قصة ولادة ابنتي المبكره

[امـ خــزامـى]

السلام عليكم حبيباتي

من زمان كنت حابه انزل قصة ولادة بنتي الله يخليها لي ويفرحني بشوفتها عروس :yaaaaaarb:

بس ماكتب الله

واليوم تشجعت وتحمست اكتبها بالتفصيل الممل وان شاءالله تستفيدون منها

وربي يسهل على كل حامل ويهون عليها ويتمم حملها على خير ويبعد عنكم الولادة المبكره
ويرزق كل محرررررروم ياحي ياقيوم

مناير وخالتي قماشه وام دليار وحدي عسل وكثثثثثثثثثثثثثثثثثثثثثثثثثثير بس نسيتهم
الله يسمعنا الاخبار الحلوه ونفرح فيهم ياكريم عاجل غير اجل



ابدأ قصة ولادتي من احساسي الغريب وتصرفاتي اللي سبحان الله مالقيت لها تفسير
قبل الولاده بيوم

يوم الثلاثاء 20 _7 _2011 كنت حامل بالشهر الثامن بالاسبوع 31

كنت عند اهلي وجلست اصبغ حواجبي واضبطها واختي تقولي وش عندك
انت دايم تشقرين حواجبك بس مو من عادتك تصبغين بالاسود
قلت مادري ودي اجرب وابي اتعود عشان لاجاء وقت ولادتي الا حواجبي حلوه

وضبطت حواجبي وكشخت واخذت الكام وقلت صوروني ابي بنتي تشوفني وانا حامل فيها
وابيها للذكرى بعد

المهم مر اليوم وانا مرتاحه ومبسووووطه ورجعت لشقتي
وسهرت ونمت بعد صلاة الفجر
الظهر صحيت اصلي واتصل زوجي قالي لاتسوين شي بجيب غدا معي
تغدينا ودخلنا الغرفه ننسدح تقريبا الساعه 2 ونصف
وكنت من امس بالليل احس بحركه بسيطه بباخر بطني كان بنتي تنغزني بطرف اصبعها
وفرحانه فيها انا لان بنتي هااااااااديه جدا مااحس بحركات ركل لا بس دوران
واقول لزوجي تحسسني وقال الحركه غريبه قلت له عادي مافي شي غريب ويخوف
انت موسوس

المهم هالحركه تكررت من بكرى 21 _7بعد الغدا وجلسنا نسولف عادي فجأء سمعت وحسيت بشي انفجر مني
مثل البالون اذا انفقع حتى زوجي سمع الصوت
انا قمت اركض واقول بسم الله بسم الله زوجي قام مفزوع وش فيك وانا اركض ومويه دافيه تنزل
مني ولا رديت عليه اصلا ارجف ويالله شلت نفسي ووصلت للحمام وانا متمسكه بالجدران

اول مانزلت بنطلون البجامه وشفت المويه ورديه عرفت انها موية الراس
لاني كنت قريت قبل باسبوع علامات الولاده ولاقبل كنت مستحيل اقراء اي شي عن الولاده عشان مااتوتررررر
وبصوت يرجف قلت عطني ملابس وعباتي
ويعطيني ملابسي ياحياتي انواع الترقيع فتح الدولاب واخذ اي شي قدامه

المهم لبست وحطيت فوطه صحيه وطيران على المستشفى الساعه 3 وشوي العصر
الحمدالله ماكان فيه زحمه وانا مختاره مستشفى قريب مو بعيد تحسبا للطوارئ
وزوجي مسسرع وقطع كل الاشارات
وانا بس اسمي واذكر الله مرررتااااااااااااااااعه على الاخر
وادخل على الطوارئ ويدخلوني الغرفه وياخذون قياس وزني وطولي ويسألوني انت اي اسبوع قلت 31 قالوا اوووف يعني ولاده مبكره
افتحي رجولك مدام عشان نشوف
وافتحها وانا الله اعلم بحالي ماافكرت بالم ولاشي اللهم استحيييييت لاني اول مره اكشف
وقالت مفتوح رحمك 3 سم ولاده
مين دكتورتك قلت لها مين واتصلوا عليها وصرفتني :eh_s(14): حسبي الله ونعم الوكيل
قالوا اختاري موجوده د خالده ود ماجده
قلت ابي خالده لاني سامعه فيها ومادحينها
على طول طلبوا من زوجي يوقع اوراق
وخلوني افسخ اللي علي ولبسوني لبس المستشفى
وطلعوني للغرفة الولاده



اخذوني بالسرير وغطيت وجهي عشان بطلع لغرفة الولاده
مااشوف شي دمووووووووووووووع وبس والدنيا تلف فيني
مو مستوعبه اللي يصير لان حملي سليم مافيني الا العافيه
ولا طلق ولا تعب ولا اي مقدمات بس كل شي مكتوب ومقدر

وصلت غرفة الولاده
وحطولي اجهزه على بطني عشان مراقبة حالة الجنين وسوولي سونار
واتضح لهم اني بالاسبوع 32

زوجي جاني وكان وجهه اسوود مررتاع انا يوم شفته مسكت نفسي
وصرت انا اهديه
ويقولي بتصل بامك لازم احد معي انا مااعرف ومااتحمل مثل هالمواقف ابي احد عنده خبره
قلت له لا تكلمها اليوم اربعاء اكيد راحوا للمزرعه لاتخوفهم علي وطريقهم بعيد
قال يصير خير
ودخلت علي دكتوره خالده وجلست تسولف معي وطمنتني عسى ربي يطمن قلبها
بس تذكر الله وتهديني وتقول مافيك الا العافيه وشرحت لي كل شي
وقالت بنحاول نخليك تحت الملاحظه وبنعطيك مثبتات على الاقل لمدة اسبوعين
ونولدك عقبها
انت ارتاحي وتوكلي على الله ولاتضيقين صدرك ويالله انا الحمدالله تطمنت عليك
اخليك اللحين عندي ولاده تامرين على شي قلت سلامتك
<<<بعد كلامها ارررررتححت راحه مو طبيعيه

بعد نص ساعه دخل زوجي وقال اهلك بالطريق
ماقدرت مااكلمهم وزعلت عليه قلت امي فيها سكر وخوافه لايكون ارتاعت
قال مو بايدي اتصلت عليها عشانك
شوي الا ويجون امي وابوي
ودخلت امي وهي تتنافض وش صاير امس عندي مافيك الا العافيه
قلت والله مااعرف انا مصدووووومه مثلك واكثر
شوي ويدخلون خواتي الكبار وكنت ماسكه نفسي عند امي بس يوم دخلوا خواتي قعدت اصييييييييييييييييييييييح ويهدوني ويطمنوني وسكت وجلست اسولف وقلت كلام الدكتوره وتطمنوا
جلسوا ساعه وطلعوا قالوا نخليك ترتاحين انت وزوجك وامي عندك وبكرى انا شاءالله بعد العصر نجيك

ودعتهم وانا مرتاحه والحمدالله جاني زوجي وسولفنا وجابلي ساندويش وعصير وغصبتني اكل امي
شويات الا قلت لامي روحي خلاص جلستك مالها داعي وامي اصلا تتعب ماتحب المستشفى وريحته
وراحت


جلست انا والممرضه متقابلين بس تراقب الجنين ونبضه وكل شوي تعطيني اكسجين وتطلب مني انام على جنبي واذا قلت لها ليش بس عشان اقدر اسمع نبض الجنين زين <<يازينها ماتبي تخوفني وتقول اخاف يوقف قلب الجنين عسى ربي يرزقها بالذريه ويفرح قلبها
مسكينه لها 4 سنوات متزوجه وماحملت
الله يذكرها بالخير كانت متعاطفه معنا مرررررا وحنونه علي وماتخوفني

قبل الفجر مرتني الدكتوره مره ثانيه وتطمنت علي وجلست تضحك معي تقولي الله يعينك
بتملين مني اسبوعين بقابلك
وقالت الظهر باجي اتطمن عليك وراحت

مااجاني نوووم اببدد ومن الروعه كل شوي مسويتها ومانعيني من الحمام
زوجي بعد ماقدر ينام

على الساعه 8 الصباح قام زوجي وودعني وراح لشغله ووصاني اتصل عليه لو صار شي
وياعمري هو كل ربع ساعه يتصل يتطمن

الساعه 10 اتصلت بنت خالتي تطمن علي سكرت منها وتدخل علي قابله سودانيه وتكشف علي
قالت الرحم مفتوح 5 سم
الا اللمرضه تجيني تقول مدام انت وش تحبين قيصري ولا طلق صناعي
قلت لا صناعي ان شاءالله مااحتاج قيصري

ليش قالت لا عادي مدام بس اسأل !!!!!!

وطلعت ومعها ابره وحطتها بالمغذي قلت وش هالابره قالت مضاد ومشت علي السالفه
<<لحد الان وانا ماشكيت بشي

الساعه 11 الا ربع حسيت بشي بيطلع مني
ورنيت الجرس جتني الممرضه قلت لها ابي اروح للحمام
قالت لا ممنوع
سوي هنا عادي انا احط فوطه قلت لها لا مو بول هذا براز الله يكرمكم
قالت لالالا مدام مايصير انت تعبانه
وانا ملزمه قالت استني بنادي الدكتوره
طبعا دكتوره خالده راحت لبيتها دوامها بعد الظهر
جتني قابله السودانيه وكشفت علي

قالت خلاص بدا مفعول الطلق وين زوجك قلت طلع قالت اتصلي عليه
واتصل عليه وانا انتفض تعال بسررعه بيولدوني خلاص

ويجهزوني ويرفعون رجولي ويعطوني الكمام ويقولون لي تنفسي بعمق عشان ماتتاألمين
واتنفس وادووووخ على الاخر
وتجي دكتوره اردنيه اسمها ماجده
وتولدني
وانا دايخه ومااشوف بوضووح ومررررررررررهقه جداااااااا
بس شفت زوجي
واشوف اللممرضات حوالي ويساعدوني ويمسكون بطني
حسيت بالراس قرب
صرت ادفع وطلع وصارت الدكتوره تحمسني يالله الراس طلع مابقى شي
اتنفسي وادفعي بقووووووه
وادفع وتطلع بنتي على الدنيا وماكانت تصييح على طول اخذوها وكانوا فيه دكاتره مجتمعين
عليها انا مسكت نفسي وجلست اركز ابي ارتاح ابي اسمعها تصيح عشان اتطمن
وحسيت بابره عطوني بفخذي وحسيت باول غرزه للخياطه
وسمعت بنتي تصييييييييييييييييييييييييح وارتااااااااااااااااااااح وادوووخ واغط بسابع نووووومه
:eh_s(22):

مااحسيت بنفسي الا الظهر كاني شفت اختي تبوسني وارجع انام على الساعه 1 فتحت عيني وكنت نايمه على جنبي
عرفت اني خلصت ولاده وخيطوني وخلصت على خير يارب لك الحمد
صوتي كان رايح فيييييها ولساني يابس من التعب صرت اقول ابي مويه واه ظهررري
امي بجنبي اول ماسمعتني اتألم جلست تدلك ظهري تبي تريحني عسى ربي يخليها
وزوجي جنبها

رفضوا يعطوني مويه بس نقطوا بفمي

وزارتني دكتوره خالده وباركتلي وتحمدت لي بالسلامه ومازحتني قالت كنت متفقه اجيك اشيك عليك واتطمن مادريت الا انك والده حتى ماصبرتي اولدك بنتك مستعجله مافيها صبر


نقلوني لجناحي ونمت لي شوي وجابولي غدا بس ماقدرت اكل مع اني ميته جوووع تذكرت بنتي ومتلهفه اشوفها ونزلت دمعتي عليها
اكلت عشان امي وبعد ماخلصت رحت اشوفها بالحضانه والعنايه المركزه
والحمدالله كل شي سليم ووزنها كان كيلو وشوي
طمنوني وقالوا بتطلع اذا صار وزنها كيلوين


والحمدالله على كل حال صحيح الولاده سهله وماحسيت فيها لانها نتفه بنتي وطلعت بسرعه
بس رووووووووووووووووووووووووووووعه الله للايوريكم

وتخسرنا خساااااااااااير لان الليله الوحده للحضانه ب2000 ريال من غير التحااليل

بس اهم شي انا و بنتي بخير والباقي يروح ويجي بسلامته




وخلصت قصة ولادتي اللي الى هالحظه اذا تذكرتها يمغصني بطني وارتاع
وللمعلوميه ترى ماادري ليش صارلي ولاده مبكره

االدكتوره قالت كل شي سليم

بس من قبل كم شهر قريت من موقع طبي ان احد اسباب الولاده المبكره
هو كثرة السائل الامونوسي وعدم استيعاب الرحم له

اتمنى استفدتوا منها ومن تجربتي


واعذروني :eh_s(8):

 

[فتون777]

حبيبتي
الحمدلله ع سلامتك والله يبلغك فيها عروس
اجر وعافيه ان شالله
واهم شي سلامتكم

 

[زين ودلال]

سبحان الله

اهم شي قمتوا بالسلامه انتي وبنتج

الله يخليها لج وتتربى بعزكم ان شاء الله

 

[حبيبي مالكني]

المهم اللحين بنتج بحضنج
وطله بويه بنتج تنسيج كل هالتعب والعذاب

 

[اميره المشاعر]

الحمدلله على السلامه نفس قصتي مع بنتي جبتها في الثامن
وبس كان عندي طلق مبكر من الرابع واستخدم يوتوبار كل ما اسوي سونار يقولوا المويه حق الجنين تنقص اخر شي لازم عمليه عشان مايقدروا يولدوني طبيبعي احتمال تعيش او تموت بسم الله عليها ووقعت ودخلت غرفة العمليات مافي 40 دقيقه الاولدت وكان وزنها 900 جرام يعني مو كيلو حلقوو شعرها تخيلووا عشان الابر حتي الحمدلله قعدت في الحضانه شهر وعشره ايام يعني طول النفاس وبنتي مو عندي وانا كل يوم اروح لها صباح وعصر عشان اتطمن عليها بس صار وزنها كيلووو ونص طلعتها على مسؤليتي والدكتوره تقولي انا واثقه فيكي احسك بتعتني فيها اكثر وماشاء الله تبارك الله الصلاة على النبي شهرين وراجعت والدكتوره مومصدقه الي تشوفها نفسها الي خرجت قالت هاذي جوري ماشاء الله وكان وزنها 3 كيلوو
والحمدلله رب العالمين دحين جوري عمرها 7 سنوات بس مررره نحفانه
سامحوني طولت عليكم بس ذكرتيني بأيام لاتنسى
اللهم احفظ اولادي واولاد المسلمين والله يرزق كل محروووم يااارب

 

[Ya7aLaTY]

الحمدلله على سلامتكم
الله يخليها لج وتشوفينها عروووووووووس

 

[فرفشه منعنشه]

الف الحمدلله على السلاااااااامه وتتربى بعزك يارب وكله باجره انشالله وحسيت فيج لاني مريت بنفس وضعج مع واحد من عيالي ودمعت عيني جد لما قريت قصتك وتذكرت الماضي ههههههههههه
​

 

[M!SS.LOBY]

اجر وعافية

 

[امـ خــزامـى]

يعافيكم يارب ويسلمكم من كل شر

 

[امـ خــزامـى]

الحمدلله على السلامه نفس قصتي مع بنتي جبتها في الثامن
وبس كان عندي طلق مبكر من الرابع واستخدم يوتوبار كل ما اسوي سونار يقولوا المويه حق الجنين تنقص اخر شي لازم عمليه عشان مايقدروا يولدوني طبيبعي احتمال تعيش او تموت بسم الله عليها ووقعت ودخلت غرفة العمليات مافي 40 دقيقه الاولدت وكان وزنها 900 جرام يعني مو كيلو حلقوو شعرها تخيلووا عشان الابر حتي الحمدلله قعدت في الحضانه شهر وعشره ايام يعني طول النفاس وبنتي مو عندي وانا كل يوم اروح لها صباح وعصر عشان اتطمن عليها بس صار وزنها كيلووو ونص طلعتها على مسؤليتي والدكتوره تقولي انا واثقه فيكي احسك بتعتني فيها اكثر وماشاء الله تبارك الله الصلاة على النبي شهرين وراجعت والدكتوره مومصدقه الي تشوفها نفسها الي خرجت قالت هاذي جوري ماشاء الله وكان وزنها 3 كيلوو
والحمدلله رب العالمين دحين جوري عمرها 7 سنوات بس مررره نحفانه
سامحوني طولت عليكم بس ذكرتيني بأيام لاتنسى
اللهم احفظ اولادي واولاد المسلمين والله يرزق كل محروووم يااارب

ماشاءالله عليك وربي يخلي عيالك ويرزقك برهم

وكله على الاجر انت من بداية حملك وانت تعبتي وكان عندك طلق

انا ابداااااااااااااااااا ماعندي ولا مشكله
صدمتي كانت قوووويه وروووعتي ماتتخيلينها
ومانسيتها على ان عمر بنتي اللحين سنه ونص

الحمدالله على كل حال

 

[امـ خــزامـى]

الف الحمدلله على السلاااااااامه وتتربى بعزك يارب وكله باجره انشالله وحسيت فيج لاني مريت بنفس وضعج مع واحد من عيالي ودمعت عيني جد لما قريت قصتك وتذكرت الماضي ههههههههههه
​

الله يسلمك وان شاءالله مايتكرر الماضي

 

[اخت خالتهم]

ماشاءالله
الله يخليها لج يااارب ياكريم


ويبعد عنا وعنج الولادات المبكره يارب

 

[sosowaty]

و عليكم السلام

الف مبروك و الحمدلله ع سلامتكم

ما شاء الله

قصتج ريحتني و ذكرتيني بولادتي و بجيت هههههه

الله يعينا

 

[Q8_QT]

الحمدالله عالسلامة والله يخليلج بنتج وتشوفينها عروس يارب

 

[ABEER FLOWER]

ألف الحمد لله على سلامتج وسلامة بنتج

: )​

 

[يتيمة جابر العز]

قصتج أثرت فيني وبجيت وقطعتي قلبي يوم تقولين اول ماشفتي بنتج دمعتي < يارب احس بشعورج ان شاءالله

والاحلى انه دكتورتج خالده احبها واحب تعاملها

حيل تخيلت نفسي مكانج بس ان شاءالله أولد كامله شهري

الله يثبت حملي هالمره يارب ياكًريم

 

[عسل حدي]

لاَ يُكَلِّفُ اللّهُ نَفْسًا إِلاَّ وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ رَبَّنَا لاَ تُؤَاخِذْنَا إِن نَّسِينَا أَوْ أَخْطَأْنَا رَبَّنَا وَلاَ تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا رَبَّنَا وَلاَ تُحَمِّلْنَا مَا لاَ طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَآ أَنتَ مَوْلاَنَا فَانصُرْنَا عَلَى الْقَوْمِ الْكَافِرِينَ

 

[ام الحلوااات]

ام خــــزااامـــــى

الـحـمــد للــه عــلـى سـلامـتــج
بــس اللـــــه يــهـــــداااج هـــذي قـــصــــه تــقــولــيــنـهــــا
انـــا فــرحـــاانــــه مــن امــــس انــي دشـــيــت الــثـــامــن
والــحــــــييييــن روووعــتــيــنــــي وزاااد الــخــــوووف
مــن شــي اســمــه ولادة مــبــكــره
اللـــه يـتـمـم عــلــي وعـلـى كـل حــامــل للــتــااســـع يــااارب​

 

[عسل حدي]

لاَ يُكَلِّفُ اللّهُ نَفْسًا إِلاَّ وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ رَبَّنَا لاَ تُؤَاخِذْنَا إِن نَّسِينَا أَوْ أَخْطَأْنَا رَبَّنَا وَلاَ تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا رَبَّنَا وَلاَ تُحَمِّلْنَا مَا لاَ طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَآ أَنتَ مَوْلاَنَا فَانصُرْنَا عَلَى الْقَوْمِ الْكَافِرِينَ

 

[امـ خــزامـى]

ماشاءالله
الله يخليها لج يااارب ياكريم


ويبعد عنا وعنج الولادات المبكره يارب

امين ياحي ياقيوم ويسهل عليك ويقومك بالسلامه وتجيبين احلى بيبي ويرزقك بره

اخت خالتهم انت اللي حمستيني اني اكتب بعد ماقريت موضوعك عن الطلق كيف طريقته

قلت خليني اكتب يمكن افيدها ويستفيدون البكريات