عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[جاي الضحى]

يا حلوهم البنات إلي يحبون يسولفون عن سوالف أول ويحبون يسمعونها. :ggdw:
:33_1185028183:​

 

[الصابرة المحتسبة]

صبحكم الله بالخير والكرامه وياعل ربي يسهل دروبكم ووفقكم ويبعد عنكم عيال الحرام ويسخرلكم عيال الحلال ويسمح طريقكم آآآآآآآآآآمين يارب العالمين.

 

[الصابرة المحتسبة]

لا مالت على الكويت ولا على شيوخها ولا على حكومتها ولا على شعبها وعسى العدو ما ياليهم والدم ما يجسيهم والسامع يقول آآآآآآآآآآآآآمين.

 

[الصابرة المحتسبة]

من ألعابنا بعد:- الدزة وهي نفس الحجلة=الحيله......... بس يكون معاها صخره مربعه ندزها برجولنا.
- والصبيان = عظيم ساري, المقصي, التيل(الطنب......الخ) , عنبر, هدوا المسلسل.
والبنات يحبون يقلدون الكبار يعني يتجمعون وهذي تصير أم وعندها بنية والثانيه تعزمها وتحطلها الغواري والفناجيل طبعا كلها ألعاب.
ونحب قبل ناخذ أعواد البرد لي خلصنا منها ونلفها بأي شي وتصير نفس العروسه ونلعب فيها.

 

[حيادر]

لا مالت على الكويت ولا على شيوخها ولا على حكومتها ولا على شعبها وعسى العدو ما ياليهم والدم ما يجسيهم والسامع يقول آآآآآآآآآآآآآمين.

ااااااااااااااااااااااااااااامين :ggdw:

صبحج الله بالنور والسرور والحبور

شلونكم بنات

مخي مقفل الحين لووووول ماميش حجوة تقند الراس :dddds:

ليما اقعد من النوووم
ذيج الحزة انهد بالقرقة لوووووووول

 

[الصابرة المحتسبة]

ديرتنا ديرة خير وخيرها على القاصي والداني والكويتيين راعين الأوله وراعين فزعه .......... بقولكم سالفه وعساني ما انقص منها والسموحه منكم..... أيام الغوص لما كانوا الكويتيين بديره ماأدري بالضبط وين يالهند يمكن وصاهم ناس كانوا هم تجار وداشين بحر ان يوصلون معاهم بنيه لأهلها بزنجبار طبعا الكلمه اللي تطلع من النوخذه مثل الوعد لا ورقه ولا تعهد ركبت البنت المركب والمركب كله شباب بأحلى عمرهم وراعين همه لااله الاالله , ولا احد قرب عليها ولا حتى يرفع عينه صوبها لي جا حزة الغدا ولا عشا حطولها الصينيه من بعيد ما يقربون كلش...... وتدرون بطول الطريج والسفر المهم وصلوا ديرة البنت ولا الناس متجمعه وأهلها ناطرين بنيتهم لا ومزهبين خيمه علشان يكشفون الحريم على البنيه جانها بنت ولا .... طبعا النوخذه خايف وحاط ايده على قلبه اهي بأمانته وتدش البنت الخيمه والعيون كلها على الكويتيين ما خلوهم ينزلون من المركب إلا لما تخلص الحريم ويطلعون الحريم ................ ولا التيبب والفرحه ان الحمدلله البنت ما فيها شي والنوخذة يستانس وأهل البنت والناس يحبون خشم النوخذه ويرحبون وهلون........ شفتوا اشلون أهل الكويتأهل الكويت عند الشدايد ايد وحده وبين معدنهم الأصيل الله لا يفرقهم آآآآآآآآآآآآآآآمين.

 

[Q8_QT]

أهليييييييييييييييييين وسهلييييييييييييييييين
شـــلــــونـــــكــــــــم بـــــنــــــات
حبيبتي الصابرة ياحلو سوالفج ذكرتينه بألعاب أول الله يذكرج بالشهادة وسمحيلي أضيف عليهم
لعبة طاق طاق طاقية رن رن ياجرس مادري إذا تعرفينها - وقعت الحرب - صباح الخير ياجدتي - وهالألعاب مشتركة صبيان وبنات يلعبونها
والبنات أذكر كنا نلعب بروي ، وكنا نلبس نفانيف كشخة جنه احنا أميرات وكل وحدة تختار لها اسم شخصية ونلعب ، وهم أذكر كنا ناخذ بوشية يدتي الله يطول بعمرها يارب ونربطها بشعورنا عشان يصير طويل ونستااااانس صج أيااااام
وبــــــس ســـــلا مـــــتـــــكـــــم و تـــــعـــيــــــشـــــــون

 

[الصابرة المحتسبة]

ياصباح الخير والنوير والحب والأعياد والأفراح لديرتنا الحبيبه الغاليه الدانه الكويت

 

[الصابرة المحتسبة]

أهليييييييييييييييييين وسهلييييييييييييييييين
شـــلــــونـــــكــــــــم بـــــنــــــات
حبيبتي الصابرة ياحلو سوالفج ذكرتينه بألعاب أول الله يذكرج بالشهادة وسمحيلي أضيف عليهم
لعبة طاق طاق طاقية رن رن ياجرس مادري إذا تعرفينها - وقعت الحرب - صباح الخير ياجدتي - وهالألعاب مشتركة صبيان وبنات يلعبونها
والبنات أذكر كنا نلعب بروي ، وكنا نلبس نفانيف كشخة جنه احنا أميرات وكل وحدة تختار لها اسم شخصية ونلعب ، وهم أذكر كنا ناخذ بوشية يدتي الله يطول بعمرها يارب ونربطها بشعورنا عشان يصير طويل ونستااااانس صج أيااااام
وبــــــس ســـــلا مـــــتـــــكـــــم و تـــــعـــيــــــشـــــــون

هلا يالشيخه : ياحلات أيامنا وبرائتها صج مو كل يوم نشتري لعبه بس طعم اللعبه اللي تنشتريها بالعيد غيييييييييير.
والله ذكرتيني يوم نلبس ملابس ونمثل الأميرة والملكة ياحلاتها من أيام.

 

[الصابرة المحتسبة]

أول لي صارالعيد وين نروح؟؟؟؟؟؟؟؟؟ نروح ملاهي الأنوار اللي مكانها ألحين التقدم العلمي وبذيج البراحه ونركب الحصن والسيارات ونااااسه لها طعم .......... وعند الباب مصور حاط خشبه عريضة ونصعد عليها ومن ورا مثبت عليها خشبه ملبسه بزوليه مشجره وفيها وروود (يعني خلفيه) ويعطينا لي بغينا نصور مزهريه فيها ورد صناعي.

 

[الصابرة المحتسبة]

-أول ماشاالله لااله الاالله العشره دنانير تكفي وتزيد للفرضه ومشترى السمج واللحم والدجاج.
- وطلعة البر ما تكون قبال البيوت وعند المناطق نخيم بالسالمي ولا الحمض, ونكون جماعة والخيام اشكثرهم ونروح نفقع هالزبيدي اشحلوه يالله من فضلك( فقع ديرتنا غير) , وهالعرفج انجمعه ونشبه وريحت الدخنه اتونس وماعندنا لا بقيات ولا غيره نلقى درام طايح ونحط فوقه حطبه مستطيله ونلعب عليها بنيه من صوب والثانيه من الصوب الثاني, والصبيان يلعبون عظيم ساري والكبار يتمشون وبالليل نتجمع حوالين النار ونسولف ونتسامر واللي عنده غطايه ولا سالفه ضحك والصغار بالخيمه نايمين وشابين لهم السراج ابو غاز , وخيمة الصباح أحسن شي.
- ونتزاور عند أهل البدو اللي يكونون دايم مخيمين ومن سكان البر ماشالله عليهم أهل نخوة وكرم لي أقبلنا عليهم احلفوا علينا إلا نتغدى ولا نتعشى على طول اذبحوا هالطلي اللي لحمه ابيض اللي ما ياكل الا العشب لا علف ولا غيره وعلى العيش ذاك السمن الأصلي .
- ولا الإلبا ياحلو طعمها .

 

[Q8_QT]

-أول ماشاالله لااله الاالله العشره دنانير تكفي وتزيد للفرضه ومشترى السمج واللحم والدجاج.
- وطلعة البر ما تكون قبال البيوت وعند المناطق نخيم بالسالمي ولا الحمض, ونكون جماعة والخيام اشكثرهم ونروح نفقع هالزبيدي اشحلوه يالله من فضلك( فقع ديرتنا غير) , وهالعرفج انجمعه ونشبه وريحت الدخنه اتونس وماعندنا لا بقيات ولا غيره نلقى درام طايح ونحط فوقه حطبه مستطيله ونلعب عليها بنيه من صوب والثانيه من الصوب الثاني, والصبيان يلعبون عظيم ساري والكبار يتمشون وبالليل نتجمع حوالين النار ونسولف ونتسامر واللي عنده غطايه ولا سالفه ضحك والصغار بالخيمه نايمين وشابين لهم السراج ابو غاز , وخيمة الصباح أحسن شي.
- ونتزاور عند أهل البدو اللي يكونون دايم مخيمين ومن سكان البر ماشالله عليهم أهل نخوة وكرم لي أقبلنا عليهم احلفوا علينا إلا نتغدى ولا نتعشى على طول اذبحوا هالطلي اللي لحمه ابيض اللي ما ياكل الا العشب لا علف ولا غيره وعلى العيش ذاك السمن الأصلي .
- ولا الإلبا ياحلو طعمها .

ئي والله حبيبتي ذكرتيني بالبر أول ياحلوها من أيام
ليلحين أذكر الصندوق الحديد كانت أمي تترسه لنا حلاو وكاكاو ونوديه ويانا البر وطبعا مانطلع بروحنا العايلة كلها
وكل اسرة خيمة وفي خيمة مخصصة حق الطباخ وحق القعدة لرياييل والحريم وهم كنا تزاور بالخيام
كان البر يونس شحلوه أخضر من العشب مو نفس الحين وأحلى وقت بالليل خصوصا لي نورت القمرة أبيييييييييييه
الجو عجيييييييييييييب واحنا متيمعين حوالين الفحم نتدفى وحاطين الكستن نشويه حده ونااااااااااسة

 

[الصابرة المحتسبة]

يازينها من ايام .

 

[الصابرة المحتسبة]

-أذكر قبل لما تطفي الكهربا نروح معمل الثلج ونشتري قوالب الثلج وكان كل منطقه تقريبا فيها .
- وكنا نبلل شراشفنا بالماي وننام بالحوش ونقعد نعد النجوم وكانت تقول أمي الله يحفظها ويحفظ والديكم : لا تعدون النجوم بعدين يطلع بدينكم ثواليل.
- ولما يجي رمضان طبعا قبل كانت حزته الله يشرفه بعز الحر والرمضا كنا نستحي نفطر جدام أهلنا فنروح ننخش وناكل يالقيمات ولا باجي الكاستر بالجدر, وامي تعطيني صينيه فيها اللي يقسمه ربي ووديه لجيرانا وهم يردولنا بصينيتهم وماشالله السفره تنترس والخير واجد, ورا الفطور هالبخور ودهن العود واللي تغسل وتبخر وتزهب لصلاة التراويح وأذكر ناخذ معانا القهوه واللقيمات حزة صلاة القيام ياحلات ليالي رمضان.... اهو يعود وعساه يعود علينا بصحه وعافيه.

 

[الصابرة المحتسبة]

أحلى وأطيب صباح لديرتنا الحبيبه الغاليه الكويت يا صباح الأعياد والأفراح.............

 

[الصابرة المحتسبة]

- طق يامطر طق بيتنا جديد مرزامنا حديد.
- البنيات مكثرهم ماي الورد يرشرشهم, الصبيان مكثرهم عين الله تحرسهم.
- شوط شوط يالبطه...... يانعنبوا من حطه....... ماحطته إلا سويره ........ وسويره راحت البر..... تجيب العيش الاحمر..... وتحطه بالصواني .... على جية خوالي ....... خوالي يا دلالي.... يامعيضدي وهلالي ......... أمي تناديني تبي تحنيني.... في ملة الصيني.... صيني على صيني ... يارب تهديني وروح بيت الله .... واشوف حبيب الله..... قاعد على سيادته وجات الغزاله ونادته.
- السبت سببوت .... والاحد عنكبوت .... والاثنين بابين.... والثلاثه مناره.... والاربعا ابشاره...... والخميس نذبح ابليس... والجمعه عيدنا وعيد الرسول.

 

[الصابرة المحتسبة]

ياعساها أمطار خير وسقيا على ديرتنا الحبيبهالكويتوعسى ربي يحفظها آمين يارب العالمين

 

[الصابرة المحتسبة]

عيدي يا كويت يا أحلى بلد:q8:

 

[m0nm0n]

يحلو كلام اول وللة خوش موضوع

 

[الصابرة المحتسبة]

هذي الكويت صل على النبي