ماكو احد يستاهل
New member
- إنضم
- 7 يونيو 2009
- المشاركات
- 143
- مستوى التفاعل
- 0
- النقاط
- 0
قصص رومانسية عن الزوج الخليجي
فى على كثير من المتزوجات منكم حاجة الزوجة لتعبير او همسة اوحتى نظرة حنان ورومانسية من زوجها العزيز
لكن ساعات تكون هالحاجة اصعب من لبن العصفور وابعد من المريخ بسبب طبيعة بعض ازواجنا... وعزة نفسهم اللي تخليهم يعتقدون ان التلميح بالحب هو ضعف وتصغير من قدره
وانا بصراحة ما الومهم... الوم سياسة (عيب ويا خزياه)اللي خلت رياييلنا مثل الثلج
صديقتي زوجها سافر لدوره في عمله وطقتها الرومانسيه وتروح وتحط له ذيك الهديه اللي تعبت بتغليفها وتحط له بكل بدلة رسالة وورد مجفف وتقعد المسيكينة
على أحر من الجمر تنطر ردة الفعل والكلام الحلو اللي بيقوله لها الا يوم رجع من السفر وعيونه تتقادح من الشرر لووول.. وزعلان ويقط عليها كلمة خلت الدمع يكور بعينها
قالها: انتي شمسوي؟؟ خليتي ربعي يتطنزون علي كل ما ألبس بدلة القى فيها أوراق طايحة منها وقالوا شفيك صاير جنك عامل بلدية
******
في ولادتي الاخيرة ياني نزيف وجلطة وبعد الولادة نمت في العنااية
والدكتور يقول حق زوجي: اذا تحب زوجتك انسى الاطفال اقل شي 5 سنوات لين تستقر حالتها
يوم بديت اصحصح من البنج وكنت اتالم من العملية والنزيف والقاه فوق راسي
وبكل رقة قال: قولي اميييييين
عاد انا فرحت قلت اكيد بيدعي لي ان الله يعافيني واني ازوج بنتي او ان الله يخليني له
قلت انا: امييين
قال: جعل ما تدور السنه الا انتي هني في هالغرفة يايبه بيبي ثاني
قلت: ياخي اصبر على الاقل لين يطلعوني غرفتي.. ليش تدعي علي وانا في العناية تبيني السنة الياية فيها
******
ريلي حددددده مايتحجى ولا يعلق ولايقول شنو يبي ولا يقول شنو عاجبه او مو عاجبه كلش
جم مره اصبغ شعري.. اصير شقرة والا اصبغه احمر والا اسوي تان ويصير لوني برونز ولا يأثر فيها ابدا
حددده لا تعليق
ودايم اقوله اقص شعري؟ اقلد هالحريم يمكن يحس
يقولي لااا لا تقصينه ولا بزعل عليج.. وهو شكله يقلد الرياييل بهالكلمة لوول
ورحت اقصه.. وخليته قصير حيل وسويت هاي لايت وطوول الطريج للبيت وانا متحمسة واقوول بقلبي انشالله مايزعل لاني قصيت شعري
يوم وصلت البيت والا القاه بالصالة يشوف التلفزيون وشافني وسكت
قلت اكيد الحين الاخ زعلان
والا طلع مو منتبه لشعري ابدا
جان اطنقر عليه وسويتله فلم هندي وزعلت وقلت له الحين انا كل هذا اسويه لك وانت ماتحس
يعني انا اتزين لك انت داقرني عيل ليش الخساير على واحد ميمدح حتى لو بالجذب
ليش ماتقول رايك؟؟؟
وعقبها بجم يوم كلمني وانا بره البيت وسأل ويني وقلت له بالصالون
اول مادخلت من باب البيت والا القى زوجي يقول: شهالزين شهالحلاه
واطير اركض للمنظرة واشوفي ويهي والا جلحه ملحه والكحلة سايحه والشعر مدهن
وارجع له وانا ماني مستوعبه
قال لي بصراحه نيو لك مره حلو
ابو الشباب مستمر في النصب
قلت شتقصد اي تغيير؟؟
جان يقلب لون ويهه وقال انتي يايه من وين؟؟
قلت له الصالون
قال محلوه شنو سويتي؟
قلت له ولا شي.. بس رايحه اشتري من الصالون كريم للشعر
جان يندقر دقره مو طبيعية وراح الحمام لوول
******
مرة قلت بسوي حق ريلي ليلة واشتريت شموع وحطيتها بالغرفة وطفيت الليتات
لما دخل قاللي: شنو الكهربا طافية؟؟
قلت بقلبي: هذا وين والرومانسية وين
جان ارقعله السالفة واقوله: لابس كنت قاعده اجرب الشموع اذا يشتغلون والا لا
(حشى جهاز مو شمعة لووول )
و وحدة من رفيجاتي كانت بتسوي ليلة وحطتله شموع والا يدخل ويقولها: الله يهداج خنقتينا بثاني اكسيد الكربون
(الاخ مدرس علوم)
ومن يومها تابت تسويله جو رومانسي لوول
******
وحده اعرفها كانت توها والدة والا يجابلها ريلها ويسألها ليش الولد حلجه يخرع؟؟
وليش اسود؟ وماخلى شي مو زين ماقال فيه
تالي جان يقولها: مو جنه يشبهج؟؟
تقول مت من البجي وانا بالنفاس
******
حبيت اعترف لكم بشي خطير بعد 14 سنه زواج قالي زوجي انا احبج
قالها وشفايفه ترتجف ويالله طلعت منت.. مادري ليش كان خايف يقول
******
