السلام عليكم .. شلونكم كويتيات ؟ ان شاء الله كلكم تكونون بصحة و عافية يارب
انا اليوم استلمت نتيجة تحاليلي و طلعت عندي نسبة فيتامين د 4 و المفروض تكون بين 20 و 40.. يعني عندي نقص واااايد
بقولكم انا شنو الاعراض اللي فيني و بشنو كنت احس و اذا في وحدة نفسي خل تروح تسوي تحليل و تشوف نسبة فيتامين د عندها
اول شي انا عمري 29 طولي 175 و وزني 97 يعني فيني شوي متن
الله يسلمكم لما كان عمري 23 اكتشفوا ان فيني ربو .. و نسبة الكوليسترول وايد عالية 9 و اهي المفروض بين 3 و 5 و ليلحين الكوليسترول عالي عندي ماعالجته
الحمدلله مافيني لا سكر ولا ضغط.. و عندي خربطة بالدورة مع ان كل هرموناتي طبيعية و الغدة عندي طبيعية الحمدلله.. و عندي تكيس على المبايض يخف و يزيد على حسب العلاج
المهم.. صارلي يمكن سنتين دايما احس بعوار في ركبي لي درجة اني ماقدر اسجد الا لما احط مخدة تحت ركبي.. و بدا معاي عوار بالظهر بالجزء السفلي من الظهر.. و عندي عوار برقبتي.. و دايما احس بضيق بالتنفس.. و تصير فيني دوخة جنه مخي قاعد يفتر.. و دقات قلبي مو منتظمة و فجأة كنت احس ان قلبي يطق بقوة جنه بيطلع من صدري لي درجة اني كنت اشوف صدري يتحرك من شدة ضربات القلب.. و دايما احس اني بردااااااانة حتى بالصيف و ماحب المكيف و دايما معاي جاكيت او شال لأني ما اتحمل البرد كلششش.. و بشكل عام دايما احس بخمول و ضيقة و حالتي النفسية شوي تعبانة و حدي اعصااااااااب ما اتحمل اي شي..
المهم.. صارلي يمكن 6 شهور عوار ظهري زاااااايد لي درجة اني ماقدر امشي مسافة طويلة و بالليل وقت النوم اتقلب ستين مرة عشان الاقي وضعية تريحني و انا نايمة.. وصلت لي درجة اني ماقدر اتحمل عوار ظهري و خايفة يكون فيني دسك او شي ثاني لأن العوار يبدي من نص الظهر لي اخر الظهر و ينزل على الحوض و يمتد لي ريولي.. و الدوخة زااايدة لي درجة اني 24 ساعة احس اني دايخة و راسي يفترر جني قاعدة بمركب بالبحر..
و مشاكل قلبي زايدة.. شهر 6 اللي طاف ياني عوار بقلبي بالليل و انا نايمة و نصي اليسار كله تخدر ايدي و ريلي و نص بلعومي لي درجة اني ماكنت اقدر ابلع ريجي,, و اصابعي كلها متخدرة و ماقدر اتنفس.. والله يابنات كنت اتشهد عبالي اني بموت.. و لما ودوني المستشفى و حطوني تحت الملاحظة و سوولي تخطيط قلب و حطولي درب و عطوني ابرتين و بعدين قالولي كل شي طبيعي !!! بس ضغطي كان وايد مرتفع 150 على 110 و ظل اسبوع مرتفع ما نزل حتى مع الدرب..
رجعتلي هذي الحالة قبل اسبوعين و رحت المستشفى و حطولي ردب و ابرة و بعدين قالولي مافيج شي..
و بعدين رجعتلي هذي الحالة قبل 3 ايام و هم دشيت المستشفى و مو عارفين شنو فيني.. سوولي سونار على القلب و سوولي فحص مجهود القلب,, بس الحمدلله مافيني شي
هني الطبيب شك بنقص فيتامين د و قالي روحي سوي تحليل دم و نشوف اذا كان فيتامين د ناقص عندج معناته كللللللل هالمشاكل اللي عندج منه !!!! و صج يا بنات طلع ناااااقص عندي و ان شاء الله عندي مراجعة مع الدكتور يوم الاحد عشان يشوف نتيجة التحاليل و يوصفلي العلاج..
بنات بليز ادعولي ان الله يشافيني و يشافي كل مريض اللهم امييييييين
