حبيبتي القناعه زينه
أنا كاه !
كويتيه !!
لكن ورب الكعبه مااعندي ماركات ولا عندي افخم السيارات ولا آكل بآغلى المطاعم ولا معاي رصيد ومبلغ كبير من المال !
أدرس بالجامعه ولبسي أقل من عادي عبايه ونقاب وملفع .. وشناط عاديه جداً جداً .. واروح مع سايق بالأجرة سيارته
كل من شافها بالشارع قعد يخز ويضحك !!
مع ذلك طااااااااااااااااف اقسم لج بربي ما تحسست ولا تضايقت
لإني ادري ان حالتي هذي احسن من حالة ناس واجد ثانيييييييين
ولإني مؤمنه ان اي أسرة .. ببداية نشأتها لازم تمر بضائقة ماديه , بالغالب ,
يعني مافيه الا موظف واحد وهو أبوي !
لا ومتقاعد وعليه قروض !!
امي ما تشتغل واخواني صغار انا البجر وبالجامعه
فـ لكِ ان تتخيلي الضائقات الماليه اللي نمر فيها !!
مع ذلك مستورين الحمدلله وعندنا بيت وماعمرنا نمنا جوعانين اكلنا موجود ولبسنا ساترنا
وندرس بالجامعه , وصحتنا عال العال ياربي من فضلك
وان شاء الله من نتخرج ونشتغل بيتغير الحال , ونقعد نذكر ايام الغُلب , ونقول راحت هالايام
يعني اللي ابيه منج اقنعي وشدي حيلج وتخرجي واشتغلي , وان شاء الله حالكم بيتغير للأفضل
دائم شوفي الناس اللي اقل منج لا تشوفين اللي فوقج تتعبين والله
