قصه ممزوجه بالصداقه بالحب والنيه ان شاء الله تعجبكم

[بنت الخور]

تسلمين الخجوله على الكتابه وبانتظار بقية القصة..

 

[N E M O]

بصراحة قصة معبرة
.....................................بالانتظار (كمليها عاد)................................................

 

[الخجوله]

طبعا اموله افرحت لها .. ووصتها ما تبخل على نواف بتصالها وبسؤالها ... بس نور في شي كان يردها عن .. الاتصال في نواف ...وايد تتردد ... مرت الايام ونواف هو اللي كان يسال عن نور ... ونور كان عاجبها اهتمامه .....





ف عيد الحب.. امل ومحمد .. قرروا يمضون هاليوم مع بعض ... وكانت امل طايره من الفرحه ... قالت حق نور الموضوع بالتليفون و كملت ...:

"امل":نوووووووون .. باجر راح اطلع مع محمد...اشرايج وين نروح ؟؟ وشنو البس ؟؟ حدي طايره من الفرحه ... نون قولي لي بليز ...(نون=نور... دلع موله لنور ههههههه)


"نور": ههههههههه كيفج اموله لبسي اللي تبين ... اشرايج تروحون سينما ؟؟ وانا بعد احجز لي انا ونواف ... ويكون عيني عليج وعينج علي .. اتطمن عليج .. وتطمنين علي ؟؟ ها شقلتي ؟؟



"امل": اتصدقين فكره .. خليني اشوف حمود شنو بقول ... وانتي شوفي نواف .. يالله دقي بلغيني باللي يصير معاج .. باي




نور تدري ان نواف احتمال يرفض .. بس قالت يمكن عشانها يسوي هالشي .. نور ما طلبت شي مستحيل .. بس تروح معاه السينما...دقت على نواف ... وقعدت تحن على راسه لما وافق ... بطلعه الروح رضى ....




من فرحه نور بالموضوع ... دقت على امل .. وقرروا يرحون الحين يحجزون لباجر .. نظرا لان عيد الحب.. كل مكان راح يكون زحمه ...اطلعوا نور امل و الفرحه بعيونهم ... وراحوا احد المجمعات و حجزوا عرض لا هو متاخر ولا امبجر ..لانهم ناوين يطلعون من السينما... يتعشون مع حبايبهم و يردون البيت مبجر .. من غير محد يحس بطلعتهم ...




في يوم عيد الحب ...


مرت نور امل واشكالهم ولا احلى ... كل وحده فيهم تقول الزين عندي ...ودت امل عند محمد اللي كان ينطرها عند سوبرماركت في احد المناطق ... ونور توجهت للشاطئ اللي شافت فيه نواف اول مره .... دقت على نواف ... كان يرن ... ومع كل رنه كانت تزيد ابتساماها و فرحتها .. انها بتشوف حبيبها عقب غيبه ... وقطاعه ... بس ما رد عليها نواف ... وظلت تدق ما فقدت الامل ... انطرت شوي .. يمكن مشغول والحين بدق عليها .... وصبرت .. وصبرت .. بدت الابتسامه تختفي ... قعدت تحاتيه في البدايه ...بس ماتدري ليش حست ان نواف مافيه شوي ان هو اللي ما يبي يرد عليها ...وظلت تدق... وتنتظر ... لما خلص موعد الفلم ... قعدت تبجي نور بحسره ... طرشت رساله لنواف ...



(نواف ... وينك ؟؟.. انا ادري انك مانسيت ..بس انا ماراح ارد البيت الا اذا رديت علي الحين ... وانت تدري اني عنيده و اسويها ..)



وبعد فتره ما هي طويله وصلها مسج ...


(نور.. انا اسف .. ماقدرت اشوفج اليوم .. ولد عمي مسوي حادث ولازم اكون معاه.... نور ردي البيت..بعدين انا اقولج شنو صار )...( نواف كان يجذب.. بس كان مايبي يشوفها لاسباب تخصه... وماحب يزعلها اكثر اطر ان يجذب عليها )



اما نور من قرت المسج .. حست ان نواف يجذب ... لان كان متردد.. وقالها موافق بس عشان توقف من الحنه ...بس توقعت ان يسوي لها المستحيل ...ظلت تبجي وتبجي .. دقت على امل تتطمئن عليها ... وبنفس الوقت كانت تبي تشكي... حست انها انانيه .. بس هي محتاجه لها الحين ..


"نور": ها اموله اشلون الفلم ؟؟


"امل": مارحنا السينما ... محمد هون باخر لحظه .. رحنا شاطئ(...) انتي وينج وشصار عليج ؟؟

نور بدت تبجي...


"نور": امووووووووووله .... نواف كشت فيني ...ليش انا حظي جذي .. ليش انا بالذات حبي غير عن الناس ..؟؟ ليش نواف ما يشتاف يشوفني مثل ما انا اشتاق اشوفه ؟؟ اموله ادري اني صرت انانيه و خربت عليج فرحتج .. بليز سامحيني .. انا بنطرج هني .. اذا خلصتي دقي علي عشان امرج ..



"امل": نور لالالا لاتقعدين بروحج تعالي عندنا ...حتى محمد يقول تعالي ...يالله ولا تبجين يمكن عنده عذر ...



"نور": لالالا امل خلاص انا بتمشى بس اذا خلصتي دقي .. احبج اموله ... روحي ستانسي ..



نور سكرته من امل و هي بالسياره تبجي... تعرض لها شاب كان يبي يتحرش فيها .. بس مشت بسيارتها ووقفت بين العائلات في الشاطئ وظلت تبجي ...وانتهى اليوم ونور من اكتئاب الي اكتئاب ... حتى نواف ما فكر يدق عليها ...

 

[الخجوله]

و في اليوم الثاني ...نور اقعدت من النوم على صوت التليفون .. وكان مسج..

اول ما بطلت المسج ...


(يا نور قلبي فيك هايم ومغرم..لوكنت غايب داخل الروح بلقاك..قصرت انا وانت بدفى حبك اكرم.. كنك معي ماعشت انا لليل فرقاك.."خاص جدا")


وما مداها نور كانت بترد عليه بمسج ...التليفون رن .. ولقت نواف هو اللي متصل .. ردت عليه

"نور":هلا نواف

"نواف": هلا قلبي اشلونج وشخبارج ؟؟...نور انا اسف..

"نور": على شنو تعتذر ؟؟ نواف خلاص انا تعودت على كسراتك ..عادي لاتعتذر ...


"نواف": لا نور لاتزعلين علي .. ترى مايهون علي اسافر وانتي زعلانه علي ... لاتخليني احاتيج .. يالله يا قلبي قولي لي انج راضيه علي .. حبيبتي .. حياتي .. قلبي... روحي ...دنيتي ... لاتزعلين ...وانا اسف .. وهذي بوسه على راسج ..امووووه ..


"نور":ههههههههههههه خلاص مو زعلانه .. بعدين وين بتسافر ؟؟ وانت ليش كل سفراتك فجاه .. اكيد رايح تبي تشرب هالزفت ... نواف حبيبي...اقطع ..الزفت اللي تشربه .. عشاني ..


"نواف": ان شاءالله حبيبي.. بس لاتزعلين

"نور": متى بترد ؟؟

"نواف": مادري بس اول ما ارد راح ادق عليج ... حطي بالج على نفسج ..


"نور": ان شاء الله.. وانت بعد ... احبك نونو

"نواف": ههههههههههههههه وانا بعد يالله مع السلامه



نور تضايقت .. المفروض ما ترضى عليه بسرعه .. بس قلبها ما يطاوعها ... تحبه ... وقعدت تبجي ...لانها راح تفقد صوته .. وحنانه ...



مسكت قلمها .. وكتبت اللي طلع معاها....


ودعني حبيبي مسافر... تارك قلبي فيه الهم يطويني .. هو يدري ان غاب دقيقه يثور الوله فيني ...بغيب له يوم .. يومين .. يمكن شهر يخليني ...في غيبته تمر الليالي .. وتكويني ...كل خوفي ينسى حبي وبعد فتره يمحيني .. يرميني ورا ظهره ..مع الذكره .. يسقيني المر والمر من كاسه ... يحيني ..يالله ترده بالسلامه .. وبرجعته لي يسليني ... احبك نواااااااااف احبك..



وبطلت التليفون و قعدت تقرا رسائله ... وكانت تبتسم مع كل رساله .. وكان قلبها يتعصر من الالم ...

 

[*momo*]

مشكوره الخجوله
انتظر البقيه...

 

[SeNyOrA Q8eYa]

خجووووووووووووووووووله حبيبتي انتظر البقيه

 

[الخجوله]

كانت مسجات نواف .. تدل على حب كبير ... بس ماهي عارفه شنو سبب تصرفاته معاها... رغم اللي يسوي نواف ... كانت تحب فيه كل شي ... ودايما تبرر له ... يمكن مايبي احد يشوفنا مع بعض ... يمكن خايف علي .. يمكن ... ويمكن...




مر اسبوع ... ونواف ... لاحس ولا خبر .... نور وايد ترددت انها تدق عليه... لانها تدري اذا نواف سافر ...يعطي تليفونه لواحد من اخوانه ... نور افتشلت تتصل .....




وهي على هالحاله ... طلعات و روحات مع اموووله ...و سوالف امل و محمد .. وبالليل تبطل هالتايفون و تقرا رسايل نواف ... لما اخر شي تبوس الدبدوب نونو... وتنام ...




مر عليها شهر ...وهي على نفس الحاله... نواف ماتدري عنه ....خلاص نور افقدت الامل مره وحده ..وعرفت ان نواف انتهى من حياتها ... بس ماقدرت اتسيطر على مشاعر الوله و الاشتياق ....



لهت نفسها بالشغل ... والدراسه ...وبمشاكل امل مع محمد...وهموم مها...وخواتها .. واهلها... يعني حاولت انها تلهي نفسها عن وايد اشياء ... ولان مها بعد مرت بنفس الموقف ... وتركت حبيبها ...لاسباب ماحبت مها انها تذكرها ... فقعدوا نور ومها مجابلين بعض وكل وحده اتعزي الثانيه ...




رغم كل هاللي يصير لنور من نواف ... الا ان امل و مها وايد يحبونه ... ومايرضون عليه ... هالشي كان يفرح نور ..وبنفس الوقت يضايقها ... يفرحها ان يكون نواف محبوب من الناس وخصوصا رفيجاتها .. كانت تفتخر فيه جدامهم... وبنفس الوقت يضايقها...ان محد في الدنيا وقف بصفها...





في البيت ... بطلت دفترها.. وقعدت تكتب بحب .. وشوق و حنين ... ولهفه ..لحبيب عمرها..نواف...


وينك حبيبي عني ما سألت
مدري اتغلى او تبيني اعاني



ذبحني الشوق ومنه تعلمت
تعلمت الصبر يا حبيبي والتفاني


مليت وانا صابر ياحبيبي وتعبت
تعبت ومن زود صبري الغالي جفاني



جفاني النوم يا روحي هلكت
ليتك تحس فيني يا حبيبي وتعاني





وقعدت تقرا مجله .. وشافت قصيده اعجبتها... وقامت و حرفتها واكتبت بدفترها ..


في دمي صرت ياحبيبي والشريان
حياتي صرت شريان بالجسد فيني


وكل ما يقولون(نواف)يثور بداخلي بركان
بركان ثاير وناره يحتويني

(نواف) انا (نور) قلبك الولهان
بنظره جفوه تذبحني وبنظره حب تجفيني


وعلى كل بحور الشعر واللي انطقه اللسان
بقولك اربع حروف (( ا ح ب ك)) يا نظر عيني



ابتسمت نور تخيلت ان نواف قاعد يقراها... هههههه تخيلت شكله و احراجه ... سكرت الدفتر والمجله ... وبدلت لانها بتطلع مع امل ... اذا قعدت بالبيت اكثر راح تتضايق...




مر عام ...ونور نست نواف...تعدت مرحله الوله .. والشوق ... حست انها اندقرت ... كل هذا مسافر ؟؟... ليش يعلقني ... خلاص اللي ومايبيني مابيه ...نور وامل ومها ... انصدموا من قوه نور وانها قدرت تعيش من غير حب ... وانها تغيرت بوايد اشياء .. اول تغير ... نور البست الحجاب... وهذي صدمتهم ...




بدت نور تقرا القران ... كان منفذها الوحيد ... من كثر ماهي كانت تشتكي ... حست ان محد يتحملها ... لجات له ... لجأت لربها ...

 

[الخجوله]

كانت تضحك معاهم .. وهي تحترق ... ماتدر ليش لما تحب احد... يكون حبهم لها استغلال... ليش مايحبونها مثل ماتحبهم ... بس حمدت ربها ..ان ربي عوضها عن علياء .. بامل ومها ...




عقب ما خلصت نور من صلاه الظهر ... قررت تدخل تشوف ايميلها بالماسنجر ... صارلها سنه قاطعه عن الماسنجر ...والنت ... اول ما بطلت الايميل شافت ايميل نواف... اون لاين*(on line)... يعني موجود وشابك ... كانت نور ناطره ان يسولف او يسلم او يعتذر عن غيبته الطويله ... بس اول ما شافها طلع على طول ...




نور اول ما شافت نواف موجوده... ابتسمت ابتسامه عذبه ..ماعرفت سببها .. بس كانت ناطره منه اي كلمه .. مايصير هي التبادر وهو اللي تركها؟؟.... بس نواف ما عطاها فرصه ...طلع على طول ... وتلاشت ابتسامه نور ....




وظلوا على هالحاله .. فتره اشهور طويله ...



لما في يوم من الايام .... كانوا في الماسنجر ... وكانت نور ناطره نواف يطلع كالعاده ... بس استغربت وجوده ..وان ماطلع ... قالت في بالها اكيد نساني ههههههههههه.... طرت في بالها فكره عبيطه ..ههههه



(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: السلام عليكم


(كســــــــــــووول).. نواف: عليكم السلام


(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: عفوا ممكن اعرف منو معاي ؟؟


(كســـــــــووول)..نواف: هههههههه انا كنت بسالك نفس السؤال ؟؟



(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: انا نكي في الشات .. كويتيه سنعه .. انت منو ؟؟



(كســـــــووول)...نواف: امممممممممممم يعني انتي بنت ؟؟انا ما ادخل الشات ... واذا بتساليني من وين ضفتج .. انا موصاحب الايميل ... هههههههههه بس قولي لي منو صاحب الايميل ههههههه


(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: يعني انت بايق الايميل ؟؟



(كســـــــــووول): لالالالالا صاحبه عطاني اياه.. قولي لي قصتج معاه ..ههههههه مادري ليش احس ان ج قصه ...




من كلامه نور حست ان اللي يكلمها نواف .. بس يستعبط ..هههههههه



(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: ذكرني باسمك ؟؟



(كســـــــــــووول): انا ماقلت اسمي ههههههههه انا اسمي فيصل ..



نور استغربت من اسم فيصل ... بس كملت معاه بعبط على بالها نواف يستعبط عليها ..




(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: اتصدق عاد عندي مذكره تحسبا لي هاليوم ...وحاطه كل ايميل و فيه اسم صاحبه.. لازم ادوره ..واتذكرك هههههههههههه



(كســـــــــــووول): لا لاتقلبين الذكريات هههههههههههههههههه ان شاء الله ماتلقينه


قعدت اتحاوره و هي شاكه ان نواف ... وماقالت لاحد عن اللي صار..

 

[SeNyOrA Q8eYa]

انزين وبعدين ياحلوة

 

[الخجوله]

يا بنات .. اشكر لكم ردودكم ...ومروركم الحلو .. والاهم تشجيعكم الرائع ... احس انكم وقفتوا معاي في كتابه اول قصه لي ...وان شاء الله الجزء اللي راح اكتبه ... هو الجزء الاخير من القصه ... وهو الجزء الاهم ...وياليت عقب ما اتخلص ترشحون لها عنوان .. لاني ماعرفت اكتب عنوان للقصه ...



تحياتي ... الخجوله

 

[الخجوله]

وصارت اتكلمه يوميا بالنت .... على امل انها تلقى اي شي ياكد لها ان هالشخص نواف ....




لما قررت في يوم انها تقوله انها لقت المذكره ... وانها عرفت منو هالشخص ... ماتنلام.. تعبت .. في بالها نواف يستعبط عليها ....وقررت تقوله ...




(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: هلا فيصل ...بارك لي ..ههههههه لقيت الدفتر النوته اللي فيها اسامي اصحاب الايميلات اللي انا ضايفتهم هههههههههههههه

وكملت ..


واكتشفت انك مجذب علي ...هذا ايميل واحد اسمه نواف ... يعني راح تطلع مجذب علي من الصوبين ..يا انك مجذب قبل.. او الحين باسمك ...ها صدناك شفت هههههههههههههه




(كســـــــــووول): اي صح ..هذا ايميل اخوي نواف...وانا الوحيد اللي اعرف هالايميل .. بس تبين الصج .. انا كنت شاك انج بنت .. نواف ما قالي ان يعرف بنات من قبل ... بس وحده ... لا يكون انتي اللي في بالي ؟؟




(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: منو قصدك ؟؟


(كســــــــووول): انتي اسمج ...ن ؟؟




(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: اي انا نور .. فيصل نواف قالك شي عني ؟؟؟



(كســـــــــووول): أي .. نور انا كنت ادورج من فتره ...بس للاسف مالقيت رقمج بتليفون نواف ...



نور حست بخوف ... ليش يدورها فيصل ... شنو يبي منها ؟؟... ووين نواف ؟؟؟ ليش معطيه الايميل ؟؟

افكار ...وهواجيس...تمر على نور... وخوف سيطر عليها.. بس كمل فيصل ...


(كســــــــــووول): نور اقدر اخذ رقمج وادق عليج ..ز ابيج بموضوع مهم ؟؟



(في عيون البشر.اضحك و اسولف .. ولا كن فيني شي .. وانا المجروح..آه ياجرح)... نور: فيصل انت شتقول .. ليش تبي رقمي .. انا نواف مادري عنه من سنه و شوي ...ولا حتى فكر يدق علي .. وبعدين من متى وبينا مواضيع ... فيصل ترى وايد اسئله تدور في راسي ..قول اللي عندك وريحني ؟؟؟ ونواف وينه ؟؟




(كســـــــــــــووول): نور هذا الموضوع اللي بكلمج فيه ... لازم ادق عليج بليز وافقي انا كنت ادورج من فتره طويله .. وفقدت الامل فيج ... تدرين حتى ايميلج مو مبين عندي ؟؟ يمكن نواف حاذف الايميل من غير ما يحطج بلوك ....!



احترات نور .. وقعدت تفكر بطلب فيصل .. وقتها ماكان في بالها الا نواف ... نغزها قلبها ... ووافقتتدق على فيصل ...


بصوت كله خوف وتوتر ...نور: هلا فيصل ... قولي ترى مافيني صبر نواف وينه ؟؟ وليش معطيك الايميل ؟؟.. وليش حاذفني منه ؟؟... فيصل رد علي !!


فيصل حس بخوف نور وهذا الشي .. خل توتره يزيد ..وموعارف من وين يبدي ؟؟


فيصل: نور ... نواف من فتره وصاني اقولج ... ان يحبج ..ويموت عليج .. ويعتذر على كل لحظه غلط فيها بحقج .. ويبيج اتحللينيه ... وكان خاش عنج سر... يمكن يكون لمحلج اياه ... بس كان خايف عليج ..لان هالشي يمكن يقتلج قبل لا يقتله ... عمره ماحس بالحب الا معاج .. عمره ما تمنى عمره يطول الا عشانج... انتي خليتي يتغير بكل شي .. نور نواف يحبج ..تفهمين شنو يحبج ...ووصاج اذا تزوجتي ..والله رزقج بالولد ... اتسمينه نواف .. لان يدري انه ماراح يموت بقلبج ...مثل ما انتي ما متي بقلبه ....




نور قعدت تبجي ... وما قدرت ترد ...وكانت شاكه .. وماتبي تصدق الفكره اللي وصلتها من كلام فيصل ... بس فيصل كمل ...


فيصل : سمعي نور ...نواف سافر من سنه .. وكان بنيته ان يخربط ... كلنا عرفناج ... حتى امي وابوي يدعون لج ... من حب نواف كلنا حبيناج يا نور ....وبسفرته انا كنت معاه ... رحنا فندق من الفنادق الي فيها هالخرابيط ... بس مادري شنو صار في نواف .. قاعد في الغرفه .. ودموعه تنزل ... كان تذكر شي ..سالته بغشمره ..ها ماتبي تنزل يقولون هني عندهم المشروب اللي يحبه قلبك ..وبعد يقدمونه لك بنات و لا احلى ... يالله قوم ... بس لقيته يقولي ... فيصل روح خلني بروحي ... واذا اذن الفجر قولي ودي اصلي ...استغربت من طلبه ان بصلي .. وهو يشرب و من زمان ما مسك القران و لا حتى راح المسجد... خليته .... توقعت ان بنام لان الواضح ان تعب من الرحله ... انا نزلت عنه وغبت عنه ساعات ... ولما رديت بطلت باب الغرفه بهدوء على خبري نايم .. حتى ماكنت ناوي اقعده ادري ان يهذي ...بس لما وصلت لقيته يقرا قران ... بجيت لحاله ..وكان شكله مؤثر ... مافكرت اكلمه الموقف كبير علي ... حتى اني افتشلت من نفسي ... ومن كثر ما كان خاشع في القران ما انتبه لي ... طلعت من غرفته واجرت لي غرفه يمه .. ومادري ليش منظره خلاني اتاثر فيه ...





الصبح قعدت من النوم رحت اتطمن عليه ... لقيته على قعدته...بس هالمره كان يدعي... ما تصدقين ان دعائه كله لج يا نور .. وكان يدعي ودموعه تسبقه للارض ... ماحس فيني .. بس انا انذهلت .. وسمعت كل دعائه .. نور انتي غيرتي اخوي ... توني كنت بطلع .. سمعته يناديني .. وقعدني يمه ... وقالي انت تدري ليش احنا هني ؟؟ قلت أي ادري .. قالي والله يا فيصل ..تذكرت وصات نور ... انت تدري اني مريض ..بس محد فيكم يدري شنو فيني بالظبط... وهالشي بحتفظ فيه لنفسي ... بس والله مو هاين علي اخلي نور .. فيصل ...



زبدا يوصيني بالوصيه اللي قلتها لج اول كلامي ... وعقبها ...مرت الايام وهو على حالته ... لما اخر يوم بنوصل فيه الديره ... لقيته ساجد ....نور نواف مات وهو ساجد ... نور بسبتج اخوي مات مؤمن ..مات والله راضي عنه ... نور مادري اشلون اقولج احنا كلنا ندعي لج بالخير .. حتى الوالده ودها تشوفج ... نور...هذي قصه نواف ...




نور من صدمتها ....كانت تبجي بحسره ... بدت تتكلم بصعوبه ...تاثرت بجي فيصل ..وتاثر بموت نواف ...وقالت:


الله يرحمه ...الله يرحمه ..الله يرحمه ... الحمدالله ..فيصل انت ماتدري اني انا بعد احبه ... واحس مالي احد في الدنيا غيره .. والحين راح عند اللي خلقه .. وصيتها بحطها بقلبي مكانه ...نواف طيب وعمره ما غلط باحد ..وعمره ماجرحني ... وانا اصلا مو زعلانه عليه او مضايقه منه عشان احلله ... بس هو محلل .. جعل ربي يوسع عليه مكانه ....ويرزقه الجنه ... فيصل انت صدمتني ..وماني عارفه شقول... وقعدت تبجي ...وعزت فيصل ....وفيصل عزاها ...




وعزوها رفيجاتها ..واهلها.. وكل اللي عرف قصتها ......






وعقب نواف بفتره طويله .... عاشت نور وهي تدعي له بالجنه .. وما قطعت فيصل .. كانت تعتبره اخوها العود.. حتى انها صارحت زوجها ...وكان ونعم الزوج ...ولما جاها الولد سمته نواف ...وعاشت ومازالت تعيش بحبها لنواف .. اللي راح ..ونواف الصغير ...والكل فرح لها ... ودعى لها ولنوافها ...




وكتبت قصتها لاخر صفحه ....وعقب ما خلصت ... امسحت اخر دمعه نزلت ....وسكرت الدفتر ...وراحت تشوف نواف واخوانه .....



















ان شاء الله تكون القصه اعجبتكم ... بس ابي ترشحون العنوان المناسب ...وابي نسبه نجاح القصه اذا سمحتوا عند كل وحده ... احبكم واحب مروركم ...



اختكم الخجوله

 

[SeNyOrA Q8eYa]

هلا هلا هلا
خجوولتي حبي: بصراحه قصة ولا اروع اتينن صج نهايتها تعور القلب بس فظييييييييعه وانا بالنسبه لي وبدون مجامله اعطيها نسبة 100% وهذا واضح من ردودي كل ما ادخل المنتدى اول شي ابطله قبل مواضيعي القصه حتى احلام اتحلم فيها لووووووووووووووول
والعنواان اللي يناسبها اهوا:-
**الحب الخالد**
وانتي براحتج حبيبتي بس هالعنوان حسيته مناسب للقصه
واااااااااااااااااو
والله قمه قمه قمه وانا متحسفه انها لصت وبنفس الوقت فرحانه اني عرت انه عندنا عضوة موهوبه بالكتابه مثلج فديت قلبج والله وتسلملي اناملج يالغاليه
وبالتوووووووووووفيق والى الامام ،،،

 

[الخجوله]

تسلمين حبيبه الكل ... بجد فرحتي قلبي بمرورج و تشجيعج... وفرحت بالنسبه ... وحتى العنوان يدل على احساسج الرائع ... وان شاء الله بحط العنوان بعين الاعتبار

 

[*momo*]

القصة كتير حلوه
مشاء الله القصة عجبتني من البداية بس ما اتوقعت النهايه تكون كدا
احيييك عالقصه كتير و بدون مجامله قصتك من احلا القصص القريتها و قلمك رائع و اسلوبك في الكتابه راقي و جميل.
و انا مع العنوان اللي الرشحتو حبيبة الكل

بدايه موفقة و بالتوفيق دوما

 

[SeNyOrA Q8eYa]

والله جد ترى مو مجامله ،،،
بس هل هالقصه حقيقيه والا من خيالج؟؟

 

[الخجوله]

تسلمين مومو على مرورج و تشجيعج ... وكلامج الرائع...


حبيبه الكل.. الصراحه القصه خطوطها حقيقيه بس منسوجه بالخيال لازم يعني مزيج من الاثنين



فرحتوني وان شاء الله راح اكتب قصه ثانيه حقيقيه بعد ..واقعيه اكثر

 

[بنت الخور]

حقيقة.. استمتعت بقراءة القصة .. وعشت لحظاتها الحلوة والمرة..

ومثل ما يقال أول الغيث قطره.. فمرحى لمثل هذه القطرات التي أنبتت هذا الإبداع..ونحن بانتظار الغيث القادم بقلم وإحساس أختنا الخجولة..

بالنسبه لعنوان القصة.. أعجبني اقتراح اختنا حبيبة الكل ولكن أحببت أن
أضيف عنوان آخر.. " نواف،، الحب الدائمـ" ..

أتمنى لك التوفيق عزيزتي في كتاباتك القادمة..

دمتي بود.. بنت الخور..

 

[الخجوله]

تسلمين لي يالغلا.. بنت الخور ..الصراحه ردودكم و تشجيعكم ..شهاده انا افتخر فيها ..اشكر نسبتج ..و عنوانج ايضا رائع ..وانا احترت الصراحه ههههههههههههههه


تسلمون لي يالغالين

 

[SeNyOrA Q8eYa]

للرفع

 

[الخجوله]

هههههههههههههههههههههههههه فديتج حبيبه الكل