* السلام عليكم ورحمة الله وبركاته*
(الحمدلله الذي اطعمني هذا الطعام ورزقنيه من غير حول مني ولا قوة)
*بما اني جبت طاري الورد..حبيت اهدي كل من تدخل موضوعي هالورود الحلوه..تقبلوها مني حبيبااتي*
هالعيش يابنااات اتعب وانا اقول لذييذ
وسهل..مايبيله شطاره
نكهة ماي الورد وحلاوة الكشمش البسيطه مع الدجاج والنخي..رووووعه..
والله ما امدح طبااخي.. بس الي راح تجرب هالطبخه راح تتاكد من كلامي
ما ابي اطول عليكم
نبتدي بسم الله الرحمن الرحيم
اول شي بكوب او قلاص كبير تحطين ماي ورد لي نص الكوب ( المج)
وعقب تضيفين كمية من خيوط الزعفران وملعقة اكل من بهارات الدجاج هاذي( اذا مو متوفره تقدرين تحطين اي بهار للدجاج عندج .. او اي بهارات ثانيه مو شرط )
ونص ملعقة اكل من بهارات السفينه (بهاراتي المفضله )
ونضيف نص ملعقة اكل كزبره مطحونه وربع ملعقة اكل فلفل اسود وربع ملعقة اكل هيل مطحون وربع ملعقة اكل كمون مطحون وربع ملعقة اكل كركم
وملعقة اكل معجون طماط
نضيف كل البهارات الي ذكرناها والمعجون على كوب ماي الورد بهالشكل ونخلطهم عدل
ونخلي خليط ماي الورد على صوب لحين الحاجه له.
نغسل الدجاجه وننقعها بشوية ليمون وطحين وخل لمدة ربع ساعه تسحب اي زفره فيها
عقب نقطعها لثمان قطع ونسلقها بالماي مع بهارات صحيحه ( مسمار+كمون+ كزبره+ فلفل اسود، دارسين+ هيل+ البهار الصيني الي على شكل نجمه ريحته خنيه) وكل البهارات الي ذكرناها بكميات بسيطه+ فصين ثوم صحيحين.. وطبعا ما ننسا نملح ماي السلق.
نخلي الدجاجه تنسلق لمدة 20 دقيقه وعقب نطلعها.
بجدر نحط كميه زينه من الزيت ( الزيت المعقول يعطي الاكل نطاعه وما يصير ناشف) ونحمس بصلتين كبار مقصصين صغار.
واذا تشوقر البصل ضفنا الثوم عقب ما نقصصه حلقات صغيره وكميه زينه من الزنجبيل المدقوق.
اذا ابتدا الثوم يتغير لونه شوي نضيف خليط ماي الورد على حمسة البصل والثوم
ونحرك نخلي الحمسه تتشرب الخلطه..
وراح يكون معاج البصل بهالشكل
طبعا كل شغلنا على نار متوسطه اقرب للهاديه..
خمس دقايق.. ونضيف حوالي كوب من النخي وكوب من الكشمش( الزبيب) وطبعا الكشمش نكون منقعينه لمدة نص ساعه بماي دافي قبل لا نضيفه.
وانصحكم بهالنوع من النخي..حيل حلووو..عن تجربه
نحمس..نخلي البصل والثوم يمتزجون بالنخي والكشمش..وعقب نضيف قطع الدجاج الي سلقناها
مع شدة كزبره مقصصه ورشة ملح حسب ذوقج ورغبتج..ونحرك
نخليه على النار لمدة عشر دقايق..مع تقليبه بين فتره والثانيه وراح يكون معاج بهالشكل واللون الحلوو الي يشوق..
وتكونين حبيبتي مغسله عيشج ( الرز ) ومنقعته بماي دافي لمدة ساعه وعقب تسلقينه بماي سلق الدجاج ثلاث ارباع الاستواء..وتديرين بالج لاتسلقين العيش حيل..نبيه شبه مستوي بس.
نبتدي نضيف العيش فوق خليط الدجاج والنخي والكشمش الي تشرب نكهة ماي الورد.
ليما نوصل لوجه العيش ..نضيف عليه جم قطعة زبده ..تعطي طعم ولون للعيش..
ونسكره عدل بالقصدير ..او اي فوطه وقطعة قماش نظيفه..نخليه على الجوله لمدة نص ساعه يستوي على نار هاديه من البخار..لاتفتحينه قبل مرور نص ساعه.
هني كالعاده..لازم اقلب الجدر للنجاب.. وانصحكم حبيبااتي..استخدموا جدور التيفال..حيل مناسبه لطبخ هالنوع من العيوش..الي تكون فيه حمسات او خلطات بقاعة الجدر..
وتفضلوا..احلى عيش ودجااج..انشالله تسونه وتاكلونه واتنطعون فيه..
لو تكرمتوا يا خواتي الغاليات..لحد يرد بكمل تنزيل الصور..
