عيون فارس

[ضوى العيون]

رهـف "
خليتها في حضني و يلست اهزها و اهزها جان بس تصك بوزها الي بطت أذوني بـ هالصوت ..
ام سامر : هااا .. شبلاج ياا رهف .. ذبحتينها !!!
رهف : طفشتني عسى الله ....
قاطعتني : لا تدعين ع الياهلة عطيني اياها .. تعالي غفورة حبيبتي تعالي ..
اخذت تتامل يدتها و هي ساكتة .. بعدها ابتسمت ..
غفران : يدووو
اخذتها من حضني ..
ام سامر : يا عيون يدو انتي !! " حبتها في خدها "
سامر : السلام عليكم
الكل : و عليكم السلام
سامر : شلونج الغالية ؟؟ " يحب امه ع راسها "
ام سامر : بخير دامكم حواليني .. " تقرب صوتها لـ البجي " بس بنيتي عيون مفتقدتها ..
يلس يمها ..
سامر : عيون مافيها الا الخير يا يمه .. مافيها الا الخير
تمسك يم قلبها : لا يا وليدي قلب الام ما يخطي .. بنيتي فيها شي ..
و اخذت تصيح .. !!
سامر : يا يمه الله يهداج .. شبلاج قلت لج عيون بخير !!
ام سامر : اتصل عليها طمن قلبي الله يطمن قلبك ..
مسك تلفونه واخذ يدق ع الرقم .. خلاه سبيكر ..
سامر : محد يشيل التلفون
زاد صياحها : ما قلت لك عيون فيها شي ..
رهف : زيين اتصل ع فارس
طالعني بعدها دق ع رقم فارس ..

......

" فـارس "

رن تلفوني مسكته اشوف منووه المتفرغ الي متصل لي هالحزة ..
كان ســامــر !!!
عيون : منووه ؟؟؟
فارس : اخوج .. سامر ..
نزلت راسها !! هالعيون عجيييبة مرة معصبة و لسانها ماشي بـ طوله بالدنيا و مرة ساكتة و هادية .. تقهر بـ ببرودها ..
شلت التلفون ..
فارس : يا هلا بـ صاحب هالصوت
سامر : هلا فيك .. فارس ؟؟
فارس : لبييه
سامر : امي ملعوزتنا شلونهاا عيون .. فيها شي ؟؟
اشرت لي بـ يدها انها تبيني .. خليت يدي ع التلفون ..
فارس : خير
عيون : لا تقول له اني في المستشفى
فارس : شووه ؟؟؟
عيون : ما ابااهم يكنسلون حفلة مريم بـ سببي و قلب امي ما يتحمل صدمات غير !!
فارس : بس انتي حامل و اكيد .......
وقفت لما شفت ملامح ويهها اعتفست .. رديت ع التلفون ..
سامر : ويينك !!! الوو
فارس : معاك ..
سامر : أخبار عيون ..
طالعتها ع طرف عيني : الحمدلله بخيير
سامر : عطني اياهاا
فارس : ان شاء الله
عطيتها ايااه بس هي ما رضـت انها تاخذه .. حاولت معاها بس منووه يقدر يقنع عـيـون !!
فارس : ما هي بـ راضية
سامر : لييش عاد !!!
فارس : مدري
سامر : سلم عليها عيل
فارس : يوصل !!
سامر : يلا فيمان الله ..
فارس : فيمان الكريم ..

صكيته من عنده و طالعت عيون ..
فارس : ما تقولين لي الحين ليش ما تبين تكلمين اخوج !!
عيون : اذاا رديت البيت اكلمه
فارس : اييي قولي بـ تشتكين علي ..
عيون : دامك تعرف ليش تسال ..
فارس : لان انا ما احب مشاكل بيني و بينج تطلع برع
عيون : قصدك عند سامر !! اقول لك سامر مهما ركب و نزل بـ يطلع اخوي و .....
رديت عليها باستهزاء : خيير ان شاء الله .. اذا كان اخوج يعني يكون الحل الوسط في كل مشاكلنا ..
عيون و هي تنسدح و تغطي ويهها باللحاف ..
عيون : سمه الي بـ تسمييه !!

حركت راسي اونها ما تتغير عنييدة و راسها يابس ..

......

" شــوق "

اكييد الحين الكل فاج عينه يقول منووه شوق ؟؟.. الااا من وين طلعت !!!
هذه من لحن الخريف غـصـب ادخل في القصة اوني اشرح الوضع في بيتنا .. من حلاته وضع عااد !!!! هدوء ما غيره هدووء ..
" شوق .. اخت ناصر .. عندها اخت توأم " ميثا " .. 17 سنة .. توجيهي .. "
نزلت من الدري و انضاري تتلفت يمين و يسار .. ماشي حد في البيت كالعاادة ..
لا اخوي زياد و لا ناصر .. لحضه في حد يالس في الصالة .. طليت لقيتها اختي ميثا ..
عفدت صوبها و رميت نفسي سع الكنبة الي قبالها ..
ميثا : بسم الله .. شبلاااج ؟؟؟
شوق : وين زيود ..
ميثا : عنبوه الي يشوفج تتكلمين عنه يقول اصغر عيالج ..
بـ ابتسامة سخرية : لا اكبر عيالي .. و خيير يا طير اكبر مني بـ 4 سنوات
ميثا : و 4 سنوات طايحة من عينج ..!
شوق : هب كانج فتحتي معاي تحقيق ..
و هي ترد نضرها لـ اللابتوب ..
ميثا : مدري
شوق : شووه تسوين !!
ميثا : تقرير كيميا
شوق : أوووه تصدقين ان انا ما سويت لي .. طبعي لي واحد معاج
ميثا : خيير ..عيدي الي قلتيه ما سممعت !!
شوق : شووه فيها لو اخت ساعدت اختها .. عيب ؟؟
ميثا : اقل انقلعي سوي لج بـ روحج ..
شوق : انزين هو مرة وحدة طبعيه نسختين ..
ميثا : لااء
شوق : ياا ربي شكثر عنيدة.. مدري ع منو طالعة
ميثا : ع اخوج ناصر
بـ استهتار : نناصر .. !!
ميثا : هيه ناصر .. ما شفتيه شلون متمك بالبنت الي مدري شووه اسمها من رد من ماليزيا
عقدت حواجبي : أي بنت ؟؟
ميثا : هييه يا حليلج ما تدرين .. تعالي انا اقول لج ..
شوق : ليش هي وراها سالفة ؟؟
ميثا : و كبييرة ..
تربعت ع الارض .. قبالها !!
شوق : و هذه يلسة ..
يلست يمي ..
ميثا : عيل اسمعي ...

.....

 

[ضوى العيون]

" هـيـفـاء "

كالعادة في غرفتي أداري دموعي .. طق طق .. " صوت الباب "
مسحت دموعي .. و همست بـ صوت تعبان ..
هيفاء : تفضل
دخلت امي .. من شافتني غمضت عينها و بقت واقفة عند الباب ..
هيفاء : دخلي يمه ..!
ام سلطان : ما اروم افج عيني و اشوف بنيتي بـ هذه الحالة ..
وقفت و رحت يمها .. حبيتها ع راسها و حبيت يدها . !
ربتت ع كتفي ..
ام سلطان : الله يرضى عليج و يعوضج بالريال الصالح

رديينا يا يمه ردينااا .. ما اباا اتذكر شي بـ خصوص الزواج .. كفاية عذااب حرقة مصير ..
تنهدت : دخلي يمه ..
ام سلطان : لااء.. بالاول قولي تم
هيفاء : ع شووه ؟؟
ام سلطان : قولي تم
هيفاء : تم يمه .. شووه صاير ؟؟
ام سلطان : يلا لبسي عباتج و شيلتج و عفدي وراي
عقدت حواجبي : وين رايحين ؟؟
ام سلطان : مدري .. اخوج بـ يفسحنا شفيها
هيفاء : لا يمه و الله ما الي نفس
ام سلطان : و لـ متى بـ تضلين بـ هذا الحال لـ متى !!
نزلت راسي : .....
ام سلطان : و غلاتي عندج تعالي
هيفاء : ان شاء الله يمه ..!
ام سلطان : ننتضرج ..

طلعت عني .. مشيت بـ خطوات ثقييلة .. الله يخليج لي يا يمه .. مدري شلون بـ تصير حياتي من دونج !!
لبست شيلتي و عباتي و طلعت من البيت .. ركبت السيارة ..
هيفاء : السلام عليكم
امي + سلطان : و عليكم السلام
سلطان بـ حنية : و اخيرا قررتين تبعدين عن هالدوامة ..

و الله يا خوي لو شوو صار ما بـ ابعد عن هذه الدوامة .. جاسم مهما كان بعييد فـ هو ساكن في قلبي .. متأكدة انه لـ الحينه يحبني .. متأكــدة و عمرها ضنوني ما تخيب ..

رحنا مجمع البحرين .. مشيت و فيني نشاط كبيير .. دخلن محل مدري شووه اسمه ع ما اضن " جيان "
وصلنا لـ حد البقوليات ..
ام سلطان : هيفاء .. حبيبتي روحي يبي لي علب صابون من الجهة الثانية ..
توني انتبهت لـ نفسي ..!
هيفاء : هااه
ام سلطان : وشوه هذه هااه .. اقول لج يبي صابون
هيفاء : منين !!
ام سلطان : لااا انتي كلش هب معاي .. الجهة الثانية ..
هيفاء : ان شاء الله يمه ..

مشيت لـ لبجهة الثانية .. شفت ياهل صغير سنتين لو سنة و نص طايح ع الارض يصيح .. رحت يمه و جثيت لـ حد مستواه ..
هيفاء : نش حبيبي عن الارض نش ..
مسكته من كتوفه و وقفته ع ريله .. ابتسمت له .. و هو يطالعني مستغرب .. !
هيفاء : وين الماما ..
برطم اونه بـ يصيح : .....

سمعت صوت من وراي ..
... : لو سمحتِ الشيخة بغيت الياهل

فريت له بس من شفته .. حسيت بالدنيا افترت في عيني .. و الارض حتى هب رايمة تحملني ..

جيته بليلة وداعه
تايه بين البيوت
صحت .. وينك ..؟؟ جيت اوادع عمري اللي راح فيك ..
ما سمعت الا صدى صوته
و كان ارق صوت
نطق اسمي .. ثم همس ..
من متى وانا احتريك..!!
قلت و عيوني تغافل زفرة الحزن وتفوت
هذا انا جيتك .. و ليت الموت جاني قبل اجيـــك ..
بعدها يادوب عدت .. عبرته حد السكوت ..
قال و عيوونه تغااارق دمع
"بسم الله عليــك"
قلت يابن الناس .. عادي .. ما ورى هالموت موت
وش وراها ..
لا فقدت عيونك ولا مسكت يديك ..

و اخــيــرا نطق ..
... : هــيــفــاء

 

[ضوى العيون]

"..::][ الحلقة الثامنة عشر ][::..

" انت كالدمعة في عيني اخاف ان تفر مني فافقدها وان فرت فلن اتردد في وضع يدي لاحتضنها "

و أخـيـرا تكلم ..
... : هـيـفـاء

داريت دمعتي بس خانتيني و طاحت .. طاحت حااارة حسيت بـ خدي احترق بـ طيحتها ..
أحترق قلبي اكثر لما طار الياهل على جاسم و هو يناديه "بابا" .. كنت أتمنى تطلع هذه الكلمة من الولد الي كان فـي بطني بس آآآه ..

جاسم : هيفاء .. انا ....

حسيت الدنيا مفترة فيني .. حتى الكلام الي طلع مني مدري شلون طلع او تجرأت كلماتي انها توقف بـ هذا الشكل جدام جاسم .. حسيت و كأن كل جرأة الدنيا تجمعت فيني هذه اللحظة .. رديت عليه و قلبي يحترق نــار ..!

هيفاء : اذا ودك تعتذر لي .. تريح ما اباا اعذار انا من كثر جروحي و الهم الي ياني بـ سببك يا جاسم " شهقت من البجي " نسيت اذكر اسباب طلاقك لي وصدقني ترى مثلك على دربي واايد .. قلوب ميته ولا ادري شووه متعبها و ماعطيها قدرة ع تقطيع قلوب النــاس ..

اختفى صوتي مع البجي .. ركضت و دموعي مثل السيل تسري ع خدي ..
وقفني صوت جاسم يزقرني ..

جاسم : لــحـضة هيفاء ..!!

ما استحملت اكثر يزقرني بـ اسمي ..
جاسم جدامج يا هيفاء ليش تضيعين فرصة لقاءه .. مو هو الي تنتضرينه لو تحلمين تشوفين طيفه الحينه هو جدامج ..
جدامج يا هيفاء ..!!!
لاااء قلبي مهما كان ضعيف .. إرادتي قوية .. بس دموعي أقوى من كل أحاسيسي .. !! ركضت
بـ أسرع ما عندي و كأني اهرب من الواقع .. الـواقع !!.. آه منك يا الواقـع .
شافتني امي اركض زقرتني كذا مرة بس آآآه .. وين اسمع و وين بـ يكون جسد فقد قلبه ..!! و ضاعت كل أحلامه و أمنيــاتــه ..!

.....

" شـوق "

[ البيت " عند غرفة ناصر ".. 11 الليل ]

فتحت باب غرفة ناصر بـ هدوء ..
ميثا " بصوت خافت " : شوقووه و الله خاايفة ..
ضربتها ع ضهرها بـ خفيف ..
شوق : أوووه ميثاا لا تصيرين جبانة جيه ..!!
ميثا : و اذا ياا ناصر و لقانا في غرفته شووه بـ نسوي ؟؟ عبقريتج الي بـ تخلصنا .. لو ناصر ..!!
شوق : انتي ما عليج خلنا ندخل و وريني الصورة قبل ما صج ايي ناصر و ما انام الليل من الفضول ..
ميثا : افففف .. انزين يلاا ..
ابتسمت لها : يلا

دخلنا داخل الغرفة .. و مثل ما تعرفون غرف العزابية ..
فوضى × فوضى ..!!!
خليت يدي ع خصري و انا اطالع المكان بـ حيرة ..

شوق : و الحينه شلون نشوفها ..

ميثا و كانها ما صدقت تسمع مني هذه الكلمة .. مسكتني من يدي و سحبتني لين الباب ..

ميثا : يلا عيل نطلع ..

شلت يدي عنها ..

شوق : أووه ماني بـ طالعة قبل ما اشوف الصورة .. " اشرت ع زاوية الغرفة " انتي دوري هناك و انا يم السرير ..
ميثا : افففف .. يا ليتني ما قلت لج .. او علمتج بالسالفة ..
شوق : بلاج هذرة ما منها فايدة .. و يلا خلصينا ..

رحت يم السرير شلت الجاكيت الي كان محطوط هناك .. دورت تحته .. شفت كراسة .. فتحتها .. ما فهمت شووه مكتوب فيها .. رميتها ع الجدار بـ عدم صبر .. فتحت الكبت و نثرت الثياب بعد ما لقيت شي .. فتحت الدرج .. بس فزعني صوت ميثا ..

ميثا : لقيتها يا شوق .. لـقـيـتـها ..

نقزت من مكاني و رحت لها ..

شوق : وينهااا ؟؟؟

فتحت لي ملف كان فيه اوراق و عفايس بس شي 3 صور ..

شوق : طلعيهم بسرعة ..
ميثا : زين .. زين

طلعت الأولى و بقت ميثا مدة تطالعها و دموعها متجمعة في عينها ..

بـ نبرة خوف : شبلاج ميثا ؟؟
مسحت دموعها : و لا شي ..

سحبت منها الصورة .. و بقيت مدة أطالعها ..

قلت مستغربة : أمــي
ميثا : هيه .. أمي ..!!

قررت افتح الموضوع الي من افتحه جدامها تصكه .. و اذا فتحته جدام زياد قال لي ان هذه مشكلتكن و ما لي خص فيها ..

شوق : تضنين ان ناصر من صجه يكرهنا ..
ميثا : مدري ..!! يلا بسرعة ما تبين تشوفين الصورة ؟

" كـ العادة تبي تتهرب "

شوق : في البداية جاوبيني .. مو كل مرة تتهربين
ميثا : يعني شووه اقول لج .. ان ناصر من صجه يكرهنا و يحط سبب موت امي علينا ..
شوق : وشو علينا هذه .. حنا ما لنا أي طرف في هذه المسألة .. كل هذا كان قدر الله ..
ميثا : و هذا الي ناصر مو راضي يدخله في راسه ..
شوق : انزين امي الله يرحمها ماتت بعد الولادة نتيجة الضغط الي فيها .. هو ما يدري بـ كل هذاا يعني ؟؟ و مو كأن أمـي ماتت بعد ما ولدتنا بـ كم يوم لو شووه ؟؟
ميثا : اقول لج صكي الموضوع .. لاني ما احب اتكلم فيه ..
شوق : كيفج ..!! زين طلعي الصور الباقية ..

طلعت الصورة الثانية .. و راوتني اياها ..

ميثا : زياد قال لي ان هذا فارس الي كان رفيج ناصر .. و هو لي تزوج البنت الي يحبها..
فتحت عيني : .. وسيييم .. يعني من حقها لو قبلته .. عيل ترفضه و تروح لـ ناصر الي ما عنده الا كف يمين و الثاني يسار ..
ميثا : شوفي ترى مئة بـ المئة بـ تكون تصرفاته معانا غير .. و مع زوجته اكييد بـ تتغير ..
شوق : ما فهمت ..
ميثا : لو اعيد لج من اليوم لين بكرة و الله ما تفهمين .. اذا انا نفسي مدري شووه معناها !! .. شلون انتي تعرفين و انتي توأمي يا الخبلة .. هممممم .. انزين .. شوفي و هذه صورتها ..

أخذت من عندها الصورة بسرعة ..

 

[ضوى العيون]

صرخت : يـــا ربـــي .. ملاااك .. بس شلون حصل ع الصورة ..
ميثا : مدري ..! يمكن و هي ما تدري صورها ..
شوق : يمكن ليش لااء ؟؟ بـ ......

الي قاطعنا صوت ناصر من ورانا ..

ناصر : شووه تسوون ثنتينكم هني ..؟؟؟

.....

" أحــلام "

[ في بيتهم " الغرفة الزجاجية" 9:30 الصبح ]

آآآآه بطني .. يا ربي ما تخيلت الحمل يتعب جيه ..

أحلام : بــــشــار ..آآآه .. بشار الحق علي ..

ياا لي و هو يركض ..

بشار : هااه حبيبتي .. شفيج ..
صحت : بشاار .. الحق علي بـ امووت ..
بشار : اوديج المستشفى ..
صرخت : لاااء .. ما ابااا شي .. اباا اروح لـ امي ..
بشار : انزين .. لا تتحركين بـ اروح اييب شيلتج و بـ ايي


ياب لي الشيلة .. لبستها .. و وقفت بـ صعوبة .. مسكني من ذراعي و ساعدني اوصل لـ السيارة ..

بشار : متى ايي هـ الياهل و يخلصنا من العذاب ..
احلام : هيه متى ايي احس كل يوم روحي بـ تطلع مني ..
ابتسم لي : ما عليج حبيبتي باقي كم اسبوع .. هونيها و تهون .. و تولدين و تييبين بـدر ..
احلام : ان شاء الله يا ابو بدر ..
بشار : لا عاد هذه كبيرة .. بشار احلى ..
احلام : هههههههههه .. ان شاء الله يا أغلى بشار بـ الدنيا ..

......

" رهــف "

[ بيتهم " ابو سامر " في الغرفة .. 9:30 الصبح ]

رهف : اووه .. سامر حبيبي الله يخليك قوم ..
انقلب الجهة الثانية : هممممم ..
رهف : حتى غفران نشت و انت بعدك رااقد ..
سامر : اففففف .. الواحد حتى ما يتهنى في اجازته ..

انفتح الباب و انصك .. دخلت غفران و هي مبرطمة ..
نزلت من ع السرير و بقيت اتاملها ..

رهف : هااه ماما شووه فيج ؟؟
غفران : يدوو مو لادية تأتيني هليب
رهف : وا خزيتاه .. في حد في الدنيا يزعل حبيبتي وعمري ..
سامر : أغار انـــا ..
ارتعت : بسم الله .. انت من متى قاعد ..
سامر : مـن " يقلد ع صوت غفران " يدوو مو لادية تأتيني هليب ..
راحت له غفران و ضربته ع كتفه بـ كف ايدها ..
سامر : آآآآي ..
غفران بـ نبرة تهديد : أسان ملة ثانية ما تأيب ألي ..
" علشان مرة ثانية ما تعيب علي "
رهف : ههههههههههههه .. تستاهل ..
سامر : هههههههههههه

سمعنا صوت خالتي ام سامر تزاعج ..

ام سامر : يــا رهــف .. ســامــر .. غـفـران .. الـفـطــور زاهــب ..

ركضت غفران و هي تضحك ..

غفران : انااا بـ اوسل تبل .. انااا بـ اوسل تبل .. " انا بـ اوصل قبل "

.....

" مريــم "

[ بوابة الصالون "سيارة سلطان ".. 11:30 الضهر ]

سلطان : متى اييكم ..
هيفاء : همممم .. ما ندري .. اذا خلصنا ندق عليك ..
سلطان : عيل انا رايح .. اذا خلصتون دقوا علي ..
هيفاء : لـحـضة .. شلون انت الي توصلنا .. المفروض حنا نوصل قبلك القاعة بعدين انت تيي مع الزفة .. بـ نتصل في حد غيرك ..
سلطان : منوه عااد !!
هيفاء : ما ندري .. ع ما اضن ان راشد هو الي بـ يوصلنا ..
سلطان : انزين .. " سكت شوي " الا مريم شبلاج ساكتة ما تتكلمين ..
بـ نعومة : و لا شي ..
سلطان : يلا هيفاء نزلي ..

هيفاء فتحت الباب ..

هيفاء : يلا مريم ..
سلطان : هههههه فهميها يا ذكية .. عندي كلمة راس معاها ..
بـ نص عيون : ان شاء الله .. مريوم بديت اغار منج هاااه ..
مريم : ههههههه
سلطان : يا حلو الضحكة عليج ..

" انصبغت احمر "

هيفاء : احم احم حشمونا عااد ..
سلطان : اكرمينا و نزلي ..
هيفاء : ههههههههه .. انتضرج مريوم داخل ..

نزلت هيفاء .. و انا ارجف من الخوف ..

سلطان : مريم ..!!
مريم : نـ نـ نعم ..

نزل من السيارة و ركب ورى .. يلس يمي و همس ..

سلطان : انتي تحبيني مريوم .. ؟؟

رفعت راسي و تلاقت انضاري بـ انضاره ..
شووه هـ السؤال ؟؟؟ .. يدري اني اموت فيه .. يعني لازم يحرجني معاه ..
نزلت راسي ..!

سلطان : تحبيني !!
بـ خوف : هيه ..
سلطان : بـس !!!!
مريم : ......
سلطان : قوليها مريم الله يخليج .. من عرفتج و انتي و لا مرة نطقتيها ..
مريم : .....
سلطان : يلا مريوم ..
مريم : ....
سلطان : ازعل عليج ..
مريم : قلت لك هيه ..
سلطان : انزين بـ اسألج سؤال ثاني ؟؟
مريم : تفضل ..
سلطان : لما قلت لج اباا رقم تلفونج شووه كان احساسج ذاك الوقت .. ؟؟
عقدت حواجبي : ما فهمت ..!!
سلطان : هممممم .. يعني شووه كانت الفكرة الي اخذتينها عني .. ؟؟
مريم : في البداية فكرت انك تباا تقص علي و تلعب بـ مشاعري .. بس لما وصلتني رسالتك قريتها و راقبت حركاتك و تعمدت اني احطك في مواقف علشان اتاكد من مشاعرك اتجاهي ..
سلطان : تأكدتي الحينه ..
ابتسمت : لو ما تأكدت ما كنت عطيتك رقم تلفوني ..
سلطان : همممم .. ما جاوبتيني تحبيني مريوم ..
رديت بـ دلع : سـلطان
سلطان : يا عيون سلطان ..
مريم : بس عاد استحي ..
سلطان : ههههههه .. عيوني ع الي يستحون .. قولي لي أول ..!
رديت بـ استسلام : و الله احبك يا سلطان احبك ..
فتحت الباب بـ انزل .. بس هو مسك يدي ..
سلطان : و أنـا أمـوت فيـج يا أغلى مريم في الدنيا ..
ابتسمت له و خدودي محمرين : .....
سلطان : اهتمي بـ نفسج .. و شوي شوي ..
مريم : ان شاء الله ..

سحبت يدي و نزلت بسرعة ..

......

 

[ضوى العيون]

" عـيـون "

[ المستشفى .. 11:45 الضهر ]

كملت صلاتي و شلت السجادة .. دخل فارس بس ما تلاقت انضاري بـ انضاره و هذه حالنا من البارحة ..
يلست ع السرير و تذكرت ان اليوم خطوبة مريم .. سامحيني يا مريم سامحني .. و الله مو بـ ايدي .. لو كان بـ ايدي كنت معاج الحينه ..

عشت البارحة موقف ما احسد عليه ..
نرد لـ البارحة ..!

[ " غرفة المستشفى 8:53الليل " دخل الدكتور علشان ياخذ دم من فارس لي انااا .. كنت مو راضية .. ما اباا دمه يختلط بـ دمي .. تقرب الدكتور و كان فارس يالس ع الكرسي الي يم السرير .. رفع كم قميصه مسكه الدكتور بـ يطقه الابرة علشان ياخذ منه دم .. بس بـ حركة لا ارادية .. خليت يدي ع مكان الي كان الدكتور بـ يطق فارس فيه ..

ابتسم الدكتور لي : لا ما عليك .. ما بـ تأزي ..
فارس مسك يدي وباعدها
ابتسم لي : لا تخافين ..

لما قرب الابرة من يده غمضت عيني .. و باعدت ويهي .. مرت يمكن 30دقيقة .. سمعت صوت فارس ..

فارس : يلا عيون ..

فتحت عيوني و شفتهم يطالعوني و يبتسمون .. رديت لهم الابتسامة ..

رفعت كم البلوزة الي كانت علي .. و انا خايفة .. بدت دموعي تتجمع في عيني لما شفت الدكتور يعقم الابرة .. تقرب الدكتور مني و الابرة في يده .. في هذه اللحظة بسرعة سحبت يدي ..

الدكتور : و الله انها ما تعور .. انتي غمضي عينك و بس ..
ابتديت اصيح : ما ابااا ..

الدكتور طالع فارس بـ نضرة ترجي .. تقرب فارس مني و همس في اذوني ..

فارس : عيون .. لا تصيرين ياهل و الله فشلتيني ..
رديت أترجاه : الله يخليك فارس .. قول له ما اباا لا يطقني ابرة ..

حرك راسه بـ عدم فايدة .. بس حدث غير المتوقع .. خلى يده الاولى ورى ضهري .. الثانية و مسك فيها يدي ..
تقرب مني الدكتور و خلى الابرة ع يدي ..
غمضت عيني .. و يلست اصيح و انا ارفس بـ ريلي .. الي يشوفني يقول ياهل .. بس و ربي اخاف من الابر ..
خلص .. وانا بعدي اصيح .. طلع الدكتور .. و احس نفسي بـ اموت من الخوف .. صج انها ما تألم بس موقفي مع فارس .. كان حدث ولا حرج ..

فارس : يــاهـل يا عيون يـاهـل ..! ]

كلماته لـ الحينه تتردد في اذوني .. يـاهـل .. انتي ياهل يا عيون في عينه يااهل.. طالعته .. كان يكمل شغله في اللابتوب .. ما قصر معاي من امس و هو وياي في المستشفى .. بس وجوده و عدمه نفس الشي .. اما يشتغل في اللابتوب او يالس و انا ع السرير اما نايمة او اقرأ قرآن .. بقيت مدة اطالعه .. ما انتبه لي لانه كان مشغول .. عن جد وسيم .. شكله طالع فضيع ما اقدر حتى أوصفه لكم .. اخاف أوصفه لكم و كل وحدة تقول في خاطرها " ياااي وايد حلو " مو ناقصة انا .. أغـار ..

أغـــــار !!!!! .. يا ربي انا شووه قلت .. معقولة اغار .. لا زلة لسان يا عيون زلة لسان ..

رميت نفسي ع السرير و نمت ..

....

" رهـف "

[ غرفتها .. 8:05 الليل ]

رديت البيت و انا متغطية بـ الكامل .. صج ان مكياجي كان خفيف بس سامر ما يرضى ..

دخلت الغرفة وتذكرت ان سامر من بعد الغدى ما شفته ..

ما كان في حد في الغرفة .. ما عدى غفران الي كانت نايمة ع سريرها .. شلت الشيلة و الغشوة عـنـي و فـصـخـت العـباة ( عباية كتف ) ..

طالعت نفسي في المنضرة .. الحمدلله المكياج ما اخترب من الحر .. مدري شووه فيها البحرين .. الجو مو واقف ع شي .. يوم برد و يوم حر ..

دخلت الحمام " أكرمكم الله "
بدلت ثيابي و لبست الفستان ..
الحمدلله لقيت بـ مقاسي .. و الله ان راسي افتر و انا ادور في هـ المجمعات عسب احصل فستان يليق علي ..
و لا عاد الله لا يخلينا من تعليقات سامر كل ما اتذكرها اضحك ..

" يبي لج درام أكل علشان تمتنين "

" ههههه صايرة كأنج عصى آيسكريم .. ما ينلقى لج شي !!"

ارتعت يوم سمعت صوت تصفير ..

سامر : حورية من السما نازلة علي ..
احمروا خدودي : غفران معاك !!

تقرب مني .. و رد بـ حب ..

سامر : انا ما تهمني غفران الي تهمني ام غفران ..
رهف : سـامـر .. استحي ..
سامر : تستحين !!! انزين تعالي بـ اقول لج ..
رهف : شووه ؟؟
سامر : انتي تعالي ..

تقربت منه .. حباني في خدي و همس ..

سامر : لا تروحين الحفلة ..
فتحت عيني : ليييش ؟؟؟؟
سامر : اخاف وحدة تشوفج و تخطبج لـ ولدها ..

دزيته ع خفيف ..

رهف : ســـامــر بلا مصاخة ..

....

 

[ضوى العيون]

" عـيـون "

[ عالم الأحلام .. 8:22 الليل ]

نشيت لقيت نفسي في البيت .. متى وصلت هني .. و منو يابني .. دخل علي سامر .. بس مدري و كأن طيف فارس جدامي .. شوي شوي سامر بدى يرد ع ورى .. وقفت و ركضت له و انا اناديه ..

عيون : سامر .. سامر .. وين بـ ترووح ..؟؟

وقفت لما لقيت نفسي بـ روحي في الظلمة بس انا و " فـارس" الي قطعني لقيته مبتسم لي .. ضماني لـ صدره ..

في هذه اللحظة نشيت متروعة .. محد في الغرفة .. نزلت من ع السرير .. فتحت الستارة ..
" لـــيــل "

يعني نمت وايد .. عفدت صوب الحمام .. توضيت و انا احس بـ الالم في بطني خف .. فرشت السجادة و صليت .. خلصت و شليتها .. انفتح الباب و انصك كانت الممرضة .. ابتسمت لي من شافتني .. رديت لها الابتسامة .. شلت القرآن و تربعت ع السرير ..

الممرضة " منال " : شلونج الحينه ؟؟!
عيون : الحمدلله احسن ..
الممرضة " منال " : تبين نييب لج عشى !!
عيون : لا مشكورة ..ما ابااا غير " طالعت زوايا الغرفة بـ أســى " اطلع من المستشفى ..!!
الممرضة " منال " : ادري فيج تمللتي .. سنة كاملة انتي هني مو هينة ..
رديت و انا اتذكر ماضيي في المستشفى ..
عيون : اييييه صح كلامج .. و الحين بعد متى اطلع ..؟
الممرضة "منال" : مدري .. قريب ان شاء الله .. " ربتت ع كتفي " بس انتي اهتمي في نفسج .. تراج هذه المرة حـامـل .. وفي بطنج يـاهـل يعني اكلي زين ..
ابتسمت لها : ان شاء الله ..

دخــل فـارس ..!

الممرضة " منال " : استأذن ..
ابتسمت : اذنج معاج ..

طلعت .. تلاقت انضاري معاي .. فـ نزلت راسي .. فارس راح يم الدريشة .. ضل يطالعها و فكره مو معاه .. استغربت !! يعني ما بـ يروح خطوبة مريم .. طالعت ساعتي ( 8:30 ) ..
وقفت و تقربت منه ..

همست : ما بـ تروح خطوبة مريم .. !!

طالعني بعدين رد نضره لـ الدريشة ..

بـ ببرود : لا
عيون : ليش ؟؟؟؟
صرخ علي : انا الي بـ اروح لو انتي ..

غمضت عيني من صرخته .. انا قلت شي الحينه ..!! حرااام عليه يعاملني جيه .. كل ما احاول اتقرب منه يباعدني الف خطوة ع ورى ..

رديت و انا قريب ابجي : انزين .. انا ما قلت شي الحين ..
صرخ علي مرة ثانية : و هذا الي عندج .. تبجين و تنثرين دموعج .. عندج شي غير ؟؟
صـحـت : ......
فارس : اذا اكلمج ردي علي ..
و انا اشهق من البجي : شووه تبيني اقول لك .. انك تعذبني يا فارس .. تـعـذبـنـي ..

طحت ع الارض و انا اصيح .. تمنيت لو الدنيا تنشق و تبلعني .. اباا امووت ..ما اباا هـ الدنيا .. يا ليتني توفيت في الحادث قبل ما اعيش مثل هذه العيشة الـمُُُُُـر .. !
وقفت و انا اشوفه يطالعني بـ نضرات ما فهمتها ..

همس : سامحيني عيون ..!
عيون :....

" مسحت دموعــي "
تقرب مني ..

فارس : سـامحتيني ..!!

" .. استغليت الفرصـة .. "

عيون : بـ شرط ..
فارس : شووه ؟؟
عيون : تروح خطوبة مريم ..
فارس : و تبين تضلين بـ روحج هني ..
عيون : شفيها .. ؟! مـتـعودة ..

طالع الجهة الثانية أونه يـفكـر ..

بـ لهفة : بـ تروح ..
فارس : همممممم .. هيه !
ابتسمت بـ نصر :.....

لـ أول مرة اقدر اقنعه بـ رايي .. مشيت بس وقفني صوته ..

فارس : تبين شي قبل ما اروح ..

فريت له ..

عيون : لا ..

بس قبل ما يطلع .. زقـرتـه ..

عيون : فارس ..!!

لف لي بـ دون ما يتكلم ..

عيون : لا تقول لهم اني في المستشفى ..
فارس : ليش عاد ؟؟
عيون : خلهم يستانسون بـ حفلتهم ..
فارس : ان شاء الله ..

رد بـ يطلع بس رديت زقرته ..

عيون : فـارس ..

وقف .. و لف لي ..

فارس : بعد شي ثاني ..

تقربت منه اكثر .. خليت يدي ع يده بـ ارادتي .. حسيته انصدم مني .. و خصوصا بـ التغير الكبير في تصرفاتي ..

عيون : مشكور فارس ..
فارس : ع شووه ؟
نزلت دموعي : مدري بـ دونك كنت شووه سويت .. !!

مسك ايدي بـ يده الثانية ..

 

[ضوى العيون]

رد بـ حنية : لو شووه صار يا عيون .. بـ تضلين زوجتي و لج حقوق علي ..

ما قدرت في هذه اللحظة اتحمل .. الكل يعرفني مو راعية مواقف جيه .. بـجـيـت ..

بس هذه المرة ما داريت دمعتي بـ وحدتي .. ولا كانت دمعة تحرق قـلـبي .. الااا كانت بــاااردة .. و يا ليتها تدوم ع خـدي ..!
ضماني لـ صدره .. و هــمــس ..

فارس : بـ تضلين غالية يا عيون .. غـاليـة يا وصية المرحـوم ..

مر علي و انا مرتمية في صدره .. يمكن اكثر من ربع ساعة ..
رفعت راسي و خدودي محمرين من البجي .. و من المـوقـف ..

ابتسم لي : كل هذاا .. ما خلصت دمـوعج ..!!

ضحكت و انا امسح دموعي .. ضل يطالعني بـ نضراات هذه المرة عرفت افسرها ..

كانت خليط من الحب .. الحنان .. العشق ..!

فريت نفسي لـ الجهة الثانية ..

بـ ابتسامة : فارس لا تطالعني جيه ..
حباني ع خدي : اهتمي في نفسج .. مع السلامة ..!

طلع من الغرفة ..
ضميت يديني مع بعض و همست ..

عيون : الله يسلمك و يحفظك ..

تقربت من الدريشة .. خليت يدي عليها ..
بـ رايكم الي سويته صح و الله خطأ..!!!!
من اليوم المفروض اعدل سلوكي معاه .. لانه لو ركب و نزل بـ يبقى زوجي .. " خليت يدي ع بطني " و أبـو ولدي ..

.....

" فـــارس "

[ عند باب البيت .. 9:25 الليل ]

نزلت من السيارة و عباراتها .. كلماتها .. حركاتها .. كلها في بالي لـ الحين ما انمحت ..

تــحـبـنـي !! .. مـن قدي .. عيون بنت راشد تحبني يا ناااس ..

دخلت البيت و انا اطالع زواياه .. ما اجذب ..

" مظلمة بدونج يا عيون "
والله اني احبج رغم كل الضروف
رغم كل المتاعب و الأسى والجراح

أخذت شاور .. لبست بانطلون جلد أسود .. معه قميص رصاصي .. لبست فوقه جاكيت أسود جلد .. طالعت نفسي في المنضرة .. رديت شعري ع ورى .. و طلعت من البيت ..

قبل ما اروح القاعة .. رحت محل ذهـب ..

فارس : السلام عليكم ..
صاحب المحل : و عليكم السلام ..
فارس : هممم .. لو سمحت ابي اليديد عندك ..
صاحب المحل : ذهب .. لو فضة .. ألماس .. و هو الأكثر الحين الألماس ..
فارس : زين عطني الألماس ..

طلع لي 3 أطقم .. أحترت بينهم ..
اخترت لـ مريم طقم كان وايد حلو .. السلسلة ع شكل حلق .. في نهايته وردة في وسطتها بلورة بـ اللون الاحمر .. اما التراكي و الخاتم و السويرة فـ ما يقلون في روعتهم عن السلسلة ..

فكرت آخذ لـ عيون بعد .. اخترت لها طقم نـاعـم .. سلسلة فـي نهايـتـها قلب فـي وسـطـه I love you بـ الوردي .. و الخاتم و التراكي و السويرة مثل الشي ..

دفعت الحساب و طلعت ..
وصلت لـ القاعة و الزفة توها واصلة .. الحمدلله افتكيت من سين و جيم " ليش تأخرت " .. بس بقت مشكلة " ويــن عـيـون ؟؟ " ..

دخلت و سلطان واقف .. طالع وسيم بـ بدلته .. كان لونها أسود .. و شعره كان أسـود لـ حد ظلمة الليل .. رغم ان شعره طويل الا انه واايد طالع لوك عليه ..

قبل ما اروح له .. رحت لـ سامر الي كان واقف مع راشد ..

فارس : السلام عليكم ..
راشد + سامر : وعليكم السلام ..
سامر : شبلاك تأخرت .. الحريم قالبين المكان ينطرون عيون .. و خصوصا مريم ..
بلعت ريجي : هاااه .. تدري الشوارع زحمة ..
راشد : هيه هـ الايام مدري شفيها الشوارع وايد زحمة ..
غيرت الموضوع : الا رااشد ..
راشد : شووه ؟؟
طالعته بـ نص عين ..
فارس : شفيها العنود واقفة بـ روحها ..
راشد : هاااه .. في وين ..
سامر : احم احم ..

طالعنا بـ اشمئزاز ..

راشد : تجذبون علي يعني ..
فارس : حـشـى و الله ما اجذب .. لف وراك بـ تشوفها يم باقة الورد ..

انا صاج .. لانها من مساع واقفة هناك .. لما لـف .. ابتسم .. و مـشـى لها ..

.....

" العـنـود "

[ القـاعـة .. 10:00الليل ]

اويييلااااه شافني .. انا شووه اسوي الحين ..

راشد : الحلوة شووه تسوي بـ روحها ..
بلعت ريجي : هاااه .. لا و لا شي ..
راشد : اخبارج حبيبتي ..؟؟
نزلت راسي : بخير .. أ أ أنت شلونك ؟؟
راشد : دامني سمعت صوتج اكيد بخير .. ألا عيوني شفيج مغطية ويهج !!
العنود : هاااه .. لا بس .. أ أنا حاطة لي مـ مـكياج و هني في رياييل و و وايد ..

يــا ربي خاايفة و مرتبكة .. من يوقف راشــد جدامي احس بـ رجفة في جسمي .. اول ما وافقت عليه كان هدفي اني انسى سـامر.. بس راشـد بـ طيبته نساني اياه في شهر واحد بس و خلاني اموت ع التراب الي هو يمشي عليه ..

راشد : شبلاج مرتبكة .. " قرب ويهه مني " تخافين مني ..!
العنود : لـ لـ لا
راشد : انزين .. شيلي الغشوة ..
العنود : لا ما ابااا
راشد : و غلاتي عندج شيلي الغشوة بـ اشوفج ..
العنود : بس ..
قاطعني : لا بس و لا شي ..

مسك الغشوة و رفعها .. نزلت عيوني عن عيونه .. بس هو رفع راسي و غصب انضاري مع انضاره تتلاقى ..

راشد : أحلى من القمر يا العنود ..
أحمرت خدودي من الفشلة : ....

......

 

[ضوى العيون]

" أحـلام "

[ القـاعـة .. 10:15 الليل ]

طالعت الكل و انا متحسرة .. كل وحدة تقول الزود عندي من كثر حلاة الفساتين .. اما انــا .. حامل ..!! فـ ما اقدر البس مثلهن و خصوصا اني صرت أمتن من قبل و وزني آآه يا وزني من الأربعين .. الحين في الستين ..

أخـذت لـي جلابـية مــن اليشـمك .. لـونـها برونـزي مـايـل لـ البنفسجي .. كانت واايد واايد ناعمة .. بس انا متعودة ع الفساتين .. مو ع الجلابيات ..

تقربت رهف مني و هي بـ كامل روعتها .. ما شاء الله عليها .. تينن .. شكلها مثل أمها .. و لان امها من لندن فـ اكييد بـ تكون رهف حلوة ..


كانت لابسة فستان وايد طويل .. حتى ان غفران اول ما دخلنا القاعة كانت تركض ورى رهف و تعرقفت فيه ..
لونه برتقالي مايل لـ البيج .. فيه ع جنب وردة كبيرة لونها برتقالي و طايحة منها خيوط ذهبية .. طالع روعة عليها .. خصوصا ان بشرتها بيضة و شعرها أشقر ..
ماعطيها شكل غير و يلفت الكل ..

رهف : أحلام شفتين غفران ..؟؟
احلام : غفران !! مع سامر ع ما اضن ..
رهف : و الله هـ البنت مخبلتني ..
احلام : هههههههههههههه .. الله يساعدج .. الا عيون لـ الحينه ما يات ..
رهف : انا شفت فارس .. بس مدري اذا يات عيون لو لا ..!!
احلام : انا بعد شفته .. بس ما شفت عيون معاه ..

أم سامر : رهـــف .. تـعـالـي لـ بـنـتـج .. و الله انـهـا طـفـرت فـيـنـي ..

احلام + رهف : ههههههههههههههه

.....

" فـارس "

[ القـاعـة .. 10:25 الليل ]

انتظرتهم يدخلون بس تأخروا .. لمحت سلطان واقف و معاه بشار .. صج تعالوا ما سلمت ع سلطان ..

تقربت منهم ..

فارس : سلطان ..!

لف لي و ابتسم ..
لويت عليه .. و همست ..

فارس : مبروك ..
ابتسم لي : الله يبارك في حياتك ..
فارس : شبلاكم واقفين لـ الحينه .. ؟؟ مو المفروض تدخلون ..؟؟
سلطان : اسأل مريم ..
فارس : شفيها ..!!!
سلطان : تصــيــح ..


..::][ الحلقة التاسعة عشر ][::..

" يا وقت وشـ باقي حزن تخفيهـ ؟؟ أظن حزن الناس كلهـ وصلني !! كل التعاسهـ والألم عايشهـ أنا فيهـ !!حتى الأمل خيب بها اليوم ظني !!!!"

تقربت منهم ..

فارس : سلطان ..!

لف لي و ابتسم ..
لويت عليه .. و همست ..

فارس : مبروك ..
ابتسم لي : الله يبارك في حياتك ..
فارس : شبلاكم واقفين لـ الحينه .. ؟؟ مو المفروض تدخلون ..؟؟
سلطان : اسأل مريم ..
عقدت حواجبي : شفيها ..!!!
سلطان : تصــيــح ..
فجيت عيني : تصيح !!!!!!!
سلطان : هـيـه تصيح ..
فارس : من شووه ..
سلطان : مدري .. تقول ما بـ تتكلم لما انت و عيون تيون ..
فارس : انا الحينه بـ اروح لها بس عـيـون .....
قاطعني : شبلاها عيون ..؟؟
فارس : .......

الحين شووه اقول له .. !! مو هي وصتني اني ما اقول لـ حد انها في المستشفى ..

سلطان : فارس .. شبلاك .. عيون فيها شي ..!!
تنهدت : عيون في المستشفى " اضطريت اخبره "..
سلطان : المــســتــشــفــى !!!

خليت يدي ع بوزه ..

بـ صوت خافت : اصصص .. ما اباا احد يعرف ..
بـ نفس مستوى صوتي : شفيها ..؟؟
فارس : حــامــل ..
ابتسم ابتسامة عريضة : حـــامـــل ..!!! انزين ليش ما تبي احد يعرف ..
فارس : مدري .. هي الي قالت لي ما اقول لـ حد ..
سلطان : ههههههههه .. اخاف صرت مثل بشار .. طلب مرته أوامر عنده من حملت ..
فارس : هههههههههه .. لا عاد مو لـ هذه الدرجة .. بس خلنا نشوف اذا تزوجت مريم شووه بـ تسوي ..
سلطان : لا مو مثلكم انا ..!!!
فارس : الا بـ تخلي اختي فوق راسك فاهم ..
سلطان : قول داخل عيوني ..
فارس + سلطان : هههههههههههههههههه
فارس : انا بـ اروح اشوف شووه صاير الحين ..
سلطان : بـ رايك .. مليت من الوقفة ..

دخلت القاعة .. تغشن الحريم .. و رحت لـ مريم .. لقيتها يالسة ع الكوشة و دموعها مثل السيل ع خدها .. رهف كانت ع يمينها و هيفاء ع يسارها .. يهدونها ..
فارس : مريوم ..

 

[ضوى العيون]

طالعتني .. و طارت في حضني مثل الياهل الي يدور ع حضن يلجي له ..
مسحت ع شعرها ..

فارس : شبلاج مريم .. معطلة الناس برع ..
مريم : .....

قعدتها ع الكوشة .. يلست يمها .. طالعتها بـ حنيه ..

فارس : آمري الغالية ..
دموعها بدت تنزل : " شهقت من البجي .. ردت و شفتها ترتجف تعلن بداية دوامة من البجي " ابي ام تشاركني هـ الليلة .. ابي اصير مثل كل بنت امها معاها في هذه اللحظة تشجعها .. ليييش بس انا محرومة من هـ الشي .. ليش انا بس الي ما عندي ام تواسيني .. امي ماتت و هي حامل يا فارس .. وينهااا ..!! و وين ابويه الحين .. ليش سوى كل هذاا .. ليش يبي يحرمنا منها .. ليييش ؟؟؟

مريم بـ كلامها هذا الكل التفت لها .. الكل ضل يطالعها بـ حيرة .. هذا الي تبينه يا مريم .. انتي طلبتي المستحيييل .. منين اييب لج امي الحينه .. !!

امي ماتت و السبب ابويه .. ربتنا خالتي الوحيدة فاطمة .. ربتنا و كبرتنا لما صار عمري 18 .. انا سافرت ماليزيا اكمل دراستي .. و هي بقت مع بنتها اليازية مع مريم في البحرين .. بس لما رديت .. سافرت كندا لـ ريلها .. اما الحين فـ ما عندنا خبر عنها ..
سالفة ابوي و امي سالفة طويلة .. لما صارت كان عمري 10 .. اما مريم توها 7 سنوات .. ذاكرتي لـ الحينه حاملة صورة امي و ابويه ..

نرد قبل 13سنة ..!

كنت نايمـ في غرفتي .. نشيت ع يد تهزني بـ خوف و دموع تطيح ع ويهي بـ حرارة .. فتحت عيني لقيت مريم و عمرها 7 سنوات تطالعني و دموعها تسري ع خدها بـ ألـــم .. قعدت بسرعة .. فركت عيني ..

فارس : شفيج مريم ؟؟؟
تصيح : البابا يطق الماما ..

انسدحت و تلحفت و انا اقول لها بـ صوت ناعس ..

فارس : أووه .. لا تحلمين و تيين تقولين لي ..

اخذت تهز فيني و دموعها تطييح .. صرخت بـ اعلى ما عندها ..

مريم : المامااا تصييح .. الماما يطلع منها دم .. فاارس قووم .. البابا يطق الماما ..

طاحت علي و هي تطقني ع ضهري ..
قمت عن السرير ..

فارس : اففف ..انزين تعالي وريني .. " تثاوبت "

مشيت و هي متشبتة في ثيابي ..
بس لما سمعت صرخة ابويه .. وقفت مثل الصـنـم ..

فهد : ســكــتــي لا ذبــحــتــج الحـــيـــن ..

سمعت بعدها صرخة امي .. تتألــم ..

سـعـاد : حرااام عــلــيــك بس .. آآآآآآه ..

الي وقفني بـ مكاني اكثر لما فتحت الباب ع فتحة صغيرة تسمح لـ عيني انها تشوف ابوي و الي لـ اول مرة اشوفه بـ هذه القساوة .. تشبت في مقبض الباب لما شفت الدم الي ملى المكان .. و امي طايحة ع الارض و هي تصييح ..
بس لما حاول ابوي يرفس امي في بطنها و هي حامل .. فتحت الباب .. طارت مريم عليه و مسكته من ريله ..

تصرخ و هي تصيح : لا بــابــا لا تطق المـاما .. لا تطقهااا ..

مسكتها امي و علامات الالم في ويهها .. صوتها .. ملامحها ..

سعاد : مـ مـ مـ مريم .. روحي ماما .. ر....

و غمضت عينها .. لـ الحين مدري .. اذا كانت توفت في هذه اللحظة .. لو أغمى عليها .. الي اتذكره ان مريم طارت عليها و طاحت في حضنها .. مسحت نفسها و دم امي خرس ثيابها ..

صرخت : مــامــا .. لا تروحين ..

تقربت منهم .. طالعت ابويه بـ عتاب .. وبعدها طالعت امي و مريم الي كانت رغم صغرها تقااسي من ألم الحسرة ..

صرخت ع ابويه : ليش سويت جـيـه يا يـبـه " صرخت بـ اعلى ما عندي " لــــيـــش ..؟؟؟؟؟؟

بـ صرختي هذه اهتز فيها ابويه .. اهتزت مريم .. اهتزت جدران البيت .. و سماوات الملـكــوت ..
تقربت من امي .. حضنتها لي .. و انا اصيــح .. ذاك الوقت بـعـدي صغيير عن الدنيا .. و مو متحمل اني افقد اعز ما عندي ..

مريم الحينه اكيد تذكرت اليوم المشؤوم .. اليوم الي فارقتنا فيه الام الحنون الي غرقتنا بـ حنانها .. اليوم الي فقدنا فيه ابوي و لا ندري وينه .. يقولون مات .. بس أحساسي يقول لا ما مات .. ابويه حي .. و متأكـد عايش بـ ألم .. يحمل ذنــب عمري ما راح انسااه له ولا اغفره ..

ام سامر " تصيح " : مريم بنيتي انا امـج .. لا تصيحين و تقطعين قلبي ..
ام سلطان : خلاص مريم .. " شهقت من البجي " انا امج يا بنيتي ..
هيفاء : الغالية بسج بجي .. تراج بجيتيني .. خلي ايمانج بـ الله قوي ..
رهف : بس مريوم .. " حضنتها " عندج بدل الام أمين .. لا تبجين و الدنيا طويلة جدامج ..

تقربت منهم فـ تباعدوا عنها ..
فارس : يلا مريم .. سلطان برع ..
اخذت تشهق : .....

ما كانت تصيح .. كان هذا نهاية هذه الدوامة ..
مسكت يدها .. و ابتسمت لها رغم غصتي .. مشيتها لين برع .. كانت تمشي بـ خطوات مترددة .. بس قبل ما تروح همست في اذونها ..

فارس :عيون ما يات لانها في المستشفى ..

وقفت و لفت جسمها كله لي ..

بـ تعب : ليش ؟؟؟
فارس : ابشري .. بـ تصيرين عمه يا مريم .. ولدي في الطريق ..

شفت ابتسامة عذبة ع ملامحها .. تتكلم عن قصة فرح يديدة في حياة اختي مريم ..

.......

 

[ضوى العيون]

أم سامر "
[ القاعة .. 11:10 الليل ]

فديت بنيتي مريم .. تحن ع امها و هذا شي طبيعي .. الام مهما غابت بـ تضل عزيزة وغالية و ذكراها طيب بـ القلب .. هيه و انا ام و يده .. احس بـ هذا الشعور .. شلون لو كان لـ بنت توها في بداية حياتها ..
قعدت ع اقرب كرسي و قلبي يوجعني .. احس بـ ألم فيه .. و نغزات من اول امس .. تقربت مني ام سلطان ..

ام سلطان : خير يا خويتي .. ما بـ تيين تزفينهم ..
بـ تعب : لا انتي روحي زفيهم ما لي بارض ..
ام سلطان : بلاج سارة ..؟؟
ام سامر : لا يا منيرة .. الم شوي " خليت يدي يم قلبي " هني ..!
ام سلطان : تبين اقول لـ سامر يوديج المستشفى ..
ام سلطان : قـطييعة .. يوديني المستشفى و يودر مرته و بنته الحين .. لا يا خويتي ماني بـ رايحة .. اذا زاد علي الالم بـ اقول له يوديني ..
ام سلطان : بـ راحتج ..!

طالعتني بـ نضرة بعدها مشت ..

.....

" شـوق "
[ غرفتها .. 6:10 الصبح ]

ميثا : شوق اذا ما ترومين تروحين المدرسة .. خلج هني ..
رديت و انا اهز ريلي : هاا شوفيها ما بها الا الخير .. آآآآآآه ..
ميثا : شفتي .. قلت لج .. بس انتي ما تطيعين ..
شوق : أوووه .. بس يا ميثا .. شي صار و انتهي .. بلاج هذرة و ساعديني اقوم ..

فرت بوزها .. و مسكتني من ذراعي وقفت و انا امشي ع ريل وحدة .. الريل الثانية الله يغربل نويصر و يخليه يطيح من فوق الدري مثل ما خلاني اطيح قولوا آآآميين ..

شوق : آآه .. ميثاا شوي شوي ..
بـ ملل : زيين ..

كنت بـ احمل شنطتي .. بس ميثا سبقتني ..

ميثا : خليها عنج انا بـ احملها ..

سحبتها من عندها ..

شوق : انتي كفاية عليج شنطتج بعد تحملين شنطتي ..
ميثا : كيفج ..!!!

مشيت لين المطبخ .. كان اخوي زياد و هو الي يوصلنا كل يوم .. و قباله ناصر .. عبست من شفته ..

شوق + ميثا : صباح الخير .. زياد " تعمدت اقول اسم زياد بس "

طالعتني ميثا و خزرت لي .. فرصتني في يدي .. تدري اني ابي استفز ناصر ..

زياد بـ ابتسامة : صباح النور ..

ما شفت ردة فعل ناصر لانه كان معطني ظهره ..

شوق : ننطرك زياد في السيارة .. و

سحبتني ميثا من يدي ..

شوق : شبلاااج ..آآآآي ريلي .. وقفي بــــــــس ..!

وقفت ..

ميثا : شفيج .. تبين اليوم بعد تنطقين مثل ما انطقيتين البارحة ..
شوق : و انا الحين شو سويت ..
بـ طنازة : لا سلامتج ما سويتين شي .. بس تستفزين ناصر ..
شوق : أوووه .. يلا بـ نتأخر ..

ركبنا السيارة و مشينا لـ المدرسة ..

.....

" عـيـون "
[ غرفـة المستشفى .. 6:25 الصبح ]

نشيت من النـوم .. اطالع المكان .. وقفت انضاري لما شفت فارس يالس ع الكرسي و هو نايم .. هيه صح امس رقدت و انا انطره .. نزلت من ع السرير .. شلت اللحاف الأبيض .. رحت لـ فارس غطيته به ..
طالعته و تأملته زين ..

عفدت ع الحمام .. توضيت و فرشت السجادة .. صليت .. و قريت قرآن .. صكيته و الابتسامة ما فارقت ويهي .. ضميت القرآن لـ حضني .. احس بـ الفرحة في قلبي الحمدلله .. الحمدلله .. اللهم ديم الفرحة يا رب .. ديمها و اجمع قلبي بـ الي اخترته لي .. " فارس " ..

خليت القرآن ع جنب .. شلت السجادة و رديت القرآن مكانه .. يلست ع الكرسي الي قبال فارس .. طالعته نايم .. تعبان .. ليش توني حاسة بـ تعبه و حزنه .. ألمه و حــبــه ..!
قطع علي افكاري صوت طق ع الباب .. وقفت و فتحته .. كانت الممرضة في ويهي .. مدري ليش كانت تطالعني بـ احتقار بس طنشتها ..
عيون : نعم ..
الممرضة : الفطور ..

دخلته .. و وقفت الممرضة تطالع فارس ..دخلت و استفزيت منها ..

بـ اشمئزاز : في شي ثاني ..
الممرضة : و الله انه حلو ..

ما سمعت شو قالت ..
عيون : نعم ..

ما ردت علي و طلعت برع الغرفة .. حركت راسي بـ عدم فايدة .. صكيت الباب بـ هدوء و رديت مكاني ..
عن جـد ما خطر في بالي اني في يوم بـ احب فـارس او حتى بـ افكر فيه .. آآه ..

رديت راسي ع ورى .. غمضت عيني و غصت في بحر افكاري .. قطع علي السكون صوت فارس ..

فارس : صباح الخير ..

فتحت عيني بـ هدوء .. يطالعني و هو مبتسم .. لـ اول مرة في الدنيا احس بـ عذوبة هـ الابتسامة ع محياه ..

ابتسمت له : صباح النور ..
فارس : ما جهزتي اغراضج ..
عيون : ليش ..؟ وين رايحين ..؟؟
فارس : وين بعد البيت ..

نقزت من مكاني .. و عفدت يمه ع الكرسي ..

رديت و قلبي يتراقص من الفرح : صــج ..!

مسك يدي و رد علي بـ حب ..

فارس : صـج ..

حاولت اتهرب من نضراته ..

سحبت يدي و وقفت ..

عيون : عيل انا بـ اجهز ..

وقف ..

 

[ضوى العيون]

فارس : قولي بـ اتهرب ..
نزلت راسي : ......
فارس : هههههه .. انزين بـ اروح اكمل إجراءات الخروج و بـ ايي اباا اشوفج زاهبة .. " غمز لي بـ عيونه "
عيون : ان شاء الله ..

طلع من الغرفة .. و انا بـ دوري شلت ثيابي و خليتهم في الشنطة .. ما كانوا وايد .. بس كم بدلة .. احترت شو البس .. بس مسرع ما طلعت لي تنورة بيضة معاها فانيلة برتقالية و فوقها قميص ابيض .. لفيت الشيلة بـ ترتيب .. طالعت نفسي في المنظرة .. ما عندي مكياج .. جان حطيت .. بس عندي في الشنطة جلوز و كحل .. لاني ما كنت حاطة كحل الا خفيف فـ غمجته ..

طالعت نفسي زين .. و بعدها رديت الجلوز في الشنطة .. وقفت ع صوت الباب ..

فارس : جـهزتــ .....

بس وقف يطالعني و كانه شايف شبح ..

عيون : شبلاك ..؟!
فارس : لا و لا شي ..

حمل شنطتي .. و مشى .. انا مشيت وراه ..
طلعت من المستشفى و لفحتني نسمة هوى طيرت طرف شيلتي وقفت اطالع الحريـة .. الشارع .. النـاس .. وأخيرا طلعت ..

وقف فارس لما شافني واقفة .. تقرب مني .. و مسك يدي ..

فارس : خلاص ما بـ تردين المستشفى مرة ثانية ..
ابتسمت له : .....

رصيت ع يده ..
ابتسم لي .. و مشينا ..

تعال اكتب كلام الحب
تعال ارسم بدايه درب
يا اغلى كلمه بشفاتي
ياعمري يا متاهاتي
قضيت الليل لعيونك
وانا ساهر
تعال اسهر انا وياك
تعال ارقد على صدري
اغني لك يااجمل قلب
تعال نرسم قلب داخل قلب
ونضحك للامل والحب

دفـى في يدي هذه المرة غيير عن كل مرة .. هذه المرة دفى الحـب ساكن احشائي .. نبض فارس احسه جريب لـ نبضي .. آآه .. يا ليته يضل معاي .. خلاص ما اباا الدنيا .. اباا بس اضل معاه في دنيا خالية من الناس ..
ما خرب علي صفو هذا الاحساس .. شـخـص في عمري ما اباا يكون هناا .. وقف قلبي بـ توقف جسمي في مكانه ..
وقف فارس و طالعني بـ حيرة ..
فارس : شبلاج الغالية ..؟؟


..::][ الحلقة العـشـرون / الفصل الأول ][::..

" أحبك هذا اعترافي الأخير أحبك ومدري معك وين المصير هي كلمة مافيها عذاب ولا نظرة تكفي من الكلام هي حب موجز هالحكي هي بعد أعذب غرام يمكن يكون هو أكبر جنون أو بسمة طفل حنون "

ما خرب علي صفو هذا الاحساس .. شـخـص في عمري ما ابااه يكون هني .. وقف قلبي بـ توقف جسمي في مكانه ..

وقف فارس و طالعني بـ حيرة ..

فارس : شبلاج الغالية ..؟؟
عيون : ....

انا موب حاقرته لا .. عيوني تدقق في ذيك الانسانة .. ابا اتأكد .. هذه هي لـو لا .. لما نزل الريال من السيارة تأكدت و يا ليتني ما تأكدت ..

رص ع يدي ..
فارس : عيون .. شفيج .. ؟!

......

" فــارس "
[ عند باب المستشفى .. 7:30 الصبح ]

حــيــرتـني .. شفيها .. طالعت عينها و مشت انضاري لـ المكان الي تطالعه .. أشـوف هناك .. لحظة ..!!!
هذه خالتي ام ســامر .. شوو تسوي هني ..

عيون : فارس .. أمـي هني ..
فارس : ما عليج الحين بـ اروح اشوف شو صاير ..

مشيت و انا مدري هي مشت وراي لـو لا .. بس لما وصلت سمعت صوتها من وراي ..

عيون : يـــمــه ..!!!

كانت بـ تركب السيارة بس وقفت .. نزلت ريلها و لفت جسمها .. طالعتني بعدها طالعت عـيـون ..

ام سامر : فارس .. عيون

عيون طاحت في حضنها و هي تصيح ..

اما آنه بقيت اطالعهم .. خالتي ام سامر .. انسانة الي يشوفها ما يقول يده .. اول ما شفتها تخيلتها احلام .. ما توقعتها بـ هذه الدرجة .. فيها شبه وايـد من أحلام .. قصيرة و ضعيفة .. ملامحها صغيرة .. تقولون في الثلاثين مو الأربعين .. قطع علي تفكيري .. صوت سـامـر ..

سامر : فــــــارس .. وين رحت ..؟!
فارس : معاك ..
سامر : شفيكم يايين هني .. عيون مريضة ..!!
فارس : هااه .. لا ما فيها الا الخير ان شاء الله ..

تقربت عيون مني .. مسكتني من ذراعي و عصت عليه .. تبي توصل لي شـي .. ما تباني اقــول لهم انها حامل لـو شووه ..

ام سامر : شصاير ..؟؟!!
فارس : لا خالتي بس عـيـون .. آآي ..

قرصتني في ايدي .. طالعتها و خزرت عليها .. هي لفت ويهها الجهة الثانية بـ غرور .. تبي تحرني ..

ام سامر : خير .. بلاج عيون ما تبينه يقول لنا ..؟
فارس : لانها حــامــل ..
ام سامر : حــــامــــل .. " رفعت يدها ع بوزها بـ تزغرت " كلللللللللوش ..
سامر : يـه .. بس يمه بس فضحتينا جدام خلق الله ..
عيون : يمه الكل يطالعنا بـ سببج ..
ام سامر : يووه .. شفيكم خلوني افرح بـ بنيتي .. تعالي يمه .. تعالي في حضن امج تعالي ..

طالعتني .. ابتسمت لها ..

 

[ضوى العيون]

خلتني و راحت لـ أمها .. حبتها في خدها ..

عيون : عسى الله ما يحرمني منج ..!
ام سامر : و لا يحرمني منج قولي آمين ..

غفران : آميــــــــن ..

عيون : غفراني انتي هني ..
غفران : ايه .. أمـو انا أأني ..
عيون : هههه .. تعالي يا بعد عمو انتين ..

حملتها و هي مبتسمة ..

سامر : يلا يمه نمشي ..
عيون : لحظة .. سامر ليش يايين هني ..
سامر : الوالدة داخت علينا .. يبناها هنيه ..
بـ خوف : شقالوا لكم ..؟؟!!
سامر : هبوط في السكر و شوي صداع ..
بـ همس : الحمدلله ..

ركبت ام سامر السيارة ..

ام سامر : يــلا عاد تأخرنــا ..
غفران : ما اباا الووح ..
سامر : شو ما تروحين .. تعالي غفران ..

يودت عيون من شيلتها ..

غفران : ما اباا
عيون : انزين .. خلوها عندنا .. بعدين بـ نييبها ..
سامر : لا ما يصير .. تعالي غفرانوو ..
غفران : مـــــا ابــاااا .. انت لووح لـ لهف .. " انت روح لـ رهف "
ام سامر : عيب غفران ما يقولون جيه لـ البابا .. و بعدين قولي ماما .. مو رهف ..
تصيح : ما ابااا .. ابا الووح ويا اموو ..
سامر : تعالي انتي .. باص الحضانة بـ يروح عنج اذا تأخرتي ..
غفران : ما اباا الـوووح ..
ام سامر : ما عليه .. تعالي حبيبتي .. بعدين بـ نوديج ..
برطمت : لهف ما تلضى ..
ام سامر : عنبوه .. هذه امج تقولين عنها رهف .. بـ ترضى .. انا بـ اقول لها .. يلا تعالي ..

نزلت غفران و ركبت يم يدتها ..

سامر : مع السلامة ..
عيون + فارس : الله يسلمك ..

....

" مـيـثـا "
[ المدرسة .. غرفة الصف .. 8:00 الصبح ]

همست لي : ميثوو .. شفيها شوق اليوم اشوفها تعرج ..
رديت بـ نفس مستوى صوتها : طقاها ناصر ..
سوسن : يووه .. ليش ..؟؟! اكيد رفعت صوتها عليه أو شي ..
ميثا : سالفة طويلة بعدين اقول لج ..
سوسن : يا خسااارة .. يا ليت شوق معانا في الصف ..
ميثا : لا الله يخليج .. يكفينا البنات .. بعد تييبين لنا شوق و هذرتها ..

المعلمة : ميثا و سوسن .. اييييه .. مسوينها حصة لعب و سوالف اشوف ..

بـ صوت خافت : ميثا الحين شو نسوي ما بـ نخلص من لسانها ..!

المعلمة : سوسن انتي من صرتين يم ميثا خربتيها .. من باجر ابا اشوفج مكان ليلى .. و ليلى تيين مكانها فاهمة ..

ليلى : ان شاء الله معلمة ..

سوسن توقف .. و تخلي يدها ع خصرها ..

سوسن : لا و الله .. هو كيفج تغيرين مكاني و توديني مكان ما تبين ..
المعلمة بـ قلة صبر : لا كيفج تصدقين .. أقول انثبري مكانج و خلينا نكمل الدرس ..
سوسن : افففففففف ..
المعلمة : و ما تسكتين بعد ..
سوسن : أوووه زين زين .. بس سكتنا ..

و تخلي يدها ع بوزها بـ طريقة خلت كل البنات يضحكون .. ما سكتوا الا بـ صرخة المعلمة ..

المعلمة : بــــــــــس ..!!!!!!!

.....

" عـيـون "
[ سيارة فارس .. 8:21 الصبح ]

يـــا ربــــــي بـ امووت من اليــووع ..

عيون : فارس .. يوعــانــة ..!!!!
بدون ما يطالعني : انزين ..

شووف .. هذا الي يقهر .. اقول له يوعانة .. يقول لي انزين ..
الي قهرني اكثر .. لف ع جهة البيت .. قلت يمكن ما سمعني زين من مساع ..

عيون : يـوعانة فارس ..!

طالعني بس ما رد عليّ ..

وقف عند البيت .. رديت بـ حيرة ..

عيون : فارس ..

بند السيارة .. و طالعني مدة .. قرب ويهه من ويهي .. و قال بـ ابتسامة ..

فارس : اباا آكل من ايدج ..
فجيت عيني : بس آنه ما اعرف اطبخ ..

باعد ويهه .. و فتح الباب ..

فارس : الي تعرفينه سويه ..

ابتسمت لاني تشجعت لـ الفكرة .. بس كفاية .. اهلي صج انهم ربوني ع الدلال .. اما الحينه ماشي دلال و دلع قبل .. آنه تزوجت و قريب أصير أم .. خلني افكر عدل .. قبل لا أضيع ..

......

 

[ضوى العيون]

" شــوق "
[ المدرسة .. الساحة ( الفسحة ) .. 10:15 الصبح ]

أمل : أمبييه .. شوق شوفي ريلج .. تخرع ..

رديت و انا اهمز ريولي ..

شوق : مافيها شــي ..
أمل : انتين بس شوفيها .. خضرة على زرقة على صفرة على حمرة ..
رديت أتطنز : قولي الوان قوس قزح و خلصينا ..
أمل : شووق .. بلا مصاخة و الله ما امزح .. يمكن كسر .. روحي المستشفى ..!!
شوق : ان شاء الله دكتورة امل .. بعد شي ثاني ..
أمل : أ.....

قاطعتنا ميثا ..

ميثا : السلام عليكم ..
الكل : و عليكم السلام ..

قعدت يمي .. فتحت البيبسي .. و قالت و هي تحرك العلبة يمين و يسار ..

ميثا : شلون ريلج الحين شوق ..؟!!
شوق : زينة ..
امل : لا مو زينة ..
شوق : نعم يا لساني البديل ..
امل : هههههه .. لا صج .. ميثا ودوها المستشفى ..
ميثا : قلت لـ زياد .. قال اذا ردينا من المدرسة بـ يوديها ..
امل : احسن ..
شوق : لا و الله .. تشتغلون محامين عن حقوق الضرب و التكفيخ ..
أمل و ميثا : هههههههههههههههههههههههههه ..

بـ أعرفكم على أمــل .. هذه رفيجتي و رفيجة ميثا المقربة .. أموت عليها .. شوي دبدوبة بس مو وايــد .. تحب الافلام الهندية لـ حد الجنوون .. اقول لكم لـ حد الجنون مو مزح .. الا صج .. ما تصدق على الله تشوف فلم هندي .. تنسى الدنيا و ما فيها ..

......

" مــريــم "
[ الشقة .. 10:30 الصبح ]

توردت بـ خجل ..

نزلت التلفون من بين ايديني .. خليته بين ريلي .. و مسحت دمعتي .. عسى ربي يخليك لي يا سلطان .. رفعت التلفون مرة ثانية .. خليته ع اذوني ..

سلطان : مـــــريـــــــم ..!!!!! وين رحتين ..؟!
مريم : معاك ..
سلطان : وين معاي .. من مساع لـ الحين اكلمج و انتي ساكته ..
مريم : ....
سلطان : هاا .. شفتين ..!
مريم : لا بس .....
سلطان : شنوو بس .. هممم .. مريم شرايج تتصلين لـ فارس .. تقولين له بـ نطلع انا وياج ..
مريم : مدري ..
سلطان : اتصلي له .. زين ..
ابتسمت : ان شاء الله ..
سلطان : مع السلامة حبيبتي ..
توردت : الله يسلمك ..

بس قبل ما اصكه .. سمعته ..

سلطان : اهتمي في نفسج ..
مريم : ههههههههه .. ان شاء الله .. مع السلامة ..
سلطان : الله يسلمج ..!

صكيته .. و مسحت دمعتي الي كانت ع خدي ..

.....

" عـيـون "
[ الغرفــة .. 12:05 الضهـر ]

شلت السجادة .. و رديتها مكانها .. فتحت الدريشة .. و قعدت عند حافتها .. أشــم الهــــوى .. رشـات من ريحة الياسمين الي مزروع تحت الدريشة تطرب شمي .. ضميت يديني مع بعض أحس بـ برد .. سندت راسي ع الدريـشـة .. و تنهدت .. رغــم الأرتيـاح الي ياني عن طريق معاملة فارس لـي .. بس هم مدري شلون بـ تأقلم مع لقب [ أم ] .. فـرحــانــة .. بس بعد حزيـنـة ..

سمعت صوت باب الكراج ينصك .. نزلت من الدريـشـة .. صكيتها .. و نزلت الستارة بـ هدووء .. لـ لحظة .. شفت علبة حمرة داخلها طقم الماس تتمرر جدام عيني .. وقفت عند محط انضاري و كأن الي حاملنها يبيني ايودها .. مسكتها بـ يديني الي بـ تتقطع من البـرد .. دافــــيــــــة .. بس مو العلبة لا .. اليــد الي مسكت يــدي بعدها .. لمعت في عيني دمعة لما باسني فارس في خدي و قال بـ كل حب ..

فارس : عيد ميلاد سعيد عُـيون ..

عـــيـــد مــــيــــــلادي اليـــــــوم ..!!!! .. ايه صح عيد ميلادي .. بس شلون عرف .. طالعته بـ عيون مليانة دموع .. تلاقت انضاري مع انضاره .. دموعي طاحت ..

مسح الدمــوع .. و خلى يده ع خدي .. طالعني بـ حنية .. ابتسامة .. شـوق .. و كأنه لـ أول مرة يشوفني .. دقات قلبي تزيد .. الهــــدوء عم في المكان .. ما عدى صوت دقات قلبي الي اضن ان اهل البحرين كلهم سمعوها .. و صـوت دموعي و هـي تنزل .. و من متى صار لـ الدموع صوت يا عيون ؟!
مدري .. محد يسألني الحيــن .. كفايــة أعــيــش في عــذاب عيونه ..

فارس : و ليش البجي الحين ..!!!!

باعدت ويهي و مسحت دموعي بـ كف ايدي .. ايدي و جسمي و عروقي الي كنت احسهم متجمدين من البــرد الحين صاروا أكـثـر من النـار من حرارتهم ..

خليت العلبة على التسريحة .. شلت الخاتم .. و لبسته .. طالعت يدي الي توجها الخاتم بـ نعومته .. و بعدها رفعت راسي اطالع فارس ..

 

[ضوى العيون]

عيون : مشكور فارس ..
ابتسم لي : العفو كل شي و لا الغاليين ..

نزلت راسي و تنهدت .. يلست ع السرير و انا امنع دمعتي انها تطيح ..

عيون : خايفة يا فارس ..

يلس يمي .. سحب يدي الي كنت مخبيتها بين ريولي .. ضماها في بحر ايده .. ضغط عليها .. و رد ..

فارس : من شو خايفة .. " سكت شوي " لا تخافين و آنه معاج ..

رفعت راسي ضليت اطالعه مدة .. بعدها رديت نزلته ..

عيون : و هــذا الي خايفة منه ..
بـ دهشة : خايفة مني آنه ..

بسرعة رفعت راسي و رديت ..

عيون : لا يا فارس .. لو شو يصير ما اخاف منك ..
فارس : عيل من شو خايفة ..
عيون : خايفة من هـ الزمن .. خايفة ...
فارس : ايه كملي ..
بعد تردد : خايفة ع الياهل الي بـ نييبه ..
فارس : الياهـل .. شبلاه .. ؟؟!!

شلت يدي من بين يده .. وقفت و رحت يم الدريشة .. مسكتها من حافته و قلت و آنه اطالع برع ..

عيون : حياتنا متقلبة .. يوم نكون مع بعض .. و يوم ثاني نتهاوش .. و الله يعلم شو النهاية .. ما تخاف ع الياهل الي بـ نييبه يعيش بدون ام او بدون ابو .. يعيش بين مطلقين .....
قاطعني : بـــــس يا عيون بــس ..
عيون : ....

وقف و يا صوبي ..

فارس : تتوقعين نتفرق بعد اليوم ..
نزلت راسي : .......

يودني من ذقني و رفع راسي ..

فارس : جاوبيني ..

طالعت الجهة الثانية بـ انضاري .. لان مسكته لـ ويهي كانت قوية .. حتى اني ما اقدر احركه ..

عيون : مدري ..!!!

حرك ويهي عسب تتلاقى انضارنا ..

فارس : لا تدرين ..
عيون : ليش اعلم الغيب ..؟؟
فارس : لا محد قال .. بس حنا الاثنين الوحيدين الي نقدر نحدد مصيرنا ..
عيون : لا مو حنا الاثنين بس ..
عقد حواجبه : ....

حركت ويهي عسب افلت من مسكة ايده .. فهم قصدي و شال يده .. طالعته شوي بعدين تكلمت ..

عيون : فارس .. ما تقول لي شلون تزوجنا ..

باعد ويهه و ضل يطالع برع ..

فارس : وصية المرحوم ..
عيون : ايه .. يعني تدري .. و هذا الشي حنا الي تحكمنا فيه لو عمي الله يرحمه .. !!!!! ما كان في يدي لا آنه " اشرت عليه " و لا انت .. ان نحدد مصيرنا ..
فارس : بس الحين غـيـر .. انتي حامل ..

خليت يدي ع الجدار .. عصيت عليه و كأني اباا افرغ كل حـرتـي فيه ..!

عيون : يعني هذا الي غيرك عليّ ..
فارس : قصدج تصرفاتي ..
عيون : .....
فارس : عُـيون .. لا تضنين مثل هـ الضن فيني .. بعد كل الي قلته لج تقولين ان تصرفاتي دليل على استسلامي لـ حملج .. اكيد لا .. تصرفاتي كانت نابعة من كل قلبي .. " طالعتها بـ نص عين " و الله عندج شك في هذا الشي ..؟!
عيون : ......

" لا ما عندي شك .. و لا عمره بـ يكون عندي شك .. "

بـ إصرار : عُـيون انتي تحبيني ..!؟؟!

فاجئني سؤاله .. ضليت اطالعه مندهشة .. رديت نضري لـ الدريشة .. احس البرودة ردت لي مرة ثانية .. شفايفي جمدت عن الكلام .. عاد عليّ سؤاله ..!

فارس : تحبيني ؟!

ابتسمت بـ خجل و نزلت راسي ..

عيون : مدري ..
فارس : لا تدرين .. انزين .. سـألي قلبج ..

طالعته و آنه رافعة حواجبي .. ادري فيه يتمسخر عليّ ..

فارس : فديتج عيون جاوبيني ..

وقفت و عطيته ضهري ..

عيون : انت شرايك .. ؟؟!
فارس : آنه ..
عيون : ايه انتَ ..
فارس : آنه مدري .. انتي الي جاوبيني ..
عيون : تبي الصراحة ..
فارس : ايه اكيد ..
عيون : أكــــــررهـــك ..!!!!!

ما شفت رده .. بس هو وقف .. زخني من ذراعي و لفني .. خلاني مقابلته و اطالع عيونه .. كنت اباا اتضحك عليه .. بس كتمت ضحكتي ..

عيون : شبلاك تطالعني جيه ..
فارس : تكرهيني !!!
عيون : أيه ..
فارس : بس انتي ....

 

[ضوى العيون]

ما قدرت و انفجرت اضحك .. فارس قرصني في خدي و هو شاب نار ..

فارس : تتمسخرين عليّ هاا ..
عيون : .... > ( أضحك ^_^ )
فارس : عيديها مرة ثانية و بـ اجتلج ..
عيون : تسويها مو بعيدة عليك ..
خزر عليّ : عُـــــــيــــــون ..
عيون : يووه .. بس بـ اسكت ..

قعدت ع السرير و بعدي اضحك .. قعد يمي و كان مبتسم .. مسكني من ايدي ..

فارس : شو بـ تسمين الياهل ..
طالعته بـ نص عين : يمكن تطلع بنت ..

يرف ايده لـ السما ..

فارس : يـــــــا رب ..
عيون : ههههههههههه .. ليش عاد ما تبي ولد ..
فارس : اذا كانت بنت اكيد بـ تطلع قـمر مثل امها ..

انسدحت ع السرير .. و انا اضحك ..

عيون : بـ اسميها هممممممم .. شـهـد ..
فارس : و اذا ولد ..

عدلت يلستي ..

عيون : مدري ..
فارس : شرايج في عيسى ..
عيون : همممم .. لا وايد ثقيل .. بس مو كأن بدري ع الأسامي ..
فارس : ههههههههههههههه .. انزين .. جاهزة لـ بكرة ..
عيون : ليش ..؟!
فارس : عرس العنود ..
ضربت جبهتي : ايييييييه .. نسيت ..
فج عينه : يعني ما اخذتي لج شي ..
عيون : امبلى اخذت .. ما تتذكر من المجمع الي في الريف ..
فارس : ايه صح ..
عيون : و انت ما اخذت لك ..
فارس : لا اخذت لي .. لـ عرس العنود بدلة .. اما لـ عرس مريم ثوب و غترة اماراتي ع رغبة سلطان ..
عيون : ايه صح لان سلطان من الامارات .. يبي يرد لـ ايام قبل ..
فارس : قومي تجهزي .. بـ نتغذى برع ..
فرحانة : صج !!!!
فارس : ايه صج ..

عفدت ع كبتي فتحته و طلعت احلى ما عندي ..

.....

" زيــــاد "
[ المستشفى .. 2:10 الضهر ]

الممرضة : رض بسيط و ان شاء الله بعد شهر نشيل اللف ..
شوق : بــل .. شهر وااايـــــد ..
الممرضة : ههههههههه .. ما عليه .. استحمليّ ..
زياد : يلا شوق نمشي ..
شوق : يلا ..
زياد : مشكورة ..
ابتسمت : العفو .. هذا الواجبّ ..

طلعنا من الغرفة و ميثا مخلية يدها ورى ضهر شوق و تمشي .. ركبنا السيارة .. ركبت شوق جدام و ميثا ورى ..

زياد : بس تدرين تستاهلين ..
تخزر لي بـ عينها : ليش بـ الله ..
زياد : علشان مرة ثانية تعفسين في اغراض غيرج ..
شوق : شسوي هذه من ميثا ..
تصرخ : لا و الله ..
شوق : هيه منج انتي ..
ميثا : الحين انا الي قلت بـ اشوف الصور لو انتي ..
زياد : و انتي يا ميثا هم غلطانة .. تروحين تعلمينها بـ السالفة ليش ..

تتسند ع الكرسي ..

ميثا : شسوي بعد .. ما اقدر اربط لساني ..
زياد : هههههههه .. ربطيه مرة ثانية .. موب أي شي تروحين تقولينه ..
ميثا : ان شاء الله ..
شوق : الا زيوود كم عمرك الحين ..
زياد : اصغر عيالج انا ..
فرت بوزها : استاذ زياد كم عمرك الحين ..
زياد : هههههههههه .. ايه جذي ابيج .. عمري 22سنة ليش تسألين ؟؟
شوق : و ناصر اكبر منك بـ سنة .. صح ؟؟!
زياد : تقريبا سنة و نص .. لان باقي عليه 5 اشهر و يدخل الـ 24 ..
شوق : اييييه .. انزين زياد .. متى بـ تتزوج ان شاء الله ..
زياد : وش تستفيدين يعني ..
شوق : مليت .. ع الاقل زوجتك تصير ويانا في البيت تونسنا شوي ..
زياد : و منو قال لج اني بـ اسكن معاكم ..
نطت ميثا : عيل وين بـ تسكن ..
زياد : باخذ لي شقة و بـ اسكن فيها ..
شوق : بـ نسكن وياك انا و ميثا .. صح ميثا ..!!
ميثا : أكـــــيــــــد ..
زياد : انا بـ اروح في شقة علشان افتك منكم تيون معاي .. لا بـ الله رحت ملح ..
ميثا : ههههههههههه .. عيل تخلينا ويا نويصر ..
زياد : ليش هو وحش ..
شوق : لا سبال و يحب يكفخ ..
زياد / ميثا : ههههههههههههههههههههههههههههههه

.....

" مريم "
[ الصالون .. 4:30 العصر ]

مريم : عُــــــيـــــون .. مكياجج روووعة ..

و هي تحط يدها تحت عيونها و تعدل شوي من المكياج ..

عيون : صج ..
مريم : ايه واايد ..
عيون : و انتي متى بـ تحطين لج مكياج ..
مريم : بعد هيفاء ..
عيون : أي لون فستانج .. ؟!
مريم : بنفسجي .. و انتي احمر صح ؟!
ابتسمت : ايه احمر .. و هيفاء ..؟!
مريم : مدري .. يمكن أخضر زيتي .. لان الشدو الي حاطينه لها زيتي ..

هيفاء طلعت من غرفة المكياج .. الكل فج عينه يطالعها ..

هيفاء : شفيكم تطالعوني جيه ؟!

اكتفت بـ ابتسامة ..

هيفاء : يلا مريم .. دورج ..

وقفت و دخلت الغرفة .. شافتني الفلبينية و ابتسمت .. رديت لها الابتسامة .. و يلست ع الكرسي ..

.....

 

[ضوى العيون]

" عـيـون "
[ الصالون .. 4:35 العصر ]

اطالع مكياجي في المنضرة .. رفعت شوي من شعري عن ويهي .. تسريحتي خفيفة بس حلوة .. صبغت خصلات من شعري أشقر .. سويت في الخصلات المصبوغة حلزونات .. و ردوهم لي ع ورى .. لموهم ع خفيف بـ ورود لونها أحمر ..
لـ الحين ما لبست فستاني .. مريم و هيفاء حملوا فساتينهن .. و بـعدين بـ نروح مع بعض بيتنا.. بـ نبدل هناك بعدين بـ نروح القاعـة ..
قطع عليّ تفكيري ..

هيفاء : طالع المكياج عليج حلو رغم انه وايد غامج و ثقيل ..
ابتسمت لها : ايه .. قلت لها تخفف الاحمر .. بس هي ما تفهم لا عربي و لا انجليزي .. مللتني ..
هيفاء : ههههههه .. " ابتسمت و قالت " الله يخليج لـ فارس ..
رفعت ايدي لـ السما : و يخليه لي يــاا رب ..
هيفاء : هههههههه .. كل هذا حُــب ..

عفدت صوبها ..

عُيون : و أكثر ..
هيفاء : اول ما ييت من الامارات انتي و فارس مع بعض ما تنيازون .. و خصوصا لما طقاج انا شكيت قلت يمكن هذا سامر مو فارس ..
ابتسمت : صج ..
هيفاء : هممم .. يعني ما اشوفكم مثل الحين .. قبل حتى ما تتكلمون مع بعض الا نادراً ..
عيون : صح كلامج .. " اخذت نفس " بس الحين كل شي تغير ..

طلعت مريم ..

مريم : شرايكم ..؟!
هيفاء : حــ ......

قرصتها ع ريلها و غمزت لها بـ عيني ..

عيون : موب حلو ..

فرت ويهها لـ المنضرة و تمت تدقق فيه ..

مريم : صج .. اقول لها تعيده لي ..
عيون : ههههههه .. بـ العكس وايد حلو و ناااعــم ..
ابتسمت و هي رافعة حواجبها : ههههههه .. جذابة .. هيفاء شرايج فيه .. ؟؟!
هيفاء : حلو .. " تطالعني بـ نص عين " بس انا احلى ..
عيون : هههههههههه ..

......

" العنـود "
[ الصالون .. 7:30 الليل ]

ما تصدقون شقد فرحااانة .. بـ أطير من الفرح .. اليــووم عرسي .. و راشـد بـ يصير لي آنه و بس ..

ياا يمي ولد اخت راشد .. اخذ يسحب في طرف جلابيتي .. قلت لـ الكوافيرة توقف .. نزلت راسي له ..

العنود : نعم حبيبي ..
ابتسم بـ ببراءة : تقول لث الماما خلثتين ..
ضحكت : لا ماما باقي شوي ..

مشى عني .. رفعت راسي .. و كملت الكوافيرة شغلها ..

شوي و يت ليلى اخت راشد الوحيدة و هي حاملة مايد ولدها ..

ليلى : يقول لي ما خلصتين ..

ارفع خصلة من شعري ..

العنود : باقي شوي ..
ابتسمت لي : ما شاء الله .. و الله و عرف اخويه يختار ..
ابتسمت لها بـ خجل : تسلمين ..
ليلى : يسلم غاليج حبيبتي ..

خلت ولدها ع الكنبة .. عمره سنة و 7 اشهر الحينه .. و هو ولدها الوحيد ..

فتحت شنطتها و طلعت منها تلفونها .. اتصلت يمكن ع ريلها .. بـ اكلمكم شوي عن ليلى .. هي اخت راشد الوحيدة .. ما عنده راشد غيرها .. كان عنده اخو مات في حادث .. ليلى متزوجة إماراتي .. يت قبل خطوبتي بـ اسبوعين .. و بعد الخطوبة بـ اسبوع راحت الامارات مع زوجها .. اما الحين توها قبل اسبوع ياية .. و بـ تمشي من هنيه بعد 4 أيام ..

ابتسمت لي الكوافيرة ..

الكوافيرة : كملنا ..

وقفت .. و رحت يم المنضرة .. حلوة التسريحة .. ما اعرف اشرحها لكم .. بس الصراحة وايد ناعمة .. عيبتني .. و خصوصا اني صبغت شعري بني غامج ..

دخلت ليلى توها مكملة من التلفون ..

ليلى : بـ تصلين ..؟!
العنود : ايه ..
ليلى : توضيتي لو لا ..
ضحكت : لا توضأت قبل ما أبتدي التسريحة ..
ابتسمت : الغرفة الثانية لـ الصلاة ..

اكتفيت بـ ابتسامة .. دخلت الغرفة .. كانت هناك ام راشد تقرأ قرآن .. صليت و شلت السجادة ..

تطالعني ام راشد و دموعها متجمعة في عينها ..
تقربت منها .. حبيتها ع راسها .. و حضنتها .. ضليت اصيح و هي تصيح .. ليلى دخلت و وقفت عند الباب .. تمسح اثر دموعها الي طاحت و هي تطالعنا ..

رفعت راسي من حضنها ..

ام راشد : الله يخليج ..
نزلت راسي : و يخليج لي ..

الحينه آنه احمد ربي الف مرة .. الله عوضني بـ ام ثانية غير امي الي توفت .. تنهدت و رحت يم غرفة المكياج ..

يلست ع الكـرسي .. طالعتني البنت الي تحط المكياج و ابتسمت ..

.....

 

[ضوى العيون]

" عـيـون "
[ سيارة فارس .. 8:25 الليل ]

اتصلنا لـ فارس .. ياا لنا .. آنه , هيفاء و مريم .. كلنا متغشين لان مكياج و كان شوي ثقيل .. طبعا آنه ما عندي غشوة .. فـ اخذت طرف شيلتي و رفعتها ع ويهي ..

ركبت السيارة ..

الكل : السلام عليكم ..
فارس : و عليكم السلام ..

كان مشغل شريط موسيقى هادية .. السكوت عم المكان .. ما عدى همس مريم لـ هيفاء .. مدري عن شنو كانوا يتكلمون .. لاني جدام ..

وصلنا .. بس فارس ما نزل .. قبل ما انزل .. همست ..

عيون : فارس ما بـ تنزل ..
فارس : بـ اروح اشوف منين بـ يطلعون الزفة ..
عيون : بـ تتأخر ؟!
فارس : ع 9 بـ اييكم ..
عيون : تسع واايد ..
فارس : شسوي بعد ..
تنهدت : انزين .. مع السلامة ..
فارس : الله يسلمج ..

نزلت و صكيت الباب ..

دخلت البيت .. هيفاء فصخت عباتها و مريم نفس الشي .. يطالعون نفسهن في المنضرة المعلقة في نص الصالة ..

عيون : ثيابكن يبتونهن ..
مريم : ايه اكيد ..
عيون : بسرعة عيل لا نتأخـر ..

قبل ما اروح وقفتني هيفاء ..

هيفاء : عيون ..
عيون : آمري حبيبتي ..
هيفاء : ما يامر عليج عدو .. بس وين غرفة التبديل ..
عيون : عند الدري ..

ابتسمت و مشيت .. دخلت الغرفة .. فصخت عباتي و شيلتي .. فتحت كبتي .. طلعت فستاني .. أمبييه .. شلون البسه الحين .. احسه وايد عاري .. و فارس اكيد ما بـ يرضى .. اتذكر لما اخذته كان بداية زواجنا و كنت ما أواطن فارس .. اخذته عناد له .. بس الحين ..

البسه و امري لـ الله .. بدلت ثيابي .. لبسته و وقفت قبال التسريحة اطالع نفسي ..

صج انه شوي عاري .. بس وايد حلو .. لونه احمر .. فيه خيط ينربط في الرقبة .. قصير لين الركبة .. و من ورى طويل .. و مفصل جسمي تقريبا .. الحمدلله اني توني حامل .. " خليت يدي ع بطني " ما فيني حتى بطن ..

يلست ع الكرسي الي مقابل التسريحة .. فتحت الدرج .. شفت في ويهي الطقم الي عطاني اياه فارس .. ابتسمت و تذكرت امس .. رفعته .. و طلعت الطقم الي تحته .. لبست السلسلة .. و الخاتم .. التراجي كانوا وااايد كبار حسيت اذوني بـ تنجلع .. لبست السويرة .. طالعت نفسي و ابتسمت .. مثل ما قلت لكم تسريحتي وايد بسيطة .. كنت مرفعة شعري علشان ما يطلع من الشيلة ..

شلت الربطة و طاح شعري ع كتفي بـ تسلسل .. عدلته لانه شوي اعتفس يم الحلزونات .. طالعت نفسي و ابتسمت ..

فتحت كبتي .. و طلعت الصندل .. يلست ع المرتفع الي يفصل الغرفة و غرفة التبديل لانهم متداخلين في بعض ..

دخلت ريلي الاولى في الصندل .. و انفتح الباب .. " فارس " ..

بدت دقات قلبي تزيد .. بس ما بينت هذا الشي .. تميت ارفع الخيط و فارس واقف يطالعني .. آنه بقيت منزلة راسي أطالع الصندل .. ارفع خيط خيط بـ يد ترجف من الخوف .. رفعتهم لـ ركبتي .. شلت الصندل الثاني و نفس الشي .. وصلت لـ الركبة .. و ربطته ..

قلبي زاد في خفقانه ..

وقفت بس بعدي منزلة راسي .. اول مرة البس جيه جدام فارس .. رفعت راسي .. بس طالعت نضراته .. ما فهمتها .. كان عاقد حواجبه و هـو يطالعني .. ما قدرت استحمل اكثر .. كنت بـ اتخطاه و بـ اطلع من الغرفة .. بس هو مسكني من ذراعي و وقفني قباله .. طالعني من فوقي لـ تحتي و بعدها ايده ميودة ذراعي ..

بـ اشمئزاز : بـ تروحين جيه ..؟!!

" صخيت شوي بعدين رديت "

عيون : ايه ..

سحبت ذراعي .. و رحت لـ السرير .. شلت عباتي و شيلتي ..

لبست العباة .. بعدها رفعت راسي و طالعته .. بعده واقف مكانه يطالعني بـ نفس النضرات ..

عيون : فارس .. شفيك تطالعني جيه ..؟!

سكت مدة و بعدين تكلم ..

فارس : بدلي الي لابسته ..
عيون : شـنـو البس ..؟!

صرخ علي صرخة خلتني أغمض عيني و اشهق ..

فارس : ما يهمني .. المهم ما تطلعين جيه ..

دمعت عيوني بس تداركت الموقف و مسحت دموعي قبل ما تخرب مكياجي ..

حقرته .. لان صج ما عندي رد .. من صجه .. شـنـو البس !!!!!

فصخت عباتي و شيلتي .. علقتهم .. و يلست ع التسريحة و دموعي تطيح .. فصخت الخاتم بـ عصبية .. و رميته .. و السلسلة بعد و التراجي و رميتهم ع التسريحة و آنه بعدي اصيح ..

تقرب مني ..

فارس : شفيج ؟؟! آنه قلت بدلي ملابسج ..

شفتي ترتجف اباا اتكلم بس موب رايمة .. سكت و هو يطالعني من منضرة التسريحة .. نضراته تذبحني .. شكله معصب ..

صرخ عليّ : ما تسمعين ؟!
رديت و آنه اصيح : امبلى اسمع .. مانيب رايحة .. وصل مريم و هيفاء ..
فارس : أستينيتي ..
عيون : ايه استينيت زيــــن ..

حوطت ويهي بـ ايدي و اخذت اصيح ..

رد علي و كأنه يباا يهديني ..

فارس : ما عليه روحي فيهم .. بس لا تصيحين ..
عيون : .... " ما شي رد "
فارس : بس عيون .. خلاص لا تصيحين .. قلت لج ما عليه ..
صرخت عليه و دموعي تطيح : مو هذا الي يصيحني .. الي يصيحني معاملتك لي و كأني ياهل ..

طالعني بـ حنية بعدها ابتسم .. تقرب مني و باسني في خدي ..

فارس : يلا عُـيـون اخرتينا ..

 

[ضوى العيون]

مدري ليش بقيت جامدة اطالعه .. يطالعني .. بعدين طلع .. توني منتبهة لـ نفسي .. نقزت .. طالعت ويهي .. يــــــا ربـــــي .. اخترب المكياج .. بسرعة .. لبست شيلتي و عباتي ..

بس قبل ما امشي .. رديت و لبست الطقم الي رميته .. ركضت .. فتحت الباب و طلعت من البيت ..

ايييه .. مريم شكلها معصبة .. ركبت جدام ..

مريم : جان بقيتي ..؟!
عيون : ....... " ماشي رد "
مريم : اكلمج ؟!
فارس : بس مريوم ..

ما سمعت صوتها .. صخت ..

.....

" هيفاء "
[ سيارة فارس .. 9:15 الليل ]

احس الجو متكهرب بين عيون و فارس .. احساسي يقول جيه .. من البداية شاكة في علاقتهم .. بس بعدين لما شفتهم لـ آخرة مرة .. قلت يمكن قبل كانوا متضايجين من شي ..
بس الحينه ردوا .. و شكلهم متناجرين ..

همست لـ مريم ..

هيفاء : مريم ..
بـ نفس صوتي : هلااا ..
هيفاء : شلون تزوجوا عيون و فارس ..؟؟!

سكتت شوي و بعدين ردت ..

مريم : شلون يعني ما فهمت ..
هيفاء : بس خلاص ..
مريم : شصاير ..

عُـيون : شفيكم من مساع لـ الحينه تتكلمون بـ صوت واطي ..

مريم : هاااه .. لا و لا شي .. بس تسألني وين القاعة ..

قرصتها في ركبتها الجذابة ..

مريم : آآآي .. " بـ صوت واطي " شبلاج ؟!
نزلت صوتي : جذابة ..
رفعت صوتها : ما غيرج جذااب ..

عيون : يعني مريوم جذااابة .. تجذبين عليّ ؟؟!

مريم تخلي يدها ع بوزها و تطالعني .. آنه ضحكت ..

.....

" ام سامر "
[ القاعــة .. 10:00 الليل ]

ام سلطان : وييه .. فديتها بنيتي لـ الحين ما يات ..

التفت لها ..

ام سامر : عيون هم ما يات و لا مريم ..
ام سلطان : مو جنهن صيفوا ..؟!
ام سامر : مدري فيهن ..
ام سلطان : اتصلي فيهن يا خويتي .. طمني قلبي الله يطمن قلبج ..
ام سامر : قطيعة .. منين اتصل لهن ..
ام سلطان : منين بعد .. أحلام و رهف عندج ..
ام سامر : اييه صدقج .. اقول لـ رهف ..

و الله انها بنت خير .. من طريت اسمها كانت جدامي ..

رهف : خالتي عيون يات لو لا ؟!
ام سامر : لا لـ الحين ما يات .. اتصلي فيها ..
رهف : زين سألوا هيفاء أو مريم .. ثنتينهن كانوا معاها ..
ام سامر : لا الحينه كلهن ما يَـو .. اتصلي لهن ..
رهف : ان شاء الله ..

راحت يابت تلفونها .. تقربت منا و تلفونها في اذونها ..

رهف : السلام عليكم .. شلونج هيفاء ؟! .. الحمدلله بخير .. ايه بخير .. الا وينكن تأخرتون .. اييه .. ننطركن .. ان شاء الله .. لا الطابق الرابع .. ايه ايه .. بعد الكوفي شوب .. يووه .. غفران عند الباب .. الله يخمد بليسها .. طفرتني .. ييبيها معاج .. ههههههههه .. مع السلامة ..

ام سامر : هااه وينهن ..؟!

ابتسمت و يا محلى ابتسامتها ..

رهف : عند باب القاعــة ..

....

" هيفاء "
[ باب الفندق .. 10:07 الليل ]

نزلت من السيارة .. مريم مشت جدامي و هي ترفع فستانها لانه كان وايد طويل و يطلع من العباية ..

مشيت لما وصلت لـ باب الاستقبال في الفندق .. أوووه .. نسيت تلفوني .. رديت بسرعة لـ السيارة .. فتحت الباب .. كانت عيون تصيح .. بس ما انتبهت لا هي و لا فارس لي .. قلت لكم ان صاير شي بينهم .. علاقة زواجهم مدري .. احساس يجيني فجأة احسه زواج غريب .. متقلبين مدري شلون ..

فارس : الحين ما تقولين لي شلون بـ تنزلين و انتي تصيحين ..
تصيح : كيفي .. انت ما لك خص فيني ..
فارس : و الاخير معاج .. كنت معصب و اعتذرت لج .. شتبيني اشوي يعني .. احب ريلج يا ست عيون ..
عيون : ........ " تصيح "
فارس : مسحي مكياجج علشان محد يلاحظ انج تصيحين .. و نزلي بسرعة اخرتيني ..
عيون : مانيب نازلة .. ابااا اروح البيت ..
صرخ عليها : عُــــيـــون .. لا تصيرين ياهل ..
تصرخ عليه و هي تصيح : ما غيرك ياهل ..

آنه طلعت و صكيت الباب ..

 

[ضوى العيون]

" مشيت بـ خطوات ثجيلة .. بعدين سمعت صفعة باب السيارة وراي .. لفيت .. كانت عيون .. من شافتني نزلت الغشوة على ويهها ..

ابتسمت أونـي مدري بـ شي ..

هيفاء : يلا تأخرنا ..!
عيون : ...... " ماشي رد "

مشيت .. و هي مشت وراي .. وصلنا لـ القاعة .. كانت مريم عند الباب .. شافتنا ابتسمت بعدها دخلت ..
دخلنا .. بس قبل ما يشوفونا .. سحبت عيون .. و اخذتها غرفة التبديل ..

فصخت عباتي .. و هي هم فصختها .. تصدقون فستاان عيون مرة عيبني .. وايد حلو و ناعم .. بس موب كأنه شوي عاري .. ما عليه خلها تستانس بـ حياتها قبل ما يطلع لها بطن و تتحسر مثل أحلام ..
فصخت شيلتها بس فرت ويهها الجهة الثانية .. راحت لـ المنضرة .. اخذت كلينكس و مسحت كل مكياجها ..

هيفاء : ليش مسحتيه ..
عيون : هاااه .. لا بس وايد ثقيل ..

طالعتها مدة .. بعدين فتحت شنطتي .. طلعت منها علبة مكياجي الصغيرة ..

هيفاء : تبيني احط لج ..
ابتسمت : يا ليت .. الي تحطينه انتي احلى ..
هيفاء : ههههههههه .. انزين .. يلا تعالي ..!!

حطيت لها .. ما شاء الله عيون حتى بدون مكياج حلوة .. قلت بـ اقول لها عنها و عن فارس .. بس صخيت لما شفتها تضحك ..

طلعنا و تلقتنا ام سامر و أمــي .. ليش تأخرتوا .. و و و و ..
حافظين الاصطوانة ..

ام سامر : وييه .. عيون شـنو لابسة .. ؟؟!
عيون : فستان بعد شنو ..
ام سامر : ما قال لج شي فارس ..
عيون : هااه .. لا ما قال شي ..

كانت مرتبكة .. مشت بعد هـ الجملة اونها بـ تروح لـ مريم ..

هيفاء : آنه بعد بـ اروح ..
ام سلطان : وين ؟!
هيفاء : وين بعد .. مع عـيون ..
ام سلطان : انزين .. روحي .. بس بعد جيه نص ساعة تغشوا .. لان راشد و العنود بـ يوصلون ..
ابتسمت : ان شاء الله ..

ردت ليّ الابتسامة .. مشيت و آنه رافعة فستاني .. لانه واايــــد طويل .. بس ناعم .. يعني موب مثل فستان مريم ..

دمعت في وحدة مارة يمي ..

.... : آآآه ..
هيفاء : السموحة خيه .. ما انتبهت ..
.... : لا عادي ما صار شي ..

بس لما رفعت راسي و طالعتها.. حسيت نفسي منهااارة كليا .. و هـي مثلي يمكن صدمتها اقل من صدمتي .. آنه وقفت صنم ما اتحرك .. اطالعها .. لا هذه هــي .. متأكدة هذه هــي ..

في هذا البارت يمكن تلاحظون تغير كبيــر في الأسلـوب .. ما اباا الابطال هُـم الي يوصفون حالهم .. صح ان في هذا الاسلوب .. تتصور مشاعرهُـم .. احساسيهم بـ شكل أفضل من الرواية العاديـة .. بس لما قارنت بين كتاباتي .. في رواية الابطال و في روايتي انا .. اشــوف ان الاسلوب الافضل في الي انا ارويـه ..
بس انتقاداتكم مطلوبــة .. و أتمنى تشوفون لي الأفضل .. لأني عن جد زهقت في أختيار الأسلــوب الصــح و الأحسـن ..

 

[ضوى العيون]

" الحلقة العشـرون .. الفصل الثانــي "
تطالع الحرمـة الي وقفة جدامها .. تحس بـ الصدمة تسري في عروقها .. متأكدة هذه هـي .. هذه ليلى زوجة جاسـم .. و و و .. بنت خالته .. ايه هذه هي الي فضلتها ام جاسم عليّ ..

واقفة و دمعة تتلألأ في عينها .. بس تخونها في هذه اللحظة ما طاحت .. الا بقت معلقة .. تنطر العاصفة الي بـ تهزها .. و بـ تطيحها بـ براكين من الدموع ..

هيفاء و ليلى .. عنصريـن .. في شخص واحـد .. ليلى الانسانة الي كانت محيرة لـ جاسم .. و هـي بنت خالته .. بس جاسـم ما حس بـ أي شعور يجمعه معاها .. رفض هذا الشي .. و تزوج هيفاء و خلاهم جدام الامر الواقع ..

عمرها امه ما سكتت .. دمرت حياتهم و حولتها جحيم .. لما صار الشي الي تبيه .. سلطان تدخل في الموضوع و خلى اخته تطلب الطلاق .. تزوج جاسم ليلى ..

بس الشــي الغامض الوحيـد في حياتهم ..
" الياهل .. مايد" منين ياا و ليلى ما تييب عيال ..؟!!

غمضت عينها و أخذت نفس عمييق .. فتحتها و كانت تتمنى لو هـ الدمعة تطيح .. بس خانتها .. تمت واقفة .. غمضت عينها و تنفست بـ صعوبــة .. تباا تصرخ .. " ماشي أوكسجين "

خلاص يا هيفاء الاوكسجين نفذ .. ما عاد في أوكسجين .. حست بـ دوخة في راسها .. تداركت الموقف في الوقت المناسب و مسكت حافة الكرسي الي كان عدالها ..

ليلى : أ أ أنتي هــيفاء ..

ما ردت .. لا موب مطنشتها .. الا لسانها صاير ثقييل ..

حركت ريلها بـ صعوبــة .. و مشت وهي نفسها ما تدري وين رايحة .. دعمت في وحدة ثانية .. تنهدت و صكت ع اسنانها .. منوو الي بـ تفجعني الحينه ..

" هيفاء .. بنيتي بلاج ..؟! بسرعة العنود و راشد بـ يوصلون و انتي بعدج .. "

أستوعبت الصــوت .. هذه ام سامر .. انفجرت و كأنها من سنة ما بجت .. طاحت في حضن خالتها .. دفنت راسها و نثرت دموعها ..

الكل واقف يطالعها ..

من جهة ثانيــة .. ليلى مسندة راسها و تسمع بجي هيفاء .. تتمنى لو كانت لها القدرة انها تبجي مثلها .. غمضت عينها .. نزلت ع الأرض .. سندت راسها ع الجدار .. و أنين هيفاء يترنح في أذونها ..

" ماما ... ثوو فيث تثيحين "

فجت عينها .. و دموعها تنزل بـ جموود ع وجنتها .. ابتسمت ابتسامة صفرة ..

ليلى : ما فيني شي ماما .. وين يدو ؟؟! .. روح لها ..
مايد : مانيب رايح .. اباا بابا ..

وقفت ع ريلها .. مسكت يد ولدها .. و رفعته لها بـ كل ألم .. حضنته .. عصت عليه .. شعرها طايح ع ويهها .. و مغطي نص ويه مايد ..
دموعها غرقت شعره .. ويهها .. و كل أحاسيسها انفجرت في هـ اللحظة ..

//
//

نزل ريله من سيارته بـ هدوء .. ما يباا ايي .. يحس نفسيته مخنووقــة .. " نزل الريل الثانية و تنهد ".. شلون اجابلها الحيين ..
يحس السبب الي خلاه يتهاوش معاها كانت تاافه .. و وااايد بعد .. بس ....

بشار : يا ريال شبلاك ..؟!
فارس : لا سلامتك مافيني شي .. يلا تأخرنا ..

بشار كان يطالعه و هـو عاقـد حواجبه ..

فارس : بلاك تطالعني جيه ..
بشار : انت فيك شي اليوم ..؟!
فارس : اناا !!!!!! ..
بشار : لا الطوفة .. انت في حد غيرك واقف هنيه ..

سامر : يلا بسرعــة ..

فارس : انزين يلا تعال ..

يطالع فارس و هو رافع حواجبه ..

فارس : شبلاك انت اليوم استينيت ..!؟
بشار : انت الي بـ تينني ..

يودني من ايدي و سحبني ..

بشار : اقول تعال .. و ما بـ تهرب .. بـ اعرف كل السالفة ..

وقف مكانه .. و سوى حركة بـ ايده ..

بشار : بس بعدين ..

فارس حرك راسه .. أونه موب مهتم .. مشوا بعدها .. بس أكيد ما بيـدخلون القاعـة ..

ليش يايين عيل .. نوقف برع .. ؟؟

اذا كانت القاعة في فندق .. هو الفندق طابق واحد منه .. فيه قاعتين و حواليهم مطاعم ..

يلسوا فارس و سامر و بشار ع طاولـة .. شوي و بشار مدري وين رايح .. المهم ..
تقريباً كل الي كانوا يقولونه عن الشركة و المشاريع اليديدة و الصفقات ..

" بـــاااابــاااااااا "

تلقاها حضن سامر ..

سامر : ههههههههههه .. يا عيون بابا انتي ..

يلست في حضنه .. تلعب بـ اصابع ريلها .. فارس و سامر جيه يتكلمون عن مشروع في الشركة و عن ايجابياته و سلبياته .. شوي و تكلمت ..

غفران : بابا تبيك الماما ..
سامر : توج متفيجة قايلة ..

تحك راسها بـ طريقة تضحك ..