^^غــزال سبا قلبــي بغــلاه^^ --- قصة بين الامارات والكويت

[محتارة]

السلام عليكم ... حقوق القصة للكاتبة والشاعرة : عذبـــة بنت سلمان


العائلة الاماراتية :

مصبح : هو الأب وهو كان يشتغل مدير في احد الشركات بس الحين تقاعد و مجابل العزبة والمزارع
سلمى: هي الوالدة وربت بيت وبعد هي مجابلة البيت وعيالها واحفادها وعندها بعد عزبة تسرح لها من العصر لين المغرب وتشوف حلالها ..

عيالهم :

علي : هو الولد العود ومتزوج حرمتين وحدة منهن بنت عمه وماشاءالله عنده 8 عيال .. ودوم منازع وحروب في بيته بين حريمه وعيالهن .. الله يعينه

راشد : هو الولد الثاني وبعد متزوج من وحدة يحبها وايد واسمها مزنة .. وعنده بنت وولد روضة و خالد وعايش في دبي عشان يكون قريب من دوامه ...

منصور: موظف في احد الشركات الاستثمارية وهو يحب شغله ومن كم شهر خبر امه تدور له على عروس ..

حمدة : الاخت العودة ومعرسة ع ولد عمها بس يالسة في بيت اهلها ويا عيالها لان ريلها سيف سافر البحرين عشان ياخذ دورة في الهندسة وبيتم 6 اشهر عقب بيرد ..

شمسة : هي سنة ثالثة في كلية التربية وهي خاطرها انها تستوي أبله .. وهي تحب ولد جيرانهم حامد تعيبها شخصيته .. وهو بعد يحبها وخبر اخته بهالشي ..

هزاع : هو أصغر واحد بين خوانه وهو يدرس في الثانوية ويحب شي اسمه كمبيوتر ليل نهار وهو يالس ع النت


--------------------------------------------------------------------------

الجزء الأول ...

شمسة : شو هالملل بتخلص العطلة الصيفية ونحن لا سافرنا ولا استانسنا ..
هزاع : يابوية شله نسافر .. الامارات حلوة الحين كل الناس ايون لنا ونحن نسافر لغيرنا !
شمسة : انا حصلت وقلت لا !!!! يله خل نسير بوظبي دبي او الشارجة المهم ابا اغير جو فففف
ام علي : شو فيج تباغمين !؟؟ حشااا صوتج واصل لين المطبخ لي برا
شمسة : اماية خل نسير مكان خل نغير جو .. شوفيكم تحبون يلست البيوت !!! اذا انتي عيوز وابوية شايب نحن شو ذنبنا ..
ام علي : عيز حيلج يا الخااااايسة صدق هب كفو حشيمة ..
شمسة : ههههههههههههههههههههههههههه اماية صدق خلنا نسير دبي ومرة وحدة نشوف اخوية راشد
ام علي : هيه والله صدقج .. تولهت ع رااااااااشد يالله فديته وفديت عياله وحرمته .. تولهت عليهم !
شمسة : خلاص اماية خل نسير له .. وانا اغير جو بعد ! صدق العين حلوة بس بعد خل نسير دبي ونشوف المهرجان ونشوف اخوية وعياله .. عفية اماية
ام علي : خلاص بخبر ابوج الليله واشوف شو يقول .. الا اقول وين حمدة من الصبح ماريتها !
شمسة : مادلها .. اكيد محتشرة ويا عيالها ..

وفي اليوم الثاني نشت شمسة من الصبح عشان تسمع الرد من امها وتشوف اذا بيسيرون دبي ولا لا .. ويلست في الصالة بس ماكان فيها حد وزقرت الخدامة وقالتلها تييب لها الريوق .. وعقب شوي الا حمدة سايرة صوبها

حمدة : ها شموس مب عوايدج تنشين من الصبح ههههههههههههه
شمسة : هيه نشيت وبعد فيني رقاد ههههههه بس اتريا اماية اباها بموضوع ..
حمدة : موضوع شوو ؟ لايكون حد خطبج ههههههههه وانتي رافضة وجالبة البيت وبترمسينها وبيستوي فلم هندي
شمسة : حمدووه عن سخافتج ..
حمدة : اويلي شكل الموضوع جد في جد ههههههههه
شمسة : يالله يا حمدة شوفيج حشره جي .. الظاهر انج تخبلتي شرات عيالج هههههههههههههههههههههههه
حمدة : هذووه شكلها اماية تحدر من الدري ..
ام علي : بسم الله ! يالله صباح خير شوفيكن ناشات ريا وسكينة !!
شمسة : امااااااااااااية اخيرا نشيتي .. ليش جي طولتي في الرقاد .. لايكون سهرانة ويا الشيبة خخخخخخ
ام علي : عنبوج ماتخيلين انتي !!!!! ظكي هنه
شمسة : ههههه شو العيوز اونها تستحي !
ام علي : يالله صباح خير .. لاتطفرين بي ولا ترا مابنسير دبي ..
شمسة : فدييييييييييييييييييييييييييييييييتج عيوزي .. صدق انج فنانة بس ماتدقين عود هههههه نزين متى بنسير ؟
حمدة : انا بسير وياكم .. بشوف اخوية تولهت عليه .. فديته
ام علي : بنسير عقب اسبوعين انشاءالله ..

وفرحت شمسة بهالخبر وتمت تعد الايام والليالي عشان يمرن الاسبوعين ويسرحون صوب دبي .. في يوم كانوا الكل يالسين يتغدون ..

منصور : ممممم الغدا عجيب تسلم ايدج اماية .. هيه صدق سمعت انكم بتسيرون صوب دبي ؟
بو علي : هيه بنزور راشد هناك ونخلي البنات يسيرون السوق.. ويغيرن جو
منصور : انا بعد تولهت ع اخوية وبسير وياكم ..
ام علي : هيه يا منصور تعال استانس واكيد راشد بيفرح بشوفتك ..
حمدة : هيه والله زين تسوي يا منصور ومرة وحدة اباك تعاوني ع عيالي هههههههههه ماروم لهم
بو علي : لا .. منصور بيتم في البيت .. مايستوي نخلي البيت بدون ريال !
هزاع: هيه صح كلام ابوية .. وعقب يوم نرد العين هو خل يسير دبي عند راشد ..
منصور : حاضر بوية .. بس خل شمسة تم وياي او هزاع .. مابا اتم في البيت اروحي .. اتملل !
شمسة : سير لااااااااااااااااااااااااا انا صاحبة الفكرة وانا الي اتقدم المجموعة ههههههههه
هزاع : انا بسير دبي وبشوف ربيعي وانا خبرته .. شو ايلس وياك بعدين اظهرك جدام ربيعي ان ماعندي كلمة !
منصور : هههههههههه خلاص يا بوية مانبا حد ..

 

[محتارة]

العائلة الكويتية :

فهد : هو الأب .. وهو مدير ادارة في احد الشركات .. ويحب الخيول عشان جذي عنده مزرعة وفيها اسطبلات للخيول ..

طيبة : وهي الوالدة .. وهي ربت بيت وتحب الطبخ وايد وتحب تشوف المسلسلات المدبلجة هههههههه ومسلسلات الطبخ طبعا ..

منيرة : البنت العودة متزوجة من ولد جيرانهم واسمه فيصل وعندها مشاري وجاسم ودلال وهي تشتغل ابلة اقتصاد منزلي ..

جراح : الولد العود وهو متزوج وظيفته مهندس كبيوتر ..وهو ناجح في شغله ويحب زوجته الي هي بنت خالته واسمها الجوهرة وعنده فهد و فواز .. وهو قاعد في مع اهله في البيت ..

نواف : صارلها سنة متخرج من الجامعة وتوه يحصل على وظيفة .. بس للحين ماتزوج ولا طلب من امه تدور له على بنت الحلال ..

العنود : آخر سنة لها في الجامعة وتخصصها لغة فرنسية وهي مخطوبة لولد عمتها ضاري .. بس هي ماتحبه ووافقت على الخطبة عشان عمتها .. وهي ماتهتم في الحب ..

سارة : هي اصغر بنت بين خواتها وكان مدللة وابوها يحبها واااايد .. وهي اول سنة لها في الجامعة في كلية الادارة .. وهي تحب عيضة وااااااااااااااااايد ..

------------------------------------------------------------------

ام جراح : عنودووو سويييرة ياعلكم شقووول !! الساعة بتصير 10 وراكم محاضرات قوموا ويعه تويع العدو ..
سارة : يمة ترا لجيتينا ..خلخلتينا فففففففففف
ام جراح : تخلخت حنوجج وتكسرت عصاقيلج .. يله قومي لا اكت عليج تب ماي
سارة : لجة لجة .. حتى يوم الخميس بتسوين لنا صيحة .. خل نرتاح
العنود : يمة اليوم الخميس الله يهداج شفيج !!!
ام جراح : وي صج ..!؟؟ واذا كنتوا تقصون علي ..
العنود : اي شي يمه نقص عليج ..
ام جراح : نزين خلاص ناموا عيل ..

وتموا البنات نايمين لين الظهر وبعدين قعدوا .. وكان نواف وجراح وام جراح قاعدين على السماط ينطرون بو جراح عشان يمدون ايهم ويتغدون .. ومرت جراح رايحة تزور بيت اهلها وبتتغدى عنهم .. وعنود وسارة مو عاجبهم الغدا ..

سارة : يعني تدرون اني ما اداني السمج ليش تسووووووووون ..وععع
نواف : اذا انتي ماتدانينه غيرج يدانيه .. ولاتقولين جذي عن النعمة .. انطمي واذا ماتبين تاكلين ذلفي وعن تعليقات الي مالها داعي ..
سارة : محد كلمك ولا طلب رايك ..
نواف : احترمي نفسج لا اقوم لج الحين ..
ام جراح : بس عاد عن اللغوة .. و سويرة اذا ماتبين روحي طلبي لج من مطعم وفكينا ..
العنود : ايه يله سويرة خل نطلب انا وياج من كنتاكي ممممممممممم وعلى حسابي ..
سارة : اوكي بس تعالي الصالة الثانية هني ريحة زفرة ..

وراحت سارة وعنود الصالة الثانية وطلبوا لهم وقعدوا ينطرون الطلب .. والباجي قاعد يتغدون ..

جراح : شرايكم نسافر كلنا دبي .. الحين عندهم مهرجان وانا واعد اليهال اني اوديهم دبي واونسهم ..
وقلت دامني بروح خل نروح كلنا مجموعة .. احلى
ام جراح : والله ياريت يا وليدي بس انت اقنع ابوك ههههه والله ودي اروح دبي ياحلات مجمعاتهم وبعد ابي اشتري من عطورهم الزينة ..
جراح : هاا شقلت يبة ؟
بوجراح : والله كيفكم .. بس انا ماقدر اروح مرتبط بأشغال هني .. خذ امك وخواتك ومرتك وعيالك و تونسوا ..
ام جراح : الله يهداك يا فهد .. الحين تبي ولدي يعابل فيننا كلنا !!! مسكين يلحق على شنو ولا شنو .. لا لا ريلي على ريلك .. بتيي ويانا
بوجراح : يا بنت الناس .. ولدج ريال قدها وقدود .. وبعدين تراكم رايحين دبي كاهي يمنا قريبة وماراح تضيعون فيها .. هذول اهلنا وربعنا وعيال عمنا .. لو بتروحون بلاد برا جان قلت لا بيي وياكم ..
نواف : ايه والله صاج يبة .. دبي والكويت واحد .. نفس الشي .. اصلا الطريج من الكوين لين دبي جنك رايح من العاصمة لين الوفرة ..
جراح : انت بتيي ويانا ؟
نواف : لا لا يامعووود .. توني قاضب الوظيفة وتبي اخذ اجارة بعد .. خلني اثبت نفسي اول والاجازات لاحقين عليها ..
جراح : خلاص عيل انا باجر بروح احجز لنا .. ها شقلتي يمه ؟
ام جراح : خلاص شورك وهداية الله .. بس للحين ماشفت راي البنات !
جراح : العنوووووووووووووود .. سااااااااااااااااااااااااااارة ..
سارة والعنود : خيييييييييير جرااااح ..!
جراح : ماكو الا الخير .. بتيون دبي ويانا ؟؟
سارة : اااااااااااااااااااااااااااااااااااااه ايه بروح وياكم .. وبشتري من هناك كل اشرطة عيضة وصوره ووووو
العنود : انجعمي سويرة .. الي يسمع عاد اول ماتروحين دبي بتلقين عيضة بويهج ههههههههههههههه
سارة : ليش لا .. كل شي يجوز خخخخخخ
العنود : انا عادي عندي .. اذا بتروحون بروح وياكم .. بس ابي اروح كله سينمااا ومابي مجمعات الي عندنا عندهم نفس المحلات نفس الماركات .. بس يقولون رفيجاتي هناك افلام هندية تنزل اول بأول عشان جذي ابي السينما خخخخخخخخخخ
ام جراح : خلاص جراح توكل على الله واحجز باجر لنا ..
جراح : ماشي باجر بحجز حق الاسبوع الياي ..

 

[محتارة]

في العين

وتحديدا اليوم الي بيسيرون فيه قوم بوعلي لدبي ..

شمسة : يالله بسرعة شوفيكم جي .. حمدة اذا بتأخريننا يلسي ويا منصور احسن !
حمدة : لمي ثمج ..
شمسة : ففففففففففف انا بسير اترياكم في الموتر ويا ابوية .. واماية شوفي هزاع بعد لا يأخرنا مب ناقصين تأخير
كفاية علينا حشرة حمدة وعيالها ..
ام علي : يالله يا شمسة .. مللتي بنا وصدعتي روسنا .. ع هالحنة شكلنا مابنسير
شمسة : اماااااااااااااااية ..
ام علي : سيري لابوج في السيارة .. ولا ترا بأعلن اننا بنتم في العين !
حمدة : هيه اماية اثرج قوووية ههههههههه زين تسوين عشان تثقل وتركد
شمسة : انا اسير عند ابوية وايد احسن ..
حمدة : نفااااااااااااادة هههههههههه

والكل تزهب وراحوا صوب السيارة الي كان بها بو علي وبنته شمسة .. وسرحوا صوب دبي .. وفي الدرب :

حمدة : اقول شمسة .. شو اول مكان بنسير له في دبي ؟
شمسة : ممممم شو رايج نسير حمر عين .. او برجمان او مجمع الوافي
ام علي : اول شي بنسير لراشد ..
حمدة : هيه اماية اكيد اول راشد بس نحن نقصد عقب عقب ..
شمسة : خل نسير سيتي سنتر .. شورايج ؟
حمدة : شو رايج نسوي قرعة ههههههههه
شمسة : هههههههههههههههههههههههههه
بوعلي : هزااااااااااااااع نش يا ولد .. قربنا نوصل
هزاع : مابا اسير المدرسة ..
شمسة : هههههههههههههههههههه حمدالله والشكر
ام علي : اي مدرسة ؟! نش يله نحن في دبي وعقب شوي بنوصل صوب راشد اخوك
هزاع : هيه نزين


وصلت عايلة بوعلي لبيت راشد .. وكان راشد في استقبالهم

راشد : يامرحبا مرحبا ملاااااااااااااايييييين .. مرحبااا عدد نف السحاب
ويسير راشد صوب ابوه و يوايهه ..
بو علي : مرحبا باجي .. شحالك ولدي ؟
راشد : مانشكي باس .. ونحن بخير دامنا شفناكم .. وين اماية ماشوفها هههههه
بوعلي : امايتك هذوووه الي لافة ويهه يالسة تقعد هزاع راقد .. يتحسب عمره في شبريته
راشد : هههههههههههههههههههههههههههههههههههه
شمسة : يا مرحباااااااااا براشد زين المزايين .. شو بلاك مستوي ضعيف !!
راشد : انا ضعيف وين هههههههه لبسي نظارة
شمسة : الا ضاااااعف ونص .. لايكون حرمتك ماتسوي لك اكل ههههه وينها خل اتضارب وياها ..
راشد : هههههه هيه تضاربي وياها .. سيريلها داخل تترياكم في الصالة ..
حمدة : السلام عليكم راشد .. مستوي حلو هههه شو السالفة ؟
راشد : ههههههه انا من زمان حلو .. واحلى عن عيالج الجياكر ..
حمدة : اوين اسم الله على عيالي .. احلى منك وماتيي ربع حلاتهم ههههه بس حليلهم راقدين الحين ولا جان تضاربوا وياك .. هههههه هيه صح سير شلهم من السيارة ..

وقتها بوعلي واقف عدال ولده راشد ويبتسم ويطالع عياله وهم يتضاربون ويتغشمرون ويسولفون .. وكان فرحان

راشد : ابوية اقرب اقرب تفضل ادخل الميلس انت هب غريب .. انت راعي البيت
بوعلي : لا يابوك خلني جي اتريا عيوزي هههههههه
راشد : ياعيني ع الحب هههههه وينج يا ام علللللللللللللللللي تعالي شوفي ريلج
ام علي : فديت هالصوت الي يزقرني ..
وتسير ام علي صوب ولدها راشد ..وهو يبوسها ع راسها
راشد : والله يا اماية ان ييتكم لي تفرح القلب والخاطر ..
ام علي : عساك دوم فرحان يا ولدي .. ونحن نفرح بشوفتك
راشد : الا وين هزاعوووو !!! بعده مانش
ام علي : هيه مانش هالخاااايس عل قلبي وانا احاول اقعدة .. ماشي فايدة
راشد : انتي تفضلي الغالية ويا بوية ودشوا البيت .. يالس يترياج يبا يدش وياج ههههههه
وانا بشل عيال حمدة وبوعي هزاع وبندخل عقب قشاركم ..

وفي الصالة ..

مزنة : مرحبا خالتي شحالج ؟ انا يالسة ويا حمدة وشمسة .. اقولهم وين خالتي لايكون مب ياية .. ترا ياويلها مني ههههههههههه
ام علي : فديتج يامزنة .. اشتقت لج ولليلسة وياج .. شحالج ؟ وشحال رويض وخالد ؟
مزنة : كلنا بخير وفرحانيين بشوفتكم .. خالد حليله ساير مخيم ويا ربعه وصارله فترة وانشاءالله عقب كمن يوم بيرد .. ورويض توها هني ماعرف وين سارت ..
شمسة : هذوووه رويض عمرها طويل .. هههه
روضة : مرحبااااااااااااا شو يبتي لي العااب ؟ تراني مستوية شاطرة في المدرسة والحين انا في الصف الثالث
ام علي : فدييييييييييييييييييييييييييتج هيه يبتلج العاب وكل الي في خاطرج
روضة : وينهم ؟
مزنة : روضة استحي عاد
ام علي : هههههه ماعلي خليها .. والله اني متوله عليها .. الحين يوم بنفتح الشنط بعطيج العابج ههههه
روضة : وين الشنط ؟
حمدة : حليلها ملسوووونة ههههههههههههههههههههههههههههههههههههه طالعه ع شمسة
شمسة : اناااااااااااااا !!!!!!!!!!!

وتمن البنات يسولفن ويتنازعن .. ويلسن يتغدن ويسولفن عن السوق والمجمعات .. اما بو علي وعياله يلسوا في الميلس وتغدوا وعقب حطوا لهم جاهي وسولفوا شوي ..

راشد : هزاااع استويت ريال ماشاءالله ..
بوعلي : هيه هزااااااااااع ريال طالع على ابوه ..
هزاع : دام جي عيل ابا اعرس
راشد : ههههههههههههههههههههههههههههههههههههااااااااي
بوعلي : افا عليك حاضرين .. منو عاد البنت ؟
هزاع : ممممم مافي حد محدد .. بس بخبر اماية تدور لي بنت عرب وحشيمة ..
راشد : ههههههههههههه ابوية حرام عليك .. الريال صدق السالفة
بوعلي : ههههههههههههههههههههههه
هزاع : هههههههههههههههههههههههههههههه لا تطمن ماصدقت بس اسايركم خخخخ

وعقب هاليلسة الحلوة .. سار بوعلي يرقد لانه كان تعبان من الدرب ..وهزاع بعد كمل رقادة لان قبل السيرة كان مواصل ومارقد .. وراشد سار عند امايته وحرمته وخواته ويلس يغايظهم وهو كان يحب يغايظ خواته ..

--------------------------------------------------------------------------------

 

[محتارة]

في الكويت ..

كان الكل مستانس على روحة دبي .. وزهبوا اغراضهم وجناطهم (شنطهم) وراحوا مطار الكويت الدولي :

جراح : يمة خلج هني ويا البنات على ما اروح الكاونتر نزين .. لاتتحركون خلكم هالصوب
ام جراح : ماعليك انت ارقد وآمن
جراح : جوهرة شوفي عيالج لا يتقلقصون بين الناس واليهال وبعدين ماندري وين دارهم !
الجوهرة : ويييييه ياجراح .. هذيل عيالي بعد روح بس خلص شغلك لا تزرعنا واحنا ننطر
سارة : تريد الهوا لك على ماتبا وقلبك تريده يحصل مناه
عنود : سويرة اخاف انج مصخنة ! فيج شي ؟
سارة : يامرحبا يا ناعم الصوت والعود ..
عنود : ففففففففف شفيج مينونة ؟!!!! تحجي قولي شي بس قاعدة وتغنيين !
سارة : وش فايدة كثر الكلام من بعد ماخنت العهود ..
عنود : هي انتي وصمخ جلااااااااااب فففففففف يا الصمخة ماتسمعين!!
سارة : يا طرفة اسرتيني بالحانج ولعتيني شوقني صوت الراااااااازم فوق جروحي زدتيني
عنود : يمة شوفي بنتج من الصبح وهي تغني اغاني اماراتية .. قوليلها خل تسكت
الجوهرة : هههههههههههههههههههههههه حسبي الله على ابليسكم
ام جراح : سارة بس عاد صيري مرة ..
سارة : امي امي يا اماية راعي البحر ماباه خخخخخخخخخخخخخخخخخ
العنود : يمة خليها تولي مسكينة مستخفة .. ههههههههههااي خلاص بنزوجها اماراتي
سارة : ميخالف اذا عيضة ماراح ارفض خخخخخخخخ
ام جراح : عن الفهاارة يا سويرة .. استحي
الجوهرة : يمة فهد تعااااال لا تروح مناك .. تعاااااااال بقولك شي بسرعة
فهد : مااااااااابي ..
الجوهرة : تعاااااااال ويعه تويع ابليسك
فهد : يا مرحبا الساع يا بوعيون سود ووساع
الجوهرة : !!!!!!!!!!!!!! ههههههه عادتك عمتك
جراح : يله تعالوا خل نروح البوابة ننطر الطيارة ..

وراحوا الكل عند البوابة الخاصة في المغادرين لدبي .. وقعدوا على الكراسي ينطرون

فواز : يا الكلب يا فهووووووووووووود .. يبة شوفه كله سبالي
جراح : عن الشطانة يا ولد ..
فهد : يبة هذا سبالي هو جذاااااااب
فواز : جب والله انه مالي والله اني راح اطقك ..
جراح : بس عن النجرة ترا اردكم البيت ..
العنود : بسكم ازعاااج ! خلاص فواز لما نوصل دبي بشتري لك سباااال.. فكنا عاد ..
سارة : هههههههههههههههههههههههههههههههههههههههههههههههههه هههههههههههههههههههههههههه
الجوهرة : !! شفيج تضحكين ؟
سارة : ههههههههههههههههههههههههههه عنود هههههههههههههههههههههههههههههههههههههههه
هههههههههههههههههههههههههههههههههههههههههههههههههه هه

العنود : ضحكتي من سرج بلا !!!
سارة : ههههههههههههههههههههه ايه روحي دبي وقولي بصوت عالي ابي سبال عشان ولد اخوي ياكله خخخ
العنود : ايه بقول ! عيل شقول !!!!!!!!! انا شاكة انج فيج شي مو صاحية اليوم حشا !
سارة : هههههههههههه ايه قولي عشان يحسبونج منحاشة من مستشفى الميانيين خخخخخخخخخخ
العنود : ليش !
سارة : في الامارات يقولون عن الشاذي سبال .. واحنا في الكويت سبال عندنا شي ينوكل من المكسرات
الجوهرة : ههههههه الحين فهمت ! يعني جنها تقول لو سمحت ابي شاذي عشان ولد اخوي ياكله هههههه
العنود : اهااااااا الحين فهمت ههههههه عيل لهجتنا احلى
ام جراح : مداح نفسيه يبيله رفسة ..
لعنود : ايوه ايوه راعية الامثال هههههههه

وتموا يسولفون لين يا وقت ركوبهم الطيارة .. والحمدالله وصلوا دبي بالسلامة .. ووصلوا الفندق وكانوا نازلين في فندق سيتي سنتر عشان يكون قريب منهم السوق .. وكانوا قاعدين في الرسبشن ينطرون جراح يأكد الحجز وياخذ المفاتيح للغرف ..

الجوهرة : اااااااه اخيرا وصلنا الفندق تعبانه منهد حيلي ..
العنود : رطوووبة رطوووبة !!!!!! ابي هوا
سارة : لا بااااااااااس الخلان لا باااس خخخخ رطوبتهم حلوة مفيدة للبشرة هههههههههه
العنود : انجعمي انتي ..
ام جراح : ماشاءالله وايد كويتيين هني ..
فهد : ايديدة شلون عرفتيهم ..
ام جراح : مايبيله يا وليدي .. الكويتيين ينعرفون ريحة الكويت فيهم يا حلاتهم ..
العنود : العببببببببببب وطنييييييييييييية ههههههههههههههههههههههههههههههههههههه
الجوهرة : شرايج خالتي نرد الكويت باجر ..؟
ام جراح : لا تونا يايين .. خل عقب باجر نرد الكويت ..
الجوهرة : هههههههههههههههههههههههههههههههه عقب باجر عاد ..
فواز : ابوي يقولكم يله هو ينطر عند الاصنصير ( اظن تسمونه في الامارات لفت )
سارة : يله مشينا .. بس وين الاصنصير صاير
فهد : كاهو عمتي هناك احنا بنسبقكم ..

وراح جراح وعياله غرفتهم وكانوا حاجزين سويت لهم يعني غرفة وصالة .. وبعد ام جراح وبناتها حاجزين لهم سويت .. وراحوا يرتاحووون والكل نام ماعدا سارة الي فتحت التلفزيون وقعدت تطالع وتطل من الدريشة ومستانسة حيل ..

 

[محتارة]

ماعجبتكم؟

 

[محتارة]

وييي شكلها مو عاجبتكم عيل ماراح اكملها

 

[DBDOB3 DES]

كملي انا متابعه

 

[محتارة]

نمله مشكوره انج متابعه ... بحطها عشان خاطرج

في سيتي سنتر وفي الفندق الكل نايم بس عقب ساعة قعدت ام جراح .. بس سارة قاعدة وتحاول تقعد اختها عنود بس عنود مطنشة وطاقتها نومة

سارة : عنووووووووووووووود يا ام السعف والليف يا حمارة القايلة ..
عنود : فكيناااااااا يا الكودنة ..
سارة : شنو كودنة ؟؟ ادري انها سبة بس بمشيها لج
عنود : الصراحة ويهج ويه منفهرة فففففففففف
سارة : هي انتي شتقولين !!!!!! شنو منفهرة لو سمحتي تحجي كويتي هههههههه
عنود : يله فارجي يا البربس ..
سارة : محد بربس غيرج !!!!!!!!
عنود : يعني شاااطرة عارفة معنى بربس هههههههههههههههههههههههههه لو انج مرة جان عرفتي لهجة اهلج ولهجة النيادة ... يا النيدية
سارة : يمة شنو يعني الكودنة ؟؟؟
ام جراح : يقولونها للغبي
سارة : شنو ويه منفهرة ؟
ام جراح : هههههههههههه بن فهرة ! مو منفهرة من هالكودنة الي قايل لج اياها
عنود : خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خ
ام جراح : يعني الي مايستحي على ويهه .. المهم دقوا على اليوهرة خل اكلمها

ودقت لها سارة ...
ام جراح : السلام عليكم .. شلونج ؟ ها بتطلعون ؟
الجوهرة : جراح خذا العيال يوديهم مكان العاب هني بستي سنتر .. عاد قلت انا انطركم لين تقعدون من النوم عشان نروح نتسوق ..
ام جراح : يله عيل خل يتزهبون البنات ونحدر السوق ..
سارة : اخيراااااااا رضيتوا تتحركون .. شوفوا الساعة 5 والله ان قلتوا بنرد مبجر ياويلكم هههههه انا بقعد تحت بروحي بالسوق لما 12
العنود : عشان جراح يكسر رقبتج ههههههههههههههههههه وتفكينا احسن فكة من ويهج
سارة : لاوالله !!!

وعلى مايتهاوشون البنات ويتلاسنون ... ولبسوا ونزلوا كلهم ام جراح وسارة والجوهرة وعنود .. وعاد الحريم غرامهن السووووق ...

العنود : ماشاءالله عيالهم محترمين مايخزوون ... مو مثل عيالنا الا ما تمر وحدة كلوها حشا
الجوهرة : يقولج حاطين تحريات الي يتحرش بوحدة يزخونه السجن ...
العنود : اهاااااااااااا عشان جذي خخخخخخخخ بس والله زين يسوون ..
سارة : وانتي بس عيونج تلاقط عليهم !!! شدراج انهم مو قاعد يخزون ؟؟؟ هااااااا
العنود : كلي تبن .. انا لمحت ماشفت
سارة : عليناااااااااااااااااااا ههههههههه مو هينه عندووو
ام جراح : يالله متى تتزوجون وتريحوني .. ياحبكم للملاسن
الجوهرة : هههههههه بسكم مخانق .. خل ندش محل الدراريع هذا
سارة : حلوة هالدراعة ..
الجوهرة : ايه زوينه .. بس تصدقين احس دراريعنا بالكويت احلى ..
سارة : ايه صااجة .. هني يقولج العبي عندهم حلوة والشيلات ..

وتموا الحريم يتسوقوووووون .. وشروا اشيا واااايد .. وجراح وعياله في المجمع صوب العاب الاطفال يلعبهم ..

الجوهرة : يا جمااااااااااااعة خل نقعد بكافيه شي حرام عليكم ..البيبي تعب
سارة : بيبي !!!!!!!!!!!!!!!!!!!!!!!!!! شنو منو
العنود : حااااااااااااااااااااااامل !!
الجوهرة : ايه بس سكتوا فضحتوني ههههههههههه .. خالتي تراني حامل
ام جراح : مبرووووووووووووووووووووووووك يا بعد عيني .. الله يبلغج فيه ..والله انج فرحتي قليبي
الجوهرة : الله يبارك بحياتج ... يله خل نقعد مكان خخخخخخخخخخخخخخ
سارة : يوهرة ليش تحملين يلي ماتستحين ههههههههههههههههههههههههههههههههههههههههههههههه
الجوهرة : سويرة عن الطفااااقة عقلي .. هههههههه
سارة : زين ييبوا بنت وسميها سارة ..واذا ولد عيضة .. تكفييييييييييييييييين
الجوهرة : ههههههه سمي ولدج عيضة .. وسارة مابي اخاف تطلع مطفوقة على عمتها خخخخخ
عنود : ايه والله صاجة اما في الطفاقة والاستهبال سويرة استاذة ..
سارة : ههههههههههه اقول انطمي عندو .. بعدين انا ودي اسمي عيضة بس المشكلة عيضة ريلي هههههه

وقعدوا يسولفون ويتمشوون لين وصلوا الكافيه وقعدن هناااااااك يشربون قهوة ويسولفون ...

 

[محتارة]

في بيت راشد :

راشد : ابوية نش صلاة العصر بتطوفك !
بوعلي يفز من رقاااده : شووووو وتوك توعيني !!!
راشد : بوية وعيتك اكثر من مرة ههههههه ماشي فايدة
ويشل العصا بو علي ويضرب هزاع عشان ينش ..
هزاع : ااااه شو مستوي !!!
بوعلي : نش عنبوك ماتخيل راقد والصلاة بتطوفك ..
هزاع : احيدك راقد بعد
راشد : ههههههههههههههههههه راقد ومراقب الاحداث صدق انك مب هين هزاعو

وينش بوعلي وهزاع ويصلووووون .. وعقب :

بوعلي : رااااشد
راشد : لبيه
بوعلي : لبيت حاية .. اباك توديني عند حمدان بن سيف .. واباك انت واخوك وياي نيلس هناك في الميلس عنده تولهت عليه ..
راشد : حااااااااضر بووية انت تامر ..
هزاع : بس انا مواعد ربيعي لي في دبي .. انا بعد تولهت عليه ..
بوعلي : واعده باجر ..
هزاع : يالله ع الشواااب يطفرون بالواحد
بوعلي : شوفيك تحرطم !!؟
هزاع : ماشي ماشي
راشد : بس بوية خلني اشوف البناااات جنه يقولون بيسيرون المول ..ويبوني اوديهن
بوعلي : ماعلي خل دريولك يوديهم ..
راشد : هيه صح بس خلني اخبرهن .. وانتوا تزهبوا عشان نسير لعمي بو سيف ..

ويسير راشد الصالة .. ويلقى شمسة وحمدة ومزنة يرمسووووووووووون :

راشد : انا بعرف شو السر ان الحريم يحبون السوالف والقرقة ...؟؟؟؟
مزنة : وانا بعرف السر ليش رياييل جي منقهرين ؟؟؟
شمسة : لا دخيلكم مانبا حرب ههههههههههههه مب وقته ترا
راشد : هههههههه المهم ترا انا بسير ويا ابوية وهزاع عند عمي بوسيف وانتن برايكن اذا بتسيرن المول عندكن الدريول ..
حمدة : هيه زين تسوي عيل شل عيالي وياك خخخخخخخخخخخ
راشد : انتي ويا عيالج طفرتي بنا ترا ... دام مالج حيل وقوه عليهم شله تيبينهم ههههههههه
حمدة : حرام عليك كلههم صبيان شو اسوي بهم ابوهم مسافر .. وانا ماباهم دوم ويا الحريم ..
راشد : نزين غمضتيني خخخخخخخخخخخخخخخخخخ ولا يهمج يا ام حمد ..
حمدة : خخخخخخخخ تسلم يا بوخالد
راشد : الا وين عيالج ؟ وروضة وينها بعد ؟
شمسة : عيالهااا في الحوي .. وبنتك وياهم هههههههه لحق عليها
مزنة : رااااااشد فديتك انا .. خذ روضة وياكم
راشد : شووو اخاف انا حاضنة اطفال وانا مادري !!!!!!!! لا شلوها وياكن
مزنة : عفية راشد نبا نتسوق ع راحتنا
راشد : لاااااا وياكن .. ويلة وداعت الله انا ساير

وفي هالوقت يتصل منصوووور ...

منصور : مرحباااااااا اماية مرحبا غناتي مرحبا بج يا الغلا كله .. تولهت علييييييييييييييييييييييييج
ام علي : فديت منطوقك انا .. شو صدق الرمسة ولا ؟ هههههههههه
منصور : هههههههههههههههههه لا مب صدق بس اتغشمر
ام علي : يا الخااااايس شو تبا داق ؟
منصور : داق اسمع صوتج واذكركم ان لكم ولد مخلينه اروحه في العين وفوق هذا ماتسألون عنه ..
ام علي : حليلك تونا واصلين هههههههه اذا يوم يستوي كمن يوم عقب تشره علينا
منصور : يوم بتردون بتلقون عروسي في البيت .. انا ابا حد يعتني بي
ام علي : منصووور فكنا ههههههه شو تبا الحين ؟
منصور : لاتحاولين مابصك التلفون ..خخخخخخخ
شمسة : منصوووووووووور عن الحشرة نبا نسير المول لاتعطلنا
منصور : منو هلي تباغم مثل الصخلة ..هههههههه
ام علي : منصور عيب هاي اختك .. يله فديتك بسير بسوي لك تلفون عقب
شمسة : شو اماااية تقولين له عيب ... لايكون يالس يسب !
منصور : اماية قوليلها هيه اسب
ام علي : منصووور ياحبك للمنازع هههههههههه ماتطووف شي حشا
منصور : انتي مربتني جي يا العيوز هههههههههههههههااااااااي
ام علي : عيز حيلك .. يله بسير باي
منصور : باي !!!!!!!!!!!! هههههههههههههههههههههههههههههههههههههههههههههههههه هه
شمسة : جنه اماية قالت باي !
حمدة ومزنة : هههههههههههههههههههههههههههههههههههههههههههههههههه ههههههههههههههههه
ام علي : منصووووووووور بسكر ف ويهك يله وداعت الله ..
منصور : وداعت الله ههههههههههه
حمدة ومزنة وشمسة : هههههههههههههههههههههههههههههههههههههههههههههههههه هههههههه
ام علي : وايد مستانسات .. شو تتحسسبون بس انتن تقولن باي !! يله تزهبوا ولا مابسير ..
حمدة : اماية انتي كل ماتعصبين تقولين مابسير ومابسير خخخخخخخخخخخ
ام علي : هيه وما بسير زين ..
شمسة : فدييييييييييييت الي يزعلوووون ههههههه اماية انتي الكل بالكل .. اذا ماسرتي مابسير
ام علي : بيي عشانج خلاص
مزنة : خخخخخخخخخخخخخخخخخخخخخخخخخخخخخخخخخخخخ فديتج والله ..
حمدة : خخخخخخخخخخخخخخخخخخخخخخخخخخ

وتسير مزنة تزقر روضة من الحوي عشان تلبسها لانه بياخذونها وياهن السوق .. وام علي وشمسة وحمدة سارن يلبسن ويتعدلن ..وعقب تنازعن اي مول يسيرون !!! وعقب قرروا انهن يسيرون سيتي سنتر .. و وداهن الدريول هناك ونزلن يتسوقن ..


حمدة : تعالن ابا اسير باريس جاليري
شمسة : هيه يله ابا اشتري عطوووووووووور
وتمن يتسوقن .. وعاد وهن يتمشن في السوق ..

شمسة : يالله ياحلاااااته يشبه شاروخان .. فديييييييييييته ااه
حمدة : لاااا شوفي لي يمه جنه سلمان خان خخخخخخخخخخ
مزنة : استحن لا تسمعكن خالتي ههههههههههههههههههه شو فيكن تخبلتن !!؟؟
شمسة : ههههههه لا لا ترا يهاااال لي يالس نغازلهن خخخخخخخخخخخخخخ
مزنة : وين ؟
حمدة : هناااااااااك يا حلااااااااااااااااته ماشاءالله
مزنة : يالله فديتهم ليتهم عيالي خخخخخخخخخخخ زين وانا اتحسب رياييل اقول خوات ريلي تخبلن خخخخ
ام علي : انا ريولي تعورني .. السوق هالطوووول ااه يا ريولي !! خل نرد البيت
روضة : اباااا ارد البيت .. مليت من سوق ابا العاب ولا البيت ..
شمسة : سكتي يا العنزززززز ليت ابوج ماخذنج وفاكنا ... امااااية لا فديتج انا عايبني سيتي سنتر خلينا يالسين
حمدة : الظاهر تبا تطلع الحرة عشان ضحكن عليها هههههههه تبا تخرب السيرة خخخخخخخ
ام علي : بعد ولا اظهر وياكن مووووووووول .. انتن ماتخيلن ولا تستحن ..
حمدة : شو اماية اتغشمر وياج !!!!!!! فدييييييييتج .. هاكوو كافيه خل نيلس هنااااك لين ترتاحين عقب نكمل
شمسة : هيه فكرة وخل نشتري بوظة حق رويض عشان نسكتها ههههههه وماتحشرنا ع الردة ..

وسارن كلهن ويلسن في الكافية ... والصدفة انه طاولتهن عدال طاولة الكويتيين ..

ياترى شو بيستوي ؟؟

شو القصة ؟

بتعرفون في الجزء الياي ..

 

[محتارة]

الجزء الثالث

وفي الكافيه ...

يتصل علي الولد العود الي دوم لاهي ويا عياله وحروب لي بين حريمه ... مسكييييين !

ام علي : علي داق !!!!!!!!! عساه خير .. الووو عليكم السلام شحالك علي ؟ وينك يا بويه ماندري بك من زمان ؟؟؟ شحال حريمك وعيالك ؟
علي : مانشكي باس الغالية .. هااا اماية انشاءالله مستانسين في دبي دار الحي ؟
ام علي : يا حلااات دبي ماينمل منهاااا .. ليتك ويانا يا علي .. وراشد دومه يتخبر عنك
علي : خله ايي العين .. شوو بس يالس هناك ماجنه عنده اهل .. ولي يسمعه عاد اونه يالس في بلاد برا
العين الا فرت حصاه عن دبي ...
ام علي : حليله مشغوووووول ...
علي : هيه دافعي ههههههههه .. انا ببات اليوم عند منصووور .. ويوم شفت البيت بدونج تضيقت الصراحة .. البيت بدوونج ماله طعم يا الغالية ..
ام علي : علني افدااااااااك .. وشله بتبات عند منصور !!! غريبة
علي : حرارته مرتفعة وديته مستشفى قبل شوي وتونا راد عاد ماهان علي اخليه اروحه .. شو ماتدرين ؟!! اتحراااه داق عليج ومخبرج !!!!!
ام علي : اويلييييييييييييي على ولدي !! لا حشا علي ماخبرني .. وشو الحين زين شحاله .. يالله ليتني ماسرت دبي .. وليش ماخبرني هو اتصل لي اليوم ..!
علي : لا اماية ماعلي شر انشاءالله ... حرارة خفيفة وعطوه دوا وباجر الصبح بتلقينه بصحته ..
ام علي : لا حشااااااااااا مابتم في دبي ... باجر العصر نحن في العين ! اويلي ع ولدي

وسكرت ام علي التلفون عن ولدهاااااااا وتمت متضيقة ومصرة ع رايها انها بتسرح صوب العين من باجر ..
وشمسة تضيقت وعصبت وتعكر مزاجها ... وهي لي كانت تتريا هالسيرة من كمن اسبوع والحين عقب مايت يبون يردون ...

شمسة : اماية شووو منصور هب ياهل ... وهو حليله بس مصخن وماعلي شر .. علي عنده !
ام علي : هاي رمسة ترمسينها !!!!!!!!! اقولج اخوج مريض تقولين مابلاه شي ...
شمسة : امااااية لاتكبرين موضوووع انا مابرد العين .. تريي شوي واذا ماطاب بنرد له .. ليش تسبقين الاحداث
ام علي : بتردين العين ويانا غصبن عنج ...
حمدة : شو بلااااكن !! تنازعن ! .. شمسة اهدي شوي ماعلي ظروف واستوت ودبي نروم نسيرلها أي وقت
شمسة : شوووووووووو !! تقصين عليه انتي .. منو بييبني دبي مرة ثانية !! حضرتج .. انتوا ماتسيرون مكان الا عقب حنه تنشف الريج ...
ام علي : صدقها اختج .. تخاف ع اخوها وتعاف الكل عشانه وانتي يا المخيسة همج وناستج وبس .. انانية تحبين عمرج .. لي مافيه خير لهله مافي خير للنااااس ...
مزنة : شو بلاكن يا جمااااااااااااااعة ... صفوا النفووس .. هب موضوع يستاهل تنازعن عليه !!!

وتمت شمسة معصبة طوووول يلستهن في الكافيه .. وام علي تحاتي ولدهاااا .. وحمدة وشمسة يلسن يسولفن ويتطمشن ع الرايح والياي ... ورووضة يالسة عدال شمسة وتطالع اليهال لي موجودين في الكافيه ... عادي حركات اليهال هههههههههههههه ...

وعقب نص سااعة ... يتصل جراح على مرته الجوهرة وتقوله انهم في الكافيه وياخذ عياله من الالعاب ويروح الكافيه ..

فهد : يمممممممممة شوفي ابوي شرى لي كرة ... شوفيها عجججيبة
الجوهرة : الله شحلاتها ...عاد حافظ عليها ..
جراح : هااااا اشوفكم هني شبعتوا من السوق ! عجيب والله عجيب ههههههههه
سارة : لا ماشبعناااا بس بنريح ولدك ... هالولد مشكلة خخخخخخخخ من الحين مزعج الله يعين ..
جراح : هههههههههههههه والله زين خوش عمة حاسة فيه وهو بعده مانولد
سارة : ههههههههه ع العموم مبروووووك يا بطل خخخ
جراح : الله يبارك فيج
ام جراح : يتربى بعزك انشاءالله ... مبرووووك حبيبي
جراح : الله يبارك فيج يا تــــاج راسي ... اذا طلعت بنت بسميها طيبة على اسمج ..
ام جراح : والله خوووش اسمه يا حلاته ... دام على اسمي بتطلع راعية بيت سنعة وحلوة والخطاطيب عند الباب ينطرونها هههههههههه
جراح : هههههههه ايه مانبيها تطيح بجبدنا... اقول عنود ليش ماتباركين !!!
عنود : لانك بتسميها طيبة !!! كنت مفكرة انك بتسميها على اسمي
جراح : هههههههههههههههههههههههههههاي حلوة منج ...
عنود : ههههههههههههههههه يله بالمباااارك يا بو فهد ..
جراح : الله يسلمج ... نزين عيل شكلكم مطولين هني انا هلكوني عيالج بروح فوق الغرفة وخلي العيال عندج ...
سارة : اقعد وياناااا جراح !!!
الجوهرة : لا روووح عاااادي ... شكلنا تعبنااك اليوم ... احنا بعد شوي بنصعد ..
ام جراح : يمة خذني ويااااك ... راسي عورني من هالصيحة واللجة ..ومافيني شدة اتسوق بعد ولا اقعد في هالكافووه ..
عنود : اسمه كافيه خخخخخخخخ
ام جراح : الي يصير عاد !!
جراح : يله عيل يمة مشينااااااااا ...

وراحت ام جراح مع ولدها الفندق ... وتموا الجوهرة وعيالها و سارة وعنود في الكافيه يسولفن ...

الجوهرة : سويرة يا الهبلة ... انا مابي جراح يقعد هههههههه مابي يشووف هالمفاصيخ خخخخ
سارة : اهااااااااااا هههههههه وانا اقول شفيهااا المرة نطت وطردت الريال
الجوهرة : ههههههههههههههههههههههه
عنود : ترااا امي عياااارة ... يمة من عياارتها !!
سارة : ليش يعني ؟ عشانها راحت فوق !
عنود : ايه هي ماراحت لانها تعبانة من اللجة على قولتها ..
سارة : ندري راايحة تشوف المسلسل المدبلج لان هذا وقته خخخخخخخخخخخ بس ماحبيت افشلها اخاف تعصب وتقول نصعد وياها ... وانا الصراحة عاجبتني القعدة هني هههههه
الجوهرة : ههههههههههههههههههههههههه خالتي مو هينه ...

 

[محتارة]

فهد وفواز قاعدين يلعبوون بالكرة ... ولما شافوا روضة تطالعهم وتضحك معاهم ... قام يحذفون (يفرون ) الكرة عليها وهي تلقفها وترد تحذفها عليهم ... يهال وبيستانسووون ...

الجوهرة : فهد ماما شوي شوي .. لاتحوش احد بالكرة ..
فهد : نزين يمة انا اعرف انيشن ...
عنود : جوهرة عيالج قلبوا راسي ترا ههههه عبالهم ملعب فشلوناااااااا ... صج عيال بدووو خخخخ
سارة : شفيهم البدوووو هااا عاد ثمني كلامج ...
عنود : ههههههههههه حلات البدوووو يا حلااااتهم دامني منهم ...
سارة : وايد واثقة من عمرج عبالج انتي حلوة خخخخخخخ
عنود : على الاقل احلى من شيفتج يا الشيفة يا القيفة هههههاااي
الجوهرة : لا عااااد بصراحة .. سااارة احلى منج !
سارة : احم احم
عنود : ماااالت على هالويه ... لاتصدقين عمرج ماما ... وبعدين ناس اذوااااق وراي اليوهرة عبارة عن نقطة في بحر هههههههه
الجوهرة : هههههههههههه ولا تزعلون انا احلاكن ... اقول انا بروح محل الذهب هذااا ...
عنود : بيي وياااج ...
الجوهرة : خلاص عيل سااارة ديري بالج ع اليهال ... حنا شوي ورادين ..
سارة : اوكيييييييييييييييييك ...

عقب شوي ... يوم فهد بيحذف الكرة على روضة .. حاشت الكرة شمسة !! وشمسة طبعا متنرفزة ومعصبة ...

شمسة : ماااااااااااااااااالت عليك يا الخاااايس .... حووول ماتشووووف ! وجـــــــــع

وتمسك الكرة وتدسها تحت الطاولة .... والكل انصدم من ردة فعلهااا .. حشااا ماسوا شي اليهال !!

فهد : انا اسف .. مادري ! ابي الكرة ميخالف تعطيني اياها ..
شمسة : لااااااااااا مابعطيك اياها اجلب ويهك ..
ساارة : اختي ماحصل الا الخير .. ياهل وما يدري هو مو متعمد ان يحوشج في الكرة ! شدعوة عليج
شمسة : المفروض مايلعب في هالاماكن شووو يتحسب يالس في ملعب ...
سارة : ندري انه مو ملعب وهو كان يلاعب بنتكم ... هذا يزاه !!! خلاص تأسفنا .. وين الكرة ؟
شمسة : حشاااااا علي مابعطيه الكره !
سارة : !!!!!!!! شنو ؟!
شمسة : يوم تسووله نظارة بعطيه الكرة ... عشان مرة ثانية يشوف عدل دربه و مايفر اغراضه ع الناس ..
سارة : حرام عليج !! الولد يبي كرته ... وماله داعي تكبرين الموضوع بهالطريقة !!!
شمسة : مابعطي الكرة .. ولي في خير ايي ياخذها مني ... اذا يبا خل يشتري غيرها بس هذي مابعطيه ..
سارة : الله يسامحج اختي ... هذا وحنا ضيوف بلادكم جذي تتعاملين ويانا .. عيل لو كنا ضيوف في بيتكم شنو بتسوين !!!! ... ماعلي مانبي الكرة .. حلال عليج

سارة انصدمت من هالموقف ... وسكتت و قالت لفهد انها بتشتري له غيرها ... بس موقف سارة ماكان ضعف منها ... بس هي كانت مصدومة من الموقف ولانها كانت متحمسة لسيرة دبي وحبها لعيضة و للاماراتيين ... فهالشي حز بخاطرهاااا .. وخذت فهد وفواز و طلعوا من الكافيه وراحوا للجوهرة وعنود لمحل الذهب ...
على اساس عقب مايخلصن من المحل يسيرون لغرفهم في الفندق ...


حمدة : شموووس شو بلاج !!! فشليتينا ويا الحرمة ...
مزنة : عيب عليج .. هذول ضيوف البلاد .. والمفروض تعتبرينهم ضيوفج بعد ! حد جي يعامل ضيوفه ؟؟؟
حمدة : غمضتني حليلهااا ... كنت بشل الكرة واعطيها واتأسف لهااا بس انتي حشااا عليج لسااان ..ماتعطين حد فجة يرمس !!!
مزنة : يا الفشلة ... وبعد باين عليهم خليجيين .. هذول اهلناا مب بس ضيوف عندنا !
ام علي : قلتلكم هالبنت خااااااااايسة مخيسة ... ماتعبر الناس ولا تحترم بس هامها نفسها ووناستها ولا تحسب حساب لغيرها ... حتى لسانها متبري منها ... عاد خل تفيدج هالكرة لعبي بهااا في الحوي ...
شمسة : انا برد البيت ... يلسة وياكم بايخة الصراحة ... وهذوه الكرة بحطها فوق الطاولة واذا يو مرة ثانية بياخذونها ... وعاد يستاهلووون حد قالهم يفرون الكرة عليه !
حمدة : لا والله !!!!!!!!!! اونهم بيردون عاد ... انا اقول خذي الكرة ولعبي بها بالحوي مثل ما قالت اماية ...
شمسة : فففففففف شو يعني اسير ادورهم واعطيهم الكرة ... خلاص برايهم .. خلصونا ابا اسير البيت ..


ووصل الدريول وسارن الحريم للبيت والكل كان متضيق ع شمسة وحركتها البايخة ... وعقب سهروا في البيت سهرة عائلية وخبرت ام علي ريلها انها تبي ترد العين باجر لان منصور مريض ومن ضمن السوالف .. خبروا بو علي وراشد وهزاع عن سالفة شمسة ... بس شمسة مايلست وياهم وسارت الحجرة ترقد ...

وسارة ماخبرت حد عن السالفة .. بس فهد قبل لا يرقد قال لامه ان حرمة خذت الكرة لي ابوه شراها ..
بس جوهرة مافهمت السالفة بالضبط و عبالها ان هو ضيعها .. طنشت به ..

 

[محتارة]

في الليل مارامت ترقد شمسة .. وتمت تفكر في لي سوته اليوم وتصرفها السخيف مع الياهل والحرمة ... ويست تقول في خاطرها ليش سويت جي ؟ شو استفدت ؟ والبنت حليلها ماغلطت علي وانا طولت لساني عليهاا .. يا الفشلة !! وكسرت بخاطر الياهل !! يالله ليتني القاهم مرة ثانية واعتذر .. ويلست تفكر ليش هي دوم تعصب ولسانها هالطول ... وتتواجع ويا الناس ع اسباب بايخة !! وقررت انها بتحاول تمسك اعصابها و انها مابتحن ع اهلها وتتواجع وياهم .. واذا ع الييات والروحات بتتريا نصيبها ويتخلي ريلها يحوطها كل مكان ..


في اليوم الثاني الصبح الساعة 10 ...

الجوهرة : انا قاعدة من الساعة 7 ! مو متعودة انا غير في بيتي ...
العنود : انا عااااادي عندي المهم انام خخخخخخخخ
ام جراح : صاجة يا بنيتي ... الواحد يوم يتعود على شي مشكلة ...
العنود : الا جراح وينه ؟؟
الجوهرة : مجابل مباراة .. وفهود نايم .. وفواز يلعب game boy .. عاد خليتهم وييتكم هههه
العنود : يا مرحب والله ... زين ونستيناااااا
ام جراح : سويرة بلاج منطمة ؟!
سارة : ما بلاني شي ... عادي !
الجوهرة : صج امس فهيدان مادري شيقول !! كرته خذتها مرة ...
سارة : ايه فهود حذف الكرة على وحدة اماراتية .. عاد عصبت وخذت الكرة .. رديها يا بنت الحلااال .. مارضت ! مابذنها ماي .. عاد خليناها تولي قلتلها حلال عليج ...
العنود : مااااااااالت عليها ... صج انها سخيفة ! ليش مازفيتيهاااا ...؟!
سارة : حاجيتها بس مارضت ولسانها طويل ... عاد ما كان لي خلقهااا ..مع انه فهود كان يلاعب بنتهم وفوق هذا اعتذر لهااا ...
الجوهرة : شنو هذي !! مايملي عينها شي ... في ناس جذي !! مصرقعة الظاهر ... الحمدالله والشكر
ام جراح : الله يسامحها ... بس لاتحشون فيها .. موزين الحش .. والكرة بدالها مليون كرة
العنود : سالفة مو سالفة كرة !!! بس شنو هالاسلوب ... عاد هو حاشها بكرة ماكفخها بطابوقة !!!!
سارة : خل تولي ... المهم وين بنروح اليوم ؟؟
العنود : خل نروح السينماااا فلم هندي ... احلى شي
الجوهرة : مممم بس انا مابي جراح يشوف افلام الهندية والممثلات خخخخ واليهال بعد مايحبون افلام
ام جراح : خل جراح ويا عياله وحنا نروح انا وياج والبنات ... والسينما كاهي في ستي سنتر
الجوهرة : بس انا وايد مطنشة بجراح !!! كله قاطة عليه اليهال وهايته ههههههه
سارة : لما نرد من الفلم ... نومي اليهال وانا بقعد في غرفتكم ... وانتي روحي ويا ريلج مطعم تعشوا بجو رومانسي حلووووووووو ...
العنود : والله عندج افكار سارووو ...
سارة : ايه عيل شلون .. عبالج انا شوية احم احم ...


وصار العصر وراحوا السينما يشوفون الفلم ... وطبعا قوم بو علي طالعين من وقت الظهر سايرين صوب العين

وفي العيـــــــــــن ...

منصور : بسم الله !!! مب جنكم في دبي ؟!
ام علي : شحالك ؟ شو بلاك الغالي ؟
منصور : ماشي اماية ...! شو فيج هههههههه
ام علي : علي امس اتصل قال انك مريض ... وانه بيبات عندك ..
منصور : هيه بات عندي بس سار من وقت .. وانا ماكنت مريض حيل ! عادي خذيت دوا للحرارة وخفيت ..لما نشيت احس اني بخير بس شوي عيوني تعورني ...
شمسة : شحالك منصور ؟
منصور : بخير ... حليلكم جان تميتوا هناك في دبي ...الحين يوم تسيرون تردون !!!!!!!!
حمدة : شو نسوي بعد حكم القوي ع الضعيف هههههههههه ... المهم سلامات
ام علي : فديتك الغالي ... بسير اسوي لك عصير ليمون ...
حمدة : جان زين تهتمين بنا مثل منصور ههههههه شو نحن عيال البطة السودا
ام علي : هههههههههههههههههه الا عيالج عيال البطة السودا
حمدة : انا بطة !!!!!!! ماعلي اماية براويج ههههههههه
منصور : وين ابوية ؟؟ وشو بلاها شموس جنها مضيقة ؟
حمدة : ابوية سار عنده شغل ... وشموس متواجعة ويا اماية ههههه تبي تيلس في دبي
منصور : حرام خربتوا عليها اجازتها ... اصراحة ماعندكم سالفة ..هههههه
ام علي : دوك عصير الليمون ...
منصور : تسلمين الغاااااااااااااالية ...
حمدة : وينك منصور ماشفت شموس شو سوت بنا هناك يوم درت اننا بنرد العين !!
منصور : شوو ؟؟
ام علي : جلبة تنازعت مع ياهل وحرمة ... وفشلتنا عسب شي سخيف
حمدة : الياهل كان يلاعب رويض بنت راشد بالكرة وحاش شمووس عاد عصبت وسوتها سالفة ودست الكرة عنه وماعطته .. ويوم رمستها الحرمة .. رديت عليها بلسان هالطول ولا حشمتها ...
منصور : كل هااا يطلع من شموس ههههههه هب هينه الجلبة ...
ام علي : مايضحك يا منصور !!! صدق انها فشيلة وهذا هم ضيوف البلاد ...
منصور : اتحسب تواجعت مع مواطنيين ...!!!!!
حمدة : لابوية ويا خليجيين ... واظن كويتيين عرفت من رمستهم ..بس مب متأكد بعد
منصور : صدق انها خايسة ... يبالها هزاب ! صح وين هزاع ؟
ام علي : ابوك شله وياه ...
منصور : وين سعيد وبطي ؟؟ شو نسيتيهم في دبي ؟
حمدة : ههههههههه لا بوية شلهم وياه بعد ...


يسير منصور حجرته ... ويتصل ع ربيعه حمدان

منصور : مرحباااااااا الساااع ...
حمدان : مرحبا باجي ..
منصور : هاا شوو استوا ويا الربع ؟ اتفقتوا ولا ؟
حمدان : هيه بوية اتفقنا ... وحجزنا فرقة حق الرزفة و وسوينا كل الترتيبااات بس باجي نوزع بطايق حق ع ربعنا ومعارفنا عشان ايون المبزرة ...
منصور : حلووو ... خلاص توزيع البطايق علي ... الصراحة فكرة حلوة اننا نسوي عشا وعزايم واشيا تراثية في المبزرة الخضرا ... بيكون حلوووو
حمدان : هيه صدقك ... خيااام وسدو وقهوة وعقب عشا ومسابقات تراثية ... ورزفة ... جو حلوو
منصور : عاد ارباح المشروع بنعطيها حق مؤسسة انسانية باسم موظفين الشركة ...
حمدان : هيه ذكرتني الاكشاك لازم نخبرهم بموعد المهرجان التراثي عشان يزهبون اغراضهم قبل بوقت ... وانا اتفقت وياهم ان بنأجر لهم الطاولة 500 درهم حق اليوم الواحد .. وبناخذ عمولة عليها ! هم لهم ربح ونحن لنا نسبة عشان نتبرع بها ...
منصور : خلاص عيل حمدان انا اخليك ... وفديتك رتب كل الامور واذا في شي خبروني وخلك دوم ع اتصال
ويا الشباب ... وهيه انا باجر بسير اسوي اعلان في الجريدة عن المهرجان الخيري الي منظمته شركتنا في المبزرة ولي بيستمر لمدة اسبوع ...

حمدان : ولا يهمك الغالي ... انت تامر
منصور : زين حمدان بخليك .. وداعت الله ..
حمدان : وداعت الرحمن ...

 

[محتارة]

منصور وايد متحمس حق المهرجان الخيري لي بيسوونه في المبزرة ... وعقب ماسكر عن حمدان رقد لانه كان شوي تعبان ... وشمسة نست سالفة لي استوت لها مع البنت والياهل واتصلت ع ربيعاتها ويسولفن وعقب شبكت ع النت ومارست حياتها عادية ... بس كان تتجنب تيلس ويا امها وحمدة لانها مفتشلة من لي سوته ولانها بعد شايلة في خاطرها شوي ...

في دبـــــي الساعة 11 في الليل...

سارة : عنود يقولج المطعم عجججيب لي راحوا له جراح ومرته ...
عنود : وينهم بعدهم في المطعم ؟
سارة : لا يا الهبلة !!!!! رادين من 10 ... ايه صح حضرتج نايمة ماتدرين شسالفة هههه
عنود : عجججيب الفلم الهندي اليوم ... حلمت بشاروخان
سارة : هههههههه شنو الحلم عاد ؟
عنود : ماقدر اقولج عيييب ...
سارة : خخخخخخخخخخخخخخخ ليش هااااا
عنود : هههههههههههههههههههههههههههههه لا بس حلمت انه يضحك لي ويقولي تعالي عندي .. عقب اكتشفت انه مو قاعد يطالعني !! قاعد يطالع البنت الي وراي ...
سارة : ههههههههههههههه ومنو هالبنت ؟؟ انــــــــا
عنود : لا اشواريا .... انا حاقدة عليها خخخخخخخخخخخخخ
سارة : ههههههه عندووو خل نقول لجراح وجوهرة يسهرون عندنا ... ملل وامي نايمة وانتي مليقة ...
عنود : جب ... بعدين جراح وجوهرة شلون يهدون الغرفة وعيالهم نايمين فرضا قعدوا ولا شي ... لاتحاولين
سارة : ايه صح ...
عنود : غيري محطات خل نشوف يمكن حاطين فلم هندي ...
سارة : انا بنام تعبانة .. تصبحين على خير
عنود : الحين مقعدتني عشان تنامين !!!!!! عليج نذالة يا سويرة انما ايه
سارة : ههههههه لاتخافين انتي النوم بجيبج ..
عنود : ههههههههه فعلا وبعدين جذي ولا جذاك .. انا قايمة مو عشان ويهج ! بس بشرب ماي وبكمل حلمي خخ
سارة : خخخخ نزين احترمي نفسج في الحلم ... تصبحين على خير
عنود : ههههههه وانتي من اهله ..

البنات انسدحوا وبس تمن يسولفون شوي ...

عنود : اقول ساروه ..
سارة : قوولي
عنود : خل نشيش الجوهرة عشان تقول لجراح يودينا مكان غير دبي ..
ساروه : مافهمت ..
عنود : يعني خل نروح شارجة بوظبي ... موشرط كله في دبي
سارة : اهااااااا .. ليش عاد ؟ دبي حلوة .. وبعدين ماظن جراح يوافق
عنود : انا قبل لا نسافر دشيت موقع ع النت .. ودشيت اماكن سياحية في الامارات وفي شي عجبني ..
سارة : شنو هو ؟
عنود : المبـــزرة ... يقولج جبال خضرااا ومناظر حلووووة شي عجيب ... وجبل حفيت قريت عنه بعد حلو
تدرين انا ماحب الاسواق وايد .. احب اشوف اشيا مو موجودة في ديرتنا .. معالم مميزة يعني ..
سارة : وين صايرة هذي لي تقولين عنها ؟
عنود : في العين ..
سارة : مادري قولي حق جراح .. شوفي شيقولج !
عنود : ايه بقوله .. بس احس انج مو متحمسة ..
سارة : بالعكس عادي .. تدرين انا احب الدوارة ههههه .. اقول ماشتقتي للكويت ؟
عنود : لا خخخخخخخخخخخخخخخخخخ مامدانا تونا يايين !!!
سارة : انا حسيت انه ودي ارجع الكويت .. عقب سالفة ذيج الاماراتية الملسونة ..
عنود : للحين ذاكرتها ههههههههه خل تولي .. احنا يايين نستانس ومالنا شغل بحد
سارة ك ايه صاااجة .. شكو اخرب سفرتي عشانها ..
عنود : بس لوعتي جبدي بنام ..
سارة : هههههههههه انتي لي تسولفين مو انا !!!!!
عنود : هههههه تصبحين على خير
سارة : وانتي من اهله ..
عنود : اقووول سويرة ..
سارة : لاتقولين ولا اقول ... خخخخخخخخ
عنود : بالطقااااااااااااااااااااق ...
سارة : الي يطقج ..
ام جراح : اشششششششششششش
عنود : كله منج ..
سارة : منج انتي ..


بدت القصة تتطور ... شو تتوقعون بيستوي ؟؟ بتعرفون في الجزء اليديد

 

[محتارة]

شكلها مو عاجبتك ... نزلت مليون بارت ولا احد رد ... خلاص ماراح اكملها ....

 

[^^ الحلا ^^]

كملي كملي

يعطيج العافيه

 

[al_3needa]

وين باقي القصه؟؟؟؟؟؟؟؟؟؟؟؟

 

[TeKaNa_Girl]

متابعينج كملي

 

[~ الزيـــن ~*]

بليز كملي متابعينج

 

[دندوشه555]

متابعينج كملي بليز لاطولين علينا:ggdw::ggdw::ggdw::ggdw::ggdw:

 

[Love-addict]

كمليهااااااااااااااااا بليييييييييييييييييييييز كل يوم أجيك وما أشوف شئ تكمله