كآبة الولاده

[شموخ عتيبيه]

السلام عليكم

شخباركم

مبارك عليكم باقي الشهر

بنااات انا اول مره اجيب بيبي بعد زواجي ب 3 سنين

و بصراااحه انا كنت متحمسه للبيبي وجذيه بس اول ماولدته مادري شصار فيني حاسه اني مابي اشوفه مابي اشيله ولا شي و انا مستغربه من نفسي مادري ليش .. و ساعات تجيني حالات كله ابجي ... و احس اني ماستاهل اكون ام ,, يقولون هاذي كابة بعد الولاده بس بصراحه هالشي حده متعبني ياريت تساعدوني و تقوليلي اذا هالشي يتم مع البنت ولا يروح...

بلييييييييييييييز محتاجه مساعدتكم ضروري

 

[كتكوته ورديه]

كنت زياره بس قصرتي خاطري اولا الحمد الله علي السلامه 2 سما عليك استمعي القران ودعي ربك بعايام المبارك وارقري نفسك واسمعي قران قبل النوم وقبل لا يجونك ناس شده وان شاء الله تزول

 

[ثلجه حاره]

حبيبتي الحمدلله على سلامتج
حبيبتي انشالله فتره وتعدي لاتحاتين ومافيج الا العافيه انا مرت اخوي جذي اول عشرين يوم من نفاسها مالها خلق للياهل وماتبيه وكله تبجي وبعدين الحمدلله تغير كل شي

يامعوده انا للحين ماولدت وفيني اكتئاب عيل لما اولد شبيصير فيني لوووووووووول

 

[رنين]

رد : رد: كآبة الولاده

عليكم السلام و رحمة الله و بركاته

اول شي حمدلله على سلامتج و مبارك ما جالك....

و اذا عالكآبه ترى عادي تروح و تذوب و تالي تنسينها و لا كأنها كانت
و ساعات سببها انج خايفه من المسؤوليات الجديده او حاسه انج ضايعه مو عارفه شتغبرين مع ها الياهل...

بس لفكرتي انه هذا قطعه قلبج الي انحطت بين ايدج ... هو زينة الحياة الدنيا زينه مو هم
و بشهادة رب العالمين
ترتاحين شوي...


و لا تغرقين نفسج بالكآبه.... لا تعيشين جوها من تحسين انج بروحج سوي اي شي يغير المود...

خاصه الحين رمضان و عن تجربه نفاس رمضان يونس له جو حلو
حتى لو قعدتي بروحج كل شي تحسين له طعم خاص و فيه بركه حلوه
و حتى السهر كلمن سهران منتي قاعه بروحج

شوفي شالي يونسج سويه ..العاب بالنت
العاب مع اخوانج او خواتج بالسهرات الحلوه


يعني تقزر ان شالله
و تر كآبه النفاس كلش ما تطول....لعبه هرمونات مو اكثر فجأه تقعدين تلقين نفسج مربوطه و انفلتي مافيج شي

 

[a7la MUM]

رد: رد : رد: كآبة الولاده

انااااااااااااااااااااااااااااااااااا كنت جذي
كنت ادش الحمام ابجي من غير شعوووووووووووووور
كنت اكررره ولدي ايييييييي صج كنت اكرهه على كثر ماميته اشوفه
وكان لما يبجي بالليل اصارخ واعصب واعطيه امي
اففففففففففف الله لايعودها من ايام
صج كآآآآآآآبه بس 10 ايام وخلااااااااااااااااص صرت وحده ثانيه حسيت اني متناقضه
صدقيني فترة وتعدي

 

[خليفة العظماء]

قولي الحمدلله عيل انا شقول بالاربعين بدون بيبي مو بس كأبه الى اكثر واكثر واكثر :eh_s(16):

قولي الحمدلله وفكري بغيرج وادعي ربج ان الله رزقج وربي يخلي لج ظناج يارب

 

[miss-winter]

لالا كثري من الاستغفار وعادي غلقه ورمضان وجوج وضعج غير عن العالم وجذي وانتي تحسين بالغلقه تعوذ من ابليس وعادي الي اعرفه كابه نفاس

 

[شموخ عتيبيه]

رد : رد: كآبة الولاده

الله يسلمكم و يعافيكم يا بنات

و يجزاكم الله كل خير على مساعدتكم لي

بس حبيت اسالكم عن شغله بعد

مادري اذا ماريتو بهالشي ولا لا ياريت تفيدوني

انا بنت بين 4 اخوان الله يحفظهم و يخليهم

و دلوعة ابوي و امي الله يحفظهم و يخليهم

و ماكنت اعرف ولا تحملت مسؤولية شي

كنت من وانا صغيره من بداية المراهقه احب اهتم بنفسي حييييييل و جسمي حيييييييل حيييييل بعد

و انا حمدالله متزوجه من 4 سنين عن حب وزوجي يحبني و يموت فيني مثل ما انا احبه و اموت فيه

و اخاف الحين بعد ماتغير جسمي و شكلي بعد الولاده انه حبه لي يقل والله يا بنات كل يوم يجي يزورني لازم اساله اذا للحين يحبني ولا لا وابي اعرف بيرد جسمي وشكلي مثل قبل ولا لا ياااااريت تقولولي

و يقولي والله احبج وماتغير شي بس والله تجيني افكار عن هالشي و الله لدرجه اتصل فيه وهو نايم يقوم متخرع عباله في شي واساله نفس هالسؤال و يرد علي بهدوء بس احسه بيعصب من كثر مازودتها بهالشي بس والله موبيدي انا دايمااا عنده احلى مايمكن واهتم بنفسي حيل عشانه لاني اغار عليه حيل ومحافظه دايما على نفسي عشانه وكل مره اطلع بستايل جديد عشانه .. و اخاف الحين بعد ماولدت و تغير شكلي يعني كنت وين و صرت وين انه ماراح يحبني مثل قبل .....

و في شغله ثانيه بعد انا من ولدت بكمل اسبوعين

و من يوم ولدت ماجربت ارضع البيبي من صدري الا مره او ماتعدت 3 مرات ومحاولات فاشله بعد ماتعدت دقيقه لاني بصراحه تعورت حسيت ماقدرت اكمل و امي وعماتي وخالتي و بنات عمامي و بنات خوالي واهل زوجي ورفيجاتي كلهم قالولي هالشي غلط واقولهم والله ماقدر تعورت و مابي اتعور مره ثانيه ... و بصراحه انا من النوع الي اخاف من ابسط عوار و ماتحمل .. والله انا يالله تحملت الحل و الولاده صارت سوالف معاهم .... اسفه طولت عليكم ... بس ياريت يا بنات تفيدوني جزاكم الله كل خير ... و بدعيلكم من كل قلبي ...

الله يوفقكم جميع يارب ويرزقكم بالشي الصالح يارب والي تتمنونه...

 

[_Pure_]

رد: رد : رد: كآبة الولاده

اول شي ترا الاكتئاب شي طبيعي تحملي هالفتره و تعدي بس حاولي اذا في شي مضايقج تعدلينه

و بعدين الجسم يرجع ان شاءالله خصوصا انج ماشاءالله تقولين مهتمه بنفسج و تغارين على زوجج
انا نفسج اهم شي عندي جمال جسمي و دايما اهتم بشكلي و وزني و الحمدلله شقولج والله اني ساعات اقول شلون انا حملت و ولدت مو مبين عليي لاني من البدايه اهتمين و دعيت بربي بالسجود ان جسمي مااا يخترب
و ترا كل مشاكل الجسم لها حل لا تخافين ولا تحاتين
دام انج مهتمه راح تحلين المشكله


و على الرضاعه والله ترا الرضاعه تعدل الجسم و تحلي العلاقه بين الام و البيبي ترا شي وايد حلو الرضاعه بس اول فتره تعور بعدين تشتاقين ترضعين ولدج و تتعلقين فيه و اهو يتعلق فيج و تحبون بعض حب مو طبيعي

حاولي ترضعين لان في وايد فوايد و يشد البطن والله انا بطني راح اختفى من الرضاعه لان كان بطني يعوري و انا ارضع و هذي العضلات مالت الرحم تشد و تدخل مكانها لاتحرمين نفسج من هالنعمه

 

[عيش و ملاس]

الرضاعه مفيده لج تبعدج عن أمراض سرطان الثدي والرحم وتنزل من وزنج الزايد بعدين فايدة حليب الأم تدرين شكثر حق البيبي تقوي من مناعته وما يسبب له غازات ، بالنسبه لجسمج راح يرد تدريجيا من بعد الأربعين سوي ريجيم ومشي وراح تلاحظين التغيير بعد 6 أشهر

 

[شموخ عتيبيه]

رد : كآبة الولاده

مشكووووووورين و ماقصرتو

جزاكم ربي الف خير

الله يوفقكم و يسعدكم دنيا و اخره يارب

وينولكم الي تبونه

و يحفظلكم اهلكم و ريايلكم و عيالكم قولو امين

ماقصرتو حبايبي

تسلمووووووون