دق فهد وكلم بسمة ببرود وحاول ان يسكره بسرعه بسمة استغربت بس تعذرت له ان تعبان
ثاني يوم قعدت بسمة من النوم وبدلت عشان تروح الجامعة ....
بسمة: ها يبه يالله مابي اتاخر عن الكلية
وليد: يالله كاني بس خل اشرب قهوتي ...
ورود: مو زين لا تشرب قهوة الصبح يصير تحت عيونك لون اسود
وليد: انزين ... يالله قومي مريم نور ... يالله بسومة .. مريم احنا رايحين تبين شي
مريم: (( تلف ملفعها )) لا حبيبي مابي شي .. بنات ديروا بالك على نفسكم
وصلت بسمة الكلية وحضرت اول محاضرة .. وعقب راحت حق سبيجة وامثال والبنات ... وبالصدفة لقت البنات واقفين ويمهم مشاري واحمد وبراك .. وباجي الصبيان من القائمة
بسمة: السلام عليكم
رد عليها الكل وعليكم السلام
امثال: ها بسمة وينج ما شفناج من فترة
بسمة: موجودة انتي ما تبينين
واهني نط مشاري
مشاري: ها بسمة شلون الخيران ؟
اهني انصدمت بسمة هذا شدراه معقولة فهد قايله ؟؟ كان فهد واقف من بعيد يطالع بسمة واهي واقفة يم مشاري .. كان فهد ياي حق الشباب يسلم عليهم ومنها يشوف بسمة لكن منظر وقفة بسمة مع مشاري خلته يشب نار وعصب لدرجة ان رد سيارته واهو حده مفور ومعصب على بسمة ومشاري
اما بسمة فعبالها ان فهد قايل حق ربعه .. لما شافها بالخيران وما توقعت هالسالفة من فهد خاصة ان هذي مو شخصية فهد ومو نوعه كلش ...
بسمة : اي خيران
مشاري: انتي ما كنتي بالخيران ؟
بسمة: اي كنت هناك شدراك
امثال: اي صح شدراك ...
مشاري: دخلت المنتزه كنت بروح اييب صاحبي ولا اشوف ورود بالجمعية فقلت اكيد كنتي هناك
بسمة: اها ... اي كنا هناك ..
مشاري: حلو جو الشاليهات بالويك اند .. انزين شلكم بالمنتزه اشتروا لكم شاليه
بسمة: (( منبطة جبدها من سخافة مشاري )) ما شاء الله اي ليش لا خنشوف الوالد اليوم
سبيجة: ها شقاعد تقولون
امثال: مشاري قاعد يقترح على بسمة تشتري شاليه
بسمة: انا مضطرة اروح بتاخر على محاضرتي تعرفون دكتور احمد ما يدخل عقبه احد اشوفكم على خير حبيباتي
وراحت بسمة وعيون مشاري عليها وامثال حاسة بمشاري لكن اللي مطمنها ان بسمة مو صوبه ..
سبيجة: وي شفيها بسمة مشت لا يكون زعلت
مشاري: تزعل من شنو ماكو شي يزعل
امثال: لا والله ؟؟ اي يصير خير
بسمة كانت بطريجها للمحاضرة لما دقت على فهد
بسمة: الو .. اهلين
فهد: اهلين (( برود ))
بسمة: شلونك شخبارك ؟؟
فهد: زين ..... انتي شلونج
بسمة: شفيك ؟
فهد: مافيني شي انتي وين
بسمة: بالجامعة رايحة محاضرتي انته وينك ؟
فهد: موجود ...
بسمة: اها .. انزين ما قلت لي شفيك زعلان ؟
فهد: سالي نفسج
بسمة: ؟؟ شنو ؟؟ اسال نفسي شنو ؟؟ شصاير ؟
فهد: انا من شوي كنت بكيفان وشفتج واقفة يم مشاري وسوالف .. بالذمة ما تخافين على نفسج من الحجي شيقولون عنج ؟
بسمة: شنو بيقولون يعني انا ما سويت شي
فهد: (( معصب )) بسمة ؟؟ انتي شقاعده تقولين ؟؟؟ وبعدين انتي تدرين عدل اني مارضى ولا اسمح حق اي احد ان يوقف وياج ويكلمج
بسمة: انزين انا شنو ذنبي اهو وقف يمي وسالني .. بعدين الكل كان واقف .. انا مالي شغل
فهد: شوفي الكل كان واقف الكل كان قاعد مو شغلي .. لو تقولين لي امج وابوج واقفين بقولج مالي شغل
بسمة: فهد انزين خلاص لا تعصب ..
فهد: شنو لا اعصب شنو لا اعصب ؟؟
بسمة: واي فهد بس خلاص ماله داعي الصراخ انا محد صرخ علي من قبل عشان انته الحين ياي تصرخ علي
فهد: اوكي يالله باي
بسمة: فهد ؟؟؟
فهد: بسمة يالله باي ..
بسمة: باي ..
تمت بسمة دموعها اربع اربع تبجي بصمت وتمسح دموعها بسرعه عشان لحد يطالعها ... وعلى طول دقت على ورود وراحت قعدت بمكان معزول ..
ورود ها بسوم شفيج شصاير ؟
بسمة: مو صاير شي .. انا ماني قادرة اقعد بطلع من الكلية .. وامي وابوي بالدوام
ورود: امبيه بسوم خلاص لا تبجين حد يشوفج
بسمة: اوكي .
ورود: الحين ادق على سايق ديدة يمرج ..
دقت ورود على ابوها واستاذنت منه ان بسمة بترد البيت مع سايق يدتهم .. ودقت على بيت يدتها واستاذنت من يدتها عشان السايق
ورود: يالله الحين يدق عليج .
بسمة: منو
ورود: السايق .. بسوم صاير بينج وبين فهد شي
بسمة: اي .. صاير .. بس مابي اتكلم ورود واللي يعافيج حدي متضايقة ..
ورود: اوكي اوكي بس مسجي دموعج وخلاص ماكو شي ان شاء الله
بسمة: اوكي يالله روحي محاضرتج .. لا تتاخرين
ورود: اي بروح انا لو اقدر اسكب جان سكبت بس علي كويز بصراحة ما ينعاد ولا جان ما خليتج
بسمة: لا ورودة حبي انتي روحي والله عادي وان شاء الله الكويز يكون سهل
ورود: ان شاء الله يالله باي ..
نطرت بسمة بو ربع ساعه ولا السايق عندها واول ما ركبت مع السايق دق عليها فهد اول شي ما ردت لكن لما دق مرة ثانية شالته
فهد: طالعي يمينج
بسمة: (( طالعت ولا فهد لاحقها بسيارته ))
فهد: بسوم والله اغار عليج والله .. ما اقدر احس الدم بجسمي يغلي .. ما اقدر اتمالك اعصابي .. شلون هالواطي مشور يوقف ويكلمج على اي اساس
بسمة: (( تبجي )) اي بس انا مالي شغل
فهد: بس لا تبجين خلاص .. خلاص سكتي ... العن ابو شكلك يا مشاري انت السبب والله الود ودي اروح ادوس ببطنه ما اهده الا مطلع مصارينه
بسمة: فهد شصاير شفيك جذي معصب وحالتك حالة كل هذا عشان وقف يمي
فهد: بسوم من يوم الخيران ويمكن من قبل الخيران واهو كل شوي اييب سيرتج وان حاط عينه عليج ومن هالحجي
بسمة: اوكي وبعدين ... فهد انا لو ابي احد غيرك جان لاحقظت وجودهم م نقبل لا اعرفك
فهد: يعني شنو
بسمة: يعني انا ماعرفت مشاري وغيره الا لما عرفتك يوم قلت لي انهم ربعك مع اني بلاقائمة من قبل لا اعرفك او اني اكلمك بالاصح انا مابي مشاري ولا ابي احد غيرك انته وبس .. فهود انا احبك
فهد: بسوم .. تعالي وياي ..
بسمة: شنو ؟؟
فهد: والله قولي حق اهلج انج بتروحين مع فطوم رفيجتج ..
بسمة: لا واي فهود ما اقدر بعدين احنا وين بنروح
فهد: محنا رايحين مكان ابيج تقعدين يمي وبس ..
بسمة: مادري فهود اخاف ..
فهد: انا مابي اضغط عليج .. بس بليز حاولي عشاني ..
بسمة: اوكي اشوف وارد لك خبر ..
فهد: طالعيني
بسمة: (( طالعته )) كا
فهد: احبج والله احبج ..
دقت بسمة على ابوها واستاذنت منه ان تبي تروح مع فاطمة شوي عشان يشترون مذكرة من الخالدية .. وقفها السايق بمصافط الجمعية نزلت وركبت مع فهد
بسمة: واي فهود خايفة مو حلوة احد يشوفنا
فهد: تصدقين وانا بعد .. بس ما عليه .. ان شاء الله محد يشوفنا .. بسوم احبج
بسمة: هههههههههههه ايدك ترجف
فهد: ونتي بعد ..
بسمة: اي اي .. وانا بعد
فهد: ونتي بعد شنو
بسمة: احبك .
فهد: والله بسوم انا ما سويت اللي سويته ولا صار فيني اللي صار الا لاني احبج وانا مابيج لمجرد لعب او مصاحب وبس لا انتي مرتي ان شاء الله .. وام عيالي ..
بسمة: واي فهد بس والله ما اقدر على هالحجي
فهد: لا صدقيني هذا الواقع وماكو غيره ان شاء الله ..
بسمة: ان شاء الله
فهد: شوفي انا لحد الحين مو مصدق انج انتي تحبيني
بسمة: ليش فهد لا تقول جذي حياتي انته شنو ناقصك
فهد: وايد اشياء ..
بسمة: يعني انا اللي مقصرة .. لاانته مو ناقصك شي اشوفك احلى واحسن واطيب واحد بالدنيا كلها
فهد: انا احلى واحد صج ؟
بسمة: اي بس لا تشوف عمرك
فهد: هههههههههههههه اشوف عمري على شنو زين منج طالعتيني
قعدوا بسمة وفهد يسولفون ويقرقون .. وقفوا عند ماكدونالدز السرة وطلبوا لهم وكلوا لما شبعوا وضحكوا وعقب كل واحد رد بيته واهو مستانس وراضي عن اللي صار .. هالموقف قرب فهد من بسمة اكثر من ما بعدهم ..
غيرة فهد غيرة صبي اول مرة يعيش قصة حب .. وحتى بسمة دمعتها اللي نزلت كانت اول دمعة تنزل على خد بسمة ويكون سببها انسان غريب تحبه ويحبها ..
فهد لما رد البيت كان يبتسم لا اراديا من الفرحة والوناسة .. والكل كان حاس فيه .. حتى الخدامة .. الكل كان يقول ان هالبريق والاشراق على ويه فهد مو طبيعي اكيد سببه الحب لكن محد يتجرا يسال فهد عن سبب سعادته وتوهج ويهه وعيونه
اما بسمة فكانت تسرح اكثر وتفكر اكثر وفجاة تضحك او تبتسم من غير شي ونظرا لان عدد الناس في بيتهم شوية فمجكوكة حالتها
اما مشاري فكان ياكل بعمره .. شتبي بسمة بفهد من زينه ولا من زين ويهها ولا اسلوبه .. الحين تهدني انا الجميل الكشخة ولد الفلوسو تروح حق فهد اي نعم فهد ولد فلوس بس ما يقايشني بولا شي .. وبصراحة بسمة حلوة وجميلة جمالها مو طبيعي .. والغريب اني اول مرة انجذب حق هالنوع من البنات بنت عادية لا لها ولا عليها شبي فيها وشتبي فيني .. حتى ما تلقيني ويه شبي فيها ؟؟ معقولة عشان فهد حاط عينه عليها انا ابيها ؟؟ لا لا في شي اكبر من جذي جاذبني حق هالبنت ... اللي مو مخليني قادر انساها
تم فهد يوصل بسمة اخته حق الجماعة كل يوم عشان يشوف بسمة الصبح و لما وصلت سيارة سلوان .. بدا يروح بروحه واحيانا تطلع بسمة بين المحاضرات توقف برة عشان يمر يشوفها ...
يوم عن يوم بسمة صارت كالادمان حق فهد ما يقدر يعيش من غيرها دقايق .. اضعف الايمان اذا بسمة ما طلعت يوقف يم بيتهم .. او يفتر ..
واذا طلعت مع اهلها اهو لازم يروح يتاكد من الوضع اللي داير مدارها .. ويشوفها من بعيد ويمشي .. وكل بين فترة وفترة شرى حق بسمة هدية واحيانا عشان الشك يشتري هديتين حقها وحق ورود في حال امها وابوها سالوهم من وين لكم هالهدايا ..
ولو شنو كانت تبي بسمة يوصل لها .ز لدرجة ان مرة كانت تكلم فهد وقالت له مشتهية ككاو .. الساعه 12 بالليل دق عليها وقالها الككاو ينطرج بالحديقة وطلعت ولقت جيس متروس ككاو وحلاو ...
بالنسبة حق بسمة الوضع عاجبها وايد ويوم عن يوم تحس بامان عجيب غريب واحة ووناسة .. وحبها لفهد يزيد .. لان علاقتهم تتطور للاحسن ..
وفي بيت فهد
فوز: فهود طافك
فهد: خير
فوز: ابوي وافق على زواج فواز
فهد: صج ؟؟ الله يبشرج بالخير .. زين زين خوووش خبر بس شالطاري ؟؟
فوز: ماكو سليمان وافق يتزوج
فهد: شنووو؟؟ وانا ويني عن هالاخبار
فوز: مادري عنك لاهي انته وسلوان مو بهالدنيا
فهد: ايييي ... انزين بو داود منو بياخذ ؟
فوز: لحد الحين بس وافقو قال حق ابوي ان دام فواز مستعيل خل يتزوج على ما تخلص سالفته لان عندهم مشروع مادري شنو
فهد: يالله زين زين الله يوفقه يارب ... ما بغينا نفرح فيهم
فوز: اي والله بعد عمري فواز طلع تره واهو ينطر هالزواج .ز ما بغى
فهد: الفال لج اختي
فوز: هههههه فهود احرجتني
فهد: ليش بعد ليه امتى بتقعدين
فوز: الله كريم ان شاء الله الفال لك انته لا ولا اقولك بعدك صغير ..
فهد: شدعوة ؟؟ مو مال زواج ومسؤولية يعني
فوز: تقدر تقول مادري عنك حجي ثاني بعدك صغير فهود و
فهد: ما بقالي الا هالكورس واتخرج ..
فوز: انته الله يهداك لو مكمل الكورس اللي فات ومخلص
فهد: بعد مو نصيبي بس كاني ضغطت على نفسي هالكورس وان شاء الله اتخرج
فوز: ان شاء الله ان شاء الله .. عاد انته شاطر فهود ما شاء الله عليك د حيلك وتزوج ليش لا ..
فهدك اشتغل تالي اتزوج
فوز: هههههههههههههههه يحليلك فهود حدك تحب الاستقرار شفيهم بروك وجسوم مو عليك
فهد: حرام عليج عاد جسوم ميت ويستقر ..
فوز: يحليله
دق فهد على بسمة يبلغها بالخير
بسمة: يحليله واخيرا
فهد: اي والله ما بغى فواز .. طلع براسه نخل
بسمة: يالله مبروك .. وسليمان متى يتزوج
فهد: مادري حتى ما سالت من بنته ومتى وشلون
بسمة: اها ..
فهد: بس شوفي سوي حسابج انتي معزومة
بسمة: على شنو
فهد: مادري عالعرس عالملجة مادري بس لازم تيين
بسمة: يصير خير
فهد: لا يبه مو بكيفج انتي وخالتي وورود لازم تيون
بسمة: امبيه وشقولها ماتعرفكم خو
فهد: عادي تعرفين سلوان
بسمة: مادري والله فهود ما اوعدك ..
فهد: يصير خير ..
ام سليمان : فهد ... فهد ...
فهد: هلا يمه
ام سليمان: وينك صارلي ساعه اناديك
فهد: كاني يمه امري
ام سليمان: سكر تلفونك عشان اعرف اكلمك بالاول
فهد: يالله .. يالله بو جاسم اشوفك بالديوانية
بسمة: ههههه يالله باي ..
فهد: باي .. هلا يمه امري
ام سليمان: ابوك وافق على زواج اخوك فواز ...
فهد: الحمدلله .. خووووش خبر ..
ام سليمان : اي عاد خالتك هيا مسوية عشا اليوم .. فضروري تكون موجود
فهد: ان شاء الله .. انزين يمه سليمان منو خطب ؟ نعرفها
ام سليمان : شوف يمه محد يدريو لا تقول حق احد .. بعده ما صار شي ننطر نخلص سالفة فواز وعقب بنتكلم
فهد: اي اوكي قوليلي منو
ام سليمان: دانة بنت خالتك
فهد: شنو ؟؟؟؟؟ اصغر منه بوايد
ام سليمان: عادي مافيها شي .. دام ان يبيها واهي راضية ماكو مشاكل .. ليش عندك مانع ؟
فهد: هههههههههههههههههههههههههه لا ماعندي
ام سليمان: هاو ينيت شفيك تضحك ؟؟ شنو اللي يضحك بالله
فهد: لا والله يمه ماكو شي السموحة .. انا مضطر امشي تبين شي يمه
ام سليمان : لام ابي شي بس لا تنسى اليوم والله يا فهود ان تاخرتوا بتشوفون شي ما شفتوه انت وخواتك
فهد: لا لا ما نتاخر لات حاتين حبيبتي عقب الصلاة بتلاقينا مرتزين بالصالة مبدلين وكاشخين
ام سليمان: اي عبالي بعد
صار المغرب والكل قاعد يتجهز في بيت فهد .. فهد لاهي واقف يم الخدامة واهي تكوي طرف غترته .. اما فوز فكانت بغرفتها تتمكيج .. سلوان قاعدة تسوي شعرها .. وام سليمان قاعدة تلبس مجوهراتها .. وما اذن المغرب الا سلوان وفهد بالصالة
فهد: يه يه سلوانو شالكشة السنعه
سلوان: يا نحسك فهود ليش كشة هذا موديل شفيك
فهد: يجوز .. انا ان شاء الله ما راح اخلي مرتي تسوي جذي بشعرها
سلوان:عشتو ... نشوف .. هذا ويهي ان ما سوت شعرها مثل ميريام فارس
فهد: لا حرام عليج بسومة مو جذي حدها ناعمة حبيبتي
سلوان: هههههههههه والله وصار لك حبيبة فهد باشا
فهد: انزين ام كشة دريتي منو خطيبة سليمان
سلوان: اي دريت
فهد: عيل امي تقول محد يدري
سلوان: اي صح محد يدري من بيتنا بس الانسة دانة تمشي وتسولف
فهد: الحمدلله والشكر .. ترا دانة ما تستحي والله يعني عيب تتحجى وخالتي ما تحجت
سلوان: اقول فهود اهي ما استحت يوم كانت تبيك والحين بكل وقاحة موافقة على اخوك وتبيها تستحي وما تتكلم يبه هذي دانة والاجر على الله
فهد: سلوان شالحجي .. لا لا تقولين جذي عنها خل تولي
سلوان: لا والله فهود شنو احنا هنود اول شي تبي فهد وما خلت احد ما نشرت له اشاعة انك تبيها وتحبها بس عشان يناسبونا والحين تبي سليمان . وهذا اخوك مادري شيبي فيها
فوز: يبي منو ؟
فهد: يه يه يه فوز شالحركات
سلوان: اي امبيه فوز شحلاتج امبيه ما يصير تصيرين احلى مني
فوز: ههههههههههههههههههههههه اي شي سلوان صح ؟
سلوان : صح لا حدج كيوت ان شاء الله يخطبونج انتي بعد ونفتك منكم مرة وحدة انتو الثلاثة
فوز: حرام عليكم شسويت لكم انا حدي مسالمة ومثل النسمة مالي حس
فهد: صايرة مغرورة فوزو
ام سليمان: يالله حبايبي يالله تاخرنا الحين امكم العودة تسوي لنا سالفة يا لله
طلعوا اهل فهد من البيت وكلهم ركبوا سيارة وحدة .. اما فواز وبو سليمان فراحوا مع بعض من زمان .... والسبب انهم بيقعدون مع الرياييل قبل الكل .. بيقعدون مع اليد وريل خالتهم هيا
ولما وصلوا الكل سلم عالثاني وفهد راح يقعد مع الرياييل .. لكنه قلبه كان مع بسمة .. فكان طول الوقت يدز مسجات او يدق يكلمها دقيقة ويسكره
فواز: بسك بسك اثقل .. الحين كل هالرياييل مو عاجبينك
فهد: ليش ؟
فواز: مادري عنك طايحله مسجات وغراميات
فهد: ههههههههه يالله خلاص خلاص ..
دز فهد مسج حق بسمة وقالها ان ما راح يقدر يكلمها لان مفتشل من خواله وابوه واخوانه .. القعدة بالرغم من انها كانت عائلية الا ان طابع الرسمية كان طاغي عليها .. يمكن بسبب شخصية بو سليمان الجادة .. ويمكن لان هالعشا كان عشا خطبة ..
فواز كان فرحان والدنيا مو شايلته من فرحته واخيرا راح يتزوج حبيبته وبنت خالته هنوف .. واخيرا راح يستقر .. والقلوب تقرب من بعضها
ومو بس فواز كان مستانس .. الكل من غير استثناء يمن حتى الخدامات مستانسين .. لان فواز كان خووش صبي وعموما عيال ام سليمان كلهم محبوبين والكل يرتاح لهم ويحبهم ... م ناليدة ليه الخالات وعيالهم ورياييلهم .. وحتى عيال هيا .. هيا كانت وايد مسالمة وطيبة فوق العادة .. فعيالها طلعوا عليها .. وخاصة هنوف ويمكن هذا السبب الي خلا فواز يحبها كل هالسنين .. فواز يحب هنوف من لما كانوا بالمتوسط والكل كان يدري عن هالحب الطفولي .. وكبروا والكل ناطر هاللحظة والحمدلله هاللحظة صارت
بسمة: هابشر شلون كانت قعدتكم ؟
فهد: والله وناسة .. خوالي ورياييل خالاتي .. وعيال خالاتي وخوالي .. يعني الكل الكل كان موجود
بسمة: يعني الزوارة
فهدك تقدرين تقولين بس الزوارة احيانا ناس تيي واحيانا ما تيي يعني عندي خوالي الكبار عيالهم مو كل زوارة ايون بالشهر مرة زين عاد اليوم شفناهم .. ووناسة خووش عشا والله طحنالج انا وفواز بالسي فوود
بسمة: ههههههههههههههههههههههههه بالعافية .. عاد مشتهية ربيان
فهد: فوقه تروحين باجر ناكل
بسمة: ممممممم مادري ... خنشوف امي واقولك
فهد: اي بسومة من زمان مو شايفج ..
بسمة: حتى انا مشتاقتلك يالخايس .. مساع لما دزيتلي صورتك واي فز قلبي عليك يالخايس تهبل بالغترة
فهد: اي شفتي شلون .. عيل شنو بتسوين بالعرس شكلج بتقومين من الكوشة وتلميني
بسمة: فهد ههههههههههههههههه اعلمك والله باجر اوريك تتطنز علي
فهد: لا والله حبيبتي ما اتطنز .. انتي من صجج باجر انا اللي اركض بالصالة عالكوشة والمج .. حاصللي انا
بسمة: حياتي .. لا تقول جذي انا اللي حاصللي فهودي حبيبي حياتي والله والله فهود وجودك بحياتي حلم اخاف اقعد منه وما الاقيك
فهد : لا لا تقولين جذي الله لا يفرقنا عن بعض ونتم العمر كله مع بعض
بسمة: ان شاء الله يارب ..
فهد: انزين انتي شسويتي اليوم
بسمة: ماكو ولا شي عمتي وخالاتي يو لنا .. قعدنا سوالف وضحك وحب وجاي وبعدين طلبنا عشا .. وما شاء الله ما طلعوا الا الساعه 12
فهد: ما شاء الله .. تصدقين انا احب جذي ماحب العوايل المفرقة ..
بسمة: اي احسن شي جذي .. الكل يحب الثاني ... فهود قوللي قبل لا انسى .. درست ؟
فهد: اي الحمدلله ما باقيلي الا شي بسيط
بسمة: زين طمنتني
فهد: انا ليش قاعد اشد حيلي ؟؟ مو عشان اشتغلو اتقدم لج على طول
بسمة: فهد حياتي انته والله انا مابي اضغط عليك وبالعكس عادي اخذ راحتك
فهد: لا مابي اخاف احد ايي يخطبج
بسمة: ومن قال برضى
فهد: ماتدرين يمكن عمي وخالتي يبون مصلحتج
بسمة: واي فهود فالك ما قبلناه لا تقول هالحجي وبعدين امي وابوي مو من هالنوع وان شاء الله نكون حق بعض
فهد: ان شاء الله يارب
وتموا بسمة وفهد يسولفون لين طلعت الشمس عليهم
بسمة: فهداني هههههههههههه الشمس طلعت
فهد: طبيعي عقب اذان الفير الشمس تطلع
بسمة: ايو الله يا حلاتنا واحنا لينا وردينا كملنا اي روحوا ناموا
فهد: لا خلينا شنو هالنومة اللي بتشبعنا .. طافج ما قلت لج انا مساع رحت اصلي ولا اسمع فوازو يقرق بالتلفون او بالاصح يرضع مع الخطيبة
بسمة: ههههههههههههههههههه فهودو شلك فيهم حرام عليك
فهد: اي اي طحت عليه .... مو هين بو الفوز
بسمة: كا انت قاعد ترضع
فهد: لا انا غير .. اهو سنين واهو يرضع وانا المسكين توني .. لحظة ياني خط ثاني .ز هذا براك خلج عالخط
بسمة: اوكي
فهد: ها بروك
براك: انت قاعد ؟؟ تحاجي منو ؟؟ بهالفير
فهد: حبيبتي .. امر بروك اخلص
براك: ايا الواطي هههههههههههههههههههههه امر ها
فهد: ههههههههههه اي جيكت حدي بياع ها شبغيت
براك: ماكو بروح اتريق ما تيي وياي
فهد: وين بتروح ؟
براك: مادري يا شارع المطاعم يا مطعم هندي
فهد: مشتهي اكل هندي ..
براك: فوقه .. يالله تزهب كاني مارك ..
فهد: اوكي .. ها عمري
بسمة: ها طولت في شي ؟
فهد: هذا بروك .. بيمرني بنروح نتريق
بسمة: غريبة ..
فهد: شنو الغريب
بسمة: اول مرة اسمعك تقول تبي تتريق برة
فهد: اي انا مزاج .. بالسنة حسنة اشتهي اطلع اكل برة .. المهم خل اقوم ابدل .. ونتي قومي سويلج اي شي .. مو تنامين محاضرتج ما بقا لها شي ..
بسمة: اي بقوم اسبح .. واتنشط وازهب هدومي ..
فهد: اخييييييييييه بسمووووووو
بسمة: شنو
فهد: ولا شي بس مرة ثانية ماله داعي تقولين لي شنو بتسوين
بسمة: شكو
فهد: ولا شي رووحي .. روحي ..
بسمة: شصار ؟
فهد: ولا شي يالله بينا الو ..
بسمة: اوكي يالله باي ودير بالك على روحك
فهد: صارح بيبتي نعيما مقدما واشوفج بعدين ..
بسمة: اوكي باي
