عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[daloola]

ياهلين وسهلين صبربر

اليوم اليمعه وكل من لاهي لااله الا الله
مايمدي تسوين شي

شخباركم وشلون الزواير

 

[الصابرة المحتسبة]

هلا دلولا بخير عساج بخير
اورنجية وجويهه شلونكم؟

 

[orangeya]

هلا وغلا بالغاليين...

اهلين صبربر،،، انا بخير ياعساج بخير

نشاطاتي قلت عن قبل

ادري اني مقصرة بس والله لاهيه شوي ووعد من افضى شوي بتربع واجابلكم

كلمات ما قمت اسمعها نفس قبل :

حريمتج = حامض على بوزج = بالمشمش

معتازة = محتاجة

فتريها = عيليها = سرعيها شوي خل تخلص بسرعه

ريّض = تو الناس ... تقريبا هالمعنى

حِسْ = صوت

لا تصّيفين = لا تبطين = لا اتأخرين

ماعلمتج = ما قلت لج مو يعني ما درستج لوووووووول

عالهبنش او عالهبني (مادري اي وحده فيهم صح) لول :dddds: = عالفاضي

لي قضيت = لما اخلّص

غبيّت عنج = خشيت عنج



لو بتلاحظون اغلبهم اذا مو كلهم كلمات حيل عاديه ’’’ بس صج فقدتهم ! صرت ما اسمعهم نفس قبل !

 

[daloola]

اي صاجه اورنجيه
خالتي كل تقول : ماقضيتي؟ يعني ماخلصتي

امس انا مسيره سمعت وحده تقول ( من الدوداه) استغربت الكلمه!!! اثاري معناتها من التدوده
انتو تقولون دوداه؟؟


شلونج جويهه وشلون الوالده؟
صبربر هاو ار يو؟ بنروح المغرب المباركيه انا وابو العيال .. بسئله جان يدل راعي اللبن
جولي وينها من غير شر

 

[الصابرة المحتسبة]

هلا هلا يابنات ياعذارى
اورنجية اي نقول لي فضيت ولي قضيت نفس المعنى
ويقولون الأولين حذفة عصى يعني مامن بعد
دلولا الله يهداج تهدم هالدكيكين الصغير وراح مع اللي راحوا.

 

[الصابرة المحتسبة]

هلا هلا يابنات ياعذارى
اورنجية اي نقول لي فضيت ولي قضيت نفس المعنى
وليلحين نقول حريمتج والله ماعطيج اللي تبينه إلا لما تسوين اللي ابيه.
ويقولون الأولين حذفة عصى يعني مامن بعد
دلولا الله يهداج تهدم هالدكيكين الصغير وراح مع اللي راحوا.

 

[جاي الضحى]

مساكم/ صبحكم الله بالخير كويتياتنا،

ولهت عليكم. الحمد الله انكم بخير وعافية.

سئلت عنكم العافية. أمي هالايام أحسن الحمد الله.

منو تشرح الفرق بين كلمة حِسْ وحسس؟

دلوله الدوداه؟! ما قط مرة علي. نعرف "من المدووداه" أو "من التتووده" أو "من التدوديييه".

منو سامعه بحفرة العبجل قبل بشرق؟

يالله بزيد على الكلمات البسيطه إلي قامت شوي شوي تلاشى:

مقصمل

منشنقل

تمخمخ
تمخمخنا يعني كبرنا و صار مافينا شده.

جولي عساج بخير؟!​

 

[الصابرة المحتسبة]

هلا جويهه شلونج وشلون الوالدة
يابنات ياحلوات وينكم؟
مقصمل =قصير عليه
حس =الصوت

 

[جاي الضحى]

هلا والله صبربر؛

أنا بخير وعافيه عساج انتي باحسن حال. :eh_s(7):

شكلنا كلنا طلعنا عرضي من الموضوع هاليومين. ههه

جكيت خطأ مطبعي أنا كتبت منشنقل يوم قريتها قلت شنو منشنقل؟!! الكلمه اهي مشنقل وين أفندييا اهي إلي تجك بدلياتي الكتابيه!​

 

[daloola]

صباح الخير

شلونكم كلكم وشخباركم

جويهه مشنقل نفس مقصمل = قصير
مخمخ = لين
حس قالتها صبربر ( الصوت )
حسس : هذا اللي ايي حق اللي بالنفاس يعور بطنها ( توة يايني ) اذا كانت مو بجر يعني عندها من قبل

عيل تعالي قولي لي شنو يعني هميج
وشنو يترطرط وآخر شي شنو خميعي ... لووووووووووووووووووول

صبربر هاو ار يو ... شخبارج

اورنجيه بسئلج ...تعرفين شيسمون المكسرات قبل ؟ احنا لي الحين نقولها

جولي شلونج؟ وينج من غير شر؟

 

[أمواج البحر]

يا حلات هالموضوع انا ويني عنه @@

اعشق الحجي الكويتي وريلي يسميني العيوز هههههههههه

دلوله عادي اتليقف واجاوب ... يترطرط يعني مدندل خخخخخخخ او او يهتز وييي مو عارفة اوصل المعنى

نفس لما يقولون هالعيوز يلدها مترطرط! هههههههههه خوش تشبيه

واحب كلمة قريَب بدو (شده على الياء) يعني ماني مباعده

وووو اطلق رويلاتي ... يعني امشيهم واتحرك

مزهلق او متزهلق ... مسنع و متنسع و متزكرت

لي عوده بحيل الله

 

[أمواج البحر]

قاعده اقرا الموضوع وانا متشققه من الوناسه ^_^

:* بوسه لكم كلللللللللللللللللللللللللللللللللللللكم

 

[الصابرة المحتسبة]

هلا ومسهلا بخواتي
هلا أمواج العين لج أوسع من المكان
جويهه ودلولا واورنجية شلونكم حبايبي

 

[orangeya]

السلام عليكم ,,,

شلون احلى بنات باحلى منتدى؟

جويهه جكيتج بس مامداني أعدل البدليه لوووووول

دلوله حبيبتي نشدتيني جاني اعرف شيسمون المكسرات قبل ؟ اللي اعرفه قروضات

صبربر انتي شمعه الموضوع ،، فقدنا الغطاوي ؟؟؟

جولي وينها من غير شر ؟ مالها حِِس أبد؟! يارب يكون المانع خير




حيا الله موجتنا (امواج) يا هلا ويا مرحبا ,,,


قاعده افكرلج بنك نيم ندلعج فيه بموضوعنا ... طلح معاي ميجووو ! مادري ليش لول

اذا مو يايزلج مجموجه ,,,, امويجه احلى شي على وزن جويهه شرايج؟ :dddds:

يلا بنات يبتلكم جم حجوة ...

عرفي المصطلحات التاليه :

e7baaach

lahaaat

sarsoof

rbayaay




والحين اترخّص ياجماعه ،،،

حافظكم الله

 

[الصابرة المحتسبة]

هلا اورنجية اليوم جايبة لنا حجي معوكس افرنجي ههه

الغطاوي ابشري يالغالية

بنتنا بالصندوق وصوتها بالسوق؟

 

[daloola]

يا هلا ومسهلا امواج البحر ( امويجة على قولة اورنجيه )
شخباركم كلكم

اورنجيه : صاجة قروضات
بدعتي باسئلتج
ليش كاتبتهم جذيه ...بالموت عرفت اقراهم
حباج : اللثه بس من ورا اللي صوب الخدود
لهات : سقف الحلج
السرسوف : تحت الحجاب الحاجز (ساعات جبدج تعورج يقولون لج هذا سرسوف)
والكلمه الاخيرة ماعرفت اقراها غميضة

صبربر : ماذكر الحل بس سامعتها...صبروا علي لي باجر

 

[الصابرة المحتسبة]

السلام عليكم
طلعت لهات ههه الكبر زين
دلولا شلونج وشلون العيال؟؟
اورنجية الكلمة الأخيرة مو رباية على وزن ربادي يمكن؟؟؟

 

[قلبين وسهم]

خووووووووووش موضووووووووووووووع

يعطيـــــــــــــكم العافيــــــــــــــــه بنااااااااااات

بالتوفيــــــــــج


​

 

[جاي الضحى]

قوه يا بنيات وحريمات؛

دلوله هميج هذا العيش اللين؛ ههه أنا مو من ربع العيش الهميج أنا من عشاق العيش النثري. انتي شتحبين؟
ما عرفت خميعي؟! شنو يعني

تعالي دلوله الحسس مو بعد يعني إن أحد يرد الصوت بالبيت؟!

يا حيا الله مويجه ههه. حلاة دنياج يا السنعه. هذا الحجي ولا بلاش.

صبربر شلونج يا الغاليه صج انج شمعه الموضوع. الله يعطيج العفو والعافيه.

أفنديا شخبارج؟ صج القلوب عند بعضها أنا أقول أفنديياه شلون ما جكت بدليتي. أمبيه تذكرين يوم كنت بقول عصيده جان اكتبها صعيده. مو شي كتابتي بالعربي بالكمبيوتر. سامحوني. شنو الكلمه الأخيره? كتبيها بالعربي عفيا. بس صج خوش نقوة كلمات تبارك الرحمن.

قلبين وسهم حياج الله.

جولي لج فريه. إن شاء الله تكونين باحسن حال.

كلمات تخص البحر دامه قيض علينا ووقت بحر السيف واليال



وبذكركم بقطاية صبوره تقول:

بنتنا بالصندوق وصوتها بالسوق.


في أمان الله​

 

[الصابرة المحتسبة]

السلام عليكم
هلا جويهه عسى ربي يوفقج دنيا وآخرة
بنياتنا شلونكم؟