الجزء السابع والعشرون..
بدت الجامعه وفطوم اربع وعشرين ساعه لاصقه بنوره... تحس بالغربه... حتى انها حظرت كلاس مع نوره ولا فهمت منه شي...وكانت وايد قافطه من فكره الاساتذه الرياييل... تعرفون يوم طالبه متعوده طول عمرها على الحريم فجاه تحصل نفسها يدرسونها رياييل...!!!... وايد ارتبكت من هالسالفه.... هذا عدى عن انها كل شوي تنسى اسماء المباني... الوحيد اللي حفظته هو الكافتيريا الصالة الرياضيه...المهم انها مرت بيوم حافل جدا في اول يوم..وردن البيت تعبانات الساعه 4... نورة كان يخلص دوامها يوميا 1 ونص... اما فطوم يخلص دوامها 4... فاضطرت نورة تترياها كل هالوقت وحظرت معاها عشان يردن مع بعض...بس هالحال مابيمشي كل يوم....
اول مادخلن البيت عقن بعمارهن على الكراسي في الصاله... وين ماكانت حصه وامها يالسات..
ام خالد: ويدي..!!..بناااتي بلاكن..؟؟
نورة: هلكنا اليوم من المشي حشى..
فطوم: هي والله...خلاص ماريد ادرس...
حصه: هههههههههه لا حبيباتي خلاص ادبستن..كملن...ياما تحملنا قبلكن..
فطوم: حشىى جاني بتريا اربع مادري خمس سنين لين اتخرج...بختفي لين ذيج الساعه بروحي عاد انا مايحتاي...!!
نورة: انا وحده بروح اصلي وانخمد....
حصه: نوروووه..شو تنخمدين انا قلت بتساعديني...!
نورة: فيشوووو اساعدج؟؟
حصه: سيف بيي اليوم وابا اسويله عشى محترم...
نورة: متفيجه انتي وريلج... خليني اساعد نفسي عالمشي ذيج الساعه اساعدج...
نشت نوره شلت شنطتها وراحت فوق....
فطوم: ولا يهمج حصيص بتسبح وبنسدح شوي وبيي اساعدج في المطبخ...
حصه: فديتج والله مشكوووره ...بس اذا تعبانه برايج...
فطوم: يم بتسبح بيخوز التعب...ماعليج
نشت فاطمه بعد ودخلت حجرتها...
ويوم فضت الصالة مره ثانيه على ام خالد وحصه...لفت ام خالد على بنتها وقالت بصوت واطي..
ام خالد: هزرج اخبرها عن الاتصال اللي ياني اليوم..؟؟!!
حصه: لالا احين هي تعبانه ...رمسيها يوم ترتاح شويه...
ام خالد: على خير..
حمدان اللي بدا دوامه هو بعد...فقرر انه يقلل سيراته لبيت عمه بشكل كبير.... هذي السنه ماخذ مواد صعبه ولازم انه يركز على دراسته بشكل اكبر...ولو ان هالشي صعب هالفتره بسبب وجود فطيم.. من يمشي بسيارته ويمر على بيت عمه طرت على باله...ويشوف نفسه مغصووب انه يوقف وينزل ويشوفهم...حتى لو ماكان ناوي على هالشي... هو يدري انه مايحبها..... لكن هالبنت غير... مهتم فيها بشكل غير عادي...ويخاف ان فيوم من الايام يكتشف انه يحبها وتظيع من ايده... وصولها صعب...وين بيطير لين الشارجه يخطب..؟؟!!!!...بعدين هو لين الحين صغير عالعرس ومايبا يعرس اصلا.....عشان جي اجبر نفسه يحط على فطيم علامه اكس ...ولو حاليا.. مايبا يورط نفسه في شي مايعرف في النهاية شو نتايجه....
خليفه في امريكا ومن يوم ما فهم هند السالفه... رجعت هالبنت اطالعه بنظرات اعجاب من اول ويديد...وتمنى في لحظه انه ما فهمها شو السالفه عشان تحل عن سماااااه.... هو مب نااااقص مشتتاااات للتركيز...يكفي حصه.... كان قد مايقدر يجاهلها...بس احيانا حركاتها تحرجه من بين ربعه اللي حتى هم انتبهولها.... لكن اليوم طفح الكيل عنده... تريا لين ماخلص الكلاس وزقرها..
خليفه: اقول هند....
التفتت هند صوبه وهي تبتسم ووييهها محمر...
هند: هلا خليفه..
خليفه: شوفي... همممم..والله مب عارف كيف اقولها لج.... لكن انا مب من النوع اللي انتي تتحسبينه...
هند: اي نوع...
خليفه: انا مالي علاقة بالبنات....
ابتسمت هند..
هند: ادري انزين....
خليفه: بطلي حركاتج البايخه اللي تسوينها هذي...انتي تحرجيني من بيت ربعي وتبينيلهم انه بينا انا وانتي شي وداسينه... وهو اصلا مابيني وبينج اي شي ولا عرفج حتى....
انصدمت هند...وسكتت..
خليفه: شوفي..انا ماريد اغلط عليج...اعرف ان نيتج طيبه... لكن انا بتخرج هالسنه وبلتعن الامارات ولا بطب امريكا مره ثانيه...فياريت تعفيني من حركاتج...لاني مستحيل اتعرف عليج عن قرب او اني اكلمج في التيلفون مثل ماانتي تبغين... فـــ لو ماتصدين صوبي ابدا وتنسين واحد اسمه خليفه يكون وايد احسن.... والسموحه منج...
خلاها خليفه وروح عنها وهو جزئيا متلوم من قسوته عليها...بس كانت ظروريه...قبل مايطلع من الكلاس صد صوبها وحصلها واقفه مثل ماكانت واقفه جدامه.... ماتحركت اي حركه....ومبين عليها الصدمه... قوى قلبه والتفت عنها وروح.....
يوم وصل عند عبدالله اللي كان يالس ارووحه ...سلم ويلس ..عبدالله كان يتكلم في التيلفون....والظاهر انها عنود....الريال باين على ويهه انه ذايب...ابتسم خليفه..يابختك...!!..اللهم لا حسد... بعد شوي سكر عبدالله واطالع خليفه...
عبدالله: هااااااااا....شو بلاك تتبسم..؟؟
خليفه: هههه ماااشي...وين الباقي...؟؟
عبدالله: ساروا السينما....
خليفه: اهاااا...هذي عنود؟؟
عبدالله: هي نعم ..هذي حرمي المصوون....
خليفه: شخبارها..؟؟ وشحال الاهل كلهم..
عبدالله: بخييييييييير وعافيه والله وتسلم عليك وايد..
خليفه: الله يسلمك وياها من الشر... قول شو سويييت اليوم..!.!
عبدالله: شوووو...؟؟
خليفه: رمست البنت..وقتلها لا تصدين صوبي موليه ....!
عبدالله: خييييييييييييبه ههههههههه....بالله عليك..؟؟
خليفه: هي والله... طفرتني عبوود مااركز في المحاظرات والسبه هي وحركاتها...
عبدالله: والله افتكيت...مالك امل تستمر وياها اصلا...
رفع خليفه نظرة صوب عبدالله مستغرب...
خليفه: منو قالك ان بينا علاقه...؟؟؟؟
عبدالله: هااا..؟؟.... لا ماشي بس اقول يعني اذا كلمتها مابتستمر وياها لانك بترد البلاد....
خليفه: وانته تحيدني راعي هالسوالف...؟؟
عبدالله: لا والله ولد عمي محشووم...
خليفه: عيل جب... ادب لك الغدا على حسابك...
بعد صلاة المغرب كانت حصه يالسه مع سيف في الميلس.... يسولفون رباعه ويظحكون.. وهو كل شوي يغايظها...مستانس انه اكتشف ان حصيص ماتتحمل الغياظ وايد.... واذا زاد عن حده بتصيح... وهو كل مايشوفها خلاص سكتت وهي معصبه رد يراظيها ويظحكها....
سيف: اذا بتعيشين وياي لازم تتعودين عالمغايظ....
حصه: انته ماتحبني اصلا...
سيف: ههههههههه لا والله..؟!
حصه: اذا تحبني مابتغايظني جي....
سيف: وشو رايج اني مااغايظ الا اللي امووت فيهم....
حصه: ههههههههه قردن..ادريبك تقردن...
سيف: ههههههههه صدق صدق حصه... قبل ماتاخذيني او قبل ماخطبج حتى...شوكان خيالج عن الريال اللي بيكون ريلج...؟؟؟!!
توترت حصه...
حصه: ماكان عندي خيال..
سيف: جذااابه...
حصه: انا جذااابه..؟؟؟ قوم اطلع من بيتنا....
سيف: ههههههههه والله انج جذااابه..اصلا كل بنت لها خيال معين لزوج المستقبل....
حصه: حتى الرياييل انزين....مب بس البنات..
سيف: اكيييد وانا ما انكرت هالشي...
سكتت حصه..
سيف: يالله قولي...
وحصه متوتره...شو بقووله..؟؟ اني كنت اتمنى واحد مثل خليفه..؟؟ بياخذها بحساسيه... بس يوم فكرت فيها عدل..خليفه مثل سيف...وسيف مثل خليفه...صدت صوبه وهي تبتسم..
حصه: مثلك...
سيف: لالااااااااااااا..خلي عنج...
حصه: ههههههه والله مثلك... مثل شخصيتك جي...
سيف: حلفي..؟؟
حصه: حلفت تراني..والله...
سيف: فديييييييييييييييتج ياربي...
حصه: وانته..؟؟؟...
سيف: انا كنت اباها قصييره وسمراااا وشعرها ميعد وماعندها شهادة..اميّة...
حصه: هههههههههههه خسك الله وياها خياارااات....لالا صدق...
سيف: ههههههه شو بعد..؟؟... كنت اباها مدينه وخلوقه وجميله وتحب امي مثل امها...
حصه: بس.؟؟
سيف: شو تبيني اطلب اكثر من جي...دامني حصلتها واايد زين كفايه علي...
حصه: الحمد لله....
سيف: بس تعرفين..بقولج شي... قبل ماخطبج ..كنت وايد وايد واااااااااااااااااايد متخوف من ردة فعل خليفه...
انصدمت حصه...وطالعت فويه ريلها باهتمام....
حصه: خليفه..!!!!!....ليش يعني...؟؟
سيف: يعني...ولد عمج...وسنه مناسب... كنت خايف انه حاط عينه عليج والا شي...
سكتت حصه وماقالت شي...
سيف: بس يوم سالته وقالي انه مايفكر بالعرس الا بعد مايتخرج تشجعت...وبعد الخطبه بعد سالته اذا كان خاطره فيج والا شي.. تعرفين شوقالي.؟؟
حصه: شوو..؟؟
سيف: هههههههه..قالي لو كانت فخاطري ماخليتها لك عشان تخطبها ....هههههههه
ظحكت حصه بدون خاطر مع ريلها...
حصه: ماحس خليفه من النوع اللي يبا يعرس...
سيف: ماعليج...بيستقر فيوم من الايام....هو بس همه الحين انه يتخرج ويفتك...صدقيني اول مايرد ويشتغل ويستقر بيقول ابااعرس دورولي حرمه...
حصه: هههههههه ان شاء الله...
سكت سيف وتم يفكر...وشكله كان سرحان...قعدت حصه تراقبه وتعرف ان افكاره سرحت مع خليفه....
حصه: هاااااااي...بلاك سرحان..
سيف: هاا..؟؟... لا ماشي..
حصه: لا فيه شي....قول...افاا انا حرمتك ماتقولي...!!
سيف: لو قلت لج بتزعلين وبتحرجين عليه...
حصه: جربني...
صد سيف صوبها واطالع فعيونها بتركيز...وعلى ويهه ملامح غريبه..
سيف: كنت افكر بانه اذا صارلي شي.... ما أ أمن اي ريال ثاني عليج ماعدا خليفه...!
انصدمت حصه من هالكلام...وشحب ويهها وعلى طول دموعها تجمعت فعيونها ...كمل سيف..
سيف: هو الوحيد اللي يستاهلج من عقبي....
مدت ايدها حصه وظربت سيف على جتفه بقووو قد ماقدرت...
حصه: ليش هالرمسه يالسبال.....؟
سيف: هههههههه الموت حق ويا هالويه....
حصه: ادري بس لا تفكر فيه....
سيف: انزين مافكرت فيه انا.....شبلاج تراني صاحي جدامج..... قتلج بتعصبين...
حصه: محد طلب رايك في الريال اللي بخذه انزييييييين...... بخذ هندي... بعرس بدريولنا...
سيف: هههههههههههه جب لا اعطيج عويهج احين....
ويوم شافها تمش دموعها كسرت خاطره...وتمنى انه ماقالها هالرمسه .. تقرب منها وباسها على راسها
سيف: فديتج والله آسف.... لا تصيحين ماقصدت....شحقه تصيحين انتي...
حصه: لا ترمس بهالرمسه مره ثانيه سيف.....دخيلك ماتحمل هالفكره...
سيف: خلاص وعد... فديت رووووحج انا....ثرج اممممره عالدقه..ماتتحملين...
حصه: القوية نوره مب انا.....نوره تتحمل وايد ...
سيف: هذي اختج انا ماكد شفتها....
حصه: بتشوفها عقب العرس... مش قبله...ماسمح لك تبصبص على بنات غيري..
سيف: هههههههه عنبو تغارين من اختج..؟؟؟
حصه: اغار من الذبابه اذا طارت فوق راسك....
سيف: ياويييييييييييييييييلي..ماتحمل...قومي قومي حطي عشاج اللي مسوتنه عن اسوي شي تحتشرين عليه بسبته...
ظحكت حصه ونشت تحط لسيف العشا.... في الوقت اللي كانت ام خالد راكبه فوق لحجرة نورة... دخلت عليها وحصلتها توها ناشه وتسحي شعرها..
نورة: هلا امااايه...
ام خالد: تعالي بنتي برمسج..
ويلست عالشبريه ويتها نوره ويلست وياها...
ام خالد: بنتي اليوم عرب متصليلي يبونج لولدهم...
على طول نوره هزت راسها..
نورة: لالالالالالالالالالالالالالالالالالالا امايه انا قايلتج مـــ .....
وقاطعتها امها...
ام خالد: قوم خالج هلال.....
انصدمت نوره .... وكل شي فويهها مفتوح..... قوم خالي هلال...؟؟؟ يبوني لولدهم..؟؟؟ ومنو الولد هاذا....سعييييييييييييييد.....؟؟؟ لالالالا بموت....
ام خالد: شو بلاج فاجتلي ثمج...
نورة: قوم خــ ...خـــالي..؟؟؟
ام خالد: هي خالج هلال.... يبونج لسعيد...وانتي تعرفين سعيد..ريال ماعليه قصور يشتغل ومستقر ولو بندور مابنحصل اخير منه..... وانا رمست ابوج وقال بعد هذي يبالها مشاوره..؟؟؟ سعيد ولدنا ولا تشاوروني فيه بس شاوروا البنت...
سكتت نوره....وهي مب عارفه بشو تحس بالضبط...بالفرح..والا بالخوف... كانت فرحانه بانه السالفه شكلها متسهله....اما الخوف بسبب تحقق حلمها اخيرا...تخاف انها تمد ايدها له ويختفي.... يارب ماكون احلم يااارب.... بس كييييييييييييف..؟؟؟ سعيد مستحيل ايي يخطب بدون مايخبرني...وهو بنفسه قالي بيتريا ست شهور قبل مايخطب.... شو السالفه..؟؟ ليش غير رايه....واخر رساله منه واصلتني اليوم وماخبرني اي شي فيها.....لاحووووول...!!
نورة: امااايه....قوم خاالي هلال اللي في الشارجه...؟؟؟ سعيد ولد خالي هلال..؟؟؟
سؤال غبي.... بس ماتنلام....تخاف نفسها سامعه غلط والا شي...
ام خالد: وااااااااااااابويه عليج انا....جي كم خال عندج انتي..؟؟
نورة: شاورتي اخواني..؟؟؟ عبدالله يدري..؟؟
ام خالد: محد بيرفض سعيد...بس بنخبرهم نحن بالسالفه باجر... وانا خبرتج اباج تفكرين بالموضوع..ويوم تقررين خبريني...
نشت عنها العيوز ونزلت تحت... ونوره يالسه مكانها.... مستحيل اللي يصير....مب قادره اصدق...مب قاااااااادره...لازم اتاكد... نشت نورة وطلعت من الحجره وركظت تحت لحجرة فطوم....
نورة: فطوووووم ....فطووووووووووم...
فطوم: هااااااااااا بلاج....
نورة: مابتصدقين اللي صار... هاتي تيلفونج ولحقيني فوق...بسسسسسرعه...
وردت نورة تطلع من الحجره وركبت فوق..بعد دقايق لحقتها فطوم وعلامات الاستفهام على ويهها... قفلت نورة الباب وخذت التيلفون وعلى طول اتصلت بسعيد.... وفطوم ساكته ومستغربه....
فطوم: شو مستوي..؟؟
نورة: اششششش...بتعرفين احين...
من الطرف الثاني سعيد كان فسيارته...
سعيد: هلااا فطيم...
نورة: هلاا سعييد...انا مب فطيم...
سعيد: نوره..؟؟؟؟؟ هلا والله عمري....شحالج..؟؟
انحرجت نورة...
نورة: بخير الحمد لله شحالك انته.؟؟
سعيد: بخيييييييييير وعافيه يوم سمعت هالصوت الحلو..
نورة: سعيد ابا اقولك شي..؟؟
سعيد: قوولي نواري.....
نورة: فيه عرب يو يخطبوني اليوم واهلي كلهم موافقين عليه وقالولي فكري....
....
....
....
....
سكووت تام... فطوم شهقت من الصدمه.... ابتسمت نورة وعرفت السالفه كامله بدون ما اي واحد منهم يجاوب على شي...
سعيد: حلفي..؟؟؟...نورة بذبحج ان وافقتي ...انتي واعدتني..
نورة: ماتبا تعرف منو ياي يخطبني..؟؟؟
سعيد: مايهمني بس المهم رفضي..... ياويلج ان وافقتي....
نورة: هههههههه سعيد... اللي ياييني عرب حشام من الشارجه وانته تعرفهم بعد..
سعيد: منوووو هذيييلا بعد..؟؟؟؟
سعيد كان معصب ويصارخ..
نورة: قوم هلال السويدي...
وحليلك ياسعيد....سكت مره ثانيه منصدم....
سعيد: نوره لا تمزحين وياي....مب بهالطريقه الناس تمزح...
نورة: ارفضهم..؟؟؟
سعيد: نــــــــــــــورة...!!!!
نورة: ارفض؟.....
سعيد: شو تخرفين انتي...
نورة: ههههههههه اسال امك بالسالفه.... محد خبرك الظاهر...
سعيد: نورة بصفعج...
نورة: والله اني ارمس جد....
سعيد: ماصدقج....
نورة: اوكي..تاكد بس اذا طلع كلامي صدق شو اسويبك....
سعيد: ان شاء الله يطلع صدق وسوي اللي تبينه....انا بسير احين البيت وبتاكد من امايه...
نورة: خيبه شو بتقولها.؟؟ من وين عرفت بالسالفه..؟؟
سعيد: من فطييييييم....
نورة: اووكي... وطرشلي رسالها بعدها وتخبرني شو صار وياك..
سعيد: من عيوني بس والله ان كنتي تمزحين يا تشوفين مني شي ماشفتيه..
نورة: ههههههههههه انزين انزين....
سعيد: يالله فمان الله
نورة: مع السلامه...
سكرت التيلفون وصدت صوب فطوم اللي فاجه حلجها....
فطوم: تمزحين صح..؟؟
نورة: والله ما امزح امي توها ظاهره عني وقالت ان اهلج متصليبنا اليوم ويبون يخطبوني لسعيد...
فطوم: والله.؟؟؟؟؟؟؟؟؟.... كيف عيل سعيد مايدري..
نورة: ماعرف...يمكن امج تصرفت من نفسها...
فطوم: تسويها امي...فديييتج والله يانورووه مبرووووووك..
ويت لوت عليها وحبتها...
نورة: الله يبارك فيج بس ماشي تاكد لين الحين...
****
دخل سعيد البيت مستعيل.... ويوم دخل الصاله شاف حرمه اخوه وشيخه وامه...
سعيد: السلام عليكم...امااايه تعالي اباج فسالفه...
ودخل حجره امه ويوم وصلته ويلست حذاله قالها..
سعيد: فيه شي عندج تبين تخبريني اياه....؟؟؟
ام فيصل: شو بلاك فديتك...؟؟؟؟
سعيد: امااايه....من شوي اتصلت بي فطوم....
ابتسمت الام..
ام فيصل: هيييييييييييي...
سعيد: علييج نوووووور...صدق اللي سمعته...؟
ام فيصل: هي ابوويه صدق....
سعيد: امااايه..دخييلكم لا تمزحووون...شو متفقين عليه انتوا...؟؟
ام فيصل: جي ابوويه مب هذا اللي انته تباه..؟؟ ماتبا نوره..؟؟ تراك اروحك قايلنا انك تباها...ومابتاخذ غيرها..
سعيد: هي اباااااهااااااا....
ام فيصل: خلاص وانا خطبتها لك....
مع ذلك تم سعيد مب مصدق اللي قاعد يصير وياه....
سعيد: حلفي امااايه...
ام فيصل: وابوي عليك انا....والله....
اخيرا صدق سعيد.....وما تتخيلون فرحته..عفد على امه يلوي عليها ويبووسها
سعيد: فديييييييييييييييييتج ياماياا...الله لا يحرمني منج يارب....والله اني اموت فيج...
وتم وياها نص ساعه يستجوبها..متى اتصلتي وشو قالولج ومنو رد عليج والخ...
وعقبها راح يطرش لنوره رساله...وكانت تقول..
" احبج
احبج
احبج
بس خلاص افرجت عنج
ماااابااااااج
روحي عرسي
ووافقي عالعرب اللي يايينج...
"
الجزء الثامن والعشرون
بعد الرساله الحلوه اللي وصلت لنورة من سعيد.. ردت عليك بكلمه وحده وهي ميته من الظحك .." بفــــــكــــر..!" .. وسكرت الكمبيوتر وهي بعدها مب حاسه بجدية الموضوع...معقوووله..؟؟؟ طول هالسنين وانا اتمنى هاللحظه تي...ويوم استوت مب قادره اصدقها... كل خوفي ان السالفه تتفركش ... والله بموت ماستحمل....!
رقدت وهي شاغلة مخها بهالموضوع...
بالباجرردت نورة من الجامعه على الساعه 1.. وخلت فطوم هناك لانه دوامها لين 4... بعد الغدا زقرها ابووها...واخوانها يظاحكون عليها خالد وناصر... وهي اطالعهم بنص عين...يلست عدال ابوها..
بو خالد: امج قالت لي انها شاورتج بالموضوع..
نزلت نورة راسها قافطه..
نورة: هي ابويه..
بو خالد: وانتي شو رايج..؟؟
نورة: ابويه انا ابا اسمع رايك انته وراي اخواني...
بو خالد: بعد يبالها هذي تفكير..سعيد مب غريب..ولدنا... ونعرفه عدل.. ومابنحصل اخير عنه..واخوانج كلهم رمستهم وحده...
نورة: خبرتوا عبدالله..؟؟
بوخالد: امج اتصلت به اليوم الصبح...وخبرناه وهو بعد يمدح فيه...
ماتت نورة من الفرحه...
نورة: خلاص يابويه اللي تشوفونه..
بو خالد: يعني موافقه.؟؟
نورة: ..... هي موافقه...
بو خالد: على بركة الله...مبرووك يابنتي..
نورة: الله يبارك فيك يابويه...
ونشت عنه وظهرت براا وركظت على طول حجرتها..وقفلت على عمرها الباب... ماتصدق ... مستحيييييل...الحمد لله ياربي انك عطيتني على مابغي... سعيد صار لي...ماصدق...ياربي كمل علي جميلك ولا تحرمني منه....
بعد ماصلت العصر نزلت الصالة وحصلت حمدان يالس مع حصه يسولفون ويظحكون..اول ماشافها قالها..
حمدان: تعالي تعالي تعااااااالي....
نورة: ههههههه بسم الله منك...هلاا..شحالك حمدان..؟
حمدان: شحاالي انا..؟؟؟.. حالي مب زين...
نورة: افاااااااا..ليش عاد...
حمدان: ماجنج خونتي فيني..؟؟ انا مب قايل اني بخطبج..؟؟ شقاييل توافقين على واحد غيري..؟؟
التفتت نورة لحصه..
نورة: كل عادة وصلك الخبر ماشاء الله..!!!
حصه: هههههههه وياويهج لا اطالعيني..خبر حلوو يعني ماتبيني اخبر...
نورة: عنبوو حتى ماواحووا يردون عالعرب وانتوا نشرتوا السالفه..!!
يت ويلست بينهم...عدال حصه وحمدان فكرسي بروحه..
حمدان: انتي خلي عنج هالخريط كله..؟؟؟ كيف تقصين عليه..؟؟ كيف تلعبين بمشاعري جي..؟؟ انتي قايله بتترييني لين ماخلص دراسه وراج خونتي فيني.؟؟؟
ماتن نورة وحصه من الظحك..
نورة: جب لاحد يسمعك احين...
حمدان: صدق ارمسج ويا هالويه..انا بعترض على هالخطبه ..
نورة: هههههههههه والله ياويلك...
حمدان: اوه اوه اوه...!!...ثرها تباااااااااااه السباله....ياويلك تقول..!!
قفطت نورة وحصه ظحكت ... حتى حمدان يوم شاف نورة قفطت ظحك عليها..
حمدان: ههههههههههههه ويا هالويه... الله يوفقج ان شاء الله... وسعيد ريال مايتعوض .... وانا ان شاء الله بتخطى حبج الغاادر هذا..وبحصل لي بنت تخطبني احسن عنج بمية مرررره...
ظحكت نوره مره ثانيه..وتذكرت فطيم...
نورة: ايييه...الساعه اربع ونص احين..طرشتوا الدريول حق فطوم..؟؟؟
سكت حمدان وبان الاهتمام على ويهه..
حصه: ما اتصلت...!!
نورة: ولازم تتصل تراني قايله لامي فطوم بتي الساعه اربع...
حصه: اندوكم هاي...امج سارت العزبه من الساعه 3...وشلت الدريول...
بطلت نورة عيونها....
نورة: حسبي الله على بليس العدووووو...البنت مخلايه امانه عندنا ....ونحن نسيناها في الجامعه...نساج الموت يافطوم احين منو بيييبها..؟؟
حصه: بنشوف خالد والا ناصر..
نورة: ماعندهم تصاريح على سياييرهم...مابيدشوووون داخل...
حمدان: احممم.. انا عندي تصريح فسيارتي...
التفتن صوبه حصه ونوره مستغربات...
كمل حمدان
حمدان: كنت اييب عنود قبل....!!
حصه: هي صح حمدان عنده تصريح ...
نورة: بتذبحني فطوم لو اطرش حمدان...
حمدان: ليش يعني..الا ياحظها....
حصه: انزين انتي سيري وياه عشان ماتكون بروحها....
نورة: حلووو...فاظي انته حمدان...؟
حمدان: همممم اقدر افظيلكم ربع ساعه من وقتي...
حصه: يالله يالله يالله.... الا في خاطرك تقول دام حق فطيم اسميني فاظي من الحين لباجر...
حمدان: هههههههههههههاي هي والله شدراج...؟!
نشت نورة وركبت فوق لبست عباتها وشيلتها ونزلت..
نورة: يالله روحنا...مسكينه تاخرنا عليها وايد...
حمدان: يالله...
ركبت نورة سيارة حمدان اما هو فتح الباب الوراني وقعد يرتب السيت اللي ملعوزنه...فار عليه كتبه وقمصانه وسي دي يااات.. وخرابيط وايده... فررهن كلهن في الدبّه...ويوم تاكد من ترتيب السياره حق فطوم ركب جدام وحرك السياره صوب الجامعه...نادوا على اسمها ودخل حمدان ووقف سيارته في الباركن الجدامي عشان مايتعب فطوم بالمشي والتدويير...بس تريووا وتريوووا..وفطوم بعدها ماطلعت... قررت نورة انها تدخل وتشوفها... واول مادخلت الرسبشن حصلت فطوم واقفه عند الدريشه ويديها على خصورها... وشكلها مفوووووله....
فطوم: حلفي انتي بس....حلفي...؟؟؟
نورة: بسم الله لا تفظحينا بين البنات... شبلاج ماظهرتي..؟؟
فطوم: ويا منو يايه حظرج..؟؟
نورة: حمدان...
فطوم: انتي منو يابج من الجامعه..؟؟
نورة: الدريول..
فطوم: وليش انا اييبني ولد عمج..؟؟؟
نورة: الدريول محد يافطوم شلته امي وسارت العزبه ..شكلها الا نست...
برطمت فطيم....
فطوم: نوروووه انا قايلة لكن لا تسون فيني هالحركات...!!
نورة: يابنت الحلال والله ماحصلنا غيره...خالد وناصر ماعندهم تصاريح للدخول...ابويه محد والدريول محد...تبينا نتصل بسعيد يعني اييبج من الشارجه..؟؟؟
فطوم: اووففف..ياهالحاله...انا حوالي ساعه يالسه هني اتريا واخر شي اييبني حمدان...
نورة: تحركي انتي تحركي...والله السيره ويا حمدان ابرك من الدريول...يالله بسرعه ...
تحركت نورة ومشت صوب الباب...وفطوم مكانها...صدت صوب الدريشه..وشافت حمدان يالس وهو لابس نظارة شمسية منزل راسه كانه يلعب بالتيلفون...بعدين يرفع راسه كل مايشوف بنت تطلع من الباب..ويمد ايده ويرفع بها سفرته شوي...شكله طيب ومسكين...ومتملل....!...يزاه الله خير بعد يوم افتكر اييبني والا ببات في الجامعه اليوم بسبب عمووه....!!... شلت كتبها وتغشت وطلعت ورا نورة... نورة ركبت جدام عدال حمدان..وركبت فطوم وراها وهي قافطه..
فطوم: السلام عليكم..
حمدان: وعليكم السلام والرحمه...
حرك السياره وطلع بها من الجامعه... وهو يقاوم ويقاوم انه يصد صوب فطوم يشوفها..لكن يدري انها بتعصب على هالحركه..مد ايده وشغل المسجل... وحط لفطوم اغنية " اهمّه" لعيظه... وابتسم... مايقاوم انه يغايظها...!!
فطوم من سمعت الاغنية رفعت عينها صوب حمدان...رغم الغشوه الغليظه لاحظت انه يبتسم...تخبلت فطوم..ماتقدر تستحمل...يقهر ياناااااااااااااس يقهر...مسكت دفترها الصغير وكفخته على راسه كفخه بالقووووووو...
فطوم: بلاه هالمغاااايظ حمدااااااااااانوووووه.....!!
انصدم حمدان وعقب مسك راسه وهو ميت من الظحك... اخيرا تحركت...اخييييييييييرا انقهرت من الخاطر وردة فعلها بينت.... وفطوم ردت مكانها وهي صاده صوب الدريشه ولامه بوزها تقااوم بالقوو انها تظحك...
نورة: بسم الله بلاكم...
حمدان: مااااااشي بس فطوم عندها مرض الارتياااب...اي شي اسويه تتحسبني اغايظها...!!
التفتت فطوم صوبهم...
فطوم: ارتياااب فعينك... (مدت ايدها بينهم صوب المسجل وبندته) ..وبند هالمسجل هذا...
حمداان: شحقه..!!..(ورد شغلها) ..خليييه انا احبه وهذي سيارتي...
فطوم: نزلني...بمسك تكسي....
حمدان: اوكي..
وقف على طرف الشارع وهو ميت من الظحك...
حمدان: نزلي يالله...
نورة: حمدان بلاك عالبنت...!!..فطوم انتي بعد عن الدلع...
تمت فطوم يالسه مكانها...ماكانت قد كلمتها الصراحه...وين تنزل وتمسك تكسي...ماتعرف ادليييييه البيت...!!!...ياربي كيف يقهر هالانسان...لو قعدت في الجامعه والله ابرك لي...
حمدان: ماتبين تنزلين...؟؟
نورة: حمدانوووه تحرك خلصنا....
فطوم عصبت من الخاطر... شو فاكر نفسه !!.. بطلت الباب ونزلت عالرصيف وسكرت الباب وراها... استغرب حمدان..لا والله شجاعه...نورة كانت بتبطل الباب وبتنزل وراها...
حمدان: صبري صبري....
نورة: حمدان والله حرام عليك...
حمدان: ادري...بس صبري عليها شوي..
حرك السياره ومشى شوي... ووقف....وفطوم صامده بعدها فمكانها والقهر ياكلها اكل... وحرك السياره مره ثانيه واتجدم وهي بعدها واقفه..ظحك عليها حمدان من الخاطر... رد ريوس ووقف عدالها.. ونزل من السياره وسار صوبها...
حمدان: فطيم...
فطوم: اذلف عن ويهي...
حمدان: خييييييييبه اذلف مره وحده..!!!... خلاص انا اسف... بلاج ماتتحملين المزح...
فطوم: هذا مب مزح... انته ماصخ...
حمدان: انا مش ماصخ... بس احب اغايظج..
فطوم: ليش يعني حاط دوبك من دوبي..؟؟
حمدان: مادري والله يافطيم... المهم ركبي لا تكبرين الموضوع... خلاص مابرمسج...
تمت واقفه اطالعه....معانده...
حمدان: ...ركبي...
تحرك عنها وركب السياره ..وركبت هي بعد يوم شافت انه ماشي فايده من هذا كله...
اول ماتحرك ابتسم حمدان..
حمدان: اقول فطوم...
فطوم: يووووووووووه علينا...انته قايل مابترمسني..
نورة: حمدان خل البنت فحالها..
حمدان: فطوووووووووووم....!!
فطوم: يعلها المووووت فطووم...
عصب حمدان..
حمدان: بفصخ نعالي وبعطيج عويهج احين...لا تقولين جي يالسباااااااااااله...
سكتت فطوم...
نورة: ارمس عاد انته شو تباها..؟؟
حمدان: يوم بترد علي مثل الناس برمسها....
بس فطوم تمت ساكته ومعانده...
حمدان: ياااااااااا.. بطّــــــه....
فطوم: اووف... هااا..نعم....شو بغيت ..شو في خاطرك طويل العمر..؟؟
حمدان: تبين باسكن روبنز..؟؟
صدت نورة وفطوم صوب حمدان مستغربات....باسكن روبنز..؟؟
نورة: انا ابااا..
حمدان: محد رمسج...
نورة: بتاخذلي جان بتاخذ لفطوم....
فطوم اصلا ماتقدر تقاوم باسكن.... بس تمت ساكته... مابتطلب من هالطويل الغلس شي...
حمدان: انا ارووحي مشتهنه...
وسار حمدان صوب باسكن وخذالهن كلهن كاراميل وسط...وخذته فطوم وتمت ساكته...مثل ماقلت لكم..ماتقدر تقاوم باسكن...ويوم شافها حمدان ساكته قال..
حمدان: فطووووووووووووووووم...
فطوم: حمدان دخيل الله....
حمدان: ماخبروووج..؟؟ هالساحره اللي عدالي بتستوي حرمة اخوج...!!
انصدمت فطوم..ونطت من كرسيها وخشت راسها بينهم... اللي خلا حمدان يرتجف من قربها حتى ماعرف يسوق عدل..
فطوم: صــــــــــــــدق..؟؟؟؟؟؟
نورة: هييي...هههههههه
فطوم: وافقتي يعني..؟؟؟ فديييييييييييتج والله...
وباست نورة بقوو على خدها ونورة تظحك ...وحمدان يطالع مستغرب... ويقول فخاطره انا مالي شي..؟؟؟ وصلناها وشرينالها باسكن وخبرناها بخبر حلوو وبعد ما عطوني شي...
حمدان: احم احم... هاللوووو..!!
نورة: نعم..؟؟
حمدان: ماشي سلامتج... بس حتى شكرا على اللي سويته ماشي..؟؟؟
نورة: مشكور على مغايظ البنت...!!
سكتت فطوم وردت ورا وتساندت على كرسيها وهي تبتسم.. فرحت بخبر نورة وسعيد...تدري ان سعيد ينطنط من الفرح في البيت... اخيرا حصل مراده...الله يسعده...
بعد شوي وصلوا البيت...نورة نزلت مستعيله ودخلت البيت ماصدقت تفتك من صدعتهم...نزلت فطوم وتم حمدان فسيارته لانه مابيدش..بيروح...مسكت فطوم شنطتها ودفترها الصغير...
فطوم: ولو انك طفرتبي اليوم...لكن مشكور عالتوصيله وعلى باسكن...
استانس حمدان يوم افتكرت فيه..
حمدان: العفوو طويله...اوه قصدي يعني طويلة العمر...
فطوم: ههههه انا بنكسر نصين من كثر ما اتاوح عليه بهالطول... ماتشوف عمرك جنك...!!...يالله فمان الله
حمدان: هههههههههه بسم الله عليج عن التكسير بنت هلال... والله يحفظج...
دخلت فطوم البيت وهي تظحك ...وروح حمدان صوب ربعه...
بعد ثلاث ايام من هاليوم... كان سعيد يالس عالبحر.... ولاول مره يحس انه حاله وقلبه استقر... صح انها ماصارت على ذمته بعدها والسالفه مجرد خطبه....لكنها احسن من مافيش... ونوره صارت خطيبته....وباذن واحد احد محد بياخذها عنه...كان خاطره يملج بس نوره محذرتنه برساله لا يطلب ملجه الا قراب التخرج...وهو يتفهم وضعها...اخر سنه وخلها تركز على دراستها احسن عن انها تنشغل به... وتنهد بوناااااسه...هانت خلاص يانووره.... هانت..!!
قطع عليه افكاره تيلفونه اللي يصيح... وشاف الرقم غريب اول مره يشوفه....حاول يتذكره بس ماعرفه...
سعيد: آآآلووو...!
....: السلام عليكم...
صوت انثوي..
سعيد: وعليكم السلام والرحمه..منو معاي..؟؟
... : افاااا... ماعرفتني ياسعيد..؟؟
طريقة لفظ الاسم...والصوت..والدلع البايخ...مالوووف بالنسبه له...
سعيد: شحالج خوله..؟؟
سعيد كان مخنفس ولايعه جبده....من استوت السالفه بينها وبين نوره وهو يتحاشاها كل مايت البيت... مايبا يغلط عليها ويسويله سالفه عوده...
خوله: بخير الله يعافيك..شحالك انته...
سعيد: بنعمه الحمد لله... خير بلاج متصله..؟؟؟
خوله: ابا اسالك...صدق اللي سمعته..؟؟؟
سعيد: بخصوص..؟؟
خوله: خطبتك..!!
تنهد سعيد... احين بتسويلي مناحه...
سعيد: هي نعم...
خوله: خطبت نوووره..؟؟؟؟
سعيد: خطبت شيخه البنات...فيها شي يوم ابغي لعمري بنت مدينه وخلوقه وحشيم..؟؟؟
كان متعمد ينغزها بالرمسه... عشان تحس عدمها شوي... والا اي بنت عندها كرامه مابتتصل على ريال تحاسبه على خطبته بنت ثانيه من دونها....!!!
خوله: سعيد.... وانا..؟؟؟
سعيد: الله يرزقج بريال زين يسعدج....
خوله: احين الله يرزقني بريال زين..؟؟؟ ليش كنتوا تتكلمون علي عيل..؟؟ ليش اهلك دايم يلمحون انك بتاخذني..؟؟؟
سعيد: انا ياخوله ماقلت لحد اني بخذج....وعمري مافكرت اخذج اصلا... انتي مثل فاطمه وشيخه بالنسبه لي.... واصلا المفروض انتي ماتسمعين على رمسه امي وامج...هذي رمسه حريم لابد منها...بس ماتعني شي..
خوله: عقب شو عاد تقولي هالكلام...؟؟؟ انا رفضت وايدين عشانك اذا كنت ماتدري...
سعيد: والله انا ماطلبت منج...ولا انتي ييتي وسالتيني اذا ابغيج والا لا عشان ترفضينهم هذيلا..
خوله: يعني..؟؟ خلاص..؟
سعيد: ياخوله اصلا من البدايه ماكان بينا شي عشان يستوي خلاص الحين...هذي كله اوهامج انتي واحلامج.... والا انا فعمري مافكرت فيج كزوجه..وماقصد الاهانه...لكن كل شي قسمه ونصيب...وانتي ان شاء الله بييج نصيبج...
لا جواب..لانه خوله سكرت بويهه... تظايق سعيد من هالمكالمه واغلق تيلفووونه امرره... محد قالها تفكر فيه اساسا... من تحت راسها استوت هالمشكله بينه وبين نوره والحمد لله ان كل شي انحل ...الله يكمل علينا ان شاء الله واشوفها حرمتي ياااارب...
في امريكا.. خليفه كان مفتك من هند..الحمد لله الكلام اللي سمعها اياه ياب نتيجه..وقامت موول ماتصد صوبه ولا تمشي فدربه.... مع انه حس بالذنب شوي لانه كان يشوفها دوم مظايقه....بس هذا لمصلحتها ولمصلحته هو بعد... دخل غرفة عبدالله وشافه يرمس في التيلفون ويظحك...على باله يرمس مع عنوود.. بس يوم سكر صد صوب خليفه وقال..
عبدالله: حليلها نورووه.... خواتي كلهن خطفن...
خليفه: رمسوا الريايل والا بعدهم..؟؟
عبدالله: تقول اخر الاسبوع بيوون كلهم...
خليفه: الله يوفقها...
عبدالله : شخبارها المعجبه...!!
خليفه: لاااااااااا ويييييييييين امممره مسوتلي طاف...ههههههه
عبدالله: هههه انته طلبت منها.... لا سوري ماطلبت... كنت تعطيها امر مباشر..
خليفه: دواااها.... ذبحتني بالنظرات والحركات المايعه... جذي احسن لنا كلنا...
عبدالله: فاظي انته...؟؟
خليفه: شو فخاطرك...
عبدالله: ابا اسير اتحوط مليت زهقت من الدراسه...
خليفه: قسم بالله انا نفس الشي.. وين علوووه..؟؟
عبدالله: مادريبه...قم بنطلع..
طلع خليفه مع عبدالله يتحوطون في اي مكان يخطر عالبال...
اخر الاسبوع ويوم الخميس وصل سعيد مع ابوه وفيصل وامه وعليا وعيالها.. نورة استحت انها تظهر برااا...واصلا امها قالت لها لا تطلع فظييحه عيب.... فبالتالي طلعت ام خالد وحصه وفطوم ..ونورة تمت ويا حريم خوانها ميره وحمده في الصالة... وسلمن على ام فيصل وعليا... وبعد شوي يا بو فيصل وفيصل وسعيد يسلمون عالعيووز وفطيم وحصه... كان سعيد مستانس من الخاطر....صح انه ماشاف نظر عينه ..بس هو ياي الحين عشان يخطبها رسمي...خلاص بعد اليوم مافي تراجع...الله يكمل على خير...
كانت اللمه حلوه... سوء ريايل او حريم... الكل مستانس عسب هالمناسبه... طبعا تكلموا الريايييل بالخطبه بشكل رسمي وبو خالد عطاهم كلمته...وتم الموضوع على خير.. وسعيد مب رايم يثبت عالكرسي اللي يالس عليه وده يقوم يناقز...بس بيقولون هذا خبل مابنيوزه بنتنا...خله ينثبر محله ابركله.. ومايحتاج اقولكم ان حمدان كان راز بالويه بعد.... حطوا الغدا وتغدوا ..وبعدالغدا دخل بوخالد وبو فيصل وفيصل وخالد وناصر كل حد غرفته يستريحون شوي..اما سعيد وحمدان فتموا موازرين في الميلس يسولفون ويظحكون...وعقبها طلعوا من البيت لانهم ملوا من اليلسه...
في البيت حصه قامت لغرفتها وخلت نورة وفطوم يالسات اروحهن... واتصلت لسيف...تشوفه رد من الدوام وتغدى والا لا..؟؟؟ بس سيف مارد عليها...استغربت..يمكن مشغول والا مب عنده التيلفون... فرت التيلفون عدالها عالطاوله وانسدحت شوي.... بس سيف مارد يتصلبها...اتصلت مره ثانيه ولا رد عليها... بدت تخاف....شو مستوي..؟؟؟...بعد شوي رن تيلفونها وبسرعه مسكته وردت بدون ماتشوف الرقم..كانت متاكده انه سيف..
حصه: ..سيـــف..!!
ام سيف: هلا يابنتي...شحالج..؟
حصه: عمووووه...هلا والله وغلا..شحالج الغاليه؟
ام سيف: بخير فديتج..شحالج انتي وشحال اهلج كلهم..
حصه: بخير وعاااافيه والله..
ام سيف: بنتي بتخبرج... اتصلتي بسيف..؟؟
حصه: عمووه من الصبح اتصله مايرد عليه...اخر مره رمسته كنت موعتنه للدوام الصبح...وانتي.؟؟
ام سيف: والله ياحصه مابغبي عليج حتى انا اتصله مايرد... بس ماعليه يمكن تيلفونه خربان والا شي وساير بقعه...
حصه: الله يسمع منج..انا بتم اتصله يمكن يرد..
ام سيف: ان حصلتيه طمنيني يابنتي ماوصيج..
حصه: ان شاء الله ياعموووه لا توصين...انتي لا تحاتين وايد..
ام سيف: خير ان شاء الله...سلمي على اهلج كلهم..
حصه: يوووصل الغاليه... فمان الله
ام سيف: مع السلامه...
سكرت حصه عن عمتها وهي قلبها يعورها...ليش سيف مايرد..؟؟؟ تمت تتصله مره ورا مره بدون فايده... المغرب ياها الجواب... اتصلتبها اخت سيف الصغيره ..وقالت ان ريال اتصل عالبيت وقال ان سيف سوا حادث وهو في العناية المركزة ..وامها من سمعت الخبر اغمى عليها وطاحت..وهي بروحها في البيت ومب عارفه شو تسوي لانه اخوانها الكبار كلهم ساروا لسيف في المستشفى...وتموا الصغار..وهي بروحها..
بس حصه ماسمعت هالرمسه كلها... ماسمعت غير ان سيف سوا حادث وهو في العنايه... طاح التيلفون من ايدها وطاحت هي عداله عالارض مغمى عليها...
الجزء التاسع والعشرون
دخلت ام خالد الصاله الصغيره وين ماكانن نورة وفطوم يالسات يسولفن...
ام خالد: وين حصه..؟؟؟
نورة: سارت فوق من الظهر لين الحين مانزلت ..جنها الا رقدت..
ام خالد: برايها...سيري فازعي البشكاره في المطبخ وجهزي وياها العشا للرياييل..
نورة: ان شاء الله امايه ... (صدت نورة صوب فاطمه) قومي فزي وياي... لا اتحسبين عمرج ظيفه...!!
فاطمه: بسم الله منج خذتيني بمشراع وميداف... يالله قومي..
نشت فاطمه ونوره صوب المطبخ وساعدن البشكاره على تحطيط العشااا والتجهيزات...بعد ماخلصن ردن دخلن..شافتهن عليا...
عليا: هاا نواري...خلصتوا العشا... حطيتوه..؟؟
نورة: هي خلصنا...مانزلت حصه..؟؟
عليا: جي وين هي.؟؟؟ تحسبتها وياكن..!!
نورة: ركبت من الظهر ولا شفناها...
عليا: ....... سيري زقريها للعشا...يمكن راقده وعيها..
نورة: اوكي..
سارت نورة وفاطمه لحجرة حصه...دقن الباب ولا حد رد عليهن... اطالعن بعض وكل وحده على ويهها علامه استفهام...!!! فتحت نوره الباب ولاول لحظه ماشافت حد في الغرفه...الشبريه على حالها مرتبه وباب الحمام مفتوح..عيل وينها..!!... دخلت الحجره اكثر ..وشافت طرف ريول حصه طايحه عالارض وعدالها تيلفونها ...شهقن فاطمه ونوره...فاطمه ماتت من الخوف وتيبست مكانها وماعرفت شو تسوي...نوره طارت صوب اختها...
نورة: حصـــه...!!!.....حصه قوووومي..شوفييج..؟؟؟
ومسكت راسها وحست من حراره جسمها انها ماماتت والحمد لله ..مغمى عليها بس...كانت نوره شوي وبتصيح بس قوت قلبها...اما فاطمه على طول صاحت.. التفتت نورة صوب فاطمه وعيونها محمره...
نورة: فطوووم سوي شي.... لا اتمين واقفه جي...
فاطمه: شو اسوي..؟؟ شوفيها حصه...مريضه..؟؟؟
نورة: بسسرعه هاتي ماي في ايدج من الحمام..............بسرعه لا اطالعيني جي..!!
ركظت فاطمه وهي مختبصه وقلبها مثل الطبل خايفه موووت...يابت ماي في ايدها وثلاث تربااعه اجبب عالصبه...بس تم شويه في ايدها رشته على ويه حصه....فزت حصه من غفوتها بالقو.. ونورة تمش الماي بشيلتها عن ويه اختها..
نورة: بسم الله عليج الرحمن الرحيم....بسم الله عليج...حصه حبيبتي شوفيج طحتي جي...؟؟؟
نشت حصه عن ثبان اختها وهي تناهي وتمد ايدها لشي غير مرئي... كانها بعدها ما تخطت صدمتها وماستوعبت..ومخها متشوش...
حصه:...ودوني...ودوووني...
نورة: وين..؟؟ وين تبينا نوديج..!!..ياويييلي فطوم ربعي زقري امااايه...ماعرف اتصرف انا اروحي...
سوت فطوم اللي قالته لها نوره وركظت برا الغرفه..وحصه اتابعها بنظرها..قامت هي بعد ومازالت تترنح...كان راسها داير المسكينه... عقت شيلتها ونوره اتابعها باستغراب وخوف... فتحت حصه الكبت وطلعت عباتها وشيلتها ولبستهن بسرعه... وكانت بتفتح الباب...بس مسكتها نوره..
نورة: وين تبيين حصه....
حصه: فجيني نوووره بسييير...
سحبت ايدها من ايد نوره بالقو وطلعت للممر..ركظت وراها نوره ومسكتها مرة ثانيه...الظاهر ان البنت مينونه...
نورة: حصه..استهدي بالله.. خبريني شو السالفه...وين بتروحين..؟؟
صرخت حصه..
حصه: بـــــــــروح عند سيــــــــف...!!!
في هاللحظه كانت امها واصله عندهم هي وفطوم وعليا وام فيصل وحريم العيال حمده وميره... ووقفوا مستغربين من اللي شافوه...
نورة: ليش شوفيه سيف تروحين عنده....!!!
حصه: ســـيف في العناية يا نووووره....
كانت حصه تصيح بشكل يقطع القلب...حطت نوره ايدها تغطي بها شفايفها من اللي سمعته..وام خالد حطت ايدها على صدرها ... والباقي ردات فعلهم كانت مختلفه والكل مصدوم...
ام خالد: شو تقولين يابنتي..؟؟
صدت حصه صوب امها يوم سمعت صوتها وراحت صوبها وطاحت فحظنها وهي تشاهق وتصيح...
حصه: امااايه دخيييلج ودوووني...
ام خالد: وين نوديج حبيبتي..
حصه: عند سيف...
ام خالد: من وين يبتي هالخبر ياحصه..؟؟
تشوشت حصه وهي تحاول تتذكر....وهزت راسها وهي مرتبكه..
حصه:..آآ..اخته...اخته اتصلتبي وقالت لي..
سكتوا الكل....ثواني بس عشان يستوعبون اللي سمعوه.....وحصه دموعها تارسه عينها واطالع فويوههم واحد واحد...وهي تعرف انهم مايحسون باللي تحس هي فيه من طعنات في الصدر... ردت تقولهم بصوت هادي..مرتجف...
حصه: سيف سوا حادث....
عليا: حصه انتي متاكده..؟
كان جواب حصه انها انهارت عالارض وصياحها زاد... وصار مسموع....كانت تقول في خاطرها ليش هذيل يعطلوني..؟؟ ليش يكثرون الاسئله...؟؟؟...ليش مايودوني صوب ريلي وخلاص....ابا اشووفه ....ابا اشوووف سيف الحين...!!
يلست عدالها امها وحظنتها وهي تصيح وياها.... وفاطمه من البدايه ماوقفت من الصياح...ونورة عيونها محمره وساكته....تتظاهر بالقوه...ومن داخل قلبها يتقطع على اختها وهي تحس ان الامور بتسوء اكثر من جذي....!!.. مش تشاؤم...لكنها حاسه سادسه مثل مايقولون...
ام خالد: عليا امايه...زقري ابوج ...
الكل كان واقف مكانه لين مايت عليا مع ابوها وخالد وناصر..
بو خالد: شو مستوي...؟؟
ام خالد: البنت تقول سيف مسوي حادث وفي العنايه..
بو خالد: هاااااااا...؟؟؟؟
خالد: سيف سوا حادث..؟؟؟؟ متى صار هذا..؟؟ وهي منو مخبرنها..؟؟؟
ام خالد: اخت سيف متصله بحصه وخبرتها...والبنات حصلن حصه طايحه فحجرتها لين قبل شوي...
ناصر: معقوووله...!!...صبر بتاكد...
مسك ناصر تيلفونه واتصل بسالم اخو سيف العود.. وتاكد منه عن الخبر...وطلع فعلا سيف مسوي حادث من الظهر...وحالته خطيره ودخلوه العناية على طول وبعده فيها...وسالم واهله كانوا هناك ..وزاد الوضع صعوبه عليهم يوم دخلت الام بعد المستشفى بسبب سكته قلبه يتها من سمعت الخبر بشكل مفاجئ وغير متوقع... سكر عنه ناصر وهو يذكر ربه ..بروحه سالم صوته كان يدل على انه متاثر وايد كانه كان يصيح..وهذا شي غير مستغرب...اخووه ومسؤول عنه من بعد والده المتوفي.. اطالع ناصر فويه ابوه واخوه...
ناصر: فمستشفى توام...
رفعت حصه راسها وووقفت وتمسكت بكندوره اخوها ناصر..
حصه: شحاله سيف..؟؟
مسكها ناصر من كتوفها لان حصه مووول كانت تتنافض وشكلها بطيح مره ثانيه في اي دقيقه..
ناصر: ياحصه ذكري ربج....ان شاء الله مافيه الا العافيه..
حصه: بشووووفه...
ناصر: بتشووفينه ان شاء الله..خلينا نسير الحين...
حصه: احيين بشوووفه...بسير وياكم...
بو خالد: استهدي بالله يابنتي ..وين تبين المستشفى كلها رياييل وانتي بينهم مايصيير..
نورة: ابويه حرام عليكم لاتسوون بالبنت جي...خبلتوبها...خلوها تروح تشوفه عالاقل تطمن عليه...
ام خالد: برايها يابو خالد...انا بسير وياها..
ناصر: برايهن خلهن يسيرن ابويه... ام سيف يقولون طاحت عليهم ومرقده هناك بعد...
ام خالد: بعد..!!!.. لاحول ولا قوة الا بالله....شو الي صابهم مره وحده...!!
بو خالد: يالله يالله انزين..انقفظن...خلونا نسير..
ركظت نوره صوب حجرة حصه ويابت التيلفون مالها وعطته اياها..
نورة: شليه..بتصلبج عقب...لا تخافين ان شاء الله بيكون بخير...
حصه: آمين يانوره...ادعيله الله يخليج..
نورة: الله يشفيه يارب... ركظي عن يسيرون عنج...
سارت حصه تحت وركبت مع اخوها ناصر.. اللي تم يطمنها طول الدرب وهي كاسره خاطره... اما الباقي كلن سار فسيارته حتى فيصل يوم خبرته عليا بالي صار شل ابوه ولحقهم...
اما باقي الحريم..فقعدن تحت في الصاله وهن يدعن انه سيف وامه يقومون بالسلامه..ويترين التيلفون يصيح عشان يسمعن اي خبر....نوره اختنقت من هالجو الكئيب...
نورة: فطوم..قومي نطلع الحوش نشم شوية هوا...محد رياييل في البيت كلهم ساروا المستشفى اظن..
فطوم: يالله..
طلعن برا ويلسن على الدري اللي جدام الفيلا...
نورة: آآآآآآآآآآآه حليلج ياحصه...قطعت قلبي والله ماتستاهل..
فطوم: هي والله ..مسكين سيف الله يعينه مايندرا بحاله هو بعد..
نورة: الله يشفيه.... ماحيده متهور انا بالعكس عاقل ومب من النوع اللي بيسرع في السواقه...كيف سوا حادث..؟؟؟
فطوم: من ربج يانوره...مكتوووب انه يصير....مب شرط هو المسؤول يمكن حد غلط عليه ودعمه او شي...
نورة: ماقول غير الله يشفيه هو وامه وتعين حصه....
فطوم: آآمين.... اندووج..قومي هذي سياره داخله..
نورة: صبري صبري....هذي سياره حمدان...
فطوم: حد وياه انزيين....ماتشوفين...
دققت نورة النظر.....
نورة: سعيـــــد....!!
ولفت صوب فطوم وهي اطالعها باستغراب وقالت...
نورة: مايدرون بالسالفه...!!
نزل سعيد من السياره وهو ميت من الظحك..
سعيد: واللـــــــــه ان ربيعك هذا خرىىى...
نزل حمدان هو بعد يتبسم بسخريه...
حمدان: هذا مينوون دوم جي يتمصخر...
سعيد: بس حرام شكله الا زعل.... وايد غلست به انته الصراحه...
ظحك حمدان..
حمدان: ههههههه هـــــذاااا..؟؟؟؟؟...هذا اول امس حالف مايرمسني لين يوم القيامه اون...وشوف كيف اليوم يرحبي... عااااادي هذا الا جي سوالف متعودين عليه...
سعيد: ههههههه حلييييله...
وصد سعيد بشكل (مغناطيسي) بدون مايعرف السبب صوب البيت...وشاف نوره يالسه هناك مع فطوم اللي كانت متغشيه...وابتسم لها احلى ابتسامه طالعه من قلبه سيده.شووعلييه...!!..خلاص خطييبته الحين.... وردت له نوره ابتسامته بوحده خفيفه...وكئيبه...بشكل خلا قلبه مب مطمن... صد صوب حمدان..
سعيد: سير الميلس وبييك احين...برمس نوره شوي..
سار سعيد لين وصل لنوره...
سعيد: السلام عليكم...شحالك نواري...؟
وابتسم..
ابتسمت هي بعد بس بشكل خفيف مثل اول..
نورة: وعليكم السلام....الحمد لله انابخير شحالك انته سعيد..؟؟
سعيد: شو بلاج نوره..؟؟
نورة: سعيد...همممم..والله مب عارفه شو اقولك..
سعيد: خيير..؟؟؟ شو مستوي لا تروعيني...!!
نورة: سعيد...سيف ريل حصه.. سوا حادث والحين هو في العنايه...
سعيد: شوووووووووووو..؟؟؟؟؟
سعيد يعرف الريال وماتوقع هالخبر ابد...
فطوم: كلهم هناك في مستشفى توام..
تم سعيد مبحلق فيهن شوي عقب صد عنهن وسار صوب الميلس..ماكمل ثانيه الا وهو طالع مع حمدان وطيرااااااااااااان برا البيت... بعدها بشوي يت عليا تزقر نوره...وتقولها ان يبونها عالتيلفون..
استغربت نوره ..منو متصل هالحزه..!!..اكيد من المستشفى.. نقزت نوره ترد عالتيلفون..وطلعت عنود متصله..
عنود: هااااااااااااا العروس..؟؟؟ شعليييييج نسيتينا احين انخطبتي..
نورة: ماعاش من ينساج ياعنود..شخبارج.؟؟
عنود: الحمد لله...هاااا خبريني شو صار وشو استوا...
نورة: شو صار بد وشو استوا...؟؟ ماشي..
عنود: رمسوا الرياييل..؟؟
نورة: حسب علمي هي...
عنود: بلاج بسم الله مب متحمسه ..؟؟..هذا اللي كنتي تبغيينه صح والا..
نورة: الحمد لله على كل حال...
عنود: بسم الله منج...بلاااااااااااااااج..؟؟؟
نورة: عنوودوووه....حصه ريلها في العنايه..
سمعت شهقه عنووود من التيلفون...
نورة: سوا حادث مسكين...حاله حصه والله تقطع القلب...قبل شوي ساروا المستشفى ..
عنود: شوو صار عليه ليش في العناااايه..؟؟؟؟
نورة: سوا حادث...
عنود: وشووو حاله الحين..؟؟؟
نورة: والله مادري بس هو في العنايه... وامه بعد مسكينه طاحت عليهم وهي بعد في المستشفى... الله يشفيهم ويعين اهلهم..
عنود: آآمين...مسكيييينه حصه...هزرج اتصلبها..؟؟؟
نورة: مب الحين..الا من شوي سايرين..خليها تطمن عليه وتهدا شوي..
عنود: من ترمسينها اتصليبي على الموبايل ماوصيج...طمنيني..
نورة: ولا يهمج...
عنود: برايج عيل نورووه...سلمي عليهم..ولا تنسين تتصلين مابرقد انا لين مادقين لي..
نورة: ان شااااء الله..وسلمي على عمي وحرمته..
عنود: ان شاء الله...فمان الله..
سكرت نورة عن عنود وردت تقعد عند الباقي في الصاله...
في المستشفى حصه كانت بلا عقل...امها ماسكتنها من ايدها وتقووودها..لانه حصه من دموعها وغشوتها ماقامت تشوف شي... عند باب قسم العناية كان متروووس رياييل..كلهم من اهل سيف وربعه وقرايبه...حصه وامها دخلن قسم العنايه مع ناصر وسالم اخو سيف.. وتموا سالم وناصر واقفين شوي بعيد اما حصه وامها قعدن على الكراسي يترين الدكتور يطمنهم عن حاله سيف...حصه كانت متمسكه في ايد امها تعصرها عصار... ماتعرف شو هالاحساس المخييف اللي متملكنها..... خايفه... ومعصبه...بينها وبين سيف باب واحد ومب قادره تدخل بدون اذن...!!!...باي حق هم يسمحون لها انها تدخل عنده او لا...؟؟؟...ريلها هذا...وفوق هذا بعد محد يا يطمنها عليه....طالعت ناصر وسالم..واقفين بعيد ويتكلمون بجدية.... حاولت تخمن عن شو يتكلمون وشو يقولون....اكيد عن سيف....ومايبونها تسمع.....شووفيه سيف..!!!! قولولي ..ارحموووني شووفيه...!!!..
بعد مرور ساعه ونص ياهم الدكتور واذن لشخص واحد بس انه يدخل عنده لدقيقه وحده...حالة سيف خطيره وماتتحمل... كلهم اتفقوا ان حصه تكون هالشخص..لانه سالم سبق وشافه من قبل....اما ناصر وام خالد ..تعتبر حصه اقرب منهم لسيف.... ازاحت الستاره اللي تفصل بين الغرفه والممر...وشافت سيف... راسه ملفوف..وصدره وبطنه بعد ملفوف...حتى ايده وريله..... وصوت مؤشر مزعج يطلع من جهاز دقات القلب.... تقربت منه ودموعها تنزل من عيونها بدون ماتذرفها...تاملت فيه...الكدمات كانت مبينه على ويهه ..وجتوفه...يالله ياسيييف...شو اللي صار فيك..؟؟؟...ليش انته من بد كل هالناس..!!!...استغفر الله العظيم...تمسكت حصه بالحديد اللي كان عالسرير عشان مااطيح مره ثانيه...وكانت تصيح من خاطرها...ومب عارفه شو تسوي او كيف تتصرف...حست بلمسه خفيفه على ايدها..رفعت عيونها وهي تشهق..وشافت سيف...فاتح عيونه ويطالعها...يحاول يلفت انتباهها بهاللمسه الخفيفه اللي قدر عليها...تمسكت حصه بايده وضمتها لقلبها..
حصه: سيف...!!..الحمد لله عالسلامه سيف..
مارد عليها...كل رده كان ابتسامه صغيره تعبانه ...ودمعه وحده نزلت من عيونه... غمض عينه مره ثانيه وراح لدنيا الله اعلم بها... دخل عليها الدكتور وقالها انها لازم تطلع الحين...تقربت حصه منه وباسته على راسه...كان ودها اتم اكثر من جذي.. بس هالدكتور اللي واقف على راسها مب مخلنها..واذا كان هالشي لمصلحه سيف...بتطلع... الله يشفيك من العوق اللي انته فيه ياسيف....!
طلعت برا عند امها ويلست عدالها وهي منهااااره بالكامل....حظنتها امها وهي تصيح وياها...
بعد ساعه لاحظوا توتر الدكاتره والممرضات عند غرفه سيف...وما واحالهم الا وهم ساحبينه لغرفة العمليات...طاح قلب حصه ...وطمنها ناصر بانهم شالينه العمليات وان شاء الله مايصير الا الخير... لكن الدكتور رجع بعد ساعه... وعلى ويهه ملامح مكتئبه.. من شافته حصه عرفت شو صار..وطاحت عالكرسي اللي وراها كانه صايبنها شلل..... هز الدكتور راسه وهو مب عارف كيف ينقل الخبر....
الدكتور: انا آســــف... البقية فحياتكم...
.......
الجزء الثلاثين
سيف مات.... سيف..خلاص مات...هالفكره ترددت مليون مره في عقل حصه في اللحظه اللي وصلها فيها الخبر..قعدت على هالكرسي اللي مب مريح... وهي ماتحس بنفسها..ماتحس بريولها...مب قادره تتحرك او تصدر اي صوت....سيف مات...خلاص مات....كان الصريح والصياح والاصوات العاليه ترتفع حواليها...بس حصه كانها صمخا ما تسمع...ماتفكر...وماتروم تتحرك بعد...ماحست الا بنفسها مخنوقه لانه امها لوت عليها بقوو وهي تصيح...ليش تصيحين يامايه....خلاص سيف مات شو فايده الصياح يعني...وانا ليش ماصيح..!!!.. مب قادره اصيح....من الصبح اصيح واحين مب قادره...مخنوقه... وابا اطلع....
حصه: امايه...ابا اسير عند عموه...!!
اطالعتها ام خالد وعيونها كلها دموع وهي مستغربه...
ام خالد: بنتي شو تبينها..؟؟ الحرمه مريضه وطايحه...لا يكون بتخبرينها..؟؟
حصه: ابا اسير عند عموه...ماشفناها..
زاد استغراب ام خالد....مب صاحيه بنتها...ريلها توه متوفي وهي تبا تزور عمتها....!!
ام خالد: بنتي صاحيه انتي..؟؟ شي فيج..؟
صدت حصه صوب ناصر..وسارت عنده...هذا بروحه دمعت عيونه مع انه معرفته بسيف بسيطه... اول ماشافها لوا عليها هو بعد على باله انها يايه عنده تباه يواسيها...حليلك ياناصر...
ناصر: عظم الله اجرج ياحصه....
حصه: الدايم ويه الله.....ناصر تخبر سالم وين غرفة عموه...
ردة فعلة مثل رده فعل امه... ابتعد عنها وشاف ويهها مب طبيعي....هادية بشكل غريب...مش المفروض تكون منهاره الحين...!!!..
ناصر: غرفة عمتج..؟؟؟
حصه: هي غرفة عمووه...
ناصر: لحظه..
وبعد فترة طويله من الاستفسار من سالم المنهااااار كليا....طلع برقم الغرفه ووين موجوده...وتوصيات وايده بانها ماتخبر العيوز عن هالخبر... شلت امها وياها وسارت صوب غرفة ام سيف...سمحوا لحصه وامها انهن يدخلن لانه حالة ام سيف تحسنت وايد..لكنها نايمه وتحت تاثير المهدئات..يلست حصه عالكرسي ...وحوالي الساعه...في هدوء وصمت..وهي بس تتامل في ويه هالعيوز...وتتخيل سنين ربت فيها ولدها...وتحملت مشاكله.. ونصحته...واخر شي تخسره....كيف بتكون ردة فعلها..!!.. هي مجرد حادث ماتحملت الصدمه وطاحت....كيف لو تدري انه مات....!!!..ما تقدر تتخيل ردة فعلها....كانت تحس بالشفقه.... انا... عرفت سيف لشهور بسيطه...ومب قادره اني اصيحه الحين من زود الالم...كيف امه..!!...
ماكانت حصه تمانع انها تقعد اكثر عند ام سيف...بس يوم حست انها تتحرك...واحتمال تقوم في اي لحظه...نشت هي وامها وطلعن برا....شو بتقولها..؟؟؟ ماتبا تكون هي اللي تخبرها بهالخبر...ماتقدر...طلعت عنها وردت البيت مع امها وناصر...اللي وصلهن البيت ورد المستشفى مره ثانيه...على دخلتها البيت..الكل يسالها...كل حد يحاول يمسكها من صوب...بس تهربت منهم كلهم...وراحت لحجرتها وقفلت على عمرها...
نورة: اماااايه...شو بلااااكم..؟؟؟
يلست ام خالد والكل متحاوطبها...تمش دموعها بشيلتها..
ام خالد: سيف عطاكم عمره...
الكل انصدم...وحزن...واللي صاح صاح....حتى لو مايعرفون سيف...لكن صاحوا عشان حصه.....وتعاطفا معاها وعلى حالها... وخيم الصمت على البيت كله... والكل مب عارف شو يقول..وكيف يواسي...حصه ماشافوها من يوم قفلت على عمرها....بس كل شوي حد يروح يدق عليها يخافونها تسوي شي بعمرها...بس يوم ترد عليهم يعرفون انها بخير ويخلونها على راحتها....
تم الدفن الصبح ...والعزا طبعا فبيت سيف المرحوم... ام خالد وام فيصل وعليا وحمده وميره ..طبعا والرياييل كلهم....ماعدا نورة وحصه وفاطمه...ام سيف نشت وباستشاره من الدكتور..نصحهم بانهم مايخبرونها شي الحين...لين ما تكون قوية شوي..وتتحمل خبر مثل هذا....صح كانت مستغربه من غياب عيالها عنها بس كانت تتحسبهم مشغولين مع اخوهم...فطافت السالفه عليها وقلبها كله امل بان ولدها بخير....
في امريكا.. خليفه تملل من اليلسه بروحه في الكافتيريا....يتريا عبدالله وبعده مايا...وهو يعرف انه في غرفته... شل كتبه وسار صوب حجرة عبدالله.. دخلها وشاف عبدالله في حال غريبه.. ماسك راسه بين يديه ويالس بشكل كئيب...
خليفه: عبووود....!!!
رفع عبدالله راسه صوب خليفه وعلى طول رد نزله...بس مب بالسرعه الكافيه...لانه خليفه شاف الدمووع...والقهر والصدمه على ويه عبدالله... تم خليفه ساكت وقلبه منقبض...عبدالله مابيصيح جي الا اذا شي جااايد مستوي...الله يستر...ناقص انا...!!!
تقرب منه خليفه...
خليفه: عبدالله.....شو صار..؟؟
سكت عبدالله....شو يقوله..؟؟؟ كيف يقوووله....ربيعك الروح بالروح توفى بحادث..؟؟؟ ...حصه..بنت عمك...واللي كنت تبغيها...ترملت وهي فعز شبابها...؟؟.... شو اقووووله..!!!!..
خليفه: عبووود...طيحت قلبي ششوووو مستوي....!!!
هز راسه عبدالله وهو يتكلم بدون مايحس....
عبدالله:..آآآآآآآآآآآخ ياخلوووف... اسميها الدنيا ماترحم حد...
خليفه:.................
اطالع عبدالله فويه خليفه....وشاف الشك..والتشاؤم....ونموذج سيئ من الافكار يدور فويهه...مب عارف شو بالضبط الخبر الشين اللي يرمس عنه عبدالله.... كسر خاطره ولد عمه....يخاف يقوله ويريحه يقوم يصدمه ويزعله اكثر...اكيد انه بيزعله اكثر...بس لازم يقوووله.....لييييييش يوصله الخبر مني انا لييييش..؟؟؟..ما تمالك نفسه..نش ولوا على خليفه بقووو... اذا كان بيقوله ..مابيقووله فويهه....مايتحمل يشوف عيون خليفه...
عبدالله:.. خلوف قول لا اله الا الله.....
خليفه يحاول يدز عبدالله عنه بس هذا متمسك فيه....
خليفه: عبود خلصني...
عبدالله: قول لا اله الا الله اول...
خليفه: لا الــــــــــه الا اللــــــــــه........عبود ارمس...
استجمع عبدالله شجاعته..لازم يقوله لازم...
عبدالله: خلوف...امس سيف سوا حادث....
غمض عبدالله عيونه بقووو وهو يحس بخليفه جاااااااامد بين يديه....وساكت...ويادوب انفاسه تطلع منه..
عبدالله:... و عطاك عمره ....
ماحس عبدالله الا بدزه قويه من خليفه عقته عالشبريه...ملامح خليفه كانت متوحشه.... تبين صراع داخلي يدور في قلبه....مب مصدق...ومنصدم...ومايبا يصدق...ومعصب من انه عبدالله يقوله خبر مثل هذا....
خليفه: صدق انك ماتستحي.....عنبوو تفاول على نسيبك...!!!..
مش عبدالله دموعه...
عبدالله: ياخلوووف اذكر ربك....اطلب له الرحمه...
خليفه: اوص اوص....خلاص.....خلاص لا تقول شي...
عيون خليفه كانت محمره...وصدره يرتفع وينزل...ويرتجف من راسه لريوووله.....وكيف لا..؟؟؟...ربيعه من ايام الدرااسه....اقرب واحد له من بعد ولد عمه... يسوي حادث ويتوفى وخليفه متغرب في بلاد الزفت امريكا....!!!!!....لا ماصدق.....طلع من غرفة عبدالله وهو متشوش...مب مصدق ومعصب...
خلاه عبدالله على راحته لين مايستوعب ويفرغ الغضب اللي يحس فيه...ويتقبل الامر الواقع... مسك عبدالله تيلفونه يبا يعزي اخته... بس تراجع وقال اكيد انها مابتكلمه الحين... خله يتريا شوي لين ماتهدا هذي بعد... الله علييييج ياختي... ترملتي قبل ماتعرسين...؟؟ قبل ماتتهنين.. ياترى شو مصيرج..؟؟كيف حالج بيكون...ووين الايام بتوديج..؟؟ الله يعينج..
بعد اربع ساعات دخل عبدالله غرفة خليفه...وانصدم.. شاف خليفه يزهب شنطته ويحط اغراضه اي كلااام بدون ترتيب...وبشكل منفعل...
عبدالله: خلوف شو تسوي..؟؟؟
خليفه: برد لبلاد....
!!!!!!!!!!!!!...
انصدم عبدالله اكثر...
عبدالله: شووووو..!!!..ترد البلاد...؟؟ الحين عاد..؟
خليفه: على الاقل نحظر العزا....كلها 3 ايام وبنرد...
عبدالله: بنرد..!!!...انته ومنو...
التفت له خليفه بنظرة معصبه...
خليفه: منووو يعني..؟؟؟؟؟...انته... ولو ماتبا تسير وياي اكييه تذكرتك روح ردها للمكتب...
ورد لشنطته يفرغ فيها الاغراض ويعفسهن في الشنطه وهو معصب...
عبدالله: ان شاء الله ان شاء الله....بنسير...متى الطياره..؟؟
خليفه: الساعه ثمان...
خليفه مزاجه كان مايتقااارب...فطلع عبدالله عنه ورجع لغرفته يجهز اغراضه هو بعد...
وصلهم علي المطار...وطارت طيارتهم صوب الامارات...وطول الوقت وخليفه ساكت...ورافض اي اكل..بس طلب غرشة ماي... حتى الرقاد ماطاع يرقد.... وهو لين الحين مب قادر يستوعب....ولين ماوصلوا الامارات بالباجر الضحى ما كان مصدق..ويوم وصلوا المطار تذكروا بانهم من زود العيله ما وصوا اي حد انه يستقبلهم.... تذكر عبدالله بان سعيد واهله اكيد ردوا الشارجه..لانه اليوم السبت..وهم كانوا الخميس والجمعه في العين...واكيد انهم مابيطنشون دواماتهم.. فيوم قال عبدالله انه بيتصل بسعيد رفض خليفه وقال انهم بياخذون تكسي عشان مايعبلون على حد... وهذا اللي صار...اتصلوا بتكسي الغزال اللي وداهم صوب العين...
اول شي وصلوا خليفه البيت وعقب سار عبدالله بالتكسي صوب بيتهم... اول مادخل عبدالله البيت لاحظ الهدوء...شي طبيعي... اكيد كلهم في العزا... ركب فوق وحط شنطته في غرفته... وراح صوب غرفة نورة ودق الباب...فتحت نورة الباب وانصدمت من شوفة عبدالله ...على طول لوت عليه .. وكانت فاطمه بعدها في الجامعه...اما نورة فكانت راجعه توها...
نورة: فدييييييتك والله متى يييت..؟؟؟
عبدالله: قبل شوي..شخباركم..؟؟ شحالها حصه..؟
دخل حجرة نورة ويلس عالشبريه وهو يحس بتعب مب طبيعي...يحس بثقل..
نورة: والله.. عايشين...اما حصه لا اتخبر... من ردت من المستشفى حابسه عمرها...لا اكل ولا حياة... بس تصلي وتقرا... حتى دموع ماشي...
عقد عبدالله حياته...
عبدالله: شو قصدج..؟؟
نورة: ماصاحته تخيل...!!..صاحت وقت ماعرفت بالحادث..بس يوم خبروها ان مات...ماطلبت غير شوفة عمتها..قعدت عندها ساعتين وردت البيت...بس ماصاحت....
عبدالله: معقوووله..؟؟ شو يعني مب زعلانه عليه..؟
نورة: مب زعلانه...!!!..الله يسامحك... حصه شعورها تخطى الزعل...من قوة الحزن اللي تحس فيه مب قادره تصيح...
هز عبدالله راسه باسف...خليفه من صوب مب رايم يصيح...ولا يتقبل...وحصه بعد مب رايمه تصيح ريلها... اذا ماطلعت مشاعرها بالصياح بتمرض....شي بيستويبها البنت....!!..
عبدالله: في حجرتها هي...
نورة: هي...
عبدالله: بسير اشوفها...
نش عبدالله عن شبريه نوره ومشى بخطوات ثقيييله صوب حجرة حصه...ودق الباب.. بعد شوي فتحت له حصه...بشيلة الصلاة..وحاظنه المصحف بين يديها...يوم شافته ارتجفت عيونها الذبلانه...تعب ويه حصه من زود الالم...مشاعر مب قادر يعبر عنها او يطلعها...ابتسمت له ابتسامه صغيره...دمعت عيون عبدالله من شافها..كيف رايمه تشيل هالحزن كله وتبتسم ...؟؟؟....تقرب منها وخذها بحظنه ودموعه ينزلن...تذكر سيف..وفكر بحال حصه..وتذكر كيف ساعدها بتقبل فكرة الخطبه من البدايه....وكيف اقنعها انها ترد على تيلفونات سيف..وتذكر السوالف اللي كانت تيبهن له عنود عن تطور العلاقة بين سيف وحصه....عقب هالمشوار الطويل من التقبل والحب.. اخر شي تنحرم منه..!!!.. اللهم لا اعتراض...
كانت حصه هادية فحظن عبدالله...كانها نايمه...كانها ماتحس... ابتعد عنها وطالع فويهها...مازالت حاظنه هالمصحف..والابتسامه الصغيره عشفايفها... استغرب...!!..من وين يبتي هالقوه ياحصه...!!!! ..هذا ريلج...سيف..!
حصه: الحمد لله عالسلامه عبدالله...متى ييت..؟؟
عبدالله: اليوم...قبل شوي... حصه... عظم الله اجرج..
صدت حصه عنه ورجعت للشبريه وقعدت... وحطت المصحف عدالها...
حصه: الدايم ويه الله ياعبدالله...
قالتها وهي تتنهد...بس مارتجف صوتها...ولا تغيرت ملامحها...ماعدا الابتسامه اختفت... تقرب منها عبدالله ويلس عدالها...يتصرف بكل حذر...لاول مره يخاف من ردة فعل اخته...
عبدالله: شو حالج حصه...؟
حصه: الحمد لله على كل حال...
عبدالله: حصه.... اللي سمعته عنج مايسر... ليش تسوين بعمرج جي..
حصه: ماسويت بعمري شي...!!
عبدالله: كيف ماسويتي شي..!!..حابسه عمرج لا تاكلين ولا شي ...حتى ريلج المرحوم ماصحتيييه...مايصير اللي تسوينه بعمرج...
صدت حصه بنظرها مكان ثاني... متجاهله كلامه...
عبدالله: ياحصه لازم اطلعين اللي في خاطرج....بتمرضين ان تميتي جي...
حصه: ماااااااااقدر ياعبدالله ماقدر....كم ترمسووون وترمسووون لكن انا ماقدر...مارمت غير اني اقرا على روحه...وبس.
عبدالله: بس انتي تعرفين ان لج حياة لازم تعيشينها بعد...
ابتسمت حصه بسخريه...
حصه: خلني اعرف حياتي اول شو هي عشان اعيشها...
تظايق عبدالله من خاطره .. اخر شي يباه انه اخته تتعقد...توها صغيره ولازم تعيش حياتها وتحاول تتخطى وفاة ريلها...
عبدالله: الله يهدي بالج يا حصه.....
سكتت حصه...وبعد فتره سالته..
حصه: خليفه يا وياك..؟؟
عبدالله: هو اللي ماخذ التذاكر من البدايه...
هزت حصه راسها...
حصه: اكيد منهار... وايد ربيعه سيف...
عبدالله: منهار من داخل....مثلج...والا من برا ماشي...
سكتت حصه ...وتمت ساكته...تفكر...
عبدالله: انا بسير اتسبح وعقب بروح العزا...تامريني على شي..
حصه: سلامتك... بس اباك تتخبر عن عمتي...ابا اعرف حالها....خبروها والا لا... سالت امايه مره وصاحت وماسالتها من عقبها...
عبدلله:.. ان شاء الله...يالله فمان الله..
حصه: الله وياك...
واول ماطلع عبدالله ردت قفلت الباب مره ثانيه...
عبدالله تسبح وطلع...خطف على خليفه في البيت...وهذا كان يترياه... قاله عبدالله انه يبا يسلم على عنود... فدخله صوب المليس.. وبعد فتره يت عنود..وويهها فرحان... سلمت عليه وخذت اخباره..وهي اداري مشاعره وتعرف انه زعلان على وفاة ربيعه وحال اخته...وماطول وياها..طلع هو وخليفه سايرين صوب بيت سيف...
طبعا اهلهم واخوانهم كلهم كانوا هناك.. انصدموا يوم شافوا عبدالله وخليفه داخلين عليهم الميلس....سلموا عليهم وخليفه يحاول يمسك نفسه....من وصل البيت دور مثل ماتعود على سياره سيف....بس مب موجوده... لكن السيايير كانن تارسات البيت ...من شاف اخوانه والعرب المتيمعين....والحزن على ويوههم... خنقته العبره....واخوان سيف من شافوا خليفه ردوا يصيحون اكثر...لانه خليفه ربيع سيف وايد...خليفه انترست عيونه دموع...وحس بقلبه يعوره وصدره ظاق...بس من لوا على سالم اخو سيف العود انفجر...خلاص مايتحمل...لين متى بيتم مكابر...!!..وصاح خليفه صياح مب طبيعي...صحيح بدون صوت...لكن ويهه مبين عليه العذاااب والصدمه والحزن....والكل تاثر بسبب حالة خليفه....اللي تقبل اخيرا ان ربيعه..وحبيبه....سيف...خلاص توفى وما بيرد....
الجزء الواحد والثلاثون
رجع خليفه بيتهم وهو منهار وتعبان كليا...كان الوقت في الليل....والبيت هادي وكل حد فحجرته...وحمد ربه على هالشي..صح متوله عليهم لكن وفاة سيف غطت على أي شعور ثاني...دخل حجرته وقفل على عمره..وعلى طول دخل الحمام وتسبح بماي حار...وبعدها عق بعمره على شبريته..وعلى عكس اللي توقعه..مارام يرقد..كل ماتغمض عينه يذكر سيف...اخر مره شافه يوم سلم عليه قبل مايسافر...كان خليفه ساعتها مظايق بسبب خطبة سيف لحصه... بس هالموضوع مب مهم الحين... الواحد يقدر يحب كذا مره ...لكن مايحصل ربيع كل يوم مثل سيف... وخسارته كبيرة وايد... خذته الافكار ويابته لين ما غمضت عيونه غصبن عليه...من كثر التعب...
بالباجر الصبح اصرت عليهم ام سيف بانها تشوف ولدها...وكانت حاسه ان السالفه مصخت ومب طبيعيه...وحست انهم مغبين عليها شي...لين ما اضطروا يخبرونها عيالها عقب ما تيمعوا عندها ..حاولوا انهم يسهلون عليها الخبر ...بس مهما سووا..ومهما قالوا...يظل الخبر صعب..واصعب مايمكن... انهارت الام مره ثانيه..بس بدون سكته قلبيه ثانية ولله الحمد....ام سيف انسانه مؤمنه...وتعرف ان هالشي قضاء وقدر...وبسبب المضاعفات وتعب صحتها قرروا يخلوونها في المستشفى وقت اكثر...
مرن الثلاث ايام والشباب كلهم والرياييل ماخازوا عن بيت المرحوم.. وخليفه محد يقدر يكلمه من صعوبه مزاجه... ماطاح بيت عمه الا مره وحده عشان يسلم على اخته وحرمه عمه...وشاف نوره بالصدفه... لكن حصه...ماكان يحس برغبه انه يشوفها..مايبا يعزيها..ومايبا يشوف زعلها على سيف...هالشي بيرجعله ذكريات امل يبا ينساه...واول مايخلص واجبه هني بيرجع امريكا وبيكمل دراسته اللي ودرها...
يوم الاثنين كانت نورة مب مداومه ..تبا تقعد مع اختها وتحاول تواسيها.. فبالتالي فطوم راحت الجامعه بروحها..بس فطوم ماحصلت حد يردها..كانت تكلم نورة في التيلفون الساعه اربع العصر..
فطوم: احين شو الحل...؟
نورة: تعرفينها حركات عمتج انتي... اتصل بحمدان..؟؟
فطوم: امرنا لله..وتعالي وياه...بترياكم..
سكرت نورة عن فطوم واتصلت بحمدان...
حمدان: آآلووو
نورة: هلا حمدان..السلام عليك...
حمدان: اهلييييييييين نورة وعليج السلام...شحالكم.؟
نورة: بخير شحالك انته؟
حمدان: والله ماشي حالنا...شخبارها حصه.؟ بعدها على حالها..؟!
نورة: هي والله ياحمدان..عيزت وياها..ويهها وايد تغير من التعب...
حمدان: الله يعينها ان شاء الله...
نورة: آمين...وين انته احين..؟؟
حمدان: انا توني ظاهر من مستشفى توام....كنت عند اخو المرحوم ..خليتهم وييت...
نورة: هيي..اتحسبك قريب...
حمدان: جي شو عندج.؟؟
نورة: فطوم في الجامعه وماعندنا حد اييبها...
حمدان: هممممم...وين دريولكم.؟
نورة: شلته امايه...
حمدان: خلاص بخطف عليها انا احين...
نورة: مابتخطف عليه عشان نييبها..؟
حمدان: ويييييييييين انا احين عدال الجامعه ..وين تبيني اسير بيتكم وارد هني..!!...لالا..انا بييبها وبوديها البيت..
نورة: خلاص تمام...بس قولها انه انا مالي خص..
حمدان: عاد لي يقول باكلها انا...!!..يالله يالله جلبي ويهج..
نورة: ههه اوكي باي
فاطمه من زقروا اسمها تغشت وطلعت ولا شافت السياره عدل.. ركبت ورا على طول وهي مامنه ان نوره يالسه جدام... ابتسم حمدان وماتحرك بالسياره وتم ساكت..بس رد عليها سلامها ... ويوم طول وهو يالس استغربت فطوم...ليش ساكتين وواقفين جي..؟؟؟
فطوم: شو بلاكم..؟؟..يالله روحنا..
حمدان: احم...والله يافطيم..انا مب دريول...يالستلي ورا وانا اسوقبج... صح اقولج شيخه وشيخه بس عاد مب تصدقين عمرج موليه...!!..
استغربت فطوم... وشكت فالسالفه..وايجت من ورا الكرسي لجدام وشافت الكرسي الجدامي فاظي...وشهقت...ياويلي...انا بروحي ويا حمدانوه في السياره...!!!..يالفظييييييييحه...
فطوم: وين نوره..؟؟؟
حمدان: مارمت اخطف البيت واييبها..لانه يوم اتصلت انا كنت قريب من الجامعه الا هني...
سكتت فطوم...زين منه انه خطف عليها ...فظيحه تقعد تتشرط بعد...
حمدان: فطوم يالله ركبي جدام ...بروحي ميت من التعب ابا ارقد....
ما عارضت فطوم...صح قافطه بس متفشله منه بعد..مسكين... نزلت هي وكتبها وركبت جدام.. وتمت ساكته وهي ميته من المستحى... وحمدان بعد كان شوي قافط منها... فتم ساكت هو بعد... خطف على الدكان...ونزل الجامه وكان يرمس ويا الهندي يوم رن تيلفون فطوم ..طلعته من الشنطه وبغت تيها سكته قلبيه يوم شافت " سعيد يتصل بك"... وبشكل لا ارادي مدت ايدها ومسكت ايد حمدان اللي كان يحرها وهو يسولف ويا الهندي... مسكتها هذي كانها تطلب منه انه يسكت.... بس على طول فجته يوم انتبهت لعمرها وبالاخص انتبهت لنظرة حمدان الغريبه صوبها.... كان مرتبك..قافط...وشي ثاني بعد ماتعرف شو هو...كانت تحس انه قاعد يتامل فيها..؟؟ مع انها متغشيه بس كانه يقدر يشوفها من ورا الغشوه...وتيمع الدم كله فويه فطوم من الاحراج...
حمدان حس بقشعريره يوم مسكته فطوم... منعم يدييها...وصبوعها الطويله... واستغرب من شعوره بالحرمان يوم خوزت ايدها... ماكان يعرف شو فيها وليش مسكته ..بس شافها ماسكه تيلفونها اللي يرن ومرتبكه...
حمدان: بلاج فطيم...!!!
فطوم: آآآ... سعيد...سعيد متصل...
حمدان: ردي عليه انزين...
فطوم: بيسمع حسك....بيقولي شو تسوين ويا حمدان وبيسويلي سالفه عوووده...!!!
تامل فيها حمدان....وخذ له وقت يفكر شوي...حس ان فطيم ممنوعه عليه....في هاللحظه تعلقبها زياده...على قولتهم كل ممنوع مرغوب... احين فطيم زايغه من ردة فعل اخوها اذا درا انها قاعده مع حمدان...!!..عيل ليش فطوم تطلع جدامه..؟؟ وتاخذ وتعطي وياه بالكلام..!!..صح خذت وقت وايد لين ماتعودت عليه..بس..اذا كانوا اهلها مب راضين بهالشي...وهي تدري ... ليش تطلع له...؟؟؟ ...مهما كان الجواب...ارتاح حمدان من هالناحيه...هالشي يعني ان فطوم مرتاحه منه...وتعودت عليه....عاد مثل اخو ..مثل ولد عم ..اي شي...كيفها...المهم التقبل...اهم شي... اما الشعور عقب يتغير مع الظروف.... وعرف حمدان ان اللي بينه وبين فطوم تخطى السوالف والمزح والمغايظ... وبشكل غريب استانس وايد من هالفكره.... كل هذا التفكير خذ منه ثواني..اشر على الهندي عشان يسكت ويصبر..وصد صوب فطوم وقال..
حمدان: خلاص بنسكت...رمسيه...
توترت فطوم وهي ترد على سعيد...
فطوم: آآلوو...!!
سعيد: شوو هذا...!!..ساااااااااعه لين ماتردين على التيلفون..!!
فطوم: اهلين سعيد...سوري كان في الشنطه وماسمعته... محطوط عالهزاز..
سعيد: شحالج..؟؟؟.
فطوم: الحمد لله شحالك انته وشحال الاهل كلهم..؟
سعيد: بخير الحمد لله... شخبار نواري..؟
فطوم: تشقح...ماداومت اليوم..؟؟
سعيد: ليش..؟؟تعبانه ؟؟؟ شي يعورها..؟؟
فطوم: يالله يالله...يالاهتمام...!!..لا مافيها شي بس تبا تقعد ويا حصه...تواسيها شوي
سعيد: هي حصه...الله يعينها...شو حالها.؟
فطوم: هممممم شو اقولك.؟؟ ساكته...ماترمس...ماتسوي أي شي غير الصلاة والقرايه...
سعيد: مسكينه والله ..الله يعينها.... سمعي...انتي وين..؟؟
ارتبكت فطوم اكثر...
فطوم: انا في السياره...سايره البيت توني يايه من الجامعه...
سعيد: ويا الدريول....؟
فطوم: هي ..الدريول ووياه البشكاره بعد...
سعيد: هيي....انزين سمعي قولي حق نوره تشيك ايميلها...عنبو مطرشها ثلاث رسايل ولا ردت على وحده منهن....!!
فطوم: اووووه اووه.... ثرها بينكم رساااااااااايل ومكاتيب ..!!.. من ورانااا..؟؟؟
سعيد: اوووووه ثرج ماتدرين انتي بالسالفه.... اياني وايااج تقولينها لحد...
ابتسمت فطوم...لانه حمدان صار يعرف بعد والله يعين نوره على التغليس...!!
فطوم: انزين مابقول لحد...وبخبر نوره تشيك ايميلها....سلم على قوم امايه...
سعيد: يبلغ ..وانتي سلمي...فمان الله
فطوم: مع السلامه..
سكرت فطوم التيلفون...
فطوم: اوووووووووووووف الحمد لله..... سلمت...
حمدان: عنبووو ما بغيتي تخلصين داقه سوالف وهالمسكين يتريانا...( وصد صوب الهندي) هاا...جيب اثنين بيبسي... واثنين تويكس...جلدي...(بسرعه يعني بالهندي)....
ويوم سار الهندي رد صد صوب فطوم..
حمدان: شو سالفه الرسايل..؟؟
فطوم: ههههههههههه مهددني سعيد ماقول لحد...
حمدان: قولي عاد عرفت نص السالفه انا...
فطوم: ههههههههه سعيد ونوره بينهم رسايل وايميلات....بالنت..
حمدان: ههههههههه لا والله...مب هين سعيد...برايها انزين خطيبته...
فطوم: واذا قلت لك ان هالسالفه من قبل الخطووبه...
حمدان: حلفي...!!!
فطوم: هههههههه والله...انا متاكده...لانه يرمس كانه متعود على سالفه الرسايل ..ومتكتمين عليها من متى....وهو ماخطبها الا من كم يوم ..متى واحا ياخذ ايميلها..؟؟؟
حمدان: عنلاااتهم زااد....مب هينين اثرهم....
ياب الهندي اللي طلبه حمدان ودفعوله وروحوا....
فطووم: لا تخبر حد اوكي...؟؟ عن سعيد ونوره...
حمدان: من عيوني....
سكتت فطوم...وقفطت زياده...
حمدان: يقولون يعلهن سالمات.....
فطوم: انزين يعلهن سالمات ماقلنا شي...
تموا ساكتين لين باقي الدرب..وكل واحد تاخذه الافكار وتيبه...يوم وصلوا البيت عقب فطوم غشوتها وتحجبت...يوم شاف حمدان ويهها فز قلبه ودق بشكل غريب طبيعي...وبين هالشي على نظراته وويهه....مب قادر يغبي...نزلت فطوم من السياره وهو يطالعها..وارتاح لانها ما تحط مكياج في الجامعه....
فطوم: مابتنزل..؟؟!!!
حمدان: لا...فديت وحده انا بروح الوي عليها....
قال هالجمله بتمتع....ومبتسم....بطلت فطوم عيونها وبحلقت فيه وهي منصدمه.....تتوقع أي شي من حمدان.....
يوم شاف ملامحها توسعت ابتسامته اكثر...
حمدان:...مخدتي...!
ظحكت فطوم وشكلها ارتاحت...الشي اللي خلى حمدان يتاثر اكثر....شو صاير فيني اليوم...لايكون التعب ماثر عليه...!!
فطوم: حسبي الله عبليسك... انزين روح ارقد...مبين عليك تعبان....
حمدان: هي والله اني منهد مووووليه..... وفاة سيف الله يرحمه ماخلت فينا قوة...
فطوم: الله يرحمه...وتصبر اهله واحبابه...
حمدان: آمين..سلمي على حصه...والله خاطري اشوفها اروحي بس مايصير بعد...
فطوم: بوصللها كلامك...مشكوور عالتوصيله تعبناك...
حمدان: افااا يافطيم...لا تعب ولا غيره....يوم ماتحصلين حد اييبج اتصليبي سيده وبييج مب لازم تتصلين بنوره ونوره تتصلبي ...شغله...
وابتسم.... كان يمزح...مايعني كلامه...بس طبعا مابيمانع اذا اتصلتبه فطيم...بالعكس بينور التيلفون باتصالها... بس فطيم ظحكت...
فطوم: ههههههههههاي...ده بعدك...!!...مستحيل اتصلك.. خل عنك هالسوالف....على العموم مشكور والله ماقصرت ....
حمدان: هههههه ويا ويهج...شلي شلي بيبسيج والتويكس... ويالله دخلي داخل البيت...
فطوم: بسم الله كيف يظارب.....يالله فمان الله..
حمدان: مع السلامه..
دخلت فطووم البيت وهي تحس بفرح غريب...وعاطفه مب فاهمتنها...منظر حمدان وهو تعبان...وفكره انه بيروح يرقد...خلتها تتخيله كيف شكله وهو راقد..!.. وهالتخيل خلاها تحس بعطف وحنان عليه...كانه ياهل...دايما كانت تشوفه حيوي ونشيط وخريش ماشاء الله...بس اول مره تشوفه تعبان...وفيه رقاد...انتبهت لعمرها ولافكارها...انا شو ابا فيه افكر بحالته تعبان والا صاحي...!!.. شو لي من الحايه...؟...اول مادخلت حجرتها دخلت وراها نوره على طول...مسكتها من ايديها الثنتين وقعدت اطالع فيها..
نورة: هاااا...صاااحيه..؟؟؟ كامله والا شي ناقص فيج...!!!...الحمد لله كامله...
فطوم: شووو...بلاج يالخبله...!!
نورة: خفت حمدان سوابج شي ورديتي ناقصه ايد والا ريل...
فطوم: هههههه حرام عليج...
نورة: اللـه اللــــــه.... حرام عليج اون....بدينا نحس..!!
فطوم: حسيت فعينج عن هالرمسات الماصخه....تعاااااااااالي انتي صدق....مسوده الويه...
نورة: سوري والله حمدان كان عدال الجامعه وماطااع يرد البيت عشان اسير وياه...
فطوم: ماقصد هالسالفه انا.....شو سالفه الايميلات...؟؟؟
ورصصت فطوم عيونها...ارتبكت نورة..
نورة: أي ايميلات...!!!
فطوم: أي ايميلات هاااا....اللي بينج وبين خطيبج...
يلست نورة عالشبريه...
نورة: آآآآآآآآآآيه ياحلات هالكلمه ....من متى وانا اتمنى اسمعها...خطيبي...فديته متى بيستوي ريلي...
فطوم: اندوووكم انتووو.... لا تغيرين السالفه.... ليش ماخبرتيني ان بينكم ايميلات..؟؟؟
نورة: مادري بصراحه ماشفت لها داعي اخبرج...
فطوم: وانا اقوول ياربي...وايد مستوييين هاديين انتي وسعيد من عقب ماتراضيتوا...ولا حد منكم يسال عن الثاني... ثركم تعرفون علوم بعض وتسولفووون عالنت...
نورة: اللي يسمعج يقول داقين سوالف اربع وعشرين ساعه.....رسالتين والا ثلاث في الاسبوع بس..
فطوم: بس..؟؟؟...انزين...اتصلبي سعيد...ويسلم عليج...ويقولج شيكي ايميلج مطرشلج ثلاث رسايل ولا رديتي على وحده منهن...
نورة: فدييييييييييته...بس مقطوع النت عندي...ومب رايمه ارمس حد عن النت عن يمدووون لي لسااان...مالهم بارض بسبب اللي صار...
فطوم: هممممممممم... نورة...نحن لازم نطلع حصه من اللي هي فيه...والله البنت بتمرض شي بيصير فيها...الكبت هذا مب صحي ...لازم تفرغ...
بان الزعل على ويه نورة...يوم تذكرت اختها وحالتها...
نورة: عمري ماتخيلت ان هالشي بيصير لحصه...وانها بتوصل لهالدرجه من الزعل....مادري ماكنت احسها تحبه لدرجه الجنون يعني عشان ما تقدر تتخطى هالشي...
فطوم: ماعليج انتي...السكوتي لوتي... وبعدين احس ان سيف ينحب ...ولا تنسين انه ريلها... تلقينها زعلانه عليه وعلى نفسها بعد....ترملت وهي في هالسن....
نورة: شو نسوي يعني..؟؟ يوم هي تكلمنا كانه ماصار شي... بس كل شي ينشاف فعيونها وفويهها اللي ذبل... حالتها النفسيه زفت...واحس انه ماشي مصبرنها غير صلاتها وقراتها...
فطوم: مااعرف....بس لازم نحركها من داخل....نخليهاتحس وتصيح....صدقيني بتتغير من بعدها وشوي بترتاح...
نورة: غسلي ايدج مني... ما اقدر اسوي جي باختي...صح قلبي يعورني عليها الحين....بس ماتحمل اشوفها تصيح..
فطوم: مسكينه والله....المهم احين شو بتسوين برسايل سعيد..؟؟
نورة: آآآآيه فديت سعيد انا وطوايفه....باجر في الجامعه بسير اللاب وبشيك ..وبطرشله رساله من هناك...
فطوم: تمام... يالله قومي طلعي عني خليني اتسبح واصلي وبيييج عقب...
نورة: طالع تروغني والله...
فطوم: هي يالله قومي طلعي برا....
ظحكت نوره وطلعت من حجرة وشافت امها توها داخله ...
نورة: هلا امااايه....ييتي..!
ام خالد: هي بنتي...ييت...حد ياكم في البيت..؟
نورة: لامحد يانا...انتي وين سرتي شليتي الدريول وخليتي فطوم حليلها في الجامعه اروحها..
ام خالد: واابووويه نسيييتها نساها الموت حليلها بنت هلال...سيري قولي للدريول يروحلها...
نورة: لا خلاص اكيه يت..
ام خالد: منو يابها.؟
نورة: آآآ... انا سرت ويا حمدان ويبناها...
ام خالد: وابوي عليج انا...وشحقه ماتسيرين ويا واحد من خوانج....؟
نورة: خواني ماعندهم تصاريح امااايه...مابيدخلونهم... المهم انتي وين كنتي.؟
ام خالد: والله يابنتي كنت عند هالمسكينه اللي تصيح ولدها ليل نهار...
يلست نورة عدال امها....
نورة: ام سيف..؟؟..متى خبروووها..؟؟
ام خالد: خبروها امس.... مسكينه حالتها ماتسر بس متصبره شو بتسوي يعني...!!
نورة: حليلها...الله يعينها.... على الاقل الام تصيح...الا حصه لين الحين مب عارفين شو نسويبها...!!
ام خالد: آآآخ واعلييي على بنتي...والله انها حالها ماتسر لاعدو ولا صديق....بس الله بيسهل امرها وبيريح بالها ان شاء الله...
نورة: آمين...امايه قوم عبدالله متى بيردون امريكا..؟؟
ام خالد: والله اظني هاليومين...جان مب باجر مايندرا...مايرومون يتاخرون..
نورة: هي صح...حليلهم.....
ام خالد: برايج انا بسير ابدل ثيابي...
دخلت ام خالد وخلت نوره بروحها في الصاله... وهي تفكر فحالة اختها...وكيف تقدر تساعدها....فجاه خطرت فبالها فكره...ليش ماتروح حصه لعمتها ام سيف...وتسلم عليها وتعزيها...يمكن تتاثر بحالتها شوي وتتخطى الازمه....!!!...وقعدت تفكر فيها اكثر وبالاحتمالات اللي ممكن تصير...لين مايتها فطوم...وخبرتها بالسالفه..وشجعتها فطوم وقالت لها مابتخسر شي بالمحاوله...وركبن فوق عند حصه...اللي كانت منسدحه على شبريتها وتجلب في تيلفونها...كانها كانت تشوف المسجات او شي جي... عورتهن قلوبهن عليها...حصه يوم شافتهن نزلت التيلفون واعتدلت في يلستها...نورة وفطوم ين ويلسن عدالها عالشبريه..
نورة: شو تسوين؟؟؟
حصه:..........ماشي...
فطوم: اقول حصيص...حمدان يسلم عليج وايد...يقول وده يشوفج بس اون مايصير...
ابتسمت حصه ابتسامه خفيفه...
حصه: الله يسلمج وياه من الشر....
نورة: اقول حصه... امايه توها يايه من عند عمتج...
رفعت حصه عيونها باهتمام....
حصه: والله...شحالها.؟
نورة: خبرووها بالخبر امس....ومسكينه تصيح وتعبانه بس متصبره..
نزلت حصه عيونها
حصه:....مسكينه...الله يعينها...
فطوم: ليش ماتسيرين لها تواسينها وتسلمين عليها...؟؟؟
حصه: ياريت....بس مايستوي اظهر من البيت... ولا اظهر جدام أي ريال غريب..
نورة + فطوم: ليـــــــــش...!!!
حصه: ........... لازم اقضي العدّه ...
تلفتن فطوم ونوره لبعض..وتذكرن هالشي...انها لازم تقضي العده اربع شهور في البيت....يعني مافي امل تروح حصه لعمتها في المستشفى... الا جان عمتها تفتكر وتي تسلم على حصه وتعزيها وتعرف انها في العده ومايستوي تظهر...اكيد بتي تسلم عليها....ولين ماتزورهم العمّــه... بيتريون وبيشوفون شو بيصير بحالة حصه....
