عنـدج خـدامـة ؟ متى يبتيهـا بأي ظـرف ؟ و شنو شغلها بالبيـت !! فيدونـا

[^^yasmina^^]

حبيبتي انا يبت خدامه لاني موظفه وماقدر اجابل بنتي وولدي من شغل البيت يعني ماقدر اوفق بينهم
فشسوي
انا وحدة احب اطبخ وعشان اكون صريحة وياج ماحب شغل البيت نهائيا لان ابيت امي وايد كنت مدلله وايد معتمده علي امي وابوي والخدامه
ولما تزوجت توهقت بس الصراحة شلت مسؤلية البيت والزواج وسبحان الله هذا شي فطري بالمرا احب بيتي علطول انظيف الملابس اول باول تنغسل

المبي طلعت برا الموضوع من قرقتي
انرد لموضوعنا
انا عيالي وغسيل الملابس لان الخدم مايعرفون للطهارة والنياسه والطبخ
هذيله علي

والخدامة الغسيل والتنظيف والاوتي ومرات مرات اعتمد عليها علي بنتي العودة بس مو دايما لاني وحدة مو النوع الي ماحب اخلي عيالي عند الخدم

وعندي احسن جنسيه السيلانيه صج انهم وصخين بس اذا وقفتي فوق راسهم اوكي وبعدين حنونين عاليهال


وانصحج اذا ما عندج عيال لا اتيبيين خدامه
حلو تاخذين راحتج اكثر مع ريلج

 

[ضحاوي الديره]

كان عندي سيلانيه يابتها لنا خالتي ام زوجي اول ماردينا من شهر العسل
لان شقتي كبيييييييره حيل وعندي دراسه وتزوجت صغيره كنت 19 سنه
مهمتها كانت الغسيل والتنظيف والترتيب وبسسس اما الطبخ من تحت لان ساكنه ويا حمولتي

وقبل شهرين طلبت هنديه عشان حامل وابيها تجابل البيبي لمن اكون بالكليه
والسيلانيه عطيتها لخالتي

 

[رق رق]

انا عن نفسي ، يبت بعد ماحملت بالشهر السابع ، عشان اعلمها شغل واشوفها زينه ولا لا ويمديني اييب وحده اذا مو زينه.
وبعد ماولدت ، الخدامه دورها اتنظف البيت الا غرفه النوم مالتي لان شي خاص فيني وااعتقد راح اتنظفها مثلي.
وتظرب ملابس . اما الغسيل احطهم بالغساله ، بس ملابس بنتي اي اتغسلهم ابايدها ، ومن ناحيه الطبخ ، في اكلات انا اطبخها لان ريلي بس يحبها من ايدي ، وفي اكلات اهي اتسويها يعني اعطي راحه حق نفسي ، وطبعا لاااازم بعد ماارتاح من الدوام ايي اجيك علي الصاله والمطبخ والحمام ان نظيف عدل ، واشوف اذا في اغبار ولا لا،
والغدا اسويه بليل قبل ماانام ،

 

[تبطي عظم!]

انا جبتها لمن حملت وكنت بالخامس

انا موظفه وكنت ارد تعبانه ما اقدر انظف. كانت تصعد تنظف وتغسل مواعين

وتنزل وكل الباقي علي كان

ارتب غرفتي واغسل الملابس واكوي

ومن ولطت خليت شغل البيت كله عليها وانا مقابله البيبي اهي بس تنتبه له وقت غياابي فقط ومن اجي يخلص دورها معاه

 

[أم توتو]

ههههه يحليلج فوفو انا ماعندي خدامه ولا افكر اجيب لاني مو موظفه وعيالي كبار الله يحفظهم وبيتي شقه لنزلت بيتي الجديد افكر اجيب ولا لا

 

[وآحشنــي زمآنـك]

عندي سيلانيه جبتها أول ماولدت ..

صج اني مو موظفه بس مو معقوله بطبخ بغسل الملابس بكوي بنظف البيت ومسؤوليه البيبي وبقابل زوجي وبكشخ وين بيكون لي خلق



والرجال يبي كل شيء على سنقه عشررره

 

[روزماري]

انا مآ عندي خدآمة بس اهل زوجي خدآمتين وخآلتي مآ تقصر من آول ما تزوجت دآيم تطرشها لي تساعدني فآحس كأنها خدامتي يعني الحمدلله مآ عندي شغل واذا وصل البيبي آنشالله يمكن اجيب خدامة يمكن لا لان اللي عندنا ثنتين ودآيم عندي

 

[جنون الهوى]

ما عندي خداامه
مومحتاجتهاااا لاني مو متوظفه ما عندي الا بنوته
بس اذا زوجي عازم ربعه عندي اضطر اجيب خدامه من خدامات اهلي اللي بيتهم جنب بيتي​

 

[Model Look]

انا يبت خدامه امي لي بعد زواجي بشهرين

وانا ساكنه بيت حمولتي تطبخ لي وتنظف داري وحمامي

وطبعا البيت كله يطرشها عااادي يعني تساعد خالتي عادي

 

[ملكه نفسي]

أنا اعرف وحده عز المعرفة

عندها 4 عيال

وعندها 6 خدامات

الأربع كل وحده شايله جــاهـل

ولها خدامه ولزوجها خدامه. تقول اهو يبي يريح راسه

دائم مسافر بحكم شغله واهو اللي جاااب الخدم

بس أنا اللي محيرني شكو جايب له خدامه حقه بعد؟؟؟

مرات افكر اقول ياكيرحظها هههههه ومرات افكر فيها عدل اقول خبال وقله سنع

 

[مذهــلــه]

انا صارلي 4 شهور الا اسبوع

ماعندي خدامه وماافكر الحين اييب الا اذا حملت ممكن بالاشهر الاخيره

انا وجودهم مااحبه بصراحه بس اذا كان في طفل احس لازم تساعد بشغل البيت

بالنسبه لي اذا يبتها راح تستلم غسيل المواعين و الاوتي ملابس البيت الطلعه انا اسويهم وهذا طبعي من بيت اهلي

وتستلم تنظيف الشقه ماعدا غرفه نومي وحمامي الخاص والطباخ علي مااحب اكل الخدم

الجنسيات اللي رحومات عاليهال السيلانيات والهنديات

 

[حبوبة الأطفال]

موظفة + اطفال = خدامة

الي اقصده

انا موظفة وعندي ولدي فلازم خدامة تقعد عنده لما اروح الدوام ... وهذا اهم حاجة لي ولما ارد قلبو يكون معاي

ما احب الخدم وما احب اعتمد عليهم ... ياربي لازم أنظف بعد تنظيفهم الي شقول بس

والطبخ نووووو ويييي ممنوع بس غسيل المواعين

وبس

 

[شيخه_البيض]

ماعندي خدامه ولا افكر اييب خدامه حتى لو يبت عيال

خدامه حمولتي قايمه بشقتي وانا فوق راسها


القعده عند الحموله لها محاسن واااايد

 

[بدوية بملامح كشميرية 86]

عندي خدامه

وجبتها وكان عمر ولدي ٣ شهور

وانا موظفها. وحيييببل نفعتني

 

[سوزي الشرقية]

اني توني حامل الله يثبته لي يارب ووممنوعه من الحركة يعني التنظيف وغيره
يعني حدي حركة خفيفة جدا ومع ذلك مافكر اني اجيب خدامه ماحب الخدم
وبالنسبة حق زوجي اكيديقدر ظروفي الي امر فيها الأن يعني اني اغسل الملابس وهو ينشرهم ويكيهم ويكنس المكان ويغسل الحمام وتقريبا كل شيء

 

[Patcholli]

نعم عندي وبحكم اني موظفه وادرس بنفس الوقت لازم يكون عندي خدامه تساعدني وتعاوني عشان لا يكون في اي تقصير فبيتي

 

[boliana_q8]

انا ماعندي خدامة واشكثر بجيت وحنيت وذبحت عمري ولا راضي ايبلي
بيصيرلي سنتين من تزوجت
وانا طالبة وموضفة بنفس الوقت
شغل البيت ياخذ وقت
ابي خدامة ترتبلي شقتي
تغسلي ملابسي وتكويهم
ابي شقتي تلق وتلمع
ابي ارجع من الدوام الفالي لقمة اكلها
مع العلم اني ساكنة بيت اهل ريلي
بس خدامتهم ماتجيس عود حقي
انا حياتي كلها مخربطة موعارفة ارتب نفسي
احس الزواج صاير شوي حمل ثقيل
ماعندي وقت اكشخ حق ريلي

الخدامة وجودها بيريحني وايد
انا ما أأيد انها تنام بشقتي
اذا يابلي بخليها عند خدم خالتي
بس ان شاءالله يرضا ويريحني

 

[عنووشه]

انا اول زواجي ماجبتها

كنت انظف بنفسي الشقه ومرات استعين بخدم اهلي


بس حملت ووصلت السادس طلبت خدامه لانه تعب حامل وتنظفين وتطبخين حيييل تعب

 

[ام كوثر2007]

بالنسبه لي يبت الخدامه قبل ولادتي بأسبوع

وقعدت عندي ست سنين بالضبط وراحت والحين يبت غيرها .

الجنسيه فلبينيه طبعا .

وانا اساسا ما احب احد يطبخ غيري يعني يايبتها لتنظيف البيت

انا اللى اطبخ وانا اغسل حق عيالي واسبحهم اهي ما تدخل مع اي احد من اليهال ولا تمسكهم اصلا .

وانا احط الهدوم بالغساله لانه احب اني اطهر الملابس بيدي

وهي مجرد عليها الكوي .

يعني بالعربي انا يايبتها تعيني بشغل البيت لانه ما اقدر اجابل كله بروحي خصوصا اذا كانو عيالج وايد وفوقهم ياهل عوود .. اللى اهو الزوج .

 

[أم يزيد &سديم&]

انا حاليا ما عندي خدامة
حبيبتي إذا ع البيبي شوفيلك حضانة في الجامعة
تمسكه والله يسهل كل عسير بالتوكل