((عرفتك قبل ما اتعرف عليك))

[ضوى العيون]

في الصاله

كانت ام سالم يالسه و وياها سلمى وفطامي الصغيره..

فاطمه وسالم::السلام عليكم ورحمه الله...

ام سالم +سلمى::وعليكم السلام والرحمه..

سالم::فديييييييييييت هالكنونه انا((وشلّ بنت اخوه يلاعبها))

ام سالم::شحال اهلج يالغاليه؟؟

فاطمه::الحمد لله ويسلمون عليج..

ام سالم::الله يسلمهم من كل شر ان شالله..

سالم::الا محمد وينه؟

سلمى::ظهر ويا ربعه.. وقال عقب شوي بييّ..

سالم::عنبوه ها كله برع..

ام سالم::وثرك انته متى تتم في البيت..حتى انته كله برع ..

سالم::انا ما اسير الا اسلم على ربعي..((وهو قايم)) انا بسير ارتاح في غرفتي..

قامت وياه فاطمه بتسير ويا ريلها..

عقب ما راحوا.. سلمى لاحظت ضيق على ام سالم..

سلمى::عمتي.. خير ان شالله.. اشوفج متضايقه..؟؟

ام سالم::ما ادري يا بنيتي..خايفه على سالم..احس انه فيه شي..

سلمى::بسم الله على قلبج يالغاليه.. ما بيصير له الا كل خير..

ام سالم::لا تلوميني..تراه قلب الام لازم ينشغل على ضناه.. وسالم اغلى عيالي ..

سلمى::عسى الله يخليه لج ..وانتي لا تحاتين.. ما بيصير الا المكتوب..وابن آدم ما يلاقي الا نصيبه من هالدنيا.. والكل فاني..ما يدوم

غير وجهه سبحانه..

ام سالم:: والنعم بالله.. والله يا بنيتي.. محد يونسني في هالبيت كثرج..

وتقوم سلمى وتبوس راس عمتها..

محمد وهو داخل الصاله::السلام عليكم ورحمه الله..

سلمى وعمتها:: وعليكم السلام والرحمه..

وفي هالوقت دشت شيخه الصاله ورا اخوها..

ام سالم::حرام انه سالم كان يترياك..

محمد:: و وينه هو الحين؟؟

سلمى::سار غرفته يرتاح..

محمد::ما من شر..شو فيه؟؟

ام سالم::ما شر يا وليدي..بس توهم يايين من بيت عمك.. ودشوا يرتاحون..

شيخه::اقول محمد..ما تبون من ورودي تحطونها في غرفتكم؟؟

محمد وهو يطالع حرمته::انا عندي اغلى ورده في العالم..عساني بس ما انحرم منها..

شيخه::انتوا شو بلاكم اليوم..عافانا الله..ليكون عيد الحب؟؟

محمد:::ما يحتاي عيد عسب اقول لحرمتي اني احبها..

شيخه::اوووهوووو..الله يعيني عليكم بس..((وسارت غرفتها))

ام سالم::هههههههه..بلاكم على اختكم..

محمد::ما عليج منها..بس كنا نتغلس عليها..

 

[ضوى العيون]

الجزء السابع والاربعين((الاخير))::



الساعه 9 في الليل عقب العشا في بيت بوسالم...

الكل كان يالس في الصاله..بوسالم..وام سالم..محمد ومرته وبنته..شذى كانت موجوده ويا بنتها.. شيخه ومريم..وسالم ومرته و ولده..

كانوا يسولفون ويضحكون..وبو سالم كان يذكّرهم بايام قبل..سيراتهم البر ويا عيال عمهم..ومن هالسوالف...

سالم::ابويه تحيد محمد كيف صاح يوم كنت بسافر للدراسه؟؟

بوسالم::مسكين عوّر قلووبنا..

سالم::مستوي رومانسي الحبيب..

محمد::جب يالدب...من كثر ما كان قلبي رجيج..

سالم::يا صاحب القلب الحنون انته..

شيخه::لا صدق والله.. محد حس بغيابك كثر محمد...

سالم::وانا ما عزّ عليه غياب حد..كثر غيابي عن محمد..

ام سالم::عسى ربي يخليكم لبعض..

شذى::احلى موقف يوم اتصل بنا سالم اول مره..كان عقب اسبوع من سفره.. تحيدون كيف كان رد محمد..يوم درى عن هالاتصال..وهو

محد في البيت؟؟

مريم::ههههههه..كان يحرس التلفون ولا يظهر من البيت الا للدوام..

سلمى::جنكم الا حاطين على ريلي؟؟

محمد::فديت اللي ما يرضوون..

سالم كان فرحاان من هاليمعه الحلوه.. وفي نفس الوقت حاس باحساس غريب..حاس انه هالمنظر بيشوفه لاخر مره..رغم احساسه
والحزن اللي تملكه الا انه ما بغى يضيع دقيقه الا وياهم...

محمد رغم ضحك سالم وسوالفه كان حاس بشي ثاني.. صح انه سالم اكبر عن محمد..لكنه كان واايد قريب منه.. ويفهمه على

طول..سالم كان قريب من محمد و وايد يحبه..وهالخوف كان يعذبه.. كان يشوف اخوه وابتسامته اللي ما فارقته وهو يحس انه وراها

شي ..

حتى فاطمه..كانت وياهم وهب وياهم..تفكيرها كان كله ويا الانسان اللي يالس حذالها وايده ما فارقت ايدها..كانه يبا يوصللها

رساله..انه ما راح يخليها...

تفكيرها كان كيف يتكون حياتها بدونه؟؟كيف بتربي ولدها بدون سالم؟؟..وبعناد خوّزت هالافكار من بالها..ويلست تفكر بمقدار
حبها لسالم..

الساعه صارت 12 فليل..


الكل سار غرفته عسب يرتاح.. وشذى مرّ عليها ريلها وردت بيتها..

سالم كعادته ويا فاطمه..هالوقت كانوا يقرون جزء من القرآن مع بعض..

بعد ما خلصوا من القرايه..قام سالم وطاح على سريره.. وفاطمه سارت تتطمن على ولدها.. وعقب ردت عند ريلها..

سالم::فااطمه..مرتاحه وانتي ويايه؟؟

فاطمه::مرتااحه يا بعد قلبي..

سالم::عساج دوم مرتاحه..وانا مرتاح دام نصخج في هالدنيا وياي...

فاطمه وهي تحط راسها على صدر ريلها::احبك يالغالي.. وما ارتاح الا بوجودك حولي..

سالم وهو يلعب بشعر غلاه::انا اموت فيج يافطاامي..ابغي اقوولج شي..بس هب عارف من وين ابدا فكلامي؟

فاطمه وهي تتعلق بريلها..كانها حاسه باللي يبا يقووله::آمر عيوني..قول اللي فخاطرك..

سالم وهو متردد لانه عارف خوفها::انا حاس بانها آخر لحظاتي بينكم..ولج وصاتي يا فاطمه,,ابغيج تحطين بالج على ولدنا..و وعلى

نفسج..ولا تتضايقين لاي سبب.. وتسامحيني على كل شي.. وابغيج لا تذكرتيني ما تبكي دموعج..تراها غاليه..ولاطريت على بالج

وزارتج طيووفي.. اعرفي اني احبج في حياتي وفي مماتي..

كانت فاطمه تسمع كل كلام سالم وهي تبكي بسكات وقلب محترق من داخله..كانت حاسه طول اليوم باللي يقوله سالم..

فاطمه::يا بعد اهلي وناسي..انته في قلبي..حيّ فيه وساكن فيه.. محد يغير اللي فقلبي..حتى غيابك عن عيني ما بغيّر اللي
فقلبي.. واوعدك يا سالم اني اصووونك..وما ابدل بديلك لو شو ما صار..

سالم::حبيبتي..اعرف حبج و واثق منه..وانا ما ابغيج تضيعين حياتج وانتي صغيره..

فاطمه:: دامك ملكتني وملكت قلبي..ما لغيرك شي فيه..

سالم::فدييييتج يا اغلى احبابي..عندي طلب اخير يا فاطمه..

فاطمه::لو تطلب عيوني تفداك...آآمر..

سالم::ابغيج ..لا كبر سالم وصار ريال..تخطبين له فاطمه بنت محمد اخوي..

فاطمه::ان شالله...

سالم::ادعي يا فاطمه.. دامه رب العباد جمعنا في الدنيا.. ولكن الموت داهمني.. ادعي اجتمع وياج في جناته سبحانه.. وتصيرين مرتي

في الدنيا والاخره..

فاطمه::عسى الله يكتب لنا هالشي..

سالم::احبج يالغاليه.. وقلبي اسيرج حتى لو بالتراب مدفوون..

فاطمه::احبك يا حبيب عمري وحياتي...


لو حياتي اماني في هوايه اهتنيت
في العمر ما بحاتي معسرات الليال

لكن الموت مدرج في حشايه مبيت
وخالط الدم دمعي موق عيني وسال

والعذاب احتواني لو بكيت ولعيت
عاف كل البريّه وخصني بالعجال

حره القلب تذبح تستحيل وتميت
وسكره الموت عنها ما صفالي مجال

واشقا النفس عقبك ما لك صفيت
صادق العهد ودي والوفا لك زلال

بادرتني المنايا يوم عني قفيت
والحلم لي حلمته صار شروات لال

وين عهدٍ مضالي في حنانك ربيت
واستقيت المحبه عذب ذوق الوصال

وين صافي الموده يوم بك قد التقيت
كل ما كنت احبه والهوى لي حلال

كيف انا اعيش دونك لا حشى ما حييت
والحياه الوسيعه دون شوفك محال

كانت هاي آخر ليله يقضيها سالم بين احضان اغلى انسانه وحب حياته اللي ما تهنى فيه..نامت عيونه وهو مرتاح.. وارتفعت رووحه

عند ربها.. سالم من طيبه الكل حبه ومحد كان حزين على فراقه كثر زوجته وحبيبته فاطمه.. حبهم كان كبير محد عرف قدره ولا حد

تاكد منه الا بعد ما شاف حاله فاطمه على فراق ريلها..سالم وفاطمه كان حبهم عذري وصافي..ما كان حب شرات هالايام..كان حب

نقي وطاهر.. حب لا عرف لازيف ولاخذاع.. رغم الظروف ورغم اللي مروا فيه هالاثنين الا انهم اثبتوا على حبهم...

 

[ضوى العيون]

الظروف اللي لو عاشها غيرهم يمكن ما يكملون مشوارهم ويا بعض..لكن فاطمه تمسّكت بريلها..هب لانها تعطف عليه بالعكس..حبها له

خلاها تحارب مرضه وياه..و قفت وياه وعاشت المرض وياه.. كل ما تألم..تألمت ويااه..كل ما كان يتملل من العلاج..توقف وياه

وتسانده يكمل علاجه ويتمّ باصراره..

تحدّت الظروف.. والغربه..وكل شي عشان هالحب اللي شلته في قلبها..حب عاش من طفوولتهم وكبر وياهم..حب ازرعووه في قلوبهم

وحافظوا عليه..


فاطمه بعد وفاه ريلها.. تغير حالها.. و ما كملت دراستها اللي كانت تبا تكملها بعد ردتها للبلاد..و قزرت ايامها لولدها سالم.. حتى

شكلها تغير..صارت اضعف عن قبل.. ولونها انخطف من الحزن.. ودموووعها ما فارقت خدها من حزنها على حبيب عمرها وريلها...

رغم وفاة سالم ظلّت فاطمه تصونه..وتحبه.. وكانه بينهم وياها عايش..آآآه يالدنيا ..منو في هالزمن يعيش حب صادق شرات حب فاطمه
وسالم؟؟


عقب 23 سنه..

فاطمه وهي تدخن ولدها::يالله يا وليدي..بسرعه انقفض اباك توديني القاعه عند خالتك...

سالم وهو مرتبش::ان شالله ان شالله امايه..بس وين بشتي؟؟

فاطمه::ههههه..بسم الله عليك تراه في ايدك ادخنه لك...

سالم::لا تلوميني معرس..

فاطمه وهي تشوف ولدها اللي كبر وصار معرس.. وتذكرت ابوه..سبحان الله سالم يشبه ابوه في كل شي..حتى في ربشته...وسالت

دمعه على خدها((ليتك يا سالم تشوف ولدك ..صار معرس))



اعيش وقتي في الفكر والتسالي
واحاول انسى والدمع يرتجيني


الوقت عاند من بعد ما صفا لي
وش حيلتي يا دمعتي سامحيني


ما هو بذنبي والسنين الطوالي
هذي قدرة اللي م الممات ايحييني


لو كل نسيان الحياه انطوى لي
لا تفتكر بنساك يا نور عيني


ببقى لذكراك الجميله يا غالي
لين الموت ينهيني بوفيك ديني


صوره خيالك ما تفارق خيالي
هذا كثر ما اهواك انا وتهتويني


ارمس وكنك في السوالف عدالي
والاطفك بالالغاز بينك وبيني


لو عرفت بحور الحزن ما جرى لي
بيجف ماها وباقيه تهل عيني



سالم وهو لاوي على امه::فديييييييت هالدموع.. دخيلج ما ابغي اشوف دموعج الغاليه...

فاطمه::ذكرت ابوك يا وليدي لا تلومني..

سالم::تعرفين يا امايه..اتمنى من كل قلبي انه فاطمه تحبني شرات ما تحبين ابويه الله يرحمه...

فاطمه::فديتك يا وليدي..فاطمه تحبك..والا نسيت سوالفكم وانتوا صغار؟؟

سالم::هييييه..اكيد ما بنسى..انا عمري ما حبيت ولا بحب وحده شرات بنت عمي فاطمه..

فاطمه::عساني ما اذوق حزنك يالغالي.. وما تنحرم من شوف مرتك طول عمرك.. وما يحرمكم من بعض واشوف عيالك..

سالم::آآآآمين..يالله خلينا نلحق عالعرس..

فاطمه وهي ترد على تيلفونها اللي كان يرن::الووه..ها سلامي.. لا لا يايين الحين..انتي ويا البنات؟؟ يالله مسافه الطريج..

عقب ما وصلت فاطمه القاعه..

سلمى::ليش جي تحيّرتي؟؟

فاطمه::لا تلوميني..معرسنا مرتبش ويلست اسولف وياه ونسيت عمري..

سلمى::الله يهداج تعرفين اني اباج وياي..

فاطمه::وين البنات عيل؟؟

سلمى::الحين بيّن ..عبدالله اخوهن مرّ عليهن الصالون..


الساعه صارت 11 الا ربع ..


وصار الوقت اللي بيدخل فيه المعرس...

دخل سالم القاعه ويا عمه محمد و ولده عبدالله..

فاطمه كانت طوول الوقت تتذكر يوم عرسها.. وتذكرت سالم اللي طووول الوقت في بالها.. و ولده اللي يشبهه في تصرفااته وشكله

واطباعه صار اليوم معرس.. وقصه حبه ابتدت في هالليله...

فاطمه فرحت لولدها.. وفرحت لانها قامت بوصية ريلها..

وزوّجت سالم لبنت عمه فاطمه...

والكلمه اللي كانت في اذنها طول الوقت...آآخر كلمات سالم وصوته الغالي وهو يقوول::

((احبج يالغاليه.. وقلبي اسيرج حتى لو بالتراب مدفوون))...

...نهايه القصه...

 

[أميرة الورد]

مشكووووووووورة على القصصصصصة عورت قلبي ذكرتني بوحده جاشتها نفس الظروف الله يفرح قلبها ان شاء الله

مشكورة ضوى العيون وناطرين الجديد منج

 

[ضوى العيون]

العفو والله حياج الله وفي وايد شغلات من واقع الحياه

 

[ورود الجوري]

يسلمووو على القصه الروووعه

 

[ضوى العيون]

الله يسلمج ويخليج يارب

 

[فرحه عمري]

مـشـكـوره عـلـى الـقـصـه الـرووعـه

وانـشـاء اللـه مـاتـحـرمـيـنـا مـن جـديـدج

تـحـيـاتـي
فـرحـه عـمـري​

 

[eng_moon]

مشكووووورة وماقصرتي على هالقصة ...