج
ومشاءالله تقولين دراجاتج كامله الصراحه مو كل طالب اييب درجات كامله بالمواد العلميه صعبه
باجر لاشتغلتي بمجال مو مجالج بتكرهين عيشتج لانج راح تمين طول عمرج تشتغلين بهالشي
وعلى الانجليزي اتوقع سهالات حالج من كل المتخرجين من الثانويه
راح تعرفين المصطلحات واذا كلش اخذيلج دوره انجليزي كل صيفيه
ماكو شي مستحيل و الله سبحانه خلق الناس بعقليات مختلفه عشان كل واحد من هالناس له دور في تعمير الارض


​

 

[فيونكـآ]

miss swan حجيج يبرد الجبد مشكورة حبيبتي

 

[gala q8]

حبيبتي شوووفي , إذا بخـآطرج كيميآ و احيآء او اي تخصص ثاني تقدرين تدخليه له لاااااااا تسآلين عن شيء كثر ما تسآلين ( وين تشتغلين ) ,


لكن انا ماخذتها قاعده , لاااااااا تســآلين اي بنت عن دكتور معين او عن ماده معينه , حتى لو اهيا دارستها ,
او سسسـآلي من ناحيه الحرص بس لا تصدقيين كل الكلام ,


و خاصه لمن تسآلين عن تخصص او دكتووور هالشيين لا تصدقين البنات لان يمكن يكون الدكتور حاقد على البنت والبنت تقول لج لا والله الدكتور كريه و ما يزيد درجات و يمكن تييج وحده طيب معاها و تقول لج واايد زين هالدكتوور صح ولا لا !!

فـ حتى التخصص نفس السالفه إللي انتي حابته دخليييه و مالج شغل بآحد , و احلى شيء يكون التخصص نادر و مطلوووب


وبعدين تقولين ما تبين العلوم الاجتماعيه < تبدلين ,, لووول

وبعدين علوم الاجتماعيه على ما سمعت " بس تآكدي يمكن غيروه " , تقدرين تكونين ابله علم نفس و ابله اجتماعيات و اخصائيه نفسيه و اجتماعيه و تقدرين تشتغلين بـ مدرسه ولا بـ دار الايتام او دار المسنين ,

يعني شيء حلووو


وقبل كل هذا استخيري , و شووفي الشيء اللي تشوفين نفسج فيه ,


موووفقه حبيبتي ,

 

[حنطاويه عسل]

اي والله ياحلوو العلوم الاجتماعيه كنت ميته وادخلها بس الله ماكتب خيييره ان شاءالله

بس ترا من دفعه 2010 وفوق مايصير تصيرين مدرسه الا اذا متخرجه من التربيه لان صار ضغط على التربيه

 

[gala q8]

^ إي وانا بعد كااان حلممممي ,


إإي صح الحين ضغط :< ,



عيــل موووووفققه حبيبتي ,

 

[нdợѕнα]

و اشعليج من كلام الناااس
يعني بتدرسين عشانهم و لا شنو
صدقيني ما كو فايده من كلام الناس
انتش شنو تحبين دخلييه
و اذا متخوفه اخذي كيميا 1 و جربيه
و هم صلي استخااره

و بعدين تخيلي تدرسين ابتخصص ما تبينه مستحيل تمشين فيه صدقيني
و هم بالنسبـه انا انتاي علمي و بتخصصين أدبي عادي مو كااارثه
ما في شرط او قانون حق الي درس علمي انه ما يتخصص أدبي
دامج توج داشــه بلشي من اول كورس سألي لا تسمعين لا من اهني و لا من مني

اعتمدي على نفسج و سوي الي يريحج​

 

[Anna Republic]

دراسة المواد العلميه كلها بالانجليزي طبعااا
وقبل لا تقررين انصحج تاخذين كيميا1 أو اي مقرر علمي
يخص التخصص اللي فبالج واذا مشيتي فيه حلو كملي

مالج شغل باللي يحبطونج اذا انتي حابه شي لا تلتفتين للي
مايحب هالشي .. الناس تختلف بكل شي ومو شرط التخصص اللي
انتي تحبينه والماده السهله عندج بتكون سهله عند غيرج في فروق فرديه
بين الطلبه ..

موفقه حبيبتي

 

[kustudent1]

اولا التربية تقريبا كلها ادبي, مع احترامي لبنات الادبي بس لا تاخذين رايهم بشي يخص المواد العلمية ابد! اهما بس كانو يدرسون احصاء ويقولون صعب هالمرة بتسئلينهم عن كيميا؟ يعني لو وحده تسالني عن علم نفس راح اطيح حظ الماده لاني علمي, فمايصير تسئلين احد مو مختص!
ثاني شي انتي عشان تكونين طالبة جامعية جاده المفروض مايهمج راي البنات كثر ما تهمج ميولج!
وانتي ادرى بقدراتج من البنات, فانتي اذا بتسئلين عن هالاشياء بتضيعين وقتج لان محد يعرفج كثر ما انتي تعرفين نفسج مو؟
وسالفه ان دارسه علمي حراااام اتدشين تربية ومادري شنو ونسبه 85 اللي اشوفها عاديه يعني مو بالتسعينات! هذا شي مو منطقي! حسسوني علمي الحين دارسين صج صج علمي! كلها كانت سنتين ترى ولو تقارنينها بجامعات بره يطلع اللي ندرسه لعب يهال!! لا تكبرون المواضيع بكلمة "علمي" ولا "كيميا" ولا "فيزيا"!
موفقه ونقي اللي انتي تبينه مو اللي بنات الادبي يحسونه سهل

 

[هنـــا]

أول شي راح اقولج عنه [ صلاااااه الاستخاره ]
لان لو كان فيه خير لج بعد صلاه الاستخاره الله بيسسر امورج فيه واذا ماكان فيه خير لج الله بيبعدج عنه , أسالي وحده مجربه انا كنت ابي رياضيات من ايآم الثانويه كنت ميته عليه بس لما دخلت الجآمعه احترت بينه وبين رياض اطفال وطبعـآآ صليت استخاره بعدين حسيت اني اميل لتخصص رياض لاطفال , نصيحتي لااااا تسمعين للبنات الا الثقه اللي مجربه الشي لان البنات يسوون من الحبه قبه ..



والله يوفقج وييسر امورج ​

 

[عواشه =)]

أنآ تربيه تخصص علمي بيولوجيا ورفيجتي كيما
مآكو شي سهل ولآ في شي صعب . ب صيفي خذيت كيميا 110 دسم بس خذيت دوره ونجحت الحمدالله
و على فكره معاشج يختلف عن باجي المعلمات لانج راح تكونين تخصص نادر
* بس تأكدي من نقطه انا سامعه الي يحول من كليه ادبي يصير تخصص ادبي

الله يوفق ألجميع =))

 

[SHoSHoWa.PiNKYa]

حبيبتي استخيري وما عليج من احد

اهم شي تكونين حابه التخصص
وصدقيني اذا كنتي حابته كل شي بيكون سهل باذن الله. ♡


موفقه ^.^

 

[شوق الولايف]

انتي نفسي بالضبط كنت ابي علوم اجتماعيه وبعدين غيرت رايي وسحبت اوراقي قلت ابي تربيه وعارضوني الكل على التربيه ويوم قلت كميا تطنزوو علي ههه :eh_s(22):
واستخرت وارتحت علي التخصص
وانا تخصصي كميا من قال لج اانه صعب
يمكن تواجهج كم ماده صعبه بس كل تخصص فيه كم ماده غثيثه
بس الدفع الجديده حيل مسهلين لكم التخصص
وعلي فكره انا نفسج بالبدايه الكل عارضني يقول صعب بس يوم جربته حبيته
وبخصوص الانجليزي بس بالبدايه من كميا عامه واحد تجمعين كلمات ويصير سخيف بالنسبه لج
وكله نفس الثانويه بس انه بالانجليزي
والله حييييل حلوو

 

[فيونكـآ]

جزاكم الله خير حبايبي
بخصوص الي تقول الي تحول من كلية ادبيه ما تتخصص الا ادبي !!!!!!! صج ؟ احس ماله شغل

وشوق الولايف اقدر اتواصل وياج ؟

 

[فيونكـآ]

شكلي بجرب مادة كيميا 1 على الكورس الثاني واذا ارتحت راح اتخصصه بإذن الله
بس بغيت اسأل اذا بتخصصه شنو المواد الي مطلوبه لتخصص كيميا !!!؟ غير كيميا 1

 

[تذبحني عيونك]

انا خريجة ثانويه هالسنه وهم كنت ابي ادخل كيمياء تربيه بس سجلت علوم يمكن خيره وعلى فكره انا هم نسبتي 85 والحين انشاءالله بحول من علوم الى تربيه كيمياء والحمدالله حابه هالتخصص مع انه الكل يقول دخلي احياء وكيماء وانجليزي صعب بس انا عندي طموح من زمان ابي اصير مدرية كيمياء واذا قالولج اي كلام دخلي مني وطلعي مني انتي تقريبا نفس مشكلتي وبعدين محد بيندم كثرج لانه هذي وظيفه مو سنتين ولا اربع سنين هذي بتكون طول العمر فلا تجازفين باي تخصص مو عاجبج ويالله انشاءالله انا وياج نكون بنفس التخصص