قصتي الحقيقيه مع المرض .. تابعوني وادعولي قصه خاصه فيني (ام كتكوت)

[ام كتكوت]

السلام عليكم ...


اول شي اشكر كل البنات اللي تابعوني بالقصه من البدايه وسامحوني انتقلت اهني لان طولت عليكم وزحمت على الموضوع الاساسي

هذي قصتي المريره مع المرض ... والشلل والمعاناة الله لايعوده ... بعد ولادتي الاولى ولاتنسوني من دعواتكم ..

واتمنى تتقبلون الاجزاء بصدر رحب ولاتتضايقون ولاتخافون ترى انا حالتي غيييييير مو تقولون ام كتكوت خرعتنا والله يهون على كل حااااااااااااااامل يارب :tek:


بسم الله الرحمن الرحيييييييييييم


الجزء الاول

انا بقولكم قصتي المريره اللي لمن الحين اعاني منها من 4 سنوات عمره وليدي

اول شي الحمدلله بعد سنه و8شهور من زواجي حملت في بجري واستانست وايد

طبعا اول 4 شهور تعب ونساة وحارج ونساة فظيعه فظيعه فظييييييييييعه مستحيل وحده بالدنيا كانت تتنسى مثلي

ورب الكعبه حتن الماي كانت تلوع جبدي منه تخيلو

تنسيت بريلي وقعدت بيت اهلي شهرين وغيرنا الشقه تخيلووو والسبه نساتي

حتن شكيت ان فيني توأم

المهم بعد الحارج والنساه مازالت مستمره لمن يوم الولااااااااااده

رحت الصباح حسبي الله عليهم كان مافي سرير واشوف هنديه داخله وهنديه طالعه

مصريه طالعه وسوريه داخله

وانا

زوجي طار فيني م.الراشد (حسبي الله عليه ونعم الوكيل )



ابتدت قصتي لاتباعدون ...............


اول شي الحمدلله دخلت غرفه الولاده الحمدلله مافيني الا العافيه بس مجرد طلوووق وهذي حاله كل والده

عوار موطبيعي ... تميت نص يوم بس مفتوحه 4 سم

طووولت وكالمعتاد قالو لي الياهل قل نبضه

وقعنا قيصريه وولدت الحمدلله ثاني يوم الفير ويبت ولد الحمد لله


بس هالولد طلع من عيني استغفر الله يارب

:0bee2e8d89:



:0bee2e8d89:


اكمل

طبعا نسيت اقول قبل لا ايني طلق بيومين كنت بعرس ومن يومها وانا مومترقع وولدت قبل موعدي باسبوعييييييييييييييين يعني تو الناس


المهم

عقب الولاده بيوم

حسيت بعوار صوب قلبي ماقدر اتنفس

ولمن اتنفس يعوووووور يعوووور تعرفون لمن الوحده يكون فيها هوا او ريح شلون يغز ؟؟؟؟؟؟؟؟؟؟؟؟؟؟؟

كان قلبي يغزني وايد مادري اشلون اوصف لكم العوار بس تعرفين طول ماانتي واعيه تتنفسين تتألمين

المهم امي حبيبتي تعبت معاي تقول فيج رييييييح ( تبخرت ) ماخليت شبه وحرمل

ماخليت قشور بصل

ماخلينا مره

ماخلينا زيت زيتون وترديد

ماخلينا شيخ مايبناه

ووووووووو حتن شحم الخروف تسبحت فيه

المهم كنت احس بتعب وضعف بجسمي وترجيييييييييع وعذاب والله ماابالغ كل يوم اتشهد من الكوابيس اللي تييني

بعدين قالو الحاس مادري تعرفنوه اللي ايي حق البجر

بعدين لااااااااااا خلاص وصلت ان ماكنت اكل ولا ارضع ولا اشوف ولدي ولاشي

بس نايمه

والناس اتيي وتروح وانا شبه ميته

ليما امي لاحظت ان السالفه صارت صج مو دلع ( طبعي دلوعه )
هههههههههه

المهم زوجي والله كان يزفني يقول انتي تتدلعين وتبالغين ( بس بعدين بجى على هالكلمه )

قال ابوي تعالي اوديج المستشفى اذكر كان يمكن اسبوعين من ولادتي وانا على هالعذاب

وداني الهادي رحت ولا كأني رحت بس لاحظت اني ماقدر امشي ياوييييييييييييييلي جني عيوز عمرها 100 سنه حتن القومه من الكرسي ماقدرت اقوم والله


ورديت البيت بخفي حنين ولاسوولي شي

بس خذو فلوس ع الفاضي

المهم ثاني يوم تمرمرت زوجي وداني العدان تخيلو صافط السياره بعيييييييد ويمشي فيني ع الويل جير بهالشمس(ولدت شهر7)

دخلت بالواسطه لان نشتغل هناك

وانا ناطره ويمي جثه وانا مادري قمت ابجي اقول حق زوجي ياليتني مكان هالميت والله


المهم

سوو لي سونار مابين شي


سوو لي اشعه والصدمه


قالو لي فيه دوائر مبينه معانا ( ماذكر وين)

قالو يمكن اورام يمه يممممممه ماانسى هاليوم

المهم قالو اورام وايد

زوجي قال شنو اورام

وراها الدكتور قال

1 من 3

ياما انها اورام


او غازات

او تجمعات دمويه


تخيلو موقفي بهاللحظه :0bee2e8d89:

وانا توني والده والله وحدي تعبااااااااااااااااااانه غير السخونه اللي ماتخليني انام بالليل من الكوابيس

درجه حرارتي توصل 40 ماتنزل

والكمادات 24 ساعه وجهاز الحراره واحد ورا الثاني والثلج اللي مافارق جبهتي


المهم قاله زوجي والحل


قال لازم عمليييييييه فورااااااااااااااااا

شنو عمليه

عمليه شنوووووووو

طار فيني الراشد( مكان ماولدت )

قالهم لازم اشعه نتأكد اكثر


وبالفعل نفس كلام العدان

مو عارفين شنو فيني


((((( تدرون شنو يعني موعارفين ))))))))


يعني بيفتحون بطني مره ثانيه جذي اهما وحظهم اللي يطلع وياهم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!! !!!!!!!


اكمل

 

[ام كتكوت]

الجزء الثاني

طبعا الدكتوره اللي ولدتني(حسبي الله عليها ) وين ماراحت

من الخوف قالت العمليه على حسابنا راح نفتح بطنها ونتأكد شنو اللي في جسمها واصل ليما القلب جهه اليسار

المهم الدكتوره قالت تنويم على طوووووووووووووووووول

رحت البيت جهزت اغراضي وسلمت عليهم (ماشفت ولدي) ولا ادري عنه

ورحنا انا وزوجي المستشفى حجزولي غرفه بالليل الساعه 10 دخلت والعمليه باجر الصبح

حبيبي عمي ابو زوجي ماخلاني يقرا علي طول الليل

وخالتي بعد ماقصرت لمن نمت راحو

وامي حبيبتي قاعده مع وليدي بالبيت

المهم بعد اسبوعين من العذاب

افتحو بطني مره ثانيه (فتح بطن) مكان العمليه اللي مخيطيني تجميلي فتحووووه مره ثانيه


المهم سوو لي العمليه والله زوجي يقول شكلج يكسر الخاطر

بجى بجيييييييييي اول مره اشوفه بهالحال

طلعت واهني الصدمه@@

قالو لي انه دم ( مجهول ) منتشر بكل مكان واصل لي القلب ( شلون مادري )

والعلم من بعد الله اكيد عندهم حسبي الله عليهم وعلى اغلاطهم اللي ماتخلص

وشفطو الوسخ والصديد اللي قدرو عليه والباجي ينطرونه ينزل عبر انابيب

فاتحين بـ بطني 3 قتحات ومطلعين منهم انابيب تنزل الوسخ الله لايعيد ذاك اليوم

غير الدربات والانبوب اللي من خشمي ووووووووو

فقدت دم وايد وايد

تدرون جم واحد تبرع بدمه عشان يعطوني دم المستشفى

7 أشخاص والله

عمي واخوانه 3 وزوج حماتي وزوجي ورفيجه بالدوام

الله يجزاهم خير ويوفقهم

المهم وحرارتي الحمدلله نزلت وتميت بالمستشفى شهرررررررررررررررررررررررر بالراشد على حسابهم

شفت الويل والله عذااااااااااب عذااااااااااااااااااااب ورب الكعبه كل يوم اتمنى الموووووووووت طلعت من النفاس بالمستشفى بروحي انا والخدامه

الكل مل ولاهي بحالته

وانا حتن مااشتهي اشوف زول احد حتن ولدي لي يابوه اقولهم مابي اشوفه

ولا ابي اسمع اسمه

 

[ام كتكوت]

الجزء الثالث

المهم

اكمل
وقبل لا اكمل

الدكتوره اللي ولدتني اجنبيه بس ماعرف شنو اصلها جنه روسيه حسبي الله عليها الخايسه
اسمها يوليانا


المهم الحين وانا بالراشد وايد كنت متضايقه من البربيش مادري الانبوب اللي بخشمي

وانا صابره وساكته قلت حق زوجي متى يشيلون الوايرات اللي على بطني وكل يوم يقول باجر والله تعبت

بس الحمدلله شالو اللي بخشمي بس وبطلعته بغت تطلع روووووووووووووحي حتن زوجي طلع من الغرفه والله يبجي يقول شكلج يكسر الخاطر

المهم عقب اسبوع يه الدكتور قال لازم تنقلونها مكان ثاني (م.حكومي) لان الظاهر كلفت عليهم وايد

فزوجي قال لازم ننقلج لانج مطوله بالعلاج

(اطول من جذي) والله صج صج صج تأزمت حالتي وكنت كله ساكته وابجي وادعي

حتن الخدامه تبجي معاي وتدعي لي وتقرا علي قرآن

حتن رفيجاتي يتطنزون بدل لا ايون يقعدون معاي يقولون رافجتي الخدامه

المهم سوو اوراقي وخلال يومين نقلوني مستشفى اللوعه استغفر الله م. مبارك آآآآآآآآآآآآه

ودوني هناك مثل الجثه كرهت حياتي دخلت شهر 8 كملت شهرييييييييييييييين وانا لي الحين مقضضه وينزل مني وسخ


شهالوسخ اللي ماخلص

وكل مادشت سستر سألتها متى يوقف ونفس الكلام مادري الله كريم

المهم يابولي اكبر الدكاتره على راسهم موسى خورشيد قعد معاي وقال راح نسوي لج جراحه عشوائيه ندخل مصير ببطنج ونسحب الوسخ

شنووووووووووووووووووووو شنو يعني عشوائيه؟؟؟؟؟؟؟؟؟؟؟

قال لان جسمج مايتحمل اي عمليه بعد العمليتيين(يقصد فتح البطن او الجراحه)

تخيلو دخلوني غرفه ونوموني قمت على عواااااااااااااار الله لايوريكم وفشلت للاسف

قالو لازم ننطر الوسخ يطلع بروحه من الانابيب الصناعيه آآآآآه

وهذي حالتي ماتم متدرب ماتمت متدربه كل يوم واحد شكل يغير لي الجيس

والله لاعت جبدي حتن وحده منهم مره بجت علي وهم يغيرون لي الجيس لاني كنت اصرخ من العوار

وغير الترجيع ( الاخضر) اللي لمن الحين اتذكره تطلع روحي وانا اطلعه

اعتقد لونه اخضر من الدوا

يات امي ثاني يوم ويابت ولدي

قلت لها ليش يبتيه مابي اشوفه وزفتني من يومها كسر خاطري وايد والله لميته اول مره بحياتي بس وانا منسدحه (لان ماقدر اقعد كلش)

صارت معاي آثار جانبيه من كثر السدحه وجسمي كله خدر شبه شلل وماقدر امشي كلش وغير اللحم اللميت اللي يطيح من احتكاكات السرير لها اسم طبي ماعرفه


المهم

مرت الايام ومرت الاسابع لاعت جبدي قمت انا افتح الجيس واكب الصديد عشان لمن يجون يشوفونه فاضي يقولون خلاص خف ويطلعوني


قمت اترجى زوجي شوي واحب ريله عشان اطلع وايبلي ممرضات البيت يعالجوني

تخيلو مره قلت لدكتور مصري ارجوك طلعني وقع خروج المستشفى ومستعده اعطيك اللي تبيه امبي مادري شلون قلت له هالجمله بس لاتلوموني كنت مستعده اسوي اي شي بس اطلع : (

كرهت نفسي كرهت المستشفى

كرهت كل شي لونه ابيض

والناس تيني والله جنهم خلاص يتوقعون انا بموت باجر

غير اللي ايون ويروحون مايشوفوني لاني اكون بحاله صعبه ماقدر استقبل

احد

المهم بيوم ...

حلمت حلم وايد زين دقيت على امي ابجي قلتها يمى حلمت كذا وكذا قالت لي ان شالله خير

بنفس اليوم بالليل كان الساعه 2 وانا رايحه تكرمون الحمام دقيت جرس ع الممرضه عشان يودوني تكرمون الحمام
(مؤقت حمام بعدين قمت اقضي حاجتي بقيصريه تخيلوو)

وانا داخله وادوس على واحد من الجياس ويطلع من بطني

تخيلووو

يعني الانبوب كان مخيط في بطني وطلع وااااااااااااااي يذبححححححححححححححح

رديت السرير من الخوف ولا حتن قضيت حاجتي مع اني كنت وانتو بكرامه حصرانه

(( طبعا عفوا طول الشهرين بس بجرد بول بس ))

المهم رديت السرير ابجي ماني عارفه شنو راح يصير؟؟؟؟؟؟؟؟؟؟؟؟؟؟؟؟؟؟؟


المهم بنات رديت نمت وطبعا كل عاده كل يوم بس تغفي عيني تيي الممرضه وتفتح الليت عشان يعطوني الدوا ( بالوريد) كل يوووووووووووووووووووووووووووووووووووووم
اللي على آخر الايام قمت اصرخ بس رحموني خلوني انام
كل شوي
حراره
ضغط
ابره
مسكن
لوعه

المهم

يت جان تقولي يالله ابره وهي تبي تدخل الدوا ولا تطلع الابره من جلدي آآآآآه بس خلاص انا اهني انهرررررررررررررررررت

قمت اصرخ

ماكو دكتور تخيلو نطري الصبح ولازم يعطوني الدوا لازم

حاولو يدخلون الدوا من ريولي ماقدرت

لان ايدي مافي مكان كلها مقضضه كلللللللللللللللللللها

ايدي واصابع ايدي من فوق ليما تحت كلها خلاص الشرايين مادري الاورده ضعفت وماكو مجال

جابو الممرضه الهيد مالتهم الكبيره

قعدوها من النوم ويابوها لي ( انا افكر بالانبوب اللي طايح مادري شصار عليه وعلى الجرح اللي متبطل اخاف اقولهم يغزوني ابره هوا يموتوني)

المهم حاولت تدور بريولي هم ماقدرت

قالت ماكو الا الابهام يمين يسار لقت واحد ودخلت الابره

طبعا ماقدر اوصف لكم الالم وطبعا انتو عارفين الدرب شكثر يتم يعني طول الوقت انا قاعده وابايدي ابره مادري شنو مصيرها بعد وبالاصبع

طبعا ماقدرت انام لان مكان الابره حيل حساس وماقدر اتحرك كل ماتحركت الابره وياي يمين يسار

غفيت شوي ولا اشوف دكتور واقف على راسي يطالعني( مولابسه حجابي)

انا اخترعت قلت له خير دكتور

؟؟

قالي جيت اشوف لج مكان ادخل فيه الابره او السرنجه

المهم شاف مكان اهون من الابهام والله كريم ماذكر كان وين بس اللي اذكره اني بجيت بجي اللي السستر نفسها بجت بعد وكانت كويتيه

حبيبتي

يابت لي مجلات وقصص وكتب دينيه والخ

وكانت تترجاني اشرب الدوا ماعرف اسمه لاني مااكل صاير لي شهرين بس ع الماي والدرباااااااااات

جسمي انتفخ من الماي اللي من الوريد

قلت حق الممرضه الكويتيه فلانه بقولج شي

جان تقولي خير

قلت لها تعرفين الانبوب اللي باليمين؟؟
قالت ايه


قلت لها طاح

طاااااااااااااااح ؟؟؟؟؟؟؟؟؟؟؟؟؟؟؟؟؟ وينه

قلت لها خاشته بالسله

شافته وقالت لي شلون طاح؟؟؟؟؟ قلت لها

وسألتني يعور ؟؟ نزل دم ؟؟ في اغماء ؟؟؟؟؟؟؟؟؟؟؟؟؟؟؟؟؟؟؟؟؟؟؟

لا لا لا

المهم قالت للدكتوره وعلى حضي كان يوم الاربعا

يعني مافي مجال للهروووووووووووب

خميس يمعه مافي راوند = تدوير دكاتره

بس يت دكتوره منفسه

قالت لي مافي مشكله

لازم اشعه مقطعيه انا رفضت

قلت لهم بطلع

باختصار سويت فلللللللللللللم ومناحه كبييييييييييييييييييييييييييره

ورضو يطلعوني بالغصب ووقعت على مسؤليتي مع انبوب واحد غير اللي طاح بلا رده

قالو لي بس لازم ممرضه بالبيت عشان يغيرون الجيس يوميا والدوا اللي بالوريد بس لايتلوث غطيه

انا هني حسيت اني مسجونه وافرجو عني


يالله بنات اكمل بعدين والله تعبت سامحوني باجر بقولكم عن احاد مهمه وتضيق الخلق ( السفر+ الشلل )

-------------



المهم طبعا زوجي بالغصب بالغصب رضى عقب ما بجيت عليه وايييد وترجيته وقلت له انا ولهت على ولدي والله نسيت شكله وملامحه

كسرت خاطره وطلعت بيوم كان حرررررر وكئابه

رديت البيت المهم مر اسبوع كنت وايد تعبانه تخيلو حرارتي ردت ارتفعت وبيوم شالو الانبوب الثاني الحمدلله عقب ماخفت الافرازات والصديد وياليتهم ماشالوه

المهم يوم شالوه مر جم يوم من العذاب والصوم عن الاكل والآلام قعدت من الصبح ولا رييييييييييييحه والله كأنه فار ميت وانتو بكرامه

حتى ابوي بغرفته قايل حق امي شنو هالريحه اخاف البالوعه مطفحه

واخر شي طلع من الصديد اللي بطل جرحي من ريحته وطلع بره

وطارو فيني م.مبارك(السايق والخدامه وامي) زوجي مايدري

ودخلوني غرفه العمليات وخيطو الجرح بس بنج موضعي

ياهو يوم اسوووووووووود بجيت بجي ماتمت دكتوره ماتهديني وماتمت سستر مامسحت على راسي

ماكنت ابجي من الالم

بس ابجي اخاف يردوني المستشفى

المهم حطوني بغرفه الملاحظه المقرفه على ماوصل الدكتور يتطمن على حالتي

لمن يه قالي انتي شمسويه بعمرج؟؟

الجرح حالته صعبه ومحرجه

انا بجيت
قالي لاتبجين لازم علاج

المهم طبعا ماقدر اقولكم تفاصيل العذاب والله نفسيتي تتعب

رديت البيت والحمدلله الجرح ماطلع وسخ لان باليوم مرتين يغيرون لي الدريسينج وقطن وبيتادين وشاش وحاله

(والجرح على فكره مفتوح طبعا ) وفتحته موصغيره )

اللي زوجي هم اللي قام يعالجي ويغزني الابر ويوديني ويجيبني الله يوفقه ويسخره لي

المهم قعدت في بيت ابوي حبيبي والصراحه بيت ابوي نظام امريكي مافيه غرف تحت ومفتوح على بعض والزوار داخلين طالعين وامي حسيت انها تضايقت بس شسوي ماقدر اصعد دريه وحده ولاربع وحده مافيني حيل اروح للغرف الطابق الاول
الا مجرد تكرمون اروح الحمام وارد وخدامتين يسندوني وبس

وبالنسبه لولدي امي وخواتي قايمين فيه ماقصرووو

وتخيلو العذاب اني طول الوقت بالفراش نايمه ماحس باحد من المضادات الحيويه اللي اخذها كل يووووووووووووووووم كل يووووووووم

بالوريد

لمن يوم كنت ابي اتسبح لاني خلاص قطنت تعاونو علي وحطو كرسي تكرمون بالحمام

وانا داخله ريولي خانتني وطحت واااااااااااااااااااااااااااااااااااااااااي تخيلو جسمي ضعيف حيييييييييييل حييييييييييل مافيني قوه كلش وريولي شبه مشلوله لا اكل لا دم لا روح والله بحط ايدي عشان اقول احس اني حاطه هوا

بالغصب تعاونو وشالوني وردوني ماتسبحت

ريولي طول الليل مانمت منهم بس ابجي

ينبضون من الالم لاني طحت طيحه قشره استغفر الله ..

ابوي ثاني يوم راح حجز لي علاج بره وين؟ ( ايران) يعرف دكتور ايراني وايد وايد وايد شاطر كان بالمانيا

اول مايرجع ايران راح اكون عنده عشان يشوفون شنو علتي

المهم بعد جم يوم سوو اوراقي تقريبا كان اخر شهر 9 يعني 3 شهور من ولادتي بالضبط

سافرت انا وابوي حبيبي بروحنا ومعانا ناس (اصحاب الشقه اللي بيقعد فيها ابوي بايران واصدقاء ابوي ومنهم الممثل طارق العلي)

كنت حدي منحرجه من ابوي لان كانت تيني حالات تكرمون ارجع على طول ومااقدر امشي هو اللي يدزني ع الويل جير

وصلنا المطار زوجي ودعني وامي بجت وانا طبعا مناااااااااااحه:0bee2e8d89:

بعدين واجهت صعوبه بالطياره تخيلو حسيت اني مشلوله بنتقل من الويل جير لمن الكرسي ماقدرت لما ابوي قام يترجاني حسيت اني خلاص تمنيت الموت وبعد جهد جهيد مع مساعده (المضيف) <<<<<< فشله
قعدت على الكرسي وطوووووووول الرحله احاتي شلون بقوم وذبحت ابوي بالاسئله وهو يتغشمر ويلطف الجو وابوي غشمرجي حده حده حده بس ادري بقلبه حزن موطبيعي


المهم وصلنا ايران طبعا انتقل عن طريق الويل جير ونزلوني بجهاز من الطياره متحرك مثل الاصنصير

ركبوني سياره خاصه هناك بايران مادري شلون مثل الاسعاف

دخلت مستشفى (خاص طبعا ) يخرررررررع يخخخخخخخخرع يخرع بالثلاث

اهو كشخه بس مادري ليش يخخخخخخخخخخرع والله والممرضات الحريم اللي فيه ( رياييل )

تخيلو انتو ان الممرضه بروحها من غير اي مساعده شالتني من الويل جير وحطتني على السرير وابوي بقق عينه ههههههه لاتعليق

طبعا عنايتهم حلوه

شفت الدكتور الايراني

طووووووووووول

عررررررررض

شايب

جنه امريكي يكلمني ايراني وانا مبطله حلجي كل اللي فهمته ان اسمه محمد وبس

المهم خذو تحاليل وفحوصات وووووو

وطبعا نسيت اقول ان ماقدرت ايب خدامتي معاي (عشان ولدي) فابوي يابلي خدامه حبيبي بس تخدمني هناك

تهبل حياتي هالمره والله ماطلع من جزاها كانت اندونيسيا بس والله ماقصرت معاي بعدين تعرفون ليش

المهم ثاني يوم من الفحوصات يو دكاتره وايد ومنهم هذا محمد الله يعطيه العافيه (رغم انه كان كله يزف )

تخيلو لبسونس حق العمليات ليش يقولون لازم عمليه نفتح بطنها (للمره الثاله )

قلت يالله فتحو يت على هذي

لان بالسونار والاشعه اكتشفو ان فيه وسخ بعد يطلع ولازم يسكرون مصدر الافرازات الدمويه والسوائل الصديديه

المهم نطرت بممر العمليات ساعه ونص (نمت حزتها ) وقعدوني وانا ماعرف ولاحرف ايراني بس كلمه يعور والحين نسيتها بعد

دخلت الغرفه ولا د. محمد مع ولده هم الجراحين ماشاءالله

اشوه الولد تفاهم معاي وقمت اطقطق معاه بالانجليزي:eh_s(1):

قمت اقوله اخاف اموت

يقول ماراح تموتين وراح تردين لاهلج بالسلامه

قلت له عفيه اذا مت قول حق ابوي مشكووووور واني احبه وايد ووووكلام وايد

الدكتور قالي ماراح تموتين ولو متي راح تموتين نظيفه من اللي شفتيه :0bee2e8d89:

استغفر الله يارب اغفر لي

 

[ام كتكوت]

الجزء الرابع

المهم

تخيلو الابو قالي يالله دوخترا عدي من الواحد ليما الخمسه

انا بس اذكر اني قلت واحد قعدت على طراقات الدكتور الولد

اول مافتحت عيني جان يقولي الحمدلله على السلامه يو آر لاااااااااااايف الحمدلله

بس هذا اللي اذكره

دخلوني الغرفه كان الصبح ولا ابوي باستقبالي

بعدين دشو ناس ( ايرانيين ) وااااااااااااايد وايد يمكن 3 عوايييل

وانا منصدمه حدددددددددددددددي ناس تدخل وناس تطلع وانا مالي خلق نفسي وتعبانه

منو هذول مادري لي يومكم والله العظيم

يسلمون علي ويابو لي ورد الدنيا كلها والهدايا ووووووووووووووووووو

وابوي حبيبي تعب معاي وايد وياب لي اكبر دكاتره ايران عشان العلاج الطبيعي

ويحن علي اكلي والله بتموتين وانا مممممم حلجي مخيط ماغير الماي وبس

طبعا تتسائلون عن تكرمون الحمام ترى ماكنت اروح الحمام تخيلو كل 3 أيام مره وحده للتبول تكرمون وبس واصلي وانا نايمه بعد لان ماقدر انثني كلش

المهم يه الكتور الصبح تدرون شنو لقى وهو يسوي العمليه

يقول لقينا بمنطقه الولاده خيوط عمليه لونها اسود

يقول بالكويت مخيطين غلط وناسين خيوط صغيره

حسبي الله ونعم الوكيل

حسبي الله ونعم الوكيل

حسبي الله ونعم الوكيل

حسبي الله ونعم الوكيل

حسبي الله ونعم الوكيل

ويقول خيطنا الجرح والعمليه نجحت والحمدلله رب العالمين

وقال من اليوم لازم تمشين ولاراح يتجلط الدم بريولج وتدخلين بمتاهات (وهذا اللي صار )

المهم نسينا سالفه الخيوط واخيرا سبحوني بماي وصابوووووووووووووون واااااااااااااااااااااي يوم عيد

كان باقي على يوم ميلادي جم يوووووووووووم قلت على الاقل اكون فيه نظيفه

عيد ملادي 29-9

المهم كل يوم تغيير جرح .. ومع الادويه كانت تيني حكه مادري حساسيه من الادويه والخدامه تحك ريولي

وتوكلني

وتوديني الحمام

وتسولف لي وتواسيني

ولمن ابويي قالها تعالي اليوم تنظفين الشقه مارضت قالت انا ماهدها لو اموت

حبيبتي اكسرت خاطري مع اني كله نايمه وهي بروحها تقرا قرآن وتهفف علي

يابولي دكتور علاج طبيعي يسويلي تمارين بالفراش وانا نايمه عشان لاانشل

ويابو دكتور باطنيه كشف علي وقال الحمدلله الجرح بخير تقدر ترد الكويت

ويه اليوم اللي برد فيه الكويت تخيلو صار مقلب ماذكر شلون بالضبط بس بالرده راح اكون ابروحي لاني انا طلبت ارد ابجر من الموعد اللي ابوي حاجز

وماتحمل اقعد بعد اكثر...................

ابوي قال ماقدر اهدج بروحج


وكالعاده سويت مناحه ورضى ارد

خلصت باقي الاجرائات بالمستشفى وعطوني تقرير حق الكويت شي حق الدوام واجازه ومن هالقبيل بالايراني مترجم انجليزي

والحساب ولا الفاتوره طلعت بالملايييييييييييييين طبعا ايراني ^_^ يمكن 6 ملايين طبعا ابوي لاخلا ولا عدم مستعد يدفع البلايين قالي هالكلام واحنا رايحين المطار
كان بالليل

المهم وصلنا المطار عند المواقف وابوي يدزني على الويل جير وانا حاطه مخده تحتي (عشان لمن اقوم اسهل لي ) شفتو لاي درجه ضعفي اللي ماقدر اقوم على حيلي من على الكرسي؟؟؟؟؟؟؟؟؟؟؟؟؟

المهم ابوي انشغل شوي وعطه رفيجه يدزني (المترجم الايراني)

آآآآآآآآآآآخ قدر الله وماشاء فعل وهو يدزني


: (



: (




: (









: (



طيحني من ع الكرسي

طحت طحت

وريولي تعورت وايد المهم تيمعو علي الايرانيات شالوني وعلى فكره هذي ثاني مره اطيح بالشارع نسيت اقولكم

وبسرعه بسرعه دخلت عشان لاتطير الطياره عني:eh_s(2):

ابوي ضايق خلقه بغى يكنسل يقول شلون راح تتصرفين وانا قلت له مومشكله

دخلني لمن الطياره ودق على زوجي على اساس يستلمني من الطياره بالكويت

المهم دخلت الطياره بروحي ابي اقوم مااقدر شصااااااااااااااااااااااار


المهم ييت بقوم من على الويل جير ولا مااقدر(على فكره انا ماكنت لابسه شي في ريولي تكرمون لاجوتي ولانعال ولا حتى اي شي يعني حااااافيه)
حاولت اقوم ماقدرت ( حسيت اني مشلوله ) :eh_s(12):

نزلت راسي اشوف اريولي (لاني بلحظه حسيت انها مشلوعه ) !!!!!!!!!!!!!!!!!!

اشوفها ولا كلها مزلقه ومشققه كلها دم وانا مالاحظت لان لابسه عبايه(مانتو طويل)

اطالع عدل ولا لاااااا الجروح وايده قمت ابجي

جان ايني مضيف

قالي بالانجليزي شفيج قلت له موقادره اقوم

قالي حاولي...

قلت له مااااااااقدر قالي مسكيني وقومي قلت له مااقدر

قال الحين راح تطير الطياره ومستحيل تتمين على الكرسي المتحرك ممنوع

ياربي انا وحيده بروحي و موقادره اتصرف ولا استغيث باحد

وكلهم رياييل والله ...... التفت يمين ... التفت يسار .....التفت وره مثل المينونه ادور حرمه

ماكووووووو جان ابرطم وابجي مثل الياهل

وادعي ربي يعطيني القوه عشان ارفع نفسي واوقف ولا اتفشل بين الرياييل يلمسوني

قريت آيه الكرسي 3 مرات وانا مغمضه ...... فتحتها

ولا اشوف الناس تيمعو علي




المهم المضيف قال خلاص يااختي لازم نرفعج لان وايد تآخرنا


توكلت على ربي واستغفرت وحاووووووووولت حاولت اني اساعدهم بس للاسف هم رفعوني وحطوني على الكرسي حسبي الله ونعم الوكيل


تخيلوني وانا بالطياره بروحي محد يمي وريولي مجرحه وافكر شلون بنزل لا لا لا شلون بقوم وبقعد على هالويل جير مره ثانيه


المهم طارت الطياره وانا ابجي وابجي وابجيييييييييييييي بجيت لمن حسيت ان اللي قاعدين وراي تأذو مني : (

ناديت المضيف قلت له شوف


انا طحت بالشارع على ريولي ( والحين موحاسه فيهم ) شلون راح انزل ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

قالي لاتفكرين راح تنزلين بخير بس عطينا رقم احد عشان نكلمه

المهم ودقو على اسعاف الكويت وزوجي مايدري

عطيتهم رقم اخوي ولمن وصلنا دشو الاسعاف الطياره التفت ادور احد اعرفه ماكووووووووو

المهم بالغصب شالوني ونقلوني الكرسي وكنت ابجي واترجى اللي يدزني اقوله شوي شوي لاتطيحني ارجووووووووووك

وهو يقولي انا مومسرع لاتحاتين

بس احسه شوي يسرع ابجي اقوله لاتسرع اخاف اطيح ( ومن هاليوم تعقدت من الويل جير) ومن الطيحات

وانا بالممر استقبلوني الاسعاف ودوني طوارئ المطار سدحوني وشافو ريولي الثنتين مزلقين ومجرحين وايد ( من الشارع )

قالي رفعي القدم عشان ننظفها ونعقمها ونلفها

يايه برفعها ( ماقدرت )

قلت لهم ابي زووووووووووووووووووجي دقو عليه < ميته بجي


ابي زووووووجي .......... ابي زوجي

عطوني تلفون دقيت عليه قال كا أنا بره

المهم ابوي كان مكلمه والحمدلله زوجي قوي جدام المصايب ماشالله عليه

قام يقولي اشفيج وقلت له اني طحت

المهم رحنا اقرب مستشفى مع الاسعاف م. الفروانيه...........

تخيلو اول مادخلت الاسعاف حاولت احرك ريولي ....... تدرون احس ان ريولي مقطوعه مو موجوده على ساقي

يعني مافيه كلش ولا احساس ولا شي ولاشي

انشلييييييييييييييييييت


قمت اصرخ بالاسعاف عطوني ابره قمت اهلوس

وين ريوووووولي


المهم وصلنا المستشفى ودخلوني مكان سولي كشف واخوي ويه اصفر من الصدمه

وزوجي يقرا علي قرآن وانا مغطيني مثل الجثه عن الرياييل

دخلت غرفه كلها دكاتره

مالهم خلق

سألوني جم سؤال

حركو ريولي اليمين ماتتحرك

وديها يمين ؟؟؟(ماقدر)

وديها يسار؟؟(ماقدر)

طيب رفعي القدم فوق ( ماقدر)

انزين دوسي لي تحت جنه بتدوسين بريك ؟؟؟؟ (مااااااااااااقدر ماقدر)

ليش ؟؟ شنو السبب ؟؟؟ مادري ........

المهم جبسوها لي لان سوو لي اشعه طلعت ريلي سليمه مافيها حتن شرخ مو بس كسر وكل عظامي سليمه ومجبوره

بس شالمشكله!!؟

مادري!!

يمكن اعصاب شي ثاني مادري ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


المهم الحين وين رحنا


رحت شقتي مع الاسعاف

دخلت غرفتي النوم

دخلت بدون ولدي

بدل لا ارد من بيت ابوي من النفاس

رديت مشلوله ... مقضضه .. مشقوق بطني من الوريد الى الوريد ... تعباااانه حدي:0bee2e8d89:

زوجي دخل الغرفه قلتله فلان خليني بروحي شويه بليز


طلع وسكر الباب :.........!!!

اشوف ريولي مجبسه ثقيله ماقدر احركها كلش وفوق كل هذا تعورني وايد وايد وتحكني موووووووووت

افرفر بحكها ماقدر



:0bee2e8d89:






:0bee2e8d89:

 

[ام كتكوت]

الجزء الخامس


وانا بالدار ناديت زوجي اسولف وقلت له عن كلللللللل شي ضاق خلقه وقالي ميخالف حبيبتي المهم ان جرحج انجبر وريولج كلها جم شهر ونفتح الجبس وتطيبين

((((((((كلها جم شهر))))))))))))) >>>> قعدت هالجمله ترن في اذني

والله صج حسيت اشكثر الانسان بلحظه يكون ضعيف ذليل لاحول ولاقوة له

ياربي ياحبيبي ارحمني برحمتك الطف فيني واقعد ابجي وزوجي يهديني كسر خااااطري

المهم ردت روحي من شفت وليدي ولهت عليه اول مره احس بهالاحساس وليدي صار عمره 3 شهور .. كبر وانا بعيده عنه

الحمدلله رديت بيتي رغم اللي صار بس يم وليدي وزوجي المسكين اللي انظلم معاي ... وانطفت فرحته بالولد المنتظر باللي صار لي

والله ما حسيت بطعم الامومه

لاني ماشوف هالضنى ولا ارضعه ولا اناغيه ولا حتن نطقت باسمه ودلعته

ولمن طهروه ماشفته .. ولا اعرف شكل بسمته وضحكته وملامحه

(الا من وخيتي جزاها الله خير صورته بس عقب سنتين شفت الصور تخيلو )

المهم


الممرضات كانو كل يوم ايون يشوفون الجرح ويعقمونه لمده اسبوع ياو بيشيلون الغرسزهذا اليوم الاسود اللي ماانساه

لوعت جبودهم من الحنه والصراخ .. صراخ الالم واللوعه والقههههرررررررررررررر


المهم تعلعلت بعيشتي ( بالنسبه للحمام تكرمون ) زوجي شره لي قيصريه اقضي حاجتي فيها ...

واتسبح بالفراش .. عن طريق فوط يمسحون جسمي فيه و( ريولي مجبسه ) وووواي شعور مو حلووو

آكل بالفراش


اصلي بالفراش


اقرأ بالفراش


اسولف بالفراش


استقبل الزوار بالفراش


اسوي علاج طبيعي بالفراش

زهقت

طقت جبدي

تمنيت الموت

وفي يوم كان يوم عيد ميلادي ياو خواتي عندي ويابولي كيكه حبيباتي وهدايا بس والله هم قاعدين بالصاله وانا بالغرفه بروحي مابي اشوف احد

راحو والخدامه تقولي ماما مابتشوفين الهدايا قلت لها لأ


اخذي كل الهدايا وعطيني اريولج امشي فيهم

((((((((((((((قالت ماما انا يبي ريولي مااعطيهم احد لو يعطي فلوس كويت كلوووووووووووووووووووو))))))))

طبعا كل يوم بجي بجي واصرررررررررررخ اقول بس تعبت تعبت والله محد حاس فيني الا الخدامه

صج صج ماقصرت رغم ان الكل شاك ان هي مسويتلي سحر


بس قامت فيني قوووومه كبييييييييييييييييييييييييييييييييييييييره

المهم قرب رمضان الكريم قلت لزوجي بروح عند اهلي اقضي رمضان معاهم

قالي لا خليج يمي انا اقوم فيج بيت ابوج مافيه غرف وين بتقعدين؟؟؟؟؟؟ قلت له الدوانيه

المهم هو رفض مبدئيا

اليوم الثاني قلت له جيب مقص وشيل الجبس لان ريولي تحكني

وبعد جهد جهيد مع البجي والترجي والدمووووع انجرف زوجي ورا دموعي وسمع كلامي

وفتح الجبس ...............

قصينا قص بالمقص لمده ساعه ونص واكثر وكسره (طبعا ماحس بريولي )

جيت بحركها ولا ماقدر خلاص الحمدلله على كل حال شلل اكيد

زوجي ضاق خلقه وقام يلوم نفسه ان ماسافر معاي يقول لو انا معاج جان ماطحتي ولا صار اللي صار

قلت له مومعقوله بس عشان طحت انشل!!!!!!!!!!!!!!!!!!!!!!!!!!!!!!!

حاولت اقوم ماقدرت اوقف عليهم ولا حتن احطهم على الارض امبييييييي تخيلوووووووووووو

يعوروني اففففففففففففففففففف

مليت مليت بمووووووووووت

المهم زارني ابوي حبيبي قالي ها يابنتي شلونج اليوم اشوف رفعت الكفر


جان يصرخ وين الجبس


خفت يزفني جان ابجي واسوي تمثيليه ان انا تعبت منه وريولي تحكني موت موت موت موت قمت اهستر بغيت اين

المهم ابوي عاتبني وايد


كلمته بموضوع اني بروح عندهم البيت

رحب وقال تعالي احطج بعيوني بس تتحملين العواقب(الازعاج وووو )

لان مثل ماذكرت مافي غرف وبيحطوني بمكان قعدتهم


المهم شالو شلايلي ودقينا عالاسعاف ونزلوني بشبريه (سرير)

دخلت الاسعاف ولا المصري يقولي

فيكي ايه يابنتي


جان ابجيييييييييييييييييي واقوله قصت حياتي ........... قام يبجي

والله العظيم ورب الكعبه بجى


وصلنا بيت ابوي دخلوني من جدام الباب الرئيسي عشان يكفي السرير

وكان ثاني يوم رمضان ......... نيموني بالدوانيه ( مكان قعدتنا وتجمعنا )

وقام ايوني زوار من كل صوب وتعجبو للي صارلي كلكهم منصدمييييييين من شكلي ومن وزني اللي راح نصه واكثر

صرت انسانه ميته والله على قوله اخوي كأنج شبح ام كتكوت مو هي

ويهي مصفوق وايدي سوده من الدم ( الدربات ) وجسمي ذبلان وضعفان حده

المهم ابوي شاف حالتي بجم يوم مريبه وشعري طاح مره وحده
وايدي تعكفت يعني مثل المشلوله ماقدر اشيل ورقه اكلنكس واذا بشيل شي

اشيله من ظهر ايدي مو من الكف فاهميني ؟؟؟؟؟؟؟؟؟؟؟؟؟؟؟؟؟؟

ابوي بغى اين شنو اللي قاعد ايصير لي من سيء الا اسوأ

وقامت الكوابيس تيني بالليل لدرجه انهم شالو ولدي وخلوه ينام عندهم من كثر الصراخ بالليل

وغير الخدور فظيع بكل جسمي

يعني جنه نمل وايد يمشي بلا تووووووووووووووقف

شعري كان ليما ظهري تدرون لي وين صار؟؟؟

صار مثل البوي حت طاح صرت قرررررررررعه والله


طبعا نسيت اقولكم ان ابوي الغالي طلب لي علاج طبيعي بالبيت هو دفع اسبوع مع زوجي وكان غالي وايد طبعا بالفراش التمارين

المهم

عقب ماطاح شعري انا ينييييييييت لا مستحيل اللي يصير وين شعري اللي شطوله ؟؟

مره وحده جك بوم ماكو شي

قمت البس مثل القبعه وحجاب على راسي عن الاحراج

يابولي شيخ بعد جم يوم تقريبا ماذكر بس اللي اذكره ان كلهم طلعو بس تم زوجي معاي والشيخ

وقعد يقرا وانا ماحس فيه ولا اسمع جنه ولا احد قاعد

بس مبققه عيوني ومتصمبره جني مينونه

بس اللي اذكره ان كل ما علا صوته شوي راسي يعورني وايدي تتحرك بس ماحسيت بضيجه ولاشي الحمدلله بالعكس كنت مرتاحه

بس مسبهه ولا جني اسمع

زوجي قال شيخ زوجتي شعرها طاح قال يمكن من النفاس بس هو مايدري انه طااااااح طاااااااح يعني x باح

عطاني ماي مقري عليه وآيات اقراها ورقيه شرعيه

طبعا ماسويت ولاشي مادري ليش


وتخيلو ان اذا بحك مكان بجسمي منو يحكه

خدامتي

ومااتحمل اي لمس اي عوار اي شي .... ايدي داخله لي داخل وتغزني

مادري ليش ( لمن هذي اللحظه اللي اكتب لكم فيها )

المهم برمضان تدرون الغبقات والطلعات وووو وانا بروحي نايمه ماتحمل اي ازعاج
ماتحمل اي ليت اي ضوء كله قاعده بالظلمه وكآبه

حتن لمن اهل زوجي يو يزوروني كان ظلمه وخالتي حبيبتي قالت خلوه مسكر اذا هي مرتاحه

دخلو ضيفو عمرهم وطلعو وانا مادري عنهم

ووايد تأذيت بالنسبه لقضاء الحاجه ( التبول فقط مافي شي غير هالشي وانتو بكرامه ) هم مادري شالسبب

كله بقيصريه

وامي كانت تغسل راسي وانا بالفراش بماي مقري حبيبتي وتسبحني ياعمري

وهي تطبخ لي وتجيبه لي عندي وتقعد مع وليدي وماترضى احد يجيسه ولا يبجيه

والله العظيم ورب الكعبه انها تتفطر وتحطه على الطاوله مالت الطعام فوق ....... يمها حاله حال الصحن اللي يمها

ولدي خلاص بيكمل 4 شهوووووووور

دخلنا نص اكتوبر وانا ولدت 3-7اصلا

المهم ماذكر التواريخ بالضبط

بس اللي اتذكره بيوم ابوي قالي ياحبيبتي لازم تروحين المستشفى

انا قلت له اي مستشفى

قال الطب الطبيعي

قلت له خلاص يبه الحين هذول ممرضات ايوني ويسولي تمارين وان شالله احاول معاهم واتحسن

بس قالي هناك اجهزه وعنايه ووووو

المهم ماسمعت كلامه


بيوم من الايام يمكن مر 3 أيام على هالكلام

يت اختي الصغيره حبيبتي كان بالليل ...... قالت لي بلعب معاج اونو

قلت لها يالله عاد حدي ضايق خلقي

المهم صفطت يمي ع الفراش وقمنا نلعب نلعب لمن صار الوقت شوي متآخر يمكن كان الساعه 2 بالليل

ييت بعدل قعدتي ولا اشوف ماي ينزل على ريولي

ماي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

من وين

لا اي ماي اي اكيد ماي


يعني مونقطه لا شي واضح ماي

من وين ؟؟؟؟

اختي تتغشمر تقول اخاف مركبه نل

قلت لها لا حرام عليج والله صج انا خايفه من وين هالماي

وانا كنت لابسه بجامه بنفسجيه وصارت سووووووده

(على فكره مايتني الدوره تكرمون طووووووووول هالفتره وقفت ماكو)

قلت لها لايكون الدوره

اختي تقول شلون الدوره ينزل ماي يالذكيه لون الدوره احمر

هااااااااااااااااااااا

نزلت البنطلون شويه

ولا شنو الجرح تبطل جرح الولاده تبطل


صرخت على اختي (((((جيبي منظره اشوف )))))))))))))))

؟؟؟ انفتح ؟؟؟ لا مستحيل اغمي علي

وااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااي

زوجي كان بالاحمدي (بيت اهله) والله والله والله دقيت اهلوس اقوله الحق علي اللي بنيناه كله انهدم

والسَفره اللي رحتها ايران وطحت فيها وانشليت راحت بلا فايده الجرح تبطططططططططططططططططططططططططططططططططططططل



:0bee2e8d89:



:0bee2e8d89:


!!!!!!!!!!!!!!!!!!!!!!!!!!!!!!!!!!!!!

 

[ام كتكوت]

الجزء السادس

المهم

انا كنت بين واعيه وحلمانه ..... الا اقوول كابوس مو حلم ....!

ردت الايام بذاكرتي وره واتخيل العذاب اللي تعذبته عشان هالجرح

افكر لايكون راح ارد المستشفى ويحطون لي انابيب ووووووو ابر ودربات اللي ليما الحين علامتها بايدي من 4 سنين

المهم

زوجي بظرف نص ساعه يه وهو والاسعاف وراه

لبسوني وشالوني بالاسعاف وزخوني مستشفى مبارك وانا بين اللي قاعده وموقاعده مابي افتح عيوني
مابي اصدق اني رديت مره ثانيه للمستشفى

المهم قطوني بالملاحظه وراحو عني (لان بالليل ماكو فحص او علاج الا الصبح )

وزوجي حبيبي مايقدر يدش تم بره ممنوع الرجال

ولا المشكله يت الممرضه بتحط لي درب قلت لها مابي درب ماااااااااااابي وقمت ابجي ايدي تعورني والله ماكو مكان بنات شراييني كلها صار ضعييييييييفه ماقامت تبين اختفت : (

ويمي وحده تصررررررخ الصراحه اكتأبت واللي تصرخ صغيره بالعمر وتبجي بجي وقمت ابجي معاها وادعي لها ورب الكعبه اتذكر دعواتي لها والله واذكر شكلها حتن كانت من السمر اللي حيل ومسويه وايد عجايف وامها يمها تنادي الممرضات ولاحياة لمن تنادي

ومن كل صوب اسمع حريم يصرخون ويبجون ويترجون السستر اتيي : (

المهم مر الوقت بطيييييييء حسيت اني محتاجه اروح الحمام تكرمون

قلت للسستر بروح باثروم

قالت لي روحي

قلت لها ماقدر

قالت انا شنو اسوي يعني

ناديت عامله التنظيف ترجيتها ويابت لي قصريه قضيت حاجتي من غير لاغسل مايابت لي ماي ( متخيلين ؟)

المهم صار الصبح وانا مانمت ولا دقيقه ولا ربع ثانيه

فتحت تلفوني وقعدت اشوف الصور القديمه

اشوف تقريبا اخر الصور صور حلوه كلها حياة

اشوف صورتي مصوره ويا العروسه اللي رحت لها العرس قبل لا اولد بيومين

بكامل زينتي وانا ((( واقفه )) عورت قلبي الصوره

تمنيت ادخل بالصوره

شوي قطعت احلامي وحده من اهلنا يايه بالصدفه مع امها الله يرحمها (الحين ميته ) دخلت علي جان تقولي

ام كتكووووووووووووووووووووووووت


مخترعه علي

شفيييييييييييييج؟؟؟؟؟؟؟؟؟

شصار لج؟؟؟؟؟؟؟

ليش انتي هني؟؟؟؟؟؟؟؟؟

وليش جذي صرتي ضعيفه؟؟؟؟؟؟؟؟

وليش ايدج لونها اسود ؟؟؟؟؟؟؟؟

امبييييييييييي

اختلطت حزتها مشاعر الفشله وضيقه الخلق والضعف

انا اللي قبل بهيبتي وكشختي والكل يشوفني بأحلى شكل

جذي شكلي

بجامه البيت ... وعبايه معفسه ولفه طايحه ... وبدون جوتي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

قلت لها الحمدلله على كل حال (مضاعفات ولاده )

جان تقول كل هذاي مضاعفات

وانكسر خاطرها علي وانا احاتي انها تشم ريحه من الجرح ولا شي

بس الحمدلله الجرح ماطلع ريحه معناته مافيه صديد نفس قبل بس مجرد انه انفتح ...!
(هذي استنتاجاتي طبعا )

هي دعت لي ولمن وصل الدكتور ومعاه دكتوره راحت المره وهي تدمع والله:0bee2e8d89:

الدكتور بطل الجرح وقال

الجرح ملتهب وااااااايد من لونه والدكتوره قالت غرفه العمليات على طوووووووووووووووووول


بس موبنج عام

موضعي بس تخيلو انهم خيطووووووووه بموضعي(عذاب)

امي وصلت وهي متضايقه قعدت معاي لمن صار حزه الصلاة راحت

وقعدت بروحي

دقيت على زوجي قلت له ابي أرد البيت قالي اطلع من الدوام وايي لج

ياني ومعاه ورد فديته

قلت له الدكتور قال الورد ممنوووووووع والعطور ممنوووووووووع

كسرت بخاطره بدل لا اشكره :tek:

بس عصبت عليه لانه تأخر علي:eh_s(1):

المهم طلعت من المستشفى .....

طبعا ردوني باسعاف تخيلو بس سياره اسعاف اسمها (النقليات كبيره مجهزه للمعاقين جان سمعتوو عنها )

رديت البيت حدي تعبانه وداااايخه لاني من امس مونايمه جان تذكرون

وترى مادري عن ولدي عند منووووووو

حطيت راسي ونمت عقب ماغسلت وماذكر الساعه جم قعدت بس اللي اذكره ان بنفس اليوم زاروني ناس واااااااااااااااااااااااااااااااااايد وايد وايد

ماشاءالله الصاله انترست

حسيت بضيجه موطبيعيه انطرهم يطلعون مساكين

ولمن طلعووو حسيت براحه شوي


المهم مرت الايام الحمدلله جرحي تم يطلع ماي بفتحه صغيره بس الممرضات ايوني كل يووووووووووووم كل يووووم

يدخلون داخل اللحم يعني بالفتحه داخل الجرح الشاش ويخلونه داخل عشان يمتص اي شي يطلع ان جانه دم او ماي او صديد لاسمح الله و يخلونه داخل مايطلعونه ويحطون فوقه بلاستر طبي يلصقونه

لمن جلدي تشقق واحترق من اللزاق يوميا ..... آآآآآآآآآآآآآآه

وصار مكانه اسود وتشوه

واكيد اللي مجربين اللزاق على الجلد حاسين فيني اشكثر يعووووووووووووووووور

المهم صار آخر الشهر يعني تقريبا 31-10 بس هم كنا برمضان الكريم اتذكر كان رمضان

زوجي قط ماوراه ودونه حق علاجي من ادويه ومسكنات واجره الممرضات اللي ايوني البيت وحسيت ان خلاص ابوي كفى ووفى

صار الصبح من تاريخ 30-10 وكالعاده الصبح ابوي يطل علي

قلت له يبه خلاص انا وافقت اروح الطب الطبيعي ودقينا على الشركه الخاصه للخدمه الطبيه اللي ايوني البيت وكنسلنا معاهم

وسجلت اوراقي ودخلت المستشفى بروحي انا وابوي

رحنا اول شي قابلوني 3 دكاتره

واحد منهم هندي .... وقعد يختبر ريولي ذبحني واسئله وايد شكثرها وووووو

وابوي معاي يتغشمر وياهم ويلطف الجو

جان يقول الدكتور الهندي يالله ع الجناح

كلمه الجناح كانت بالنسبه لي بدايه حزني ووحدتي وسجني المؤبد استغفر الله

المهم رحت وكانت الساعه تقريبا 11 الظهر

اول مادخلوني طبعا عمومي على ماتفضى غرفه وايي دوري حق الخاصه

كنت منسدحه على فراشي او الفراش اللي نقلوني منه (الشبريه) صفطت يم سريري بالجناح ... كان كئيييييييييييييييييييب

الصراحه كان مايليق لمستوى الكويت (المستشفى )

الستاير مشلعه واطرافها اسود

السراير مبهذله

والطوفه مقشره وصفرة

الهنود من كل صوب ......


و



و


والمكان يخرع وخايس :0bee2e8d89:

قلت حق ابوي يبة مابي اقعد بهالمكان ولا دقيقه ولاثانيه وقمت ابجييييييييييييييييييييييييييييييييييييييييييييييي يييييييييييييييييييييييييي




المهم



قلت حق الممرضه (وانا ابجي ) لاني وقتها ماوقفت بجي والله .... قلت لها قولي حق ابوي يطلعني مابي اقعد هني شهالمكان

المهم شوي ولا اتيي دكتوره مصريه طويله ويهها سمممممح وتهبل

مسحت على راسي حسيت اني بيبي

قالت لي حبيبتي لاتتضايقين والله راح تطلعين من عندنا مستانسه وقالت لي كلام واااااااايد وايد وابوي يسمع وساكت

المهم قالت الحين بيون مدرباتج وتتعرفين عليهم وتشوفين المكان وانا دكتورتج (نسيت اسمها بس جنه سحر)

اذكر كانت يمي وحده مره كبيره بالعمر وهي بدويه تهبل عسل عسل عسل

حبيتها ياليت بناتها مشاركين ويانا بالمنتدى يدلوني عليها ضيعت رقمها اسمها ام فهد

المهم تخيلو والدكتوره تكلمني ياتني ام فهد قالت لي ليه تبكين ؟؟ خليج معاي يمي واعتبريني امج @@

انا حزتها كنت ذابحه روحي من البجي ماشوف من دموعي
والدكتوره كل شوي تقولي ليش تبجين

اقولها ابي ولدي والله ماتحمل اتركه اكثررررررررررر

<<<< تو الناس توني استوعب اني ابي ولدي

المهم الدكتوره طخختني شويه ولا تدخل المدربه توقعتها شي ثاني بس كانت بنت بعمري حبووووووووووووووووووبه وايد وايد حبيتها من اول نظره @@

عرفتني على نفسها وقالت انا معاج وراح اكون مدربتج على طول ....... المهم


وسوينا اجراءات الدخول وحطوني بمكاني وابوي قال يالله انا رايح شويه وبعد اشوي ايي ( انحاش ههههههههههههه)

حسيت اني بالروضه والله الكل يطالعني اشلون ابجي

جناحنا كان مفتوح وراهي عباره عن 4 سراير وكل سرير جنه دار لان اللي يقعدون بهالمستشفى يطولووووووووووون شهووووووور

ابون كل شي ملابس وكل شي مثل السفر الطوييييييييل

ام فهد يابه تلفزيونها معاها وكانت تسهر على المسلسلات رمضان وصاير لها شهور بالمستشفى خنت حيلي

المهم من اول يوم انعزلت على نفسي سكرت الستاره بطلت تلفوني مره ثانيه اشوف نفس الصوره وانا كنت واقفه واندب حظي استغفر الله وقعدت اكتم البجيه ماقدرت لمن انهرت وبجيت وايد لمن خلاص وربي ابجي بدون دموووووووووع

شوي ولا اشوف الستاره انفتحت ...... منو ؟؟؟؟


ام فهد !!!!!!!!!!

قاعده ع الويل جير جاره عمرها ويايه صوبي وبايدها كلينكس مادته لي يعلها العافيه

ويمها خدامه مادري من خدامته من المريضات تنام مع معزبتها مره عوده هم وشكلها خبره بالمكان ومعزبه

ام فهد قالت لي يابنيتي لاتبجين والله اللي ايون يبجون يطلعون زينين

قلت لها انا ماعجبني المكان .. قالت والله تتعودين

المهم قالت لي قولي لي شسالفتج وارتاحي وقعدت اسولف لها يمكن جريب ساعه واتشكى ووووو والله ارتحت لها هالام فهد الله يذكرها بالخير

ويمي كانت وحده سوريه صاير لها 4 شهور بالمستشفى زوجها قاطها من فوق الدري وانشلت .. عرفت قصصهم كلللللللللللللهم

وفلبينيه منتحره ونجت بس تكسرت

وووووووووووووووو بلاوي الله يبعدها عنا يااااااااااارب

المهم اول يوم عدا على خير

محد ياني حتن زوجي مايه يومها ماذكر ليش بس اذكر اني تقلبت لمن تكسرت جنوبي على مانمت ونمت من التعب ولله

بس لمن صار الصبح اسمع الممرضه تقول يالله يالله بأعلى صوتها ( طبعا من الصبح الساعه 7)

ويفتحون الستاير والدرايش

والليتات

افففففففففففففففف شنو هذا مايخلون الواحد ينام

سألت الفلبينيه (رفيجتي )
بعدين طبعا صارت رفيجتي

قلت لها شنو شالسالفه(بالانجليزي)

قالت


7




7





7





7





7





7





@@

يالله قومي نسبحج


نسبحج ؟؟؟؟؟؟؟؟؟؟؟؟؟؟؟؟؟؟؟؟؟؟

يعني شنو


يعني تفريييييييييييييك

منو ؟؟

الممرضات يسبحون المرضى كل يووووووووووووووووووووووم


ليش عشان قاعه التمارين تروحين فرررررش مع الدكتوره

طبعا يحطونج على سرير خاص للتسبح مفتوح ومتنقل ومريح

خل اقولكم شصار بغرفه التسبح باجر صار شي قوووووووووووووووووي وايد @@

!!!!!!!!!!!!!!!!!!!!!!!!!!!1

عن اذنكم بنات تعبت

لا تنسون دعواتكم لي امااااااااااانه

تصبحون على خير

انتظروني باجر

ملاحظه:

نسيت اقولكم ان خدامتي راح تكون معاي بالمستشفى تنام معاي يمي كل يووووووووووووووووووووم ......

وراح تعرفون شسوت !!!!!!!!!!!!!!!


:0bee2e8d89:

 

[كويتيه مذهله 87]

:0bee2e8d89:

واي لا تذكريني بالاياام السوده:krkrkr:

وان شالله ما تمر يارب والله لا يعووووودهاااا

ومتااابعينج يقلبي

والله يشااافي كل مريض يااارب​

 

[الجوري74]

لا يوقف لا يوقف
متابعيييينج

 

[نيلفار]

بعد عمري متابعينج بس نبي الاجزاء اليديدة علشان نعرف شصار

 

[sondos]

الله يشافيج ويعافيج ..................

والله عورتى قلبى ...................كله اجر وبميزان اعمالج والله يقومج حق ولدج بالسلالالامه

 

[miss-one]

سلامتج ما تشوفين شر الله يشافيج ويتمم عليج بصحتج

صج انه الانسان ضعيف جدام المرض

اخنقتني العبره

 

[FOZQ8]

@@ واااي ام كتكووت شنو هذاااا
عورتي قلبي صج
أجر وعاافيه ومفره للذنوب انشالله
والله يتمم عليج العافيه والصحه لج ولوليدج

 

[.]

الحمدالله ع سلامتج..

وااي عورتي قلبي..

ماجوره يارب..

 

[GAP]

حبيبتي ام كتكوت اجر وعافيه ان شاء اله

 

[بسبوووسه]

ماعندي كلام اقوله

 

[Tangled]

حسبي الله ونعم الوكيل والله يجازي اللي كان السبب جان انه عين ولا حسد ولا سحر وان كان ابتلاء الله يعينج عليه ويعين كل مبتلي يارب

 

[وين^العهود]

صج عورتي قلبي حمدلله على سلامتج

واجر وعافيه حبيبتي

ناطره باجي القصه

 

[سـاكـــورا]

أجر وعافيه والحمدالله على سلامتك صراح خوفتيني من الحمال صارلي سنتين متزوجه وماحملت
وان شاء الله تشوفين كتكوتج وانا اشوف كتكوتي عرسان

 

[سـاكـــورا]

من ثمار الاستغفار

هل تريد راحة البال. وانشراح الصدر وسكينة النفس وطمأنينة القلب والمتاع الحسن ؟ عليك بالاستغفار: {اسْتَغْفِرُوا رَبَّكُمْ ثُمَّ تُوبُوا إِلَيْهِ يُمَتِّعْكُمْ مَتَاعاً حَسَناً} [هود: 3].

هل تريد قوة الجسم وصحة البدن والسلامة من العاهات والآفات والأمراض والاوصاب ؟ عليك بالاستغفار:{اسْتَغْفِرُوا رَبَّكُمْ ثُمَّ تُوبُوا إِلَيْهِ يُرْسِلِ السَّمَاءَ عَلَيْكُمْ مِدْرَاراً وَيَزِدْكُمْ قُوَّةً إِلَى قُوَّتِكُمْ} [هود: 52].
هل تريد دفع الكوارث والسلامة من الحوادث والأمن من الفتن والمحن ؟ عليكم بالاستغفار: {وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ} [لأنفال:33].
هل تريد الغيث المدرار والذرية الطيبة والولد الصالح والمال الحلال والرزق الواسع ؟ عليكم بالاستغفار: {اسْتَغْفِرُوا رَبَّكُمْ إِنَّهُ كَانَ غَفَّاراً * يُرْسِلِ السَّمَاءَ عَلَيْكُمْ مِدْرَاراً * وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَاراً} [نوح :10ـ12].

هل تريد تكفير السيئات وزيادة الحسنات ورفع الدرجات ؟ عليكم بالاستغفار: {وَقُولُوا حِطَّةٌ نَغْفِرْ لَكُمْ خَطَايَاكُمْ وَسَنَزِيدُ الْمُحْسِنِينَ} [البقرة: 58].

الاستغفار هو دواؤك الناجح وعلاجك الناجح من الذنوب والخطايا، لذلك أمر النبي صلى الله عليه وسلم بالاستغفار دائماً وأبداً بقوله: (يا أيها الناس استغفروا الله وتوبوا إليه فإني استغفر الله وأتوب إليه في اليوم مائة مرة).

في الحديث الصحيح : ( من لــزم الاستغفار جــعل الله لـه من كل هم فـرجا، ومن كل ضيق مخرجا، ورزقه من حيث لا يحتسب ).
فيا من مزقه القلق، وأضناه الهم، وعذبه الحزن، عليك بالاستغفار فإنه يقشع سحب الهموم ويزيل غيوم الغموم، وهو البلسم الشافي، والدواء الكافي.
-----------------------------------------------
فضائل وفوائد الصدقة

أولاً: أنها تطفئ غضب الله سبحانه وتعالى كما في قوله : { إن صدقة السر تطفئ غضب الرب تبارك وتعالى } صحيح الترغيب.

ثالثاً: أنها وقاية من النار كما في قوله : { فاتقوا النار، ولو بشق تمرة}.

رابعاً: أن المتصدق في ظل صدقته يوم القيامة كما في حديث عقبة بن عامر قال: سمعت رسول الله يقول: { كل امرىء في ظل صدقته، حتى يقضى بين الناس }. قال يزيد: ( فكان أبو مرثد لا يخطئه يوم إلا تصدق فيه بشيء ولو كعكة أو بصلة )، قد ذكر النبي أن من السبعة الذين يظلهم الله في ظله يوم لا ظل إلا ظله: { رجل تصدق بصدقة فأخفاها، حتى لا تعلم شماله ما تنفق يمينه } في الصحيحين .

خامساً: أن في الصدقة دواء للأمراض البدنية كما في قوله : { داووا مرضاكم بالصدقة }. يقول ابن شقيق: ( سمعت ابن المبارك وسأله رجل: عن قرحةٍ خرجت في ركبته منذ سبع سنين، وقد عالجها بأنواع العلاج، وسأل الأطباء فلم ينتفع به، فقال: اذهب فأحفر بئراً في مكان حاجة إلى الماء، فإني أرجو أن ينبع هناك عين ويمسك عنك الدم، ففعل الرجل فبرأ ) صحيح الترغيب

سادساً: إن فيها دواء للأمراض القلبية كما في قوله لمن شكى إليه قسوة قلبه: { إذا أردت تليين قلبك فأطعم المسكين، وامسح على رأس اليتيم } رواه أحمد

سابعاً: أن الله يدفع بالصدقة أنواعاً من البلاء كما في وصية يحيى عليه السلام لبني إسرائيل: ( وآمركم بالصدقة، فإن مثل ذلك رجل أسره العدو فأوثقوا يده إلى عنقه، وقدموه ليضربوا عنقه فقال: أنا أفتدي منكم بالقليل والكثير، ففدى نفسه منهم ) [صحيح الجامع] فالصدقة لها تأثير عجيب في دفع أنواع البلاء ولو كانت من فاجرٍ أو ظالمٍ بل من كافر فإن الله تعالى يدفع بها أنواعاً من البلاء، وهذا أمر معلوم عند الناس خاصتهم وعامتهم وأهل الأرض مقرون به لأنهم قد جربوه.
ثامناً: أن العبد إنما يصل حقيقة البر بالصدقة كما جاء في قوله تعالى: { لَن تَنَالُواْ الْبِرَّ حَتَّى تُنفِقُواْ مِمَّا تُحِبُّونَ } آل عمران:92

تاسعاً: أن المنفق يدعو له الملك كل يوم بخلاف الممسك وفي ذلك يقول : { ما من يوم يصبح العباد فيه إلا ملكان ينزلان فيقول أحدهما: اللهم أعط منفقاً خلفاً، ويقول الآخر: اللهم أعط ممسكاً تلفاً } في الصحيحين

عاشراً: أن صاحب الصدقة يبارك له في ماله كما أخبر النبي عن ذلك بقوله: { ما نقصت صدقة من مال } في صحيح مسلم
الحادي عشر: أنه لا يبقى لصاحب المال من ماله إلا ما تصدق به كما في قوله تعالى: {وَمَا تُنفِقُواْ مِنْ خَيْرٍ فَلأنفُسِكُمْ} [البقرة:272]. ولما سأل النبي عائشة رضي الله عنها عن الشاة التي ذبحوها ما بقى منها: قالت: ما بقى منها إلا كتفها. قال: {بقي كلها غير كتفها } في صحيح مسلم

الثاني عشر: أن الله يضاعف للمتصدق أجره كما في قوله عز وجل: { إِنَّ الْمُصَّدِّقِينَ وَالْمُصَّدِّقَاتِ وَأَقْرَضُوا اللَّهَ قَرْضاً حَسَناً يُضَاعَفُ لَهُمْ وَلَهُمْ أَجْرٌ كَرِيم}ٌ [الحديد:18]. وقوله سبحانه: { مَّن ذَا الَّذِي يُقْرِضُ اللّهَ قَرْضاً حَسَناً فَيُضَاعِفَهُ لَهُ أَضْعَافاً كَثِيرَةً وَاللّهُ يَقْبِضُ وَيَبْسُطُ وَإِلَيْهِ تُرْجَعُونَ} البقرة5

الثالث عشر: أن صاحبها يدعى من باب خاص من أبواب الجنة يقال له باب الصدقة كما في حديث أبي هريرة أن رسول الله قال: { من أنفق زوجين في سبيل الله، نودي في الجنة يا عبد الله، هذا خير: فمن كان من أهل الصلاة دُعي من باب الصلاة، ومن كان من أهل الجهاد دُعي من باب الجهاد، ومن كان من أهل الصدقة دُعي من باب الصدقة، ومن كان من أهل الصيام دُعي من باب الريان } قال أبو بكر: يا رسول الله، ما على من دُعي من تلك الأبواب من ضرورة فهل يُدعى أحد من تلك الأبواب كلها: قال: { نعم وأرجو أن تكون منهم } في الصحيحين

الرابع عشر: أنها متى ما اجتمعت مع الصيام وإتباع الجنازة وعيادة المريض في يوم واحد إلا أوجب ذلك لصاحبه الجنة كما في حديث أبي هريرة أن رسول الله قال: { من أصبح منكم اليوم صائماً؟ } قال أبو بكر: أنا. قال: { فمن تبع منكم اليوم جنازة؟ } قال أبو بكر: أنا. قال: { فمن عاد منكم اليوم مريضاً؟ } قال أبو بكر: أنا، فقال رسول الله : { ما اجتمعت في امرىء إلا دخل الجنة } رواه مسلم

الخامس عشر: أن فيها انشراح الصدر، وراحة القلب وطمأنينته، فإن النبي ضرب مثل البخيل والمنفق كمثل رجلين عليهما جبتان من حديد من ثدييهما إلى تراقيهما فأما المنفق فلا ينفق إلا اتسعت أو فرت على جلده حتى يخفى أثره، وأما البخيل فلا يريد أن ينفق شيئاً إلا لزقت كل حلقة مكانها فهو يوسعها ولا تتسع [في الصحيحين] ( فالمتصدق كلما تصدق بصدقة انشرح لها قلبه، وانفسح بها صدره، فهو بمنزلة اتساع تلك الجبة عليه، فكلمَّا تصدَّق اتسع وانفسح وانشرح، وقوي فرحه، وعظم سروره، ولو لم يكن في الصَّدقة إلا هذه الفائدة وحدها لكان العبدُ حقيقياً بالاستكثار منها والمبادرة إليها وقد قال تعالى: { وَمَن يُوقَ شُحَّ نَفسِهِ فَأُوْلَئِكَ هُمُ المُفْلِحُونَ } الحشر:9

 

[بنت باباتي]

تدرين وانا اقرا قصتج اقول ياليتني ما قريتها
ذكرتني بأيام التعب
بس جد هالتجربه راح تقويج بأذن الله
الله ياجرج ويصبرج ويشفيج