قصة بدرية وسامي ومشعل...مسلسل انترنتي....

[StEllA]

اثناء جولتي المكوكية بين المنتديات ....قريت قصة شيقة و مكتوبة بأسلوب حلو

و آنا اقرا القصة حسيت جني قاعدة اشوف مسلسل تلفيزيوني فحبيت انقلها

لكم ....بس ها راح تكون على حلقات ....يعني اذا تجاوبتو معاي راح اكملها ((((حركات

منتدى حواء ...ما أحبها....مليييييغة)))بس ابيكم تبدون رايكم لانها تحمل قضية اجتماعية

والحين راح اخليكم مع كاتبة القصة,.......​

القصة تسلط الضوء على مشكة اجتماعية خطيرة و هي إرغام الفتاة و الرجل على الزواج عن طريق الأهل في مجتمعاتنا الخليجية

قصة بدرية و سامي و مشعل


السلام عليكم و رحمة الله و بركاته

آنا بدرية التركي ... بنت حلوة و مزيونة ... عمري 22 سنة ... تخرجت من جامعة الملك سعود قبل شهرين و أعيش في مدينة الرياض مع أمي و ابوي و أخوي أنور

مع بداية أجازة الصيف و الناس ما صدقت تفتك من الاختبارات وبداية موسم الأعراس .. كانوا جيراننا مثل العادة يا مسافرين مدينة الخبر حق عمتهم أو مسافرين مدينة جدة عند خوالهم و تاركين ولدهم سامي بروحه في البيت عايش عزوبي 100% ونظامه زي الزفت ما يعرف متى ينام ومتى يقوم ..ولا شنهو يأكل ..المهم ما أطول عليكم ... لبست عباتي و غطيت و جهي بالكامل و سليت نفسي من بيتنا من غير محد يدري و قررت أهرب من البيت ولا أرجع لأهلي ... طلعت من البيت ما أدري وين أروح .... ظهر و قيظ و حر و شمس ... قلت مالي إلا أروح عند سامي ولد جيراننا خصوصا انه بروحه في البيت. رحت عند بيتهم و أطق جرس الباب. كان سامي نايم والله يكافينا الشر و يحلم بكابوس. صحى من النوم على صوت الجرس و هو مرتبك من الكوابيس. قام و هو مرتاع و فتح الباب. شافني متغطية بعبايتي وطرحتي فما عرفني ... دفيته و دخلت داخل البيت لا إحم ولا دستور. المهم سكر سامي الباب ولحقني لداخل البيت ولقاني فصخت العباة ورميت الطرحة فانبهر بجمالي و دلالي. الحق ينقال آنا حلوة بس لين الحين سامي ما عرفني ولا يدري منهو آنا و لا شنهو أبي منه.
شفته يطالع و مستغرب من هالبنت اللي جاية له البيت و قاطة روحها عليه

طالعته و التفت عليه و قلت له:

آنا : شفيك؟ ما عمرك شفت بنات حلوات؟
سامي: لا و الله بس أنا ما عرفتك طال عمرك بصراحة ولا أدري يعني وش تبين ...

آنا: ما عرفتني ..يالله ياليتني مت ولا سمعتها منك ..اثرك لعاب يالخاين .أنا قلت بيعرفني من زولي ..هذا وأنت كل ماشفتني في الحارة قمت تصور فيني بجوالك كأنك ماكينة تصوير ...ولا شكلك ماخذها مقاولة تصور كل بنات الحارة يالخاين ..وأنا اللي أحسبك تحبني وتحلم فيني كل ليلة ..

سامي : لا والله أحبك أنتي ( ما يعرف ينصب ابدا ) ولا عمري صورت بنت غيرك صدقيني ..

آنا : طيب أنا مين هااه قل يالله ياللي تموت فيني ولا تعرف تنام الليل الا على صورتي ...

سامي : أكيد وحدة من بنات الحارة ..أصلا كل بنات حارتنا يهبلون بس أنتي تهبلين أكثر والله ...

آنا : اسكت بس يالنصاب ..أنا بدرية أخت أنور هاه عرفتني ولا لا؟؟؟ .. بدرية اللي تحبك و تموت عليك يا الشين.

سامي: هلا بدرية. شلونك؟ والله حتى أنا اعزك و أغليك بس أنتي الله يهديك ما تعطيني وجه تذكرين قبل سنتين يوم ترجعون من الطائف جيت أسلم عليك كشيتي في وجهي ودخلتي ..ولا نسيتي؟

آنا : ايه تستاهل أنت ووجهك أجل تسلم على أخوي أنور قبل ما تسلم علي؟؟؟ ما سمعت المثل المصري اللي يقول ( Ladies first )؟؟؟

سامي: أولا أخوك أكبر منك ثانيا أخوك يعني اسمه صديقي مالت علي يوم كنت في رابع ابتدائي هو كان في سادس ..غير كذا أنتي عارفة أخوك أنور أقشر و يطق.

آنا : رح بس شكلك تلعب علي ...جرحت مشاعري هذا وأنا أحبك يا ظالم ...

سامي : لا والله ما كان قصدي سامحيني ..أرجوك لا تتوقعين أني كنت مهملك ...أجل جاية عندي علشان تعلميني أنك تحبيني وتموتين في دباديبي ..

آنا : جعل دبادبيك البندق اللي تطيرهم وتطيرك معاهم ..سوري لا أنا جيت علشان شي ثاني ...ما تشوف أن بيتنا من أمس وهو مختبص ...ولا ما تدري وين حاطك الله...

سامي : طبعا ملاحظ بس أكيد عندكم عزيمة ولا عزاء ولا شي من هالقبيل ...لين تأكدت أمس من ولدين صغار عند المغسلة .بأن عندكم عرس بس عرس منهو ما أدري ...شكله عرس اختك ولا أبوك بيتزوج على أمك
آنا : يا سخفك أبوك بيتزوج على أمك ما كان أحد درى ..لا يا فالح هذا عرسي ....اليوم انشاءالله عرسي في قاعة الكوابيس السعيدة ..وعلى فكرة أنت معزوم ...

سامي: أنتي وش تخربطين اليوم عرسك وجاية عندي تعترفين أنك تحبيني ...ليش؟ ليش تنتظرين اليوم علشان تصارحيني ليش ما قلتي لي من قبل علشان اسوي أي شي علشان هالعرس ما يتم ..وأقاتل الدنيا كلها من أجلك...

آنا : اقول يا روميو عسى ما شر؟ لا يكون مصدق أني أحبك وعععع مالت عليك ..هذا اللي ناقص .

سامي: لحظة لحظة أجل ما تحبيني واليوم عرسك وشلون ..طيب وش جايبك عندي هنا ...

آنا : جعل والدينك في الجنة ..أهلي بيزوجوني واحدما أعرفه ولا أعرف عنه شي الا أنه يقرب لنا من بعيد ( يا خال ابوي حك ظهري )... وكانوا ساكنين في أمريكا ..وبس رجعوا السعودية وانهبلت أمه تبي تزوجه طبعا مالقوا أحد في جمالي و دلالي ... فخطبوني له وأهلي تقول ما صدقوا على الله وافقوا بدون ما يأخذون رأيي ..

سامي: طيب وخير انشالله زي العادة بتنزلين راسك في الأرض وتروحين لغرفتك وش الجديد؟؟ ...ثانيا كل هذا على جنب أنا وش دخلني ..يعني تبيني أكلم أبوك أقنعه يلغي الزواج؟؟؟
آنا : لا طبعا. شنهو أنزل راسي وامشي لغرفتي؟؟؟ والله أني سنتين أهوجس بالزواج بس مو كذا لازم يعرفون أن أهم رأيي في هالمسألة هو رايي مو خبط لزق ...أحسن شي سويته أني أدبتهم وانحشت من البيت وقت الغداء وهم لاهين في الأكل ..وجيتك .وخليتهم محتاسين يدوروني أحسن بيموتون ولا هم لاقيني .

سامي : لحظة لحظة ... انحشتي ..وأهلك يدورونك هلا والله هلا ..و جايه عندي آنا؟؟؟ ..ليش أنا بالذات؟
آنا: وين أروح؟ أكيد اذا خلصوا من الغداء ودوروني علشان نروح للكوافيرة ولا لقوني بيقلبون الدنيا علي يعني بيسالون عني عند أقاربي ولا صديقاتي وحتى في بيوت الجيران بس أكيد ماراح يدورون عني عندك لأنهم عارفين أن أهلك مسافرين وأنت بروحك في البيت ثانيا عارفة أنك ما راح تسوي لي شي ... يعني آنا بأمان ..

سامي : الله يسلمك من ذوقك ... لحظة لحظة .. وش قصدك واثقة ما اسوي لك شي؟؟؟ ..لا يا عيوني أقدر أسوي واسوي ونص ..الحمدلله مافيني الا العافية ...كلي فحولة ...

آنا : يا شيخ انثبر يا شينك ويا شين تفكيرك أنا قصدي واثقة فيك ..افهم يا دلخ ...

سامي : طيب وأهلك وش أسوي فيهم لو مالقوك وجوا يدورونك عندي وش اسوي؟؟؟ أخوك أنور من غير شي يقطعني تقطع وشلون وأنتي عندي واللي يرحم والديك اطلعي وفكيني ...ما أبي مشاكل.

آنا : تبيني أطلع هاه؟؟؟ طيب أوريك الحين أطلع للساحة وأصارخ بأنك مختطفني وحاولت تغتصبني بس ما قدرت ... يووه ساعتها يا مسكين وش يفكك من حلوق خلق الله يا بتصير علك في لسان حريم الحارة ..وشباب الحارة يجلسون يتطنزون عليكز هاه تبيني اطلع؟؟؟

سامي : لا لا الله يخليك هونت. أنا آسف امزح معاك بس ..طيب سؤال بسيط من فضلك طال عمرك أنتي بتجلسين هنا الى متى ...يعني علشان أعرف شنهو السالفة ..

آنا: الى الان والله مدري بس حاليا أنا جوعانة أبي شي أكله .وش رايك تطمر الحين و تروح بسرعة وتجيب لي بروستد دجاج؟؟؟ تراني ميتة من الجوع منحاشة من بيتنا وهم جايبين كباب وكفتة ..آآه يا بطني ..

سامي : وشنهو قالوا لك؟؟؟ اشتغل عند أبوك؟؟؟ أنا ملزوم بك؟؟؟ ..تطلعيني في هالشموس ..لا وبروستد بعد ؟؟؟
آنا : لا خلك مرتاح أنا أطلع الان في الساحة في هالشموس واصارخ الحقوني لين يسمعني أبوي وأخوي وساعتها تتأدب ..لا تجيب لي بروستد أبد مشكور ...

سامي : لا خلاص أجيب لك وأمري لله ..ربع ساعة ويكون البروستد عندك ..و طلع سامي من البيت .. وشاف أبوي و أخوي أنور على بيوت الجدران شكلهم يدورون علي. وشكلهم معصبين مرة .. قال سامي بخلي الباب مفتوح ... علشان لو جا أبو بدرية و أخوها يدورون ولقوا بنتهم تكون دخلت من وراي وأنا رايح أجيب الغدا ..وبالفعل راح لمحل الروستد وجاب و جبتين بروستد دجاج.
ولما وصل للبيت الا و يد ثقيلة على كتفه والتفت الا ابوي و أخوي أنور وعيونهم تقدح شرار و مسكوه من زمارة رقيته.

في الحلقة القادمة:
- ابوي و أخوي أنور يدخلون بيت سامي يفتشونه عشان يدوروني
- شلون قدرت أختفي في البيت مع انهم فتشوا كل شي؟؟؟

__________________

 

[دلوعة منطقتي]

مشاركة: قصة بدرية وسامي ومشعل...مسلسل انترنتي....

اي كملي وبعدين شصار

 

[Bent_Dubai]

مشاركة: قصة بدرية وسامي ومشعل...مسلسل انترنتي....

انزين وبعدين شو صار وينج كملي..........

اتريا التكمله اوكي.....

 

[نــمــاري]

مشاركة: قصة بدرية وسامي ومشعل...مسلسل انترنتي....

ما احب هالحركااااااااات
بسرعه وووويييييييييين التكمله

 

[StEllA]

مشاركة: قصة بدرية وسامي ومشعل...مسلسل انترنتي....

حتى آنا ما أحب هالحركات بس أول ما نزلت الحلقة الاولى شفت ما كو تجاوب فقلت يمكن ما عجبهم و بعدها ما شيكت ....و السبت و الأحد ما دشيت النت .....تدرون بعد كورس صيفي و غثا ...الحين راح أحط الحلقة الثانية.....فاصل و نعود.....

 

[StEllA]

مشاركة: قصة بدرية وسامي ومشعل...مسلسل انترنتي....

الحلقة الثانية

راح سامي لمحل الروستد وجاب و جبتين بروستد دجاج.
ولما وصل للبيت الا و يد ثقيلة على كتفه والتفت الا ابوي و أخوي أنور وعيونهم تقدح شرار و مسكوه من زمارة رقيته.

أبو بدرية : سامي... من عندك في البيت داخل؟؟؟
سامي : ما ما ما ماع ماعندي أحد أنا بروحي أهلي مسافرين جدة مثل ما تعرف طال عمرك

أنور : أجل ليش جايب بروستدين هاه ليه مو بروستد واحد هاه؟ يالله قول ليش.

سامي: أبد طال عمركم تآمرون على بروستد ولا بروستدين تحت أمركم فدوة لعيونكم ..عارفين كأس عالم وآنا أتابع المباريات .. قلت اشتري غدا و عشا عشان ما يفوتني متابعة التلفزيون. من جد تآمرون على بروستد ولا الاثنين تفضلوا طال عمركم ..

أبو بدرية : لا ما نبي بروستد اسمع يا ولدي باسألك سؤال بس جاوبني بصدق ..أختك بدرية اللي هي بنتي ما جات عندك؟ ما قالت لك ودني مكان؟ ولا أي شي؟؟

سامي : بن بن بنتك أختي ..منهي بنتك ؟؟ بدرية؟ لا والله يا عمي الله لا يوفقني آنا ما شفتها ولا كلمتها ..تبون البروستد ؟

أنور : يبه ماني مصدق سامي. لازم نفتش بيته ونشوف .والله يا سويمي لو تطلع نصاب لاقطعك قطع صغيرة مثل البروستد ..

سامي : شنهو؟ تف تف تفتيش؟ .تبون بروستد؟ ..تراه حار ..الب البييت قدامكم حلالكم ..بس شوفة عينكم لي ربع ساعة اشتري البروستد وتارك الباب مفتوح لأني أمس نايم في الملحق و متعيجز أجيب معاي المفاتيح ..يالله تفضلوا فت فتشوا

والله و يدخلون البيت ويجلسون يفتشون البيت تفتيش ...وبعد عشر دقايق مالقوا شي وطلعوا و أنور عيونه تتطاير شرار ويطالع سامي و كأنه يقول ماني مصدقك .. المهم طلعوا وما لقوا شي ..فاعتقد سامي اني أكيد طلعت وانحشت من البيت ... الغبي يفكرني خفت من أهلي يصيدوني عنده.. المهم سكر سامي الباب بعد ما طلع ابوي و اخوي أنور و دخل الصالة و فتح أكياس البروستد عشان ياكل. وتوه فاتح الأكل إلا أطب عليه

آنا : ماشالله منتهى الأنانية والطفاسة .. يعني ما تكلف نفسك تقلق علي شوي ..ثانيا قلت لك جب لي بروستد مو تجلس تطلب بروستدين وتعطلنا وأنا ميتة جوع ..

سامي : وجع وجع وين كنتي متلبدة؟ وشلون ابوك وأخوك مالقوك وهم قلبوا البيت فوق تحت ...وين تخبيتي؟؟

آنا : أبد ما يبي لها ذكاء تخبيت فوق مكيف غرفة الشغالة ..ياهو حار .والله أني اتصبر طول ما أنا فوقه احمريت ..وش اسمها صارت طماطة .والله يا أن اللي بيعرس علي بيستانس الليلة لو تمت الدخلة ...المهم يالطفس عطني بروستد ... تراني بأموت من الجوع ..

سامي : الله ياخذ عمرك طيحتي قلبي يا شيخه والله كنت خايف لايصيدونك أهلك وأنتي عندي ساعتها وش بيفكني منهم .كان فرموني ..

آنا: اها بس لا تبالغ والله أهلي حليوين بس لولا هالعرس اللي مدري وش قلبهم ضدي ..

سامي : فهميني شنهي سالفة هالعرس؟ ..وليش بيغصبونك عليه؟ يعني هو أكبر منك في العمر ولا شنهو؟

آنا : لا السالفة ومافيها هذا ولد خال عمة أمي يشتغل في السفارة السعودية في أمريكا ..و مثل ما أنت عارف من يومنا صغار دايما يا نصيف في أبها ولا الطايف و إذا كلش كلش نروح جدة ..وفي سنة من السنين ضغطنا على ابوي يودينا أمريكا وبالفعل ودانا وياليته ما ودانا ..تقول مبتلش فينا حاشرنا في الدرجة السياحية ..صبرنا ويوم وصلنا أمريكا الا يروح بنا لقريب أمي ذاك قال ايش وشوله نسكن في فندق ..ولا نستأجر شقة وبيت أحد قرايبنا موجود ..المهم سكنا عندهم وأنواع الزحمة الحق ينقال أنهم كانوا معنا حبوبين وطيبين بس ولو ضغط نفسي تخيل علشان أنا بعد أجاملهم كنت مصادقة بنتهم هي عمرها 7 سنين وأنا بادخل 14 ..المهم أخوي أنور كان منبسط مع ولدهم مشعل اللي بيزوجوني له ..دايم يطلعون ويجون مع بعض وطبعا مطنشينا يالبنات .حتى في واشنطن ما عندنا بنات يسهرون ويطلعون ..المهم مرة من المرارير قلت لمشعل يوديني السينما ووقتها طاح من عيني ..قال لي تصور يقول ببيروح يستأذن أمه وياخذ رأيها ..ياخي أكره ما عندي في الولد اللي ماله شخصية .يعني مو مثلك ماشالله عليك يوم قلت لك تخبيني وافقت على طول ما قلت بروح اسال أمي اذا توافق ولا لا... أنت رهيب ..المهم عاد من عقب ذيك السفرة لا سمعنا عنهم شي ولا سمعوا عنا شي الا أحيانا أشوف أمهم في جدة أو الطايف الصيف مرتزة ..ويوم جوا الرياض مادري من قال لهم ما لكم الا بدرية حق ولدكم .. صج أني قمر وحلوة وأطيح الطير من السما بس ولو ..ويتقدمون لي ..القهر عاد ..ما تبي مايونيز؟؟ ..تراني ابيه .. عطني اياه أرشه على البروستد.

سامي : تبين ما يونيز ما تدرين أنه يسمن ..

آنا : ما عليك جبه بس ..أحسن من أنه ينكب ... المهم تقدموا وقم يا بو أنور وتاخذك النخوة ويوافق عليه كذا بدون احم ولا دستور ..يلعن أبو أبليسك مالك بنت اسمها بدرية بدر البدور تاخذ رايها هي تبي الولد ولا لا؟ بس كذا خبط لزق وافقوا وحددوا أول الصيف موعد للعرس ..أول الأمر وناسة يعني بأتزوج وكل شوي موديني سوق لا واشتري مو مثل ايام العزوبية بس متفرجة .بس عقب ما خلصت مشتروات وقبل اسبوعين بالتحديد كانت الملكة ولا أحد أخذ رايي ولا شي واليوم العرس ..ايه مستحيل يفوزون علي ما أكونبدر البدور اذا ما أخلي الناس حواليه تدور

سامي : طيب الولد لك عليه ملاحظات ولا تحبين أحد وودك تتزوجينه ..هاه اعترفي ..تبين البطاطس ولا لا

ندى : خل البطاطس ابيها بس أحب اكلها في الأخير عقب البروستد . يابن الحلال وش كنت أقول الولد ما أعرفه الا من حادثة السينما غير أنه دب شوي وتحس أنه دلوع ..وفارق شعره في النص ..وما تدري وشلون ابيض وخدوده وردية ..بس المبدأ غلط ..مو كذا والله على الأقل يخلوني أجلس معاه وأكلمه اشوف شلونه اذا يناسبني أو لأ.

سامي : طيب وشنهو ناوية تسوين؟ ..بتنحاشين الى متى؟ خصوصا يعني أنتي رسميا زوجته ...مصيرك له ..

آنا : زوجوك بقردة عانس عمرها 45 سنة ان شاء الله ... هذا رفع المعنويات؟؟؟ ..مالت عليك ..على العموم جوابا على سؤالك القيم , آنا ليش جايه لك يا ابو النخوة والمرجلة ..على فكرة أنت شهم ..بصراحة يعني أنت شهم .

سامي: الله يستر شنهو تبين مني ...ماني مرتاح للفاصل الاعلاني اني شهم وراعي نخوة ..

آنا: طول ما كنت فوق المكيف والنار تحرقني تحت في ال....... كنت افكر وشلون اطلع من هالمأزق ومالقيت الا حل واحد ,انت الوحيد اللي قادر تساعدني فيه يا شهم يا اصيل ..تروح أنت شخصيا على أنك أخو صديقتي وتكلم مشعل كلام رجال لرجال يمكني يقتنع ويفهم ...قل تم ..هات المخلل الله يرضى لي عليك .

سامي: خذي المخلل. لأ ما تم . شنهو اروح لمشعل؟؟؟ وشنهو اقول له؟ ووين ألقاه؟ ..لا لا لا الله يرحم والديك ...

آنا : تكفى تكفى يا شهم يا قوي يا انت ..فكر فيها اليوم اذا سويت هالشي بكرة بنات الحارة بينهبلون عليك بتصير معبود طالبات جامعة الملك سعود ..المنتديات في الانترنت والايميلات بيذكرون قصة شهامتك معاي وشف كم بنت بتموت فيك ..فكر في مسقبلك استثمر في المشروع الرابح ...

سامي : طيب اوكيه بس وين القاه واحد الليلة عرسه وين أحصله؟ و أكيد بتلقينه مشغول.


في الحلقة القادمة
- ماذا حدث مع سامي عندما قابل مشعل؟؟؟
- كيف حضرت بدرية حفلة زواجها مثل باقي الحاضرات دون أن يعلم أهلها بأنها موجودة مع المدعوات؟

 

[نــمــاري]

مشاركة: قصة بدرية وسامي ومشعل...مسلسل انترنتي....

تكفيييييييييييييين حطي الحلقات مره وحده

 

[StEllA]

مشاركة: قصة بدرية وسامي ومشعل...مسلسل انترنتي....

Ok Ok Ok

 

[StEllA]

مشاركة: قصة بدرية وسامي ومشعل...مسلسل انترنتي....

الحلقة الثالثة:

هذا آنا وياكم ... آنا بدرية بدر البدور .. اللي خليت الناس حواليه تدور

مازال الوقت ظهر و آنا عرسي الليلة على مشعل المتين الدب اللي ما أعرفه ولا هم يحزنون و ما زلت منحاشة من البيت و أهلي يدوروني و آنا في بيت سامي ولد جيرانا

بالموت أقنعت سامي انه يروح و يكلم مشعل .. و قلت له بتصير مشهور و البنات بتحبك ... فرح و وافق و قال لي:

سامي : طيب اوكيه بس وين القاه؟ واحد الليلة عرسه وين أحصله وبتلقينه أكيد مشغول.

آنا : ما عليك أخته مكلمة أمس تقول أنه بيروح صالون الكشخة علشان يجهزونه للعرس. تالي العمر الرجال صاروا يسابقونا على التزيين ليلة العرس ..تلقاه في طريق الأمير عبدالله وتكلم معاه كلام رجال أنت ماشالله عليك اسلوبك مقنع ...هاه والله بتصير أشهر ولد في السعودية ...

سامي : ما عليك ولا يهمك يا بدرية .. بس رجاء شخصي اذا اشتهرت قصتي قصدي موقفي معاك وسألوك البنات عن شكلي ياليت ما تدققين في الوصف كثير اتفقنا ...

وراح سامي لطريق الأمير عبدالله يدور صالون الكشخه ويالله يالله لقاه ..و دخل الصالون ... لاحظ ان الصالونات تطورت و هو ما زال يحلق عند الهندي بو خمسة ريال .. ما كنه داخل عند صالون حلاقة الا كأنه داخل في مغارة موسيقى وأضواء خافتة و كل حلاق في جهة ..وفيه تقريبا 7 حلاقين وجلس يدور مشعل وهو أصلا ما يعرفه ولا عمره شافه من قبل . كل شوي يرز وجه عند واحد يحلق و يسأله أنت السيد مشعل؟
وبعد اربع تجارب فاشلة لقى واحد دبدوب حاطين هالماكينة حقت البخار فوق راسه ووجهه كله كريمات واللي يقهر رجله فوق مخدة ومحطوط فوقها فوطة والحلاق التركي جالس يدعك في هالأصابع وشوي الا يحط عليها مناكير

سامي : آسف على الأزعاج بس عندي سؤال بسيط حضرتك السيد مشعل؟؟؟

مشعل: ايه آنا مشعل. منهو انت؟ تراني ما اشوف شي من البخار.

سامي : آنا صديق قديم سمعت عن زواجك اليوم فحبيت أجي ابارك لك لأني يمكن ما أقدر احضر العرس فلازم أبارك لك شخصيا ...يالله منك المال ومنها العيال ..

مشعل : الله يبارك فيك وعقبالك بس منهو أنت؟ ما عرفتك والله أنت صديقي ولا تقرب لي ولا من الجماعة؟

سامي : يابن الحلال لاتستعجل بيني وبينك أبي اكلمك في موضوع مهم بس ياليت تخلي الحلاق التركي يتركنا شوي واذا على رجولك انا ادعكها لك.

مشعل : طيب يا جاويد رح شوي في كلام مهم مع أني ما أدري شنهو هالكلام ومنهو اللي بيقوله

سامي ( وهو يفرك رجول مشعل): قل لي يا مشعل انت مبسوط بالزواج؟ شكلك كنت تبي تتزوج من زمان!!!!

مشعل : والله الحمدلله الزواج استقرار وتكوين مستقبل الحمدلله ...اهيء اهيء صج اني ما ودي أتزوج الحين بس أهلي غصبوني الشكوى لله لازم اوافق ...

سامي : آها. حلو. لا أجل وصلنا خير. شف يا مشعل الصراحة انا لا صديقك ولا قريبك ولا شي آنا أخت صديقة زوجتك بدرية .. عفوا قصدي أخو صديقتها ..وهي اقصد بدرية كلمت أختي علشان تطلب مني أكلمك علشان تراجع نفسك قبل الزواج يعني هي مو مرتاحة من الزواج منك مو عشان شي لا بس علشان هي ما تعرفك زين ولا أنت تعرفها وكذي ..

مشعل : ( ويشيل مكينة البخار من على راسه ) شنهو؟؟؟ متأكد بدرية قالت لك كذي؟؟؟ .. يعني مو بس أنا بروحي افكر بهالشي؟

سامي : لا مو أنت بروحك بس شكلك متعلق بقصة حب قديمة هاه قل لي لا تستحي ..

مشعل: لا والله مو قصة حب ولا خرابيط بس تعرف توني راجع من أمريكا وطول عمري كنت أدرس في الأكاديمية السعودية في واشنطن .. ولا عمري فكرت في الزواج من صديقاتي ..لا من هند العراقية اللي كنت أروح معاها للسينما دايما ..ولا من نوال الأماراتية ..شريكتي في معمل الكيمياء ..ولا حتى من رشا المصرية اللي كانت معاي في مخيم الصيف ..و لا من سلوى اللي من المدينة المنورة .. وهي دايما تروح وتجي معاي في السيارة ايام الثانوية ..ولا حتى سهى الفلسطينية اللي كانت تروح معاي دايما في المسبح الكبير علشان نسبح ..يعني شف مع مجموعة البنات هذي كلهم وقربهم مني ما فكرت في الزواج فما بالك أتزوج من وحدة ما أعرف عنها الا أنها تقرب لي من بعيد وسكنت مرة عندنا أسبوعين في الصيف وطول الوقت هي كانت مع أختي الصغيرة ...

سامي : كل ذولي البنات تعرفهم وتطلع معاهم وتخيم معاهم وتسبح معاهم ؟؟؟..كل ذولي واحنا هنا في الرياض يالله يالله على تليفون وفواتير خساير ويالله يالله كلمت بنت وحدة في سوق النمر ..هي في الدور الثاني وأنت في الدور الأرضي ولو أقرب من الدرج هي تنحاش تخاف لا أرقى عندها ..اسمح لي اقول لك يا مشعل أنك جبار ..فعلا أنت جبار ..مو بس جبار اسمح لي أن أخذك قدوة لي .أنت رجل عظيم جبار ..أنا من بكرة مسافر أمريكا باسجل في الاكاديمية واترك الجامعة يلعن أبو الجامعة والفقر اللي فيها اثركم عايشين في نعيم بره المملكة ويقولون غربة يا زينها من غربة

مشعل : هييي أنت فاهمني ولا لا ؟ شفيك تخربط وتهلوس خل نرجع لموضوع بدرية. هي فهمتك؟ وشنهو تبي؟

سامي : اتركنا من بدرية لا بارك الله في بدرية. تكلم لي عن بنات الأكاديمية في واشنطن

مشعل : وليش أنت جاي أجل فهمني؟ وش تبي بدرية؟ و بعدين ابشر بالخير اقص لك عن الاكاديمية اللي تبي .

سامي : طيب بدرية يعني تبي منك و ما عليك أمر أنك تصير رجال وتسوي موقف هي على كلامها ماراح تنساه لك أبد وهو أنك تكنسل العرس من نفسك ..وتعتبر هذي حركة شهامة منك ..هاه وش قلت موافق صح يا يالله سولف لي عن الأكاديمية وبنات الأكاديمية وركز لي على بنات ثاني ثانوي أدبي واللي يرحم والديك ...

مشعل : طبعا لا مافي أمل مستحيل ...مستحيل أني اكنسل الزواج صحيح ما كان ودي به بس ما دام صار اللي صار فلازم أكمل مو عشان البنت ما أعرفها اقوم افشل أهلي واشوه سمعتي بين الناس الزواج الليلة يعني الليلة

سامي : ياخي صج انك نذل وافق أول وقص لي عن بنات الأكاديمية بعدين ارجع و هون في كلامك مو كذي؟ صج انك بايخ .. على العموم براحتك .أنا بوصل لها كلامك واللي يكتبه الله بيصير ...بس أنت ضيعت على نفسك فرصة تصير شهم ونبيل بين شباب الرياض بكرة تلقى اسمك في كل ليستات الشباب اللي يطالعونها البنات اصلا وش يهمك دام عندك جيش في واشنطن تحت رهن يدينك يا جبار ...

وقام سامي و حط راس مشعل مرة ثانية في مكينة البخار بقوة عشان تحرق راسه.

و رجع لي سامي البيت و آنا كنت أنطره على جمر و أتمنى أسمع منه أخبار زينة بس انه صدمني لمن قال لي ان مشعل مصر ان العرس الليلة يعني الليلة.

آنا: هين أوريه هالدب دواه عندي كنت أبي هالموضوع ينحل بشكل ودي بس لازم الزواج كله يخترب ويتكرفس ..

سامي : وشلون عرس وأنتي مو فيه ... في عرس بدون عروس ولا في في سلطة بدون طماط ....

آنا : ايه فيه وايد .. مرة يقولون العريس مستحي و يكنسلون الزفة ولا تمشي العروس بروحها كأنها يتيمة ومرة يكون فستان العروس يفشل فيسربونها أهلها للمعرس من تحت لتحت .. يعني أهلي بيدارون على الفضيحة ويقولون أي شي ويكنسلون الزفة ... عادي عندك حريم ما جوا الا علشان يأكلون ويرقصون ..بس

سامي : طيب سهلة. أوديك للمستشفى نقول سووا لها عملية زائدة ..ولا روحي لمستشفى خاص يجبرون رجلك يعني أنها مكسورة ..و يخترب العرس.

آنا: ايه هين افتح بطني علشانهم وبعد هذا كله بيزوجوني له ..ولا لو حطيت جبس بيأجلون عرس بس بيقولون من بيشوفك أنتي وجبسك ..فكر معاي بطريقة تخرب العرس مرة واحدة ..

سامي: اممم قولي لهم أن البتاعة ( شي يجي عند البنات كل شهر مرة ) جاتك وأنك تعبانة منها ومن ذا الحكي ..

آنا : مالت عليك صج انك ما تفتهم. هالأيام الرجال يعرسون يقعدون مع زوجاتهم أسبوع سوالف وبعدين يالله يالله يسوون شي .... راحوا رجال أول اللي الواحد أول ما يشوف البنت شالت طرحتها الا رايح للحمام ومتسبح.

سامي : طيب آنا أروح للمطعم اللي بيجهز العشا والبوفيه واكنسل الطلب ولا أحرق المطعم. وطبعا ما في عرس بدون عشا

آنا : انت صج تثبت أنك خبل علشان عشا يكنسلون عرس ..كان أبوي يرسل اخوي لألف مطعم وتشوف بدال العشا عشرين عشا أكثر ما كثر الله في الرياض المطاعم ... فكر بشي بدونه ما يتم العرس نهائيا ....امممم لقيتها في شي بدونه ما يتم العرس ..أصلا يخترب مرة وحدة ....

سامي : وشنهو هالشي اللي بدونه ما يتم العرس نهائيا؟؟؟ هاه؟ علميني يالله.

انتهت الحلقة

الباقي في الحلقة الجاية
__________________
آنا بدرية بدر البدور ... كل الناس حواليه تدور

قصة بدرية و سامي و مشعل
رحلة إلى الكويت
قصة طقاقة

 

[StEllA]

مشاركة: قصة بدرية وسامي ومشعل...مسلسل انترنتي....

بس بنات نبي آرائكم في الزواج التقليدي....فاصل و نعود<<<<<<<<

 

[StEllA]

مشاركة: قصة بدرية وسامي ومشعل...مسلسل انترنتي....

الحلقة الرابعة

قعدت آنا بدرية بدر البدور مع سامي أفكر في خطة تخرب العرس و تخلي الناس حواليه تدور


و بينما احنا نفكر و كل شوي سامي يجيب فكرة سخيفة طرت على بالي خطة جهنمية و قلت لسامي:

آنا :الطقاقات ... عمرك سمعت عن عرس مافيه طق؟ ...طبعا لا مستحيل مافي أمل كان يروح العرس وطي ..

سامي: يمكن أنا وش يدريني؟ ... طيب وشلون يعني؟ وش المطلوب وشلون نقنع الطقاقات ما يجون؟

آنا: شف عاد باجلس أفكر بروحي انا وأنت تجلس حاط رجل على رجل؟ ما يصير؟ لازم تشغل مخك معاي. شف باعطيك اسم الطقاقة وعنوانها وتليفوناتها وأنت بأي وسيلة تخليها ما تجي العرس زين .. وانا باجلس افكر بشي ثاني هاه بس بسرعة لانه مابقى على المغرب الا ساعة يالله الوقت يسرقنا

وراح سامي مسيكين ألى حي لمنفوحة تقاطع شارع عيسى الأحسائي مع شارع بشير شنان في حارة الطرب الأصيل وسأل أهل الحارة عن بيت أم فيصل الطقاقة ... طلع له واحد صغير ..معاه جمر شكله يبي يصخن طيران ... كان يروح و يسأله:

سامي: يا حبيبي تقدر تقول لي وين بيت الفنانة أم فيصل؟

الولد : شفت البيت اللي على اليسار في آخر الشارع؟ هذاك بيت مرزوقة.

سامي : يا حبيبي يا بعد عمري يالزين ,,,, وآنا شنهو ابي ببيت مرزوقة؟؟؟ آنا أبي بيت أم فيصل

الولد : عارف البيت اللي في آخر الشارع على اليسار؟ .. ابو باب أحمر هو بيت مرزوقة

سامي : أنت تيس؟ ابي بيت أم فيصل ... وش ابي ببيت مرزوقة أنت شلون تفهم؟

الولد : لا تقول يا تيس لا أجيب لك الشباب ربعي يلعنون والدينك فاهم .انت يالأبيض جاي تسب ( والله وصار في ناس يشوفون سمار سامي بالنسبة لهم على أنه بياض) ....ثانيا مرزوقة هي أم فيصل يا ثور فهمت؟؟؟

راح سامي لبيت أم فيصل قصدي مرزوقة .. و طق الباب .. إلا و يفتح له برطم كبير قصدي واحد طويل عليه براطم وعيونه حمر ويدينه برتقالية مدري من الروعة.

سامي : عفوا هذا بيت الفنانة مرزوقة الله يحفظها ويطول بعمرها ..اللهم آمين .

الرجال : شنهو تقول أنت؟

سامي : بيت الفنانة أم فيصل ..قصدي مقر اقامة فرقة أم فيصل للفنون الشعبيه والأعراس؟

الرجال : ايه نعم هذا هو... وشنهو تبي بها؟

سامي : يعني باكلها الله يهديك؟ أكيد باتفق معها على حفلة تحييها لنا ذات الصوت الجهوري

الرجال : لحظة أدخلك عليها ... انطر هني مو تدخل على طول.

ودخل سامي الصالة ... ماشالله بيت طرب اصيل طيران معلقه على الجدارن ..ومنقد محطوط في وسط الصالة ( منقد = اللي يشبون فيه الجمر و يسوون فيه القهوة اذا طلعوا للبر وأحيانا يستخدم للشوي لكن غالبا الطقاقات يسخنون عليه الطيران ) المهم أقبلت الطقاقة الحلوة المملوحة الخنيفرة

سامي: عفوا أنتي الطقاقة مرزوقة؟

الطقاقة : وش مرزوقته؟ أنا الفنانة أم فيصل صاحبة فرقة أم فيصل للحفلات والأعراس ..نعم وش عندك ؟

سامي : الله يسلمك أنا مدير اعمال سمو الأمير ... سعود بن عبدالله بن مساعد بن خالد بن محمد بن ناصر بن فواز بن جلوي بن مشعل ( في امراء سياحين مزعجين العالم ولو تحلل اساميهم ما تلقى طاري عبدالعزيز الله لا يبلانا بس )

الطقاقة : ونعم بك وبمن أرسلك بس وش تبي منا آمر.

سامي : طال عمر سموه الله يسلمه .بعد شهر عرس بنته في فندق الانتركونتيننتال وطبعا زي العادة على حساب الحكومة ..ونبي مطربة قديرة مثلك تحيي الحفل تقلب الصالة فوق تحت ..والكل نصحنا بك

الطقاقة : الله يسلمك ويخلي سمو الأمير بس اللي أوله شرط آخره نور ..سعري في الليلة ثمانين ألف ريال غير العشا وصينيتين حلويات للشباب يعني السواق و ربعه ..وراح أقدم بس 20 أغنية والباقي كل أغنية زيادة عليها ألف ريال هاه اتفقنا؟

سامي : حشا مو مرزوقة ... فيروز بتغني زين يا جارة الوادي؟؟؟؟ ..اتفقنا بس انا بعد عندي شرط ..

الطقاقة : اشرط وقول وشروطك أنت وسمو الأمير على العين والراس وش هو شرطك؟

أنا : انتي عارفة سمو الأمير وزوجته الأميرة عازمين ناس واجد من الرياض وجدة والشرقية والخليج .ويبون عرس عرس يبيض الوجه ويبون طق مو أي طق يبون طق يخلي البنات لا شعوريا يرقصون ..واللي حامل تسقط ..يبون القاعة كلها تهتز وهو منبه علي لازم اتأكد من هالشي بنفسي فياليت تسوين لي بروفة بس جامدة

الطقاقة : ابشر دقيقة بس يا بنات يالله بنسوي بروفة للشيخ مندوب الأمير .

وبدوا الطق ..طق على مستوى ..وكل شوي يقول لهم أكثر اكثر كذا ماراح نتعاقد معكم ..وبعد عشر دقايق بدوا هالعبيدات والعبيد اللي معاهم يتناتقون في النص ..( بدوا يستنزلون )

يوم شاف سامي الطق حما .. كان يقوم و يطلع من البيت وكان جايب معاه قفل شاريه و قفل الباب ..و اتصل بهيئة الأمر بالمعروف و النهي عن المنكر و قال لهم فيه حفلة مجون و اختلاط ... كلها ربع ساعة الا أربع من سيارات الهيئة واصلة للموقع و قعد سامي يراقب من بعيد لين قاموا الشيوخ ينزلون ومعهم هالطقاقة وفرقتها ملفلفينهم بخياش وكل شيخ جالس يقرا قرآن علشان يكرش الجن اللي في روسهم ..يوم تأكد ان الهيئة قشتهم كلهم رجع للبيت.

سامي : ابشرك كل شي تمام ما رحت الا يوم تأكدت أن الهيئة قشتهم كلهم ..يعني مستحيل الفرقة تجي اليوم للعرس يعني مافيه عرس لأنه مافيه طقاقات ..هاه وش رأيك فيني؟

آنا : من يقول الا فيه طقاقات يا شاطر ..يعني في عرس

سامي: وشلون الهيئة طلعوهم؟

آنا : لا ..بس في عرس وفي طقاقات يا شاطر

سامي : طيب وشلون؟ أمك بتجيب مسجل وبتشغل أشرطة طقاقات؟ ولا في فرقة احتياطية متعاقدين معاها؟

آنا : بسم الله علينا عرس بمسجل وش قالوا لك تبينا نصير نكتة في الرياض؟ ..أنا قصدي يا حلو ..

سامي : اها عترفتي بلسانك أني حلو يا ليت ما تنسين هالشي ولا تنكرينه ..يالله كملي.

آنا : الحمدلله والشكر بس ..المهم فيما أنت رحت تفركش جية الطقاقات ..طرت لي فكرة ... ليش ما أنا وأنت نتنكر في هيئة طقاقات منها نتأكد أن العرس يخترب ومنها ابي أعرف وش صار .. ترى قوية مرة أني ما أحضر عرسي ولا أدري وش صار فيه ..نص البنات يخلون أهاليهم يسجلون لهم اللي صار عقب الزفة ..علشان ثاني يوم يقعدون يتفرجون .. اقوم أنا ما أحضر عرسي ؟؟؟؟ ..خير انشالله

سامي : بس وشلون نتنكر كيف في هيئة طقاقات؟ ثانيا سمعتي عن طقاقتين بس يحيييون عرس؟ وش قالوا لك نينيا وريدا على غفلة ..ثانيا طقاقات وما معاهم طيران وين رايحين يستهبلون ولا يغنون في عرس؟؟؟

آنا : و من قال لك أنا وأنت بس؟ ما عليك كلمت واحدة اسمها شذى ناشبة لي من أيام الكلية تبي تتعرف علي البنت مسكينة قروية وشايفتني كشخة قالت تبي تتلزق فيني ..المهم أني عطيتها وجه الترم اللي فات وهي صارت أي شي أطلبه منها تسويه لي كلمتها من شوي ..وبتجي هي بعد المغرب ومعاها اختينها الثنتين وثنتين من بنات خالتها ..يا عليها بنات خالة كل شي عندهم طيران اورج عود ..والاحسن من ذا كله عندهم فان يعني تقول سيارة طقاقات متطورات ..ولا تخاف بيجيبون لنا عباية اضافية لك .. موصيتها على مقاس اكس لارج عشانك

سامي : لا والله أنتي عارفة مقاسي ميديوم مالت عليك ..بس ماني متخيل نفسي في هيئة حرمة لا وطقاقة بعد ..

آنا : يا خبل وش بيضرك صدقني ما راح تندم تعال وشف بنات يرقصون لا وقدامك على طول تعال متع عيونك .. اللي مطلعة صدرها واللي نص ظهرها طالع واللي فتحة فستانها فوق الركبة بأربع اشبار ....هاه الى الان متردد تجي ؟؟؟

تابعوا شصار في الحلقة القادمة مع الطقاقة سامي

 

[StEllA]

مشاركة: قصة بدرية وسامي ومشعل...مسلسل انترنتي....

الحلقة الخامسة

أقنعت سامي ان احنا نسوي روحنا طقاقات و نروح نحضر حفلة زواجي

مرت شذى بالفان ومعاها اخواتها وبنات خالتها و خلينا سامي يلبس العباة و يتدرب على الطار ودخلنا العرس
سامي أول مرة في حياته يدخل عرس نسائي و طبعا كنا متلثمات يعني اسم طقاقات محترمات وأشوف سامي فك فمه و هو مستغرب يوم شاف اللي ظهرها كله طالع ولو تنحني شوي طاح صدرها من فوق الفستان واللي لابسة ضيق يالله يالله تقدر تمشي والتنورة ضيقة مرة وكل شي بارز واللي كتوفها تبين و علامة التطعيم مبينة

قمتو نغزت سامي وقلت هذه رئيسة الفرقة

راح سامي لمكان الطقاقات و استلم المايك

سامي: الو الو.. واحد اثنين ثلاثة أربعة ..الو الو حوّل مسيكم بالخير جميعا ..معاكم فنانة الخليج الأولى ..أم فيصل بن عبدالرحمن..ها؟ شفيكم بلقتوا عيونكم؟ والله ولدي اسمه فيصل ورجلي اسمه عبدالرحمن ..يعني الأسامي الزينة محرمة علينا عشاننا طقاقات؟ عموما منعا للاحراج تقدرون تنادوني الفنانة تهاني
في البداية أحب أعرف بنفسي وأعطيكم شوية معلومات
أنا حائزة على جائزة الطار الذهبي في مهرجان باريس للفرق الاستعراضية وجائزة الكوشة المربوشة من مهرجان موسكو لفرق العروس و أحييت عدد من أعراس الشخصيات المهمة شيوخ ووزارء وقضاة و رجال أعمال هذا غير عرس الملك..شفيكم؟ أقصد ملك اسبانيا يا شين اللي يفهمون غلط. هذي بطاقتي التعريفية و أكيد كلكم مستغربات ليش احنا متثلمات .والله الواحد وش يسوي هذا عالم الفن وغرابيله ..أحتكرني صالح كامل وابتلشت ماغير أنا وعبدالمجيد عبدالله دايما جلساتنا مسربة في الراديو والأسواق عاد مع موضة تسجيل العروس فيديو لو تبثني أحد القنوات أغني في عرس عز الله أنهم بيفسخون عقدي عشان كذا انا اليوم متلثمة..نقطة أخيرة ..تقديرا مننا واحتراما لكبار السن والعجز اللي كل واحدة منهم مخبية جوال بو كاميرا عشان تصور هالبنات وتوريهم لعيالها ولا تمخمخ عليهم في الظهرية مع شلة قهوة الضحى ما عليكم الا تعطوننا جوالاتكم واحنا نصور لكم بس أنتوا تأشرون على البنت اللي تبونها وكل صورة بعشر ريال ..والفلاش علينا بسم الله وعلى بركة الله نبدا الطق ..في البداية اذا سمحتوا لي أحب أقدم اهداء بسيط وتحية محبة عطرة الى من وضعت سيقاني في أول طريق الفن والشهرة وعلمتني مسكة الطار وتسخينة ورشة الماء والطق و طلعت كوامن النعومة في صوتي وخلتني ألعلع في الغناء الفنانة الأخت الأم العظيمة أم عنبر وأحيي ذكراها في أغنيتها الشهيرة ..أسمر خشمه كبير ..جالس قبالي يشرب عصير

أحد الحريم: غني لنا شي يوسع الصدر

سامي: اقول انثبري مكانك بس يا ماما اذا جبتوا فرقة طقاقات في عرسكم خلوهم يغنون لكم اللي تبون ..أن شالله غربي ..بس تقولين لفنانة محترمة اسمها تهاني من كبار مطربات الخليج والعالم العربي وفي حضرة فرقتها غنوا لنا أي أغنية؟
ثانيا أنا أحترم نفسي وما أغني في حفلاتي الخاصة لمطربين زملاء فاهمة؟ يالله يا بنات

مافي ولا واحدة قامت ترقص؟مو ناوين تعدون هالعرس على خير؟

أم العروسة: شقاعدة تخربطين يا تهاني؟ غني شي سنع

سامي: اقول بس انطمي هذا اللي ناقص

آنا: اعقل هذي أمي كل شي عاد الا هي يكفيها ضيقة الصدر .. وأنت شنهو هالاغنية من أولها ..قلنا نخرب العرس بس مو لهالدرجة عاد ..لا تنسى أنه عرسي

سامي: اوكيه اوكيه نغير الأغنية .. حكمتنا في الفرقة الزبون دايما على حق.. بابدى أغني لكم من أغانيي المشهورة .. البداية راح أطلع لكم بصولو وتلحقوني يا بنات بالصالون قصدي بالكورال كوبليه ورى كوبليه يعني كوبليه لي وكوبليه لكم ..مو تخشون على كوبليهيي والله لا اكبللها لكم فوق راسكم ...فاهمات ...عزيزاتي الحاضرت احم احم نأسف لهذا الخلل الفني أما الآن أقدم لك علامة بارزة من علاماتي الفارقة .. باب النكد ..بنات اطلعوا وراي

ليش يا قلبي تفتح للنكد باب ..من حسبته عصفور يا قلبي طلع غراب ...خسارة كنت احسبه صادق طلع كذاب

أحد الحريم: قولي آمين الله ينكد عليج دنيا وآخره.. احنا في عرس ولا عزا؟ شنهو هذا؟ مالت عليج هذا عرس يعني أغاني فرح مو أغاني نكد ..خافي الله سديتيها في وجه البنيات يخافون يقومون يرقصون

سامي: لا اله الا الله وبعدين ما راح نعرف نغني ..وين السيكورتي نادوا لي السيكورتي ...هالآدمية بتخرب العرس ترى ما صارت أم كلثوم الله يرحمها كانت زميلة وعزيزة ولا تعرضت لربع اللي أتعرض له الحين .. بنات وينكم اطلعوا لي بالكورال

باب النكد ..يا قلب فتحته مين يسكره ..عيوني في الحب عمياء و محمره ...جدة رطوبة بس الرياض غبره .. صارت الدنيا في عيوني سودا ...ووسط دنيتي كأني دودا

أحد الحريم: جعلك الدود اللي ينخر عظامتك كانك نكدتي علينا الدنيا يا شيخة خافي الله فينا ..مسوين لك شي؟ والله في عيني الدمعة منج ومن أغانيج ومن صوتج الي يحوم الكبد

سامي: لا مصخت مصخت بقوة ..ماني لاقية الأجواء الصحية اللي أغني فيها يا بنات في الشنطة جايبه معاي ديتول أعقم به الجو ..أحس أني مخنوقة ماني قادرة أدش مودي الطربي

أم العروس: خافي الله فينا يا تهاني مدري يا أم فيصل ياللي أنتي والله ما صارت اللي تسمع صوتج وهي داخلة للقاعة تهج وتنحاش ..غني شي فيه وناسة وطرب و فرفشة ..واللي يرحم والديج

سامي: يا أم العروس على خشمي أنتي بس تأشرين طال عمرج وأحنا رهن يدك ..تبين فرفشة ...من عيوني ..في أغنية لي أخذتها بعد صراع رهيب مع الزميل محمد عبده ..أغنية بايقاع سريع يالله بنات طلعوا بايقاع بياتي وانا بالحقكم بايقاع سيكا ..نتلاقى انشالله في ايقاع النهاوند ..احم احم اعوذ بالله منك يا أبليس

درب الضياع اللي أمس مشيته ..حلفت ما أمشي فيه مرة أخرى ..والكابريس الي لاجلك شريته ...بعته وشريت كورولا حمرا ..درب الضياع يا درب الضياع ..آه يا باب النكد ...سوري سوري في خلل فني ..الذاكرة المؤقته خشت في الذاكرة الدائمة ..يعني بلغة أهل الحاسب الرام خشت في الروم ...الله يستر من الفيروسان ..نرجع للأغنية ..آه يا درب الضياع ..كلن لقى له حبيب ..وانا ماحصلت لي حبيب .. وسو يا سو حبيبي حبسوه ..كلن لقاه نصيب وانا ما حصلت لي نصيب وسو يا سو حبيبي حبسوه

أحد الحريم: الله ينتقم منج يا شيخة كانك جاية هالليلة عشان تنكدين علينا

حرمة ثانية: حسبي الله عليج حشا أنتي مو تهاني ..أنتي المفروض يسمونك مصايب هموم ..ذكرتيني بليلة عرسي على المرحوم يوم ينطفي الكهرب ..علينا واحنا في السطح ..انتي حافظة أغنية فيها كلمة عرس فرح ..زينة أنوار أو أي شي فيه فرح؟

سامي: لا لا وصلت للسب العلني أنا مضطرة أنهي العرس وأطلع بكرامتي كل شي الا الاهانات .. خلاص ... العرس تكنسل

آنا: اصبر يا شينك خل نشوف وشلون أهلي بيتصرفون

سامي: اوكيه بناءا على رغبة الأخوات المشاهدات ما راح نكنسل الحفل الغنائي الساهر بس سكوت لو سمحتوا

أم العروسة: بس يا حريم اصبروا انشالله القادم مذهل أكثر وأنتي يا تعازي قصدي يا تهاني ..واللي يخليج غني شي يفرفش يوسع الصدر .. الحريم شب فيهم الروماتيزم من قلة الحركة .. يبون يقومون يرقصون.

سامي: طيب زين بأغني شي فرايحي ..باخرج عن تقاليدي ..العادة أبدى بشي ثقيل واخلي الخفيف في الأخير علشان نحلي فيه بس يالله يا بنات يا لا بس الكحلي .. احم احم يا لابس الكحلي يا شين يا محلي ... طلعت تقليد وأنا أحسبك أصلي .. آه آه أصلي (دخل جو مواويل) أصلي على الأصل دور ..على الأصل دوور ..ويوم احترق بيت خلي ...احترق قلبي كأنه حطب السمر . و آه يا قليل الأصل رزيتك وعزيتك و أنت مالك أصل يا قليل الخاتمة ..آه يا قليل الأصل ...ليتك تموت .. ودي تموت ..يا جعلك تموت متى تموت آه يا ليل يا عين .. وين وصلنا ..ايه يا قليل الأصل

حرمة أخرى: قلوك في زيت حار.. شنهو هذا؟ احنا في عرس ..أنتي ليش قاضبة الميكرفون؟ عطي المكرفون للي وياج يمكن يغنون أحسن منج

آنا: هذي مرة خال يتقول لك تعطيني المايكروفون علشان أغني يمكن أغني شي يرقصهم

سامي: اها تبين ترقصين أنتي ..يالله هناك بس انقلعي .. عناد فيك باغني مرثية هذا اللي ناقص أعطيها المكرفون و آنا رئيسة الفرقة

أم العروسة: خلاص خلاص يا مرة أخوي .. سكتي .. عدي هالليلة على خير يكفينا اللي فينا ..الله ابتلانا بها خليها تغني على كيفها لين أدعي الضيوف على العشا

سامي: لا وصلت ..كرامتي مسحتوا بها الأرض ..أجل خليها تغني على كيفها لين تدعين الضيوف على العشاء ؟ خبلة؟ أنا أوريكم أن ما غنيت أغاني تسد نفسكم على العشا .. احم احم .. حبيبي غص في قطعة لحم ..وأخته تسممت من حمص مابه دسم ... وولد جيرانا الشغالة حطت له في الرز سم .. هين أنا أغني لين تدعون الضيوف على العشا هذي آخرتها ..هين هين ..الا وتجي حرمة دبة متينة حيل


الدبة: أقول لج خذي هذي ألفين ريال بس عاد أغنية سنعة علشان ترقصيني

سامي: شنهو هذي؟ رشوة؟ آخرتها رشوة وعيني عينك؟

آنا: مو رشوه كذا الطقاقات يعطونهم الحريم فلوس علشان يغنون لهم أغاني معينة ولا يمدحون في عوايلهم ولا أنديتهم وأحيانا مدارسهم

سامي: هلا و الله ايه هذي الناس اللي تقدر الطرب الأصيل .أمري وش تبين أغني لك شرقي غربي .. سريع بطيء ..من عيوني .. والله ...احم احم أخواتي المستمعات بناءا على رغبة الأخوات الحاضرات ..وتنازلا مني شخصيا أنا المطربة تهاني .على سن ورمح ..قررت أني أغني لكم أغاني بعض الزملاء المطربين والمطربات وذالك مقابل مبلغ مادي رمزي قدره ألف ريال ... واللي تبي تغني لعائلتها ..بألف وخمسمية ..كما يسرنا أن نبلغكم عن وجود أغاني جديدة للهلال والنصر على ألفين ريال ..جزء منها يروح للاتحاد السعودي لكرة القدم عشان لجان تطوير كرة القدم السعودية وتنمية موارد دخل الأندية . احم احم الآن أغنية يا دار للزميلة زبيدة

آنا : يا دار لرابح صقر ونبيل شعيل ..أنت وين كنت يوم حرب الخليج ما سمعتها؟

سامي : لا و الله خليني أغني عشان هالدبة تبي ترقص احم احم

رقصت الدبة وفي هاللحظات بديت أحس بهزات أرضية

سامي : لحظة لحظة ستوب ..يرجى من السيدات المتواجدات بالقاعة ربط أحزمة الأمان واللي مهربة ولدها ولا بنتها للقاعة ياليت تضفهم وتحطهم في حجرها ..الفرقة ماهي مسئولة عن أي أضرار تنجم عن رقصة تلك السيدة الرشيقة ..والان نعود لمواصلة برامجنا يالله نطي نطة يا دبدوبة وكمان نطة وكمان نطة وعشان خاطري نطي عشر نطات واحد اتنين تلاتة.. هيه هيه..ستوب استراحة نص دقيقة يا حريم اللي طار ولدها ولا جوّّالها تروح تجيبهم قبل ما نكمل الأغنية .الطيبة مدهرة رقص ..أحد لاعب عليها قايل لها ياريشة؟يالله نكمل ..ليتك معي ساهر ليل الهوى كله ..ما أنوم أنا وأنت لأجل الحب سهران ..يالله يالله عاش عاش ورى ورى ..البنات الجالسات حول المنصة ترى الونش يرجع على ورى ما دق أشارة ..ما علينا ..هل رأى الحب سكارى ..سكارى

أم العروسة: يالله حياكم الله العشاء جاهز تفضلوا

سامي: صج قلة أدب مافي احترام لأهل الفن؟ المفروض احنا يالفنانات نتعشى أول الناس

أم العروسة: لا تخافين بنعزل لك من الباقي و اذا ما بقى شي بنعطيك خمسين ريال تتعشين منها أنتي والفرقة يالله تفضلوا


في الحلقة القادمة تعرفون شاللي صار لما عرفوني آنا و سامي

 

[StEllA]

مشاركة: قصة بدرية وسامي ومشعل...مسلسل انترنتي....

بنات الحلقة هذي فيها شوي مشاهد رايحة فيها ...والرقيب شغل مقصه

 

[StEllA]

مشاركة: قصة بدرية وسامي ومشعل...مسلسل انترنتي....

الحلقة السادسة

آنا الحين قاعدة مع سامي مسويين روحنا طقاقات و حاضرين حفلة زواجي .. و احنا قاعدين نطق سمعت امي تقول:

أم العروسة: يالله حياكم الله العشاء جاهز تفضلوا

سامي: صج قلة أدب مافي احترام لأهل الفن؟ المفروض احنا يالفنانات نتعشى أول الناس

أم العروسة: لا تخافين بنعزل لك من الباقي و اذا ما بقى شي بنعطيك خمسين ريال تتعشين منها أنتي والفرقة يالله تفضلوا

آنا : (همسا) اسأل أمي وين العروس .. قبل لا يروحون الحريم يأكلون

سامي : وين وين وين؟؟ صبر صبر ..وين العروس ما زفيناها ..في عرس بدون عروس؟ ودي تيجي؟ في بروستد بدون بطاطس؟ و لا في سلطة بدون طماط؟

أم العروسة : عاد هذا اللي كتبه الله ..المعرس ما وده بالزفة ..يستحي الله يهديه قمنا طلعناها له من دون زفة

سامي: لا لا لا ... أنا سكت على كل شي بس توصل المهزلة والاستهتار الى هالحد لا ..أغني في عرس ولا أشوف العروس بنفسي ظلم ...يالله بنات وراي ..عرس أونطة هاتوا كروتنا ..عرس أونطة هاتوا كروتنا

أم العروسة : الله يهديتج يا تهاني عاد المعرس وهذي رغبته. شنسوي له؟

سامي : لا لا رغبته عند أمه ما علينا هذا عرس ..على الأقل تجي هي نشوفها نتملا منها مو تهريب حشا مو عرس هذا

أم العروسة : عاد يا بنت الحلال العروس وراحت مع رجلها المهم يالله .. الله يحيكم على العشا على قل الكلافة

في هاللحظة قررت آنا بدرية أخرب كل شي علي و على أعدائي

آنا: لا يمه .. آنا العروس ... وهذا آنا ما رحت حق رجلي ...ليش ما تبون الناس يدرون أني رافضة الزواج بهالطريقة؟ يا حريم أعرفكم بنفسي اللي ما تعرفني ترى آنا بدرية بدر البدور ... اللي خليت خطيبي حوالية يدور .. يعني المفروض اني عروس الليلة بس أرفض الزواج بهالطريقة

سامي: كلو لو لو لو لوش ... خلاص بدرية تحررت يا ناس يا هوووو ... ياهووه يا قاهرتهم يا بدرية ..هذي آخر موضة بالزفات ..تعتمد على الصدمات

أم المعرس : هي وصلت بك قلة الحياء تسوين كذا عيني عينك با بدور؟؟؟ بس الحكي مو معاج .. الحكي مع أبوك الحين تنادونه يشوف فعايلك يا اللي ما تستحين ... عروس و تنحاشين؟؟؟ ايا الهايتة

أم العروسة : ابشري يا أم مشعل الحين ننادي ابوها و اخوها يجي يأدبها هي و شلة الصبيان اللي معاها بس انتي لا تعصبين.. وأنتوا يا حريم تفضلوا العشا لا تضيقون صدوركم

سامي: الحمدلله عرس من أروع ما يكون ..بالرفاه والبنين ..استأذنكم عندي عرس أمراء في استراحة وبعدين عندي عزا بروح الطم فيه أشوفكم على خير

أم العروسة : صبري أنتي يا تهاني الفقر ...وتسحب لثام سامي وينكشف وجهه ويطلع الشنب و يعرفون ان لا تهاني ولا شي من هالقبيل ..وأنه ولد

التفت و لقيت شذى و خواتها وبنات خالاتها انحاشوا وما بقى ألا أنا وسامي اللي هو تهاني ..امي و ام مشعل خطيبي ..حتى الحريم دخلوا يتعشون ...وكلها دقيقتين الا لقيت أبوي و معاه أنور داخلين و يقوم أنور و يطيح في سامي طق و ترفس و يدوس في بطنه و ابوي يهاوشه و يهاوشني

ابو بدرية : أجل ما شفتها يا سامي الكلب ... ولا تدري عنها هين دواك عندي أن ما خليت أكبر عظمة فيك كبر النملة .. وأنتي يا قليلة الأدب يا بدرية على بالك بتمشين كلامك علينا؟؟؟ شرايك أنك بتروحين بملابسك هذي و نزفك الحين لبيت مشعل ... هذا نهاية تربيتي فيج يا الهايتة؟؟؟
آنا : ما يصير تزوجوني واحد ما أعرفه ولا أعرف عنه شي مابي مابي ..

أم مشعل : عناد فيك يا بدرية وقدام أبوك هذاني أقولها لك بتجين ورجلك فوق راسك على بالك أنك أذا جيتي مع هالهايت ( تقصد سامي ) أنك بتسوين اللي في رأسك؟؟ هزلت والله

سامي: يا جماعة الخير اذكروا الله بس شكل هذي مشكلة عائلية خاصة ..أنا استأذن الحين واذا حليتوها على خير انشاء الله تعال يا أبو بدرية ولا تنسى تجيب أنور معاك عشان يدوس في بطني و يطقني ... حاضرين لخدمة الطيبين

أبو بدرية : أنت الله لا يعوق بشر ما راح تطلع من هنا الا على المقبرة ..هذاني أقول لك ..بس خل نشوف شسالفة هالبنت ..اللي وجهها مغسول بمرق..يالله يا بنت البسي عباتك هذا مشعل ينتظر بره يالله لو ما الحشيمة لأم مشعل ..كان كسرت ظلوعك .. بس بأطيح اللي في رأسي في سامي هالهيس ( الهيس شيء اختلف اعلماء في تفسيره بس الأكيد أنه حاجة مش كويسة )

آنا : هذا آخر كلام لكم يعني ..اوكيه مافي مشكلة بروح مع مشعل ..بس ما ودكم تدرون ليش آنا انحشت عند سامي بالذات؟ ليش ما رحت لوحدة من صديقاتي؟ ولا رحت أي سوق انحاش فيه الى أن ينتهي العرس هاه؟ ما ودكم تعرفون؟

أم بدرية: وجع عسا ما بينكم شي؟ هاه يا بنت قولي تقلقلت حنوكك!

آنا : يوووووه تذكرين قبل سنتين يوم نرجع للرياض أنا وأنور عشان يسجل في الجامعة وبقيتوا انتوا في الطائف ..عاد يا يمه الله لا يوريك ... كان شباك غرفة سامي قبال شباك غرفتي ..وكل يوم يتسبح ..و يجلس يدور وهو مفصخ في غرفته يغريني و أنا أقاوم وأحاول ما أطالع كثير بس شوي ..بس هو ما يعقل واذا درى أني طلعت للساحة قام يروح للسطح حق الملحق ويتغزل فيني ..و أجي بانحاش عنه وينط علي في الساحة ..أجي باتركه ..ويقوم يمسك يديني .و يشبك أصابعه في أصابعي ..ويقول لي كلام حلو ..يسرسح على القلب سرسحة ..كلام يدوخ ... ولعب علي قال وريني غرفتك

قمت مثل المجنونة ووريته غرفتي ..وقال لي غرفتك صغيرة ...وريني غرفة أمك وأبوك . ورحنا غرفتكم ..طبعا آنا على نياتي مدري ليش .. وقام يكمل لي كلامه الحلو وهو ماسك يديني ..وحضني يقطع أبليسه كان حاط عطر أسكادا كأنه يدري أني أموت في هالعطر وقال لي تبين أوريك سحر .. عاد أنا وافقت ..

سامي : معليش على المقاطعة بس هالحكي عني .ولا عن مين بالضبط؟

آنا : اسكت يا حبيبي الى متى بنخبي حبنا؟ لازم هم يدرون وين وصلنا يمه ...

أم بدرية: وصلنا للسحر هاه .. و وراك السحر ولا توه؟

آنا : ايه ياهو سحر ..خلاني أنام على سريركم ... حتى بالعلامة كان فراشكم ذاك الوقت أحمر ..

أم بدرية : عمى يعميكم ... وليش تقولين له تكفى يالخبلة؟ أحمدي ربك ..والله أنه طلع سنافي أحسن من أبوك اللي له خمس وعشرين سنة وهو على نفس الخطة .. أني ألمح له يابو الشباب سو تجديدات و هو مو داق لي خبر ...البرازيل غيرت خطتها وهو على نفس نظام ليلة الدخلة ..
(هني بدرية توصف لهم شسوى لها سامي....)
أم مشعل : الله يلوم اللي يلومك يا بدرية ... وآنا خالتك من الحكي بس ساحت ركبي ..أثرنا ملعوب علينا بالزواج ..مزوجينا دبش ما يفهمون شي
آنا : صبري يا خالتي توك وبعدين ..وش سوى ..
أبو بدرية: كل هذا يا قليل الأدب وفي غرفة نومي بعد ...ما تستحي على وجهك

أم بدرية: اص بس الله يفشلك من سمعك غرفة نومي وغرفة نومي كأنك مسوي شي ..حدك حدك 3 دقايق ونص وتقول لي تمسين على خير يا أم أنور .. كملي يا بدرية ..وبعدين وش صار؟؟؟

أم مشعل : أي والله كملي وأنا خالتك ماعليك من أبوك ...الحين وين صار يبوس؟

سامي : أقسم بالله يا عمي يا أبو أنور أن ولا شي من هذا صار .. ولا أدري غرفة نومكم هي فراشها أحمر ولا لا هي فيها مكيفين حتى أنا وش يدريني ..

آنا : شفتوا عارف أن غرفتكم فيها مكيفين ...


المهم وجلسنا كذا طول الأجازة أذا طلع أخوي أنور مع ربعه من العصر وتركني في البيت بروحي ..الى أن يرجع في الليل ..سامي يكون جنبي ما يتركني ..وكل يوم شي جديد و خطة جديدة مرة في المجلس ومرة في المطبخ ...حتى مرة مستحية اقول لكم وين

أم مشعل : يا بختك يا بدرية ..هذي الرجال اللي تفهم .. يعرفون يستغلون البيت ..مو أبو مشعل ما أقول الا حسبي الله عليه ما عمره دخل المطبخ ألا علشان يأخذ شي من الثلاجة يأكله ويطلع

أم بدرية : أي والله عندنا وعندك خير .. الواحدة عمرها يمر ما تستمتع به ..نلبس أحمر ولا أخضر هو هو هالثلاث دقايق ونص وتصبحين على خير ..

آنا : شفتوا عاد ..أنه ضيعني في حبه ..بس أحبه أموت فيه ..وكل ما أقول له متى بتتقدم لأهلي يضيعني بكلامه الحلو ..عاد يا خالتي يا أم مشعل كانك مصرة تزوجيني ولدك مشعل على هواك ..ما عندي مشكلة ..

أبو بدرية: أنا يا قاتل يا قاتل ...كل هذا مع بنتي يا قليل الحياء ..وصلت بك المواصيل تمتر بها في البيت ما بقى مكان ألا خذتها له ... موتتك على يدي ..

سامي : والله العظيم اقسم بالله ما صار ولا شي من اللي تقول ..ما بقى ألا أمصمص رجل وحدة وع وين عايشين ..يا عمي شف وجهي تمقل فيني زين بالله عليك هذا وجه واحد راعي هالحركات؟ في البحرين مرت جنبي أمريكية لابسة جينز أنكب البيبسي على هدومي..و أنا أطالع فيها

آنا : كذا يا سامي تنكر قصة حبنا أجمل قصة؟ حرام عليك يا أخي شسويت لك ..على العموم عارفة أنك تحب غيري ألف بنت بس الشكوى لله الله زرع حبك في صدري و ما اقدر أسوي شي ..اهجرني يا أناني يا قاسي أنا بأتزوج مشعل وأحقق رغبة أهلي خلاص و أنت رح للي تبي تروح ...يا خاين ..

أم بدرية : لا وين يروح له لازم يستر عليك وخصوصا عقب كل اللي سواه ...يا بنيتي شي تعرفينه ولا شي تتعرفين عليه ..لا يغرونك أشباه أبوك

 

[StEllA]

مشاركة: قصة بدرية وسامي ومشعل...مسلسل انترنتي....

الحلقة الأخيرة

أكمل لكم السالفة

أم بدرية : لا وين يروح له لازم يستر عليك وخصوصا عقب كل اللي سواه ...يا بنيتي شي تعرفينه ولا شي تتعرفين عليه ..لا يغرونك أشباه أبوك

سامي: يا خالتي يا أم بدرية والله العظيم ما في شي من اللي قالته بدرية صح ..بالله عليك هذا وجه واحد يعرف في الحريم شي ..عاد أسوي كل هالاشياء؟

أبو بدرية : أقول خل عنك المسكنة و تسوي نفسك بريء الجريمة اللي سويتها لازم تصلحها وبعدين أعرف أتفاهم معاك

آنا : لا يبه ما أبيه ..مانّ بروحه شكله يعرف واحدة ثانية ..خله يروح لها ..الله كريم أنا بأتزوج مشعل ...يازينه .. على الأقل مو راعي بنات

أم بدرية : شوفي عاد يا أم مشعل أذا ولدك ما يعرف لمصمصة الرجول وهالأشياء اللي تفتح النفس خليه يشتري له من هالكتب ..مو بكرة البنت تعاني مثلنا

أبو بدرية : أنتوا ناوين تفضحونا عقب اللي صار ما عاد ينفع تعرس على مشعل..مالنا هالا هالهيس ( الهيس = سامي)

آنا : لا يبه أرجوك. شيقولون الناس اللي جاو يحضرون زواجي على مشعل؟ أقوم أعرس على سامي؟ ما يصير.. هو صج سامي أحيانا يسوي شي مثل السحر بس ولو. الوحدة أذا بتعرس تعرس على رجال ثقيل مثل مشعل

أم مشعل: لا يا بنيتي ولدي ما يصلح لج الحين لسببين: ولدي مو قادر يتزوجك وانتي الله لا يبلانا والسبب الثاني ولدي وأعرفه زين مدرعم من نوعية أبوه ما عنده الا خطة انبطحوا وبس

سامي : ما تلاحظون أنكم صايرين تمونون وناسين أني أنا أكثر واحد معني بهالشي وأني أنا اللي تبون تزوجونه وهو ما سوى شي أساسا؟

أبو بدرية : أنت أصلا مالك رأي ولا دبرة بتسوي اللي نقول لك عليه مو كافي فضحتنا الله يفضحك

أم بدرية : اها عاد كل شي ألا رجل بنتي لا تزعله ..بدال ما تهاوشه تعلم منه شوي ... يمكن نعوض شي بدال 25 سنة من الملل

أم مشعل : آنا باتصل على مشعل يدخل علشان يطلق ..بنتكم ما تصلح لنا

آنا : لا عاد حرام والله تفرقوني عن مشعل اللي أحبه ..كنت متوقعه أنكم بتكونون معاي أذا عرفتوا ليش أنحشت من العرس مو توقفون ضدي وتمنعون زواجي من حبيب قلبي شعولي

سامي: مو من شوي ما تبين تعرسين عليه؟ شصار الحين؟ صار حلو؟

آنا : انت اسكت بس يالخاين يا راعي البنات .. ضيعت مستقبلي بخرابيطك يا ويلك من الله

أم بدرية : اها بس كل شي الا رجلك الجديد احترميه ..والله انه كنز ربي يحرسه من العين ..أقول يا سامي أذا ما عندك مانع و أنا خالتك ممكن تخلي خالك أبو بدرية يتعلم منك شوي؟ يمكن يتعلم منك أبيه يعرف شلون يمسك يديني على الأقل

سامي : والله يا خالتي ..بالنسبة لي ما عندي مانع ..بس ظنتك رجلك منه رجا أنه يتعلم شي؟

و يجي مشعل وتقول له أمه السالفة .. الولد حمّر وجهي .. آنا خفت و قمت أقرأ المعوذات خفت لا يبرك فوقي ساعتها أموت عاد هو ماشاءالله متين حيل...ويحمّر وجهه زيادة وفي الأخير صاح و دموعه أربع أربع كأنه أبو أربع سنين راحت عنه أمه .. و أمه تقول له طلقها يا مشعل مالك نصيب يا ولدي وهو يصيح و شوي ألا وعيوني بدت تدمع ....والوضع صار بايخ تقول فيلم هندي ....و سامي كل شوي تجي له رفسة من أنور مع ان ابوي قايل له لا يطق

آنا: مشعل أنت تبكي ليش؟ ..أنت تحبني ولا ايش؟

مشعل : والله يا بدرية أكذب عليك أذا قلت لك أحبك بس أهلي قالوا لي الحب الحقيقي يجي عقب الزواج ..ولا أنا كان ودي بفترة خطوبة أعرفك زين ...والحين لا خطوبة ولا هم يحزنون

آنا : من جدك هالحكي ولا عشان اللي عرفته؟ما عليك منهم قل الصج

مشعل : والله جد كل ما تذكرت يوم جيتوا عندنا في أمريكا و أزعجتونا .يوم تطلبين مني أوديك للسينما وأقول لك لا أحس أني كنت بايخ وغبي وأني ضيقت صدرك ومدري شلون أعتذر منك

آنا: أجل دامك تحبني ..لا تسمع كلامهم ولا تطلقني .. ونتزوج

مشعل : بس شلون نتزوج ..وأنتي يعني اسمحيلي ..يعني ...

سامي : و ليش مستحي؟ قلها ..يعني قال لك جاي من أمريكا بتصير مؤدب؟

آنا: ما عليك منهم أنت تبيني ولا ما تبيني؟هاه قل لي

مشعل : أيه ودي بك .. بس لو ما أنتي .... يعني مثل ما يقولون .. انتي .....

آنا : أول جاوبني تعطينا فرصة نعرف بعض زين يعني فترة زي الخطوبة ...قبل ما تصير الدخلة؟

مشعل : أنا ودي بس أمي تبيني أطلقك عشانك صايرة .....

آنا : متى يا مشعل تقدر تتخذ قرارك بنفسك؟ قالوا لك أهلك تزوجها تتزوجها على طول قالوا لك طلق تطلق .. وين عقلك ليش ما تتخذ قرارتك بنفسك

مشعل: يعني أذا اتخذت قراري بنفسي بتحبيني؟ خلاص يمّه ما راح أطلقها أنا أحب بدرية وقابل بها ولو أنها .....

أم مشعل: استح على وجهك تعصيني وتاخذها وتعرف أنها ..الله لا يبلانا بس و جايبة عشيقها معاها بعد؟ا

سامي: لا ا لوضع صار ما ينسكت عليه وصلت بها تجيب عشيقها هنا واخزياه بس

أم مشعل : اقصدك أنت يالخبل ..يا ولدي طلق وبكرة أزوجك اللي أحسن منها.. بنت حمولة

سامي: يا بنت الحلال تعوذي من أبليس خليهم يعرسون على بعض لا توقفين في وجييههم ..ولدك مخرب أبوها أيام كان في أمريكا كنا نحارب العراق وهو مصاحب له عراقية ..وأنتي داجة في بنتاجون سيتي مول ....يا بن الحلال يا مشعل لا تطلق خلك معاها

مشعل: ماني مطلق يعني ماني مطلق كلمة وقلتها ..هي تحبني وأنا أحبها ..اسمحيلي يا يمّه مالي دعوة بماضيها ولا هي لها دعوة بماضيي ..خلونا نتعرف على بعض نفهم بعض ..نعتبرها فترة خطوبة

أبو بدرية : بس يا ولدي ترى البنت مثل ما قالت لك أمك يعني ..

سامي: يا بن الحلال صج محد بيخرب على بنتك الا انت ..تعوذ من أبليس ما صار شي بيني وبينها.. مشعل خل عنك الخرابيط ... ما في أحسن لك من بدرية ..بس الله يخليك أذا ممكن عناوين البنات في أمريكا اللي تعرفهم ..نويت أترك الجامعة وأرجع أدرس ثانوي في أكاديمية الملك فهد في واشنطن

آنا : يمّه... يبه ...مشعل... ترى كل اللي قلته لكم خراط و كذب ما صار بيني وبين سامي شي ..مابقى ألا احب هالشين

سامي: جزاك الله خير ...شين شين بس أعيش ولا أنطق

أبو بدرية : شف الله فكك من الموت بس من بيفكك من التكسير أجل نجي ونسألك وتقول ما شفتها؟

أم بدرية : يعني كل اللي قلتيه والتبويس ومصمصة الرجول طلعت كذب؟ حسبي الله عليك يا بنيتي ..سخنتيني على الفاضي ..أنا وخالتك أم مشعل صرنا نرجف ..من ........... الله يقطعك بس يا أبليس

آنا: والله غصب عني يا يمّه بس ما بغيت أتزوج بهالطريقة كنت ابي فترة أتعرف عليه ويتعرف علي نعرف بعض ونفهم بعض ..يمكن الحب يجي بعد الزواج بس لازم نمهد له الطريق ...بالأسلوب الصحيح ....ما راح يتغير شي أنا و مشعل بنبقى متزوجين بس عطونا على الأقل شهر نتعرف على بعض أكثر.. يا يمّه ويا أبوي عمر تجهيز الزواج ما كان بغرفة النوم ولا شرى الملابس ولا أطقم الذهب ... لأن كل هذا يمكن في زلة يروح مع أول كلمة طالق

سامي : اهيء اهيء اهيء ...مدري شقول بس ..ارحمني يا أنور توبة والله ما عاد أكررها كسرت ضلوعي من ترفسك فيني ..واحد يوديني للمستشفى بسرعة مو قادر أقوم

مشعل : خلاص يا يمّه ويا خالي ويا خالتي الزواج بيتم وبتجلس ندى عندكم شهر نتعرف على بعضنا أكثر ونفهم بعض والله يكتب اللي فيه الخير

أبو بدرية : والله مدري شقول الحمدلله ...اللي ستر علينا وتمم فرحتنا خلاص يا عيال دامكم أتفقتم ..وهو كذالك بعد شهر انشاءالله نسوي لكم عرس ثاني

أم بدرية : ونجيب طقاقة محترمة تغني فيه ...مو مثل بعض الناس ... اللي ما غير يخربون العروس

سامي : الحمدلله الفنانة تهاني تحجبت واعتزلت الفن ..الحمدلله بتشتغل قهوجية

أم بدرية : يالله يا بو أنور خذ العيال ترى الحريم شوي ويطلعون من العشاء ما نبيهم يشوفوننا ..و أنت يا مشعل خذ بدرية وروحوا تعشوا في أي مطعم وسولفوا مع بعض وبعدين رجعها للبيت

وطلعنا ..آنا مع خطيبي مشعل رحنا مطعم ياباني كشخة عشان نتعرف على بعض ..وأبوي راح لربعه في الأستراحة يكملون السهرة بلعب البيلوت ..والحريم جابوا مسجل وشغلوا أغاني وكملوا رقص ... أما سامي طلع محمول على يدين أنور وطق وتكفخ .. الى الفجر لين عيونه صارت زرق و خشمه تنفخ

وبعد سنة آنا و مشعل جبنا ولد و قررنا نسميه سامي اعترافا منا بفضل سامي علينا و جبر لخاطره و تعويض عن الطق اللي كله ..و سامي ما زال في تشيكسلوفاكيا يجربون فيه العلاج الطبيعي لأول مرة في العالم محاولات زرع سبع ضلوع بدل اللي تهشموا على يد أنور

و خلصت القصة

 

[Bent_Dubai]

مشاركة: قصة بدرية وسامي ومشعل...مسلسل انترنتي....

الصراحه ما في اروع من هل قصه......

مشكوووووووووووورة والله ما قصرتي بس اذا ف زياده كثري منها....

تسلمييييييييييييين اتريا الجديد ان شاء الله منج.......

 

[ياحلاتي قمر]

مشاركة: قصة بدرية وسامي ومشعل...مسلسل انترنتي....

بصراحه ما تدش العقل




خربوطيه شوي بس تضحك

 

[ذكريات]

مشاركة: قصة بدرية وسامي ومشعل...مسلسل انترنتي....

خخخخخخخخخخخخخخخخخخ

النهاية عجيبة

بس و الله هالبنية تقهر , , , اشسوت بالولد فقير

 

[StEllA]

مشاركة: قصة بدرية وسامي ومشعل...مسلسل انترنتي....

بنت دبي مشكوووورة ....وانشاالله بكون في أكثر....أحزان مشكووورة على المرور بس منو قالج انها قصة حقيقية اهي تاليف وحدة سعودية....ذكريات مشكوووورة

 

[نــمــاري]

مشاركة: قصة بدرية وسامي ومشعل...مسلسل انترنتي....

حلللللللللللللللللللللللووووه القصه
خيااااااليه القصه بس فيها حمااااااااااااااااااااااااااس وتشوووييييييق
يعطيج العافيه