((عرفتك قبل ما اتعرف عليك))

[ضوى العيون]

الجزء الواحد والثلاثين::


عقب الغدا سار الكل غرفته.. الا سالم..قال لابوه انه يباه في موضوع مهم..وساروا سالم وابوه المكتب عسب يتكلمون براحتهم..

طبعا محمد ما قدر يخلي اخوه بها السالفه برووحه.. فسار وياهم..الكل ارتاب.. خصه سلمى وشيخه.. شيخه يمكن اقتنعت انه الموضوع
يخص الشركه رغم خوفها..لكن سلمى كانت متاكده ان الموضوع جااايد.. لانها تفهم محمد من نظراته.. ومحمد ماله في الشركه
وسوالفها..هي متاكده ان الموضوع يخص سالم.. وكانت خااايفه على اختها وااايد...

أما في المكتب..سالم ومحمد يلسوا يرمسون بوسالم.. طبعا بوسالم انصدم صدمه عمره... ما ينلام تراه البجر وساعده اليمين..والانسان

اللي يتكل عليه ويسند ظهره عليه..بس لانه انسان مؤمن بقضاء الله يلس يهدي ولده اللي كان منهااار..وشكله ما يسر...

بوسالم::لا تحاتي وانا ابوك... ربك ما ينسى عباده الصابرين..

سالم:: والنعم بالله يا بوي... بس انا ما احاتي حد كثر الوالده.. وفاطمه...كيف حالهم من عقبي...

بوسالم::لا تييأس وانا ابوك.. انته امش على العلاج وان شالله تتغلب على المرض وتتعالج منه..

سالم::ابويه نسبه الشفا من المرض بسيييطه.. او شبه مستحيله.. لانه المرض غزا قلبي..انا مريض من فتره.. وكنت اهمله..

محمد::ابويه..احنا فكرنا بشي وان شالله هالشي يرضيك..

بوسالم::قوول وانا ابووك..

محمد:: احنا بنغبي عن الكل سالفه مرض سالم..وبنخلي يتعالج خاري البلاد.. على انه سار يكمل دراسته ... وان شالله يتشافى
ويردلنا بالسلامه..

بوسالم::انتوا ما فكرتوا ببنت اخوي عبدالله؟؟؟

سالم::آآآه.. ابويه فاطمه اللي مصعبه عليه المرض.. انا فكرت اطلقها..

بوسالم:: لا لا ... ياولدي لا تفكر بها التفكير.. جي بتضيع مستقبلها..شو بيقول عنا عمك؟؟؟

سالم::يا بوي انا ما ارضى على بنت عمي انها تعيش ويا انسان مريض ..ويمكن يموت ويخليها بلقب الارمله...

يقاطعه ابوه::عن هالرمسه يا ولدي وخل ايمانك بربك قوي..وبنت بوسيف لك ان شالله.. خل الطلاق بعيد عن فكرك..

سالم::يا بوي هاي بنت عمي قبل لا تكون مرتي.. وانا ما ارضى لها... دخيلك افهمني...

بو سالم::محمد...قم ازقر لي مرتك...

محمد وسالم مستغربين من فعل ابوهم...

محمد::ليش؟؟؟

بوسالم:: قم ازقرها وانته بتعرف اللي بسويه...

محمد وهو يشوف سالم باستغراب::ان شالله..

طلع محمد يزقر مرته اللي كانت يالسه في الصاله ويا مريم و شيخه وامها

طبعا ارتابوا البنات من السالفه..بس قالوا يمكن في سالفه تخص محمد وسلمى ... وبوسالم مدّخل بينهم.. طبعا هاي الفكره بس عسب
يبعدن الخوف اللي ملا صدوورهن..

اما سلمى اللي كانت زااايغه وقلبها يرجف في محله.. محمد وهو يمشي حذال مرته كان يخفف من رووعها..وقالها ان الموضوع
بسيط.. بها الكلام البسيط هدت نفسها..

دخلت المكتب ويا ريلها وسلمت ..

بوسالم::تعال يابنيتي حذالي..

مشت سلمى وعينها على ريلها اللي هدّ ايدها.. وسالم اللي شكله حزين ومبين عليه الهم...

سلمى::ان شالله عمي((ويلست حذاله))

بوسالم::سلمى انتي انسانه عاقله ومؤمنه بقدر الله.. وانا ما بغيت اخبرج باللي يصير الا لاني اثق فيج وبعقلج..شوفي يالغاليه
((ويخبرها عن سالم ومرضه)) والحين ابغي اقوولج شو رايج بسالفه فاطمه وسالم..؟؟؟

سلمى تيبست في مكانها..وهي منزله راسها.. ابدا ما توقعت انه هاي السالفه.. رفعت عينها وشافت ريلها اللي تقرب منها ويلس
حذالها يربت على جتفها..وعقب صدت صوب سالم..اللي شكله يقطع القلب.. ودمعت عينها.. ما كانت دموع شفقه.. ولا شي.. دمعت
لانها تخيلت حال اختها.. سلمى اكثر وحده تعرف فاطمه.. وتعرف شكثر فاطمه تحب سالم وتموت عليه...ودمعت لانها كانت تحترم
سالم... سالم انسان ما يستاهل هالمرض.. الكل يحبه اكيد بحزنون عليه حزن شديد...

سلمى وهي مستغبنه تحس انها مخنووقه::شو بلاهم فاطمه وسالم؟؟؟

سالم وهو يحس ان الكلمات تخونه::سلمى .. انا احب فاطمه واحترمها.. واباها حلالي اليوم قبل باجر.. وهالكلام توني اقووله لمحمد
وابويه.. سلمى انا ما ارضى لفاطمه تعيش ويا انسان مريض يهدده الموت في كل لحظاته.. وعقب تعيش حياتها ارمله...

سلمى نست وجود ريلها وعمها::سالم.. انته بتجتل فاطمه لو طلقتها.. هي هب بس تحبك.. فاطمه تموت على طاريك.. فكيف لو درت ان
الانسان اللي تحبه بيتخلى عنها ويستسلم لمرضه..لو درت ان الانسان اللي تحبه بيتخلى عنها وهي في عز همها فيه..؟؟؟

سالم:: انا ما ابغيها تعرف عن مرضي..انا بسافر للعلاج.. وبنقوللها اني بكمل دراستي وبتأخر هناك وانا ما ابغيها تتعلق بالأمل..

سلمى:: وما فكرت انها بتعيش بلقب مطلقه؟؟؟ ما فكرت انها مستحيل ترضى ببديلك؟؟؟ ما فكرت انها ما بتسامحك طوول
عمرها؟؟؟... سالم اللي تفكر انته فيه انتحااار.. وجرم بحق فاطمه...

بو سالم::يا بنيتي.. تفكير سالم كان شهامه منه.. وحب تجاه اختج..اللي اقووله انج تكلمين اختج بالموضوع.. ونشوف رايها..هل هي
موافقه تعيش ويا سالم وتتحمل علاجه وياه.. والا تتم معززه مكرمه في بيت ابوها..وتشوف نصيبها في هالدنيا..؟؟؟.

سلمى :: اللي تشووفه يا عمي بيصير...

عقب هالكلام .. الكل سار غرفته وشال في قلبه هم كبييير...

محمد اول ما وصل غرفته.. لوى على مرته اللي انفعلت .. ما تنلام واايد تحب اختها وتعرف اللي بيصير لها لو عرفت باللي يصير..يلس
محمد يهوّن على مرته.. وتم حاضننها لين ما ارتاحت وارقدت..مسكيينه.. اذا هذا حالها.. فكيف تتوقعون بيكون حال فاطمه؟؟؟

 

[ضوى العيون]

][®][^][®][الجزء الاثنان والثلاثون::][®][^][®][


طوول اليوم وسالم يفكر.. افكار توديه وافكار تييبه..ولاهو بمرتاح...ما يعرف كيف بتكون رد فعل فاطمه..وشة

بتسوي لادرت انه مريض وعنده القلب.. وماله في هالدنيا الا ايام معدوده وفتره محدده..بتتخلى عنه والا بتم

وياه..يلس يتذكر ايامهم.. تذكر اول يوم تلاقى فيها وياها عقب ما رد البلاد [/color]

عرفتك قبل ما اتعرف عليك...

رسمتك في خيالي حلم غالي..

قبل عيني تشوفك والتقيك...

عشقتك يا خيالن في خيالي..

كانت هاي الاغنيه دووم يرددها في باله لاطرت له فاطمه...لانها تذكره باول ليله شافها فيها..كان حاس انه

اللي بين ايده اغلى انسانه حبها..بس هب متاكد لان الزمن غيرها..عقب 12 سنه.. الطفلهه الصغيره الحبوووبه..

صارت بنت غاويه فاتنه..تسحر العيون لا شافتها..آآآه يا فاطمه يا اغلى من روحي عليه...

يوّد تيلفونه ويلس يقرا مسجااتها اللي عمره ما فكر يمسحهن ((خلّ عنك هالرمسه...ولا تخلني اضحك جدام امايه

بتفضحني انته؟؟؟قوو سير ارقد اخير لك)) ابتسم وتذكر يوم كان يغلس فيها ويذكرها انها مرته وانها له

طووول العمر.. نزلت دمووعه وضااق به كووونه... دوّر في مسجاته عسب يطرش لها...

جيتك وان ماني بتايه الراي..

جيتك وانا مادري وش اللي بغيته..

وان كان تسال ليه انا جاي..

ابشر برد يقنعك لا قريته..

ان مر يوم بالعمر منت وياي...

اشتاق لك شوق المسافر لبيته..

لا تلومني لاجيت من أقصاي...

مافيه غيرك لاتضايقت جيته...

وتريا شوي كعادتهم...وعقب سمع رنه المسج..ابتسم رغم جراحاته وفتح المسج..

اعاهدك نبقى انا وانت خلان

ودرب المحبه يالغالي ندله..

ياصاحبي خل المحبه لنا انسان..

انسان ما يرضى بحكم المذله..

ببحر انا وياك من دون ربان..

بنشي فبحر فيه الاشواق فله..

انا معك والبحر والغيم خلان..

ما نفترق لو كلن يموت بمحله...

فدييييييييتج يا فطامي..يعلني ما اذوق حزنج يالغاليه..آآآآآآه يالزمن ..ليش الدنيا قاسيه عليه...

نسير صوب فاطمه...

فاطمه وااايد مرتابه من حركات سالم..تحس انه فيه شي.. عساه ان شالله خير..سمعت صوت المسج..

وقرته..وزادها المسج استغراب...شو يقصد سالم بها المسج.. اكيد شرات ما قلت هو متضايق من شي.. ردت

عليه بالمسج.. وتمت تفكر فيه...شوي ويرن تيلفوونها...((كانت الساعه 6 جريب المغرب)) كانت المتصله اختها

سلامي...سلمى كانت هاديه رغم توترها ورمستها عادي وقالت لها انها بتتعشى عندهم واحتمال تبات ويا

اختها.. فاطمه ما خانها احساسها.. لانها تعرف اختها..وحسّت بصووتها شي غامض.. ولانها قالت يمكن تبيّت

عندهم.. قالت في خاطرها ان الموضوع بينها ومحمد.أكيد صارت بينهم مشكله او سوء تفاهم.. ما لمحت لاختها

انها شاكه فكلامها وحالها..بالعكس رحبّت بها واستانست لانها بتييهم...وبتبات عندها.. تولهت على سهراتهم

وجي...

مر الوقت وصارت الساعه 8 عقبها يتهم سلمى...

يلسوا اول شي في الصاله..ميره وام سيف وسيف وفطامي ومحمد وبوسيف..محمد ما طوّل عندهم..قال انه
بيسير صوب ربعه وبيرد ياخذ مرته خلاف..كان بوسيف يبا ولد اخوه يتعشى وياهم لكنه اصّر على رايه

((مساكين ما يعرفون باللي فالقلووب خافي))

تعشوا ويلسوا يسولفون لين ما ترخص بوسيف عسب يسير يرقد.. لحقته ام سيف الغرفه.. وما تم في الصاله غير

ميره اللي كانت تتضارب ويا سيف على السوني..ما يعرفون كيف يلعبون بهدووء...

اما سلمى خذت اختها فاطمه اللي طوول اليلسه وهي تحاتي سلمى.. صح سلمى طبيعتها هاديه وكتوومه وما

يبين اللي فيها.. الا فطامي تفهمها على طوول.. تعرف اللي فيها..والحين هي شاكه باختها.. وتظن ان السالفه

بينها وبين محمد((مسكينه يا فاطمه ما تدرين ان السالفه تخصج))

 

[ضوى العيون]

][®][^][®][الجزء الثالث والثلاثين::][®][^][®][



فاطمه::سلامي انتي شو فيج؟؟.. من اول ما ييتي وانتي هب عايبتني...محمد سوالج شي؟؟قالج

شي؟؟؟ مضايقنج؟؟

سلمى::لا لا .. السالفه ما يخص محمد فيها.. السالفه كلها تخصج يا فاطمه..

فاطمه وتحس انه اختها بتختنق فعبرتها..::سلمى دخيلج خبريني ...شو بلاج؟؟ انا شو فيني؟ سالم فيه

شي.؟؟

سلمى وخانتها دموعها::سالم يا فاطمه مريض.. والي يايه اكلمج فيه واايد كبير .. لازم تفهمينه قبل لا تردين

عليه..او تقررين..((وتقوولها كل السالفه من بدايتها لين النهايه))

فاطمه وهي منصدمه اكبر صدماتها.. حست بانه المرض في قلبها..قبل لا يكون في قلب سالم..تمت سااكته

طوول ما اختها ترمس.. ورغم ها كله ما ذرفت دمعه على سالم وحاله.. لانها في عزّ صدمتها..

سلمى:: فاطمه...الحين القرار بيدج...الكل يتريا منج الرد الحين.. عمي وسالم ومحمد...وما نبغي حد من العايله

عسب ما يحاتونه.. الكل بيعرف في وقته المناسب..

فاطمه::خلاص سلمى.. انا ما ابغي شي.. ممكن تخليني برووحي ..؟

سلمى ما صدمها الا بروود فاطمه.. ما توقعت رد فعلها.. طاحت من عينها.. ولاول مره تحس ان اختها تخذلها...

ظنتها اول من بيوقف ويا سالم في محنته..ولكن للاسف تخلت..

سلمى وهي منصدمه::خلاص ياختي.. انا بخليج بس فكري فيها عدل...

فاطمه وبكل بروود:: بشو افكر..؟؟؟ انا في الحالتين خاسره..

سلمى وهي تذرف دموعها::خاب ظني فيج...(( وطلعت بسرعه))...

اتصلت سلمى بمحمد عسب ترد بيت ريلها...ومحمد بعد ما تحيّر عليها...ردلها بسرعه...

سلمى مرت على ميره اللي كانت بالصاله ويا سيف وسلمت عليهم.. وهم مستغربين ..بلاها سلمى تصيح؟

واللي سهّل عليها الموضوع انه ابوها وامها رقوود...بهالطريقه ما بيشوفونها ويسألونها عن دموعها...

اول ما شافها

محمد مسح دموعها وما سالها ..يلس يهديها وجي..عقب خذها صوب البحر يلس وياها في مكان هادي...

لوى عليها.. كان الجو بارد...بس البرووود اللي حسّت به سلمى بروود خوفها ورد فعل اختها اللي ما توقعته..

محمد::خلاص يا سلمى لا تصيحين.. حبيبتي والله قطّعتي قلبي عليج...ما اعرف احزن لدموعج والا لمرض اخوي

وحاله...

سلمى وهي تصيح::فاطمه طاحت من عيني يا محمد... طااااحت...

محمد وهو مستغرب::ليش يالغاليه؟ شو قالت؟

سلمى::ليتها قالت.. كانت باارده..كاني ارمس عن واحد غريب..كانت جااامده.. ما هزّت لها شعره...كنت اشووف

في عينها نظره عطف.. ولا شفت الحب اللي لقيته في عيوونها لا طرينا سالم..فيها شي ماات...آآآه يا محمد ما
اعرف والله ما اعرف..

محمد:: اللي افهمه من كلامك انها تخلت عن سالم...تبغي الطلاق؟

سلمى وهي تحط ايدها على ثمه::لا تقووول.. دخيلك.. والله اني ما اتمنى فرقااهم.. مثل ما فاطمه اختي.. ترا

سالم اخويه.. واعرف انه هالخبر بيضره اكثر مما هو فيه..

محمد::آآآآه يا سالم.. مسكين والله هالانسان..طيب من يوومه.. محد يطريه الا بكل خير.. قلبه ابيض.. حب فاطمه

من كل قلبه.. والله مرات احس انه في هالدنيا بس عشان اختج.. ما تعرفين يا سلمى حتى وهو في الغربه

ينشدنا عنها..ويوم درا انها تخرجت يلس يحّن ويرمس امايه عسب تخطبها.. يبغيها من نصيبه...والله

مسكييييييين...

سلمى:: لا تقطع قلبي عليه..والله انا اشهد انه طيب حنون..عمري ما شفت منه الا الخير والسنع..

وهاي كانت رمستهم.. عن سالم واللي يصير له.. كيف بيتصرفون.. وشو بيقولون له عن فاطمه؟

شوي ويسمعون رنه تيلفوون...كان موبايل سلمى اللي نسته في السياره.. سار محمد ييبلها اياه.. وكانت

المتصله فاطمه...

فاطمه::السلام عليكم والرحمه..

محمد:: وعليكم السلام هلا فاطمه...

فاطمه::محمد شخبارك؟ وينها سلمى؟

محمد::انا بخير الحمد لله..صبري بس..هاذيه سلمى وياج...

سلمى وهي متضايقه من اختها::هااا فاطمه...شو عندج؟

فاطمه::انتوا وين؟

سلمى::بعدنا في بوظبي...ليش؟؟؟

 

[ضوى العيون]

][®][^][®][الجزء الاربع وثلاثين::][®][^][®][



سلمى::بعدنا في بوظبي ..ليش؟؟؟

محمد كان منتبه لكل كلمه تقوولها سلمى...

فاطمه::سلمى انا ابغي اسير وياكم العين...

سلمى::تيين العين؟؟؟((وهي صاده صوب محمد))ليش؟؟؟؟؟؟

فاطمه::ابغي ارمس سالم..ابغي اعرف منه السالفه...

سلمى::بس قوم امايه شو بيقوولون لو .....((وهي تشوف محمد اللي يأشر لها انهم بيوون صوبهم الحين)) خلاص

خلاص... تريي علينا والحين بنييكم..

فاطمه::اترياكم...

وسكرت عنها....

محمد::قوليلها خل تزهب وياها

ثياب عسب تبات وياج...

سلمى::محمد بلاك؟؟؟نسيت انه ابويه وامايه بيغيضوون لو دروا انها ظهرت؟؟؟

محمد:::يا ذكيه قولولهم انه عندي زام اليوم وببات في الدوام.. وخلي اختج تبات وياج في ملحقنا.. وانا ببات

بغرفتي في البيت...

سلمى::بس يا محمد.....

محمد يسكتها::لا بس ولا شياته...ها مستقبل اخواننا...

اتصلت سلمى باختها مره ثانيه عسب تخبرها تزهب لها ثياب لانها بتبات في بيت عمها الليله...طبعا فاطمه ما

قدرت تظهر الا عقب ما وعت امها وخبرتها..ان محمد عنده زام وهي بتبات ويا اختها الليله..طبعا ها عقب ما

اتفقت ويا اختها..وبجذي ام سيف رضت ترووح بنتها ويا اختها العين..
نرووووح شوي بيت ام علي...

علي من رد البيت وهو بغرفته..شهد كانت واايد قريبه من اخوها ودرت انه هب طبيعي...

علي يسمع حد يدق الباب:: ما ابغي ما اغي عشا...

شهد::اختك تباك انزين...

علي:: تعالي.. ادخلي..

شهد::علاوي.. حبيبي ليش ما تغديت ولا بتتعشى ويانا.. زعلان منا شوو؟؟؟((وهي حاطه ايدها على جتف

اخوها))

علي::فديتج غناتي.. لا زعلان ولا شي.. بس متضايق شوي..

شهد::لييش؟؟؟افااا يا خوي.. متضايق واختك موجووده؟؟؟

علي وهو يلوي على اخته:: والله مالي غيرج والوالده يا شهووده... انتي يمكن اكثر وحده تفهمني...

شهد::انا بيرك ياخوي..قوول شوو هامنك جيي؟؟؟

علي::شهد.. انا حبيت..قدرت وحده تكسر بداخلي حاجز بينيته سنين.. ودشت قلبي اللي ظنيته مات.. حيّت

بداخلي اجمل واحلى الشجوون..ويوم قربت منها..عرفت انها ملك غيري...

شهد وهي حزنانه على رمسه اخوها..هي كانت تعرف عن سالفه ميثا..واللي تقريبا الكل يعرفها وابدا

ما توقعت علي يحب...صح انه انكسر في لحظتها..صح مرت عليه ظرووف انهار فيها.. بس علي كان انسان
صبوور قنوع.. راضي بحكم الله...عمره ما تذمر ولا شكى..كان الوحيد الصامد ضد ظرووفه القاسيه..

شهد::منو هالانسانه؟؟؟اعرفها؟؟؟

علي::للاسف تعرفينها..البنت هي فاطمه بنت عبدالله... بوسيف...اللي شفناها في المستشفى...

شهد منصدمه::فاطمه ما غيرها؟؟؟بس هاي مالج عليها ولد عمها...

علي::آآآه يا شهد لا تزيدين المواجع...اعرف هالشي... كنت اظن ان امايه بتتقرب منهم وانا باخذها..بس الوالده
حطت عينها على اختها..وفاطمه..قلبي انخطف من بين ظلووعه...

شهد في خاطرها((آآه يا خوي..مالنا في هالدنيا نصيب..انا حبيت سالم وبالاخير ما كان ملكي كان

لغيري..وانته ما تحب الا الانسانه اللي اختارها قلبه..آآه يالدنيا...صدق انها دوااره))

شهد لوت على اخوها وهونت مصاابه ودموعها تذرفها على حالهم::ما عليك يا خوي.. بتلقى غيرها...

علي::مستحيل مستحيل شهد.. ما ابغي احب خلاااص..ما ابغي انصدم مره ثانيه..

شهد::لا اله الا الله...

علي::محمد عبده ورسووله...خلاص يا شهد ..انا بعيش حياتي شرات قبل...ما ابغي افكر بحد وانصدم..

شهد::يالله ياخوي..خلنا نظهر وننسى اللي صار.. قوم اتعشى ويانا.. ترانا ولهنا عليك...

علي::ان شالله يالغاليه... الحين بييكم...

وبجذي علي قرر ينهي افكاره بالحب وينسى اللي صار له.. وهو اصلا تعودت على النسيان.. تعود انه
ينجرح ..فها الشي ما كان يديد عليه.. بالعكس ساعده هالشي انه ينسى بسرعه ويكمل حياته مثل ما كانت
قبل..

 

[ضوى العيون]

][®][^][®][الجزء الخامس والثلاثين::][®][^][®][

محمد وسلمى وفاطمه وصلوا العين..طبعا محمد ما قدر يبات في البيت عسب محد يقول انه وسلمى متضاربين لا سمح
الله.. فخذ ثيابه وقرر انه يبات في فندق لين الصبح..

واللي في البيت عبالهم انه عنده زام وبيبات في الدوام الليله..شيخه استانست اول ما شافت فاطمه..ومريم وام سالم

رحبوا فيها وقاموا بالواجب..اما بوسالم فكان راقد((الساعه كانت 11 في الليل))

كانوا الكل قاعدين في الصاله..ترخصت ام سالم عسب ترتاح وترقد..ومريم بعد.. ما تم في الصاله غير شيخه وسلمى
وفاطمه...

فاطمه تسال شيخه::الا سالم وينه؟؟

شيخه::ما اعرف..اعتقد ويا ربعه..اكيد بيي عقب شوي...

فاطمه::ممممممم...شوااخي حبيبتي..لو طلبت منج فاطمه شي...بتسوينه؟؟

سلمى وهي تطالع فاطمه..وهي عارفه انها ما تبا تبين او تقول لشيخه عن اللي يصير ...

شيخه::اكيد..كم فطامي عدنا..الا وحده..

فاطمه::ابغي اشووف سالم..ابغيها تكون مفاجأه له...

شيخه::هههههه..احب هالسوالف..انزين انا بقوولج..شو رايج تيلسين في غرفته لين ما يرد..هو ما بيتاخر..

فاطمه وهي صاده صوب سلمى::شوو رايج؟؟

سلمى::ابوي انا بسير ارقد..مالي شغل بسوالفكن...(( وتقوم عنهن سايره ملحقها))

فاطمه::ما عليج منها...يالله راويني غرفته.. وهاااا ما ابغي حد يعرف...

شيخه::افا عليج انتي.. تعالي بس...

ويسيرن ثنتيناتهن جناح سالم.. كان روووعه جناحه.. ومبين انه مزهبنه عشانهم...فاطمه كانت مستاانسه بسبب اهتمام
سالم فيها وفي ترتيبات العرس.. وفجاه انقبض قلبها يوم اذكرت سبب ييتها بيت عمها...

شيخه::ها جناحه..اووه اقصد اللي بيصير جناحكم... وهناك غرفتكم...

فاطمه و ويها احمر من رمسه شيخه::احم احم.. عن الغلاسه .. ويالله فارجي..برووحي بتصرف..

شيخه::يالله يالمصالح..توه تتفداني والحين ما تباني..

فاطمه::لا لا ..كله ولا انتي...بس لا تخبرين حد ما اوصييج..

شيخه ::انزين خلاص..يالله تراه سالم شوي وبيي..((وينسمع صوت سياره برع)) هااا الطيب عند ذجره..يالله باااااي..

فاطمه وبدت ترتبك::باااي

سارت شيخه عنها...وهي سارت الغرفه..كانت كبيره وروووعه... الاثاث.. والستاير..والاكسسوارات...كانه يعرف

ذووقها..يلست على غنفه كانت عطرف الغرفه وبندت الاضائه ويلست تترياه...

شوي وتسمع خطوات مرتبكه تقترب من الغرفه...

ارتبكت وحست بجسمها ينكمش من الخوف..انفتح الباب.. واندفع سالم داخل الغرفه.. ويلس عند اقرب مكان له على

السرير .. شغل الاباجووره وفتح السده.. وطلّع دواه ويلس يتصدد((كانه يدور شي)) يتقدمت منه فاطمه وفي ايدها كوب

ماي وعطته لسالم..سالم خذ الكوب منها وهو بعده هب منتبه للشخص اللي عطاه الماي.. لانه كان بالحييل تعبان.. خذ

دواه وشرب الماي وسمّ بالرحمن وغمض عينه.. بقى لحظات.. وعقبها فتح عينه مثل الانسان المنصدم..رفع عينه وشاف

اللي ما توقعه... فاطمه بشحمها ولحمها توقع الكل الا فاطمه.. وفي غرفته بعد..وقف وتم يطالعها..وهي بعد تمت

تطالعه...آآآه يهالحب اللي بينهم...صدق عشقوا بعضهم.. وحبهم تعدى كل الظرووف..محد ينكر هالحب..كان واضح في

عيون سالم من طفوولته.. وفاطمه ما اكتشفت حبه الا يوم عرفت انه يباها حلاله.. وقتها حست بحبها له اللي خبته طوول

هالسنين... لحظات كانت وعيونهم في عين بعض..حسووبها غير...دخلوا عالم ثاني.. عالم محد فيه غير سالم وفاطمه..

سالم::تولهت عليج يا بنت عمي...

فاطمه وهي مستحيه::تولهت عليك العافيه...

سالم::شو يابج غرفتي؟؟ ومن متى انتي هنييه؟؟ليش ما خبرتيني..((وهو يتطالع غرفته المعتفسه))؟

فاطمه وهي عرفت بشو سالم يفكر::هههههه.. انا ما ييت حق الغرفه.. انا ييت لصاحبها...

سالم::الغرفه وصاحبها رهن اشارتج...اخدمج بعيووني فدييتج..

فاطمه يودت ايد سالم ::سالم انته صدق تحبني...

سالم وهو سرحان بالعيون اللي فتنته::شوو احبج الا امووت فيج...

فاطمه::ممكن تتخلى عني في يوم؟؟

سالم::اتخلى عن كل شي الا انتي يا بعد قلبي...

فاطمه::عيل ليش تبا تطلقني؟؟

سالم انجرح.. وحس بشي ثجييل على قلبه::فاطمه..انتي عرفتي السالفه كلها؟؟

فاطمه::عرفت كل شي.. بس اللي ابي اعرف.. ليش انته ما تباني؟؟ليش تكرهني؟؟

سالم::ما عاش اللي يكرهج حبيبتي...بس انا ما ابغيج تتعذبين ويا انسان مريض..وتعيشين عقب حياتج ارمله... ابغيــ ......

فاطمه وتحط اصابعها على ثم سالم تباه يسكت...

فاطمه::اموت انا ولا انت...عسى يومي قبل يوومك...يعل قلبي يفداك يالغالي...

سالم وهو ماسك ايد فاطمه ويخوزها بعد ما باسها...::يعل عمرج طويل حبيبيتي.. وانا ما بغيت هالشي الا لمصلحتج..

فاطمه::مصلحتي وياك سالم.. انا مالي غيرك.. انته ريلي.. والحرمه لازم تساند ريلها...وانا بكون وياك فتره علاجك.. وان

شالله تتعالج ..وترد لنا احسن عن قبل...

سالم وهو يلعب بشعرها اللي دوومه يتخبل عليه::المرض خلاص تمكن من قلبي...

فاطمه::ربك لا راد شي بيصير.. وهو بيده مرضك وعلاجه...

سالم :: والنعم بالله...فطاامي.. عقب موتي.. ابغيج تكملين حياتج....

فاطمه بدون ما حست حضنت سالم وصااااحت في حضنه...ضمها سالم ودمعت عيينه ...

سالم::حبيبي والله...عسااني ما اذوق حزنج يلغاليه..دخيلج لا تصيحين..ترا دموعج غاليه...

فاطمه::اوعدني انك ما تخليني.. وتم دايم بقربي...

سالم::وعد يا بعد قلبي..وعد..((ومسح دموعها ويلسها حذاله))

سالم:: حبيبتي...عندي لج شووور...

فاطمه::شو هو؟؟

سالم::ابغي نجرّب موعد عرسنا.. ابغيج اليوم قبل باجر...

فاطمه استحت من سالم::بس انا لي الحين ما زهبت عمري...

سالم::ازهبي وانتي وياي...حبيبتي والله اني مستعيل..وبعدين احنا لازم نسافر للعلاج.. والا انتي ما تبين تيين
وياي؟؟

فاطمه::اكيد ابغي اكون وياك..بس عمي ومرته شو بتقوولهم؟؟

سالم::باجر ان شالله الكل بيعرف عن مرضي.. ومحد بيعترض لو جربنا موعد عرسنا...

فاطمه وهي متلوومه منه::اللي تشووفه يا ولد عمي...

سالم::فديييت هالخدوود الحمر.. يعلني ما انحرم منج...

فاطمه:: ولا منك يالغالي.. يالله الحين برووح عنك...

سالم::افا كنت ابغي اسهر الليل كله وياج..

فاطمه::يوم بنعرس ببقى طووول الليل والنهار وياك لين ما تمل...

سالم:: والله لو ما افارقج دقيقه بعدني ما اشبع منج.. كيف تقولين لي بتمل...عمري ما بمل من شوووف هالغزال..

فاطمه وهي خلاااص مستحيه مووووول:: تصبح على خير الحين...

سالم:: وانتي من اهله يا كل الخير بحيااتي..

طلعت عنه فاطمه وهي مستاانسه رغم الخوف اللي فقلبها..

و سالم حس انه بيدش حياه يديده ما كان متوقعنها.. بس للاسف.. قصيره...

 

[ضوى العيون]

][®][^][®][الجزء السادس والثلاثون::][®][^][®][


فاطمه بعد ما ردت جناح اختها..

سلمى::فطاام...شو صار

فاطمه::بسم الله روعتيني..عبالي رقدتي...

سلمى::كيف بييني رقاد وانا ما اعرف شو اللي صار..حتى محمد يحاتي فديته..

فاطمه::خلاص سلامي..انا قررت اكمل دربي ويا سالم..ومهما صار له ترا بيصير لي دامني مرته...وباجر قررنا انه يخبر

العايله كلها.. ونعجل في زواجنا عسب نسافر سوا((قالت جملتها الاخيره وهي متلوومه))

سلمى وهي تضم اختها::فدييتج فطاامي..سامحيني يالغاليه..كان عبالي انج بتتخلين عنه..والله اني آسفه..

فاطمه::ما الوومج سلمى...يمكن رد فعلي خلاج تحسين بها الشي...فديتج والله...انا كيف اخلي سالم...اول انسان واخر

انسان يدخل قلبي..وهو بها الظرووف.. والله لاكمل دربي وياه لو كله ثغرات..وبخليه يتغلب على مرضه..

سلمى::عسى الله يوفقج ويهنيج ياختيه..((وهي لاويه على اختها وتذرف دمووع))

فاطمه وهي تصيح::بس خايفه يا سلمى.. والله اني خايفه.. اخاف ما اكون قد المسؤوليه اللي حطيت نفسي فيها...

سلمى::كلنا وياج.. ومستحيل اتخلى عنج لو مهما صار...

وعقب اتصلت سلمى بريلها وخبرته عن اللي صار بين فاطمه وسالم..وعقبها وطّت راسها ورقدت لانها كانت وااايد تعبانه

من هاليوم الثجييل على الكل... اما فاطمه فما قدرت ترقد وهي تفكر...كيف بتكون حياتها وكيف بتتحمل مرض
سالمهي ما تتحمل اي شي يصيبه..فكيف هالمرض المميتتمت طووول الليل وهي تترقب اليوم الثاني عسب

تعرف اللي بيصير ...

اما سالم..اللي حاله نفس حال مرته ويمكن أردى..كان يفكر كيف بيسعد فاطمهكيف بتتقبل مرضهبتصبر وياه

والا ما بتتحمل فتره علاجه

عاهد نفسه انه يعيشها احلى ايام عمرها دامه له في الدنيا القليل..قال لازم يراويها احلى الايام وحبه لها..عسب تذكره

عقب موته..يلس يفكر..عقب موته كيف بيكون مصيرها بتحب غيرهبتكمل حياتها ما يعتقد لانها كانت تحبه

حب جنووون..لاحظ هالحب في عينها..قرا في عينها احلى الكلام..واغلى احساس..

في اليوم الثاني ..الكل اصبح وفي باله الف والف سؤال.. الف هم .. والف فكره...كيف بيتصرفون.. وكيف بيفتحون

هالموضوع للعايله...

الظهر بعد ما رجع بوسالم..خبره سالم انهم يبون يرمسوونه وعقب الغدا وكالعاده...

اجتمع بوسالم في عياله (سالم ومحمد) وخبروه اللي صار..طبعا ما قالوله التفاصيل.. بس قالوله ان سلمى رمست اختها

وفاطمه موافقه انها تبقى مع ريلها طول العمر.. وتتحمل المرض وتوقف وياه فتره علاجه..وطبعا بوسالم طلب
انه ييلس ويا بنت اخوه ويسمع رمستها.. وفعلا يت فاطمه وقالت له انها تبا تتم ويا سالم.. كانت عيون سالم عليها وهي

ترمس.. كانت مستحيه ومتلوومه..اما هو فرحان رغم الجرووح اللي فقلبه..فرحان لانه عرف قدره عند اغلى ناسه.. فرحان

لانه بيخلي هالدنيا وهو متطمن ان فاطمه تبادله الحب..

بو سالم اتصل فاخوه وطلب منه هو وعايلته انهم ييون العين..واتصل في بنته شذى عسب تيي بيت ابوها.. لانه بغا

يجتمع في الكل.. ويقوولهم عن مرض سالم..

المغرب عقب الصلاه الكل كان موجود في بيت بوسالم ...

عايله بوسيف((بوسيف و ام سيف..فاطمه و ميره و سواف))

وعايله بوسالم طبعا((بوسالم وام سالم..محمد ومرته سلمى ..وسالم وشذى ومريم وشيخه )) الكل كان موجوود في

الصاله.. وبدا اول شي بوسالم يذكر آيات قرآنيه تصبرهم قبل لا يخبرهم بالموضوع.. وبدا يتكلم في الموضوع.. كان

صعب عليه وااايد..لكنه انجبر..بما انه كبير العايله فلازم هو اللي يقووللهم هالموضوع.. ولان سالم ما قدر يخبرهم..قلبه

ضعيف صار.. ما يتحمل نظراتهم او ردود فعلهم...الكل انصدم..

اولهم شيخه..هالانسانه واايد تحب اخوها متعلقه فيه للجنون.. كانت حاسه لكنها تبعد هالافكار والحين تنصدم بشي

اكبر.. ما توقعت اللي فيه سالم مميت.. وام سالم قطعت قلووبهم من صيااحها الهادي..كانت هاديه كعادتها.. ودموعها

تحجرت..تمت تصيح بسكاات..فاطمه طبعا من البدايه كانت تصيح ..يعني الكل الكل كانت حالته ماتسر..

بوسالم::والحين يا اخوي..بغيت ارمسكم عن موضوع سالم وفاطمه...شو رايك فيه

بوسيف وعيونه على بنته وسالم::فاطمه بنتك يا خوي..قبل لا تكون بنتنا.. لكن الراي رايها بالاول والاخير..

بوسالم وهو صاد صوب فاطمه::يا بنتي الحين والكل موجود...شو رايج باللي سمعتيه. وشو آخر قرار لج

فاطمه وهي عيونها على امها اللي بكت على بنتها وصاحت خووف على مستقبل بنتها..:: انا ياعمي.. ما اتخلى عن

ريلي.. ها اللي علمتني اياه الغاليه..الحرمه تكمل دربها ويا ريلها.. مهما كانت درووبهم...تكون وياه بالحلوه والمرّه..

((وقامت تيلس حذال امها وتلوي عليها)) هب صح يالغاليه

ام سيف وقلبها تقطع على بنتها..مسحت على راسها بحنان مبالغ فيه وبخووف.. كانها بنت صغييره::لا خلاني الرب منج

يالعاقله..دوم كنتي كبيره بعيني.. وهالكلام اللي اسمعه خلاني افتخر انج بنتي..صح يابنتي.. الحرمه تلازم ريلها

بالحلوه والمرّه..يعل الفرحه دووم بدياركم...

فاطمه لوت على امها::ما ابغي غير رضاج يالغاليه...

ام سيف::راضيه عليج دنيا وآخره..

الكل صاح على هالموقف اللي صار.. حتى الكبار((بوسيف وبوسالم)) دمعت عيونهم..فاطمه ضحت بكل شي عسب تبقى

ويا سالم.. وهي تعرف انه ما بقاله في هالدنيا الا القليل..

وبجذييه..اتفقوا على انه عرس سالم وفاطمه بيكون على نهايه الاسبوع الياي..يعني فاطمه جدامها اسبوعين عسب

تجهّز عمرها...كانت فرحتهم ميته بسبب هالخبر اللي اسمعووه عن ولدهم..لكن سالم اصّر انهم يفرحوون بعرسه.. وطلب

منهم انهم يفرحوون له ويسوون له عرس ما صار ولا استوى في الامارات بكبرها..الكل كان حزيين.. مر هاليوم عليهم

وكل واحد شاال في قلبه اكبر همومه.. كيف تتخيلون حال ام سالم.. وهي تسمع انه ضناها وبجرها مريض بمرض ماله

علاج.. شيخه اللي كانت قريبه من اخوها كيف كان حالها.. كان ما يسر..وميره حزنت على قرار اختها..كانت معارضه من

البدايه..لكن مالها حيله.. ام سيف..كانت وااايد حزيينه على حال سالم.. وبنتها كيف بتكون وياه

الف والف الف سؤال كان يدور في كل فرد في العايلتين.. كيف بيكون مستقبل فاطمه وسالم؟؟ وكيف بيتغلب على
المرض...

 

[ضوى العيون]

][®][^][®][
الجزء السابع والثلاثين::][®][^][®][

مثل ما تعرفون انه عرس فاطمه وسالم تجدّم وصار على نهايه الاسبوع الياي..فاطمه كانت تزهّب عمرها في الفتره اللي طافت..لكن
الحادث اللي صار لها..وسالفه مرض سالم.. عطّل عليها الموضوع...وشرات ما كانت تسوي قبل ..ردت للمركز الاوروبي للتجميل..لان آثار
الحادث بعدها عليها.. من الارق والتعب ..

وسلامي بعد ما قصرت ويا اختها..كانت من صوب تزهّب اختها وتسير ويا محمد عسب تتشرى لها..أما سالم ارتبش في بطايق العرس

وتوزيعهن... والقاعه وهالسوالف تراها على بوسالم..وحتى شيخه وميره ومريم ارتبشن وسارن يتشرن لهن فساتين واكسسوارات

وسوالف البنات اللي ما تخلص لووووول...

صح انهم ارتبشوا وفرحوا من خاطرهم..لان هالعرس يا في وسط المشاكل والظرووف اللي مرت فيها العايله..لكن بعده موضوع مرض

سالم مضايقنهم..لكنهم يحاولون يفرحون ويخلون سالفه المرض على صووب.. شرات ما طلب منهم سالم....

أما علي اللي وصله خبر زواج فاطمه وسالم..صح ان صدمته كانت كبييييره ..لكنه ما بغا لفاطمه الا كل الخير.. وفرح لفرحتها((مسكين

هالانسان طيب وااايد))..بالعكس اصّر على امه واخته انهم يحضروون العرس...لان شهد ماكانت بتحضر اول شي لانها ما تتحمل تشوف

سالم وهو يدخل حياه يديده وهي مالها طرف فيها...وبعد احترام لاخوها واحساسه تجاه فاطمه..لكنه اصّر عليها وهي ما بتقدر ترفض

له طلب... وهي مسكينه ما تعرف الظرووف اللي يمر فيها سالم.. وسبب تعجيلهم بالعرس..

وسالم بعد حجز لهم ((هو وفاطمه)) تذاكر سفر لألمانيا عسب العلاج...

بقى على عرسهم اسبوع..طبعا تعرفون ربشه فاطمه.. عروس ما تنلام.. كانت متوتره.. كل يوم يزيد خوفها من الحياه اليديده اللي

بتدخل فيها... لكن ايمانها بالله وحبها الكبير لسالم خلاها تتمسك بهالحياه.. وتتمسك بالامل.. وزاد اصرارها على حبها وتمسكها

بريلها وحبيبها..سالم...

كانت فاطمه وشيخه وميره وسلمى وكانت وياهم بنت شذى الصغيييره.. في واحد من المولات..كانوا يدوّرون طقم للعروس.. تلبسه في

حفله عرسها..

شيخه::بسج يالطفسه...ياربيه كله منج ميرووه...شوفيها هب طايعه تيلس...

وكانت بنت شذى تيّر شيخه تباها توديها صوب محل الالعاب...

ميره::ههههههههههه... فديتها والله عسووووله هالبنت.. هاتيها عنج..انا بوديها ..

سلمى::انتي سيري وديها.. واحنا بنسير المحل اللي حذالكم..بس لا تتحيرين...

ميره وهي شاله بنت شذى ::ان شالله.. وانتوا لا تبتعدون..

فاطمه::ما عليج..لا تتحيرين...

ابتعدت عنهم ميره تبا محل الالعاب عسب تودي بنت شذى.. دخلت المحل وخذت كمن لعبه اختارتهن الصغيره..وهي تحاسب ما انتبهت

لها..انها ظهرت برع المحل..شوي يوم تصددت ما لقتها.. زاغت عليها((يا ربيه انا ناقصتنها..برووحي مترووعه اتمشى برووحي وياها
بعد تخوز عني..وين سارت الحين وين ادورها))

ردت داخل المحل..وتمت تدورها...من بعيد لمحت واحد شالنها.. ويلاعبها.. تقربت منه وهي معصبه((نست انها هب متغشيه)) وسمعته

يسالها..وين ماماوين بابا

الريال لاحظ وحده تتقرب منه...رفع نظره.. وطاحت عينه عليها.. ماشالله عليها.. جمال وجسم..الله يحفطها..

ميره انقبض قلبها من تلاقت نظراتهم..تلاحقت عمرها وتغشت((بس عقب شوو؟؟شافها الريال وخلص))..

ميره::اخوي ممكن تعطيني البنت

علي::السموحه منج الشيخه...((وهو يرمس الصغيره)) سيري حبوبه عند ماما...

بنت شذى::هاي خالووه ميله..ماما محد...(بصوتها الطفوولي))

ميره في خاطرها((فضحتينا))

علي::سيري حياتي عند خالوه..لاتخلينها مره ثانيه..انزين..

بنت شذى::اندييييين((وعطته بووووسه عخده))

علي::لا خلاني الرب منج...((ويكلم ميره)) حطوا بالكم عليها.. زين انها ما ظهرت برع المحل..

ميره::مشكوور اخوي...((وخذت الصغيروونه وظهرت برع المحل))

شهد::علوووووووي..منو هاي اللي ترمسها((لهجه تتغلس فيها عل اخوها))

علي::لا اله الا الله..بدينا نشك اونّا.. شدراني ..هاي اللي وياها يتني.. وانا ريتها.. ويت تاخذ بنت اختها عني...

شهد::بعدتعرف انه هاي بنت اختها.. اسميكم يالشباب هب هينين...هههههههه

علي::بس عاد يالدبه..خلصتي انتي مشترى

شهد::هيه.. بس ابغي اسير المحل الثاني((وتاشر عليه))

علي::خلاص يالغاليه من عيووني...

شهد::تسلم عيونك اللي بغت تلحق البنت..

علي::يا ربيه.. هاللي يعطيكم ويه...يالله جدامي..


في المحل الثاني..

ردت ميره عند خواتها.. وهي تفكر بالانسان اللي شافته.. بعمرها ما اهتمت لنظرات اي شخص..هي كانت تعرف

انها تلفت الانظار بجسمها الغاوي وشكلها الحلو ..لكنها ما كانت تكترث لحد..بس هالانسان نظرته غييير.. فيها شي غامض...شي

خافي...((ميره من الاشخاص اللي يتقنون لغه العيون وقرايتها)) وبسرعه ابعدت هالافكار من بالها..وانشغلت ويا البنات...

شيخه::فطاامي...شوفي هاللون..والله انه حلو عليج..

فاطمه::والله سلمى شرايج

سلامي::هييه... بس لازم تختارين لون التحديد بعد شراته..

فاطمه صدت صوب ميره اللي توها يت::ميره.. تحيرتي علينا...

شيخه::انا قلت ضعتي هههههههه

ميره::هب مني.. من بنت اختج..ماشالله عليها.. تعرفون انها سارت صوب ريال.. لومتني وياه..

سلمى::ههههههههه خس الله عدووها..شو سويتي...

ميره::شو بعد استسمحت منه.. وظهرت..

فاطمه::أسميها ههههههه عذبتج عيل ههههههه

صدت شيخه صوب البنت اللي دشت ويا واحد.. وتمت تناظرها لين ما شلت غشايتها.. وعرفتها على طووول..

وشهد بعد من شافت شيخه ابتسمت لها ويت حذالها((هي ما انتبهت للي وياها))

علي من شاف انه بنات في المحل.. ظهر وتم واقف برع.. عسب تخلص اخته ويحاسب عنها..بس هو لاحظ انه البنت الصغيره اللي شافها

توه وياهم...

شهد سلمت على شيخه وسلمت على اللي وياها...طبعا فاطمه عرفتها.. بس ما تضايقت منها ولا شي.. بالعكس ..فاطمه انسانه عاقله..
وتعرف انه شهد خلاص مالها علاقه بسالم..

شهد عرفت فاطمه وباركتلها بالعرس.. وتمت وياهن يتشرن وجي...اما ميره فاستغربت انه هالبنت تعرف خواتها..وتمت تفكر فيه.. منو
هالريال اللي وياها

عقب ما روحوا البيت.. تمن البنات يسولفن.. وجي.. وطبعا من السوالف يابن طاري شهد..

فاطمه::انتي يالدبه من وين تعرفينها

شيخه::اعرفها من وحده ويانا.. اسمها هيفا...((وخبرتهم سالفه شهد.. وكيف عرفتها.. وليش بغت رقم بيت بوسيف))

فاطمه وهي تتطالع اختها ميره::ههههههههه.. يعني اللي وياها كان اخوها..

شيخه::هي ها اخوها..هي عندها 3 اخوان.. واحد معرس وبعيد عنهم.. والثاني صغير توه في الثنويه.. وها اخوها الكبير..

ميره عرفت ليش فاطمه تشوفها بها النظرات.. وما تدري ليش حست بشي من الفرح بداخلها..واستحت من احساسها..

فاطمه وهي ينغز اختها::ميره حبيبتي.. حرااانه اشووفج محمره...

ميره::جب يالدبه..((وفرت اختها بالمخده))

سلمى::بلاكن انتي وياها...عنبووه دومكن تتناقرن

ميره::اساليها هيه..ليش دوم تضايقني...؟؟

فاطمه::هههههه..خلاص خلاص..

 

[ضوى العيون]

][`~*¤!||!¤*~`][الجزء الثامن والثلاثون::][`~*¤!||!¤*~`][

في سياره علي...

شهد::تعرفهم هاييل اللي شفناهم

علي::منو هالبنات اللي في المركز مساعه

شهد::هييه..عرفتهن

علي::لا..منو يكونن؟

شهد::بنات بوسيف..

علي انقبض قلبه::اهاااا..وهاي اللي ميوده الصغيروونه منو تكون

شهد وهي تبتسم::هاي ميره..اخت العرووس..

علي وكانه يحس بانه فاطمه صارت ماتهمه::ايواااا.. عيل هاي ميره..

شهد::ها ياخوي.. اشووفك مهتم فيها..خير ان شالله؟؟((وهي تتبسم وفرحانه من حال اخوها))

علي::ما اعرف شهووود..بس ليكون هاي نفسها اللي تباها الوالده تكون لي

شهد::هههههههه هييه هي هاي البنت...حلوه صح

علي::بصراحه ..هييه...((يحاول يغير الموضوع))الا تعالي ..خذتي كل اللي تبينهما نقصج شي

شهد وهي فهمت قصد اخوها::لا بسني..تعبانه ابغي ارد البيت..مشكوور اخوي..لا خلاني الرب منك ان شالله.. وعساني افرح بفرحك يالغالي...

علي ابتسم وتم ساكت عنها..

طول الوقت تم يفكر في ميره..صح انها ما حركت مشاعره شراات اختها فاطمه..يمكن احساسه بفاطمه..لانها ذكرته بميثا..حب

طفوولته.. فاطمه لها نفس نظرات ميثا البريئه الطفووليه.. وابتسامتها..اللي توضح غمازاتها..كانت تشبه ميثا فيها واايد..بس ها اللي

خلاه يتمسك بفاطمه..احساسه برووح ميثا فيها.. لكن ميره..غيير ..كانت غااويه ماشالله عليها.. صدق تم يفكر فيها..بنت حشيم وفيها

رزاانه..رغم سنها الصغير لكنها عاقله..يلس يفكر فيها وااايد...

آآه يهالقلب اللي ما يرسى له على بر... موج طاغي.. ما يرحم.. يضيع باحاسيسه ويضيع صاحبه وراه.. اعترف علي لنفسه.. انه قلبه

نسى الحب وعناوينه...لكنه ما يأس من الحياه.. كلام اخته شهد .. وحال امه اللي تبا تفرح به.. خلاه يفكر بجديه ..بسالفه ميره.. ماشالله
الكل يطريها بالخير.. اخته تمدحها .. وعايلتها ماشالله الكل يشهد بمكانتها.. وحتى ام علي.. ما خلت شي ما مدحت فيها.. وفوق ها
كله جمال وحلاه.. ومنطووق شرات العسل..

وعزّم عقب تفكير..انه يرمس امه.. وتسير ترمس ام سيف عسب يخطب ميره..

باقي عالعرس يومين...

سلمى تزهب شنطه اختها وتساعدها على ترتيبها..

فاطمه::سلامي والله بديت اخاف..

سلمى وهي حاسه بخوف اختها..كانه هالخوف بصدرها..

سلمى::لا تخافين يالغاليه..احنا كلنا بنساندج.. وسالم اكيد بيداريج..وبيسعدج..

فاطمه::فدييت هالطاري.. ليت اللي فيه فيني.. ياليت افداه بقلبي واشوفه مهتني بحيااته.. ويعيشها وهو فرحان بها.. وياي..

سلمى وهي حاسه بغبنه خنقتها..

فاطمه::فديته..تحيدين ايام الحادث..ما خلاني دقيقه..كنت احس بوجووده..رغم ان احساسي بالدنيا كان معدووم..كانه هو دنياي
وحياتي كلها..احبه ياسلمى ...اخاف عليه من النسيم..فكيف وهالمرض اللي ما اعرف شو نهايته..((دمعت عينها))

سلمى لوت على اختها وهي حاسه برجفتها.. فاطمه تحاول بقد ما تقدر تقتنع ان سالم بيتشافى.. وطبعا الاحتمال الثاني ما

نسته..لكنها مؤمنه ان سالم بيتغلب على مرضه..

مرّ هاليوم بسرعه.. وصار العرس قريب.. ما بقاله الا ليله وحده.. وبتصير فاطمه مرت سالم للابد.. وبتعيش وياه..طوول حياته.. اللي ما

يعرفوون مداها..قصيره والا طويله..

البنات سارن الصالون عسب يتحنن.. ويجهزون العرووس..

وصح ما قلت لكم..حمد عرف ان بنت خالته اللي بغتها امه من نصيبه عرست وصارت ملك لثاني..وبجذه رد حمد يرمس امه عن العنود..

وهي مالها حيله غير انها توافق..

حمد اتصل في ربيعه سالم::السلام عليكم والرحمه

سالم::وعليكم السلام والرحمه.. يالدب وينك.. تعال تلاحق عى اخوك.. ما اعرف شو اسوي.. ما زهبوّا عقالي.. اونه يباله

يوم..وباجر عرسي..بنتحر انا ..

حمد::هههههههه يحليله المعرس.. لا تعصب يابووي.. باجر ليلتك..خلاص الحين ياينك..انته وين؟؟

سالم::انقفض قبل لا انتحر او اسوي جريمه هنييه((ويخبره عن مكانه))

حمد::هههههه لا يابووك يوّد عمرك..الحين بييك.. لا تتهور..

سالم::انا وين وانته ويناقوولك متغصص منه وانته تقولي لا تتهور..

حمد::يالله ياينك..تراني جريب.. شوي وبكون وياك..

دقايق ويوصل حمد عند سالم .. وتفاهم وياهم لين ما قالو له يمر عندهم العشا وبيكون عقاله زاهب..

حمد::خلاص أخ سالم.. ارتحت الحين

سالم::هي مرتاح.. خلاص سير.. حفظك الرحمن

حمد::يالنذل..عنبووك توك حاشر البقعه والحين ما تباني..

سالم::هههههه خلاص خذت اللي اباه منك...شو بعد؟؟

حمد::والله انك خام عيل.. تعال بخبرك شي وااايد حلو..

سالم::شووو

حمد::شو بتعطيني قبل

سالم::تعرف الكف تراه بيعطيك احلى واغلى طراق لاقيته...شووو رايك

حمد::خيبه خيبه.. وها باجر عرسك.. الله يعينها مرتك عليك والله..

سالم::آآآآه فدييييت هالطاري.. تعال بس بعطيك بووسه..

حمد ويفر سالم اللي يحاول يلوي عليه::قووم فضحتنا خسك الله..ما ابغي بووستك تلوع بالجبد..

سالم::يالخاام جان بوستي انا تلوع بالجبد..عيل منو بووسته الحلوه هااااا

حمد::العنووود فديتها...

سالم::احم احم..ياخي حشم اللي وياك على الاقل ..بلاك قمت تعق خيط وخيط...بعدين خبرني شو سالفتك اليوممتنوومس ماشالله..عله دووم بوشهاب

حمد::خلاص.. العنود ان شالله من نصيبي..هاييج عرست وخلاص.. هم وانزاح..

سالم::يالله بالبركه حبيبي والله انك تستاهل..بس سير اخطبها عن تغير عيووزك رايها..

حمد::ههههههه والله انها تسويها.. بس احنا حددنا يوم نسير لهم ..يوم السبت ..اتصلت بهم الوالده وخبرتهم..

سالم::بالبركه ياخوي..

وبجذييه.. خلاص حمد بياخذ العنود اللي طال انتظارهم لبعضهم... وعلي قرر ياخذ ميره اللي مقتنع منها.. اما سالم وفاطمه.. بيبدا باجر مشوار حياتهم ...

 

[ضوى العيون]

الجزء التاسع والثلاثون::

الليله احلى ليله عند العايلتين.. ليله تجمع احلى ثنائي.. واغلى عرووسين.. الليله ليله فاطمه وسالم..ليله بدايه حياه

حلوه كلها حب..ليله كان سالم يترياها.. وفاطمه كانت تحسب الليالي عشانها..

الوقت 5 العصر..يت الحرمه اللي بتعدل العروس وباقي البنات..

اتصلت شيخه بفاطمه وخبرتها انها بتي عقب شوي..والكل تيمع طبعا عند العرووس..

وبدوا يدخلون عليها ويسلمون عليها..واللي ينصحها واللي يعطيها هديه زواجها..

سلمى+ شيخه+ ميره+ مريم+ شذى وبنتها كلهم متيمعات في غرفه ميره.. وكل وحده مرتبشه بعمرها..

اما فاطمه فكانت في غرفتها..ويا امها.. اللي ماخلت بنتها.. وهي تدعيلها وتنصحها ((تعرفون هاي الليله وايد مهمه للعروس..ولازم
تاخذ فكره انسانه فاهمه وعاقله شرات ام سيف))

خلصن البنات من التعديل..ويا وقت العروس..شذى وبنتها وميره ومريم والحريم راحن القاعه.. وما تم في البيت الا فاطمه اللي يالسين
يعدلوونها ويمكيجوونها.. وسلمى وشيخه يالسات وياها..

صارت الساعه 8.. لبسوا فاطمه الفستان وغدت قمر..ما شي بحلاها..تطيح الطير من السما.. جمال وبياض.. وعيون يذووب بها

الواحد..وشفايف توت.. وخدود موردات.. ها كله وسواد شعرها وطوله بصووب.. كانت تسريحتها بسيطه..ومكياجها بسيط.. لان جمالها
طبيعي .. مايباله مكياج..وجسم غاوي.. عود رويان ماشالله عليها..

اتصل بهم بوسيف..وقالت له سلمى ان العرووس ازهبت.. وقال انه بيمر عليهن عسب ياخذهن القاعه..

وبجذه ودعت فاطمه بيت ابوها وهي رايحه القاعه..

ارتاحت قبل فاطمه من التوتر اللي هي فيه..وتمن الحريم يدخلن عليها قبل لا تنزل تحت.. ويسلمن عليها ويباركن لها.. حتى ربيعاتها

اللي كانت وياهن في المدرسه ينها يسلمن عليها..

وصارت الساعه 9 ونص..وقالولها انها بتنزل القاعه عقب شوي.. كانت فاطمه متوتره واايد..وسمت بالرحمن.. وانزلت القاعه..

كانت زفتها قصيده

اقبلت يا قبــــلت الله في حــــلاها .. شمعة الدنيا ضوت ليل العمـــــر ..

اقبلت والكل يمشي من وراهــــا .. وانثنى من زينها ليل السهـــــــــر ..

هيه صبا شمس تعلت في سماها .. هي ملاذ الارض في وقت السحر ..

من شذاها تاخــــــذ الدنيا شذاها .. لا دخون ولا عبير ولا عطــــــــر ..

يا هنيك يا بها فزت بغلاها .. فزت بلي نورها شمس وقمـــــــــــــــر ..

الخزاما والنفل ريح لهواها .. لا مشيت ريح البسيطة ينتـــــــــــــــثر ..

ربي هوه الي وهبها ثم عطاها .. في حلاها وزانها بأحلى الصـــــور ..

عالية في زينها وفي مستواها .. ما تشوف بزينها بين البشـــــــــــــر ..



كانت فااطمه تجنن.. الكل كان يسمي عليها..

مشيتها مشي الغزال.. مشي الهوون..وعيونها الواسعه الحلوه يغرق فيها من هواها..ونظراتها كلها سحر ودلال.. اما شعرها شلال

منساب بلون الليل.. وثغرها لاتبسمت.. كانها ملاك بحلاها.. كانت مثل الحلم.. رووعه بكل مافيها..

كانت متوتره واايد..لكنها تمت متمسكه بيد اخوها سيف اللي كان يمشي حذالها..عسب يوصلها..ويضغط عليها عسب يحسسها

بالثقه..وما شالله عليه سيف كان غاوي ..رغم صغر سنه..الا انه كان سيد الرياييل..وصلت فاطمه كوشتها كانها وصلت لمأمنها..

وارتاحت على كوشتها كانها حوريه.. او ملكه من ملكات العصوور اليديمه..ظهر سيف متلوم من القاعه.. وسار صوب الرياييل بعد ما

سلم على اخته وتطمن عليها..وتمن البنات يتصورن ويا العروس على الكوشه((تعرفون البنات ما يفوتن هالسوالف لووووول))

اما ام سيف كانت في حاله ثانيه.. كانت فرحانه لان بنتها خلاص صارت عرووس وشافت زفتها قبل يومها..ومن صوب ثاني كانت في

حزن لان بنتها بتفارق البيت اللي ربت فيه وايام طفولتها فيه.. وبتبدا بدايه حياه.. نهايتها معرووفه..((الله يسعدج يا بنيتي.. ويسعدج

ان شالله..ليتني ما اذوق حزنج يالغاليه))

نسير شوي صوب سالم...


سالم برووحه كان في حاله..متوتر وحالته لله.. وفرحان في نفس الوقت.. واخيرا بيصير اسير فاطمه.. وفاطمه بتكون له وقربه في كل
اوقاته...
سالم::يالله يا بويه.. متى بدخل

بوسالم::اصبر ..شو بلاك؟؟عنبووك كانك اول واحد يعرس...اثقل..

سالم::يابويه برووحي في حاله..لاتزيدني..ابغي نظهر بسرعه.. ما ابغي اتم هناك وايد..

محمد::ههههههههه .....لا تلوومونه..حاس فيه تراني.. من اسابيع كنت في مكانه(يصد صوب سالم)الله يعينك ياخوي..

سالم::محد فاهمني غيرك..

بوسيف يايينهم من بعيد::هااا بلاكم متيمعين

بوسالم::الولد استخف يا خوي.. ما ادري بلاه ..ما جنه دقايق وبيدش القاعه...

بوسيف::يحليلك يا ولد اخوي.. ما عليك هوّن عليك انته بس..

صارت الساعه 10 وقال بوسيف انه بيدخل سالم القاعه..

سالم وبوسيف وبوسالم وياهم سيف بعد مره ثانيه دخلوا القاعه.. كانت الاجواء في قمه الرووعه...

سالم كان وسيم ماشالله عليه.. طووله الحلو.. وعرضه الاحلى..وعيوونه الناعسه وابتسامته اللي تذوب البنات وتسحرهن..مشى وعيونه

تدور على اغلى ناسه.. وكانت هي آخر الاستيج...عيونه غزتها..كانت اميره فاتنه من بعيد حس بقلبها اللي يتنافض في مكانه...وهو
يتجدم يتفداها في خاطره ويزيد شووقه لها..

وصل عندها...ورفع ويها باصابعه برقه.. وباسها على يبهتها..ووقف حذالها وايده ما خازت عن ايدها.. كانه يبين للكل انها خلاص
ملكه برووحه.. ما يبا حد يشووفها او يلمسها..

يلس حذالها شوي وتعرفون المصوره ما خلتهم في حالهم..الا اوقفي جي,,وسووّ جييه وهالسوالف.. وعقبها الساعه 11 ونص خلاص

سالم قال لأمه انهم بيظهرون..عسب يرتاحون..

وبجذه زفوّا العروسين في احلى ليالي العمر...وبدت الحين حياتهم اللي رسموها وكل واحد منهم بيتمسك بالثاني...

وصلوا احلى عروسين الفندق..ودخلت فاطمه تبدل ثيابها.. اما سالم سار يابلهم العشا...يلسوا يتعشون وسالم متنوووووومس من

الخاطر..لان فاطمه خلاص صارت حلاله وملكه..وفاطمه صح كانت مستحيه..بس سالم ماشالله عليه يخلي الواحد يتعود عليه بسرعه..

بعد العشا يلس سالم على طرف السرير.. وفاطمه كانت يالسه مجابله المنظره((تعرفون البنات موتهم وحياتهم جدام المنظره))

سالم::غناتي والله انج حلوه.. تعالي قربي ابغي احس بوجوودج...

فاطمه::عيوونك محلتني...ان شالله يالغالي..

وقامت ويلست حذاله...سالم مسح على شعرها برقه وتم يتامل ملامحها اللي دومه غرقان فيه..وهي كانت متلوومه منه ..

سالم::غناتي ...تحبيني

فاطمه::الحب لو بالكلام..جان خلص الكلام ولا وفيته حبك معناه...شوف عيوني..وانته تفهم اللي فخاطري..

سالم::يعلني ما اخلى منج.. ولا من منطووقج العسل..

وكانت هاي ليله اجتمع فيها اغلى واروع حب في قلوووب هالشخصين...

 

[ضوى العيون]

الجزء الاربعين::


علي::يالله امايه جان بتسيرين لهم..ما ابغي اتحير على الشباب..

ام علي::يالله ان شالله ان شالله..الحين بخلص..هيّد عليه..

علي::انا اترياج في السياره..

وتظهر ام علي من الغرفه وعباتها في ايدها::ها ييت..عنبووك حشرتنا..

علي::اسميج يالوالده تتحيرين...هب مكياج تحطين الله يهداج..

ام علي وتلبس برقعها..وعلي يشوف امه منبهر..ام علي رغم كبر سنها..الا ان ملامحها حلوه وااايد..عيونها الوساع اللي خذهن علي

منها.. وخشمها سيف مسلول..ماشاالله عليها..

ام علي::شو ها مكياج بعدتحيدنيه من بنات هاليومين

علي::هههههه لا لا ..خلاص يالله نسير...((ويزاعج))شهدوووووه

شهد تظهر من المطبخ::ها شو بلاك؟؟ليش تزاعج؟؟

علي::اقول ترانا طالعين ..تبين شي؟؟

شهد تبتسم::لا الغالي ما ابغي غير سلامتك..

علي::يالله عيل في امان الله..

ام علي::حطي بالج عرووحج..

شهد::ان شالله..مع السلامه..

شهد ردت المطبخ وفي قلبها هم كبييير..امس شافت فارس احلامها.. وحبيب قلبها.. يسير لغيرها..بس في نفس الوقت كانت فرحانه

لفرحته..الكل لاحظ ان سالم اكبر من فرحااان... واايد متنومس كان..خصه يوم سلم على حرمته..كانت عيونه انانيه في شوف حبيبته..ما

يبا حد يشوفها غيره..الله يوفقك يا سالم ويهنيك بغلاك ومرتك...عساني ما اذوق حزنك...والله يصبرني عنسيانك..

هذا كان حال شهد..اللي سارت العرس بس عسب تقنع نفسها ان سالم صار لغيرها...وانه بدا حياه..اسم شهد لا وجود فيه..

نسير صوب المعاريس...



فاطمه نشت من وقت..اصلا هي ما عرفت ترقد.. في مكان غير ..ما تعودت عليه..نشت وسبحت وبدلت ثيابها.. ويلست

تنشف شعرها.اللي دوم يتعبها في هالسالفه..ماشالله من طوووله..محد يلومها..تذكرت ليله امس..وكيف صارت مرت وحبيبه سالم فارس

احلامها..ابتسمت ابتسامه تملاها النشوه والفرحه اللي غمرتها...وصدت وراها تشوف فارس احلامها اللي مرتاح في رقاده..شكله

غرقاان في منامه..يعلني ما انحرم من شوفك..وردت مره ثانيه تتعدل..وعقبها قامت وزهبت له الريوق..ويوم ردت الغرفه..لقته راقد

بعده..شافت الساعه ولقتها 11..قالت لازم توعيه..تمت تتطالعه.. ما عرفت شو تسوي..وكيف توعيه..كانت متلومه منه..ومستحيه

موووت..بدت تزقره..

فاطمه::سالم...سالم...

سالم وهو يتغطى زياده..بحركه تغيضها::هااا...شووو

فاطمه ياربيه شو اسويبه::يالله عاد..بيستوي الظهر وانته راقد...

سالم وصوته التعبان::ما ابغي ..ابغي ارقد..

فاطمه::برايك..ارقد..انا بسير عنك..((وقامت من مكانها))

بحركه سريعه ياها سالم من وراها.. ويرها من ايدها::تعالي تعالي..


فاطمه زاغت..منه::قووم عني..يالدب ..

سالم لاوي عليها وهو يضحك::منو يقدر يخوزني عنج..ههههههه

فاطمه وبدت تضحك::ههههههه..بس عاد يالله ....

سالم وخلاها ترتاح عقب ما اتعبت من الضحك::خلاص هديتج..

فاطمه::ههههههه..الله يخس عدووك..عورني بطني من الضحك..

سالم::سلامه بطنج يالغاليه..(وتم يطالعها)احبج يالغاليه..احبج يا اغلى ما عندي..

فاطمه وهي متلومه من رمسته::انزين الحين بتقووم.. والا بنتم وايد عالفراش؟؟

سالم:::لا لا خلاص.. انا عندي مفاجأه لج بعد..خليني اقووم..

فاطمه::الحين انا اللي اخليك تقووم؟؟ما ادري منو هاللي من متى اقووله ينش ولا براضي..

سالم::خلاص قاااااااااااايمين...

وعقبها يلس وياها يتريق..وقاموا يسولفون شوي.. وعقبها قال سالم..انهم بيسيرون يسلمون على الاهل..وخلاف بيسيرون صوب

دبي..بيتمون فيها يومين.. وعقبها بيسافرون..المانيا...

تغير شكل فاطمه من ياب سالم طاري السفر والعلاج.. وهو حس فيها..يلس حذالها ومسح عشعرها..

سالم::فديتج يالغاليه..ليتني اموت ولا اشوف نظرات الحزن والخوف في عيونج...

فاطمه ::لا بعيد الشر عنك..سالم انته كل ما عندي.. اتحدى هالعالم كله عشانك...

سالم تم سرحان وعقب عد هالبيتين على فاطمه::


افرض اني يا غناتي قبل اشوفك انتهيت..
..................خاطري اعرف شعورك قبل ما يفوت

الفوات..افرض اني مت وانته لا علمت ولا دريت..
................ وش مصيرك كان قالوا من هواك اليوم مات...؟؟؟

فاطمه غزا الحزن قلبها.. واعتصر فوادها من همها على ريلها..

فاطمه بعد تفكير..حطت ايدها على ايد ريلها وعدت هالبيتين::


قبل لا اوصف شعوري تراني في حبك ابتليت..
.............................واعشقك ياخلي من يومي للممات..
لا تقولي يا غناتي اني بهمك ما دريت..
.............................انا اقرب لك من همسك والاصوات..
لا تطريلي يومك ليتني قبلك انتهيت..
..........................لا تقولي فديتك دمعي اصبح كالفرات..
كم مره قلت يا سالم ونهيت..
..............................خلّ عنك هالطاري واهتني بالحيات..

خذها سالم في حضنه..بالحييييييل..حست بهالحضن بامان الكون
كله..بالحب كله..سالم يا اغلى من روحي عليه..

 

[ضوى العيون]

الجزء الواحد و الاربعين::

بعد يومين ومثل ما كان مخطط له..سافر سالم وياه شريكه حياته فاطمه..

كانت طيارتهم 12 الظهر..

الساعه 9 الصبح في بيت بوسيف..فاطمه وسلمى في الغرفه اللي جمعتهم سنين حياتهم وطفولتهم..

سلمى::فطامي انتي متاكده انج ما نسيتي شي؟؟

فاطمه وهي ماخذه الدبدوب اللي هداها اياه سالم في ايام ملجتهم::هيييه فديتج..كل الاوراق وكل التقارير في الشنط..ما نسيت شي.

.((سرحت شوي))سلمى..تتوقعين سالم بيتغلب على المرض

سلمى::ان شالله يالغاليه..دامج وياه قلبه بيقوى..وبيصير احسن عن قبل.. وان شالله يمشي بالعلاج.. ويتعالج..

فاطمه وكأنها حزنانه::والله اني خايفه..رغم شكلي الواثق.. وكل شي..بس والله مترووعه من داخلي..

سلمى وهي لاويه على اختها::افا عليج يالغاليه..كلنا وياج.. وسالم ان شالله يتعالج وبيردلنا احسن عن قبل...

فاطمه::ان شالله..

اما في الصاله بوسيف يوصي ولد اخوه على بنته .. وعلى عمره..

بوسيف::ياولدي هالله هالله بفاطمه.. ما اوصيك..

سالم::افا يا عمي..فاطمه عيوني اللي اشوف بها..انا اموت ولا اشوف فطامي تشكي من شي..

ام سيف::يا وليدي احنا ندريبك تغلي فطامي..لكنا لازم نحاتيها ..هاي بلاد غربه..

سالم::ما بتتغرب وهي وياي يا عمتي..

بوسيف::وما اوصيك يالغالي.. طمنا عليك.. وكيف العلاج وياك..لا تقطعوونا..

سالم::ان شالله يا عمي..

وعقب السلام والموادع..وميره اللي حزنت على اختها.. والكل كان نفس حالها..ويمكن اللي كان حالها ما يسر..ام سيف..لانها كانت

تغلي بنتها فاطمه وااايد..

وعقبها مروّا على بيت بوسالم...

الكل كان حزين.. والبيت كساه الهم وهم يودعون بجرهم.. واغلى ناسهم..

شيخه كانت تصيح..على فراق ربيعتها وحبيبه دربها..واخوها اللي سافر يتعالج وما يعرفون شو مصيره..

وام سالم اللي صاحت على ولدها..محد يلومها..ظناها وحشاها سالم..عقب الغربه والسنين اللي عاشها بعيد عن اهله وناسه كتب له

رب العالمين انه يتغرب مره ثانيه ويذوق طعم الغربه..بس هالمره غربته.. ما ينعرف لها.. بيرجع منها.. والا لا...

عقب هالمواقف الصعبه والموادع راح سالم وفاطمه المطار .. وكان وياهم سلمى ومحمد..لان محمد اللي بيوصلهم المطار..في الدرب

اتصل حمد بسالم..

حمد::سلام عليك بوغنيم..شحالك اليومها وين انته؟

سالم::وعليكم السلام والرحمه..هلا والله بوشهاب.. الحين طالعين من دار الزين سايرين المطار...انته وينك؟؟السموحه ما رديت عليك

مساعه كنت عند الاهل.. تعرف نسلم وجي..

حمد::الله يعينك يالغالي..انا جريب مطار بوظبي..بلاقيك هناك..ابغي اشوفك يالغالي واسلم عليك..

سالم حس بصوت حمد انه حزين من فراقه.::خلاص يالغالي..القاك هناك..

عقب مسافه الدرب..وصلوا المطار..فاطمه وسلمى تجدمن شوي..لانه حمد وياه كمن واحد..يوّا يسلمون على سالم ..

ارتبشوا الشباب في سلامهم.. وكل واحد سلم على سالم.. اما حمد..لوى على سالم.. وحضنه من الخاطر..شهّقوا منه.. كان منظرهم

يكسر الخاطر..حمد كان وايد وايد يحب سالم ويغليه..وهو عاش مرض سالم قبل لا يعيشه سالم ويحس به..

حمد::ما اوصيك يالغالي..طمنا عليك..دخيلك..

سالم ونزلت دموعه بعد ما شاف دموع حمد::ان شالله.. وانته ما اوصيك على عمرك..هالله هالله بعمرك...والسموحه منك يالغالي..

حمد::بالحل فديتك بالحل..

وبجذه افترق سالم وحمد.. وسار سالم خذ مرته وكمل الاجراءات.. وعقبها سلموا على سلمى ومحمد.. وتوكلوا على الله...وطارت بهم

الطياره..وبجذي بدت رحله علاج سالم..

بعد يومين

ميره يالسه في الصاله وياها شيخه بنت عمها.. ويتابعن فلم.. ومندمجات فيه..

شوي ويسمعن تيلفون البيت يرن...قامت ميره وهي تتأفف لانهم خربوا عليها اندماجها...

ميره::الووو...

شيخه كانت عينها على ميره اللي تحولت نظرتها من العصبيه للفرحه..حتى دموعها خانتها وذرفتها من الوناسه والفرحه..

ميره::فديت هالصوت وراعيته...شحالج انتي؟؟احنا بخير ونعمه..

شيخه تجدمت من ميره..لانها بدت تعرف المتصل..

ميره::شحال سالم؟؟وشو علاجه؟

فاطمه::الحمد لله احنا بخير .. وسالم باجر جلسته الاولى من العلاج..الا بتخبرج وينها امايه؟؟منو وياج انتي؟؟

ميره::امايه محد سارت بيت ام علي..ومحد وياي غير شيخه..((وتشوف شيخه اللي تاشر لها تبا السماعه))هذي ها تبا ترمسج..

شيخه::فدييييييييت هالصوت وراعيته..فديت بحبيبتي ومرت اخوي..شحالج الغلا؟؟

فاطمه::الحمد لله فديتج..انتي شحالج؟؟ وشحال بيت عمي؟عساهم بخير..؟؟

شيخه::كلهم امره بخير ما تنقصهم غير شوفتكم يالغاليه..

فاطمه::شواخ ما اوصيج على سلامي ..فديتها والله تولهت عليها..

شيخه::افا عليج بس..انتي ما اوصيج على اخوي..

فاطمه تصد صوب سالم اللي ما خلى ايدها من بدايه الاتصال ويمسح دموعها ::سالم في عيني يا شيخه.

شيخه::خلاص ما بنطول عليج..سلمي على سالم..

فاطمه::يوصل ان شالله وهو بعد يسلم عليج.. وردي السلام على الاهل..خلاف برد اتصل بكم..

شيخه::مع السلامه.. وطمنونا عليكم..

فاطمه::ان شالله..مع السلامه..

 

[فرحه عمري]

يـالـيـت الـتـكـمـلـه

لان حـدهـا الاحـداث رووعـه

الـلـه يـعـطـيـج الـعـافـيـه

تـحـيـاتـي
فـرحـه عـمـري​

 

[ضوى العيون]

الله يسلمج ويعافيه يارب

 

[ضوى العيون]

الجزء الاثنان والاربعين::


بعد 3 شهور...

سلمى داشه بيت ابوها.. وهي فرحاااانه...

سلمى تزاقر::امااايه..ميرووووه... وينكم ؟؟

ام سيف ويايه من المطبخ::بسم الله عليج...شو مستوي؟؟شو بلاج تزاعجين؟؟

سلمى وتسير صوب امها وتبوسها عراسها.. وتلوي عليها..

سلمى::بعد 7 شهور..ان شالله..بنتج بتستوي ..ماما...

ام سيف وهي فرحااانه::فديييييت بنتي انا..مبروووك يالغاليه مبروووك... ((وهي لاويه عليها)) عساني افرح في اختج مثل ما فرحت
بج..

سلمى::آمين يالغاليه..الا بتخبرج..ما اتصلت بكم

ام سيف::لا فديتها..من يومين ما اتصلت بنا..ما اعرف شحالها وشخبارها..

سلمى وهي ميوده موبايلها::تعالي.. تعالي باتصل بها.. وببشرها..

سلمى وهي تتريا رد فاطمه عليها::الووو

فاطمه::هلا والله.. مرحبا..

سلمى::مراحب مليووون..شحالج يالغاليه؟؟شو علومج؟

فاطمه::الحمد لله طيبه.. بصحه وسلامه..

سلمى::وينكم انتوا ؟قطعتونا..

فاطمه::ههههههه موجودين..والله الجو حلو هني...بس جو البلاد طعمه غير..تولهت على دار زايد الله يرحمه..

سلمى::فديتج يالغاليه...فطوووم عندي لج خبر بمليووون..

فاطمه::ما ابغي المليون..ابغي الخبر..يالله بسرعه..شو هو ؟؟

سلمى::عقب 7 شهور ان شالله.. وان الله راد وكتب...بتستوين خالووه فاطمه..

فاطمه::والله؟؟يالدبه مبروووك..يالخاينه يالخاينه..ما ترومين تترين يعني؟؟

سلمى::هههههههه...شحال سالم؟؟

فاطمه وهي صاده صوب سالم اللي يالس يلاعب اليهال في الحديقه::الحمد لله بخير.. نفسيته تغيرت للاحسن.. ويتعاطى ويا العلاج

احسن عن قبل..بس قلبه اللي ما يقدر..(وسكتت)

سلمى::لا لا ان شالله بيروم عالعلاج..بس انتوا تمسكوا بالله .. واصبروا..

فاطمه::ان شالله..يالله عاد انا ما ابغي اطول عليج واخسّرج..عقب بيلس ريلج يذلنا...

سلمى::هييه..ترووميله انتي ريلي..لا خلاني الرب منه..بيتخبل لو درى عن حملي..ههههه

فاطمه::بعدج ما خبرتيه؟؟

سلمى::لا بعدني بخبره عقب الغدا..يوم بنكون رواحنا..

فاطمه::ههههه يا حبج انتي حق هالحركات..يالله انزين سلمي على الاهل.. وامايه حبيها عراسها..ترا والله تولهت عليها واايد..

سلمى::يبلغ ان شالله.. وهي بعد سلمت عليج..

فاطمه::مع السلامه..

سلمى::في امان الله..

من سكرت فاطمه عن اختها..ردت مكانها على الكرسي حذال البحيره.. وعينها على ريلها وحبيبها..سالم اللي صار ما يخلي فرصه

يستانس فيها.. ويفرح فاطمه فيها.. كان يحسسها بحبه وحنانه.. وشوقه لها حتى لو كانت في حضنه.. عيشها في حب رووعه..ما

كانت تشكي من شي.. يلبي كل رغباتها.. بس المشكله.. ان قلبه صار ضعيف وما يتجاوب مع العلاج..اليوم يلسوا ويا الدكتور..وشرح

لهم وضع سالم..واللي شجعهم..عزيمه سالم وثباته في العلاج.. وها طبعا بفضل مرته فاطمه..اللي وقفت وياه في كل لحظه تمر

عليهم.. كانت رحله علاج سالم..مثل الامتحان لحبهم.. وبالفعل الاثنين فازوا بهالامتحان وبكل جداره.. فاطمه وقفت ويا ريلها موقف

الحرمه المحبه لريلها وتشد من عزيمته في محنته..وسالم كان يعوض عليها بحبه.. وكرمه وياها في الحب..



عليم الله من شفتك وانا ما دمعت لي عين
اطير من الفرح وانسج مشاعركلها الحان

اعيش لحاظري وامسي..اعوض بالفرح فرحين
بعد ما كانت ايامي تعاند قسوه الحرمان

نعم انته الذي اهوى نعم يا بارق الخدين
تزلزل كل شي فيني برمش عيونك الفتان

تبدل خافقي بحبك وزانت دنيتي ضعفين
وصرت الكاتب الشاعر وصرت العاشق الفنان

انا هايم هيامٍ فيك يشهد له ليوم الدين
تصور كل ما اشوفك احس اني بعد ولهان

أسابق حالي لحالي عساي ارضى عيونك زين
واكون لدنيتك شمسٍ واكون لخافقك شريان

احبك يا شعاع الشمس واجمل ما رأته العين
احبك حيل يالغالي فدتك الروح والاشجان

انا جيتك وانا كلي احاسيس ومشاعر لين
تداعب مهجتي وتغرس ورودك داخل الوجدان

انا جيتك انا جيتك وكلي غرام سنين
ولا افكّر باحد غيرك ولا غيرك احب انسان


لحظات عاشوها في هالشهور..خلتهم يتعلقون في بعضهم اكثر واكثر..حبهم تعدى كل شي..حب ماله مثيل في زمننا.. حب انغرس في
قلووبهم..وثبتوا عليه رغم المواقف والمحن اللي يمرون فيها..الا انه كل واحد يعوض على الثاني.. ويحسسه بالحب مهما صار..

خلوونا نسير شوي بيت بوعلي ::


علي يدق على امه في غرفتها..

ام علي::ادخل ..

علي وهو يوايج ::الغاليه راقده؟؟

ام علي::لا لا فديتك..تعال ادخل..

علي::السموحه يالغاليه جاني غثيتج..بس في موضوع وابغي افتحه وياج..

ام علي وتعدل من يلستها::آمر يا ولدي..

علي وهو متلوم من امه::امايه..انا فكرت وايد قبل لا اييج.. وانتي تعرفين اني كنت اتهرب من هالسالفه..بس ما اقدر ارد لج طلب..

ام علي تتبسم..لانها بدت تعرف مغزى ولدها..

ام علي::بشو فكرت؟؟

علي::بالنسبه لموضوع بنت بوسيف..انا اشوف..انج ترمسن اهلها.. عسب اتقدم لبنتهم..

ام علي::هالساعه المباركه ياوليدي.. ومثل ما قلت لك عنها..انا ماابغي هالبنت الا لك..من اللي شفته..تراها بنت والنعم فيها..ذربه
وتعرف الاصول..

علي::خلاص يالغاليه..بس انتي متى بتسيرين لهم؟؟

ام علي::باتصل في ام سيف..عسب اسير لها عقب المغرب..شو رايك؟

علي::اللي تشوفينه..

ام علي::بارك الله فيك..واشوف عيالك وافرح بهم...قبل لا افارق هالدنيا

علي::فديتج يالغاليه..بعد عمر طويل..يالله انا بترخص وبرد قبل المغرب..

ام علي:: برايك فديتك..وهالله هالله بعمرك..


علي خلاص فكر بالاستقرار..ونسى الحب وايامه..فكر انه يكون اسره تخصه..وعايله يملكها.. والحب بيحصله من مرته وشريكه

حياته..علي كان وايد يسأل عن ميره من اخته شهد اللي بدت تتعرف عليهم..وبعد من امه..والبنت دشت خاطره..بس ما تعلق بها..عسب

ما ينصدم فيها لا سمح الله..

خلاص علي صار واقعي اكثر..والحب صار عنده شي بيلقاه في شريكه حياته بس..

ها كان حال علي..علي اللي انصدم في الحب.. صار يقدر يتحمل صدماته..الله يوفقك يا علي ويهنيك بميره..


مالقيت اللي بيفهم مقصدي
وانجبرت ابعد وانا قلبي جريح

يحسبون اني عليهم معتدي
لا حشى والله هذا مب صحيح

الصحيح اني حبيبٍ مبتدي
ما عرفت اجامل وطبعي صريح

كنه الحظ اختلف مع موعدي
ما وفاني يوم قلبي به مريح

يشتكي كل الجسد من مرقدي
تاعبن حاله وغيره مستريح

افعلي المعروف وقلبي اسعدي
وداويه دام القلب توه جريح


وبالفعل بعد المغرب سارت امه صوب بيت بوسيف.. وطلبت ايد ميره لولدها علي..ام سيف رحبت فيهم.. وقالت لها الشور الاول والاخير

للبنت وابوها..وقالت انهم بيردون عليهم جريب..

وبجذه ام علي ارتاحت منهم ...دام ام سيف موافقه على ولدها..معناته ان البنت بتوافق..وان شالله خير..

 

[ضوى العيون]

الجزء الثالث والاربعين::

بعد مرور شهور..تغيرت وايد اشيا في حياه ابطال القصه..

اول شي بنبدا..بحمد والعنود..ام حمد وافقت على خطبه العنود لحمد..واملجوا ..وبجذه صارت العنود حرمه حمد ..واتفقوا ان عرسهم
عقب شهرين..اما سلمى..فربت ويابت بنوته حلوه..وسموها فاطمه...اول شي لان اسم ام سالم (فاطمه) ولشده حب سلمى لاختها

الغاليه..سمت بنتها على اسمها...علاقه سلمى بمحمد صارت وايد قويه.. وحبهم كبر مع الايام وبوجود فطامي الصغيره..اللي فرحوو

بها وايد وصارت تملي حياتهم..الحلوه.

و ميره اللي تخرجت من الثنويه بمعدل وايد حلو.. ورفعت راس اهلها بالنسبه.. وصارت ملجه علي على ميره جريبه..علي صار مغرم

بميره اللي خلاص بتصير من نصيبه وحلاله.. وقدر انه يمسح كل ذكرى يديمه في باله.. ويعيش هالواقع اللي انرسم له..وصارت ملجته

وبيت الزوجيه شغله الشاغل..لان مثل ما تعرفون علي هو راعي البيت ..فقرر ان يبني له ملحق في بيتهم..عسب يكون جريب من اخته

وامه..

اما سالم...آآآه ياسالم..هالانسان اللي ما نفع ويا علاج.. ولا ادويه..علاجه الوحيد كانت فاطمه اللي ملت حياته..وصارت الدواء والشفا

لمرضه..مرت عليهم شهوور.. وهم في بلاد غربه..فاطمه حملت ويابت لسالم ولد.. ولغلاة سالم عندها سمته سالم..صح ان سالم عارض

من البدايه لانه بغا يسمي ولده عبدالله..لكن اصرار فاطمه..هزمه..وخلاها تسمي الولد باسمه..فاطمه رغم بعدها عن امها واهلها..قدرت

بوجود سالم تتغلب على آلام الولاده وتحملت وصبرت..بس عسب ما يحس سالم بانه ابعدها عن اهلها وتعبها..

وكانوا كل يوم تقريبا يتصلون البلاد ويطمنون الجميع عليهم..وحمد بعد كان يتصل بسالم ويتطمن عليه..بعد ما كمل سالم الصغير شهره
الاول..راجعوا المستشفى..لانهم طلبوا من سالم مراجعتهم...

سالم بعد ما ردّ ويا مرته وولده من المستشفى::خلاص حبيبتي..احنا بنرد البلاد على اقرب طياره ..

فاطمه::بس يالغالي..ليش ما تكمل العلاج.. وان شالله رب العباد ما بيخلينا..

سالم::حياتي فطاامي.. اعرف انج ما تبيني اوقف عن العلاج..بس حبيبتي..انا ما ابغي اموت الا في بلادي..وعند اهلي..

فاطمه ودموعها غزت عيونها اللي تموت فهالانسان اللي وياها::يا اغلى من رووحي عليه..بعطيك قلبي..بعطيك رووحي.. بس دخيييلك

ما ابغي اسمع منك هالكلام..

سالم ويمسح على راس مرته::فديييييت قلبج.. ياعمري ..انا اخذت قلبج وملكته من زمان... والا نسيتي؟؟((وهو يبتسم))

فاطمه وهي تبتسم وتحط راسها على صدر سالم::لا لا ما نسيت...انسى العالم كله.. ولا انسى الحرامي اللي سرق قلبي من ضلووعه..

سالم وهو ياخذ مرته ويمشي ::ليكون بترفعين عليه قضيه؟؟

فاطمه:: هيه.. وبتحاكمك محكمه الحب بسجن مؤبد في عيوووني.. يا عيووني..

سالم::فديت هالمنطوووق..لا خلاني الرب منج..

فاطمه:: ولا منك يا حبيب عمري..

سالم يلّس فاطمه حذاله على الغنفه وحط راسها على صدره.. كان مرتاااح يوم يحس بغلاه حذال قلبه..

سالم::فاطمه...شكثر تحبيني؟؟

فاطمه::اكثر واكثر مما تتصور..انته اغلى حب عرفته في هالكون كله..

سالم::فاطمه تعرفين اني كنت احبج من يوم واحنا يهال.. سافرت وتغربت وانتي في بالي.. كنت اخاف انج تصيرين لغيري..لان شيخه

كانت دايما يوم تكلمني تقولي انج كبرتي.. واحلويتي..ويوم عرفت ان محمد خطب سلمى..زادني خوف انج ممكن توافقين على

غيري..واول ما حصلت فرصه.. رمست الوالده عسب تخطبج لي..

فاطمه وهي تلعب بشعر ريلها اللي كان محطي راسه على ريلها::ههههههه.. واتخيل اني ما وافقت عليك.؟؟

سالم::كنت ما بتزوج طوول عمري.. وبعكر حياتج.. واول واحد ما يوافق على زواجج من غيري.. انتي بنت عمي.. وانا اولى بج..

فاطمه::فديييت روووحك..تعرف يا سالم..انا عقب ما خطبتني..حسيت اني ملكت العالم بكبره..حسيت اني كنت احبك من زمااان..بس هب

حاسه فيه..الا بعد خطووبتي لك..

سالم::اول ما شفتج..يوم رديت البلاد.. كنتي حلوه بين ايدي وخااايفه..هههههه منو تحريتيني؟؟

فاطمه وهي متلومه::كنت اتحراك كااسبر..هههههه...لا كنت اتحراك عمي او حد فتلومت..لكن يوم قلت لي انك سالم..صدق استحيت

وتلومت وما عرفت شو اسوي..كنت ابا الارض تنشق وتبلعني..

سالم::هههه يالله لها الكثر انا ازيّغ شوو؟؟

فاطمه::هههههه..لا بس استحيت انه ولد عمي الكبير.. يشوفني ببجامه النوم..وبدون شيله بعد...

سالم وهو يشوف مرته بنظره حب::عادي حبيبي..لانج في يوم صرتي مرت وحلال ولد عمج..اشووفج كيف ما ابغي..

فاطمه::هههه هييه الحين حلالك...مممم انته خبرني شكثر تحبني؟؟

سالم::لو قلت كثر البحر..اجذب..ولو قلت كثر الصحرا..شويه..حبي لج ماله تعداد ولا حدود...حبي لج من ولادتي.. وبيتم حتى وانا تحت

التراب مدفون...اصلا لو مات جسمي.. روحي بتم ساكنه حناياج.. ما بخليج..مهما صار..وغلبني الموت..

فاطمه::بسم الله عليك من طاري الموت..لها الكثر تحبني ياسالم؟؟

سالم::وايد وايد يا فاطمه..انتي اكثر شي في هالدنيا حبيته..انتي حبي وجنوني..لو تعرفين شكثر احبج بتتخبلين.. الحب ما كان حب

الا بوجودج..فاطمه...يالغاليه بوصيج على شي..

 

[ضوى العيون]

فاطمه::انته تامر يالغالي...آآمرني..

سالم::لو خذني الموت منج.. وصرت في التراب مخزوون.. ابغي منج..تربين ولدنا خير تربيه..وابغيج تعلمينه..الحب ومعناه..وابغيج

يالغاليه..تكملين دربج..انتي بعدج صغيره.. وحلوه.. واعرف ان واايد يبوونج..اذا حد تقدم لج..لا ترفضينه((قالها وصوته مبين عليه
الضيق))

فاطمه ناظرته بنظره..خلته ينزل عيونه عنها..كأنها عاقبته بهالنظره..

فاطمه::توني كنت مصدقه انك تحبني..اما الحين.. ما احس بها الاحساس..

سالم::حبي لج خلاني اقوول جي..

فاطمه::بس اللي احيده اللي يحب..يغار على حبيبه.. وما يباه يصير لغيره..

قربها سالم لصدره ومسح عشعرها اللي ذااب فيه سالم من اول نظره له::فاطمه..انا اخاف عليج من هالزمن وبلاويه..انتي الحين أم

شابه في بدايه حياتها..وما عندج ريال يحميج..انا ما بدوم لج...

حضنته فاطمه اكثر..كانها تقووله انها ما بتتنازل عنه للمرض::انا لك وبتم طوول عمري لك.. وما بربي ولدنا الا وياك...

سالم::فديييتج يالغاليه..ليتني ما اذوق حزنج..((وبكت عينه))

ماتت فاطمه من حزنها يوم شافت دموع سالم..دموع اغلى ناسها واغلى احبابها..مسحت دموعه وباسته على دموعه اللي يسكبها

فاطمه::فديت دموعك يالغالي.. دخيلك لا تذرفها..اخافك تذرفني وياها..

ابتسم سالم وهو يحس بفاطمه تمسح دموعه::ما تطلعين من عيني لو الموت يا فاطمه..

وحضنها اقوى احضاااانه...


دايم تكررسؤالك..وش تعني لي؟؟
واجابتي لك حبيبي مثل ما اعنيلك

ان كان بالحب والاخلاص توفي لي..
اوعدك ما اضيّع الاخلاص واوفي لك

وان كان قلبك بكل الحب صافي لي
قلبي من سنين بالاشواق صافي لك..

اسأل عيوني وخدّيني ومنديلي
واسأل خفوقي وكم بالليل يسري لك

يا فرحتي يا غناتي يا قمر ليلي
سبحان من صوّرك واحسن بتجميلك

سالم عن جد حب فاطمه حب ..ما انعرف في زماننا..ولو كان موجود تراه نادر.. هالانسان اللي صار له الموت امر محتوم .. خلاص ما فيه

حيله.. وهو بعده يفكر بفاطمه.. وشو بيكون مصيرها في بعده..طاحت دموعه اللي ما كان يذرفها الا نادر ولأقوى اسبابه.. ويا ترى

شو الاقوى عن فراق فاطمه ؟؟ وهو يعرف ان فاطمه صارت تحبه حب يمكن اكثر واكبر عن حبه لها...ومن غير ان صار لهم ولد..هالولد

شو ذنبه ان يعيش بدون ما يعرف او يشوف ابوه؟؟..كل هالافكار والامور كانت تخلي الصخر يبكي..فكيف قلب سالم الطيب والحنون...

 

[ضوى العيون]

الجزء الاربع والاربعين::

عقب شهر بالضبط..

خلاص قرروا سالم وفاطمه يردون البلاد..طبعا بعد اصرار سالم على موقفه..والدكاتره اتفقوا على

راي واحد..مهما تم سالم بالعلاج..ترا مصيره وااحد..عمر سالم بدا يقصر.. والوقت بدى ينقص من عمر سالم..لان العلاج ما بيفيد

وياه..وبجذه قرر سالم انه يرد البلاد ويا مرته وولده..عسب يعيش باقي ايامه بين اهله وفي بلاده.. ويموت بينهم..

في بيت بوسيف...


ميره::امااايه..تعالي شوفي سواااف...

سلمى اللي طلعت من المطبخ::يا ربيه بلاكم انتوا تتناجروون؟؟

سواف::هاي اختج الغلسه..ما تخليني الاعب فطاامي...

ميره::اصلا هي ما تحبك انته..شوفها فديتها..تباني ...فطااامي حبيبي(تقوولها بكل رقه)

سلمى::يا ربيه منكم انتوا..عنبووكم ما ايي بيت امايه الا تتضاربون..هاتها هاتها بنتي (وهي تاخذ فاطمه الصغيره من ايد اخوها)

سواف وهو يشوف ميره بكل حقد::كله منج يالغياااره...

وشوي يسمعون صوت من وراهم..اشتاااقت له اسمااعهم:: وانا محد يباني ويتضارب عشاني...

الكل صد صوب الصوت اللي محد توقعه... وكانت مفاجأتهم.. فاطمه ...

سلمى تربع على اختها وتلوي عليها::فديييييييت هالويه.. فديت اللي اباها..انا بضارب عشانج..

وميره بعد لوت على اختها.. وباستها..صدق تولهوا عليها..صارت في غربتها سنه و3 شهوور..بدون ما يشوفونها...

فاطمه ودموعها اللي خانتها من شافت لمة خواتها..وصدت على اخوها اللي تم متيمّد في مكانه من المفاجأه..هب مصدق...وتجدمت
منه.. وبدون ما يحس سيف الا هو حاضننها...

سيف::فديتج يالغاليه.. كلنا نباج.. والله البيت من دونج ما ينطاق..

فاطمه::فديتكم يا اخواني ..لا خلاني الرب منكم ان شالله...

سالم من بعيد::هووود يا اهل البيت...

سلمى::يالفضيحه.. مخليه الريال برع((وبصوت عالي)) اهدا ...حياك يا سالم حياك الله..

دخل سالم وبيده ولده ..وكلهم كانوا فرحانين.. تجدمت سلمى وسلمت عليه وخذت سالم الصغير في حضنها.. ولد اختها واول مره

تشوفه...سيف تجدم من ولد عمه و وايهه.. وميره سلمت على سالم..ويلسوا كلهم في الصاله..ياخذون علوم واخبار سالم وفاطمه..
سلمى طوول الوقت وهي عينها على اختها.. اللي من الخاطر متولهه عليها.. ومتفااجأه وفرحاااااااانه من هالمفاجأه الحلوه..

فاطمه وفي حضنها بنت سلمى::فديييتها.. وايد تشبه امها.. فديت فطاامي الحلوه..

سالم::هاتيها هاتيها.. لالا ..تشبه ابوها... الا سلمى ما قلتيلي...محمد وينه؟؟

سلمى::محمد عقب شوي بيي.. ماخذ امايه المستشفى ويا عمتي..

فاطمه وهي مترووعه::بلاها امايه.؟؟

سلمى:: ما فيها شي..بس سايرين عشان وحده من الحريم مربيه.. ويتحمدولها بالسلامه..بس..

فاطمه::الحمد لله عبالي فيهن شي..

وشوي يسمعون صوت من بعيد..

ام سيف::لا لا يا ام سالم..تتغدين عندي اليوم..

ام سالم::ما فيني على حنه بو سالم..بيرد البيت منو بيحط له الغدا..؟؟

ام سيف::ماشالله شيخه واختها موجودات..ليش بعد تردين..؟؟

ام سالم::انتي مووول..عنيده...السلام عليــ....((وسكتت من صدمتها يوم شافت ولدها وضناها في الصاله..

سالم قام من مكانه وعطى البنت لامها::وعليكم السلام ورحمه الله... هلا بالغاليه..

ام سالم وهي لاويه على ضناها.. ودموعها على خدودها:: فديييييت هالويه.. من متى انته هني؟؟ متى رديت.. فديييييت نصخك يا

وليدي..

سالم وخنقته الغبنه من حال امه::احنا تونا وصلنا البيت.. من ردينا المطار ويينا بيت عمي..

اما ام سيف.. دموعها طااحت من شافت اغلى البشر عندها.. بنتها وغلاها فاطمه..قامت فاطمه من مكانها.. ولوت على امها..

فاطمه::فديتج يالغاليه وفديت ريحتج الغاليه.. والله والله تولهت على حضنج يا امايه..

ام سيف::لا خلاني الرب من شوفج فديتج..ليتني ما انحرم منج.. انا اللي اشتاقت عيوني لشوفج.. وصدري لحضنج يا بنيتي..

ها كان لقاء ام سيف وام سالم بعيالهم اللي انجبرت ظرووفهم تبعدهم عن عيونهم.. ها قلب الام.. وخوفه على ضناه.. كانت هالصوره

اللي بكت كل من كان في الصاله.. ام سالم صدق كانت رمز للأم الحنون .. اللي تخاف على ضناها.. وأم سيف بعد.. رمز للأم النصوح..

فاطمه خذت من أمها حسن تدبيرها.. وحسن تصرفها.. وكل الأخلاق ..

عقب هالأستقبال.. وهاي الدموع اللي تبين وله كل واحد فيهم للثاني...أم سالم فرحت من شافت سالم الصغير.. ماشالله عليه واايد

يشبه ابوه.. في خشمه وعيوونه.. اما حواجبه وشفايفه.. ورمووشه الغليظه خذها من أمه.. يعني ما شالله عليه.. قمر..حليو رغم صغر
سنه..

أم سيف::بسج يا أم سالم.. مصعتي الولد.. عطيني إياه أبا أكحل عيوني بشوف ولد بنتي الغاليه..

أم سالم::هههههه الحين أنا مصعته.. ها الضنا يا الغاليه.. لا تلوميني..ها أندووج ..بسم الله عليه..

أم سيف وهي تاخذ سالم في حضنها::بسم الله ..بسم الله.. فديت هالقمر.. ما شالله عليه..

سالم وفاطمه فرحاانين.. كانهم غابوا عن هاي اللمه سنين ودهوور...

سالم::سلمى..وينه ريلج؟؟

سلمى وهي ميوده موبايلها بتتصل في ريلها::الحين بشوفه وين..

أم سالم::توه كان ويانا..بس ما ادري به وين سار؟؟

سلمى::الوو..هلا الغالي.. وين إنته ؟.....هيه.. يعني مشغوول؟؟......انزين تعال عدنا لك مفاجأه حلوه في بيتنا.. هيه بيت أبويه..

تعال بسرعه..

وعقب ما سكرت عن ريلها.. هو ويا واحد من ربعه..جريب والحين بيرد...

عقب عشر دقايق..محمد صوته من بعيد::هووود يا أهل البيت..

أم سيف::هدا يالغالي.. اقرب ما عدنا غريب..

محمد وهو يحدر الصاله::السلام عليكم ورحمه الله...

وحط عينه على سالم اللي وقف من شاف أخوه..محمد بعده مصدوم وسالم تجدم منه عسب يسلم على أخوه ويتوايهون..

محمد وهو متنووومس من الخاطر::من متى إنتوا هنييه؟؟ يالخاين.. إنزين على الأقل خبرني...

سالم:: لو خبرتك بعد كيف بتستوي مفاجأه؟؟

محمد::إنزين يالدب.. أقولك متى بتردون تقولي مطولين هاااا (ويصد صوب مرت أخوه اللي تجدمت منه تسلم عليه) عاد إنتي بالذات

يا مرت أخوي ما بسامحج..كيف تسمعين شوره..؟

فاطمه::هههههه.. ما عليه قلنا نسويها لكم مفاجأه ونفرحكم بردتنا..

وتموا يسولفون ونسوا الوقت اللي مر بهم بسرعه بدون ما يحسون به..

 

[ضوى العيون]

الجزء الخامس والاربعون::



عقب يلستهم وصل بوسيف البيت وشراتهم تفاجأ بوجود بنته وريلها .. وفرح يوم شااف سالم الصغيير..

وعقب ما تغدوا في بيت بو سيف ..سار سالم ومرته و ولده.. وسلمى وريلها وبنتها.. وأم سالم .. صوب العين..

وهناك كانت فرحتهم كبيييييييييره.. خصه شيخه اللي كانت كعادتها مجابله التلفزيون..وإنصدمت من شافت أخوها وحبيبه قلبها
فاطمه يدخلون عليها الصاله.. استااانست..ودموعها كالعاده اسبقت كلماتها..وشذى كانت موجوده وقتها.. وفرحت بردة أخوها من

السفر.. أما مريم ..اللي تعلقت بولد أخوها.. الصغييييير...

سالم::شيخووووه..عاد عطي الولد لامه.. وخلينا نرتاح.. ترانا مووول تعبانين..

مريم::حرام عليك سالم خله عدنا.. ما شبعنا منه..

سالم::ليش هو غوزي يشبعكم؟؟

فاطمه::بسم الله على ولدي..

سالم::ههههههه.. شفتوا هاي من كلمه تخاف عليه.. تبونها تخليه لكم؟

مريم::لا لا خلوووه عدنا.. بنهتم فيه.. انتوا سيروا ارتاحوا الحين..

محمد::خلوه الولد عند امه.. عافانا الله عليكن.. لزقه..

شيخه::انته خلك ويا بنتك.. ما نباها..

سلمى::فديت بنيتي...بلاها؟؟انا اباها فديتها..

سالم::ههههه.. الحين بتشن الحرب والسبب ولدي..

فاطمه::هههههههه.. فديته سحر قلوبهم بجماله..

شذى::خلاص فطاام.. خليه هني . وانا بنفسي باهتم فيه..سيروا ارتاحوا انتوا..

سالم وهو يشوف مرته اللي كانت تتطالعه::بلاج؟؟هاي شذى عادي خليه عندها.. اثق فيها ..

شيخه ومريم::يا سلام.. اشمعنا؟؟

سالم وهو ميود مرته فاطمه ورايحين صوب جناحهم::ما عليج منهم حبيبتي..بنسير نرتاح((وهو يأشر لهم بحركه تغيضهم))

نروح شوي غرفه محمد وسلمى..

محمد:: والله ما اعرف سلامي...التقارير تبين انه سالم ما ينفع وياه العلاج.. وايامه صارت شبه معدومه..

سلمى::لا تقول جيه..والادويه؟؟تعتقد انها ما بتكون ذات فايده؟؟

محمد::اصلا الادويه صار مالها لزمه غير انها تسكن آلامه..لكن العلاج مستحيييييل ما منه فايده... الا بمعجزه من رب العالمين... والله

القادر على كل شي..

سلمى:: والنعم بالله..بس انته ما فكرت بمصير اختي فاطمه؟؟و ولده سالم.. شو ذنبه يعيش بلا أبو ؟؟

محمد::أفا عليج غناتي.. إحنا موجودين.. وفاطمه ما بتحس بالغربه دامها في بيت عمها.. وبتم عزيزه مكرمه..و ولدهم ترا ولدنا.. ولد
أخوي كانه ولدي..

سلمى وراسها على صدر اخوها::فدييتك حبيبي... عساني ما انحرم منك..ويومي قبل يومك..

محمد::لا بسم الله عليج يالغاليه..لا تقولين جي.. انتي روحي وقلبي واغلى ما املك..

سلمى::اللي صار لاخوك واختي الغاليه..خلاني اتمسك فيك وبحبك اكثر.. واطلب رضاك يا بعد كل اهلي و ناسي..

محمد::فدييتج يا سلامي وفديت قلبج الطيب..

والله ما اسيبك واخليك
واعيش في كوني بلياك

ابيع هذا الكون واشريك
يا من سلبت القلب وياك

خلك مع خلٍ بالحل يغليك
وبين البشر ما حد يسواك

ازعل جميع الناس وارضيك
وامشي انا لو حافي وراك

تدري انا احبك واداريك
وعهدٍ قطعته مول منساك

هذا حال البيت من اول يوم لوصول سالم له.. الكل فرحان ومستانس انه ردت الحياه لها البيت اللي بعدت مسراته من راح سالم وسافر

عنهم..واليوم يرد وياه روح يديده وهي ولده سالم الصغير.. فرحتهم بقدوومهم فرحه كبيره..وهالفرحه نستهم سبب سفر سالم

بالاساس..ونستهم يسألونه عن نتايج العلاج وفحوصاته..

الا سلمى ومحمد..ما نسوا هالموضوع.. ومحمد اطلع على كل الفحوصات.. وعرف ان سالم ما بقاله شي في دنياه.

 

[ضوى العيون]

عقب يومين...

نش من نومه.. كانه انسان يديد.. منولد توّه.. حس براحه نفسيه..حس بانه انساااان ثااااااااني... ماشي هامنه.. ولا شي شاغل باله..قام

من فراشه ودخل يسبح..

وعقبها ظهر الصاله.. ولقى حبيبته ومرته ويا امه.. و ولده الصغير وياهم..

سالم::صباح الخير..

فاطمه وام سالم::صباااح النور والسرور..

ام سالم::تعال فديتك تريّق ويانا..

فاطمه::عمتي مسوتلك الريوق اللي تحبه..

سالم::فديتها ام الخير..(ويبوس امه عراسها) تعرفين امايه احس اني فرحاان.. ومرتاح.. يا حلاه الواحد اللي ينش ويلقى في صباحه

اغلى ناسه.. امي الغاليه.. وويه الخير عليه.. زوجتي وحبيبتي... وعمري كله ولدي الغالي.. شو ابغي في دنياي اغلى من جي..

عساني ما انحرم منكم... عن جد مرتاااح..

فاطمه::يعلك دوم مرتاح فديتك...

سالم::اممم... انا اليوم بسير امر على ربعي اسلم عليهم.. ما ادري ..حاس اني مشتااق لهم...

ام سالم::اشتاقت لك العافيه فديتك..هيه يا ولدي هب زين ترد من السفر ولا تشوف ربعك..اكيد ما يدرون بك..

سالم::ههههههه.. يحليله بوشهاب.. ما شفناه من ردينا من السفر..

ام سالم::يحليله حمد..مسكين لازم تسلم عليه وتبارك له بملجته...

سالم::هيه عاد معرسنا لازم نبارك له..

وسار عنهم سالم.. صوب ربعه اللي سلم عليهم واحد واحد... وآخر شي.. يلس ويا بوشهاب..

حمد:: والله حرام عليك يالخاين.. انا من امس اتصل فيك.. وتلفوونك كله مغلق.. خوفتني عليك.. وثرك انته في البلاد..

سالم::فديت خشمك انا.. كنت ابغي اسويها لكم مفاجأه..

حمد::مفاجأه يالظالم؟؟ خوفتنا وعقيت قلوبنا من الرووع عليك..وهو بكل بساطه يقول مفاجأه..

سالم::انزين ما علينا.. شحالك انته؟؟وشحال عربانك واهلك...؟؟ والقلب مالك..

حمد::احم احم.. الاهل كلهم بخير ونعمه.. ما يشكون باس..

اما عن القلب .. تراه بالف خير.. من ملجنا وعلاقتنا صارت اقوى واحلى..

سالم::الله يهنيك بحياتك يا اخوي...واتمنى لك كل خير.. والله الزواج احسن شي في هالدنيا..راحه نفسيه .. واستقرار..حب

متبادل..حب محد يقدر يلوومك عليه..

حمد::هيه يا خوي.. والله محد فاهمني.. ومحد مغير حالي غيرك يا خوي...وبعدين تعال خبرني... انته شو صحتك؟؟ وعلى شو

نويت..؟؟

سالم::لا نويت..ولا هم يحزنون.. انا حالي موكلنه لرب العالمين..

حمد:: والنعم بالله.. بس ياخوي هاي صحه.. واللي فيك هب شوي..وعلى كلام الدكتور.. يبالك بس عزيمه واصرار عالعلاج..

سالم::بس يا حمد..عيزت من دكتور لثاني.. ومن مستشفى لغيره.. عيزت.. حتى البلاد ودعتها عسب يخليني هالمرض.. شكله هالمرض
عاشق قلبي وتربع فيه..

حمد:: لكن يا خوي.....

سالم::بس يا بوشهاب.. انا ما ييتك عسب تغثني بهالرمسه.. انا اليوم حاس اني مولوود يديد..حاس بشي حلو ومرتاااح..ابغي اسير لكل

حد اعرفه .. ابغي اشوف الكل.. ابغي استسمح منهم كلهم...

حمد:: الحين اللي يسمعك يقوول مووول محد يدانيك..ياخوي انته الكل يحبك.. واشهد ان محد زعلان والا شال فخاطره عليك..سالم..

انته ياخوي اغلى واحسن ربيع عرفته في هالكوون كله..

سالم::يالله يالله.. عن اصدق عمري...


لو تغيب الشمس .. وجهك لي سراج
برتحل والشوق في قلبي شعيل

وان تكدر خاطري وضاق المزاج
اذكرك ويطيب لي قلبٍ عليل..

يا صديقي صرت لضيقي العلاج
يسعدك ربي يا القلب الاصيل..

 

[ضوى العيون]

الجزء السادس والاربعين::

في بيت بوسيف عقب الغدا..

عقب ما تغدوا الرياييل في الميلس.. يلسوا في الصاله ويا البنات وام سيف.. محد غريب.. وسالم ولدهم..

سالم::تسلم هالايد الطيبه.. مشكووره عمتي على هالغدا الطيب...

ام سيف::الله يسلمك يا وليدي..

ميره::فطامي وعي ولدج.. بسه رقاد.. نبغي نلعب وياه..

بوسيف::خلي.. الولد راقد شتبينه؟؟

ميره:: تراهم بيسيرون وما بنشووفه..

فاطمه::ههههه.. برايها ابويه.. خلها توعيه..بسه رقاد.. فليل ما بيخلينا نرقد من صياحه عقب..

سيف وهو شال سالم بيده::حبووبي.. قووم فديييييت هالخشم..

ميره::هاته .. ما تعرف توعيه..

سالم:: عمي اسمحلي جان غثيتك والا ضايجتك بشي.. تراني ما اقصد...

بو سيف استغرب من كلامه::لا يا وليدي ما شفت منك الا كل خير..

سالم وهو صاد صوب عمته:: وانتي بعد يا عمتي.. اسمحيلي يوم اني خذت فاطمه عنكم..وبعدتها عن عيونج.. واسمحيلي جان غثيتج
في يوم..

ام سيف صدت صوب ريلها عقب ردت على سالم::لا يا وليدي.. هاي مرتك وحلالك.. وقلب الام لازم بيزعل لا بعد عنه ضناه.. لكنها سنه
الحياه..


فاطمه كانت تسمع الكلام اللي يصير حولها.. وسكن قلبها هم كبيييييير وسع هالدنيا كلها ولا درت سبته.. بس هالحزن كان دليل

خوف..غرزياًَ حست بهاشي.. سالم اليوم غريب.. من نش الصبح..لين ما سار عند ربعه.. ولين ما رد البيت.. والحين كلامه..


اما سالم..رغم احساسه بالارتياح..وانه انسان ثاني يديييييييييد.. حس بانه آخر مره يشوف بيت عمه.. ويرتاح من لمتهم..حس بانها آخر

يلساته وياهم...

عقب ما يلسوا وسولفوا..اعتذر لهم سالم.. وقال انهم بيسيرون العين..وبجذه انتهت زيارتهم لبيت بوسيف...

في السياره..

فاطمه وهي خايفه:: سالم..

سالم::عيون وقلب سالم انتي.. آمري يا حياتي كلها..

فاطمه:: لا خلاني الرب منك ياحبيبي...انته بشو حاس؟؟

سالم وهو عارف اللي في قلب فاطمه من خوف::حاس باني مرتاح.. واني مولود من يديد...وحاس باني بمووووووووووت.................
في حبج يا اغلى من روووحي عليه...

فاطمه وهي تضربه بخفيف على ايده::اونك تلعب باعصاابي؟

سالم::هههه..فديتج والله...


حبيبي هدّي اللعبه تراني ما احتمل اكثر
لانك جزء من روحي وعقلي وكل احساسي

انا فرحك انا سعدك لافكارك انا دفتر
احبك لو تعذبني يا شمعه وسط جلاسي

تعال نجدد الماضي تراك في عيني تكبر
حياتي ما بها غيرك في احلامي ومقياسي

كفايه لي جرا منك يا غايتي ما اقدر
ترفّق يا بعد عمري واهلي وقربتي و ناسي


عقب ما وصلوا بيت بوسالم...

كانت الساعه 7 المغرب..

شيخه::يا حيّ الله باغلى اثنين...

سالم::الله يحييج.. شو عندج هنيه في الحوي؟؟

شيخه::يالسه اعابل في ورودي...

فاطمه::اشوفه الورد ذابل.. منج..

سالم::ههههههههه...هيه تصدقين ..يدعي عليها الحين..

شيخه::ماعليه ..امبوني كنت بعطيكم منه تزينون فيه غرفتكم..بس الحين ما بعطيكم .. ولابقطفه عشانكم...

سالم::ها اللي ناقص عسب تستوي الغرفه خليه نحل..

فاطمه عقب ما غمضتها شيخه::حرام عليك.. خلاص شيخه انا باخذ الورد عنج..

شيخه::عقب شو عاد..كله من ريلج..

فاطمه::بلاه ريلي فديييييييييته..

سالم::فديت رووحج يالغاليه..

فاطمه::فديت عمرك..

شيخه:: احم احم.. شكلي بشرد داخل ..

سالم::احسن تسوين..والا اقولج ,,احنا اللي بنسير..عسب ناخذ راحتنا اكثر...

خذ مرته من ايدها.. وهو مار ضرب شيخه عجتفها ضربه خفيفه..عسب تخوز عن دربهم..

شيخه::ما عليه يالدب..