قصة سعوديه قمه في الروعه

[sara3]

واو البارت عجيب .عفية عليها دانة اللى سوته بسارة تستاهل هاللزقة

ولا اشرايك بنت لكويت

البحر الهادئ لا تطولين علينا الاحداث حلوة مرةةةةةةةةةةة .مع تقديري لمجهودك الاكثر من رائع:tek:

 

[لـــــ الكويت ـؤلؤة]

لو انا مكان دانة جان سويت اكثرمنها
عيل تطلع وهي مو امسترة جدام زوجها
اخليها تنسى اتفكر تدخل هل بيت دام نواياها شينة شينت الحلايا
ناس ما عندها كرامة 00000000
معاج يختي سارة ولو انج سميت شينت الحلايا 0000000000
ههههههههههههههههههههههههههههههههههههههههههه

 

[sara3]

لو انا مكان دانة جان سويت اكثرمنها
عيل تطلع وهي مو امسترة جدام زوجها
اخليها تنسى اتفكر تدخل هل بيت دام نواياها شينة شينت الحلايا
ناس ما عندها كرامة 00000000
معاج يختي سارة ولو انج سميت شينت الحلايا 0000000000
ههههههههههههههههههههههههههههههههههههههههههه

خخ خخ خخ خخ خخ

وهى كل سارة سارة انا اسمى عنجليزززززززززززززززززززى

 

[فساتين فخمه]

انا ماكملتها بس قلت اردلاني انقهرت صراحه مولهاالدرجه الشاب السعودي ينزل نفسه لشغاله وسيرلانكيه

 

[البحر الهادئ]

ويش شغالته وسيرلانكية مافهمت قصدك
ومشكوره على مرورك يا فساتين فخمه

 

[البحر الهادئ]

الجزء الثالث)
وقفت سعاد..تناظر في شكلها بالمرايه..
فستان الزواج مثل ما حلمت..نافش وفيه احجار كريمه
..المكياج سموكي روعه الشعر شنيون كشخه
..والباقه من اجمل مايكون
حتى المعرس هو هو من تمنته عينها دايم..
طيب ليه ماتفرح..
مسكت نفسها لاتبكي..
لانها ان بكت جابت القديم والجديد..
راح تبكي على من حبته وخان...على قلبها الي ما يطيع ينسى ..وعلى حضها الي اجبرها ترتبط فيه وهو مايبي الا مذلتها..
قالت الماس .. الي كانت متالقه رغم مرضها في فستان ليموني رووووووعه :-سعاد لاتقطعين قلبي
هزت سعاد راسها وقالت بتاثر :-آه يا الماس...ثقل الجبال على قلبي..
بكت الماس غصبن عنها..اما سعاد فتماسكت لانها حلفت ما تبكي عليه بدمعه يكفي الدموع الي ذرفتها اول مره رفضته يوم كانت تدرس بالجامعه..
دخلت دانه وهنادي وكانن كل وحده احلى من الثانيه ..هنادي لابسه زهر وموف..ودانه لابسه كموني وزهر رووعه..ورافعه شعرها شنيون جاي على وجهها الدائري فتنه
قالت دانه :-الماس خير ان شاء الله
مسحت الماس دموعها وقالت :-صايره حساسه زياده عن اللزوم..شكل الواحد لاقرب من الموت ينهبل
ناظرنها البنات بقسوه لانهن يكرهن انها تتكلم عن مرضها باستخفاف..
قالت هنادي وهي منقهره من كلام الماس :-الزفه بعد شوي سعاد ..يالله جهزي عمرك
حست سعاد برجفه عنيفه ..
وقالت بصوت مرتجف صدم البنات :-جاهزه
><في وقت><
ناظر احمد في ساعته..الساعه 12 بالليل والله ماصارت..
ناظر في سعود وقال :-ياخوي ماصارت بنمرح هنا بالقاعه بدخل خلاص
ضحك سعود :-اقول اركد لاتفشلنا تو بدري
انهبل احمد :-وش تو بدخل الحين يا تعلم الشيبان يا رحت بلحالي
سعود :- هههههههههههههههههههه طيب
<>
على انغام اغنية ..صابر بتحدى العالم ..
انزفت سعاد لانها مو تقليديه وتحب التميز
والغريب انه على الرغم من انها مغصوبه على الزواج الاانها ما بخلت على تجهيزاتها ولا على نفسها بشي..
مشت خطوه..بخطوه..
كااااااااااااااااااااااااااااااااااااااااااااااااا ن جو القاعه رومنسي...انوار مافيه..كل طاوله عليها شمعه منوره بظلام المكان..
واخيرآ..
وصلت وجلست على الكرسي المخصص لها...
ما امداها تجلس عشر دقايق الا ورنا تكلمها برقه حتى ماتخوفها وتقول :-ترى احمد بيدخل
خافت سعاد وقالت :-الحين
ابتسمت رنا :-ايه ياقلبي الحين ابتسمي شكلك مخترعه تراه حبوب وما يخوف ولايغرك طوله وعرضه
ابتسمت سعاد غصب وقلبها بصدرها مسوي حفلة استنفار
ودقايق..الا وبدخلته ..
كانت سعاد تجبر نفسها تكون قويه لانها لو ضعفت ماراح يرحمها ..جاء وسلم عليها وجلس جنبها..
<>
حس احمد بالكون يهتز تحته..بالناس يتلاشون ..ومايبقى قدامه الاهي
حبيبته
حبيبته الي ذلته..وقست عليه
حبيبته الي تزوجها مخصوص..عشان يذلها مثل ماذلته ويعلمها كيف تحبه ثم يصد عنها حتى تعرف بقسوة الشعور بحب ماله قبول..
15 سنه
ضاعت من عمره..في رجاوي حبها
جلس..وهو يحمد ربه لانه لقى شي يسند نفسه عليه..لاحظ ملامح امه ونوف كن ميت لهم احد..لان بعد الي صار والحرق الي جاه.مارجع رنا للبيت بعذر انه يبيها تساعده .وابوه وافق ولو انه شك بالموضوع بس احمد فضل يأجل السالفه لبعد العرس لانه مو ناقص مشاكل
جته اخته تهاني وقالت له وشفايفها ترجف :-حمودي صدق انك بتترك البيت
ضمها احمد لصدره :-لا ياقلب حمودي..
بكت وقالت :-بس انت اخذت كل اغراضك
مسح دموعها وقال :-لاتبكين ترى بزعل..وبعدين تزعل عمتك سعاد
ناظرت تهاني سعاد وقالت ببراءة الاطفال :-انتي عمتي الحين
ابتسمت سعاد غصب (غص احمد بريقه من بسمتها الي كما نور القمر في وجه تبارك الي خلقه ) :-ايه حبيبتي
حبيبتي .......آآآآآآآآه محلاها من كلمه !!
جلست احمد يتحسر على عمره وهو يشوف سعاد تبوس تهاني
قالت تهاني :-عمتي لازعل احمد تزعلين
حمرت خدود سعاد وقالت :-هاه
وناظرت احمد المبتسم ..وقالت :-ا..ايه حبيبتي
وراحت تهاني ..عشان المصوره بتصور..
نست سعاد تحذر المصوره من انها تطلب اي تقارب بينها وبين احمد وتستاهل الي يجيها ..
كان هو مستناس وموسع صدره..اما سعاد فكانت متورطه ماتقدر تنفعل وتفضح عمرها قدام خلق الله ..ولاهي قادره تتحمل قربه منها,
عدت السالفه على خير وبقي الاصعب!!
لا بقوا مع بعض لحالهم وش بيصير...!!​

 

[البحر الهادئ]

؛>في صاله الرجال<
قال خالد لفهد المكتئب :-ههههههههه هاه لسى على نيتك بالنحشه
ناظره فهد بضيق مو عارف وش يقول "آسف ياولد عمي ابوي بواسطاته وعلاقاته حلف انه..بيفصلني من شركة ارامكو اذا ماطعته وتزوجت رنا وانت تبيها"
حس خالد بشي ..متغير على فهد الايام الي فاتت مهموم وحزين وحالته زفت..
قال فهد :-لا تسالني وش فيني ياخالد..الي فيني ماراح يسرك
قال خالد بهدوء :-بيزوجونك غصب صح
انصدم فهد ورفع عيونه فعيون خالد :-انت عارف
هز كتوفه وقال :-لا خمنت تذكر اني قلت لك ان الشياب بيطينون عيشتك لين تتزوجها
قال فهد بقهر :-ياليتها تطيين عيشه كان هانت
(وتذكر قبل 3 ايام يوم قال له ابوه بعد مارجعو من صلاة العصر :-بعد عرس احمد جهز نفسك لانك بتملك على رنا بنت عمك
قال فهد بصدمه :-نعم
ابوه :-انعم الله عليك جاك العلم
قال فهد بهدوء تحته بركان ثاير من التعصيب :-اسمح لي يبه هذي مو صفقه من صفقاتكم هذي مسالة عمر وحياه
صارخ ابوه :-وش فيها رنا ست البنات
قال فهد بسرعه :-والنعم فيها يبه ،بس انا ما اخترتها بنفسي ابي اختار بقناعتي
ناظره ابوه وقال : الحمد لله والشكر ترانا بالسعوديه ياولد
فهد :عارف اننا بالسعوديه
ابوه :-اجل خل عنك هالخرابيط كيف بتختار بقناعتك وحنا بفضل الله ماعندنا اختلاط
انقهر فهد لانه ماله اعتراض على رنا ..لا الاعتراض على الاستبداد وعلى تحكمهم بحياة كل واحد في العايله وكانهم مو كفو حتى يختارون من يشاركونهم في الحياه
المساله كانت مساله عناد ..وهو مايبيهم يفرضون عليه رغباتهم
قال فهد وهو قابض يده لدرجة غرست اظافيره في لحمه :- انا ما ابيك تختارون لي .. انا قادر اختار بنفسي
ولاحياة لمن تنادي...!!
قال ابوه وهو يطلع الدرج لغرفته :-الملكه بعد زواج احمد
قال فهد بعناد :-ماني متزوج انا رجال مو بنت انغصب
عصب ابوه وقال بقسوه :-براحتك بس دور لك شغل غير شركة ارامكو
الصدمه افقدت فهد الكلام..ناظر في ابوه وكأنه يشوفه لاول مره
قال والصدمه واضحه بصوته :- اكيد تمزح
ابوه :-انا ما امزح وياليت لو تعتبر من اخوك وعقابي له يوم ماطاعني بس مصيره مسوي الي ابيه
مسك فهد راسه بيدينه وقال :-مستحيل مو قادر اصدق يبه..حنا عيالك
قاطعه ابوه :-وانا ابي مصلحتكم الي غافلين عنها..بنات الحمايل قليل وانا ابي امهات احفادي شقرديات
قال فهد وهو يكمد غيضه من ابوه عشان مايعصي ربه وعشانه متذكر فضل ابوه عليه :-يبه الماس بنت حمايل وهذاك بتزوج رجلها
حس فهد بلمحة الم مرت على وجه ابوه الي قال :-ياليت الكل مثل الماس..عطاها ربي من كل شي وجملها بس حرمها من الضنا..وهذا الي مخليني ابي ازوج سعود نوف
حس فهد انه ديناميت بينفجر في اي لحظه ..
وقال :-ماراح اتزوج رنا
قال ابوه بلامبالاة :-اجل ودع شغلك واتحداك تلقى وظيفه تعطيك هالثروه كل شهر
جا ابوه على الجرح...قال فهد :_يبه حرام عليك سنين من الغربه في الكد والشقا وتبي تحرمني من ثمرة مجهوداتي وتعبي
قال ابوه وهو يكمل طريقه لغرفته :-وافق تسلم ..
ناظره فهد..بتبلد
وقال يكمل :-انتظر قرارك بكره العصر ..ان مارديت من المغرب بكون فاصلك من شغلك وانت تعرفني زين واسال سعود عني.
جلس فهد بغرفته ومانام الليل يفكر وقلبه مليان من الكره على هالوضع وهالمذله..
اشين صفاته عزة نفسه الزايده والي منكده عليه..كيف ينجبر على شي مايبيه
دارت به الافكار يمين وشمال وكل الطرق تقفلت في وجهه ...
لكن عزة نفسه رفضت خضوعه لابوه و اذا يبي يفصله يفصله...
وفعلا هذا الي قاله لابوه..الي رد عليه وقال :- انت معك اجازه لين اليوم الثاني من زواج اختك بعطيك فرصه لين تنتهي اجازتك ان وافقت كان بها ورجعت ولقيت وظيفتك موجوده وان رفضت لا تتعب عمرك وترجع للوظيفه
وطلع وترك فهد يكويه القهر كوي!!))
رجعه للواقع ..يد خالد الي مسكت ذراعه
خالد :-توكل على الله ياخوي وكافي عناد
فهد :-وانت
ضحك خالد :-وانا وش فيني
عصب فهد :-انت تبيها كيف اتزوجها
قال خالد :-الي يسمعك يقول عاشقها..ياخي بنت كلن يتمناها اخلاق وادب وذوق
فهد :-مقدر
انقهر خالد وقال شي صدم وفاجا فهد في نفس الوقت :-شف قسم بالله لتحرم علي هالبنت ليوم الدين
صرخ فهد :-لا
قال خالد بعناد :-حلفت ياخالد وماني ناوي اكفر عن حلفي لاني جاد يا اتتزوجها وتحفظ مستقبلك يا ترفض وتضيع عمرك وفي التالي تضحيتك مالها معنى لاني ما راح اتزوجها
ضربه خالد بشويش وقال وهو يمزح حتى يخفف الجو :-لو ما تزوجتها وش بيسوون بك الشياب بيطردونك من شغلك
كان خالد يمزح ولما شاف نظرة فهد الي تأكد هالشي..ماتت الابتسامه على شفايفه
قال بهمس وعيونه بعمانه وابوه الي كاشخين بالبشوت وفالينها سوالف :-بيطردونك من وظيفتك
هز فهد راسه..
قال خالد وهو يقرب من الهستيريا :-مستحيل كيف ..
ضحك فهد بدون نفس :-وشهو الي كيف الي بروسهم بيسوونه ولو كان بالمريخ
كئب خالد وقال :-عز الله كبروا وخرفوا
ابتسم فهد :- وانا اشهد
ناظره خالد وشوي الا وهم فاطسين ضحك..
قال فهد وهو فيه الضحك :-حسبي الله على ابليس هبلو فينا
خالد :-هههههههههههههههههه ودك تغصب واحدن منهم على شي مايبيه ياترى بيضحك وبينسط مثله الحين
وناظروا في الشياب الي يضحكون ويسولفون
قال فهد يمزح :- ايه احترني تغصبهم عشم ابليس مو في الجنه الا عشمه في لمحة لها
خالد :- هههههههههههههههههه على رايك
كمل خالد بعد كم دقيقه :-وش نويت عليه
قال فهد بعناد :-ماراح يمشون علي رايهم وزواج ماني متزوج لو اموت من الجوع
عصب خالد وتمنى لو يمسك فهد ويخنقه لين يرجع لعقله ..بس مافيه امل عيال عمه روسهم يابسه ونفوسهم عزيزه بالحيل ، صحيح ان خالد نوى يتزوج وتمنى لو تكون من بنات عمه يا رنا يا هنادي..بس رنا وماراح تكون له وهنادي مايدري يبيها ولا لا ؟
×

​

 

[البحر الهادئ]

:>الساعه1 صباحا<<في جناحهم بالفندق>
قال احمد لسعاد وهو يناظرها :-والله وكسبت الرهان يابنت العم
نست الخوف..والحزن .. ورجعت لعنادها وقوتها
قالت بغرور:- كسبت تسمي زواجي منك ربح..اعرف انك خسران ياولد العم لاني مابيك
انقهر احمد وتمنى لو يمسكها مع رقبتها ويخنقها.. ما تمل من العناد من القوه ..ومن مذلته
قال يبي يجرحها مثل ما جرحته :- ولا انا ابيك
يمكن تكون ملامحها من برى مثل بركة ماء راكده مليانه بالاسرار وغامضه لكن من جوى كانت مثل مدينه مدمره دمار شامل كلامه جرحها من الصميم للصميم ..
وعم المكان هدوء فضيع...كلن يناظر في غريمه بقوة عين وكبر وعناد
قال وهو يناظرها بعيون سود لحظها يذبح :- تركتيني بليلة الملكه تدرين شلون بتركك انا بليلة زواجنا
رفعت سعاد عيونها بعيونه وقالت بصدمه :-بتطلقني..
ضحك وقال :-لا ..
قالت بخوف :-اجل
قال بلا مبالاة :-انتي في حالك وانا فحالي
فهمت سعاد تعليقه وقصده..حمرت خدودها..وانقهرت لانها كانت بتسوي هالشي قبله..
ناظر احمد فيها وبعروقه تصطلي النيران..عارف ان بعدها عنه فوق طاقته لكن لا...مرجلته فوق كل شي
قال وهو ينزل شماغه ويفك ازارير ثوبه وسعاد عيونها طالعه من مكانها..:-الليله غصب بيجمعنا مكان واحد وسرير واحد
وبكره لارجعنا بيتنا ..انتي لك غرفه وانا غرفه
كانت تتمنى لو تبكي..لكن حتى الدمع قفا وتخلى عنها..فضلت السكوت لان كلمه..بس كلمه..بتفجر البركان الثاير بصدرها..
جلس يناظر بالتلفزيون..
ودخلت سعاد وبدلت ملابسها ..بملابس محتشمه وكانت هلكانه من التعب والتوتر النفسي والتفكير..وقفت قدام المرايه وفكت بنس شعرها حتى طاح على خصرها بتموجاته السوداء
اجبر احمد نفسه يناظر اي شي .. ولايناظرها هي مو داريه ولاعارفه وش تسوي به..
بعد حاله وتعب نامت سعاد...بينما طلع الصبح واحمد ماغمض له جفن
×
×فتحت سعاد عيونها على همس ينادي باسمها ولقت احمد يصحيها ..رفعت نفسها وغطت جسمها بسرعه ابتسم لها
قال :-ماودك تتغدين
ناظرت في الساعه ولقتها 2 الظهر قامت بسرعة البرق وقالت وهي شكلها بتبكي :-يوه فاتتني الصلاه
ابتسم احمد من تعابيرها وقال :-حاولت اصحيك بس ما طعتي
انتبهت سعاد لوضعهم الجديد وقالت بهدوء :-صار خير الحين بصليهم
وراحت تاخذ شاور سريع ..
صلت ولبست وخلصت..
قال احمد وهو يشوفها ماذاقت الاكل :-تغدي
سعاد :-لا بس
احمد :- تبغين شي محدد
هزت راسها وهي تشرب العصير :-الاكل الثقيل بعد النوم مباشرة يأذى المعده
احمد :- كلام فاضي
هزت كتوفها :-براحتك انا مو متعوده اكل لاصحيت من النوم شي اشربه يقوم بالواجب
ومارد عليه وكمل اكله وطنشها..
حس احمد باتعدام في الشهيه ماله مثيل بس كان ياكل عناد حتى ماتقول انه ما اكل لعيونها يوم عافت الاكل لكن في الاخير ماقدر يتحمل ويجبر نفسه على الاكل اكثر..
ناظرته سعاد وتمنت لو تمسك كاس المويه الي بيدها وتصبه على راسه ..بس مسكت اعصابها وسكتت..
قال :-اذا كنتي جاهزه بنرجع بيتنا الحين وبالنسبه لشهر العسل.............
قاطعته وقالت :-مالها داعي الادعاءات
ناظرها وقال :-عادي عندك ماتسافرين
سعاد :-وضعنا مايساعد
قال يستهزء :-افهم من كذا ان الوضع مو معجبك
قالت بتحدي وقوه :- لاتفسر الكلام على هواك..
ووقفت وراحت تجمع اغراضها القليله..
انقهر احمد من ردة فعلها صحيح ان شهر العسل بيأزم الامور وبيصعبها عليه ..ويمكن يكون معها حق وضعهم مايساعد بس هو مايبي كلام الناس يجرحها ,,
ناظر في جواله الي بيده بعصبيه "تخبلت انا كيف افكر في شعورها وهي ما فكرت فيني يوم "
جمعت سعاد اغراضها القليله بيدين ترتجف..ماكانت متخيله ان اسعد ايام حياتها بتنقلب نكد كذا..والجاي اعظم بس الله يصبرها​

 

[البحر الهادئ]

<>في بيت ابو احمد <>
دق احمد على ناصر لانها فرصته عشان يتطمن على رنا لان قلبه ماكله عليها
ناصر :-هلا والله بالعريس
احمد :-هههههههههههه هلا بك
قال ناصر بخبث :-غريبه متذكرنا للحين
ابتسم احمد من تعليقه وقال :-عن الحركات الي مالها داعي وبشرني على رنا
ناصر :-بخير انا مثل ما وصيتني ما افارقها ابدآ
هز احمد راسه وقال :-وش انطباعات امي طيب
كئب ناصر :-الله يجيرنا شايطه على اخر شي ومتحلفه في رنا وانا خايف ياخوي اجازتي تنتهي بكره
قال احمد :-خير ان شاء الله انا برجع بيتي اليوم
انصدم ناصر :-من جدك
احمد :-ايه
ناصر :ليش طيب
توهق احمد ولازم على الاقل يلقى عذر يبعده عن الشوشره والا تدخلوا الشياب وهم ان تدخلوا في شي قلبوه فوق تحت
قال بنبره لها معنى :-بيتنا اريح لنا والسفر ملحوق عليه انت عارف مامعي اجازه الا اسبوعين بتروح كلها في الروحه والجيه
ناصر :- هههههههههههههههه ماعندك وقت
احمد :-انتبه عليها لا اوصيك والله قلبي مو متطمن
ناصر :-ياخي لاتوسوس انت توك متزوج عش حياتك وانسانا شوي
احمد :-طيب..كيف طلول
ناصر :-يشكي راسه بس بخير
احمد :-اذا زاد عليه الوجع خذه للطبيب وماعليك منه
ناصر :-صار ..يالله رح لزوجتك وعن الهذره
احمد :-يالله سلام
وسكر الجوال وسرح في هالمشكله ..تذكر الي صار ولمس جرحه الي ماطاب للحين لا وصابه شمم من بعد حفلة العرس البارح ومتورم وزايد وجعه لازم يروح للطبيب ويغير ضمادته .والايغيرها هو وتذكر ان الضمادات بالبيت,,ايه لارجه يضمده
جلس يفكر وراسه بين يدينه "كيف بيلقى عذر لابوه حتى تجي رنا وتسكن معه كيف.."
وقفت سعاد تفكر في الي سمعته..وش فيها رنا !!
وليه احمد مو متطمن..!!
كان احمد يكلمها
سعاد :-نعم
كان طفشان وقال :-انعم الله عليك اقول خلصتي
ارتبكت وقالت :-ايه
واخذ شماغه وطلعوا..
في نفس هالوقت ------>>
قالت رنا لناصر :-ياقلبي ياحمود شايلن همنا حتى وهو بعيد
ناصر :- اي والله الله يوفقه يارب في حياته
الا وطلال يدخل :-انتم هنا ياحلوين
رنا :-ههههههههه ايه هنا
سوى طلال نفسه خايف :-الحمد لله خفت حسبتني بلحالي مع الساحرات
ناصر :-هههههههههههههههههههههههههههه سنايدي
عصبت رنا :-عن قلة الادب
قال طلال يبي يقهرها :-بدينا في المحاضرات
قال ناصر :-طفش صح
رنا وطلال :-اي والله
ناصر :- وش رايكم نطلع من البيت نتمشاء
قالت رنا بخوف حقيقي :-انهبلت انت عشان تحرقنا امي بالحيا
هز ناصر راسه :-علقه تفوت ومحدن يموت
تحمس طلال وقال تذكر يا ناصر المقهى الجديد الي مفتتحينه بشارع الملك عبدالله
تذكر ناصر المقهى الروعه الي توه له شهرين مفتتح :-ايه
طلال :-اجل خلنا نودي رنا بيت عمي سعود ونروح للمقهى ونواعد الشله
استانس ناصر :-والله وجبتها شرايك اخت رنا
سوت فيها معصبه وقالت :-تذكرتوا اني موجوده يالله اني احمدك واشكرك
ناصر وطلال :-ههههههههههههههههههههههههه
تذكرت رنا امها وقالت :-خايفه يا ناصر امي تتحلف فيني
ناصر :-دقي على ابوي وخذي منه الاذن وعقبها ماراح يكون لها كلمه
ترددت رنا وتحت الحاح اخوانها دقت على ابوها ووافق انها تروح لبنات عمها ولا وتتعشى بعد عندهم
قالت رنا :-بروح اجيب عبايتي
وطلعت بسرعه وقف ناصر بيلحقها وطاح جواله وانكسرت شاشته على الرخام ونزل يجمع قطعه
في هالوقت لقت ام احمد الفرصه حتى تشفي غليلها من رنا ..وماراح يبرد قلبها الا لما تحرقها بالنار وبما ان مافيه وقت قبل جيت ناصر مسكت سكين الخضار وحطتها على النار لانها كانت على الطاوله محطوطه وفي طلعة رنا من غرفتها ما درت الا وبامها توقف في وجهها وكانت ناويه تحط السكين الحاميه على خدها لولا ان رنا حطت يدها بين السكين وبين وجهها وجاء الحرق بيدها لا ومن قوته لزقت السكينه بجلدها
وعلى صرخة رنا ..جوا العيال يركضون
وقف ناصر مصدوم ووجهه كانه واحد ميت ..وصدمه طلال من ورى وجمد هو الثاني
سالت دموع ناصر غصب عليه وفوق طاقته قال وهو يصارخ :-حرام عليك يالظالمه
صرخت في وجهه :-استح انا امك
قال وهو شبه مهستر :- لا يكرمن الامهات عندك
الا ويجيه منها كف معتبر...وقف الزمن
مافيه شي حي..
الاعيون تتلاقى ..مو مصدقه مصدومه وعيون قاسيه متحجره
قالت نوف الي شهدت اخر شي من السالفه :-آه ياليتها جت على وجهك يالشينه
الا وناصر يفقد اعصابه ويرميها على الجدار وتفقد وعيها وامها تصارخ ..
قالت بهستيريا :-عند ابوك انا ماخليته يحرقك بالحيا ويطردك انت واخوانك المتخلفين ويزوج اختك ذي شايب من ربعه ماكون بنت ابوي
كانت رنا تتالم بالمره ..ويدها تحرقها
طلال ..مصدوم
ناصر منفعل لحد الاجرام
قالا ناصر يتوعد :-قولي له اني انا السبب وشوفي انا وش بقوله
صرخت :- وش بتقول
قال ناصر يستهزء :-بجيب القديم والجديد واعطيك مثال حي ..حادث طلال انتي السبب في عماه حرق يدي وحرق صدر احمد وكسر ضلعه واخرتها حرق رنا انتي انسانه مريضه
انصدمت امه من كلامه ومن تهديده الا تبصم بالعشره انه قاصده وخافت مره لان لو شم نايف خبر بفعايلها هو بيطلقها لكن قبل الطلاق بياخذ حق عياله منها والعين يالعين
شاف ناصر رجفتها وقال وهو يناظر في نوف الي مغمى عليها :-عساها تموت والا انتي يمه مقدر ادعي عليك بس حسبي الله ونعم الوكيل
واخذ اخوانه وطلع..
بعدها بربع ساعه ..قال ناصر لرنا وهم بالسياره :-كيفك الحين
قالت رنا وهي ترجف :-نص نص بس الحمد لله المراهم مسكنه الوجع
قال طلال باكتئاب :-والحين ياناصر
سوى ناصر الوضع ايزي ..عشان اخوانه ولا بقلبه النار قايده :-عادي خطتنا ماشيه ومدام رنا بخير بنوديها بيت عمي ناصر تغير جو
قالت رنا :-احسن شي تسويه
طلال :-براحتكم على الاقل مانشيل همك وانتي في بيت هالاجاويد
وفعلا نزلت رنا في بيت عمها وراحوا العيال مشوارهم..
قالت هنادي وهي تصارخ :-ياهلاااااااااااااااااا وش هالزياره الحلوه
ابتسمت رنا من قلب :-ماعليش ما امداني اكلمك واعلمك عسى مايكون عندك روحه ولاشي
هنادي :-جتني المسج الي ارسلتيه ولو عندي طلعه لعيونك ااجلها
ابتسمت رنا من قلب وقالت :- وين خالتي
هنادي :-مو هنا طالعه
وفجاه انتبهت هنادي ليد رنا المضمده وقالت بخوف :-رنو شفيك سلامات
تورطت رنا وقالت :-يسلم عمرك يالغلا هذا انا من زود الذرابه حرقت نفسي وانا اطبخ
هنادي :-اح يوجع ..رحتي مستشفى
رنا :- توني جايه
الا وبجية منال :- هلا والله برنو احلى زياره والله
رنا :-هههههههههه كبر راسي من كثر الترحيب
هنادي ورنا :-هههههههههههههههههههه
وبعدين راحن البنات وجلسن بالغرفه ..وراح الوقت بين السوالف والوناسه ..حست رنا ببهجه فقدتها طول عمرها وفي قلبها تمنت لو نوف مثل منال الحين مع هنادي طيوبه وحبوبه وضحك ووناسه لا تنافس ولاكره ..
دق جوال رنا..وطلعته من الشنطه لينه احمد ..
قالت وهي توقف :-بالاذن بنات بطلع اكلم فيه احد من العيال
منال :-لا كلهم طالعين وفهد نايم بغرفته من بعد صلاة العصر
تطمنت رنا وطلعت...
اذن لصلاة المغرب وصحى فهد على صوت الماذن وقام ووضا ولبس عشان يجلس بالمسجد حتى يقيم..الا ويلقى بوجهه بنت شعرها احمر غامق طويل معطيته ظهرها وجالسه على الصوفا الي بالرسبشن ومو وحده من خواته متاكد..
قرب منها ..ووقف عند الزاويه عشان لا التفتت ماتشوفه ويقدر يتخبى ..الا ويسمعها تبكي
"هلا احمد...ايه ...
صارخ احمد :-اكيد انتي بخير وش صار
قالت رنا وهي تحس بالم يدها ينبض وانهارت قوتها لما سمعت صوت اخوها الحنون الي شايل همها حتى باحلى ايام عمره
قالت رنا لان احمد لو ماقالت له جاها وهي ماتبي تزعل سعاد :-كنت رايحه باخذ عبايتي عشان اطلع مع ناصر وطلال ومدري كيف الا وهي حارقتني بسكين
انصدم احمد :-سكين
بكت رنا زود :-ايه سكين كانت تبي تحرق وجهي بس الله ستر
ضاقت باحمد الوسيعه وطبق عليه صدره من الضيق:-آآآآآآآآآآآآآآآآآه ياربي
رنا وهي تمسح دموعها :-سليمه يا خوي هذي امي وهذي طبايعها والدليل الي سوته فيك وفي ناصر مو انا الوحيده الا احرقتني
عصب احمد :-مالك معقد معها
رنا :-اعقل يا احمد .. ابوي ماراح يرضى يخليني اسكن معك يفرجها الله بمعرفته ياخوي انا الحين بروح تاخرت على البنات
احمد :-زين اكلمك شوي
رنا :-اوكي
سكرت رنا الجوال ومسحت دموعها..ووقفت اما فهد خاف تشوفه وهج لغرفته بسرعه..
سكر الباب وجلس مو مستوعب الصدمه الي سمعها..صدمة حياته فيه ام تحرق عيالها بالنار..
هو لاحظ يد رنا المضمد كفها كله ..وماتوقع تكون امها السبب ..من جد زوجة عمه مريضه وماهي صاحيه..
حس الدنيا تضيق عليه ..وش العمل
خالد وحرم يتزوجها حتى لو هو ماتزوجها..هو
لا الوظيفه كانت هامته..ولا شي همه..
لكن الحين..حياة رنا التعيسه بيدينه ان وافق يتزوجها بيطلعها من النار الي عايشه فيها لان مستحيل ابوها يوافق يخليها تسكن مع اخوها وهو موجود وان عرف السبب يمكن توصل للطلاق والفضايح وان مادرى بتذوق رنا الويل..
وبتصميم ..طلع بسرعه للمسجد وبراسه بعد الصلاه موال!!

​

 

[ام سلمي]

تسلم ايدج يالغالية والله القصة قمة الروووووووووووووووعة بس التكملة اكيد اروع
لا تحرمينا وكمللللللللللللللللللللللى بلللللللللللللللللللللللللييييييييييز

 

[sara3]

روعة يا البحر الهادئ

يا ترى شنو الموال اللى براس فهد

ما اعتقد هذى امهم هذى سوايا مرة ابو

اعتقد ان سعاد واحمد راح تمشى امورهم.ناطرين حبيبتى بقية الاحداث يسلمو:ggdw:

 

[لـــــ الكويت ـؤلؤة]

وللة وكاسرة خاطري رنا كيف امها يهون عليها تحرق بنتها
المفروض ما يسكتون عنها وابوهم يوقفها عند حدها قبل لا تتمادا امهم
مو كل ام ام00000000000000000
كيف اتربي اجيال هذى
لا لا المفرووووووووووووووض ما يسكتون عنها

 

[البحر الهادئ]

يعجبني هالحماس يابنات يعطيكن الف عافيه

 

[البحر الهادئ]

الفصل العاشر
(الجزء الاول)
><الساعه 3 الفجر><
كانت الماس نايمه وسعود يناظر فيها..اختفى لونها مع ايام المرض وليالي التعب كانت تتسحب دايم وهو نايم وتعاني بلحالها ولاكنها داريه انه ماتغمض له عين ولا يغفى له جفن ..
جلس يمسح على شعرها بيده الحنونه ودمعته سايله على خده.."آآآآآآه يالغاليه ياليتني انا الي مكانك اعاني.."
فتحت الماس عيونها وشافت سعود يناظرها بعيون ما ترمش ودمعته على خده تسيل ..
الدمعه الوحيده الي تسللت من قوته ومناعته الي يظهرها قدامها..عرفت دايم انه حنون وانه يحبها بس ماعرفته ضعيف بضعفها..
قالت بهمس وتعب :-حبيبي ليش مانمت
انتبه انها صاحيه مسح دمعته بسرعه وابتسم وقال :-مافيني نوم ارجعي نامي
قالت بحب :-كيف انام وانت كل ليل دمعتك على خدك
ابتسم غصب بيسوي الموضوع ايزي :-آها فيها قبايل ذي من لعب عليك وقال هالكلام
ابتسمت غصب وقالت له وهي تمسك يده بقوه :-يانور عيني احس بك حتى لو ماشفتك
قال وهو يشد اصابعه على اصابعها :-وش حاسه الحين
حاولت تجلس بس ماقدرت كان راسها مصدع ودايخه مره :-تمام بس دايخه مره..وكبدي تحوم علي
نزل من السرير وراح يمشي
سالته الماس :-وين...؟؟
قال وهو يطلع من الغرفه :-دقيقه وراجع
بعد خمس دقايق
رجع سعود ومعه كاس ليمون مد يده لالماس وقال :-سمي بالله
قالت :-ليمون وع ما احبه
ابتسم سعود غصب عنه وقال :-اشربي العصير الحين عشان ترتاحين
عندت الماس :-ما ابيه
عند سعود :-تشربينه ولا شلون
الماس :-هههههههه يمه خفت وش بتسوي يعني
سعود :-هههههههههههههه اقول لا تتحدين
ناظرته الماس بغرور ..وماردت
سعود:-ماقد ربحتي اي تحدي معي فلا تفشلين عمرك الحين
الماس :-ما ابيه
سعود :-الماسوه
انقهرت الماس لانها ماتحبه يناديها كذا وابتسم هو لانه يعرفها ماتطيق هالاسم ..
وبرمشة عين ركضت الماس للحمام ورجعت ...حست بمعدتها انقلبت عليها يوم شمت ريحة الليمون
انصدم سعود هذا حالها كل يوم ...
ساعدها ترجع لسريرها وقال والخوف لاعبن في اعصابه "وش العمل يالغاليه لمتى بتمين على هالحاله ..كذا بتموتين جوع "
كانت الماس مره تعبانه وماقدرت تردعليه..وبسبب تعبها نامت بحضنه بسرعه ..
غطاها سعود زين وطلع من الغرفه يشيك اذا وصله فاكس من المانيا ..دخل مكتبه ولقى مامن جديد..
جلس على مكتبه يفكر بهالمشاكل الي محاوطته من كل جهه .. مرض زوجته .. جلسته بدون شغل..
وتذكر مكتبه الي كان ناوي يأسسه بالشرقيه لازم ينقله هنا الرياض عشان مايتعب الماس بالمشاوير ولايبعدها عن اهلها لان نفسيتها راح تتأزم
وجلس يراجع اوراقه وخططه ..عشان يفتح مكتب للاستشارات الماليه بحكم خبرته في الامور الماليه والاقتصاد وبوضعه قبل بشركة العايله كمدير تنفيذي لها يأمر وينهى..راح يضطر الحين انه يبدء من الصفر وماصابه احباط ولاشي لان راس المال موجود وهو يتمتع بخبره ممتازه وبمؤهلات عاليه تساعده في مشروعه ، ويمكن لاول مره بحياته حس بالاستقلاليه واهمية شغله ومرد هالشعور لنفسيته الي كانت في حاله سيئه الشهور الي مضت ، مل من تدخلات شياب العايله ومل من تخريبهم لحياته بنية يجيه مولود ..طيب هو راضي بقدره وبالي كتبه الله له ..ليه هم ما يحترمون رأيه ووجهه نظرة كل همهم الورث والورث..هذا هو تركه لهم بكبره..
سند ظهره للكرسي ..وجلس يفكر
ناظر في جواله الي حاطه من المغرب على المكتب ولايدري عنه من ذاك الوقت ..فتحه لقى عشر مكالمات من ابوه ومكالمتين من فهد ومكالمه من الدكتور المسأول عن حالة الماس..انقبض قلبه خير اللهم اجعله خير
اخذ جواله وجرب حظه يمكن يلقى فهد صاحي الحين لانه يحب يقوم ويروح للمجلس لين يقيم والاذان على وشك ياذن
بعد ثالث دقه رد فهد :-هلا
سعود :-سلام
فهد :- وعليكم السلام والرحمه وينك دقيت عليك اليوم مارديت علي
سعود :-ماعليه كنت ناسي جوالي بالمكتب
استغرب فهد :-رجعت للشركه
قال سعود بقوه :-مارجعت ولا راح ارجع
قال فهد :-بس انت قلت.......
قاطعه :-ناسيه بمكتبي الي بالبيت
فهد :-هههههههههه على بالي المهم بعلمك بشي
سعود :-خير اللهم اجعله خير
قال فهد يمزح :-وانا مايجي من وراي الا كل خير
سعود :-هههههههههههههه عن الخراط وعلمني وش عندك
فهد :-بتزوج
انصدم سعود :-ايش
قال فهد وهو بيموت من الضحك على لهجة اخوه المصدومه :-بتزوج ياخي حرام ولا عيب
بدا سعود يستوعب السالفه :-هههههههههههههههههههه لا موحرام ولاعيب
فهد :-على بالي
قال سعود يبي يقهره :-من هي تعيسة الحظ احمممم اقصد سعيدة الحظ
عصب فهد :-امحق اخو الحين تشوف الي بتاخذني تعيسه الا امها داعيتلها
سعود :-هههههههههههههه ماقصدت سقط سهوا
فهد :-اقول سهوا ولا ماسقط احسن
سعود :-هههههههههههههههههههه طيب لا تزعل من هي الي امها داعيتلها
فهد :-ههههههههههههههههه ايه قل كذا من اليوم
سعود :- اعرفها ..؟
فهد :-ايه رنا بنت عمي نايف
ابتسم سعود :-ونعم الاختيار والله ؟؟
قال فهد بكآبه :-اي اختيار والي يسلم عمرك كلها من تخطيطات الشياب
انقهر سعود :- لاحول ولاقوة الا بالله
قال فهد يخفف عنه لانه ذكره بسالفة نوف :-عادي ياخوي ترى الوضع ايزي
قال سعود بقوه :-اذا ماتبيها ماعليك منهم هذي هي شغلتهم تنكيد حياتنا
قال فهد :-لا ياخوي صح اني في البدايه رفضت رفض قاطع بس امس غيرت رايي ووافقت
قال سعود بمرار بحكم تجربته :-وش هددك ابوي ابه
فهد :-يطردني من وظيفتي
صرخ سعود :-ايش
فهد :-الي سمعته
تحطم سعود :-مو معقول ماني مصدق
قال فهد بحزن :-لاصدق
وتم سعود ساكت عرف فهد انه زودها على سعود وحط براسه فكرة انه مايبي رنا وانه متزوجها عشان يحافظ على وظيفته عشان كذا لازم يصحح له نظرته ويصارح اخوه ب الي في قلبه لانه مايقدر يصارح خالد على الرغم من انه صديقه الروح بالروح بس هالمسأله مره حساسه وهو مايبي احد يشفق على رنا ويرحمها ويقول هذي الي تزوجها ولد عمها عشان يفكها من جبروت امها والمآسي الي تسببت لها ..
قال فهد بعد تفكير :-شف انا طالع الحين من البيت نتلاقى في المسجد الي قريب من بيتك ابيك بسالفه
هز سعود راسه وقال :-اوكي
فهد :-يالله سلام
وقف سعود عشان يتوضى ويروح يصلي الفجر ...

​

 

[البحر الهادئ]

>بعد الصلاه رجع سعود وفهد سوى <
قال سعود وهو يدخل فهد المجلس :-بطل على الماس وبرجع لك
ابتسم فهد :خذ راحتك
ضحك سعود :-لاتوصي
راح سعود لالماس ولقاها تطوي سجادتها وجلالها وتحطها بمكانها ابتسم وقال :-حبيبة قلبي كيفها الحين
ابتسمت الماس :-بخير ياحبيب حبيبة قلبك
ضحك وقال :-اقول لا تقولين هالكلام اتهور
حمرت خدودها وقالت بجرأه :-تهور احد ماسكك
انقهر سعود وقال بملامح ضعف وقلة حيله ضحكت الماس :-شين الحلايا هنا وبروح له
عقدت الماس حواجبها :-من سليطين
سعود :-لا شين الحلايا الثاني
الماس :-ههههههههههههههه فهود
سعود :-ايه ماغيره
خافت الماس وقالت :-خير ان شاء الله عمي فيه شي عمتي.......
مسكها مع كتوفها وقال :-هدي هدي مابهم الا العافيه
مسكت قلبها :-اشوى خفت
قال سعود :-تلاقينا بمسجد الحاره وعنده موضوع يبي شوري فيه
الماس :-موضوع
سعود :-ايه اعلمك بعدين اوكي
ابتسمت بكل حب :-اوكي قلبو
راح سعود فيها ...وقال بتعصيب :-ما اقول الا الله يبلشك يافهيدان والا كان لون هالليله رمادي
الماس :-هههههههههههههههههههههههههههههههههه
قرب منها وقالت له وهي تشوف نواياه :-اقول يالاخو اخوك مرتزع برى رح له لا يجينا يتهبد كالعاده
تذكر سعود دفاشة فهد يسويها والله..
وما امداه يكمل تفكيره الا وفهد جالس يغني عند اخر درجه تحت
الماس :-هههههههههههههههههههههههههه يا حبني لخفة دمه
ناظرها سعود بنص عين :_ احلفي بس
عضت على شفايفها لا تفطس من الضحك من غيرته وقالت :-امزح امزح
ابتسم وقال :-ايه على بالي
وقاطعهم صوت فهد وهو يغني اغنية خالد عبد الرحمن ابصملك على العشره
الماس :-هههههههههههههههههههههههه رح له تفجرت روسنا من صوته الي كله نشاز
عطاها سعود بوسه طايره ...وطلع
حست الماس بوجهها مولع من حركته ...ليه هو الرقه والرومنسيه غريبه على سعود

قال سعود :- اقول انطم لو يدري عنك ابو نايف اعتزل
فهد :-هههههههههههههههههه ياخي يوم كنت ناوي تجحدني ورى ماقلت لي انطق بالبيت ولا اجيك واتعب عمري
سحبه سعود ورجعوا للمجلس :-هههههههههههه ظروف
غمزه فهد :-احلف ..ظروف هههههههههههه
ناظره سعود :-ههههههههههههههههه تراني اكبر منك بسبع سنين اعقل وخلك ثقيل
قال فهد بغرور :-انا عاقل وثقيل من يوم يومي
سعود :-هههههههههههههههه والدليل الحفله الي محييها في بيتي تو
فهد :-هههههههههههههههههه ياخي اذكرك اني هنا
سعود :-طيب طيب خلنا فالمهم
جلس فهد وتغيرت ملا محه فجاه
لاحظ سعود هالتبدل من المزح للجد وقال بتوتر :-خير وش فيه انا اعرفك ماراح تجيني في مثل هالحزه الا ووراك شي كبير
هز فهد راسه وقال :-كبير وبس ياخوي الا صدمة حياتي
عصب سعود ووصل حده :-خل عنك الالغاز وادخل في الموضوع طوالي
هز فهد راسه وقال :- اول ماقال لي ابوي الموضوع عصبت مره ورفضت ومن يوم مارجعت من الشرقيه وكل ماشاف خشتي كرر علي نفس الموال تاليتها قال لي ان معي فرصه لين ينتهي زواج احمد وسعاد لان عطلتي تنتهي امس يعني اليوم الثاني لزواجهم
سعود وهو عاقد اصابعه بقوه :-طيب
كمل فهد :-انت تعرفني ما احب احد يمشي كلامه علي ولا يفرض قراراته حتى لو كان ابوي هو صح يمون علي ويامر وينهي على الروح بس لموضوع اختيار شريكة حياتي ويوقف انا رفضت بكل قوتي فقال انه راح يفصلني من وظيفتي وحلف بهالشي وبصراحه ماشكيت دقيقه في كلامه لانه سوى هالشي فيك وانت الكبير ومدير الشركه يعني بيرحمني انا
وصل سعود حده :-المهم
فهد :-المهم نويت ما ارجع عن قراري والوظيفه بكيفها ..بس
سعود :-ايه
ناظره فهد وقال بجديه :0ثقتي فيك ياخوي كبيره وهالشي الي بقوله لازم يصير بيننا
هز سعود راسه وقال :-افا يافهد حنا اخوان ومايحتاج توصي
فهد :-عارف عارف...
سعود :-طيب وش الي صار وخلاك تغير رايك
مسح فهد وجهه بيدينه وقال :-امس وانا نايم صحيت عشان اصلي المغرب ويوم طلعت من غرفتي الا واشوف لي بنت قاعده بصالة الاستقبال فوق وتكلم
عقد سعود حواجبه :- من هي
فهد :- رنا
انصدم سعود :-رنا بنت عمي
هز فهد وكمل :-المهم بالاول ماعرفتها بس كانت تبكي وهي تكلم وكانت كف يدها ملفوف بضماد..
مافهم سعود شي وش دخل مكالمة رنا ويدها المجروحه وبكاها بالجوال بموافقة فهد بالزواج منها
عرف فهد وش كان يفكر فيه وقال :-تخيل ياخوي ان امها هي الي حارقتها بالنار
صدمة الدنيا تجلت بوجه سعود...
وقال فهد بقهر :-لا وقد حرقت احمد وناصر وان ماخاب ظني بسببها ..واحمد كان معصب وهي تكلمه والظاهر كان يبيها تجي تسكن معه هو وسعاد بس ابوه الظاهر ماراح يرضى..
كمل سعود :- وبالتالي بتعيش رنا بين يدين هالوحش..لان عمي عنيد وماراح يوافق تترك بيته صح
فهد :-ايه والبنت اخلاق وذوق والبنات دايم يذكرنها بالخير ومالها امل غيري .. لان من هنا لين تنخطب بتكون امها الظالمه قضت عليها تخيل كانت تبي تحرق وجهها
قال سعود بحقد زود على حقده عليها وعلى بنتها نوف :-حسبي الله على الظالم
وقف فهد :-انا بروح انام لاننا بنخطب بكره لازم تجي معي
تذكر سعود وقال :-ايه عشان كذا ابوي هالكن جوالي من كثر مايدق خلاص تم متى نويتوا
فهد :-العصر
كان فهد دوم كبير بعين سعود وكبر الحين اكثر واكثر ..
سعود :-الله يوفقك ياخوي ويجزيك بالخير
ابتسم فهد :-يسلمو يالله see you
وراح فهد وطلع سعود فوق...

​

 

[البحر الهادئ]

<)(يوم الملكه)(
قالت نوف لامها وهي تبكي من قلب :-وش شايفيني عيالك يمه كل واحد بس يضرب فيني
قالت امها وقالبها شايل :-عساهم الماحي والا اختك الي ملكتها الليله ومحدن عبرني واخذ رأيي
قالت نوف :- لا ومسوين لها حفله ببيت احمد وبيتنا وش فيه
طبعاالفكره هذي كانت من اقتراح طلال ابو الخطط ..هو عارفين ان امهم ونوف بينكدن على رنا ليلتها عشان كذا عجبتهم فكرة ان الحفله بتكون في بيت احمد ولو انه مامر على زواجه غير ثلاث ايام وعشان ما تنحرج سعاد لان توها عروس خلى احمد العزيمه للرجال فقط
قالت امها :-بالطقاق ..
طلعت رنا من غرفتها وفستانها بكيس معها وقالت والغصه خانقتها :-يمه ماودك تحضرين ملكتي
ولا قلب يرحم ولا احساس يتأثر
قالت وهي تناظرها من فوق لتحت :-توك تذكرتي امك
قالت بتعب :-انا ذاكرتك دايم العتب على الي ناسيني ومو معتبر لوجودي
وقفت امها وجتها طايره بتصفقها كف الا وبيد تمسك يدها الي بتنمد على رنا
بغت تموت ام احمد من الخوف لان ابو احمد هو الي مسكها..
ناظر في يد رنا وقال :-امك السبب
سكتت رنا ، ناظر في ناصر الي يدها كانت مربوطه
ابو احمد :-وانت بعد
سكتوا العيال ووصل ابو احمد الجواب ..
قال بهدوء :-انتي طالق
انصدموا العيال وصرخت رنا ..:-لايبه تكفى مو بليلة ملكتي
قالت ام احمد بصدمه :-تطلقني يانايف
ناظرها باشمئزاز وقال :-المفروض اني مطلقك من زمان بس عيالي كسروا ظهري والحين كبروا وصارو كلهم فاهمين وعلى وجيه زواج اما انتي طابت النفس منك من متى تهتمين في بيتك او عيالك فيه ام تشوه عيالها انتي مريضه ولولا حلف احمد ورجاويه وحبته ليديني كان يدينك هذي الي حرقت عيالي بتنشوي في النار
ارتجفت ام احمد من كلامه ..
واخذ ابو احمد عياله وطلعوا ...كانت رنا تبكي قال ابوها لها :-يبه لاتحطين بخاطرك ولاتهتمين فكري في مستقبلك انتي الحين بتكونين في ذمة رجال فكري فيه وفكري كيف تسعدينه وامك برجعها لا تخافين بس حبيت اعطيها درس ما ينسى ..يكفيني قهر انها ماراح تحضر ملكتك
مسحت رنا دموعها :-ان شاء الله يبه
قال ناصر اخيرآ بعد صمته من الصدمات الي صارت :-يالله بنزلك عن سعاد وبنروح الشركه
هزت رنا راسها ..وحرك ناصر السياره
،
،كان احمد جالس مهموم حتى الغداء ماطب بطنه وسعاد غصب عنها عافت نفسها الاكل لانه ماذاقه ..
اما الحين فهم على وجه المغرب وهو مانطق كلمه من امس
قالت سعاد غصب عنها :- احمد
وما انتبه..
علت صوتها شوي :-احمد
التفت يمها وقال :-نعم
قالت وهي ماتقدر تنزل عيونها من عليه :-احطلك شي تاكله
قال وهو يصد عنها :-لا
قالت برقه :-بس انت ما اكلت شي من امس
قال بعصبيه :- وانتي وش عليك مو متزوجتني غصب
انقهرت سعاد من ردة فعله هذا جزاها يوم كانت خايفه على صحته ..هذا جزاها الي ما اكلت شي بسببه من البارح
وقفت ولاول مره تحس بالدموع من جد تحرق عيونها وراحت تركض لغرفتها ...
جلست على طرف السرير وهي تمسح دمعه قهرتها ونزلت غصب..
جلس احمد جنبها وقال يطلب سماحها :-لاتزعلين مني انا تعبان شوي
قالت بصوت مخنوق فيه الصيحه :-لاعادي معك حق
انقهر احمد :-لا مامعي حق
قالت :- انت ليش مهتم بمشاعري لها الدرجه مو انت تزوجتني عشان تذلني
جمع على اصابعه من التعصيب وقال وهو يمشي طالع :-تصدقين عاد لو اقولك ان جرح مشاعرك اخر شي ممكن افكر فيه
رفعت عيونها وطاحت بوجهه وهو يناظرها بقوه ..حمرت خدودها..ولمست ازارير بلوزتها بتشوف هي مفتوحه ولا لا عشان يبحلق فيها كذا
ضحك احمد من قلب من حركتها ذي ..وانقهرت سعاد منه وقال قبل لايطلع"اذا تبغين تشوفين مواهبي في الطبخ الحقيني في المطبخ"
قالت سعاد وهي مذهوله :-هاه
احمد :-ههههههههههههههههه تبغين تشوفين مواهبي بالطبخ
انصدمت سعاد :-انت تعرف تطبخ
قال بغرور :-واحسن طباخ بعد
وطلع من الغرفه ، جلست سعاد مبلمه من الصدمه احمد يطلب منها تروح معه للمطبخ لا وهو الي يطبخ لها ..شكله مايحب يزعل احد وهذي طريقته في الاعتذار
هزأت سعاد نفسها "قومي يالخبله الحقيه ماراح تحصل لك مره ثانيه"
وراحت تركض للمطبخ..
<*>
جلست سعاد على واحد من كراسي المطبخ الفضيه المرتفعه وحطت يدينها تحت ذقنها تناظر احمد وهو مرجع اكمامه ورى ..ويجهز الاغراض الي بيحتاجها لطبخته
ماقدرت سعاد تنزل عيونها عنه ..وتخبلت عليه في نفسها ماكانت متوقعه طلته بهالروعه ..لانها اول مره تجلس مرتاحه وتقزه وهو لاهي عنها
"آآآآآآه ياقلبي " قالتها في نفسها بس حست بالدنيا كلها تسمعها ..
مااحد يلومها عيونه بلحالها تخبل .. قد سمعت بالعيون الكحلى بس اول مره تشوفها عيون ضيقه سود ورمش عكش (كثير منعكف) تحت حواجب طويله عريضه سوداء كانها مرسومه رسم بوجه اسمر قوي .. ينزل رهبه بقلب الواحد
لامت نفسها على هالافكار الي تودي للانتحار (هههه) و قالت تبتسم له :-مســــاعده
شاف ابتسامتها العذبه من هنا وطاحت الدجاجه على رجله من هنا:-اخ ...
سعاد :-هههههههههههه هذي اولتها
انقهر احمد ..من نفسه ياخي البنت بس ابتسمت لك و شف وش صار طاحت عليك الدجاجه المثلجه بغت تكسر رجلك ..
وقفت سعاد وراحت له عشان تساعده كانت لابسه بلوزه بيضاء قطنيه ضيقه اكمامها قصيره مره وعليها كتابه فضيه من قدام..وبنطلون جنز ضيق وشعرها رافعته شنيون حايس روعه ومسويه مكياج خفيف زاد في جمال عيونها وحاطه قلوس زهر فاتح روعه وطبعا متعطره وريحة عطرها تسحر ..​

 

[البحر الهادئ]

ناظرها احمد :-على وين
حاولت تمسك نفسها لاتضحك :-بساعدك
ناظرها من فوق لتحت .. وانتبهت لنظراته وحمرت خدودها وهي تلعن نفسها لانها جريئه بزود والدليل لبسها ذا وش بيقول عنها الحين صدق انها خبله المفروض تلبس جلابيه بلوزه طويله ساتره مو ها اللبس كانها من جد عروس سعيده
ابتسم احمد وهو يشوف خدودها مولعه "سعاد القويه العنيده تحمر خدودها من يصدق"
ومن زود الرباشه وهي تمشي لجهته مكان الدجاجه يوم طاحت شويه مويه من الثلج الي كان عليها وصندلها (تكرمون) يزحلق خلقه بدون وجود مويه ، الا وتزحلق وشوي وتطيح على ظهرها .. وتتأذى صرخت من الخوف وحست قلبها بيوقف لان الطيحه بتكون قويه
انهبل احمد يوم زحلقت بالمويه ووقف الزمن حوله رمى الدجاجه على الطاوله ولحق عليها قبل لاتطيح..
تمسكت سعاد فيه ..بكل قوتها وبلاشعور ..مع قميصه من قدام الي تقطعت على طول ازاريره الخمسه الي فوق ضمها لصدره وحس مثل الكهرب الي سرى به ومارحمه ..
وصلت سعاد لمرحلة الهستيريا اول مره يضمها احد بهالطريقه ..
ماصدقت خبر توقف الا وهي مبعده عنه والحياء مقطعها ماتدري كيف تواجه عيونه وتواجه نظراته بعد ماتمسكت فيه بدلاخه وغباء وكانها بتطيح بنار مو رخام ..ياليتها طايحه كان اصرف لها
رفعت عيونها شوي ...الا ويطيح نظرها على صدره
صرخت بصدمـــــــــــــــــــــــــــه من الي تشوفه ..
انتبه احمد لقميصه المفتوح وسكره بسرعه ..وقال بيغير الموضوع وبيرحم نفسه من العذاب الي فيه والي يسببه قربها منه وريحته عطرها الي بأنفاسه الحين :-انتي بخير
هزت راسها بصدمه ماخفتها ..
قال يمزح :- الله ياخذها ذا الدجاجه شكلي برميها
ضحكت غصب :-اخذها الله وخلصت
ضحــــــك من قلبه
انهبلت سعاد لانها اول مره تشوفه يضحك فيها .. يازيــــــــــــــــــــــــــــــــــنه ويازين ضحكته
شاف احمد نظراتها الزايغه وقال بخوف وهو يقرب منها :-سعاد قولي الصدق انتي بخير
استغربت سعاد من سؤاله الي فيه نغمة خوف عليها ,, هذي النغمه ماتنوجد الا في صوت من يحب وهو مستحيل يحبها وان حبها بيكون مثل زوج دانه الاولي ..يحب دانه على طريقته وحبه ما يمنعه من الحرام والنظر يمين ويسار وهذا الي تتمنى الموت على قبوله.
كان يناظر بلوزتها الي كانت بدون ما تنتبه مرتفعه عن بطنها ..بسرعة البرق زينت بلوزتها ونظراته مازالت تقزها
قالت تصرف نظراته الغريبه لها :- ا..ا ..احمد صدرك علامه
نزل احمد عيونه لان افكاره بدت تنحرف ..صدق ماهو بصاحي
قال وهو يعدل ياقة قميصه ويرجعها ورى :- حادث
ارتجفت وجتها الصيحه :- متى..؟؟
قال يسأل بجد مو تهزيء كالعاده :-انتي مهتمه من جد ..؟؟؟
قالت وعيونها تلمع لانها حست بالاهانه من سؤاله وش شايفها :-اجل
ابتسم نص ابتسامه وقال :-قبل عرسنا باسبوعين
قالت وهي تحس بالخوف عليه يشلها :-من ايش...؟؟
حط احمد الدجاجه في قدر وحطه على النار ..وقال يبي يصرف الموضوع بأي وسيله :-حادث مايسوى ..
وكمل وهو يلتفت لها :-اذا لسى مصره تساعديني قطعي البصل
جاب سيرة البصل من هنا .. وتقرفت من هنا وقالت وهي مصدومه :-وعععععع بصل يالله بس قطعه انت
احمد :-هههههههههههههههههه تراه بصل مو شي ثاني عاد لو اقولك اذبحي خروف وش بتسوين
طلعت عيونها قدام ..
وقالت :- والله مابقي الاهي .. انا ما اقدر اشوف دم قدامي تبغاني اذبح كائن حي
ماقدر احمد يمسك نفسه وجلس يضحك
عصبت سعاد :-لا والله انا مخترعه وانت تضحك وش الي يضحكك
احمد :-ههههههههههه اضحك من كلمة كائن حي ياكبرها هههههههههههههههههههه
ماقدرت تمسك نفسها لان طبعها مزوحي وضحوك ..وجلست تضحك معه
قال يمزح :-طيب قطعي الفلفل الاخضر والطماط والا فيهم مشكله بعد
قالت وهي تناظره بغرور :-وش قالولك ... على ان ريحتهم تحوم الكبد وتجلس باليدين الا ان طعمهم يمي
"والله لو تنقعين بقدر كله طماط وفلفل تهبليييييييييييييييين "
انجن احمد من اسلوبها في الكلام ..لسانها يقطر عسل ما ينلامون اخوانها الي شوي ويبكون يوم ساعدوها تركب بالسياره معه الجلسه معها ما تنمل..
وقفت تحوس بالمطبخ..ناظرها احمد وقال يمزح والابتسامه مالية وجهه :-اذا ماعندك خبر الطماط والفلفل ينحطون بالثلاجه مو بدرج المنظفات والمناشف
كانت سعاد معطيته ظهرها ..ضحكت منه والتفتت له وهي مسويه مغروره ..
وقالت :-عارفه .. والحين وين مريلة المطبخ
ناظرها احمد وقال وهو عاقدن حواجبه :-وش هي ذي..؟؟
ناظرت فوق وقالت :-ذي الله يسلمك يلبسونها فوق الملابس عشان ما تنعدم من الشغل وعشان ريحة الاكل
فهم احمد وقال وهو ياشر بالملعقه الخشب :-هونيك
سعاد :-هههههههههههههههههه طيب ياهونيك
رجع احمد يكمل الخلطه الي يسويها ولقت سعاد مراييل المطبخ..
قالت له بتهور :-المفروض تلبس وحده حرام قميص ارماني يروح فيها ..
التفت يمها وقال ببراءه :-تعالي لبسيني وحده يديني مو نظيفه
"ياليتني مسكت لساني استاهل الي يجيني صدق اني خبله .."
ناظرها احمد وهي جامده وابتسم ..لانه عرف تفكيرها ، انقهرت منه مو على كيفه يستهزء فيها بتلبسه المريله وش دعوه ماتسوى السالفه
عاندت واخذت له وحده ..وجته تمشي ..حست بحياء تحاول تدفنه من كثر عنادها..
وقف قدامها ونزل راسه لها عشان تربط عليه المريله الي من قرادتها كان خيطها قصير ولازم تقرب منه عشان تقدر تربطه كانت يدينها ترتجف وماقدرت تفلح في ربطها ..لانه مره مره قريب منها ..
وبعد محاولات ربطتها..على رقبته
رفع راسه وقال وهو يبتسم :-ياليتنا من حجنا سالمين
انقهرت سعاد الحين وجهها مولع وجسمها كله ينتفض وهو يستهزئ فيها قالت بقهر :-احمد ربك
ناظرها احمد وقال :-احلفي
ناظرته بنص عين :-والله
الا ويحط يده الي كلها مايونيز واشياء مخلطها كثيره على وجهها ..صرخت بضحكــــــــــــــــــــــــــه :-حسبي الله عليك يا احمد وووووووووووع
ماصدق احمد الحركه الي سواها وجلس يضحك من شكلها ..ومادرى الا وترد له الحركه وتعدم وجهه وملابسه
وجلسوا على هالحاله ..
"احمممممممممممممممممممممم"
التفت احمد وهو ماسك في يده من الخلطه الا ورنا واقفه على الباب ومصدومه من اشكالهم ..
شوي الا وتنفجر بالضحك :-هههههههههههههههههههههههههه علامكم انهبلتوا
وناظرت في وجيههم وملابسهم والمطبخ الي كله مايونيز سايل على الدروج والارضيه ..
ضحك احمد وسعاد..
احمد :-مدري عن بنت عمك ذي ماهي بصاحيه
سعاد :-لا والله انا الي بديت
رنا :-ههههههههههههههههه خلاص انا الغلطانه ..
احمد سعاد :-هههههههههههههههههههههههههههههههههههههه
قال احمد وهو مو مرتاح لشكله كذا قدام رنا :-يالله بروح اخذ شاور
الا وسعاد تقول هالكلمه بنفس الوقت
انحرجوا كلهم .. وكانت رنا اكثرهم الي قالت :-روحو انتم وانا بنتظركم
وراحوا سوى عشان ما يشككون رنا في وضعهم الي لو درو عنه الشياب قلبوا عاليها على واطيها..
دخل احمد غرفته .. وسعاد غرفتها
خلص احمد الشاور ولبس ثوب وشماغ ونزل بسرعه ..لقى رنا منظفه المطبخ بمساعدة الشغاله ومضبطه القهوه ..
قال احمد :-كفو والله رنو لو يدري فهيد انك منظفه مطبخ بيتي ذبحني
حمرت خدود رنـــــــــــــــــــــــــــا وضحك احمد الي قال :-يالله دقايق وراجع علمي المدام
رنا :-ههههههههههههه ان شاء الله
وطلع من البيت ..
في السياره جلس احمد يفكر في احداث اليوم ..تذكر سعاد وعذوبتها ورقتها ..ذكر سؤالها عنه ..مساعدتها له ..نظره الاهتمام الي بعيونها ..
احساسه بوجودها حوله في كل مكان
والله حرام ..ما يهتني بالنوم ابد..صابه ارق ومانام من يوم ماجمعه بها بيت زي خلق الله ، ليش يكابر ليه ماينسى..
نفض هالافكار من راسه كيف ينسى ..عز الله انه بيكون رخمه ان نسى سواياها فيه
في وقت كانت سعاد لابسه وجالسه تمشط شعرها بسرعه عشان تنزل..تذكرت كل المواقف الي صارت لهم بالمطبخ..احمد اليوم ماهو احمد الي عرفته الايام الي فاتت كان يمزح ويوسع الصدر والاهم انه كان يهتم فيها حتى لو انكرت هالشي ..لان لغة العيون ونبرة الصوت ما تكذب ..
حزنت وفكرت ..لوين بيودينا هالطريق ..اي مصيبه هالمره بتبعدنا عن بعض !!
نفضت عنها هالافكار ونزلت لرنا ..
سعاد :-ياقلبي يارنو سوري تاخرت
رنا :-ههههههههههههههه شدعوه tick your time
سعاد :-ههههههههههههههه ماعاد ورى هالتيكه
رنا :-هههههههههههههههههههههه
التفتت سعاد تدور احمد ..قالت رنا:-احمد طلع ويقول راجع
انصدمت سعاد وحزنت بنفس الوقت لانه طلع بسرعه :-ماعاد عندنا وقت لازم نروح للمشغل
ناظرت رنا بالساعه وقالت :-هههههههههههههههههه سعاد الله يعافيك تونا الساعه 6
سعاد :- حتى لو الملكه الساعه تسع وخلق الله بيجتمعون من بعد صلاة العشاء
قالت رنا تمزح :-هههههههههههههههههه ماغير الشله وخليهم ينلطعون عادي
سعاد :-هههههههههههههههههههههههههههه
الا وبدخلة احمد ومعه وجبات ..سريعه
احمد وهو يناظر سعاد :-هذا غداء متاخر وبدال الحوسه الي تو
سعاد :-ههههههههههههههههههههه جاء بوقته
وتغدوا غدا متاخر على قولة احمد ..وبعدها قال :-يالله تروحون المشغل
رنا :-انا جاهزه
سعاد :-دقيقه بجيب عبايتي وشنطتي وبجي
طلعت سعاد بسرعــــــــــه واخذت عبايتها من الدرج ..وهي مشغوله تحط اغراضها بشنطتها الا وبدخلة احمد الغرفه ..ناظرته وطاح قلبها لانها اول مره يدخل غرفتها
طلع بوكه وسحب فلوس وهو يقول :-خذي
ناظرت بشنطتها :-معي فلوس
عصب احمد لكنه مسك عمره :-خلي فلوسك معك انا زوجك ومسؤل عنك
ناظرته وقالت :-مايحتاج
عصب وقال وعيونه كلها شرر :-سعاد صبري مو طويل
ولاحياة لمن تنادي
سحب بوكها بسرعه وقالت له :-احمد جبه
احمد :-لا
يئست منه وقالت باستسلام :-اوكي موافقه اخذها بس رجع بوكي
احمد :-احلــــــــــــــــــــــفي
عصبت هي هالمره :-مايحتاج كلمتي سيف
ماقدر يمنع نفسه وقال :-جربت كلمتك قبل هالمره وما عاد اثق فيها
جرحتها هالكلمات وقالت بانفعال :-ذيك المره غير
قرب منها وقال وحزن هالسنين يطلع :-ليه غير وش الفرق انتي وعدتي واخلفتي بوعدك ومتى بليلة ملكتنا
انصدمت سعاد وقالت بقهر ما ينوصف :- ولك عين تتهمني بعد الي سويته
انصدم من قلب احمد وقال بذهول :-وش سويت ..؟؟
تنكدت حياتها :-لا تسويلي فيها ماتدري انت قضيت علي
احتار احمد من كلامها :-انتي وش تقولين
قالت بانكسار:-انا نسيت انسى وخل ها الليله تعدي على خير
احمد :-بـس............
سعاد :-عشان رنا
مسكته مع اليد الي توجعه ..وقرر يتناسى الموضوع شوي وله تفاهم معها وش قصدها ببعد الي سويته ..​

 

[ام سلمي]

رووووووووووعة بس بتشوقييييييينا
بليييييييييزالله لا يحرمنا جديدك كملي

 

[sara3]

عفيية علية ابو احمد على هالحركة جان من مبطى طلقها.بس شنو اللى يخليها تسوى جذى ماكو ذرة حنان لعيالها

شكلة الماى بترجع لمجاريها بين احمد وسعاد


روعة كملى حبيبتى كملى ناطرينك

 

[لـــــ الكويت ـؤلؤة]

لا يوقف لا يوقف لا يوقف
ناطرين باقي الاحداــــــــــــــــــــــــــــــــــــــــــــــــــــــــــــــــــــــــــــث
لا تطولين علينا
فـــــــــــــــــــــــــــــــــــــــــــــديتج