فــن..الســوالــف..شـاركونـي..!!

[بنت الدلال]

مساء الكـادي


شخباركم ؟


هالموضوع من زمان بحطــه واتعييز ... وتره مهم حييــل حق الي ماتعرف تســولف



وكـل وحـده تدش تحط لنا نصيحــه :


اول شــي لازم تعرفين متى تسولفين ومتى تسكين.. فرضا وحـده مندمجه قاعده تشوف برنامج ولا مسلسل وانتي تقرقين تقرقين واهي تقول اي اي اي وودها تطقــج .. اكره هالموقف وصارلي وايــد ازعــاج ياربي


ثــاني شي لازم تعرفين السالفه المناسبه بالمكان المناسب .. يعني مره تقول ايي والله ولدي طاح ذاك اليوم ومادي ري شصار واهمه يختبون فجـأه تدش وحده عرض ايي شفنو فلانه ضعفاانه صايره النص اكيد مسويه تحزيم مو معقوله رجييم لالا ... وتكون ذيك ماخلصت سالفتها



اذا توهقني وقعدتي مع وحــده ماتعرفينها عــدل وماتدرين عن شنو تسولفين وياها وياكثر ماتصير معــاي

حـدي اتوهق واقعـد ساكتـه بس المفروض

اسالها عن المدرسه او الدوام واهي بـأي مرحله وتخلص السالفه بعدين هههه شتسون اذا صــار فيكم جـذي


..


وكل يوم بدش اضيــف نصيحــه وانتو فيدوني بعـد

 

[زيـنـه]

لا تقاطعين سالفة احد
لا تطولين صوتج على اساس يسمعونج لانج بهالطريقه الا بتفرضين سالفتج عليهم
لا تبالغين بالسوالف او الاحداث
لا اتطولين السالفه و تتمططين فيها
لا تسولفين عن نفسج و اهلج وايد و كل شوي انا و انا و احنا و احنا
لا تتدخلين بخصوصيات الغير و تسالين اساله حساسه و شخصيه
لا تتاخذين اسلوب الحش و النميمه في سوالفج و تحاشيه كثر ما تقدرين
عطي الاشخاص اللي تسولفين معاهم حجمهم و احترامهم اذا مره عوده او بنت صغيره .
قدري الناس و راعي اللي جدامج وحالتهم الاجتماعيه و مستواهم الاقتصادي .. يعني لا تسولفين عن الزواج و الزوج و الحموله مع مو متزوجه او مطلقه او ارمله .. او لا تسولفين بالامور الماديه مع ناس على قد حالهم و انتي تدرين .

هذا اللي في بالي الحين .

 

[Viva La Vanilla]

مساء الياسمين

لا تتصنعين بالدلع اهم شي

يا شين اللي و اهيا تسولف غصب انا صوتي حلو و صوتها يرجف من كثر ما كل ساع تغير النبرة

ماحب اللي يجذبون و يبالغون

كوني طبيعية بالسوالف و لا تعطين تفاصيل عن حياتج من اول مرة....

و شنو بعد احب اذا قعدت مع ناس اول مرة اكون مستمعة 70% اكثر من ما اتكلم


و سلامتج و اذا طرى على بالي شي هم راح ادش مرة ثانية

و تسلمين

 

[أم الطيب]

احتاااااااااااااااااااج وايد هالموضوع
مشكوووووووووووووووووووورين

 

[vogue grl]

لا تقاطعين سالفة احد
لا تطولين صوتج على اساس يسمعونج لانج بهالطريقه الا بتفرضين سالفتج عليهم
لا تبالغين بالسوالف او الاحداث
لا اتطولين السالفه و تتمططين فيها
لا تسولفين عن نفسج و اهلج وايد و كل شوي انا و انا و احنا و احنا
لا تتدخلين بخصوصيات الغير و تسالين اساله حساسه و شخصيه
لا تتاخذين اسلوب الحش و النميمه في سوالفج و تحاشيه كثر ما تقدرين
عطي الاشخاص اللي تسولفين معاهم حجمهم و احترامهم اذا مره عوده او بنت صغيره .
قدري الناس و راعي اللي جدامج وحالتهم الاجتماعيه و مستواهم الاقتصادي .. يعني لا تسولفين عن الزواج و الزوج و الحموله مع مو متزوجه او مطلقه او ارمله .. او لا تسولفين بالامور الماديه مع ناس على قد حالهم و انتي تدرين .

هذا اللي في بالي الحين .

كلامج كله صح عجبني صراحه وخوووش نصيحه

 

[ريماا]

الموضوووع وايد حلو
حلو الوحدة تتصرف على طبيعتها
لازم الواحد يحترم راى اللى جدامة(الاختلاف بالراى لايفسد للود قضية)يعنى مو حلوة اغلط اللى جدامى وغصب اقتنعوا براى
اكرة شى اللى بجذبج يعنى تشترين شى من مكان ووحدة تجذبج اشكرة(مو معقولة-اممم متاكدة-مستحيل)وغيرها من اسلوب وقح هذى قلة حيا
ساعات الصمت يكون جواب يعنى اذا كان فى سؤال استفزازى من احد صمتج يعلمة انج انتى ماتردين على السخافات
ساعات الوحدة ماتحس بعمرها واهى تسولف ويكونون الناس ملو من السالفة وينطرون النهاية
حلو الوحدة ماتفلسف بشى ماتعرفة مافيها شى تقول والله ماعندى فكرة احسن من ماتنحط بموقف محرج
وننطر الباجى ان شالله يفيدونا

 

[الجوري74]

انا عندي مشكله
مشكلتي اني ما اعرف اختصر السالفه معني احاول بس هم اطول
يعني لازم اذكر السالفه بالتفصيل الممل واحنا بعصر السرعه :ada:شلون:
يعني اذكر المكان والزمان وشنو ياب الطاري وشنو ردوا ومنو الموجود واللي مو موجود
فودي اعرف شلون اختصر السالفه ووصل المعلومه بسهوله ويسر يعني "المختصر المفيد":tek:

 

[دنيا رديه]

موضوعج عجيب ومشكوره ويعطيج العافيه

 

[صلاتي-حياتي]

اذا كان الكلام من فضه فالسكوت من ذهب

هالمواقف اللي قلتيها شكثر صارتلي خصوصا لما اقعد مع وحده مومتعوده عليها ماعرف اجيب سالفة صراحه انقد على عمري بس شسوي ياربي انا جذيه صعب اني ادخل بالسالفه او ابدا موضوع حاطه حرتي بالنت هههههههه

اختي كل وحدة تسعى انها تصير لبقه وفطنه وتلقطها وهي طايره بس كله على التربية واذا كانت البنت جريئة والام معودتها كله قاعده عند الحريم وتعرف سوالفهم ومداخلهم لان الحريم غير سوالفهم الواضحه لهم سوالف بين السطور مايلقطها الا الفطن ... انا انقرصت شكثر لاني ماانتبه كلش شيقولون شينغزون بس على قولتهم لنا الله والله يهدا ويصلح بال الجميع انشالله
موضوعج هادف ويسعى لتطوير الشخصية

 

[كويتيات]

ولا لي قعدتي بين مجموعة بنات كلهم ساكتين وانتي اللي تتكلمين واهما ساكتين يبونج انتي تتحجين وما ياخذون ويعطون معاج واااااااي ودج تطقينهم يعني ساكتين يبون يسمعون سوالفج وسين وجيم ولي سألتيم ما يردون عليج كلمة ورد غطاهاا اوووووووف واللي يبط الجبد ان هالناس عايشين معاج ابيت واحد

 

[كويتيات]

بس شوفي الله يسلمج انا اتوقع ان القراءه والاطلاع والاستماع وانج تاخذين فكرة شامله عن كل الثقافات الدينيه والاجتماعيه والنفسيه والعلميه والطبيه و البيئيه و تتعلمين كل انواع الفنون ويكون عندج اطلاع على اكثر من مجال هذا يساعدج على انج تديرين الحوار بين الناس تيبين سالفه وتعطين معلومه وتذكرين موقف تقطين نكته وتقولين لهم انا قريت انا سمعت انا شفت في كتاب في وحده صار لها كذا يعني تتعلمين بداية الموقف وتنطلقين منها

يعني ما شا الله اشوف بنات لي قعدو يسولون ما يسكتون وكل وحده تكمل للثانيه ويديرون عجلة الحوار بكل سلاسه ومتعه ويمشي الوقت وما تحسين وفي بنات اللهم يا كافي كل شوي تشوفين ساعنج متي يمر الوقت جنج قاعده بمستوصف تنطرين الدور ولا المستوصف بعد احسن تقعدين تقرقين مع اللي يمج وتشوفين سالفة الدور والارقام لول

 

[بنت الدلال]

للـــرفــع

 

[أحبك خفاا]

هلا حبيبتي فديتج والله موضوعج حلوو شوفي انا عاني بدوامي من الناس اللي مايعرفون يتكلمون تقط عليج سالفة تحرجج مع اللي قاعدة معاهم وتوهقين وماتبين ياخذون فكرة عنج انج عصبية وبنفس الوقت ودج توقفينها عند حدها احترت وكل يقولون اني بالدوام تطالعين بنظرة كان محد عاجبج وربي هاذا طريقتي حتى المشية موعاجبتهم وربي تعبت صراحة من عند اللي مايعرفون يسولفوون وربي مع انهم حريم كبار ومتزوجات تقول سوالف خرابيط ماتدرين شلون تردين عليها تعبت ياناس ماادري اعتزل ناس ومااسولف والله ماادري واذا احد مدحني استنفروا تشوفين الوحدة وجها يقط الوان شدعوة لا اعرفها ولاتعرفني ولا بينا غيرة

ابي الحل من عندكم تكفون نفسية صفر :0bee2e8d89:

 

[بنت الدلال]

بــرد على اختي كويتيات :


ســاعات وحــده تعرف كل شي ومتطلعه على المجتمع كله وخصوصا السياسه لانا محور الكـل هالايــام ..


بــس ماتعرف تسولف عــدل .. فهمتي شلون .. نبي نتعلم طريقــه السوالف والاسلوب


في بنات بس تسمعينها شلون تسولف وتضحكين عليها واسلوبها يصير مشوق


وبنت تنطرين متى تخلص سالفتها

 

[pink-rose]

خوووووووش موضوع الصراحة
ومنكم نستفيد

انا مشكلتي اني مستمعه ومو متحدثه وما اعرف اسولف مع ناس ما اعرفهم
والمشكله ان الناس فاهميني غلط !!! حسبالهم ان انا ما اسولف معاهم
او كلا مجابله النت لاني مغروره او مو من مستواهم !!!
وهالشئ حيييييييييل مضايقني لاني بالعكس مو مغرورو الحمدلله

هالمشكلة واااااايد تصادفني بالدوام---> حتي وحده قالت لي ان اول حسبالي انج ثقيلة دم ومتكبره
بس يوم عرفتج طلعتي حيييييل حليوه--- قلت لها ياربي انا وحده ما اعرف اسولف مع ناس مو مطيحه الميانه
معاهم --- ودي اعرف!!!!

 

[بنت الارسنال]

يعطيكم العافية

 

[Eng.shosha]

مشالله عليكم خووووووش نصايح ما خليتو لي شي لووووول




عالعموم يعطيكم ألف ألف عاااااافيه عالموضوع الاكثر من رائع

 

[miamy]

خووووووووووووش موضوع

واضافة كويتيات وااايد حلوه

انا ماحب اللي تدش بنص السالفه وتقول شنو شنو..... منو...واي يعني ما عليج

فرضي قاعدين نحش فيج تخترب السالفه عدل ويبدي الترقع خخخخخخخخخخخ

 

[كويتيه كيوت]

انا مشكلتي وايد هاديه ومستمعه اكثر من اني اسولف اهوا بصراحه شي زين بس المشكله
ان الغالبيه العظمى من الناس يشوفنج على انج مغروره ودمج ثقيل ومو من مستواهم وشنو يبطون جبدي لما يقولون متكبره واعوذبالله من الكبر
اما عن السوالف ترى اصعب شي لما تسولفين مع اشخاص اول مره تشوفينهم يعني لازم تعرفين شنو
تفكيرهم ونوعهم عشان يصير بينكم حوار سألي وين يدرس وخليج مرنه بالحديث معاهم بس لازم
تكونين حذره بسوالفج مو على طول ميانه
وان شاءالله وصلتلكم المعلومه:eh_s(8):

 

[رهوف]

#اهم شي بالسوالف اختيار النبرة لا تكون عاليه حيل ولا واطيه اللي يسمعج يعاني على ما يعرف شبتقولين


#عدم استخدام الالفاظ البذيئة اكش بصراحة من اللي كلامها كلبة وحمارة >>> على فكره حريم بعد مو يهال


#احترام الكبير وسماعه لما يخلص سالفته حتى لو كانت ممله او سامعتها من قبل


#عدم استخدام الايد في التعبير بصوره مبالغ فيها


#واهم شي الذكاء في اختيار المواضيع اللي تناسب عمر وثقافة الشخص اللي جدامج